Решетникова Ангелина Ефремовна

Вера, кин тынад эшед...

Ижысь гуманитарной лицей 1990-тӥ арын кылдӥз но ӝоген пыриз Россиысь выль сямен (инновациосъя) ужась школаос радэ. 1997-тӥ арын со «Дышетон удысын эскеронъёс ортчытъян площадка» статус басьтӥз. 2002-тӥ арысен ужа «Нимысьтыз дышетонъя школа» программа бордын.

Дышетонысь выль проектъёсыз уже пыӵатонын со выль эшъёс шедьтӥз бускель финн-угор республикаосысь, Финляндиысь, Эстониысь но Венгриысь.

Та ужъёсыз бергатӥсь-ӟырдатӥсь луэ гуманитарной лицейысь национальной школалэн кураторез – удмурт кыллы дышетӥсь, методист-консультант Ангелина Ефремовна Решетникова. Вылӥ категориен дышетӥсьлэн, Калыкез дышетонысь отличниклэн тусбуез туэ республикаысьтымы Данъян пул вылын.

- Кизнер ёросысь Безменшурысь Ефрем Кузнецовлэн семьяяз 50 ар талэсь азьвыл Геля нылзы вордскиз. Ангелина - кылчин кадь шуэмез возьматэ. Адямилэн кыӵе луонэзлы нимыз но юрттэ, шуо. Озьы-а?

- Озьы, дыр. Монэ Гели, Ангели гинэ шуылӥзы, эркияса будэтӥзы. Атае, агайёсы туж ярато вал. Ачим но соослэсь устогес пиосъёсыз али ке но уг тодӥськы. Кыкез но агае – Анатолий но, Вениамин но – гуртын самой адскымон пиос вал: соос ик баянэн шудӥсьёс, соос ик туспуктылӥсьёс, спортсменъёс. Кыксы но дышетӥсь луизы. Вань улонзэс гуртысь школамылы сӥзизы.

- Дышетӥсь луон мылкыдды со бордысь но потӥз, дыр?

- Нырысь-валысь библиотекарьлэн ужез кельшиз. Вань книгаос мынам луозы, малпалляй. Яратоно книгае – «Улэм потэ». Берлогес гожъяськисьлэн, журналистлэн профессиезлы синмаськыса улӥ, пӧрамъёсме редакциосы ыстылӥ.

Атае туж яратэ вал лыдӟиськыны. Со сярысь нимысьтыз вераме потэ. Куать ар войнаын вал. Бертыса нырысь механизатор, собере мушкась луыса ужаз. Котьма ужын маке выльзэ утчаз. Мушъёсын эскеронъёс лэсьтылӥз. Выжыкыл кадь маде вал соос сярысь. Пуэз вӧлыса ужакуз но, лэсьтоно арбериосыз ки улаз шудыса кадь бергазы. Ӝажы яке карнан, лопата пӧрмытоз-а, ваньмыз синмаськылӥзы. Корзинаос, мушкоос куталляз. Урамын сое Яблок агай, Чечы агай шуылӥзы. Бадӟым садэз вал, отын 30 пала пӧртэм пумо яблокпуэз. Быдэс урамлы емышез тырмылӥз. Толбыт повидломы ӧз бырылы. Балетка сумкаям учебникъёс интые улмо тырыса эшъёсылы нуллылӥ…

- Иське, пичиысен ик асьтэлэсь нимысьтыз висъяськись луэмдэс шӧдӥды. Зэмзэ но, тӥ шудо кӧкыын веттамын. Дышетскон ласянь кызьы – «5»-лы гинэ-а?

- Озьы ке озьы, но мон одно отличник луон понна куалекъяса ӧй улы. Капчиен дышетски. Огпол таӵе учыр но вал. Черчениен дышетӥсеным малы ке ог-огмес ӧм валалэ. Мынам ай чертёжъёсы готовальня арбериосын, сьӧдо-гордо тушен, туж ӝикыт лэсьтэмын луозы вал. Малы ке ваменски-а, мар-а – журналэ фамилие вадьсы ньыль «кол» пуксиз. Берло ини валай, марлы «кыкъёс» пуктымтэ: «1»-ез туж капчи «4»-лы тупатыны. Асме ворми но - озьы ик луиз. Четверть понна «4» потӥз, нош арлы – «5». Али но туж гажаса тодам вайисько та дышетӥсьме, Владимир Никитичез. Солы луыса, ӧжыт гинэ худграфе дышетскыны ӧй мыны. Суредаськон ласянь йӧндыреме али но юрттэ бордгазетъёс но мукетсэ лэсьтыны.

