Разин Альберт Алексеевич

Кузьымгуртлэн кузьымез

Разин А. А.

Удмурт кун университетысь тодосчиез Альберт Разинэз асьме шаерын но, палэнын но тодӥсьёс уно. Солэсь гожъямъёссэ ярато наукаен вырисьёс но, огшоры лыдӟисьёс но. Со тужгес но паймытэ удмурт калыклэн, гуртоослэн ӵуказе нуналзы сярысь сюлмаськеменыз. Чик будэтытэк, Разинэз тазьы ниманы луоно: Кузьымгуртлэн удмурт калык понна будэтэм кузьымез.

- Альберт Алексеевич, тодосчиос тӥледыз гажало но, «гажало» но. Гажасьёсыз кылысь кылэ но, гожъяса но оскытыны выро: Удмурт кун университетысь Адямилыкез эскерон институт олома каре, солэсь нокыӵе пайдазэ адӟыны уг лу. Мон но юасал: мар дауртӥськоды институтады?

- Мон нуналлы быдэ, лычсузьымон шумпотыса, компьютер азе пуксисько. «Пӧраме» аслым кельше. Укыргес шутэтскон нуналъёсы, нокин люкетымдэ дыръя, ужаны яратӥсько. Маин выриськомы? Алигес тодӥмы: ӝыныезлэсь уноез калыкмы сопал дуннее адямилыко луытэк кошке, зэмос шудэз веръятэк. Адямилыктэм муртлэн йырыз кысэмын, визьмыз уг буды, дуннеысь аслэсьтыз интызэ уг шедьты но мыдлань улэ. Сыӵеос вань кивалтӥсьёс пӧлын но, огшорыос радын но. Лэсянтэм югдур. Табере ми экериськомы таӵе югдурлэсь кытысь но кызьы кылдэмзэ.

Милям валаммыя, ми адямиослы юрттэт сётыны кулэ тазьы: валэктон уж нуоно - котькудӥз ассэ ачиз мед эскероз, мед тодоз, данзэ мед ӝутоз.

- Шерезлэн, адямилэн улонэз азьвыл малпамезъя пӧрме. Асьтэлэн коть оглом пуксем улонды чутрак воштӥськыны быгатоз на шат?

- Туала арын шерезлэн ӵуказе нуналлы осконэз юн. Кин тодэ мар возьма азьланяз. Оломар но луоз, дыр, ай. Ачим мон котькыӵе воштӥськонъёслы дась. Шуом, ужысьтым уллязы ке, Махатма Гандилэсь адӟем карыса, конгро боды куто но шаертӥмы калтыртыны шӧтало. Гуртъёстӥ ветло. Отын кӧлон инты сётозы, сюдозы но удозы. Коть оскелэ, коть эн, удмуртлыкез огнам ӝуто. Ма, кызьы огнам? Огнам ӧвӧл, котырам бинялтӥськозы уно эшъёсы, юлтошъёсы, иськавынъёсы, асьме калыкмылэн ӵуказе нуналэз сярысь сюлмаськисьёс.

- Вордскем гурттылэн нимыз туж тунсыко - Кузьымгурт. Удмурт шаерын но Алнаш ёросады маин со тунсыко но дуно? Маиныз бордаз кыске?

- Со - вордӥськем музъеме. Татын мылкыдме бугыртӥз тулыс йӧ кӧчъёсыныз шаугетӥсь Варӟи. Тодам лыкто чалберлэн (шырчиклэн) крезьгуръёсыз азьын мальдэме. Будӟынналэ (Быдӟымнуналэ) паймытӥз ӝужась шундылэн шудэмез. Син азям пуксе Четкер бамалэ тубыса, чибориё буям курегпузъёс питыръяммы, шулдыр шудэммы. Гужем Балтач урамамы но Бадӟым вӧсяськонын ортчо вал шулдырлэсь но шулдыр сабантуйёс. Кудӟоно вал йӧлпыд выллем тӧдь-тӧдь льӧмпу сяськалэн омыре лӧсъяськись зыныныз.

Кузьымгуртъёс али но чарка пыдсы выемын ӧвӧл. Калыкмы укыр тыршись. Таӵе огыр-бугыр аръёсы но улыно-вылыно коркаос пуктыло.

