Ар вакытлы тупась йылолъёс

Бусы сюан

Арлэн тужгес но чебер вакытаз, инвожо толэзе, милям Салья гуртамы ортче «Бусы сюан». Юан кылдэ: ма со сыӵе, кыӵе солэн пуштросэз, кинлы, малы со сӥземын? Пересь анайёслэсь юалляськыса, мон трос пумо верамъёсты кылӥ. Одӥгъёсыз шуо, «Бусы сюан», пе, анай-атайтэк кылем муртъёс понна ортчытӥське вал. Мукетъёсыз та сэбедэз герӟало егит дыръязы улонысь кошкемъёсын. Нош ми сямен, та сэбед гуртын улӥсь но будӥсь егитъёсты дышетэ Музъемез данъяны, малы ке шуоно гуртын улӥсьёс сое туж умой валало но сӥлы каро. Сотэк-а Быдӟынналэ Му-Кылчинлы бусые куинь ӵуж буям кукей сого. Гуртын улӥсьёс оско: Му-Кылчинэз данъяд ке, няньтэк уд кыльы.

Удмуртъёс шулдыръяськонлы бадӟым саклык висъяло ке но, котьмалэн аслаз дырыз. Ужаку – ужано, шулдыръяськыку – шулдыръяськоно. Гырон-кизён ужъёс йылпумъяськыса вӧсяськем бере кутске та сэбед. Сальяос сяна, «Бусы сюанэз» тодо вылэм Нӧднюк Починка, Нӧднюк, Куӵосъёс, Вуж Тӥгырмен, Выль Тӥгырмен, Уддяди, Кибья, Ляли, Омга, Ӟатча, Аксакшур гуртъёсысь егитъёс. Малы егитъёс? Та егитъёслэн сэбедзы.

«Бусы сюан» ортчон нуналэ котырысьтымы дас кык удмурт гуртъёсысь егитъёс дырто вылэм Салья гуртэ. Гыркмас (Кырыкмас) шур дурысь Суллё возе люкасько соос. Котькуд гуртысь егитъёс асьсэлэсь арганчиоссэс ваё вылэм. Зэмос конкурс ортче отын: кин чебер эктоз, кин шулдыр кырӟалоз. Таӵе пумиськонын ик егит пиос но нылъёс ог-огзэс синйылтылӥзы, собере ини семья но кылдытъязы. Соинтэк-а та гуртъёсысь шедьтыны луэ салья кенъёсты.

Вашкала дыръя одно ик котькудӥз пинал ныл бурлат шортдэрем, туго кышет, уксё тӥрлык, пыдазы укмысо кут, йыразы уко туг дӥсяллязы. Кинлэн сыӵе чебер дэремез вылымтэ, ӵыжы-выжыоссылэсь куро вылэм. Котькудӥзлэн возь вылысь сяськалы кельшемез потэ уго.

Салья гуртмес Тайвади шур кыклы люке бере, та сэбед но кык нунал кыстӥське. Ӟегез Ваннапала кизизы ке, «Бусы сюан» нырысь шур тапалан ортчоз, нош кыкетӥ нуналаз – Пор палан. Ӟег – удмуртлэн тужгес но яратоно тысез. Кылэмды вань, дыр, котьма ласянь синмаськымон муртэ «ӟег нянь кадь ӟеч адями» шуыса верамез.

Шунды пуксён вакытэ гуртысьтымы вань калык ваське та юмшанэ. Мӧйыос но пиналъёс – сюан учкыны, нош егитъёс – сюанчиос. Ог дасо пала арганчиос люкасько. Пересьёс вуытозь, пӧртэм пумо шудонъёс шудо.

Калык вуэм бере ваньмыз шыпытак карисько. «Бусы сюан» одно ик кутске бусы дурын. Нылъёс нуназе пала ымнырынызы ӝыны круг кылдыто но ог-огзы борды кунултӥськыса кырӟаны дасясько. Сюанчиослы пичи нылъёс но пиос чебер сяська керттэтъёс, кызьпу вайёс кузьмало, соос чибиньёслэсь утиськыны юрттозы. Собере гуртысь пересьёс кырӟан мыто. Со – «Бусы сюан» гур.