Озьы ик тау карисько Елена Арсентьевналы – англи кыллы зол дышетӥз, Елизавета Владимировналы – ӟуч кыллы, литературалы дышетӥз.

- Таиз одно ик Елизавета Владимировна Петрова, луоз. Берло но со тӥледлы юрттӥз на, шуом, Нациосын ужан политикая министерствоын дыръяз…

- Зэм вераськоды. Нош соку, 8-тӥ классэз йылпумъякум, солэн монэ педучилищее лэземез уг поты вал: марлы, пе, юнме кык ардэ быдтод, одно ик вылӥ образование басьтоно луоз на.

- Но тӥ уд жаляське, дыр, ук Можга педучилищеын дышетскемдэс?

- Ньыль арме юнме быдтӥ кадь потэ. Отын ай 1-тӥ-2-тӥ курсъёсын тютюпи шоры кадь учко… Но соиз умой: гурт но город куспысь выж кадь луиз. Татын но суреданъя зол дышетӥсе вал – Валерий Иванович Григорьев.

- Но педучилищеын методикаез умой сёто ук…

- Паймисько. Рудольф Фёдорович Березин но ӵапак озьы ик шуиз вал… Ма, кызьы луэ методикалы кытын ке дышетыны? Сое аслыд лэсьтоно. Бен, вань сыӵе предмет, учебникъёс но. Но соос дышетскисьлэсь йырвизьзэ гинэ куасьто. Педучилище кыӵе ке сюбег коридортӥ нуэ кадь (мон отын ёркай ни вал): тани тӥледлы класс, 40 дышетскись, котькудзэ кылтӥзы кыскы, пумтэм тетрадьёсыз эскеры… Педколледж ке но нимаське, дышетонлэн пуштросэз ӧз воштӥськы.

- Педучилище бере талэсь азьвыл тӥ ужады 52 номеро школаын. Нош кызьы лицее вуиды ай, Ангелина Ефремовна?

- 52 номеро школаын мон 13 ар ужай, начальной классъёсын, собере ӟуч кыллы, литературалы дышетӥ. Суредаськонъя кружок нуи. Туж шумпотӥ: удмурт кружок усьтыны лэзизы. Городысь методцентрын ужасько ни вал. Соку гуманитарной лицейлэн кивалтӥсез М. П. Черемных дораз ӧтиз. Тӥлесьтыд фамилидэс, пе, куинь интыын дэмлазы: методцентрын, Дышетӥсьёслэсь тодон-валанзэс будэтонъя институтын но Культурая министерствоын. Пыкиськеме ӧйлась ни, оскиллям бере. Но соку ӧй вала на вал, ас интыдэ шедьтыны луонлык кылдӥз, инмысь шуд усиз кадь шуыса.

- Методист сямен усьтӥськыны луонлык сярысь вераськоды-а?

- Соку, методцентрын, малпам уже куашказ, шуыны луэ. Та уж шоры мон мукетгес учкисько. Методист методикалы уг дышеты – методист огазея дышетӥсьёсыз. Соин ик малпай анай кыллы дышетӥсьёслэсь ассоциацизэс кылдытыны. Удмурт гинэ ӧвӧл – бигер, пор но мукет. Таӵе огазеяськон Марий Элын вань ни. Дасялом устав. Одно ик – проект, сотэк одӥг вамыш но азьлань мыныны уг луы.

Матысь дыре удмурт кыллы дышетӥсьёслэсь улосъёс куспын конференцизэс ортчытом. Отчы пыриськозы финнъёс, эстонецъёс но. Куинетӥ нуналаз малпаськом удмурт гуртъёсы потаны.

- Городын удмурт кыллы дышетон асьмелэн дыго-мого, огинтыяз сылэ на. Туж шуген пыӵа школаосы, отын солэсь муртало. Соин ик кӧня ке ар талэсь азьвыл пичиез нылы огпол туж паймыса шуиз вал: «Мама, милям классамы англи кылэз умойгес тодо ни, удмуртсэ сярысь». Таӵе дыръя методика ик юрттыны быгатоз, дыр?

