Степанов Анатолий Петрович

Мулэсь гурзэ шӧдӥсь-шудӥсь

Степанов А. П.

Кыӵе ке ужез ӟеч валась, солэсь эсэпсэ шӧдӥсь адями сярысь вашкала удмуртъёс шуылӥзы: удысэзлэсь кылзэ тодэ. Зэм, таӵе адямиосты - Инмарен сётэм кибашлыосты - вамышлы быдэ уд пумита. Но лэсьтэм киужзэс огпол гинэ адӟыса, эсьмаса, быдэс улонэдлы бурдъяськем мылкыд басьтод.

Анатолий Петрович Степанов ӵапак таӵе кибашлыос пӧлысь - горд сюйлэсь, пулэсь кылзэ тодӥсь-шӧдӥсь адями. Аслаз киосыныз пӧрам шуланъёсыныз, шудонъёсыныз но крезьгуран арбериосыныз - пыжкрезеныз, мугуранэныз - со, Удмурт шаерез но Россиез гинэ ӧвӧл, музон кунъёсты но паймытӥз ни. Тӥни кыӵе тунсыко милям удмурт воргоронъёсмы! Ма, учконо ке, Анатолий Петровичлэн быдэс семьяез туж но туж аспӧртэмлыко. Надежда Леонидовна кузпалыз но, Вера но Григорий пиналъёсыз но чеберлыкез мур валало. Та шӧдонзэс удмурт сям-йылолъёсынымы пӧлэстыса, пӧртэм киужъёс но пӧрмыто, тунсыко ужрадъёс но ортчыто. Ма борды гинэ уг кутскы Степановъёслэн семьязы - ваньмыз чеберске, выльдӥське но мур пуштросэн пачылме.

Сое нырысьсэ синйылтӥ «Шундыкар» лагерьысен. Син шорам нырысь ик йӧтӥзы йыраз изьыям гын шляпаез но али гинэ бычырам сьӧд тушез. Мыным со вераны луонтэм рос-прос потылӥз. Мултэс кылзэ уз вера, ужзэ олокытӥ-мар быдэстоз. Ми, литературая отрядын дышетскисьёс, быдэс нунал ӵоже кучапи сярысь ньыль чуръем кылбур гожтӥськом, нош Анатолий Петровичлэн нылпиосыз со дыр куспын горд сюйлэсь шулан лэсьтыны вуо. Та арберизэс вузаса, кудӥз-огез уксё но жильдылӥз. У-у, кылбурасьёслэн кӧтсы пӧсь кыле вал соку - коть кут но, али ик Степанов борды ӝабырскы…

- «Шундыкар» лагерьын нылпиосын ужатозям, малпасько, йыг-йыг кивоштӥсьёс будэтӥ ни, - веранзэ мытэ Анатолий Петрович. - Тани, кылсярысь, Алнаш ёросысь Иван Берёзкин кизэ зол волятӥз ни - кык арзэ кубыз лэсьтон бордын тыршиз. Зэмос кивоштӥсен лыдъясько аслэсьтым пиналъёсме но - Вера нылме но Гриша пиме. Соос пичи дыръязы ик мон борды кариськизы. Сюен-а вырисько, пуэз-а вӧлӥсько - ужамме чакласа сыло вал. Бӧрысь асьсэос но уж борды кутскизы. Ӵапак соку кооперативъёс кылдылӥзы. Мон но нылпиосыным таӵе амалэн шудыны кутски. Соослы шуисько: сюйлэсь вить шудон лэсьтӥды ке, мон тӥледлы тамында коньдон сёто. Мон - тӧро, нош соос мынам ужасьёсы. Арняяз огпол уждун сётылӥ. Ческыт сиён яке кыӵе ке шудон басьтыны шумпотыса магазинэ дырто вал ини. Уксёзэс лыдъяло: кин меда золгес тыршиз? Озьы киужзы ӟечгес пӧрмылӥз. Тодо угось: урод лэсьтэмзэ мон уг басьты. Тӥни со дырысен Вера но Гриша творчествоен герӟаськемын. Нылы йылпумъяз Удмурт кун университетысь дизайнъя факультетэз. Пие но али отын ик 4-тӥ курсын тодон-валан люка.

- Удмурт шаерлэн кыӵе сэрегаз бен вордскиз но юнмаз таӵе йӧно семьялэн кузёез?