Культурамы но ышымтэ на. Кырӟаса, сюлэмзэс усьтыса, куно пыртало, адямилэсь мылкыдзэ чылкытатыса лэзё. Кулэм муртлэсь короссэ кырӟаса, гурт кузя ки вылазы нуо. Палэнысь адямиос, тае адӟыса, нырысь паймо, собере пушсы тыре но, асьсэлэн синкылизы вияны шӧта.

- Тӥ бадӟым семьяын будӥды-а?

- Ми вить нылпи. Мон шоретӥез, но узырез - вань агае но, апае но, сузэре но, выны но. Куспамы ноку керетэммы ӧвӧл. Ваньмы быдэсэсь на. Вася агае оже ветлэмын, 80 арес ини. Войнае басьтӥзы 17 арескын. Сизьым арлы кошкылӥз. Бертэмзэ возьмакум, мӧзмыса кулӥсько вал. Туж лякыт сямо, улытозяз шырез но вӧсь каремез ӧвӧл, дыр. Сыӵеесь мукетъёсыз но сузэр-вынъёсы. Ваньмынызы данъяськисько. Тужгес но тау карисько Валя апаелы. Улытозяз мон сярысь сюлмаське, маин ке но ӟеч лэсьтыны тырше. Со ик, атай интые кариськыса, мыным дышетскыны юрттӥз. Выльвылын (целинаын) трактористын ужаса, коньдонэн бертӥз, мыным нырысетӥ костюмме басьтӥз. Кузьымгуртын парсь сюдыкуз, Алнаш районын азьмынӥсь вал. Можгалан пӧсь цехын ужамзэ синйылтӥзы, премиосын но грамотаосын пусйизы.

Рево но Люция туж удалтэмын: ноку мурт шӧлкын уг уло, улытозязы калыклы ӟеч лэсьтыны тыршо. Нылпиоссэс но чурыт кыл вератэк будэтӥзы. Сюлэмзы укыр шырыт, соин котькин соосыз гажа.

- Мар вералоды семьяды сярысь? Шудо-а со?

- Мон анаелэн яратоно пиез вал. Валамон, даурез мон пумысенгес куректыса ортчиз. Сопал дуннеысен но чакла на монэ. Улонэ мед радъяськоз ини шуыса, ачиз кадь кен шедьтӥз, мыным кышнолы ыстӥз.

- Кӧня ке вералэ нылды сярысь.

- Софи нылы ассэ шудоен лыдъя, нимзэ но туж яратэ. Бызи ке но, фамилиме уг вошты, пе. Малы нимыз Софи? Огласянь, удмуртъёс, Машенька, Петенька интые, Маши, Пети шуо. Мукет ласянь, гороскопья со - Кый. Нош таиз визьнодлэн кузёез ук. Вылаз ик, грек кылын визьнод - софия. Озьы котыр ласянь бергатэм бере грек кылысь удмурт Софи Разина пӧрмиз. Дышетске со удалтэм Морозов педагогъёс дорын, усточиослэн школа-интернатазы. Крезьгурлы дышетӥсез но туж ӟеч вал – Т. П. Курсакова. Суреданын но крезьгуранын умой быгатэ, уно дипломъёс басьяз. Кылдытӥз ог кызь удмурт но ӟуч кырӟанъёс, вальс, менуэт, мазурка, сюан марш но мукет крезьгуръёс. Соос пӧлысь кыксэ сцена вылын шудӥз-кырӟаз Геннадий Корепанов-Камскиез ӟечкыласа.

- Трос-а шумпотонъёсты вал?

- Укыр трос. Лулсюлэмы вырӟымон зэмос праздникъёс луылӥзы: атае но агае войнаысь бертыку, анае уж дурысь берытскыку, котькуд тулыс вуыку, котькуд Будӟынналэ, котькуд сабантуе, озьы ик Удмурт пединститутын но Москваысь социологической институтлэн аспирантураяз дышетскыкум.

Нимысьтыз вераме потэ студент дыръям витетӥ курсын шумпотэмме. Удмурт телевидениын кык ар утчаллям удмурт диктор. Конкурс пыр олокызьы ортчи но, монэ дикторе кутӥзы. Валтӥсь режиссёр Алексей Сергеев укыр шумпотӥз но монэ ушъяз. Ӝыны уждунэн вераськись дикторлэн коньдонэз сокем трос ӧй вал ке но, мон куанӥ котькытын тодманы кутскемзылы. Ачим дикторлэсь ужзэ ӧй дунъя, сое огшоры техника удысэн лыдъяй. Малпасько вал пумен режиссёр луыны. Но ӧз кылды, монэ, пумитъяськи ке но, келязы Ува ёросысь Удугучин школа-интернатэ.

