Денисова Татьяна Михайловна

Тон шунды кадь

Денисова Т. М.

Татьяна Михайловна Денисова

вордӥськемын: Можга ёросысь Зугнё гуртын

дышетскемез: Ижевскысь культурая училище, ГИТИС

будон тубатъёсыз: Можга ёросысь Бадӟым Кибья гуртысь культурая юртэн кивалтӥсь, Удмурт драмтеатрысь артист, Удмурт радиоысь куарая режиссёр, Удмурт телевидениысь диктор, иворъёсъя передачаез нуись.

- Аслам нимы мыным туж кельше - со огдыре туж небыт но шара. Тау тодмо-дано спортсменкалы Нина Аркадьевна Парамоновалы - со мыным сыӵе ним кузьмам. Нина Аркадьевна атаймыя ӵыжы-выжы луэ. Мон вордскем берегес (ӧйтӧд, кӧня дыр ортчем ни) со дорамы куное пырем. Мыным туж синмаськем. Кызьы бен нимыз, пе. «Ма, ӧйтӧд, нимыз но ӧвӧл, улэ но улэ, ай мырдэм роддомысь вайим»,- нокыӵе но кариськымтэ анай.

Куинетӥез но ныл вордскем шуыса тодэмез бере атай монэ басьтыны пумит луэм. Серекъян понна ӧвӧл, зэм-зэм. Монэ басьтыны черод кылдэм ни вылэм - гуртысьтымы ик дышетӥсьёс но Бадӟым Кибьялась врачъёс. Соку озьы карыло вылэм, лэся. Анай пумитъяськыны ӧз дӥсьты, дыр. Атаез гуртоос куаретӥллям: будӥз ке, пе, пумитаз мар вазёд?

Атае мон понна - дунне вылысь самой яратоно адями. Ачиз со атайтэк будэмын – песянае, школаын выж миськыкуз, синмаськем школа директорлы. Тӥни солэсь ик Загуляев фамилизэ сётэм. Но атае ноку но кӧтсэ урод ӧз возьы, солэн мукет нылпиосыныз кусып тупатӥз. Загуляевъёс - тодмо адямиос. Пӧлазы - Удмуртиысь калык артистка Валентина Загуляева, режиссёр Фридрих Загуляев, атаймылэн мукет мумылэсь братэз - инженер Илья Загуляев, солэн кузпалэз - тодмо удмурт тодосчи Бибинур Шараповна…

Атае, Михаил Иванович - республикаысьтымы дано агроном, Можга ёрослэн дано муртэз. Со быдэс улонзэ бусылы сӥзиз, шуыны луоз. Ӵукна 5 часын дорысь кошке вал, собере таманлы чай юыны бертэ. Мон бызьыса дораз вуисько, ӝӧк сьӧрын шораз учкыса пукисько. Чай юэмез бере гинэ яке погмаськем йырсиме маялтэ, яке тыбырме вешалтэ. Со бӧрсьы мылкыд сыӵе умой луэ.

Мон туж шаян вал - весь шудыса, жугиськыса будэмын. Пичи дырысьтым ӝож дыръёсты уг ик тодӥськы. Атайлэсь мотик куаразэ кылыса, шудон дорысь тапыр доре вуылӥ: мон но сьӧраз мыно! Озьы мон со сьӧры бусыосты котыръяй. Со монэ сюрес дуре кельтэ, ачиз бусые пыдло кошке. Куддыр пеймыт луытозь пукисько вал огнам, зангариос, тӧдьы сяськаос шоры учкыса.

Атае городысь бертэмезлы быдэ мыным кузьым вайылӥз - ох, лӧптылӥ. Нош огпол со мыным пуштрес дэрем басьтӥз. Мар вал соку: коркась вань валесъёсты тэтчаса туркатӥ, собере усьытозям бергай. Сыӵе-сыӵе шумпотэме ноку ӧй вал ни кадь.

Школаын дышетскыкум, мон пӧртэм ӧй висъяськылы. Кин луон сярысь малпан но йыре ӧз лыктылы. Гуртэ гинэ медам кыль но заводын медам ужа. Галямы (апае) валтӥз медучилищее. Коридоретӥ ортчыкум ик сюлэмы сыӵе шуг луиз - борддоръёс вылам усё кадь. Потыса бӧрдӥ-бӧрдӥ но доре бертӥ. Визьнод сётӥз колхоз контораын ужась. Тон, пе, эктыны быгатӥськод ук, мын культпросветэ. Бертыса клубын ужалод. Озьы направлениен кошки. Эктонъя нырысетӥ урокын ик дышетӥсь станок доры султыны косӥз. Мон одӥг со кылэз кылыса ик юзыр-кезьыр луи - вот, заводлэсь пегӟыны выри но, татын но станок! Дышетӥз туж ӟеч специалист Сария Ибрагимовна Сухенькая.

