Ар вакытлы тупась йылолъёс

Салья гуртлэн календарез

Удмуртъёс вашкала дырысен тодмо усто пӧйшурась луэменызы, пайда поттыны быгатӥллям муш вордонысь но, нош озьы ик тодмо на соос музъем ужен выременызы. Вань улонзэс валаса герӟаллям арлэн вакытъёсыныз, музъем ужен. Со бордысь ик кылдӥзы пӧртэм праздникъёс, сэбедъёс. Тодматском Салья гуртысь удмурт сямъёслы сӥзем календарен.

• Выль ар – 1-тӥ толшоре. Выль арлы дасяськон. Кыз чеберъян. Пӧраськон. Выль арез пумитан. • Вожодыр – 6-тӥ толшоре. Шундылэн толалтэ берытскон вакытэз. Лек лулъёс кыре пото.

• Ымусьтон – 7-тӥ толшоре. Гуртэтӥ пӧртмаськыса но тунатӥськыса ветлон дыр кыстӥське Йӧ вылэ султон нуналозь.

• Йӧ вылэ султон – 19-тӥ толшоре. Вожодыр йылпумъяське. ӵукна шур дуре мыно. Йӧ вылэ тӥрен кораса, люкмес усьто. Вожоосыз – лек лулъёсыз, кырсьёсыз-жобъёсыз – вуэ келяло.

• Вуж Выль ар – 13-14-тӥ толшоре. Кулэм анай-атайлы йыр-пыд сётон нунал.

• Кирен арня.

• Оддокей – 14-тӥ южтолэзе. Та нуналэ ӟольгыри юон тыр ке но ву люкаське ке, тулыс вазь вуоз шуо, нош кынтыса улӥз ке, тол кема кузёяськоз на.

• Вӧй буранъёс.

• Вӧй – нуналыз вошъяське. Вӧй понна вӧсяськон. Вӧсьнерге ветло. Валэн ворттыло. Гурезетӥ дӧдьыен нискылало.

• Дӧдьы куштон нунал – 7 оштолэзе. Та нуналэ вашкала дырысен уг ужало. Гуртоослэн верамзыя, тыло-бурдо но, пе, кар уг лэсьты. Арня вискысь кыӵе нунал тупа, со нуналэ бадӟым уж борды уг кутско.

• Пучы арня – нуналыз вошъяське. Быдӟымнуналлэсь арнялы азьвыл. Табань вӧсяло. Пучы вайыса, оброс азе поно.

• Кулэм потон уй – Быдӟыннал азьын покчиарняе. Юртъер котырез чылкытато. Укно, ӧс йылъёсы сусыпу вайёс тыро. Шайтанъёсты, албастыосты, жобъёсты улляло. Ӝытпал капкаосы йыгало, пыӵалэн инбаме ыбыло.

• Быдӟыннал – вӧй бере вить яке сизьым арня ортчыса луэ но кыстӥське быдэс арня ӵоже.

• Арнянунал – Быдӟым куалаын вӧсясько. Курегпуз буяло, пиналъёс курегпуз бичаса ветло. Бичам курегпузэз питыръяса шудо. Ӝыт вӧсьнерге ветло.

• Вордӥськон – юртысь куалаын вӧсяськон. Пучы ворттон – Зогонын валэн ӵошатсконъёс. Валэз корка пушкы пыртало, сое нянен, пӧраськемен сюдо. Ӝыт вӧсьнерге ветло.

• Пуксён – юртысь куалаын вӧсяськон. Сабантуй. Покшур нырйылын ӝук вӧсяло. Пӧртэм пумо ӵошатсконъёс ортчыло. Вӧсьнерге ветло.

• Вир – Кукей лушкан. Лушкам кукеез нюлэскы мыныса сиё.

• Мушег – шур сопала куное мынон. Ӵош турнасьёс ог-огзэс куное ӧтё.

• Бигерарня – шур тапалан куно карон. Ӵош турнасьёс ог-огзэс куное ӧтё.

• Кӧснунал – Пересь сюан. Пересьёс, сюанчи кариськыса, коркась корка пыраса куно луо.