- Зэм, таӵе шуге-леке вуонмы – удмурт кыл шоры кулэтэм кыл шоры кадь учкон бордысь. Доразы анай-атайёс ас кылынызы уг ке верасько, нылпилы сое дышетон туж секытэн сётӥське, зэмзэ ик – мурт кылэн пумисько кадь. Озьы бере, мургес учконо луэ методикамес. Мынӥськод ини англи, немец но мукет кыллы дышетӥсьёс доры, кыӵе амалэн соос пыӵатыны быгато та кылъёсты. Эскереме бере валай: татын азинсконъёс пото, ог-огеныд ваче вераськыса, рольёсын шудон бордысь. Аудио но, видеоматериалъёс, мукетыз но уже кутӥсько, нылпиослэсь мылкыдзэс ӝуто. Шуом, тон кыӵе ке Иванов яке Петров ӧвӧл – тон Франциысь лыктэм бизнесмен, но тынад багажед-котыред ышем. Кызьы та югдурысь потоно? Валамон, таӵе дыръя кылъёс асьсэос «лыкто-чилекто».

Мон валай: асьмелэн методикамы бере кыле. Соин ик УдГУ-ысь дышетӥсен Бибинур Загуляеваен «Дуно эше» учебник дасян борды кутским. Мылкыд карисьёс кӧня ке арзэ соя дышетско ни.

- Асьмелэн уката ик бадӟым шуг-секытъёс кылдо ӟучомем нылпиосты удмурт кыллы дышетонъя. Та ласянь дышетӥсьёслы асьсэлы ялан выльзэ утчано, малпано луэ. Шоркарысьтымы кинэ висъяны быгатӥськоды, кинэн уртче ужаськоды?

- Соос пӧлын, мон шуысал, 11 номеро школаысь Валентина Анатольевна Порцева, 49 номеро школаысь Вера Григорьевна Орлова но Зоя Григорьевна Быкова, 70 номеро школаысь Нина Ивановна Егорова, 52 номеро школаысь Галина Георгиевна Вахрушева но куд-ог мукетъёс. Алигес кӧня ке кузя дорам вуизы: проект, пе, гожтоно вал… Ассоциацимы луысал ке, ӵемгес пумиськылысалмы, котькуд толэзе, кудаз ке школае потаса, кыӵе ке дышетӥсьлы юрттэт сётыны быгатысалмы.

- Вераськонады тӥ ӵем поттылӥськоды «проект» кылэз…

- Ми выль технологиосъя ужаськом, дышетскиськом проектъёс гожъяны. Мынам урокъёсы ӧжыт, но лицейын берозь пукылоно луэ. Кенешиськом, эчешиськом – дырлэсь ортчемзэ шӧдыны уг луы. Проект лэсьтон – капчи уж ӧвӧл. Йырын кема бергатоно луэ. Нош проектэз лэсьтӥськод ке, со ини ачиз тонэ валтэ, уен-нуналэн ужатэ. Адями тунсыко луэ, вань ке солэн йыраз малпанъёсыз, темаез, сое уж вылын быдэстон бордын ужа ке. Мынам дышетскисьёсы – ӵапак сыӵе пиналъёс. Соос пӧлысь висъяны быгатӥсько Светлана Едыгароваез. Со кӧня проектъёс гожъялляз, ужаз ни. Финляндиын ӝыны ар вал. Солэн нимыз быдэс финн-угор дуннелы тодмо, МАФУН-ын но ужа. Озьы ик – Ирина Фёдорова (кыксы ик УдГУ-ын дышетско ни). Со Светалэсь кутскем ужзэ – «Усьтэм финн-угор университет» проектэз - нуэ-ужатэ. Туэ гужем со Таллиннэ IV финн-угор конгрессэ мынэ.

