Корепанов Александр Германович

Крезьгуре – калыкелэн визез-бурез

Корепанов А. Г.

Удмурт кизилиос сярысь гожтыкум, нырысь ик малпасько: мар лэсьтӥз та адями ас калыкез понна сыӵезэ, маин сое нимысьтыз ӝутыны луэ? Александр Корепанов гожтӥз Удмурт Республикалэсь кун Гимнзэ. Сое гинэ ке но гожтысал, нимыз зарни букваосын историе пырысал.

- Ӵукналы быдэ, котькуд адямилэсь асьме шаерен данъяськон мылкыдзэ бугыртыса, ёзвие выль кужым пыӵатыса кадь чузъяське республикамылэн Гимнэз. Сое огшоры гинэ кылзыны уг луы. Шуг-секытэн тырмытэм сюрес выламы вормон гур выллем луэ. Асьтэлы кызьы потэ, Александр Германович?

- Аслым но озьыгес потэ. Шуыло, та гимн Россилэн гимнэз сярысь но умойгес.

- Шуыло, атаезтэк нокыӵе гимн но ӧй пӧрмысал…

- Бен, шуыло: Герман гожтӥз, пиез аранжировка гинэ лэсьтӥз. Мукет сямен вераса, лушказ, аслыз кариз. Зэм, «Родной Кам шурмы» – Герман Корепановлэн гурез. Кырӟанэз солэн. Нош мынам йырам ӧй ке лыктысал сое уже кутыны, быдэс ар (1992-тӥ—1993-тӥ аръёсы) ӧй ке ужасал со бордын, Удмуртилэн луысал мукет гимнэз. Герман Афанасьевичез авторлэн правоосыз ласянь мон нокызьы ӧй пачкаты. Историын трос сыӵе ог-огзылэсь басьтыса шедевр кылдытэм муртъёс: Бах – Гуно, Верди – Лист, Рахманинов – Шуберт… Сыӵеез луыны быгатэ асьмелэн но.

- Та Гимнэз кутон понна нюръяськон секыт-а вал?

- Ог дас мурт пыриськиз конкурсэ. Мон симфонической оркестрлэн партитураеныз адӟисько вал Гимнэз. Вылӥ Кенешлэн сессияз духовой оркестрлы тупатыны куризы. Мынам та ласянь но, Гимнлэн огъя пуштросэз ласянь но кизергес вал ай валанъёсы. Кышкатски ке но, трос выри, кӧня ке вариантъёс лэсьтӥ. Та уж туж тунсыко, фактура ласянь узыр, но секыт вылэм. Котьма ке но духовой оркестрысь музыкантэз партитура лэсьтыны кури. Ӵапак сое быдэстӥзы Вылӥ Кенешлэн сессияз 1993-тӥ арын тулыс. Депутатъёс кылзэм бере валай: малпам уже тани-тани куашкалоз… Соку Валентин Кузьмич кырмиськыны «куро» сётӥз: Гимнлэн инъетэз луыса мед кылёз Герман Корепановлэн гурез. Собере ини йырам пыӵатӥ: ас вылад басьтэм ныпъетэз мукетыз вылэ погыльтыны уг яра. Созэ но ятвылтӥ: атаелэсь крезьгурзэ нокин но мон кадь мур, выжыозяз уз вала. Тӥни соку Гимнлэн философиез но мон доры вуиз. Уже кыстӥськиз 1993-тӥ арын шуркынмонозь. Олокызьы но пӧртэмъяса утчай.

Решение кутэмын вал: духовой но, симфонической вариантсэ но кылзыны. Кызьы? Сессиозь кылемын на кӧня ке нунал! Соку мон лопырскем кужымен уж борды кутски. Симфонической сяна, духовой оркестрлы партитура выль сямен гожтӥ. Валай: Инмар мыным юрттӥз. Аслым кельшем бере, мукетъёслы но кельшиз. Тросэз куаразэс сётӥзы мынам крезьгуре понна. Эшшо огпол султыса кылзӥзы. Нош ӝыт, Республикалэн нуналаз, Операя но балетъя театрын Гимнлэн премьераез вал.

- Шӧдӥське, со тодэ ваёнъёсты али но сюлэмдэс шунто. Нош та вакытэ Кун Кенешлэн сессияз вераськон мынэ ни: кыӵе кылын, ӟуч яке удмурт сямен чузъяськыны кулэ асьме Гимн? Та пумысен лыдӟисьёсмы но валэктон возьмало. Крезьгурчи кызьы малпа меда?

- Вунэтоно ӧвӧл: шаерамы трос ӟучъёс уло, уката ик городъёсын. Соин ик Гимнлэн кылъёсыз луыны кулэ кык кылын: ӟуч но удмурт (ӝоген талы конкурс ялозы, дыр). Котькудӥз мед быръёз ас мылкыдызъя. Нош официально кызьы быдэсъяны – тазэ сайкыт йырын малпаськозы ни, дыр.

- Витьтон аресозь сюрес… Мар со тӥ понна, Александр Германович? Быгатӥды кадь-а та дырозь пусъем ужъёстэс быдэстыны?

