Зуева-Измайлова Анна Сергеевна
Ваньзэ оскалтэме потэ
Анна Сергеевна Зуева-Измайлова – тодмо критик но литературовед, кылтодон наукаосъя доктор, Россия Федерациысь Писательёслэн огазеяськонзылэн муртэз, пыртэмын Финляндиысь литературной обществое. Кивалтӥз Удмурт кун университетысь ӟуч филологияя кафедраен, али журналистикая факультетлэн деканэзлэсь ужзэ быдэсъя. Тужгес тодмо ужъёсыз - «Поэтика удмуртского романа», «Усьтӥсько выль инвисъёс», «Удмуртская литература в контексте языческих и христианских традиций» монографиос.
Наукаез азинтэмез но калыклэн улоназ чырмыт пыриськемез понна кылем арын со луиз Удмурт Республикалэн Кун премиезлэн лауреатэз, солэн нимыз пыртэмын шаермылэн Данъян пулаз.
- Туала улонын литературной критикалэн кулэлыкез, азьвыл аръёсын ӵошатыса, уг шӧдӥськы ни. Котькудӥз гожъяське кызьы быгатэ…
- Со герӟаськемын улонысьтымы вылӥ ӟечлыко литературалэн кошкеменыз. Сое воштӥзы детективъёс но «нылкышно» романъёс. Соос шулдырто, серекъято, оло, бӧрдыто но, нош адямилэсь сюлэмзэ уг вырӟыто, визьзэ уг бугырто.
Туала писательёс, кылбурчиос нокинлэсь кылэм-адӟем уг каро, асьсэ законъёссыя гожъясько шуисьёс вань ке но, котькудӥз творчествозэ дунъямзэ вите. Со сяна, пото литературной журналъёс, соослы материалъёс кулэ. Ваньзэ тае лыдэ басьтыса, ми басьтӥським критикаез улӟытон борды. Удмурт кун университетысь удмурт кылтодонъя факультетлэн ӟуч филологияя кафедраяз писательёсын но кылбурчиосын пумиськонъёс ортчыло. Аспирантъёс соослэн произведениоссыя ивортонъёс дасяло. Авторъёс азьын ик соосты лыдӟо, кельше-а, уг-а соослы. Пумиськонэ пырисько журналъёслэн редакторъёссы но. Лэчыт, тунсыко вераськон пӧрме. Аспирантъёслэн материалъёссы татысен ик журналъёсы кошко. Кылсярысь, В. Ившинлэн поэтикаез сярысь материалъёсты печатлаз «Луч» журнал, В. Ванюшевлэн творчествоез сярысь – «Кенеш», В. Семакин сярысь – «Луч»… Та выллем «котырес ӝӧкъёсты» ми сӥзиськом улонысь кошкем писательёслы но. Озьы эскеримы Кедра Митрейлэн творчествоезлэсь аспӧртэмлыкъёссэ но соосын лыдӟисьёсты тодматӥм «Инвожо» журналын. Матысь дыре эскером коллегамылэсь – университетысь преподавательлэсь В. Шибановлэсь но телевидениысь режиссёрлэсь С. Карповлэсь творчествозэс. Ми тыршиськом вань журналъёсын, тужгес но ӟучъёсыныз, кусып возьыны, удмурт гожъясьёслэн творчествоенызы Удмуртиысь вань калыкъёсты тодматон понна. Нош аспирантъёсы кыӵе шумпотэмын: бумага пӧлын бугыръяськытозь, улэп авторен кенешод! Соос, гожъяськем сяна, калык азьын вераськыны дышетско, литературной процессэ нуналмысь пырисько. Озьы соос литературоведение сюрессэс капчиенгес шедьто.
Пусъеме потэ: вань мынам кык бигер аспирантэ. Соос тыршо удмурт но бигер литератураослэн кусыпъёссы бордын. Ӟуч филологияя кафедра сяна, асьме литературалэсь мукет калыкъёслэн литератураосынызы герӟетъёссэ нокин но уг эскеры ни, оло, та вакытэ.
Литературной критикаез улӟытэм но выль учёнойёсты, аслым кивоштӥсьёсты, дасям сяна, берло дыре бадӟым саклык висъясько удмурт классикъёс сярысь книгаос поттонлы. Тодмо литературоведэн З. Богомоловаен ӵош поттӥмы ни Михаил Петровлы, Кузебай Гердлы сӥзем монографиос. Соосты печатлан понна коньдон утчаса кал быриз. Ярам, юрттӥзы Удмуртилэн Президентэз А. Волков, шаерысьтымы Писательёслэн огазеяськонзы. Ӝоген лыдӟисьёс кие вуоз З. Богомоловалы 80 арес тырмемезлы сӥзем «Женщина на Олимпе» монография. Нырысетӥ 100 экземплярез солэн творческой ӝытаз люкылэмын ни. Али бызьылӥськом, К. Митрейлы сӥзем книгалы коньдон утчаса. Книгаос поттыны юрттэ культурая, дышетонъя «Многоцветье» центр. Мон солэн кылдытӥсез но кивалтӥсез луисько. Та центр огазея шаерысьтымы удмуртъёсты но ӟучъёсты, бигеръёсты но еврейёсты, учёнойёсты но политикъёсты, кивалтӥсьёсты но дышетӥсьёсты, юрттэ литератураез но культураез азинтыны.