Огшоры дыръя со гурез уг но кырӟало, нош туннэ – со кык-куинь яке ньыль час чик но уз дугдылы. Мон уг тодӥськы, кыӵе удмурт сэбед куинь-ньыль час чик дугдылытэк азьланьтӥське. Оло нош та сэбед удмурт юмшанъёсысь самой кема кыстӥськисез? Асьмелы, удмуртъёслы но, кулэ, дыр, сюлмаськыны та выллем рекордъёслы сӥзем лыдпусъёсты пусйыса кельтон сярысь, дунне вылын вань ук Гиннесслэн книгаез, оло, отчы но пыртыны луысал?

Вашкала дырысен сэбедлэн кутсконэз тыл аратэмлы кельше. Пересь анайёс бусы сюан гурез кутско но, сое азьланьто егитъёс. Со кутскем гур сэбед бырытозь уз дугды ини. Тани кыӵе кылъёсын со кутске: 1. Осто гинэ, Инмаре но,

Быдӟым гинэ Инмаре!

Сизьымдон но дышмонъёсыз

Пыд уламы лёгалом,

Вылысь гинэ, ой, Инмармес

Йыр йыламы ӝутомы.

2. Ой, возьма, дыр, возьма, дыр,

Милям ӟег но бусымы,

Тулкымъяськыса, веттаськыса,

Сяськаоссэ сюреласа.

3. Оло гинэ лыктоно но,

Оло гинэ лыктонтэм.

Ми пинал но, ой, визьтэмъёс

Лыктоно но кожамы.

4. Осто гинэ, Инмаре,

Быдӟым гинэ Инмаре!

Куинь бусые пазьгем няньмы

Ньыль бусые мед пушъёз.

Гожтэм такмакъёсысь нырысетӥ куплетэз пумиське на сюан но вӧсьнерге кырӟанъёсын. Та кылъёс вань сэбедлы кутскон сёто. Кырӟаны кутскыку, кытысь ке чокморъёс вуо. Чокмор дӥсяськыны быгатэ гуртысь нылмурт яке пиосмурт. Соос нокинэн но уг верасько. Ымныръёссы ватэмын, вылазы дӥсямын берыктэм шубаос, дукесъёс яке удмурт нылкышно дэремъёс, куд-огез бадӟым шароваръёсын дӥсяськемын.

Чокморъёслэн киязы кузь боды, та сэбедын соос вань калыкез шулдыртыны, серекъятыны кулэ. Нылпиослы тужгес но паймымонэз – чокморъёс. Учкисьёс ӵем дыръя чокморъёсты пушнерен но йӧттыло. Чокморъёс соосты уйыло но калыкез серекъято.

Бусы дурын сюанчиос куинь пол «корка воштон» ортчыто. Одӥг вамыш лэсьто но мукет корка пырем каро. Тазьы кырӟало:

Ой, возьма, дыр, возьма, дыр, ук

Первой гинэ коркамы.

Отчы гинэ воштӥськытэк

Амалъёсмы, ой, ӧвӧл.

Чузъяське жингрес эктон гур. Егитъёс вань мылкыдзэс поныса экто, шулдыръясько. Татын кырӟаны луэ пӧртэм пумо такмакъёс: егитъёс сярысь, яратон сярысь.

Капчи каре, капчи каре,

Капчи каре шудӥсьлы.

Капчи каре шудӥсьлы но,

Мылкыд каре эктӥсьлы.

Эктыны ке мон потӥсько,

Бурзэ пыдме люкисько.

Сизьымзэ яратӥсько но,

Огез понна бӧрдӥсько.

Ой, апае, апае,

Маин чебер апае?

Йырсиоссэ ваё пунэм,

Соин чебер апае.

Эктон йылпумъяськем бере тазьы кырӟало:

Ой, таулэ, таулэлэ,

Та куанылэм интыосмы.

Ойдолэ но мыныломе

Талэсь шулдыр интые.

Озьы куинь пол «корка воштэм» беразы сюанчиос, ваче кунулскыса, ураме пыро, чик дугдылытэк кырӟало. Милям гуртамы улӥсьёс тодо: Бусы сюан дыръя урам кузя шурлы пумит кырӟаса тубоно. Кылсярысь, вӧсьнерге ветлон но шурлы пумит тубо, нош кисьтон дыръя шур быземъя коркась корка пыраса уллань васько. Урам кузя тубыкузы, сюанчиосыз одно ик куно карисьёс сюрозы. Кин корка вадьсаз пӧраськемъёсын сылэ, со вӧзы сюанчиос дугдо но кышномуртэз данъяса кырӟало:

Ой, возьма, дыр, возьма, дыр, ук

Милям Маня апаймы.