•Арня – Урбеч уллян. Гуртысь пересьёс коркась но гурт котырысь жобъёсты, шайтанъёсты, албастыосты, висёнъёсты шур вылэ улляло.

• Вордӥськон – Тулыс кисьтон – кулэмъёслэн «Быдӟынналзы». Кисьтонлы пӧраськон. Бӧлякъёслы ивор сёто. Кисьтончиосты куно каро. Пересьёслы куясько. Выль кулэмъёслы куясько. Келисько. Кисьтонэз келяло.

• Гырыны, кизьыны потон – оштолэзе (нуналыз вошъяське). Кукей буян. Нырысетӥ кидыс пазьго.

• Гершыд поттон – Быдӟыннал бере тямыс арня ортчыса луэ. Кизем йылпумъяськонлы сӥзьыса анаын, бусыын Му Кылчинлы вӧсясько. Кукей буяло. Му Кылчинлы куинь буям кукей гуало.

• Вожодыр, Инвожо – инвожо толэзе. Шундылэн гужем берытскон вакытэз. Лек лулъёс кыре пото. Чакласькыса уло, мултэс уг кесясько, вуэз уг пожало.

• Вӧсяськонъёс: Нырысетӥ нунал – кизем юос понна вӧсяськон. Кыкетӥ нунал – Быдӟым Инмарлы вӧсяськон. Куинетӥ нунал – Му Кылчинлы вӧсяськон. Ньылетӥ нунал – Быдӟым куалаын вӧсяськон. Витетӥ нунал – Лудын вӧсяськон. Куатетӥ нунал – Акташе вӧсяськон. Сизьыметӥ нунал – Куяськон.

• Юа бичан – егитъёслэн шулдыръяськонзы. Гыркмас шур дурысь Суллё возьын юа бичало.

• Бусы сюан – гуртамы кык нунал ортче. Гуртмес кыклы люкыса бызе Тайвади шурмы. Нырысетӥ нуналаз – ӟег нырысь куд пала кизизы, нош кыкетӥ нуналаз – мукет палан. Сэбедэ егитъёс но быдэс гуртысь калык люкаське. «Корка воштон». Чокморъёс лыкто. Урам кузя тубо. Сюанчиосты урам кузя куно каро. Бусы дурын «корка воштон». Исаськонъёс. Бусы сюан бере шулдыръяськонъёс.

• Гужем юон – 12 пӧсьтолэзе. Быдӟым куалаын вӧсясько. Вӧсьнерге ветло.

• Турнаны потон.

• Веник бичан нунал – гужем юан бере ньылетӥ нуналаз. Быдэс гуртэн мыно веник бичаны. Котькуд семьялы нимаз инты висъяло.

• Турнаны потон – Сялтым (Чалтым) вӧсян. Таяз аре бызем выль кенакъёслы Чалтым вӧсян ортчыто. Собере ваньзэсты вуэ куяло.

• Виль – 2-тӥ гудырикошконэ. Выль вуэм ю-нянен пӧрасько. Ваче куное ветло.

• Араны потон – вань гурт калык бусые араны потэ.

• Сӥзьыл кисьтон – коньывуон толэзьлэн кутсконаз. Сое одно ик ортчытоно Пукро нуналлэсь азьло. Пукро бере кисьтонъёс уг луо ни. Сӥзьыл кисьтон – кулэм муртъёслэн «сӥзьыл юонзы». Кисьтонлы пӧрасько. Бӧлякъёслы ивор сёто. Кисьтончиосты куно карон. Пересьёслы куяськон. Выль кулэмъёслы куяськон. Келиськон. Коркась корка кулэмъёсты юмшатон. Кулэмъёсты ӵукна келян.

• Пукроу (Пукро – 14-тӥ коньывуонэ). Пукроен герӟаськем тодметъёс. Табань пыжон. Сое вӧсян, семьяез куно карон.

• Сӥзьыл юон – 7-тӥ толсуре. Сӥзьыл юонлы дасясько. Табань пыжо. Юртысь куалаын вӧсясько. Лудын вӧсясько. Вӧсьнерге ветло. .