Лазарева Августа Якимовна

Улон ачиз монэ бырйиз

А. Я. Лазарева

Августа Лазарева (Чиркова) – Удмурт Республикаысь калык артистка. Балезино ёросысь Вуж Кеп гуртын вордскем нылаш Ново-Волково школаын дышетскиз, собере городын газосварщица луиз. Но лушкем малпанэз сое вуттӥз театре. 1977-тӥ-1981-тӥ аръёсы дышетскиз Уфаысь искусствоосъя институтын, собере Удмурт театре лыктӥз. Быгатонлыкез тужгес пушйиз 1990-тӥ аръёсы – «Сирпу саюлын яратон», «Эбга», «Эш-Тэрек» спектакльёсын. Татысь валтӥсь рольёсыныз финн-угор театръёслэн фестивальёсазы пыриськылӥз – «Эбга» 1994-тӥ арын умой дунъет басьтӥз Финляндиын. Огъя вераса, 23 ар ӵоже ог сю пала рольёс шудэмын ни: пӧлазы – Василиса Прекрасная но, Баба Яга но. Пӧртэм-пӧртэм нылкышноос. Котькудӥзлы ас буёлзэ, лул кужымзэ кузьмаз Августа Якимовна, ас кужымзэ шӧдӥсь актриса.

- Августа, тон котьку йӧно, йырдэ вылын возиськод. Со мумы йӧлын сётэмын яке астэ куасано луэ?

- Зэмзэ но, монэ вылтӥяськись кожало. Азьло улонам графиня (яке монашка) вал, дыр. Кузь дӥсен мыным кельше, мугорылы эркын. Сцена вылын но сыӵе дӥсен уясько кадь. «Марья-голубкаысь» Царица-водяница сямен.

- Пинал дыръяд сьӧд ужлэсь ӧд пега, дыр?

- Ӧй. Пичи дыръям мон туж ужась вал. Котьма борды ӝогак кутскылӥ, мыным оскылӥзы. Анае шуылӥз: тон ке вань, удалтэ, кытчы ке потоно ке, машина но сюре…

- Мукетъёс пӧлысь висъяськемдэ пичиысен шӧдӥд-а?

- Шӧдылӥ. Одӥг кышномурт шуиз: «Поля, та нылыд тынад яке туж шудо, яке туж шудтэм луоз». Малы озьы шуиз? – малпалляй.

- Нимыд Инмарен огкылысь луэмдэ возьматэ…

- Монэ Надя ниманы малпало вылэм, нош атае кутэм но Августа гожтэм. Малызэ но верамтэ. Со монэ туж яратэ, эркия вал, конфет но тросгес сётылӥз. Урок лэсьтэммес эскере но монэ тужгес ушъя вал. Тусын мон бадӟым апае сямен ик солы кельшисько - сьӧд, оло, соин но.

- Августа, нош пинал дыр малпанъёсыд тонэ вуттылӥзы-а театре?

- Со пыдлон, лушкем вал. Сцена вылын пыр кылбур лыдӟылӥ, сценкаосын шудылӥ… Анаймылэн 56 манет пенсиез мырдэм тырмылӥз няньлы, сакырлы гинэ. Нырысь малпанэ вал: ӝоггес ужаны кутсконо, отӥяз – адӟом. Желя эшеным Ижысь 7-тӥ техучилищее пырим. Электрогазосварщица луи. Ужаны кутски нефтяникъёс дорын.

«Ижмаш» дворецысь хоре ветлыны ӧдъяй. Нош куке учки калык театрлэсь спектакльзэ – мукет номыр кулэ ӧз луы ни. Бугульмаысь институтэ сваркая технологе дышетскыны ысто ни вал. Ӵапак со вакыт Удмурт театре люкало вылэм егитъёсты, Уфаысь институтэ келян вылысь. Калык театрен гуртэ потоно автобусмы ӝегаз – татчы кожоно кариськи Ольга эшеным.

- Кыӵе валтӥсь малпанэд?

- Адямилы уродзэ эн лэсьты – азьпалан со аслыд озьы ик берытскоз.

- Кыӵе сямыд люкетэ?

- Ас малпанме укыр меӵак вераме. Собере, шуи ни, ас поннамгес, кинэн ке огъя кыл шедьтыны секытгес. Асме йыръён сямы вань на.

- Котькудӥзлэн театрысь валтӥсь актриса луэмез потэ, дыр. Тон понна сыӵе шудо вакытъёс воректӥзы-а?

- Ог дас ар пала, 1989-тӥ-1998-тӥ аръёсы, тужгес ӟеч рольёсты шудыны кылдӥз. Ма, али но уг ӝожтӥськиськы… Лирико-драматической актрисаен асме золгес шӧдӥсько. Кизилие ӝуатскиз кадь «Сирпу саюлын яратон» (Ю. О’Нил) бере, Юрий Фараджулаевен пуктэм спектакльын картэзлэсь лушкем, ӟырдыт яратӥсь нылкышноез – Аббиез – возьматыкум. Классика пӧлысь ик – Люсинда (Мольер «Эриктэм эмъясь», Мели (Эзоп). Таӵеоссэ секытгес шудыны, но соос лулпушез узырмыто. Котькыӵе вакытлэн асьмелы тупась шугъяськон-шумпотонъёсыз вань.

- Режиссёръёс пӧлысь кин тонэ яратэгес?

- Василий Ушаковен трос ужам: «Эбга» трагедиысь (П. Захаров) Дукья, «Эш-Тэрекысь» (Е. Загребин) Алсу – та рольёсын мон гинэ вал, мукетъёссэ малы ке ӧз куты. Озьы ик «Шунды-Мумыын» (Г. Романова) Чабьяез возьматӥ. Та вашкалаысь вуэм нылкышноос, асьме авторъёслэн.

