Шушакова Галина Николаевна

Тани кыӵе мон луи!

Г. Н. Шушакова

Галина Николаевна Шушакова – филология наукаосъя кандидат, доцент. Вордӥськиз Вавож ёросысь Гурезь-Пудга гуртын.

Удмурт университетысь филология факультетэз йылпумъямез бере сое кельто удмурт литературая кафедрае. Дышетскиз Москваысь Ломоносов нимо кун университетысь аспирантураын. Фольклорист. Эскеронъёсыз сӥземын удмурт калык прозалы – выжыкылъёслы, мифологилы.

Мыло-кыдо пыриське йӧскалык движение. Бырйылэмын Удмурт нылкышно кенеше, 2000-тӥ арысен – «Удмурт кенеш» огазеяськонлэн вице-президентэз. Но со сяна, бордаз та нылкышно кыске маин ке мукетыныз. Огшоры «кандидатлэсь» со данаклы яркытгес.

- Галина Николаевна, удмуртъёс пӧлын али трос тодмо-дано адямиос, но жаляса верано луэ, данакез матын но уг тупало интеллигентлы. Тӥ висъяськиськоды асьтэлэн манеръёсыныды, котькинэн - огшоры студентэн но бадӟым кивалтӥсен, удмуртэн но мукет выжы калыкен - огкыл шедьтыны, вераськыны быгатэменыды. Кытысь со тӥляд? Инкуазен (анай-атаен) сётэм ӟеч сям-а, тыршон-а?

- Ой, уг тодӥськы – тӥ мыным укыр бадӟым дунъет сётӥськоды ни. Мон тыршисько. Пӧрме-а, уг-а, но мон дышетскисько асме возьыны, пушкам ӟеч сямъёс пыӵатыны. Туж уг яратӥськы керетыны – соин номыр но уд басьты. Палэнскыны тыршисько керетӥсь адямиослэсь – малы керӟег муртлы мае ке валэктыны вырод, со тонэ уг кылы ке. Мед кылёз аслаз малпанэныз. Но уг яра сое вӧсь карыны – солэн вань правоез ачиз сямен малпаськыны. Со мукет, адямиос огкадь луыны кулэ ӧвӧл.

Мон сое йырам понӥ комсомолын дыръям, соин ик туж тау карисько азьвыл пионер, комсомол огазеяськонъёслы. Соос асьмеды уродлы дышетӥзы шат? Тодады вае ай, кыӵе вал комсомоллэн инъетъёсыз? Со, ачид бордын ужан, азяд бадӟым ужпумъёс пуктон сяна, косылӥз котырысьтыд адямиослы но юрттыны, соосты сьӧрад кыскыны. Озьы устоосызгес дышетскисьёс юрттылӥзы лябъёсызлы. Милемды дышетӥзы котькуд муртлэсь быгатонлыксэ адӟыны, ӟеч сямъёссэ гажаны. Мон туж шумпотӥсько, сое соку ик валай шуыса: мон эшъяськылӥ-шудылӥ ваньмыныз, тон – визьмо, тон – ӧвӧл шуыса, ӧй люкылы. Бӧрысьгес бен валай соку идеологилэсь мыддорин палзэ но.

- Кызьы?

- Школаез йылпумъяме бере пыри Удмурт университетысь филология факультетэ. Мон умой дышетски, комсомол огазеяськонлэн секретарез вал, соин нокыӵе кӧберанэ ӧй вал. Группаямы вераськонъёс потӥзы: кин комсорг луоз. Огез шуэ «уг», мукетыз – «кышкасько», соку шуи: мон луо! Быгато-а, уг-а - ӧй малпаськы: собыдӟа дӥсьтонэ вылэм, а соку комсомоллэн улонын интыез туж бадӟым вал ай. Но колхозэ келязы но, куалектӥ: адямиос мукетэсь ук, мон кадесь ӧвӧл, кызьы мон соосын ужалом? Мон туж паймылӥ, малы соос ас тодэмзыя уло – комсомол мукет вера ук!

Мон паймылӥ, малы соос весь серекъяло, мынам сереме уг поты ук! Тӥни соку валай пиртэш луэмме. Вань сюлэмшугъёсме дневнике гожъяй. Соосты выльысь кутскыса лыдӟылӥ, янгышъёсме утчаны, воштӥськыны выри. Куддыр часэн малпаськыса пукылӥ: кыӵе меда мон луо?