- Тӥляд валтӥсь проектты – бадӟым классъёсын дышетскисьёслэсь слётсэс ортчытъян – быдэс финн-угор дуннеез бугыртӥз. Мынам тодэмея тужгес удалтэмез луэ 8-тӥез, Белая, Кама но Волга кузя теплоходэн уямды…

- Та проектмы арлы быдэ грантъёс басьтылэ. 2002-тӥ арын Сорослэн фондысьтыз 1 миллион манет сётӥзы. Программамылэн нимыз «Усьтэм обществолэн культурая политикаез» вал. Теплоходын ик семинар ортчытӥм. Со вакытэ ик, удмурт, пор, чуваш, бигер гуртъёсы кожаса, эскеронъёс ортчытӥм, материал люкам. Дас нунал куспын сю пала адями пыриськем та слётэ: венгръёс, комиос, поръёс. Таӵе слётъёсы ӟучъёс но пырисько. Но быдэстоно ужпуммы асьме калык понна ужа: азьпала валтӥсь, выжыосмес дунъяны быгатӥсь элитаез, азьветлӥсьёсыз будэтоно. Шумпотымон: ми пала ымнырынызы берытскемын пӧртэм ёзъёсысь кивалтӥсьёс, соос котьку милемыз шуныт пумиталлязы.

Слётъя проектмы трос адямиез кыске. Отын выль технологиос ужало, соин ик со грантъёс но басьтэ. «Моторез» луэ ачиз директормы Михаил Петрович Черемных. Со сыӵе куронъёс пуктэ – шумпотыса ужаны кутскиськод. Та пыр ик кӧня эшъёс шедьтӥ ни. Тужгес оскымонъёсыз – Лариса Буранова, нациосын ужан политикая министрлэн воштӥсез, но Бибинур Загуляева. Ӵош ик анай кыллы дышетӥсьёслэсь огазеяськонзэс кылдытон борды кутским. Уж эшъяськытэ.

- Тӥляд лицейды инновациосъя ужась школаос пӧлы пыре. Мар ласянь со нырысь ик висъяське огшоры школаослэсь?

- Быдэсак дышетон шоры учконэныз, программаеныз. Бен, Россиысь сю таӵе школаос пӧлысь лицеймы огез устоез. Директормы со понна трос лэсьтэ, шуи ни. Лыдъялод меда, кӧня методологъёс дорамы лекциос лыдӟылӥзы. Теориез мур тодӥсьёс – философъёс, социологъёс ми доры лыкто. Соос тодо, кыӵе луыны кулэ та вакытэ дышетон, солэн пуштросэз, вылтусыз. Соосын вераськон понна азьло ик «пелез будэтоно». Соин ик нырысь-валысь та тодосчиосыз кылзыны-валаны милемлы секыт вал.

Удмурт кун университетэн кусыпъёсмы юнэсь. Лицеймы уго солэн «бурд улаз» кылдытэмын вал. Тросэз ужрадъёсмы ӵош ортчыло. Тодон-валанэнызы ми доры вуо Историяя, кылъя но литературая Удмурт институтын ужасьёс но. Ӧс кусыпмес волятӥзы ни, шуыны луэ, М. В. Гришкина, Е. Я. Трофимова, Г. А. Никитина, М. Г. Иванова, А. С. Зуева, В. Л. Шибанов, С. Т. Арекеева, Л. П. Фёдорова. Трос тодосчиос слётъёсамы пыриськылӥзы, кылсярысь, В. Е. Владыкин. Милемын али но гожтэт пыр кусып возё Иштван Козмач но Сара Хянникайнен. Огъя вераса, кин вуэ университетэ, со ми дорын но куно луэ.

- Учконо ке, тӥляд лицейды вылӥ дышетскон заведение пырыны выж выллем, мукет сямен вераса, университетэ «тэтчыны» трамплин.

- Пырак озьы уд шуы, лицей сыӵе сюбег ужпум уг пукты азяз. Но дышетскисьёсмы, зэмзэ но, капчиенгес пыро вузъёсы, син шоры йӧтымонэсь луо.

- Нош бадӟымгес ужпум ке?

- Аслам удысэя ке верано, «Егитъёс но финн-угор дунне» программаез быдэсъяськом. Та проектъёсыз улонэ пыӵатыса, ми дасяськом культураен герӟаськем политикая менеджеръёсты, - соос умой мед тодозы ас калыксылэсь выжыоссэ, со дыре ик асваланзы, дунне шоры учконзы вылын мед луоз. Дышетскисьёс мед быгатозы калык культураез утёнын но азинтонын асьсэлэсь технологиоссэс кылдытыны но уже кутыны. Огъя вераса, проектмылэн валтӥсь ужпумез – финн-угор дуннеысь азьветлӥсь егитъёсыз будэтон.