Азьвыламы пӧраськемен,

Кабак гинэ винаен.

Тӥлесьтыд но та ӟечъёстэс

Тодылыса, туганэ,

Кемалась но, ой, кемалась

Возьмалляса ми улӥм.

Вашкалаос шуозы вылэм: бусы сюанчиосты куно карид ке, коркад шудбур но тазалык каръяськоз. Соин ик кинлэн маиз вань: вӧен яке чечыен нянен, пӧраськемен, мусурен, ческыт аракыен – одно ик куно карылыса лэзьяллязы. Сюанэз учкись куноос но гуртоос сюанчиос бӧрсьы кырӟаса тубо. Егит пиос чебер нылъёсты синйылтылӥзы. Урам кузя тубыса, нош ик бусы доры лыкто. Кутсконаз сямен ик «корка воштон» ортчыто. Куинь корка воштон луэ. Шулдыръяськыкузы кырӟало пӧртэм такмакъёсты.

Салья дано, Салья дано,

Салья маин но дано?

Италмас кадь пиосын но

Мак сяська кадь нылъёсын.

Милям пиос туж кужмоесь,

Тараканэз но вормо.

Тараканэз но вормо но,

Шырез гадьтӥз сэзъяло.

Отӥ лыкто машинаос,

Фараоссы чиляса.

Татӥ лыкто салья пиос,

Нырулъёссы чиляса.

Оти но ӟичы пытьы но,

Тати но ӟичы пытьы.

Та салья но, ой, пиосмы

Ваньзы пу пилён нушы.

Ой, агае, агае но,

Маин чебер агае?

Йырсиоссэ выллань сынам,

Соин чебер агае.

Ой, апае, апае,

Маин чебер апае?

Йыраз керттэм сатин кышет,

Соин чебер апае.

Сьӧд кышетэ бер пужыё,

Бер пужыез – мак сяська.

Та салья но, ой, пиослэн

Кисъёсазы бутылка.

Кырӟалэ, кырӟась эшъёсы,

Мынам уг лу кырӟаме.

Сюлэм вылам секыт лыктӥз,

Уг валаськы марлызэ.

Та Салья но, ой, пиосыз

Эгыр мешок карысал.

Эгыр мешок карысал но,

Куатыр- куатыр лёгасал.

Шиш тӥледлы кедра мульы,

Кӧмзэ музысь бичалэ.

Шиш тӥледлы салья нылъёс,

Асьтэ гуртысь утчалэ.

Салья гуртын улӥсьес понна тужгес но тунсыко люкетэз – исаськонъёс. Пинал нылъёс пӧртэм муген та сэбедэ потыны уг быгато. Соин ик кин ӧз поты та шулдыръяськонэ, быдэс гурт азьын туганзэс верало. Кылсярысь:

Ой, йӧно ик, йӧно ик ук,

Милям Турпуз Санямы.

Татчы лыктыны со возьдаське,

Лудкеч Сеняен ветлыны уг возьдаськы.

Ой, йӧно ик, йӧно ик ук

Милям Ёрок Нинамы.

Татчы лыктыны со возьдаське,

Падей Валикен ветлыны уг возьдаськы.

Ой, йӧно ик, йӧно ик ук

Милям Савать Олямы.

Татчы лыктыны со возьдаське

Закар Веняен ветлыны уг возьдаськы.

Ой, йӧно ик, йӧно ик ук

Милям Быле Валямы.

Татчы лыктыны со возьдаське,

Ляли пиосын ветлыны уг возьдаськы.

Ой, йӧно ик, йӧно ик ук

Милям Патан Тонямы.

Татчы лыктыны со возьдаське,

Тӥгырмен пиосын ветлыны уг возьдаськы.

Кинлэсь туганзэ уг тодо, сыӵе нылъёсты «пал сапеген» но исало. «Мунчоысь мунчое ветлыны уг возьдаськы», шуо. Исаськонъёс бырыку, тазьы кырӟало на:

Ой, эшъёсы, эшъёсы но,

Вожъёстэс эн ваелэ.

Тӥ ке татчы потысалды,

Ми тӥледыз ӧм исасалмы.

Исаськонъёс бере кутске малы лыктэмлэсь мугзэ ивортон.тУчке ай кыӵе кылъёс вераса кырӟало сюанчиос:

Осто гинэ Инмаре но,

Быдӟым гинэ Инмаре!

Музъеме пазьгем ю тысед

Ӟечкын гинэ мед кисьмалоз.