- Кыӵе луиды?

- Нормальной. Мон дыши серекъяны, валаськоды-а? Со сыӵе тунсыко вылэм – маскаръяськыны-серекъяны быгатон. Соку эшъёсылы Галя Баймурзиналы, Нина Юсаевалы, Нина Шутовалы али но тау карисько. Соослы луыса, мынам сюлэмам ваньмыз радъяськиз, азьвыл мон визьмыным гинэ улӥсько вылэм. Табере мон мозмытски секыт, быдэстонтэм малпанъёслэсь, дугдӥ асме котькуд пичи янгыш понна йыръемысь.

- Эриклэсь ческыт шӧмзэ валаса, «шонер» будэтэм пиналъёс чутрак мукет пала но воштӥськыны быгато. Тӥляд урод луэмды ӧз поты-а?

- Потӥз. Озьы, зэм но, котькуд адямиен луэ, дыр. Сыӵе вакытэ вуиз 2-тӥ курсын: мон куштӥськи комсоргысь. Ваньмыз паймизы: малы? Уг поты, шуи, жади, адямиос понна сюлмаськыса. Али паймымон потоз, дыр, но мон, комсорг, аслым общежитие но 3-тӥ курсысен гинэ шедьтӥ ай! Отчыозь мукетъёссэ интыяны выри. Соин но, лэся, ваньмыз акыльтӥз. Мынам потӥз ас тодэмея улэме.

- Кафедраын ужамды сярысь вералэ.

- Озьы, дыр. Мынам туж потӥз аспирантураын дышетскеме. Но отчыозь 7 ар кафедраын ужай: удмурт литератураез лыдӟылӥ ӟуч филология, история, кунсьӧр кылъёсъя факультетъёсысь студентъёслы.

- Малы фольклор вылэ дугдӥды?

- Ма, мон фольклор вылын будэмын ук. Анае туж кырӟась вал, атае - кылась-бурась. Школаысь директормы Анатолий Максимович Егоров но калык сямъёсты гажаны дышетӥз. Собере Москваын соку отчы сяна инты ӧй вал. Мынам туж-туж потэ вал очно дышетскеме, соин ик, чик малпаськытэк, Москвае кошки.

- Но тӥляд соку семьяды, пиды вал ни ук.

- Вал… Кузпалы монэ валалляз, дунъялляз быгатонлыкъёсме.

- Яшин бере дышетыны секыт ӧй вал-а?

- Ӧй. Даниил Александрович, зэм, зол фольклорист вал, но малпасько, со вакытлы мынам но тодон-валанэ тырмылӥз ни: опыт но, аспирантура но маке сёто ук. Мон дышетски туж тодмо Аникин профессор дорын. Со синмаськытӥз монэ фольклорлы. Экспедицие ветлӥ Калуга котырысь ӟучъёс доры. Та удысэз эскереме юрттӥз мыным валаны асьме адямиослэсь пуш дуннезэс.

- Огвакытэ фольклор сярысь вераськисьёс но ӧй вал ни кадь, но шуак ваньмыз со пала берытскизы, этнофутуристъёс кылдӥзы. Малы? Луэ-а сое зэмос фольклорен ниманы?

- Малы озьы луиз? Малы ке шуоно, дауръёс воштӥськыку, дуннеын кыӵе ке валантэм югдур кылдэ: огвакытлы дугдэ кадь азинскон. Адямиос тросгес малпаськыны, пушказы бугыръяськыны кутско. Валамон ини, ваньмыз берытске кутсконэз доры.

Фольклор улэ аслаз улонэныз. Дауръёс ортчемъя со вошъяське, узырме. Туала улонын, зэм, со адскымон инты басьтэ, но со умой ук – фольклор юрттэ культураез, солэсь но зол – искусствоез азинтыны. Кылсярысь, мон синмаськисько Юрий Лобановлэн шедьтэм амалъёсызлы. Со егитъёсты но бордаз кыскыны быгатэ.

- Дышетэмдыя тодӥсько, тӥ студентъёслы эш луыны быгатӥськоды. Озьы эсэпсэ но ыштыны кема ӧвӧл ук.