- Тӥлесьтыд но пыдъёстэс тышкаллязы-а, яке тӥ эктыны усто вал?

- Ма дышетсконэз быдтытозь ик йӧтылӥз. Пыдэ гинэ ӧз йӧтылы, губырскемысь тыбыр кузя но кормазы, йырсиетӥ но золъязы. Урокысь синкылияськытэк кошкисьёс туж ӧжыт вал. Но али мон валасько: сотэк уд дышеты. Ӟечен валэктэмез ум валаське ук, а йӧтэ ке, ческыт ик уг поты, выльысяз тыршиськод ни. Но кызьы ке озьы ваньмыз йылпумъяськиз.

- Тӥляд гуртэ берытскемды уг поты вал ук…

- О-о, но мар карод, направлениен кошки бере. Зэмзэ вераса, мон со сярысь ӧй но малпаськылы ни, мӧзмыны дыр ӧй вал: мон, 19 аресъем нылмурт, огдыре клубын ужай, школаын кружок нуи, колхозысь комсомолецъёсын кивалтӥ. Ми весь маке ортчытъям, ёрос конкурсъёсын котьку сямен нырысетӥ инты басьям. Синмаськись пиос вал. Огкылын вераса, улысал, дыр, мон туннэ но Кибьялам, дорамы тодосчи Альберт Алексеевич Разин ке ӧй пырысал. Ӧйтӧд, оломарме адӟем, мын, пе, артистэ, али ӵап конкурс радъяське. Конкурс сярысь ялонэз так-то ачим но газетысь синйылтӥ ни вал.

Татьяна

- ГИТИС-э мон сюри шаплыелы луыса. Этюдъёсты ваньзы ӟеч возьматӥзы, но берпуметӥ турын ини, Москваысь профессор азьын-а, мар-а, тросэз куалекъяны ӧдъязы. Сцена вылын воргорон огназ вальсын поръя. Профессор ми шоры учкыса шуэ: потэ, эктэ соин. Ваньмыз кышкало, а мыным - эктӥсьлы, вальс нокыӵе уг поты. Дӥсьтэмме дунъяз кадь.

Жаляса верано луисько, театрлы мон быдэсак синмаськыны ӧй быгаты. Артист уг луы шуыса шӧдӥ ни, институтын дышетскыкум ик. Этюдъёсын шудылӥ бен, но озьы гинэ - зачёт понна. Яке мылкыдыя роль ӧз сюры? Мон дышетски Светлана Кибардинаен, Лев Вахитовен, Игорь Люкинэн, Пётр Денисовен, Кадим Галихановен ӵош. Режиссёръёслэн туж бадӟым осконзы вал Игорьлы но Петялы. Пётр Денисов, кылсярысь, Москваын шудӥз «Акселератка», «Иван Великий - гулящие люди» фильмъёсын. Но жаль, кыксы ик йыромизы...

- Удмурт театрын, зэмзэ но, кема ик ӧд ӝегалэ - туннэ шудэмдэс тодэ вайисьёс ӧвӧл, шуыны луоз. Асьтэлы кудӥз ке роль тодады кылиз-а?

- Тодэ, сюлэме кыльымон рольёсты шудыса ӧй вутты - тросгес ужам выжыкылъёс бордын. Но со понна режиссёръёс янгыш ӧвӧл - мон дась ӧй вал мур пуштросо бадӟым ролез усьтыны. Театрысь ми, ГИТИС-ын дышетскемъёс, ваньмы огдыре кошким. Со куатаськон ӧй вал - просто милям, егит муртъёслэн, ӟечгес улэммы потӥз. Артистлэн уждунэз шыдлы сяна ӧз тырмылы, нош ГТРК соку туж азинскиз - соос трослы йӧнгес улӥзы. Ӵап соку радиоын ужась эше Лилия Тер-Оганова телевидение выжыны ӝутскиз, интыяз монэ ӵектӥз. Озьы мон радиорежиссёр луи. Ар-а, мар-а, ужай. Директормы Евгений Николаевич Осипов весь шуэ вал: Татьяна, тыныд телевидениын ужано, мын. Мон малпай, визьмо адями валатэк уг вера, дыр, мынӥ. Кема ӧз учке, кутӥзы.