Осто гинэ Инмаре но,

Вылӥсь гинэ Инмаре!

Пазьгылэм но ю тысьмы вылэ

Шуныт зоръёстэ но сёт.

Осто гинэ Инмаре но,

Вылӥсь гинэ Инмаре!

Удалтэм ю тысьёсмы но,

Ву тулкым кадь мед тулкымъяськоз.

Осто гинэ Инмаре но,

Быдӟым гинэ Инмаре!

Кизем ю нянь бусыосмы

Азвесь шапыкен мед шобырскозы.

Та такмакъёс бере сюанчиос кырӟало на берпуметӥзэ:

Куанон быриз, куанон быриз,

Куанон ваньмыз ик быриз.

Шудон быриз, шудон быриз,

Шудон ваньмыз ик быриз.

Тае кырӟаку, вань чокморъёс ымнырзэс усьто. Котькинлэн тодэмез потэ, кинъёс меда поталлязы таяз «Бусы сюанэ» чокмор луыса.

Тӥни озьы милям гуртамы ортчылэ та аспӧртэмлыко юмшан. Бусы дурын кема чузъясько на арганэн шудонъёс, эктонъёс. Пинал нылъёс но пиос дырто клубе, нош пересьёс но пиналъёс берто доразы.

Ӵуказеяз таӵе ик «Бусы сюан» ортчоз шур сопалан.

«Бусы сюан» йылпумъяськем бере пересь анайёс но атайёс ӝук пӧзьтыса вӧсясько на, Инмарлэсь курисько. Со куриськон кылъёс мукет сэбедъёсын куриськонъёслэсь туж ик уг висъясько.

Та шулдыръяськонын вань языческой тодметъёсыз но. Соос юн герӟаськемын калыклэн улон шоры учкеменыз. Котькудӥзлэн та дуннеын вань аслаз кузёез. Со кузёосын тупаса но эсэпсэ шедьтыса улоно.

Дуннеысь котькуд калык маин ке но висъяське. Удмуртъёс вашкала дырысен тодмо музъем ужен выременызы, нянез тужгес но сӥлы каременызы. Няньлэсь бадӟым номыр ӧвӧл. Соинтэк-а анай-атайёс кузь сюрес вылэ потӥсь муртэ вӧен нянь веръято. Ӝӧк вылэ одно ик пуктозы нянь колды. Нянь ке вань, кырӟан но вань. Вашкалаосмы асьсэ шулдыръяськоназы туж быгатыса пыртылӥллям нянез данъян но дунъян мылкыд пыӵатон понна .

Сялтым вӧсян

Азьвыл аръёсы турнаны быдэс гуртэн пото вал. Кыӵе но аспӧртэмесь мадёсъёс уг кыло вал егитъёс мӧйыослэсь ӵош ужан, ӵош шутэтскон вакытэ. Вашкала дырысен пиналъёс понна уртче ужан зэмос школа вал. Пельысь пеле кылыса, вашкалаослэн сямъёссы, йылолъёссы пыр ӟечезлы дышетскыса, будӥзы гуртысь пиналъёс.

Мынам туннэ тодматэме потэ Салья гуртын турнан вакытэ ортчись туж аспӧртэмлыко сэбедэн. Сое ми палан «Чалтым (Сялтым) вӧсян» нимало. Кинлэсь гинэ ӧй юа, нокин но валэктыны ӧз быгаты «чалтым» кылэз. Нош та сэбед сярысь тани ма вераз Кияса ёросысь Салья гуртын вордскем Александра Петровна Миронова.

– Нуназе вуэ ке, турнасьёс ваньзы огазе кабан доры сиськыны лыкто ини. Турнасьёс пӧлын кин ке но сӥльын шыд пӧзьтэ. Ой, кыӵе ческыт кошке со! Жадем мугорез быдэсак бугыртэ кадь. Озьы кӧня ке сиськем бере вань жадем ик быре. Шулдыртэм, серектэм но потэ. Котькуд аре гуртын егит семьяос кылдо: кин ке но бызе, кин ке но кышно басьтэ. Турнан вакытлы со выль кенъёсты син азязы возё ини. Турнасьёс пӧлын сыӵеос вань ке, шаплы кышномуртъёс асьсэ куспын кенешо: –

Кышноос, чалтым вӧсян вань.