- Вордски мон Ува ёросысь Сям-Можга гуртын. 8-тӥ классэз но отысь школаын ик йылпумъяй. Дышетсконме азьланьтыны малпай Дэбесысь педучилищеысь суредаськонъя люкетаз. Сое 1979-тӥ арын быдтӥ но Ижевске шонтӥ. Дышетӥсе интыяськи 21 номеро школае (али К. Герд нимо гимназия). Отын мон суреданы, ужаны дышетон урокъёсыз нуи. Одӥг ар ужаса вуттӥ-а, ӧй-а, армие мыноно луиз. Кык ар ӵоже службаме нуи Свердловск палъёсын.

- Ма, киыз мынӥсь адямилы отын но уж сюрылӥз, дыр?

- Частямы поездэн мыныкумы ик нерад каризы, - пальыштӥз Анатолий Петрович. - Одӥгезлэсь туссэ суредай но, со мыным напчытэм йӧлын банка сётӥз. Со бӧрсьы мукетыз дорам лыктэ: суреда, пе, монэ буй-буй йырсиен. Соку уго модаын кузь йырси вал, нош милям йыръёсмы пиль-пиль ӵышкемын. Озьы тӥни сюрес вылысен ик мон тросэзлэсь тусъёссэс суредэ пуктыны вуи. Эсьмаса, ӝӧк вылам тушёнкаен, сгущёнкаен сомында банкаос люкаськизы! Туж умой ортчи службаме. Суредаськыны, маскаос но лэсьтыны дыр шедьтӥсько вал.

Армиысь вуыса, нош ик интыяськи Ижысь 21 номеро школае. Отысь дышетӥсьёс армие кошкон азям дуно час кузьмазы, выльысь та школае ик мед берытском шуыса. Улонэ монэ нош ик вуттӥз нылпиос доры.

- Анатолий Петрович, сюйлэсь, пулэсь кылзэ тодонды-шӧдонды ку но ма пумысен бугырскиз?

- Нырысь ик валай мон сое… нырыным. Кыӵе ческыт зынзы соослэн, оло киям бергатыса маке пӧрмыто, малпай соку. Зэм, киужен мон со дырлы эшъяськемын вал ини. Ай Дэбесын дышетскыкум, курсовой но диплом ужъёсме сӥзи лылэсь но сюрлэсь лэсьтэм арбериослы. Кӧня утчай мон соосты жуг-жаг куян интыосысь, собере сузялляй. Маке лэсьтыны кутскон азям соосты корано, вылаз ик, часэн-часэн пӧзьтоно. Котырак вӧлскылӥз вераны луонтэм кӧш зын. Мыным со зын чик но ӧз яра. Озьы мон палэнтӥськи лыэн, сюрен выронлэсь. Озьы ик уг яра клейлэн зыныз но.

Дэбесын дышетскыкум ик, дорам лыктӥз дышетӥсе Владимир Яковлевич Корепанов. Мыным вазиське: Степанов, мар-о ужалод туннэ ӝыт? Ма номыр ик уг, шуисько пумитаз. Лыкты, пе, дорам, ма но со ужалом. Озьы со монэ кыскиз пуэн вырон борды. Творчество шоры учконме паськытатӥз но муромытӥз.

- Озьыен, творчествоез тӥ нырысь ик нырыныды шӧдӥськоды?

- Бен. Творческой уж борды кутскыкум, пулэсь я сюйлэсь зынзэ шӧдыса, мынам дыльдые шыр! вияны кутске. Зэмзэ вераса, адямилэн улоназ пӧртэм зынъёс бадӟым инты басьто. Соосъя асьмеос тодэ ваёнъёсамы выйыны быгатӥськом яке кыӵе ке выль малпанъёсы вуиськомы. Со сяна, шуо: адями, пе, аслыз кузпал но зынъя быръе. Тыныд со тупа ке - тупа, уг ке - уг.

Сюйлэн зыныз мон понна самой ческытэз. Нош соин вырыны кутски Удмурт кун университетын дышетскыкум. Зэм, та удыс странаямы выльысь «улӟиз» кылем даурлэн 60-тӥ аръёсаз. Со дырозь сокем ӝог ӧз азинскы.