- Татчыозь ыштысал ке, ыштысал ни. Нош студентъёсты зэм яратӥсько. Мар понна соосты уд яраты – дышетскыны мылкыд каремзы понна-а? Туала студентъёс туж тунсыкоесь, мае но соос уг тодо. Шӧдӥське ХХI даурын улэммы, табере котькытысь ивор басьтыны луэ. Тросэзлэн вань аслаз улон шоры учконэз, малпанъёсыз. Соослы ӧжыт юрттыны, лӧпкытыны гинэ кулэ – мылкыдзы уката мед бурдъяськоз. Ато асьмелэн кызьы: лыктэ гуртысь пинал дышетскыны. Институтэ пырыны быгатэмысьтыз со сыӵе лӧптэмын, но, городын кӧня ке нунал улыса, мылкыдыз зӥбиське: коньдонлы ёрме, вожъяське, общежитиын ултӥяло, эшшо экзаменын пыкыло, уллянэн кышкатъяло на. Мон малпасько, озьы уг яра. Адями, экзамен сётыса, бадӟым конкурс пыр потыса, вузэ пырыны быгатэм бере, иське, со визьтэм ӧвӧл. Иське, сое ӧръяны быгатоно. Куд-огез шуоз: студент – пинал ӧвӧл ни, ачиз мед сюлмаськоз. Мыным потэ, чутрак озьы уг яра, вань ук лекъяськытэк-кышкатъятэк ужан амалъёс. Луэ ваньзэ адями кылын вераны.

- Асьтэос ноку но «кык» уд пуктылӥське шат?

- Пуктылӥсько, но «кык» пуктыны луэ, адямиез ултӥятэк. Шуом, адӟисько, студент дасяськымтэ, верасько, мар солы дасяны, мар вуттыны кулэ. Лыдэ басьтӥсько практикая занятиосын ужамзэ но. Ог-огмес валатэк кылем учыръёс ӧй вал на кадь, потэ.

- Филология факультетэз ӟучлы но удмуртлы люкем бере, тӥ удмурт люкетэзлэн нырысетӥ деканэз вал. Соку студентъёслэсь фольклорез тодэмзы понна гинэ кыл кутоно ӧй вал, дыр.

- Бен. Деканлэн тужгес бадӟым сюлмаськонэз - кафедраослэсь ужзэс радъян. Ми быгатӥм соосты утьыны, ӟеч, тупась преподавательёс бырйыны. Деканэ монэ кӧня ке адями пӧлысь бырйизы, нош оско ке, ужаны капчи. Мыным туж юрттӥзы Р. И. Яшина, В. К. Кельмаков, И. В. Тараканов, С. В. Соколов. Но кык ар сяна отын ӧй пукы – мозмытыны кури. Мон ӧвӧл дышемын асьсэдыз олокин кожась кивалтӥсьёс азьын ултӥяськыны.

- Комсомол дартты выльысь улӟем, шӧдске – тӥ каллен выжиды политикае. Малы?

- Политикае выжи шуыны чылкак уг луы, дыр. «Удмурт кенеше» ӧтиз Нина Игнатьевна Малых. Мынам уже вал гуртъёсын лекциос радъян, кивалтӥ лекторъёслэн группаенызы. Отчы пыризы асьме тодосчиос. Мыным та уж тунсыко потӥз – гуртын милемыз возьмаллязы, сак кылзӥськылӥзы. Озьы пумен амалтэк тунсыкъяськыны кутски политикаысь огъя югдурен, удмурт движениен. Собере «Удмурт кенешлэн» Пичи кенешаз Валентин Кузьмич Тубылов монэ вице-президентэ ӵектӥз. Калык дурбасьтӥз.

- Нош асьтэос? Нырысетӥ курсын дышетскыкуды сямен, «я» шуиды-а?

- Мон ӧй кышка, дыр, малы ке шуоно мон дырозь та интыын ужамын В. Я. Митрофанов но Н. И. Малых. Соос туж визьмо адямиос, ужзы ӟеч радъямын вал. Усто ужазы, ужало но ёросъёсын.

- Озьы ке но та огазеяськонэз али азьтэмез гинэ уг курла. Секыт ӧвӧл-а сое кылзыны, дурбасьтэмез шӧдытэк ужаны?