- Ас адӟонэлы ӝожтӥськыны сьӧлык луысал. Витьтон аресэлы луыса мон али сыӵе, кыӵе вань. Лул курадӟон ласянь но, коньдонлы но мукетызлы ёрмон ласянь но шуг-секытъёс трос гинэ вал. Нош соос ӧй ке луысалзы, мон луысал мукет. «Сал» шуэмез история уг чида. Поэт сямен: асьмеос кулэ ӧвӧл ог-огзылэсь висъяны вормонэз но келянэз, ыштонэз. Сыӵе жалянэн асме уг пӧсекъятӥськы. Мон ужасько…

Нырысь ик, творчество удысын. 1980-тӥ арын атаеным ӵош быдэстӥм «Мятеж» операмес (либреттозэ дасяз анае, Людмила Николаевна). Гожтӥ «Уӵы но Роза» балет (жаль, татчыозь ӧз пуктӥськы на), симфония, оркестрен фаготлы концерт, оркестрлы кӧня ке сюитаос, фортепианолы трос крезьгуре – квинтет, соната… Камерной крезьгуре, романсъёсы, спектакльёслы кырӟанъёсы…

- Удмурт профессиональной музыкалэн атаез – со тӥляд зэмос атайды. Солэсь кельтэм синпельзэ утён вылысь, мар лэсьтӥськоды?

- Герман Афанасьевичлэн архивезлы бадӟым дыр висъясько. Солэн произведениосызлы аранжировка лэсьтӥсько. Сизьымдон ар тырмон юбилеезлы сӥзьыса, бадӟым фестиваль ортчытӥм ке вал, соку солэн куд-ог ужъёсыз нырысьсэ чузъяськизы. Шуом, оркестрен скрипкалы концертэз, со азьло клавираен гинэ кыллиз. Туэ сое Чайковскийлэн фестиваляз но быдэстӥзы. Духовой оркестрлэн репертуараз но Герман Корепановлэн азьвыл тодмотэм крезьгурез пыриз. Тани, кылсярысь, скрипкалы гожтэм чурзэ мон саксофонлы но духовой оркестрлы тупатӥ. Сыӵе транскрипциосы ӧжыт ӧвӧл.

- Удмуртиысь композиторъёсын кивалтонэз ас пельпум вылады басьтон – сое ас выжыысьтыды потэм быгатонлык шуыны луэ-а?

- Ӧй шуысал озьы. Мон пинал дырысеным ас поннамгес, кепырась вал. Но улон куриз атаелэсь ужзэ та ласянь но азинтыны. Дӥсьтытэк кадь кутски, но табере улон огъя шумесын нырке ини. Трос бергано луэ, крезьгурен вырисьёсмы ёрмонэн сэрен улонлэн тыпак пыдсаз медаз пуксе шуыса: гонораръёсыз будэтон, книгаос поттон ласянь но, концертъёс, фестивальёс ортчытъян пумысен но. Кызьы шуод, крезьгурчиослэн лулзы-мылкыдзы сярысь но, вылзы-тырзы сярысь но сюлмаськоно. Учконо ке, али Композиторъёслэн огазеяськоназы пыремлэсь мар пайдаез кадь… Азьвыл со котьма инмысь выллем усьылӥз: квартира, путёвкаос, фестивальёс… Озьы ке но огазеяськонэ пыремъёслэн лыдзы будэ, куке соос чылкак куинь кузя гинэ вал – табере дас кык: Юрий Толкач, Сергей Черезов, Николай Шабалин, Сергей Корепанов, Алексей Проскурин, Александр Корепанов, Евгения Копысова, Ирина Нуриева, Светлана Стародубцева, Ирина Ходырева, Ада Голубкова, Римма Чуракова. Дас куинь луысал: туж жаль, али гинэ ми радысь «усиз» Геннадий Корепанов-Камский. Огъя вераса, сизьым композитормы, вить музыковедмы.

- Котькудӥзлэн вылӥ образованиез вань, консерваториез йылпумъямын. Али но одно ик сыӵе курон пуктӥське-а, Композиторъёслэн огазеяськоназы кутоно ке?

- Бен, али уката но, дыр. Нош мукет ласянь ке… Герман Афанасьевичлэн нокытын нимысьтыз вылӥ дышетскемез ӧй вал. Озьы ке но «Наталь» операез бере сое Хренников но Хачатурян соку ик союзазы кутӥзы. Атае ас кужыменыз-шӧдонэныз гинэ тыршыса вылӥ тодонлык люказ. Сыӵе учыр одӥг-ог гинэ луэ. Али самодеятельной композиторъёс дышетсконэз кулэен уг лыдъяло кадь, соослэн валанзы ӧвӧл крезьгурлэн вылтусыз но, оркестровка сярысь но.

- Соин ик, тодонзы тырмымтэен, крезьгурчиос Композиторъёслэн огазеяськонзылэсь юрттэт витё. Сыӵе юрттэт али сётӥське-а?