- Озьыен дышетӥсьын но бергады?

- Удугучин школа-интернатын туж шумпотыса ужай биолог, химик но воспитатель луыса. Агитбригадаен ветлӥм гуртъёстӥ концертъёс возьматъяса, трактор дӧдьыын. Мон конферансье вал, хорын кырӟай, интермедиос пуктылӥ, Рево выныным эктылӥ, фокусъёс возьматъяй. Огдыре дышетски на режиссёре. Спектакльёс пуктылӥ дышетӥсьёсын но пиналъёсын. Нуи химиен но фотоен кружокъёс, кивалтӥ школа участокен. Урокъёсы опыт лэсьтытэк уг ортчо вал. Котькуд парта вылын микроскоп сылӥз. Котькудӥз дышетскисе, улэп чорыгез вандылыса, сюлэмезлэсь жугиськемзэ адӟиз. Тыршеме юнме ӧз луы – пиналъёс уллёен сьӧрам ветло вал, котькуд верамме пелязы понылӥзы. Туж шудо аръёсы вал соку, дышетӥсьлэн ужез самой пайда`? малпай.

- Улытозяды кыӵе ке янгышъёс лэсьтылӥды-а?

- Янгышъёсы мында номыри ӧвӧл. Тужгес но ӧпкелисько, адямиослэсь мылкыдзэс ӝутэм интые, шексэс утчаны но визь тырыны тыршеме понна. Ма, Сталин озьы дышетэ вал ук. Быдэс улонамы солэн дышетэмез пыӵатэмын вал. Эштэ гажаськод ке, пе, сое одно ик критика улэ кысконо.

Крестьян философия воксё мукетлы дышетэ. Тани анае нокинлы визь ӧз тырылы, котькинэн нялтас кариськыса улӥз. Нош школаын «визьмо» дышетӥсьёс шуылӥзы: «Мӧйыос дышетскемын ӧвӧл, улонлэсь бере кылемын, соослэсь верамзэс пеляды эн понэлэ, сямзэс адӟем эн карелэ». Мон озьы ик кожалляй. Малпай: «витьлы» дышетски ке, дышетӥсьлэн верамезъя улӥ ке, азинскем адями луо, урод адямиослы визь тырыса, сямзэс тупато.

Таӵе янгышамме бергес ятвылтӥ. Али, визьмолэсь но визьмо пересьёсыз сайкатыса, визьнодзэс юаме потэ. Соос оломае но тодо вылэм. Шуом, инмысь Ӟазег сюресысь кизилиослэсь кызьы вошъяськемзэс эскерыса, азьло ик вераллязы: кыӵегес луоз сӥзьыл (кузь-а яке вакчи-а?), вуоно аре валэс юос-а, ӟег-а удалтоз.

- Туала улонмы, азинскем интые, золгес но золгес куашкамысь тӥ пыкылӥськоды шундыпуксёнысь сямъёсты. Малы?

- Отын адями шоры палдурес учко. Адямиез, пе, пудо-животэз сямен ик, ӟеч сюдӥд-вордӥд ке, мукет номыр но кулэ ӧвӧл ни. Нош лулсюлэм сярысь вераськон, пе, шузи коммунистъёслэн супыльтонзы. Адямилэн Инмар дорозь ӝутскыны тыршемез янгыш сюрес, пе. Наукаын таӵе мыдлань идеологиез вульгарной материализм шуо.

Западын США азьветлӥсь луэ. Кинъёс со американецъёс? Европаысь кошкем азьтэм-бертэм адямиос. Санэ басьто вормись адямиез гинэ. Шуом, конкуренциын, нюръяськонын, быръёнъёсын… Коньдон понна нокинэ но, номыре уз жалялэ, лёгалозы но азьлань вамыштозы. Али соос дунне вылысь 40 процентсэ музъем ваньбурез быдто но инкуазез туж зол куашкато. Быдэс дуннелэсь ваньбурзэ киултэмзы потэ. Соин нимысьтыз дасям программая куашкато экономикамес но культурамес. Нош асьсэос эрико улон сярысь бӧтьырто.