Татьяна Денисова

- Эфире нырысьсэ потон азяды куалекъяды-а, яке артист понна со нокыӵе ӧвӧл?

- Ачим номыре ӧй вала ай ке но, меӵак эфире потон азьын малы ке ӧй куалекъя. Режиссёр шуиз: главное - пальпот. Но мукетыз эфир азьын эскероно кариськиз ик. Гожтӥзы. Учки но - аслым чик ӧй кельшы. Но репетировать карыны дыр ӧвӧл ни. Пальпотыны косо, а иворзы урод… Ярам, кызьы ке ортчытӥ кадь. Паймоно кадь, эфир бере ик студие жингыръясьёс луизы. Ваньмыз, пе, ушъяло, ӟеч диктор шедьтӥллям шуыса. Мыным тужгес дуно вал кылбурчилэн Михаил Федотовлэн малпанэз.

- Ку тӥ асьтэлэсь тодмо луэмдэс шӧдӥды?

- Уг валаськы, кызьы вераны. Нырысетӥ араз ужакум юасалды ке, соку ик шуысал. Пинал дыръя уго астэ мултэс ӟеч дунъяськод: одӥг-кык мурт ушъя но, аслыд кизили потӥськод ни. Ас вылысьтым гинэ уг вераськы, телевидениын ужась туала егитъёслэн но сыӵе вылтӥяськон сямзы вань: эфире огпол-кык пол пото но, асьсэды олокин кожало ни. Мынам али солы сереме гинэ потэ.

Аслым рос-прос оскыны кутски кадь, гуртъёсы поталлякум. Арлыдо адямиос тодмаса вешаллязы, юалляськизы, соку мылкыд туж умой луылӥз, уката ужам потылӥз. Нош огпол пересь кышномурт шуиз: тон шунды кадь. Мылкыд секыт дыръя но аслад пальпотэменыд буйгатӥськод. Мынам соку ик тодам лыктӥз Москваын телеужлы дышетскыкум специалистъёслэн сётэм дунъетсы. Соос шуылӥзы: тынад, пе, кыӵе ке сайкыт пуш кужымед вань, со учкисез бордад кыске. Туала тележурналистъёс пӧлын, пе, сыӵеос туж ӧжыт. Тӥни со учыр бере, дыр, мон аслым дунъямон потыны кутски.

- Азьвыл тӥледыз огшоры гинэ диктор шуо вал, табере - передачаез нуись. Маиз воштӥськиз?

- Пӧртэм номырез ик ӧз, но азьвыл мон гожтэм текстлэсь палэнскыны уг быгатӥськы вал, али сюжетъёсты ачим герӟаны быгатӥсько.

- Мынам арлыдо анаелы туж уг кельшы, телевидениын шуш адямиос ужало шуыса - экранысь, пе, чебер, сайкыт адямиосты адӟем потэ.

- Со шонер, дыр. Но оскисько, со мон сярысь озьы уг вера? Жаляса верано луэ, туала телевидение зэмзэ но чеберлык, интеллигентность сярысь сюлмаськемысь дугдӥз - со ульчая кариськыны ӧдъяз: передачаез нуись коть лусьтро медло, мед гинэ зульыны, студиын пукись адямиосты вераськытыны (эшшо умойгес - керетытыны) быгатоз. Та ласянь азьвыл телевидениын ужасьёс мыным но синмаськымонгес пото.

- Гуртэ потаку, газетчиосты пыкыло валантэм выль кылъёс понна. Но «Удмурт дунне» ноку но «кат», «ӧри», «ӧнерчи» шуыса уг гожъя - озьы вераське туала удмурт радио но телевидение. Тӥледлы, калыкез нуналлы быдэ удмурт иворъёсын тодматӥсьлы, со мылкыддыя-а? Асьтэос улонын со кылъёсын вераськиськоды-а?

- Мылкыдэз кин юа? Ӧвӧл, конечно. Но кивалтӥсьёсмы косо бере… Кельшонтэм текстъёс луыло. Дыр ке вань, тупатъясько, ас сяменым верасько. Та ласянь мон соглаш пыкылэменыды: берыктыны луонозэ аналтӥськом, берыктонтэмзэ оломар малпаса сётӥськом.

- Выль телеканал кылдэм бере ГТРК-ысь тросэз журналистъёс отчы пегӟизы, нош тӥ малы кылиды?