– Кин? – Ма, тӥни ук, Падей Олексанлэн Зояез. Туэ Вуж Тӥгырменысь ваемын. Тон, Сандра, лушкемак вера анайзылы, бискыли мед пыжоз но тон сьӧры ик мед лэзёз.

– Ой, нылъёс, ну ортчытом ке, ортчытом ини Чалтым вӧсян. Ой! Сюлмы ик дыг-дыг тэтчаны кутске. Тон, Надёк апай, чебер кылъёстэ дася.

Озьы лушкем малпам уж ӵуказеяз нуназе сиськон вискын ортче. Сиськемзы бере выль кен номыре но уг тоды на. Шаплыез кышномурт кабан йылэ тубе но выль кенлэн анаеныз, пыжем бискылиез кутыса, кыла-бура:

– Осто, Инмаре! Зоя но Олексан понна Чалтым вӧсян ортчытӥськом.

Выль кен, аслэсьтыз нимзэ кылыса, пегӟыны ӧдъя. Сое одно ик куто но кабан доры ваё. Выль кенэз медаз пегӟы шуыса, кык кузя возё.

– Бен малы одно выль кенлы пегӟыны кулэ?

– Возьдаськоно вал. Та Чалтым вӧсянын олокыӵе но визьтэм кылъёс верало.

Нош гуртоос понна со серекъян-шудон гинэ. Кылсярысь, таӵе кылъёс верало:

– Олексанлэн потыку, Зоялэн сётэмез мед потоз. Аминь шуэ!

Вань калык «аминь» шуэм интые, гурак серектэ.

– Зоялэн кӧжы пуртэсэз куасаськем сӥес кадь мед усьтӥськоз! Олексанлэн жеребей нушы йыр быдӟа мед луоз! Аминь шуэлэ!

Калык нош ик гурак серекъя. Нош кабан йылысь кышномурт уг буйга на, олокыӵе но визьтэм кылъёсын веранзэ азьланьтэ. Веранзэ тазьы йылпумъя:

– Тазалыксы мед луоз. Шур дурысь бадь пушъет кадь корка трос нылпи мед вордозы. Аминь шуэлэ!

Кабан йылысь васькыса, кылысь-бурась нылкышно бискылиез нырысь ачиз пичи гинэ чигтэ но веръя, собере ваньзы пичиен оскалто ини.

Собере, Гыркмас шур дуре мыныса, выль кенэз вуэ кушто. Выль кен бере шуре вуэ ни вӧсясь, нылэз кутыса возисьёс но вань мылкыд карисьёс.

Тӥни озьы туж шулдыр ортче вал гуртамы Чалтым вӧсян. Нуназе озьы шулдыръяськемзы бере вань калык ӝутскем мылкыдын кутске уж борды .

Юа бичан

Берло аръёсы трос но трос вераськомы азьвыл аръёсы егитъёс пӧлын ӝужам тужгес но чебер, синме йӧтымон сэбедъёс сярысь. Туала егитъёслы туж тунсыко соосын тодматскыны.

Мынам тодамы вайытэме потэ 1960-тӥ арозь Салья гуртын возиськем туж чебер сэбед сярысь, со – юа бичан.

Тодэ лыктэ таӵе мадёс. Куке но вашкала дыръя ми пала пегӟыса вуиллям куинь семьяос. Соосын кивалтӥллям туж чебер но визьмо кышномуртъёс. Бадӟымезлэн нимыз Салля, нош шорысезлэн – Суллё, нош пичиезлэн – Сари. Салля интыяськем Тайвади шур дуре, нош пичи выныз – Гыркмас (Кырыкмас) шур котыре. Ог-огзэс та егит адямиос туж яратӥллям. Соос кыкназы ик усто пӧйшурасьёс вылӥллям. Ог-огенызы ӵошатскыса коньы кутылӥзы, пе.

Озьы, ӵош ужаса но ог-огзылы юрттыса, улӥллям кык вынъёс. Ми палан соку потыны луонтэм нюлэс вылэм. Но та кык шӧртчиос ог-огзылы толалтэ куасэн тыл но сэрегпум вуттылӥзы.

Кема кыстӥськымтэ Суллёлэн улонэз. Одӥг нуналэ Салля доры солэн пинал кышноез бӧрдыса вуэм. Гыркмас шурлэн вылӥяз ватӥллям Суллёез.