Кафедраен кивалтон, студентъёсты дышетон, научной уж, книга поттон… – чылкак жадисько. Юрттэт утчаса, сояз-таяз ӧсэ йыгаськисько – сое усьтӥсь гинэ но ӵемысь уг луы. Киос-пыдъёс юскисько – туннэ. Нош ӵуказеяз – ваньмыз выльысь. Одӥг кылын вераса, улӥсько осьминоглэн принципезъя – одӥгез пыды уг ке мыны, мукетыныз мынӥсько.
- Озьыен, туала литературоведенилэн ужпумъёсыз воштӥськемын. Капчи вал-а со шоры учкондэс мукет ӧре берыктыны?
- Адями улытозяз воштӥське. Соин ик астэ выльдон но улондэ выль сямен дунъян мултэс ӧвӧл. Со сяна, мон нуналмысь ужасько студентъёсын. Соос но табере чылкак мукетэсь – эрикоесь, котькудӥзлэн аслаз малпанэз, дунъетэз. Соин ик мыным литература шоры выль синмын учкон капчиен сётӥськиз.
Социалистической реализм ваньзэ умойлы но уродлы гинэ люкылӥз. Нош туала литературоведение котькуд писательлэсь солы гинэ тупась аспӧртэмлыкъёсты утча.
Али авторъёс эрикоесь луизы: кин ма сярысь малпаське – сое ик гожтэ. Ваньмыз лэземын. Сыӵе «ваньмыз лэземын» пыр но ортчыны кулэ, ас кужымдэ шӧдон понна – мон тазьы но гожтыны быгатӥсько, чылкак мукет сямен но.
Басьтэ ай, шуом, А. Кузнецовалэсь творчествозэ. Со улонын но хулиганка, творчествояз но. Солэн сонетъёсыз та жанрлэсь вань куронъёссэ таркало. Кутсконзэ но йылпумъянзэ рифма улэ шедьтэ но ваньзэ йырчукин берыктэ. Сыӵе эрик удмурт литературалы али туж кулэ – азинскон понна.
Туала удмурт литература ӟуч литературалэн «азвесь» дауреныз «висе», М. Цветаевалэсь, А. Ахматовалэсь, Б. Пастернаклэсь адӟем каре. Соин ик кылбурлэн культураез вылынгес луиз, солэн пуштросэз 3-4 сӥлы люкиське.
Европалэн, дуннелэн куронъёсыз дорозь будӥз ини Сергей Матвеев. Солэн йыраз но сюлэмаз – быдэс дуннелэн культураез. Со кылбуръёсаз огазея Библилэсь пуштроссэ Кафкалэн гожъяськон амалъёсыныз, Гитлерлэсь ӧтёнъёссэ туала политикъёслэн верамъёсынызы. Но со сузьетын шӧдӥське авторлэн идеяез, позициез.
- Асьтэос писатель луыны уд малпаське-а?
- Ой, уг тодӥськы. Книгаосызлы дунъет сётыкум, Г. Перевощиков шуылоз вал: тыныд писатель луоно вал, тон тодӥськод, кызьы произведениез гожтоно, ма но ку отын луыны кулэ.
Но мон валасько: со мынам уже ӧвӧл. Адями гожъяське ассэ валатэк, солэсь кизэ валтэ подсознание. Нош мон ваньзэ визьмыным лэсьтӥсько, тодӥсько, мар шонер но янгыш. Мон укыр нормированной адями. Куке мынам малпанъёсы лобӟизы эркын, вань тунгонъёсты пезьгытыса, соку, оло, верос ке но гожто. Но ачим сярысь книга одно ик «пӧрало». К. Станиславский, быдӟым режиссёр, гожтӥз «Моя жизнь в искусстве», нош мон книгаме «Моя жизнь в науке» нимасал.
- Докторской диссертациды «Удмуртская литература в контексте языческих и христианских традиций» шуыса нимаське. Асьтэлэн улонады инмар, солы оскон кыӵе инты басьтэ? Язычество яке христианство тӥледлы матын?
- Дисстертациме гожтыкум, вӧсьлыклэсь (религилэсь) теоризэ котыр ласянь эскероно луи, христианствоен, язычествоен мур тодматски, Иисус Христослы оскон – адямилэсь пуш улонзэ, мон сямен, шонер радъясь система. Инмарлы оскон адямилы озьы берытске, кызьы солы кулэ. Огез быдэсак отчы пыре, мукетыз - кӧнялы ке.