- Уж интыез воштон понна бадӟым муг луыны кулэ. Куд-огез кошкизы кивалтӥсьёсын тэрымтэен, тросэз - будэмзы потэмен. Угось ГТРК-ын эфир дырез арысь аре кулэстыны кутскизы, авторъёс нимаз передача лэсьтыны ӧз быгатъялэ ни, соослэсь дырзэс ялан шымыръязы. Творчествоен вырись муртэ со туж зол шукке. Эшъёсылэн туж тунсыко проектъёссы кылдӥзы, соосты выль телеканалын, кызьы шуо, киын-пыдын пумитазы. Мон - иворчи, исась ӧй вал, соин ик ӧй но вырӟы кадь. Вань на мукет но мугез - туж потӥз ГТРК-лэсь зарни юбилейзэ пусъеме (серекъя).

- Сомында ар ӵоже иворчиын ужаса ӧд жаде на-а? Тӥледыз но адӟем потэ ни вал бадӟым передача яке ток-шоу нуисен…

- Уг пӧяськы - акыльтӥгес ни. Туэ шаерчи луыса ужамелы 13 ар тырмиз. Со туж трос. Зэм, передача нуэм сяна, мон ачим сюжетъёс лэсьтӥсько, со ужме пӧртэмгес каре. Но со уг буйгаты. Али олокыӵе но малпанъёсын улӥсько. Дыр со понна туж трос.

- Марысь мар ке, интыяды кинэ ке адӟиськоды-а?

- Уг на. Но оскисько, удмурт егитъёс пӧлын трос быгатӥсьёс, дӥсьтонзы гинэ мед тырмоз.

-Тодмо луэмды улонын юрттэ-а, люкетэ-а?

- Юрттэгес, дыр. Мыным каньылгес кивалтӥсьёсын но вераськыны. Телефон пыр ке вазиськисько, Татьяна Денисова шуэмен тырме, кинме-марме валэктонэз ӧвӧл ни. Мон Татьяна Михайловна шуыса, аслам но тодам уг лыктылы, муртъёс но озьы уг вазисько. Ӵемысь ӟучъёс но тодмало. Тани пиме ӟеч школае интыяно вал. Эшъёсы шуизы, отчы «витьёсын» сяна уз кутэ, эн ик вырӟы. Но мон директор доры пыри, ӟечбуръяськи но… Со ӧз но юалляськы, пиме кутӥз.

Ульчаын тодмалляло. Соиз тӥни секытгес - тодо бере, тон весь чебер луыны кулэ. Нош куддыр потэ огшоры гинэ - шоголляськытэк, буяськытэк, пальпотытэк ветлэм…

Такъян

- Удмурт луэмдылэсь возьдаськылэмды вань-а?

- Ноку но. Нялтас вераса, мынам тросэз эшъёсы ӟучъёс. Соос ай мон шоры дунъясагес учко. Мон ачим тодматскыкум но куддыр нимме Такъян шуисько. Мон больницаын но тани возьдаськись удмуртъёсты сайкатӥсько ни: одӥгез кышномурт радиоез миндэр улаз поныса кылзэ. Мар дауртӥськод, шуисько. Ма, палатаын, пе, ӟучъёс но, куаретозы… Трос ӧй вера, но табере удмурт радио татын зол чузъяське, медсестраос-санитаркаос но анай кылзэс тодазы вайизы - мон шоры ӟуч сямен уг вазьыло ни.

- Блондинкаос вожмаськыса политикае чуртнасько, тӥляд сыӵе мылкыдъёсты уг потыло-а? Удмурт огазеяськонъёсысь но малы ке адӟыны уг луы.

- О-о, мыным озьы вералляло. Вуоз-а, мар-а куке сыӵе вакыт, али ас поннамгес улӥсько. Огласянь жаль - тодмо луэм нимы тэк улэ, калык понна уг ужа шуыса.

Вакчи юан - вакчи веран

Гороскопъя?

Телец, Дракон.

Кельышлы дӥськут?

Кантри.

Буёлды?

Горд яке лызалэс.

Арлэн вакытэз?

Котькуд вакытлэн кутсконэз.

Яратоно крезьгурды

Шансон.

Фильмды?

«Жестокий романс»

Книгады?

Ф. Достоевский, «Игрок».

Сиён-юонды

Пӧртэм калыкъёслэн кухнязы.

Источник:

Денисова Т. М. Тон шунды кадь / Т. М. Денисова ; записала З. Рябинина // Удмурт дунне. - 2006. - 17 нояб. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"