Ручкина Светлана

Куинь сяськалэсь тугоко

"Малпан" группа

Соос егитэсь. Луэ-а нылъёсты удмурт кизилиос ниманы? «Малпан» группа – син азямы быдэ вуэм маке – туала шоу-бизнеслэн куронъёсызъя пӧрмытскись но синъёсты шумпоттӥсь. Нош матын-а та куронъёс удмурт эстрадалы дышем адямиослы? Валалоз-а Анна Плотниковалэн, Геннадий Ганьковлэн но Валентина Пудовалэн учкисез выль шӧмъёсты? Эльвира Панченкоен, Светлана Ручкинаен но Наталья Ушаковаен «Шулдыр ӝыт» театрын ӵош ужасько бере, таӵе юанъёслы валэктон ӵем утчасько. Кызьы пыртоно удмурт сцена вылэ выль, туала мылкыд? Кызьы сое удмуртъёслы выжыятоно – учкисьмы угось консервативной, шуыны луоз…

Лемлет малпанысен – филармониозь

«Малпан» кылдӥз 2004-тӥ арын чылкак егит нылашъёслэсь. Соку Марина Галичанина, группалэн лулчеберетъя кивалтӥсез, Ижысь Октябрь ёросысь Нылпи творчествоя центрын тыршиз. Отысен ик егит кырӟасьёсты бордаз люканы ӧдъяз. Со вӧзын будӥзы но тодон-валан басьтӥзы «Шунды» огазеяськонлэн правлениезлэн та вакытэ кивалтӥсез Юлия Никитина, Снежана Эскендерова, Елена Севастьянова… Группаын тужгес но кема кырӟа ини Эльвира Панченко. Нош 2005-тӥ арысен «Малпанын» жингрес куараеныз шумпоттэ Алнашысь уӵы Светлана Ручкина. Филармониысь «Шулдыр ӝыт» театрлэн воштӥськон вакытаз – 2008-тӥ арын – «Малпан» группа дуэт гинэ кылиз: Света но Эльвира кылдытӥзы «Malpan XXL» проектсэс.

Группалэн лулчеберетъя кивалтӥсез Марина Галичанина декрет отпуске кошкем бере нылашъёсты «будэтон» борды басьтӥськиз продюсер Павел Поздеев. Мариналэн, оло, ӝож мылкыдыз но кылдӥз. Но со вакытэ нылашъёс кылдытӥзы тужгес но узыр кавер-программазэс (мукет артистъёслэсь удмуртэ берыктэм кырӟанъёссэс)! Соку ик туж ӝог тодмо луизы егитъёс пӧлын.

2010-тӥ арын группаын мукет воштӥськонъёс ортчизы: вуиз куиньметӥез кырӟась – Наталья Ушакова – «Шулдыр ӝыт» театрын пичи дырысеныз будэм-кыдам нылаш. Зэмзэ вераса, Наташа нырысь мурт кадь потӥз, но со ачиз рос-прос басьтӥськиз группае пыӵан борды: нуналмысь тыршыса, дышиз «малпанъёслэн» кырӟан амалзылы, эктон выросъёссылы, сямъёссылы. Кыкетӥ арзэ ини нылашъёс куинь кузя ужало. Куинь быдэ вуэм солист, куинь жингрес куара, куинь чебер сяська – одӥг тугокоын.

Астэ ачид вуза!

Нылъёсын пумиськоно кариським Удмурт театрын, «Дэмен – Выль арен!» концертын. Гримёркаын гань-гань вераськон пӧрмоз, пе! Эльвира ышыны вуиз: со, пе, али сцена вылын, Алексей Ложкин артистэн берга-эктэ. Ракета шуонэ – кудые – пуксьыса, космонавтъёс музэн, дуэтэн кырӟало вылэм. Со вакытэ Света но Наташа театрлэн фойеяз календарь вузано кариськизы. «Удмурт дунне» газетмы соослы сыӵе кузьым дасяз – вуоно арлы календарез соослэн мусо туспуктэмъёсынызы чебертӥз. Нылъёс эшшо шаплы кариськиллям: Выль арлы сӥзьыса, яркыт магнитъёс, открыткаос печатлаллям на.