Мон ӵемысь черке ветлӥсько – молитваосты, кырӟанъёсты кылзыса, сюлэмме басылатыны. Но улонме черклэн куронъёсызъя чылкак радъяны уг быгатӥськы. Валасько ке но, христианство адямилэсь мугорзэ но пуш дуннезэ герӟа, ог-огзылы тупатэ шуыса. Инмар адямилы ассэ ачиз кияз кутыны юрттэ - сыӵе ужпум мынам улонам котьку но сылӥз. Нош язычество мыным матын ӧвӧл.
- Мон тодӥсько, тӥ хиромантиен тунсыкъяськиськоды. Инмарлы оскон сое умоен уг лыдъя…
- Ну, мон котыр ласянь азинскем адями. Угось сямы сыӵе – ваньзэ оскалтэм потэ. Хиромантия – адямилэсь азьланяз улонзэ но сямзэ кырымпыдэсысь гожъёсъя но вырйылъёсъя тодон.
Мае возьмато мынам киосы? Нырысь ик, соос мынам чылкак пӧртэмесь. Паллянэз кырымпыдэс возьматэ, мае Инмар сётэм, бурыз – кызьы со кузьмам быгатонлыкъёсты кутыны быгатӥськод, мае ас кужыменыд вормиськод. Мыным Инмар трос сётэм, сое возьмато удалтонлэн, шудбурлэн, визьлэн, сюлэмлэн гожъёссы, Аполлонлэн, Юпитерлэн вырйылъёссы. Мыным сӥземын бадӟымесь вормонъёс, шудбуро улон, куинь удысъя карьера лэсьтыны луонлыкъёс. Нош мон аслэсьтым визьме гинэ азьпалтӥ – сое бур кырымпыдэсъя гинэ шӧдыны уг луы, сое улонэ возьматэ. Мон палдуресгес азинскисько, шӧдске. Мукетыз ӧр усьтӥськоз ай, малпасько. Со, оло, политикаен герӟаськемын луоз.
… 30 арес тырме ини: диссертация утемын, квартирае вань. Быземе потыны кутскиз. Нош мынам котьку но таӵе малпанэ вал: картэ удмурт луиз ке – умой, ӟуч ке – тожо урод ӧвӧл. Учёной но дышетӥсь гинэ медаз луы - инженер яке медик. Шедиз ведь сыӵе удмурт инженер. Владимир Николаевич али ужа «Межрегионгаз» огазеяськонын, азьвыл сямен ик – инженер. Семьяямы со – зэмос кузё. Уксё вае (учёнойлэн уждунэныз пиналъёстэ уд сюды ук), квартира, бакча понна кыл кутэ. Бакчаын но номыр уг ужаськы ни. Монэ мунчое нуо, ваё. Кухняын гинэ но мон кузё ӧвӧл ни. Нылы вордӥськем бере ваимы картэлэсь анайзэ. Со нылпиосты учкиз, али но пӧра, утялске быгатэмезъя. Тӥни озьы, мон эрико дама! Бӧрсьысь бӧрсе кык нылпи ваи - Катюшаез но Ванюшаез. Катюша УдГУ-ысь журналистикая факультетын дышетске, нош Ванечка - прикладной информатикая факультетын. Нылы «Инвожо» журналын ӵемысь печатлаське. Пие – спортсмен, гитараен шудэ.
- Тӥ - кыкетӥ поколениысь интеллигент. Со вылтӥяськыны муг, яке астэ ачид азьлань улляны сюло?
- Атае Сегей Илларионович Зуев Селтаысь роноен, Юмга-Юмга школаен кивалтӥз. Анае Зоя Ивановна Иткулатын – вордӥськем гуртам - пичи классъёсын дышетӥз. Сизьым нылпиос пӧлысь мон шоретӥез вал. Ваньмы – дышетӥсьёс луим, пичиез выны сяна.
Дышетӥсьёслэн нылпиоссылы дышетскыны капчигес ик вал. Можгаысь педучилищее пырыкум но нокыӵе сюлмаськонъёс ӧй вал – татын дышетско вал ини апай-дядяйёс. Университетын Зуев фамилия исторической факультетлэн этажаз кылемын вал - со юрттӥз мыным филологияя факультетын дышетскыны. Мукет ласянь, ми мукет пиналъёслэсь пӧртэмгес луыны кулэ вал - анай-атай милемыз ӟеч дышетскыны, асьмеды умой возьыны косылӥзы. Монэ сокем визьмазы, шонер сюрес вылысь паллянэ-буре кожыны ик ӧй дӥсьтылы. Зуев фамилиез флагез сямен вылӥе ӝутыса нуи, пичиысен ик валай, сое мон тодмо каро шуыса.
- Одӥгъёсыз тӥледыз ярато, мукетъёсыз - синазькыль каро, дыр. Тӥ сое лыдэ басьтӥськоды-а?
- Мон тазьы верасал: тау эшъёсылы, мыным юрттэмзы понна; тау тушмонъёсылы, шутэтскыны огинтыям сылыны сётымтэзы понна.
Источник:
Зуева-Измайлова А. С. Ваньзэ оскалтэме потэ / А. С. Зуева-Измайлова ; записала О. Вахитова // Удмурт дунне. - 2003. - 21 марта. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
