Лаптев Александр

Александр Михайлович Лаптев - удмурт гожъяськись, критик, журналист, Удмурт Элькунысь гожъяськисьёслэн огазеяськонзылэн ёзчиез, Россиысь сӥё-дано журналист.

Улон сюресэз

Александр Михайлович Лаптев вордскиз 1958-тӥ арын 28-тӥ инвожое Алнаш ёросысь Юртошур-Какси гуртын. Атаез, Михаил Павлович, «Родина» колхозын тракторист но, дуриськись но луыса ужаз, нош анаез, Дарья Алексеевна, та хозяйствоын ик пудо-живот утялтӥз но будэтӥз. Семьяын, ньыль нылпи пӧлысь, Саша бадӟымез вал. Пичи дырысеныз пияш мае ке но тодны, валаны тыршылӥз, туж тыршыса дышетскиз. Соин ик дышетӥсьёс пияшез котьку мукет пиналъёслы син азязы адӟем карымон пуктылӥзы. Соосызлэн вожзы потылӥз, Сашаез сантэманыгес вырылӥзы. Озьы, пинал дырысен, Сашалэн самой ӟеч но умой эшъёсыз луизы книгаос. Пияш туж трос лыдӟиськиз, но валаса – ки улаз мар сюрем ӧз кыска. Нош 6-тӥ классысен со эшъяськиз «Дась лу!» газетэн.

Кузпалэныз Римма Игнатьеваен

1976-тӥ арын Саша Лаптев пыриз дышетскыны Удмурт кун университетысь филология факультетэ. Татын огвакыт со дышетскиз али шаерамы тодмо луэм литераторъёсын но журналистъёсын: Сергей Васильевен, Михаил Федотовен, Николай Танаевен, Пётр Сергеевен, Рашит Хайдаровен но мукетъёсыныз. Соос мылысь-кыдысь пыриськизы университетысь литературно-творческой кружоклэн ужаз но элькунысь газетъёслэн литобъединениослэн занятиосазы. Саша Лаптев соку ик ини выль потэм книгаослы рос-просэсь рецензиос гожъяны кутскиз. Сыӵе малпаськыса но тыршыса ужамез ик юрттӥз студентлы диплом но гожтыны. Нош диплом Александр гожтӥз Элькунысьтымы калык писательлэн, Семён Самсоновлэн романъёсызлэн но повестьёсызлэн жанровой аспӧртэмлыксы сярысь.

1981-тӥ арын, дышетсконзэ быдтыса, Александр Лаптев ужаны интыяськиз «Дась лу!» газетэ. Татын со сюлмысь кутскиз уж борды, командировкаослэсь ӧз палэнскылы. Та аръёсы егит журналист умой тодматскиз удмурт шаереныз, вуылӥз ваньмаз сямен ёросъёсы но гуртъёсы. Нош уйёсы гожъяськиз…

Ньыль ар тыршемез бере, 1985-тӥ арын сое ӧтизы Удмуртиысь писательёслэн огазеяськонзылэн «Молот» (али «Кенеш») журналазы ужаны. Отын соку валтӥсь редактор А. Н. Уваров вал, Сашалэн аспалмуртэз (землякез). Со туж шумпотыса но бадӟымесь осконъёсын пумитаз пинал ужасьсэ. Александрез кутӥзы поэзияя но критикая ёзэтэ. Валтӥсь редакторлэн возьманъёсыз кема ӧз ӝегалэ. Кык ар ужамез бере, Александр Лаптев Дубултаын (Латвия) ортчем егит критикъёслэн Всесоюзной семинаразы пыриськиз ини.

Но 1991-тӥ арын А. М. Лаптев журналысь кошконо луэ. Писательёслэн огазеяськонзылэн Чеберлыко литератураез вӧлмытонъя (пропогандая) бюрояз кӧня ке ужамез бере, берытске ужаны азьло интыяз ик – «Дась лу!» газетэ.

Александр Михайловичлэн творчество удысын эшшо одӥг тунсыкъяськон ӧрез вань на. Со калык куспо эсперанто кылэз удмуртъёслы валамон каре. 2000-тӥ арын Екатеринбургын потэм эсперантоя учебниклэн одӥгез авторез луэ.

2000-тӥ арын Александр Михайлович Лаптевлы сётэмын вал «Россиысь сӥё-дано журналист» ним. Берло аръёсы А. Лаптев быдэсак потӥз профессиональной гожъяськон ужэ.