- Юрттыны ноку пумит ум луиське. Атайме тодам ваисько ке, солэн кӧня дырыз солы быриз… Али но – я Толкач, я Шабалин, я мон – визь-кенешъёс сётылӥськом. Но, мон сямен, самодеятельной крезьгурчиослы туала вакытэ, сыӵе зол азинскем техника дыръя, сокем ик юрттэт кулэ ӧвӧл ни. Крезьгурен вырон – со ваньмон дыръязы, мылкыдзылы уж. Зэмос профессиональной ужен соосты номыр уг огазея. Таиз – «тонна руда» пӧлын бугыръяськем кадь – туж секыт, вань кужымез кыскись-позыртӥсь уж.

- Секыт ужлэн емышез но ческытгес. Музыкантъёс куспазы крезьгуро кылын верасько. Тросэз соосты уг валало, сыӵе вылӥ шӧдонъёс ваньмызлы уг сётӥсько. Музыкалы дышетон пумысен кыӵе малпанъёсты, Александр Германович?

- Сыӵе дышетон вылӥе пуктэмын луысал ке, асьмелэн туж уно крезьгурчиосмы луысалзы. 90-тӥ аръёслэн кутсконазы крезьгуро коллективъёс трос кылдылӥзы. Но кадръёслэн тырмымтэзы али но туж зол шӧдӥське. Вылӥ быгатонлыкен музыкантъёслы симфонической оркестрмы ик туж ёрме, бадӟым малпанъёссы быдэсмытэк кылё.

Крезьгуро училищеын 25 ар дышетӥ, соин ик та сюлмаськонъёс мыным матын. Али УдГУ-ысь искусствоосъя факультетлэн крезьгуръя люкетэныз кивалтӥсько. Ужаськом ини ньылетӥ арзэ вить удысъя: академической хор, калык хор, калык инструментъёс, духовой инструментъёс но хореография. Тазьы гинэ ку ай ёрмонысь потом? Асьмелы одно ик кулэ крезьгуръя вылӥ дышетскон заведение.

- Уд учкиське-а, крезьгурлы дышетскымтэ адями палдурес шуыса?

- Котькуд адями мар ке но ласянь дышетскытэк кыле. Соин ултӥ карыны уг яра. Но крезьгурлы дышетымтэен, усён гопъёсмы кылдо ик. Буш инты так уг кыльы: сое тырмытэ массовой культура. Адями – дышетскемын-а, ӧвӧл-а – чеберлык борды кыстӥське. Басьтэ ини сое, мае мычо. Нӧкы вӧй интые – маргарин. Али, мон шуысал, зэмос искусствоен вырисьёс, массовой культурае выемъёсын ӵошатыса, туж ичи, векчи гинэ сӥ кылдыто. Нош обществоез сяськаяськытон понна, та сӥез ӟӧкгес кароно, со тырмыт луиз ке, обществомылэн культураез будоз.

- Асьтэ сярысь ке верано, тӥ городын будэм шор арлыдо крезьгурчи, котьма но тӥледлы дурен сётэмын: вылӥ шӧдонлык, лулчеберлык, визь, тодон-валан. Сямды но лач-лач, зӥбыт. Ваньмыз со юнме шорысь уг лыкты. Эшшо берытском на выжыосты борды…

- Пинал дыръям висеменым, крезьгуро школае ӧй ветлы. Атаелэн монэн вырыны дырыз но моӵез уг тырмы вал. Сизьым-тямыс арес дырысеным со «Наталь» операез бордын ужаз, симфония кылдытӥз. Калык гуръёс пель сьӧрам чузъяськыса улӥзы. Ваньмыз со лулам-вирам пыӵаз. Удмурт кылэз ӧй ке но дышеты (со вакыт луонлык ӧй вал на), мынам крезьгурелэн кылыз удмурт, визьбурез но удмурт, шуысал. Соин ик гожъямъёсам калык гуръёс капчиен пӧлэстӥськыса пыро.

Пинал дыръям Дэбес черкогуртэ семьяенымы бертылэммы но шӧдӥськытэк уг кыльы, дыр. Выжыосмы отысь. Песянаелэн сузэрез Евгения Матвеевна Малых дорын гужемъёсы шутэтскылӥм.

«Бадӟымгес луэмея ас выжыосме юнгес шӧдӥсько», - шуэ Александр Германовичлэн нылыз Людмила но. Со шумпотыса быдэсъя Корепановъёслэсь произведениоссэс, фортепианоен шудэ. Нош дышетскыны пыриз Удмурт университетэ, дӥськутъя дизайнер луыны малпа. Пичиез нылыз, Маша, дасяське консерваторие… Тӥни озьы, выжыезъя – пушъетэз.

Александр Корепановлэн кузпалыз но, Тамара Ювенальевна, тодмо музыкант. Ӵошен соос Волга но Кам котырысь трос интыосы вуылӥзы, пӧртэм концертъёсы, фестивальёсы пыриськылӥзы.

Нош вань на ӵыдонтэм музъем кесэгзы, сад-бакчазы. Отын – инкуазен ваче син. Лул но шутэтске, киослы но уж шеде.

Источник:

Корепанов А. Г. Крезьгуре – калыкелэн визез-бурез / А. Г. Корепанов ; записала Т. Чернова // Удмурт дунне. - 2001. - 11 мая. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"