Дуннелэсь бере эн кыльы!

- Нылъёс, табере вералэ: кызьы тӥ та калэ вуиды – асьтэос вузаськыса сылӥськоды?

Света: – Нош мар карод. Сыӵе милям калыкмы! Ачид ке ӧд мыны, ӧд ке мычы, уз но вала, мар та, ма соин кароно.

Наташа: – Малпай: ми ке ӧм, кин-о басьтӥськоз коммерция борды? (Серекъя).

- Тани ма бордын ужпум! «Малпан» группалэн ӧвӧл шат продюсерез?

Света: – Ӧвӧл…

Наташа: – Вань лулчеберетъя кивалтӥсь. Но сое продюсерен ниманы секыт. Марина Галичанина крезьгурен выре, репертуарез эскере, куарамес пуктэ, кырӟанъёс гожтэ. Нош продюсер быгатыны кулэ, кызьы шуиськомы, продуктэз калык дорозь вуттыны. Али ми асьмеды асьмеос ик пиарить кариськом.

Эля: – «Мalpan XXL» проектын продюсер чотын вал Павел Поздеев. Со проектлэн малпасез, мылкыд сётӥсез луиз, но сое но продюсерен ниманы ӧй луысал.

- Син азяды пуктэ: вылысьтыз вылаз гастрольёс, бадӟым сцена. Таиз вань-а тӥляд туннэ нуналлы? Мар тӥледлы уг тырмы быдэс дунне тыр чузъяськись луон понна? Продюсер гинэ шат?

Света: – Шуом, кылдысал ке ужпум «Малпан» группаез Европае яке эшшо кыдёкегес кунгож сьӧры поттыны (кытын вань шоу-бизнес, кытын со ас куронъёсызъя азинске) – продюсер одно ик кулэ луысал. Со сяна, хореографъёс, стилистъёс. Соос рос-прос ужасалзы выросъёсмы бордын, пуктысалзы эктонъёс, кенеш сётысалзы вылтус ласянь.

Наташа: – Костюмъёс – со милемыз котькыӵе вакытъёсы чепыллясь юан! Шундыпуксён палан вань таин вырись нимысьтыз адямиос – имиджмейкеръёс. Милемын котькудӥнымы таӵе специалист мед ужасал. Со бордысь угось быдэс группалэн тусыз потэ, сцена вылын огъя суред кылдэ.

Света: – Со сяна, одно ик выльдоно репертуарез, фонограммаослэсь ӟечлыксэс. Конешно, милемын ужа зэмос профессионал (Александр Коновалов – Удмурт филармониысь «Life-music» студиез кылдытӥсь – авт.) Но озьы ке но сюлэм мае ке выльзэ куре… Фонограммаос одӥг кадесь пӧрмо, соосты угось одӥг мурт лэсьтэ – таиз шӧдӥськытэк уг кыльы.

Наташа: – Нош мыным уг тырмо куараез туала карись амалъёс…

- Крезьгур гожтонысь выль ӧръёс – трендъёс – сярысь юатэк уг чидаськы. Ачим диджей бере, тодӥсько, макем со лэчыт ужпум: техника воштӥське, аранжировка куараос но выльдӥсько, выль крезьгур ӧръёс кылдо. Кызьы соос сьӧры уйиськоно?!

Наташа: – Бен, быдэс дуннеын модае пыремын ни тенденциосты чакласа возён, соосъя тупатскон!

Света: – Мынам мылкыдыя – улэп куараос, луло сэмплъёс (цифра амалъя гожтэм крезьгур люкет – авт.). Фонограммаез соос узыргес каро.