Трос аръёс ортчизы ини со дырысен, нош Салья гуртын улӥсьёс али но ветло на Гыркмас дорысь Суллё возе. Та возь выл туж узыр вылэм пӧртэм емышен: узы, боры, кудымульы, сутэр, губи, шу, льӧм – ваньзэ татысь нулло вылэм. Нош льӧмпу сяськаяськыку гуртысь егитъёсты магнит сямен кыске юа (ӟуч сямен ми палан сое «дикий чеснок» шуо). Шӧмыз солэн чеснок кадьгес, но ыме ческытэз кыле. Тулыс, витамин тырмымтэен, та юа туж ческыт потэ вылэм гуртоослы.

Юа бичаны ветлӥллям арня нуналэ, чебер выль кутъёссэс кутчаса. Пиос выль укмысо кут кутчало, нылъёс – бурлат-шортдэрем, киязы но йыразы – укоос, возь вылысь чебер сяськалы укшало вылэм. Юа бичамзы бере шулдыръясько.

Таӵе чебер возез синйылтыса, татчы вуылыны кутскиллям Починкаысь, Вужгуртысь, Куӵосысь егитъёс. Озьы тодматскыса, егит нылъёс но пиос асьсэлы пар но шедьтылӥзы. Пельысь пеле кылӥськыса, аръёс бӧрсьы аръёс ортчемъя, егитъёслэн та сэбедзы паськытаз но паськытаз. Котькуд ар таӵе пумиськонэ вуылыны кутскизы трос но трос гуртъёсысь егитъёс: Уддядиысь, Выж Тӥгырменысь, Выль Тӥгырменысь, Аксакшурысь, Бӧдьяысь, Кибьяысь, Лялиысь…

Мон али малпасько но паймисько: малы кулэ вал гырыны сокем чебер возез? Озьы Суллё возь пӧрмиз бусылы. Вашкала дырысен азинскем но чеберскем Юа бичан сям пашмиз. Нош кыӵе воштӥсько синъёссы мӧйы муртъёслэн, юа бичан сярысь юаку. Тани ма вераз мыным Екатерина Родионовна Никифорова (вордскемын 1919 арын Вуж Салья гуртын):

– Пичи дыръямы юа бичан сярысь анай-атайёсмы милемлы данъяськыса верало вал: «Вот, нылы, бадӟымгес будӥд ке, тон но ветлод ай юа бичаны. Али будыны кулэ на, кут кутаны дышетсконо, чебер эктоно, шулдыр куараен кырӟано. Маин паймытод тон люкаськем калыкез? Кин тодэ, оло, вуоно кузпалдэ но отысь ик шедьтод ай».

Ӧжыт будэммыгес бере пересь анайёсынымы ӵош ми но ветлӥськом вал юа бичаны. Со Суллё возь Гыркмас кузя кыдёке кыстӥське вал. Отчы вуыса адями ачиз но сяськалы кельше. Сыӵе чебер татын инты! Кошкем но уг поты, ява!

Ми возь вылысь юа, колыс бичаськом, собере дыртыса егитъёслэсь шулдыръяськемзэс учкыны мынӥськом вал. Концерт но тӥни! Татчы арганчиосын вуо вал починкаос, вужгуртъёс, куӵосъёс, тӥгырменъёс, уддядиос. Нош кыӵе чебер дӥсяськемын соос!

Вот ӵошатскон ке ӵошатскон вал ини отын. Нырысь ик эктыны пото. Азьло угось одӥген, кыкен, куинен, ньылен, куатен, тямысэн эктылӥзы. Ми дыръя шудыны яратӥськом вал «Шаль кышетэн», «Ӟазег уя, ӵӧж уя» шудонъёсын. Татысен ик ог-огеныд тодматскон но луэ ини.

Ми асьме палась вань гуртъёсысь огъёзъёсмес тодылӥмы, нимын вазиськылӥмы. Азьло адями сабырлы вал уго. Ог-огзэ гажаз, юрттылӥз. Кӧня тодӥсько, ноку но жугиськон, керетон ӧз луылы. Ӵош шулдыръяськылӥм. Куинь арня ӵоже юа бичаны вуылӥм, нош отӥяз вань калык Сальяла «Бусы сюанэз» адӟыны тубылӥз. Туж шулдыр луэ вал! Мынам вань нылъёсы адӟизы со шулдыръяськонэз. Али юа но кытын но отын гинэ на будэ.

Тӥни сыӵе вылэм со «Юа бичан». Мон малпамъя, оло зэмзэ но вань егит сюлэмъёсты огазеяз улонысь вазь кошкем Суллё? .