Жаляса верано луисько, Россиысь кивалтӥсьёс США-лэсь адӟем карыны шӧтазы. Соинтэк-а Россиысь студентъёс пӧлысь кык куиньмосэз шуо: мон улысал но ужасал Америкаын. Озьыен, асьмеос культурамес но адямиез ум дунъялэ ни, данъяломы на техникаез но ваньбурез гинэ. Вожъяськомы коттеджын улӥсьлы, иномаркаен ворттылӥсьлы, бадӟым пукон вылын кузёяськисьлы.

- Тӥ мур пыриськиськоды удмурт движение. Кылсярысь, «Дэменэн» кивалтыкуды, 1991-тӥ арын, удмуртъёслэсь нырысетӥ Ӧтчамзэс дасяды. Со сярысь рос-просгес вералэ вал.

- Зэм, мон эшъёсы юрттэмен, удмуртъёслэсь нырысетӥ Ӧтчамзэс ортчытӥ. Соку куамын ёросын конференция ортчытӥ, котькудаз «Дэменлэсь» ёззэ кылдытӥмы, съездэ делегатъёс бырйимы. Бӧрысь соосыз «Удмурт кенешлэн» ёзъёсызлы берыктӥзы. «Удмурт кенешлы» устав гожтӥ.

Съездэз дасякумы, 1991-тӥ арын 20-тӥ-22-тӥ августэ, Кам дурын вӧсяськон ортчытӥмы. Гольяны посёлоклэн улланьысьтыз туж шулдыр инты шедьтӥмы. Куд-огез соку сьӧрамы мыныны кышказы, ӟучъёс, пе, мыскыллялозы. Нокин ӧз сантэма. «Икарус» автобусэн мынӥмы, вӧсяськимы, шулдыръяськимы, палаткаын кӧлӥмы. Вӧсяськеммы кабыл луэм, шӧдске, - кык нунал ортчыса, «Дэменэз» вӧй вылтӥ кадь пусъён ортчиз.

Вӧсяськеммы бере монэ Алнаш ёросысь Правительствое ӧтчаса сизьдӥзы. Тонэн, Разин, оломар адӟод, пе. Нош мон аслэсьтым кари, кивалтӥсьёсыз ас палам берыктӥ. Ӝыны ар ортчыса, Кузёбайын уно калыкен ӵош вӧсяськыса, Гербер праздник ортчытӥм. Нимзэ ачим малпай, концепцизэ ачим ик гожтӥ. Отын чаклай пӧртэм ёросъёсысь калыкез огазеяны, инкуазе потыса, вина юытэк, удмурт шудонъёсыз шудыса, кырӟаса-вераса шулдыръяськон ортчытыны. Сценарийёссэ гожъянэ но пыриськылӥ. Кузёбайын, Кияса ёросысь Сальялан но Ижын малпамъям пӧрмиз, мылкыды бурдъяськиз. Зэмос удмурт шулдыръяськон ӧръяськылӥз. Жаляса верано луисько, табере югдур воштӥськиз: шаерамы но, карын но антигербер пӧрмиз, калык шулдыръяськонэз воштӥзы зын ву но концерт.

- Вералэ на «Удмурт вӧсь» но «Шунды» сярысь.

- Кык ар пала Семён Виноградов профессор котыртӥ бергай: ойдо, шуисько «Удмурт вӧсь» огазеяськон кылдытом, тонэ тӧро каром. Пумитъяське: мон, пе, сьӧлыко адями, утчано святой выллемзэ. Паймод но бырод. Мырдэм соглаш луиз. Калыкез люкамы. Сое нуиз ӵыжы-выжые юрист Слава Камитов. Уставзэ Рево выныным гожтӥм, регистрация карим. Али «Удмурт вӧсен» кивалтэ Уксё Лади (Якупов Владислав Аксямович), туж чупрес ужбергатӥсь.

Таьяна Корниловаен ӵош «Шунды» огазеяськон кылдытӥмы. «Октябрь» культура юртын конференция ортчытӥм, правление бырйимы, уно пол егитъёсыз люкаллямы, устав гожтӥм. Огаз культура юртын нырысьсэ удмурт кылын Выль арлы сӥзем шулдыръяськон ортчытӥм. Мон, билетъёс вузаса, вить общежитие ветлӥ. Котькудаз «Шундылэсь» ёззэ кылдытыны но сое «Тылси» ниманы малпаськомы вал. Но, дыры тырмымтэен, «Шундылэсь» палэнтӥськи, куд-ог малпанъёсы улонэ пыӵатэк кылизы.