Удмурт кун университетын керамикалэсь куронъёссэ валаны дышетӥз Ида Геннадьевна Верещагина. Лэсьтылӥмы дымковской, филимоновской нимаськись мунёосты. Диплом уже но мынам сюй мунёослы сӥземын вал. Тӥни соку йырам юан чилектӥз: нош удмуртъёс маин пӧртэмесь? Уно дауръёс ӵоже музъем ужен вырыса, ӧй вал шат соослэн сюй мунёоссы? Та юанэным вазиськи одӥг тодмоелы. Нош со шуэ: удмуртъёс, пе, бере кылем адямиос ук - кытысь ай соослы сюй мунё! Солэн таӵе кылъёсыз мыным чик но ӧз кельше. Сюлэмме туж мур бугыртӥзы. Шонер ӧвӧл со, малпай ас поннам. Кызьы озьы: горд сюй вылтӥ ветлыса но, удмуртъёс сюйлэсь номыр ӧз лэсьтылэ?

Мон утчаськыны кутски. Вазиськи республикаысьтымы шаертодонъя музейысь специалистлы, археологлы Таисия Ивановна Останиналы. Со ӟуч адями ке но, удмурт калыклэсь сямъёссэ сюлмыныз шӧдэ, гажа. Возьматӥз вашкала сюй мунёосты. Зэмзэ вераса, соос мыным нырысь ӧз кельше. Сюлэмам кемалы ӧз кыле. Соку ужасько вал 41-тӥ лицейын. Пиналъёсылы огпол гинэ ӧй вазиськылы: ойдолэ лэсьтом удмурт шӧмо, удмурт тусо сюй мунё!

- Ӵектондылы дурбасьтӥсьёс шедизы ик-а?

- Зэм. Вазиськонэ кык дышетскиселэн сюлмазы усем ик. Кык нылашъёс Наташа Роготнева но Ирина Трошкова удмурт сюй мунёос пумысен книгаосысь утчаськиллям. Ивор шедьтӥллям ведь! Дорам лыктӥзы но огымысь кадь верало: ми, пе, одӥг книгаысь лыдӟим, Сарапулысь огаз музейын сюйлэсь лэсьтэм туж трос арбериос утисько шуыса. Ойдолэ, пе, отчы вуылом. Со музей сярысь мынам кылэме вал ини. Дышетскисьёсылэн мылкыдзыя кариськи - куинь кузя шонтӥмы Сарапулэ. Отын милемыз пумитаз археолог Николай Решетников. Со ми азе сюй мунёосты чуренак пуктылӥз. Соос пичиесь - ог 8 сантиметр ӝужда. Нылъёсы шуо: ойдолэ, пе, соослэсь копизэс лэсьтомы.

Мон соглаш луи - сыӵе амал вань уго. Мунёосты киямы бергатӥм-бергатӥм но уж борды кутским. Соку мынам йырам чилектӥз: ма соос ваньзы гижыен шияса чеберъямын ук! Вашкала адямиослэн ки но гижы пытьыоссы та сюй арбери вылэ лякиськыса кылемын. Мугоры юзыр-кезьыр луыса кошкиз. Соку Наташа но Ирина быдэс каникулзы ӵоже мон дорын мунё лэсьтыса пукизы. Мастерскоям соослы нимысьтыз инты но висъяй.

Соосты мон дышетӥ: сюй мунёосазы удмурт калык шӧм но мед пыӵалоз, соос туала улонлэн куронъёсызлы-сямъёсызлы но мед тупалозы. Озьы кылдӥз нырысетӥез сюй мунёмы. Жаляса верано, та нылашъёсы керамика удысысь кошкизы. Одӥгез луиз архитектор, мукетыз нылпи эмъясе дышетскиз.

- Анатолий Петрович, кызьы малпаськоды, творчество удысын ӵош ужан бадӟым-а пайда сётэ?

- Горд сюен вырыны кутскыкум, мыным 30 аресъёс вал. Соку ик мон шӧдӥ: та удысын кулэ пичи ке но коллектив. Одӥг адями малпаське ке - умой, нош маке пумысен визьзэс сынало ке дасэз - эшшо но ӟеч. Но со малпаськон одӥг пала нуись сюрестӥ шуод-а, мар-а, мед азинскоз. Киын маке лэсьтонэз ӟучъёс юнме уг шуо ук «промысел» - «промыслить» кыллэсь кылдэмын. Озьыен, киосын ужам сяна, йырвизез но куаш-куаш сынано.

- Арбериостылы сюй нимысьтыз кытысь ке бичаськоды, дыр?