Та вакытэ антракт кутскиз. Фойее лобатӥзы концерт залэ люкаськемъёс. Кин буфетын гусъяське, кин дискъёсын-книгаосын вузчиос дорын берга. Тани «Малпанъёс» котыре но дыртӥсьёс сюризы – кык лать-лать кышномуртъёс, удмурт дэремен. Йыре малпан чилектэ: Лымы ныл дӥсен шоголляськись нылъёс шоры учкыса, малпасько-а меда таос «тренд, сэмпл, аранжировка» кылъёс сярысь? Таӵе учкисьлы «шулдыр удмурт кырӟан» кулэ! Озьы ке но календарез басьтӥсь ӧжыт ӧз луы. Мусо пальышась апокъёсты автограф но гожтӥськытӥзы…

Чеберез кылдытон

- Нылъёс, тӥ артистъёс, соин ик котьку чебер луыны кулэ. Уд акыльтӥське-а син азьын луыны?

Света: - Ми огшоры нылъёс ук. Рос-прос образъёсмы но ӧвӧл.

Эля: – Образъёсмы милям ӧвӧл, таиз зэм. Но ми пӧртэмесь.

Наташа: – Ми мультфильмысь «Смешарикъёс» кадь! Ваньмы пӧртэмесь, но ог-огмылы кельшиськом. (Пальпотэ).

Света: – Чебер луон сярысь верано ке… Астэ сыӵеен яратоно, кыӵе тон вань. Но одно ик шедьтоно лулпуш гармониез – со вылтусад но одно ик выжоз.

Наташа: – Валамон, чебер луон понна выроно спортэн. Мон фитнес-клубе ветлӥсько. Азьло школаын физкультура урокъёс вал, нош мугордэ кыдатон сярысь табере аслыд сюлмаськоно. Тренировкае толэзьлэсь кема уг ветлӥськы ке, асме урод шӧдыны кутскисько. Со сяна, чакласько ма сиемме, кӧё-вӧёзэ уг ик веръяськы, ческыт пыжосъёсты но палэнтӥсько.

Света: – Мон оскисько: инкуазен сётэм чеберлык – тужгес но дуноез. Но со сяна, валаса радъяны быгатоно нуналдэ, ужъёстэ. Наташа: – Быгатэмъя чеберлыкъя салонъёсы пырасько.

Света: – Нош тужгес но чебер каре яратон! Котькыӵе тон мед луод – астэ чебер возьматыны, адямиослы мусо адскыны быгатӥд ке, мугор шекъёстэ нокин уз синйылты.

Наташа: – Бен, яратон чебер каре. Астэ но, матысь адямиостэ но. Эшшо пушйиськод, тыныд саклык висъяло ке! Шудо луиськод, кылзӥсед вань ке.

Ӟеч – урод

- Нылъёс, тӥ пӧртэмесь, но ӵош ужаса, ог-огдылэсь манеръёстэс но асэстӥськоды, дыр? Тумошо сямъёсты, кылъёсты вань-а?

Света: – Мынам вань яратоно веранэ: «Ну мар ке но со сыӵе…» – уг ке быгатӥськы мае ке валэктыны (cерекъя). Эля ӵем вера тазьы: «Ха-ха-ха! Тунсыко…» Наташа… Наташа мар вералля?

Наташа: – Мон куддыр туж шыпыт, йыг-йыг, малпаськись, нош куддыръя мынам пушкам лампочкае ӝуатске кадь – мон кутскисько шузияськыны, серекъяны, маскаръяськыны.

Света: – Соку Галина Иосифовна (Галина Платонова – Россиысь дано артист – авт.) алэ: «Ма, нылы… шыпытгес!»

Наташа: – Нош Света куддыр туж ӧжыт вераське, нош куддыр пуштэ кадь – дугдытэк мае ке вера, вера. Кыӵе ке учыръёс сярысь ӝутскем мылкыдын маде!

- Вералэ котькудды тужгес но синмаськымон сямдэс. Мар понна асьтэлы кельшиськоды?