- Кунгож сьӧры потады-а?

- Куное ветлэм выллем уно пол удалтӥз. Кык пол Венгрие но кык пол Эстоние калыккуспо симпозиумъёсы, конференциосы. Совето власть дыръя турпутёвкая, 44 манет гинэ тырыса, Болгарие ветлӥ. Германиын Хельга нимо немка дорын кык арня кунояй. Со но Москвае пунэмзэ ветлӥз. СССР-ын улэмез туж потэ вал.

- Кытысь потэмын Разин фамилиды?

- Дырды вань ке, кузьгес мадёнэ таиз. Атаелэн куинез агайёсыз Россиысь удмуртъёслэн 1918-тӥ арын Елабугаын ортчем Ӧтчамазы (съездазы) делегатъёс вылӥллям. 1919-тӥ арын оштолэзе соосыз колчаковецъёс судтэк-мартэк ыбылӥллям. Покчиезлэн 23 аресъем Вася дышетӥсьлэн «сьӧлыкез» одӥг гинэ вылэм – Ӟунняшурын ликбезэн вырем, дышетэм. Трокай агаез Ӟатчалась волисполкомын Совето власть вылэ ужам.

Бадӟымез, Микаль, Кузьымгуртысь школаез ушъян грамотаен йылпумъям. Петроградын, эксэй армиын дыръяз, Февраль революция дыръя депутат луэм. Акцентэд вань ке но, укыр ӟырдыт вераськиськод шуыса, солдат эшъёсыз бырйиллям. Октябрь революция бере, дораз бертыса, Кузьымгуртын комбедэн кивалтэм, вынъёсыныз ӵош гуртоослы фамилиос люкылэм, асьсэлы басьтэм Стенька Разинлэсь.

- Кыӵе куинь визькенеш сётысалды егитъёслы?

- Нырысь ик: ноку эн данъяськы, муртъёсын артэ етӥзгес, кужмогес, тодӥсьгес, чебергес луэменыд. Вылӥынгес луэмдэ муртлы пумит эн куты. Быгатӥсько кожаса, мукетсэ эн лёга, вормемедлы эн шумпоты. Шумпоты астэ ачид вормыны быгатэмедлы, шуом, азьтэмдэ, «чибор» (яке «ыргон») ньылондэ, вожпотондэ, йыркурдэ, акырӟандэ, эшедлэн дусымезлы синмаськемдэ, муртлэсь кышнозэ яратэмдэ.

Кыкетӥез: ноку эн жадьы. Мед луоз сӥнӥсьтэм лулкужымед. Кытысь сое поттоно? Муртлы ӟеч лэсьтыса, муртлэн шумпотонэзлы куаныса! Адями ачиз понна гинэ улэ ке, лулсюлэмыз ӟольгыри пуз быдӟа гинэ кыле, пуш дуннеез бездыт луэ. Улонзэ ӟурыса ортчытэ.

Куинетӥез: яратоно кузпалэд понна номырдэ эн жаля: кужымдэ но, дырдэ но, сюлэм шуныттэ но, мусо кылдэ но. Ненеглэсь но ненег яратондэ уть секыт кыллэсь.

- Альберт Алексеевич, тӥ зэмос философ. Озьыен, кулонлэсь уд кышкаське, дыр?

- Шонер вераськоды, уг кышкаськы. Крестьянэд но сыӵе ик. Кулонэз но нылпи вордӥськемез артэ пуктэ со. Озьы, пе, та дуннеын тупатэмын. «Гожтэмезъя», пе, ваньмыз радъяськоз.

Но мыным кулыны вазь на. Кулытозям кык бадӟым малпанме быдэстоно. Поттоно «Книга для родителей, их детей и внуков» но «Пиосмурт ке тон» нимо книгаосме. Софиез пыд йылаз йыг-йыг султытоно, ачиз кадь ик сӧриськымтэ, чылкыт сюлэмо эш шедьтыны юрттоно.

Источник:

Разин А. А. Кузьымгуртлэн кузьымез / А. А. Разин ; записал А. Шкляев // Удмурт дунне. - 2006. - 6 окт. - С. 6, 11-12. - (Удмурт кизилиос).

За предоставление материала выражаем огромную благодарность редакции газеты "Удмурт дунне"