- Сюймы пыд уламы. Тодоно гинэ, кудӥз тупалоз киужлы. Ужамъя тае валаны кутскиськод. Сюйлэсь «пӧрам» арбериед пилиське ке, озьыен, музъем маке сярысь вера. Шуом, мылкыдыд умой ӧй вал яке кыӵе ке висён тонэ зӥбе. Сюй адямилэсь кужымзэ мерта. Соин ик та ужлы сюлэмдэ сётыса, бурдо мылкыдын тыршоно.

Горд сюен ужан тупа Инмарлэн ужамезлы - удмурт калык визькылъёсъя со но угось нырысетӥ адямиез горд сюйлэсь кылдытӥз. Тодэ лыктэ Адам - нырысетӥ воргорон. Адам, солэсь пӧрмиз, луоз, «адями» кылмы. Вань мукет кылмы но - «мугор». Малпаськоно ке, со кык кыллэсь пӧрмемын ук. Му но горд. Юнме ӧвӧл со. Му - со котьмалы инъет.

Лэсьтӥсько мон мугуран нимаськись крезьгуро арбери но. Мугур - озьыен, мулэн гурыз. Со аспӧртэмлыко шулан. Отын быдэс октава, тямыс нотаез. Соин кыӵе ке крезьгурез тыро-пыдо шудыны но луоз. Шуланъёсылы мон пӧртэм вылтус бырйисько. Кудӥз вӧлъям бурдъёсын тылобурдолы кельше, мукетыз - ӵӧжлы, куинетӥез - пельняньлы.

- Нош маин аспӧртэмлыко мукетыз крезьгуро арбериды - пыжкрезьды?

- Со крезь кадь: пулэсь лэсьтэмын, сиосыз вань. Инъетэз крезьлэн, но вылтусыз солэн мукетгес: пыжлы кельше яке, шуом, чорыглы. Таӵезэ нокин уг лэсьты ни. Бен, тодмо крезьчи Сергей Кунгуров кутскылӥз вал пыжкрезез дасян борды.

Али Гриша пие мугуран лэсьтонэн тунсыкъяське. Сое лэсьтыку, мон уже уг кутӥськы клеез. Та арбериез чылкыт пулэсь, бадярлэсь дасясько.

Анае туж кырӟась вал. Монэ но крезьгуран дунне ас бордаз кыске, лэся. Арганэн, баянэн шудӥсько. Пӧртэм крезьгуро арбериослэсь куара сётэмзэс кылзыны яратӥсько. (Аслаз лэсьтэмъёсыныз Анатолий Степанов быгатыса шудэ. - авт.)

- Горд сюй шудонъёстылы кытысь образъёс шедьтӥськоды?

- Зэмзэ вераса, куд-огезлы, оло, уг но кельшо мунёосы. Ма, мон ачим но соосты чебер, кильтро карыны уг турттӥськы. Басьтом тани филимоновской шудонъёсты. Соос чеберлы лэсьтэмын ӧвӧл. Пушказы соос возё калык сямез, стилез. Мунёосме лэсьтыку, мон соосты маке ласянь аспӧртэмгес карыны турттӥсько. Песянае огпол гинэ ӧз шуылы: мар-о, пе, мунёостэ сокем шуш лэсьтӥськод. Нош мон пумитаз вазисько: соослэн пушсы чебер мед луоз.

Туж яратӥсько мӧйы калык шоры учкыны, соослэсь выросъёссэс чакланы. Мыным соос вераны луонтэм мусоесь пото. Песянае улэп дыръя со шоры кема-кема учкыса пукисько вал. Зэм, ымнырыз но, киосыз но кисыриосын шобырскемын. Озьы ке но кыӵе бадӟым кужым шӧдӥське вал со пушкын.

Горд сюйлэсь мунёосме мон бадӟым киё лэсьтӥсько. Соин но, лэся, соослэн вылтуссы сокем ик чебер уг адскы. Со бадӟым киос пыр мон возьматӥсько удмурт калыклэсь ужез яратэмзэ. Песянае, мыным кыӵе ке адями сярысь веракуз, шуэ вал: «Учкы ай, пие, та муртэдлэн кыӵе бадӟым киосыз - ужась, иське». Удмуртъёслэн «Ужаны потӥ - бурдъяськи» визькылзы но вань. Бадӟым киос бурдъёслы но кельшо. Адями сюлэмзэ сётыса ужа ке, лобаны кутске кадь, мылкыдыз ӝутске.