Наташа: - Мон пусйысал таӵе сямме: ас азям ужпум пуктӥ ке, мон сое одно быдэсто. Та сямы мынам будэмея кужмоя. Туж шумпотӥсько, Петербурге режиссёрлы дышетскыны пыри шуыса. Та мон понна, меӵак вераса, шуакгес лэсьтэм вамыш вал. Йырам малпан чилектӥз но, мынӥ, тодӥ, дышетскыны пыри.

Света: – Та юанлы мыным вераны туж секыт. Удмурт кун университетын психологияя факультетын тодон-валан люкаме монэ «сӧриз». Умойзэ урод адӟыны дышетӥз, уродзэ – умой паласен. Оло, мынам плюсэ – мон быгатӥсько пӧртэм луыны, пӧртэм муртъёсъя тупатскыны. Но та котькыӵе учыръёсы но умой шат? (Пальыштэ).

Наташа: – Тынад плюсэд – тон семьяедлы туж матын шуыса.

Света: - Мынам плюсэ – мон дэремъёсын ветлыны яратӥсько. (Малпаське). Мон огшоры нылаш. А, эшшо плюс! Мон Алнашысь. (Серекъя).

- Эля, тон туннэ маке туж шыпыт… Кыӵе тынад ӟеч сямъёсыд?

Эля: – Мон… кескич. Та котькуд ласянь плюс, малпасько.

- Ярам, ӟеч палъёстэс тодӥм. Табере урод палъёсыныды тодматском…

Света: - Мон чик но уг быгатӥськы аслым, улонэлы кулэ луись быръёнъёс (выбор) лэсьтыны. Матысь адямиосме коскатӥсько.

Наташа: - Берло дыре нуналме радъяны уг быгатӥськы… Эшшо туж трос уксё быдтӥсько! Коньдонме кулэтэмезлы кисьтӥсько: куэз вольыт карись дуно маска, кильтро сапег, тузӥ дэрем…

Света: – Дэрем сярысь эн вера. Мон со – дэремъёсты яратӥсь!

Эля: – Мынам шеке – уг чидаськы критикаез. Туж секытэн кылзӥсько курланэз.

- Урод мылкыдын кызьы нюръяськиськоды?

Света: – Мон кафее мынӥсько, пукисько огнам, кӧтме тырисько. Куддыр таӵеез укыр ӵем луылэ. Собере асме буйгатӥсько: «Ма, мон тае заслужить кари ук!» Куддыр со муген ик выль дэрем басьтӥсько. «Сайлент ву гур» группаен сцена вылэ кык пол одӥг дӥсен потаны уг яратӥськы. Эшшо вань на татуировкае! Пирсинг но пуктылэме вань. Шуак лыктӥз таӵе мылкыд, котьма кар! Анаен атае, таӵезэ адӟыса, ӧз шумпотэ.

Эля: – Мон яратӥсько пель угы октыны. Пелям пасьёсыз но трос. Яратӥсько дӥсез гладить карыны но посуда миськыны!

Наташа: – Мон синучкон азьын эктыны яратӥсько. Но дорын нокин ӧвӧл дыръя. Крезьгурез золгес лэзисько, мае ке задорзэ, кылсярысь, Кристина Агилераез. Со кадь ик вырисько. Киям мар ке микрофон порма кутӥсько, позыръяськисько, эктӥсько. Со пичи дырысен кылем сям-а мар-а… Но та бадӟым-бадӟым секрет!

- Кыӵеен тодады кылиз пичи дырды?

Наташа: - Мон туж-туж возьдаськись пинал вылӥськем. Будыса кепыранэ пумен ортчиз. Анаеным-атаеным споръяськыны но кутски, ас сяменым карисько табере!

Света: – Мон мамае борды бурмемын вал. Мамалэн нылыз но тӥни. Кытчы ке мамаостэк кӧлыны кыльыны – ноку но! Герӟамын-думемын, кожалод. «Эрки писэй» нима вал ӵужай. Университетын дунне шоры учконэ чылкак воштӥськиз. Мамае дышетӥсь, со котьку шуэ: «Ми огшоры адямиос». Мон валасько, кизили висёнэн медам висьы шуыса, озьы вера.