Гожъямъёсыз сярысь

Гожъяськыны Саша кутскиз школаын дышетскыкуз. Нырысь публикациосыз: пичияк заметкаос, веросъёс но кылбуръёс – печатласькизы «Дась лу!», «Алнаш колхозник», берлогес «Советской Удмуртия» газетъёсын но «Кенеш» журналын. Авторлэн куд-ог веросъёсыз печатласькизы «Быльырам синкыли» (1997) огъя бичетын. Николай Байтеряковлэн улонэзлы но творчествоезлы сӥзем интервьюысьтыз оглюкетэз пыртэмын 8-тӥ класслы чаклам «Удмурт литература» учебнике-хрестоматие, кӧня ке кылбуръёсыз потӥзы Таллинын дасям «Азвесь лодка» антологиын. Покчи лыдӟисьёслы «Кизили» журнал дэмлалля Александр Лаптевлэсь веросъёссэ.

1997-тӥ арын поттӥз веросъёсын но визь-нодъёсын «Хи-хи» бичетсэ. Удмурт писательёслэн произведениосынызы оградын та книга сярысь тодосчи В. Л. Шибанов гожъяз «Литературная Россия» газетын «Лики и отражения» статьяяз.

Александр Лаптев веросъёсаз сьӧд буёлзэ уг жаля. Югыт дуннеез сьӧдмаса возьматон ӧвӧл со. Автор сюлэм пыртӥз поттэ туала улонысь лэчыт ужпумъёсты, шара возьматэ кырсь интыосты, чеберъятэк суреда азгынмем кивалтӥсьёсты. Со вакытэ ик веросчи ас понназ серекъя но. Серекъямаз мӧзмытэз вань. "Хи-хи" книгаез аспӧртэм каро визь-лул быртыкъёс — визьысь но лулысь потэм веран шапыкъёс. Соос нырысьсэ печатласькизы "Инвожо" журналын. Лаптевлэн "быртыкъёсызлы" журнал бамъёсы вуыны капчи ӧй вал. Редколлегилэн членъёсыз пӧлын но со гожъямъёсты поттыны пумитъяськисьёс сюризы. Номыр вылез, ӟечез отын ӧвӧл, пе. Укыр лек верамын но мыскыл каремын. Татын лулысь потэм шапыкез уг шӧдӥськы. Адями визьлэн малпанэз со. Кызьы, малы, кыӵе муген, ку кылдэмын? — таиз ини мукет ужпум. Александр Лаптев семья кылдытон пумысен индылон уг сёты, ас малпанзэ гинэ вера. Лыдӟисьлы кельшон сярысь автор уг сюлмаськы. Со нырысь интые пуктэ верано кылзэ.

Визь-лул быртыкъёсыз пыр Лаптев учке уно адями сямъёс, удысъёс, ужпумъёс шоры.

Газет-журналъёсын кызь вить арлэсь кема тыршытозяз, литература удысэз ялан нуыса, Александр Михайлович удмурт писательёслэн улонзы, творчествозы сярысь лачак ужъёссэ лыдӟись доры вуттӥз. Берло аръёсы уго пӧлысьтызы тросэз сярысь чылкак гожъямысь но дугдӥзы ни вал. Кылсярысь, вуныны кутскем писательёслэн ӵыжы-выжыоссылэсь, эшъёссылэсь, тодмооссылэсь юалляськыса кылдытӥз Евграф Баранов, Николай Васильев, Пётр Блинов, Льӧм Маня (Мария Баженова), Степанида Иванова, Георгий Петухов, Тимофей Иванов, Георгий Архипов но данак мукетъёсыз сярысь портретъёс – тодмотэм учыръёсты шараянъёс, писательёсмылэн та югыт дуннеысь пӧртэм сямен куспетӥ кошкемзылы паймыса, адӟонзылэсь мугзэ валаны турттыса. Выль шедьтонъёс вылын син азе пуктэмын, шуыны луоз, ортчем XX даурысь удмурт литературалэн трагедиен вужерам сюресэз.

Та ужъёссэ огазе люкаса, 2008-тӥ арын А. Лаптев «Тӥ учке ӵемгес ӵукпала…» книгазэ поттӥз. Книга куинь люкетлэсь: рецензиос, статьяос но интервьюос. Рецензиос люкетаз автор эскере пиналъёслы гожъясьлэсь Аркадий Клабуковлэсь «Палбам» повестьсэ, Николай Байтеряковлэсь «Сьӧд валъёс» прозаен книгазэ, Ульфат Бадретдиновлэсь «Ӵушъял вордӥське веньёстэк» гожтэмзэ но мукетъёссэ. Кыкетӥ люкетаз автор пыртэ вуныны кутскем писательёс сярысь статьяоссэ.

Книгалэн куинетӥ люкетаз автор пыртэ Н. Байтеряковен, Г. Ходыревен, А. Уваровен, П. Черновен интервьюоссэ. Александр Лаптев туж умой лэсьтэм: нырысь ик писательёсты буре ваён мынэ, собере соосын выльысь пумиськиськод но, сюлмаськонъёссэс, малпанъёссэс быдэстытэк кошкемзэс шӧдӥськод. Та книгаяз А. Лаптевлэн малпаськись, трос лыдӟыны но тодыны тыршись автор луэмез шӧдӥське. Кин ке сярысь гожтон азяз со уг аналскы вуж газетъёсты бугыръяны, архиве вамыштыны. А. Лаптевлэн гожъяськон манерез (стилез) вольыт, валамон, лыдӟисез бордаз кыскись.