XVIII даурын Удмурт шаертӥ ортчем эксэй армиысь Рычков капитан. Удмуртъёс пӧлтӥ ветлэм, соосын эшъяськем. Бӧрысь со гожтэм: «Россиысь нокыӵе калык но ужез яратэменыз уз ӵошатӥськы удмуртъёсын. Адӟе вал, кызьы соос урод музъемъёсын но быгатыса нянь будэто».

Пичи дыръям выныным ӵош пыраллямы одӥг тодмо воргорон доры. Со быгатэ вал дуриськыны но, муш но вордылӥз. Ми юаськом вал: «Тон оломае но лэсьтыны быгатӥськод, оломае но пӧрмытӥськод, нош кыӵе уж тыныд золгес кельше?» Со ми шоры паймыса учке но шуэ: «Озьы уг луы, пиосы. Мае туннэ мон быдэстыны кулэ, со уж ик сюлэм бордам лякиське». Та учырын но шӧдӥське калыкмылэн ужез гажамез.

- Сюен вырыкуды, кыӵе но пӧртэм малпанъёс уг бергало, дыр, йырады?

- Шудонъёсыз, шуланъёсыз лэсьтон борды кутскон азьын трос лыдӟиськоно, утчаськоно, отысь тодэм ивордэ йырын сӥсъяно. Мон малпамъя, мынам тужгес но ӟеч пӧрмо мӧйыослэн-вашкалаослэн ымныръёссы. Уж борды кутскисько но соослэсь тусъёссэс син азям пуктӥсько. Лэсьтыны кутскемме возьмаса гинэ уло кадь соос. Паймисько, макем мур малпанъёсыз калыкмылэн. Тани лэсьтӥсько мон шудон. Йырам кылъёс бергало: шуд - шудон. Адями ку-о шудонэн шудэ? Куке со шудо - кӧтыз тыр, уг висьы, улонлы ке шумпотэ. Ваньмыз со ог-огеныз герӟаськемын. Тани басьтом «мунё» кылэз. Му - со му, нош нё люкетэз кылдэмын нёнь-нёнь кыллэсь, малпасько. Нонӥсь нылпиез но асьмеос «нёнь-нёнь» шуыса вешаськом ук. Малпан кылдэ, вашкала удмуртъёс нылпиоссылы ноныны, оло, горд сюйлэсь шудонъёсты сётъязы? Бен, сутэмъёсыз чурытэсь, нош ас понназ куасьмемъёссэ сюпсьыны но луоз. Мынам Вера нылы пичи дыръяз кӧня шудонэз сюпсиз, сииз. Ческыт потэ вылэм, лэся.

- Быгатэмды коньдонэн пайда но ӵуказе нуналлы оскон сётэ-а?

- Мыным поттэм коньдонэ тырме, семьяелы но тырме. Кузпалы уг тэргаськы. Инмар мыным сюрес возьматӥз шуыса, тау карисько. Быгатэме сётэ сиён, ӵуказе нуналлы оскон. Вань уксёез уд басьты ук. Шумпотӥсько, дышетэм пиналъёсы пӧртэм ёросъёсын тыршо, мытэм ужме азинто. Мынам соослы бадӟым осконэ. Дышетӥсьёслэсь тодон-валанзэс будэтонъя институтэн ӵош арысь аре радъяськом горд сюен выронъя курсъёс. «Шундыкар» лагерьын но дас арлэсь кема ужасько ни. Али дышетӥсько Дэри ёросысь Ягул школаысь пиналъёсты.

Семьяямы ми ог-огмес пӧртэм ужлы бурдъяса улӥськом. Вера нылы тани «Эктон корка» студие ветлэ. 15 метр пала дэра басма куыса, анаеныз ӵош удмурт дэрем вуризы. «Шундыкар» лагерьын со туэ нылпиосты дышетоз ни. Пие крезьгуран арбериосты лэсьтон борды кыстӥське. Арлы быдэ тыршиськом «Мугур» студимылэсь адӟытонъёссэ радъяны. Улонлы шумпотыса ке улӥськод, озьыен, шудо адями тон.

Источник:

Степанов А. П. Мулэсь гурзэ шӧдӥсь-шудӥсь / А. П. Степанов ; записала Е. Никитина // Удмурт дунне. - 2007. - 6 июля. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"