Кыӵе амалэн та ужмы быдэсъяське? Конференциос, презентациос, семинаръёс, лекциос, «котырес ӝӧкъёс», тренингъёс, мастер-классъёс, тьюторъёслэн консультациоссы, озьы ик пӧртэм шулдыръяськон программа пыр. Бадӟым инты басьтэ «Проектэз быдэсъян технология» шудон. Берло ини егитъёс ог-огзылэн проектэнызы тодматско, финн-угор дуннеысь эшъёссэс ӧтьыса.

- Ужаменыды тодматсконо ке, валаны луэ, гуманитарной лицейын нырысь инты басьтэ котькуд дышетскисен нимаз ужан, солэсь кыӵе ке удысъя пӧрмоссэ усьтон но со ӧретӥ нуон. Нош кинъёс татчы пырыны быгато, гуртысь пиналъёслы вань-а луонлык?

- Котькудӥз нодлыко пинал ми доры шедьыны быгатэ нимысьтыз дасям шудон-эскерон пыр ортче ке. Тест пыр эскеронэз ортче ке. Мукетыз ужпум – быгатозы-а анай-атайёс коньдон тырыны. Дышетэм понна дун, нырысь аръёсын ӵошатыса, трос пол будӥз.

- Шудо пиналъёслэсь нимъёссэс вералоды, дыр?

- Ой, кӧня соос луизы ни, син азям будэм нылъёс-пиос… Соос мынам отличникъёсы. Отметкая уг шуиськы – дышетскон, уж ласянь тросэз асьсэды вылэ пуктӥзы ни. Шуом, Андрей Рысьев, Денис Гурьянов, Роман Козлов Москваын дышетскизы, Хакамада, Чубайс бордын кужымзэс эскеризы. Маша Лекомцева, Туркуын дышетскыса, калыккуспо дипломен флорист луиз – таӵеез Ижын ӧй вал на. Инга Игнатьева, Дима Денисов Эстониын визь люкало. Настя Петрова, Саша Егоров, Оля Урасинова, Катя Сунцова венгер кылэз дышетонэн герӟаськизы… Наташа Гусева, Настя Григорьева, Света Едыгарова финн кылэз матэ каризы.

- Жаляса верано, дыр: нылъёсмы бызё но палэнэ кошко. Тӥляд асьтэлэн но нылды Эстониын ук…

- Ирина Тарту университетын дышетске, филолог луоз. Бызиз эстон пилы Индреклы. Будэ ни Иллимар нимо пизы. Солы кык но ӝыны арес. Со эстон но удмурт сямен вераськыны дауртэ ни, кӧня ке ӟучсэ но тодэ. Ми сое туж яратӥськом, мусоямысь ик ӧм дугдылысалмы, вӧзамы ке луысал. Эмеспимылэн дораз ветлӥмы ни быдэс семьяенымы – картэным, анаеным, Катя нылынымы. Таиз нылы лицей бере крезьгуръя училищеын дышетске, туэ йылпумъя ни вокалъя люкетсэ. Куараез, пе, шер пумиськылӥсь – меццо-сопрано, но кырӟась луыны уг малпа.

- Сое мукет нылъёсын ӵош ӵемысь адӟылоно луэ «Зорай» ансамбльысь.

- «Зораен» Россиысь искусство удысысь дано ужась Розита Анкудинова кивалтэ. Нылъёс отчы мыло-кыдо ветло. Тодо уго: татысен сюрес мукет элькунъёсы но усьтӥське. Кылем арын октябре Эстоние ветлӥзы, ӵыжы-выжы луись калыкъёслэн нуналъёссы дыръя пӧртэм интыосын асьсэды возьматӥзы, трос выль эшъёс шедьтӥзы.

- Кузпалды сярысь ӧд вералэ на…

- Толяе мынам туж умой адями. Вӧзысьтымы ик, Бертло гуртысь. Ас гуртам ужакум, педучилище бере солы бызи. Оло, атайтэк будэменыз, со туж тыршись. Ужез секыт ке но – газорезчик – дорын котьма лэсьтыны вуэ, сиён но пӧраны яратэ. Нылъёссэ эркия. Таӵе карт вӧзын ас удысам копак зымыса ужаны быгатӥсько.

Источник:

Решетникова А. Е. Вера, кин тынад эшед... / А. Е. Решетникова ; записала Татьяна Чернова // Удмурт дунне. - 2004. - 27 февр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"