- Вань, дыр, «Малпан» сярысь супыльтонъёс, кыл вӧлдонъёс но. Кудзэ ке кылэмды вань-а?

Света: – Мон тодӥсько, «малпанъёсты» вылтӥяськись кожало шуыса.

Наташа: – Мыным тросэз шуо: сценаен ӵошатыса, улонын мон чылкак мукет. Фотографиосме адӟо ке, тужгес ик концертъёсысь, малпало, та нылаш кезьыт, дораз эн матэкты.

Света: – Мон, Удмурт филармоние ужаны вуыкум, малпай вал: Наташа милесьтым трослы арлыдогес.

Наташа: Анисимов Коляен Сыктывкаре ветлӥм но, со мыным шуэ: «Кыӵе тон, Наташа, капчи сямо, шулдыр адями! Нош мон кожасько вал, звезда – йырыд урдэмын!»

Эля: – Мыным туж уг кельшы: адямиос монэ нырысьсэ адӟо но монэ кылчин, ненег маке кожало. Собере асьсэос ик ӝожомо, угось малпанзы уг зэма. Эшшо ке монэ янгыше уськытыны туртто.

Наташа: – Вань эшшо супыльтон, группамы куашка шуыса. Кин кытчы пазьгиське, пе: мон – Питере, Света – Финляндие, Эля – Карелие (отын кылдӥз Chupai Eli выль проектэз – авт.). Нош ми нокытчы ум дыртӥське на!

Дыр вуиз…

- «Малпан» группаысь нылъёслэн одно ик асьсэлэн лемлет малпанзы но луыны кулэ…

Света: – Мынам туж потэ, аслам коркае, пиналъёсы мед луозы шуыса… Яратӥсь картэ. Ма, мон но сое мед яратом. Сюлэмелы кельшись уже. Кельшем сяна, со уксё но мед ваёз, уно пӧртэм дэремъёслы мед тырмоз… (Серекъя). Картэлы но, пиналъёсылы но!

Наташа: – Таяз арын аслэсьтым кузме, яратонме мед шедьтом ини, соин улонме мед герӟалом! Со сяна, туж потэ ужын азинскеме, быгатонлыкъёсме интыяз кутэме. Творчествоын мед луозы вормонъёс, соос шумпотон мед ваёзы.

Света: – Вунэтӥ вераны! Мынам семьяе анаелэн-атаелэн кадь мед луоз: гуртэ бертӥськод но – соос отын телевизор ӵошенназы учко, диван вылын, мусо гинэ ӟыгырскыса, пуко.

Наташа: Мон но бадӟым семья сярысь малпасько. Тазалыке тырмысал ке, куинь пинал но вайысал! Ачим семьяям огнам будӥ бере, котьку сузэр-вын сярысь малпалляй. Вань семьяме огазе люканы мед быгатысал – анайме, пиналъёсме…

Эля: – Мынам но потэ быземе… Кыкетӥ ползэ. (Серектэ). Пинал ваеме потэ… Кыкетӥзэ – таяз радэ пи мед вордскоз. Машина нуллысал… Европаетӥ тӧлэн ӵош ворттылысал. Туж потэ Шотландие вуылэме: друидъёсты-язычникъёсты адӟеме, кельтъёсын тодматскеме – юнме шат соосты удмуртъёслы кельшисесь шуо!

- Эх, кыӵе тӥляд, нылъёс – нылкышно малпанъёсты!

Света: – Мар карод. Вакыт сыӵе вуэмын…

Источник:

Ручкина С. Куинь сяськалэсь тугоко / С. Ручкина, Э. Панченко, Н. Ушакова ; записала Дарали Лели // Удмурт дунне. - 2011. - 29 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"