- Курланы капчи уго, ачид ке номыр уд лэсьтӥськы. Адямиос малы ке сое уг валало: вань сьӧлыкез «Удмурт кенеш» вылэ кушто. «Удмурт кенеш» – общественной огазеяськон, но со тэк уг пукы. Ми вылӥ кивалтӥсьёсын ум керетӥське, революцие ум потӥське ке, со уг вера, ми асьме калык шоры киынымы шонтӥм шуыса. Выжы калык понна сюлмаськон кутскыны кулэ, нырысь ик, кивалтэт, министерствоос бордысен. «Удмурт кенеш» ужа калыклэсь асваланзэ ӝутон бордын. Нош адямиос милесьтым пинь пуктыны, пиналзэс институтэ донгыны курыса ветло.

- Али калык оске нылкышно политикъёслы, соос капчиенгес вормо быръёнъёсын. Сыӵе мылкыдды ӧй вал-а?

- Ой, ӧвӧл. Нылкышно сюлмаськыны кулэ, пиосмуртъёсмы золгес мед луозы шуыса. Мыным туж кельшо визьмо, кужмо удмурт воргоронъёс.

- Тӥледлы удалтӥз – вӧзады ӵап сыӵе адями.

- Геннадий Афанасьевич Ушаков, зэм но, туж визьмо адями. Мон туж дунъясько сое. Улонам кыӵе ке вамыш лэсьтон азьын одно соин кенешисько. Азьло ик тодӥсько кадь, мар шуоз, но верамзэ кылзӥсько. Шумпотӥсько, Геннадий Афанасьевичелы юрттыны быгатӥсько ке. Мон кенешъёстӥ-семинаръёстӥ лобаса ӧй ветлысал, дорын тросгес пукысал ке, со, оло, тросгес но лэсьтысал. Но быгатэмея тыршисько тросгес саклык висъяны.

- Галина Николаевна, кузпалэныды фамилиосты туж тупало, но чылкак одӥг кадесь ӧвӧл – малы мултэс букваен улӥськоды?

- Ушаковаос укыр трос ни кадь потӥзы.

- Тӥляд пичи дыр малпанды быдэсмытэк кылиз. Уд жаляське-а?

- Пичи дыр малпанэ мынам, зэм но, туж чебер вал – мынам потылӥз гимнастка, балерина луэме. 4-тӥ классын дышетскыкумы, цирке нуллӥзы, тӥни отысен синмаськи соослэн лобамзылы.

Доре бертыса, кутски ас кожам гимнастикаен вырыны – шур сьӧры потыса, берганы дышетскисько вал. «Советской Удмуртия» газетысь адӟи Пермьысь балетъя школае нылъёсты кутон сярысь ялонэз, шумпотӥ ни вал, малпанэ матэктэ шуыса. Валамон ини, монэ отчы нокин но ӧз нуы. Но школаын дышетскыкум, ас поннам номеръёс дасялляй, сцена вылэ потаме вань. Шпагат, питран лэсьтыны туж огшоры потылӥз. Балетэз учкыны али но яратӥсько.

Быдэсмымтэ малпанъёс улонын трос луо. Кылсярысь, огвакытэ мынам тракторист луэме потылӥз – радио пыр кыӵе ке дано трактористка сярысь очеркез кылзэм бере. Ваньмыз сярысь жаляд ке… Мон ноку номыр сярысь уг жаляськы.

- Ӵем-а бӧрдылӥськоды?

- Ма, луылэ. Но со астэ жаляса бӧрдон ук – иське, сыӵе синкыли - лысву. Вот Библиын гожтэм сямен адями быгатысал ке ӧпкельыса бӧрдыны, соиз мукет.

- Синкыли сяна, мар буйгатыны быгатэ на нылкышноез?

- Мыным туж юрттэ дневник. Мон сое 1966-тӥ арысен нуисько. Со монэ вала кадь потэ. Юрттэ но – угось дыр ортчыса учкиськод но валаськод, кызьы мон кари, кызьы кароно вал.

Юрттэ матысь адямилэн шунытэз, кужмо пельпумыз.

Юрттэ Инмарлы оскон. Таиз – нырысь ик. Мон - шудо адями, но Инмарлы матэктыны быгатысал ке, уката шудо адями луысал, дыр.

Источник:

Шушакова Г. Н. Тани кыӵе мон луи! / Г. Н. Шушакова ; записала Зинаида Рябинина // Удмурт дунне. - 2004. - 30 апр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"