- Удмурт нылкышнолэсь образзэ кылдытыны капчигес-а?

- Дукьяез шудыны секыт вал. Котькуд спектакль бере, ачим но валатэк, душе дыртылӥ. Картсэ виыны дӥсьтэм кышномуртлэн сьӧд кужымезлэсь озьы мозмытскисько вылэм.

- Партнёръёсын тыныд удалтылӥз кадь?..

- Кинэн ужаськод, сое яратыны кулэ (валаськоды: актёрез сямен). Гена Бекмановен тупаськом вал. Соос «Катанчие» кошкем бере лапеггес актрисаос басьтӥзы интыме. Собере Игорь Люкин, Николай Шишков вуизы… Таосыз но кошкем бере огдырлы партнёртэк кыли. Комедийной яке характерной рольёсыз сётылӥзы ни. Леонид Романов кутылӥз таӵеосаз: «Пинал мылкыд – юмал йӧлпыд» (В. Котков) – Чупа, «Парсьпи но эмеспи» (А. Григорьев) – Ольга. Чупаез шудыку, куинь пол дӥсез вошъяно, пӧсяно – но калык серекъя бере, жадем тӧлӟе. Ольгаез лушкаськисез шедьтон борды ӝабырскем кышномуртэ, ӧз тодмаллялэ – вылаз ик очкиен потылӥ. Огпол гуртын огез учкись спектакль бере шуэ: ма, та артистказы воксё веськрес гинэ вылэм ук… Нош «Сирпу саюлын…», «Эш-Тэрек» бере шуылӥзы: сцена вылын чебергес, синмаськоно кадьгес.

- Табере театрын егитъёсын ужано…

- Бен, партнёръёсы 17 ареслы но пинал ни. Но, шумпотӥсько, роль сёто ай. Егит актрисаосын огдыре ик кыӵе ке образ бордын ужаны быгатӥсько. Соиз жаль: ужаськод-ужаськод, куд-ог спектакльлэн улонэз туж вакчи – кык-куинь толэзь гинэ. Но мон яратӥсько ӵошатскыса, вожвылъяськыса ужаны. Собере, валтӥсь актрисаен шуак маке луэ ке, мон воштыны быгатӥсько ук. Ролез дасяку но юрттылӥсько.

- Кудӥз ролед жаль – спектакль али уг ни мыны?

- Абби, Алсу… Мыным туж кельше вал Александр Блиновен ужаны. «Буш коркан адямиос» (Пудин) спектакльын Лизкалы кӧня кужымме сётоно луи… Та ужмес пытсазы, туж лек – калыкмылэн сямызлы уг тупа шуыса. Нош драматургез вӧзысьтымы ик, пор.

- Вань, дыр, ук тужгес яратоно ролед но?

- Вань. «Малы бӧрдо нылашъёс» (Ф. Буляков) спектакльысь Даша. Та секыт драматической роль – асме отысь адӟисько. Оло ке автор лул пушкам учкем… Куке та пьесаез лыдӟизы, мон пыд улме но светофорез но ӧй адӟы ни – быдэсак отчы выйи.

- Нырысетӥ ролед?

- Василиса – «Царевна-лягушкаысь». Тазэ мон 20 ар пала шудӥ.

- Выжыкылъёс ма понна кельшо?

- Кин гинэ мон ӧй вал ни отын! Со сярысь тазьы гожтӥ (эшлыко чуръёс пӧранэн кӧня ке вырисько):

Кин гинэ ини ӧй вал:

Коӵыш, ӟичы, кый, куака,

Эксэй, вуныл, Баба Яга…

Эркын инмын лобасько,

Ӧрӟилы но кельшисько,

Ваньзэ ик синйылтӥсько:

Кин пӧяське, ушъяське,

Вожъяське, урттылӥське…

Выжыкылын уката сюлмысь, пырак со дуннее выйыса шудоно луэ – нылпиос алдаськемдэ соку ик валалозы.

- Асьме театрын ик мукет дыре, азьло аръёсы, ужасалыд-а?

- Котькуд артистлэн аслаз вакытэз. Но улэпен адӟем потэ вылэм азьвыл «кизилиосыз», соослэсь шудэмзэс. Жаль, видео шуонъёсы гожтыса кылемын ӧвӧл соос. Милям но бен трос ик гожтымтэ, уката ик – классикаын шудэммы. Ярам коть гожтыса кельтэмын самой нырысетӥез ик - театрын ужаны кутскемлэсь азьло Иван Даниловлэн «Яратон со» телеспектакляз шудэммы - синпельлы кылиз.

Соиз но умой: ми дышетскыса вуим на Василий Перевощиков, Борис Безумов кадь бадӟым артистъёслэсь.

- Нош вӧзысьтыды бадӟымгес эшъёстылэсь?

- Котьку синмаськыса учкисько Галина Владыкина шоры, кызьы со пӧртэм луыны быгатэ: серемес но, кайгуо но… Нефёдовалы но туж шуныт мылкыды – уката ик соин: Раиса Геннадьевнаен ми артэ гуртъёсысь, одӥг школаын дышетскемын. Юрттэтлы со доры мынӥсько.

- Ӟуч актрисаослы синмаськемдэ но тодэм потэ вал…

- Нонна Мордюкова, Инна Чурикова, Тамара Сёмина, Наталья Гундарева… Москваын куд-огзэ адӟылыны кылдӥз. Но мынам котьку син азям Нина Петровна Бакишевалэн пиштӥсь синъёсыз.

Источник:

Лазарева А. Я. Улон ачиз монэ бырйиз / А. Я. Лазарева ; записала Татьяна Чернова // Удмурт дунне. - 2005. - 25 марта. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"