Библиография

Книгаосыз

Вы чаще смотрите на рассвет!.. – Ижевск : Изв. Удмурт. Респ., 2011. – 23 с. – (Библиотека "Известия Удмуртской Республики" / авт. сер. Вячеслав Ар-Серги. Ближние родники).

Гизьыриё улмо но велик : нылпиослы веросъёс. - Ижевск : Удмуртия, 2020. – 93 с.

Пуньылэн пыдыз потӥз : нылпиослы веросъёс. - Ижевск : Удмуртия, 2018. - 93 с.

"Тӥ учке ӵемгес ӵукпала..." : кылдунъетъёс, кылужъёс, юан-валэктонъёс. – Ижкар : Инвожо, 2008. – 246 с.

Хи-хи : веросъёс, визь-лул быртыкъёс. – Ижевск : Тодон, 1997. – 95 с.

Чупа-чуп! : нылпиослы веросъёс. - Ижевск : Удмуртия, 2013. - 93 с.

Статьяосыз

Азьветлӥсь : верос // Ӟечбур! – 2012. – 14 июня. – С. 4.

Гаӵоло : верос // Инвожо. – 2011. – № 3/4. – С. 76–79.

Гуштон : верос // Кизили. – 2009. – № 3. – С. 4–5.

Йӧнтэм из : нылпиослы верос // Вордскем кыл = Родное слово. – 2011. – № 8. – Вкл. л. – ("Вордскем кыллэн" книжкаез).

Квартирант : рассказ / пер. с удмурт. Риммы Игнатьевой // Луч. – 2011. – № 7/8. – С. 65–70. – (Библиотека малого жанра).

Керо курег : верос // Кизили. – 2008. – № 10. – С. 4–5.

Кири : верос // Кизили. – 2007. – № 4. – С. 6–7.

Кӧйыз-а сюриз, пие? : верос // Азвесь кышетэн толэзь : веросъёс : семьяын лыдӟон книга / люказ но радъяз В. Н. Ившин. – Ижевск, 2007. – С. 71.

Лӧбы : нылпиослы верос // Вордскем кыл. – 2009. – № 7. – Вкл. л. – ("Вордскем кыллэн" книжкаез).

Ляпа : верос // Кизили. – 2012. – № 5/6. – С. 4–5.

Муртъёс : верос // Удмурт дунне. – 2009. – 22 апр. – С. 6–7 ; Кенеш. – 2010. – № 5/6. – С. 76–82.

Ӧпкелён : верос // Кенеш. – 2012. – № 8. – С. 30-33.

Ӧтьымтэ куно : верос // Инвожо = Альманах удмуртского ПЕН-клуба. – 2010. – № 5/6. – С. 87–92.

Пуньылэн пыдыз потӥз : верос / иллюстрациез Галина Ивановалэн // Кизили. – 2013. – № 5/6. – С. 6-7 : ил.

Пыжем картофка : верос // Удмурт дунне. – 2012. – 11 июля. – С. 6–7. – (ИнГОЖ).

Скаллэн йӧлыз кыл вылаз ; Пась кенер : нылпиослы веросъёс // Удмурт дунне. – 2010. – 1 июня. – С. 7.

Чагы : нылпиослы верос // Удмурт дунне. – 2011. – 24 авг. – С. 8.

Чарли : верос // Удмурт дунне. – 2009. – 23 дек. – С. 7.

Чуп! : верос // Кизили. – 2010. – № 7. – С. 4–5.

Ӵынкыт дунне : верос // Удмурт дунне. – 2008. – 15 июля. – С. 6 ; Инвожо. – 2009. – № 1/2. – С. 74–81.

Шымыран : верос // Кенеш. – 2013. – № 5-6. – С. 34-54.

Эрке писей : верос // Кизили. – 2008. – № 7. – С. 6–7.

Югыт дуннелэсь кин ӵыдэм : верос // Инвожо. – 2012. – № 4/5. – С. 98–103. – (Удмурт ПЕН-клуб. Альманах).

Юрттӥськизы : верос // Удмурт дунне. – 2010. – 17 нояб. – С. 7.

Берыктэмъёсыз

Ӟичы, тылобурдо но кырныж ; Куинь вынъёс : ненец выжыкылъёс // Ӟечбур! – 2006. – 12 окт. – С. 4.

Лев Ф. Чукай : верос // Ӟечбур! – 2006. – 2 февр. – С. 12–13.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.