Тарасова Нина Семёновна

Тӧдьы юсь сямен - азьлань!

Тарасова Н. С.

Шӧтэм кышномуртъёс уг луо ке но, пӧлазы сюро на сыӵеосыз но: со шоры огпол учкид ке, синъёстэ воштэмед уз луы ни. Ӵапак таӵеос пӧлы мон пыртысал Ижевскысь пинал усточиослэн юртысьтызы куроен киужанъя специалистэз Нина Семёновна Тарасоваез. Солэн куролэсь удмурт мунёосыз дуннелэн кыӵе гинэ сэрегъёсаз тодмо ӧз луэ ни! Куд-огез утисько Санкт-Петербургысь мунёосъя музейын но К. Герд нимо национальной музейлэн фондаз, озьы ик соосты пумиталод Канадаысь, Япониысь, Финляндиысь, Голландиысь, Швециысь, Германиысь, США-ысь, Китайысь нимаз адямиос киысь, 1997-тӥ арын удмурт куро мунёосын тодматскизы Россилэн Кун Думаысьтыз депутатъёс но. Со сяна, Н. Тарасова пӧртэм пумо ужрадъёсы пыриськемын: 2000-тӥ арын Россиысь калык творчествоя «Вормон салют» фестивальлэн лауреатэз луиз (Ижевск), 1997-тӥ–2003-тӥ аръёсы – калык киужъя «Данилушка» фестивальлэн дипломантэз (Екатеринбург), 2002-тӥ арын – улосъёс куспын чеберлыко киужъёсъя «Зарни кияс» фестивальлэн лауреатэз (Сыктывкар), озьы ик со пусъемын быдэс странаямы ортчись «Калык киужъёс» адӟытонлэн дипломеныз но медаленыз (Волгоград). Берло вакытэ Нина Семёновна вань сюлэмзэ сётэ нылпиосты киужлы дышетонлы. Та ик бурдъяз сое ватсаса тодон-валан сётӥсь дышетӥсьёс куспын Россиын радъям «Сюлэмме сётӥсько пиналъёслы» конкурсэ пыриськыны. Огъя вераса, куролэсь пӧртэм арбериос лэсьтон мылкыдыз та кибашлы кышномуртлы чик но тэк пукыны маза уг сёты. Выльзэ но тунсыкозэ ялан утчаськытытэ…

- Куро - туж аспӧртэмлыко маке, - огзэ мунёзэ кияз бергатыса вера Нина Семёновна. Пинал усточиослэн юртазы «Куро мунё» студилы вӧл-вӧл инты висъямын. Кытчы гинэ эн учкы, синъёсты шумпотто куролэсь лэсьтэм аспӧртэмлыко арбериос, мунёос. – Куро уг яраты лякылэмез, пачкатэмез, солэн улэп макелэн кадь шокамез потэ. Дорам дышетскыны ветлӥсь пиналъёсме но индылэмысь уг дугдӥськы: ужды чебер, чылкыт быдэстэмын мед луоз. Асьтэлэн ӝажыяды гинэ медаз, кузьманы но мед яралоз, шуисько. Нош ужан висказы керӟегъяськыны кутско ке, мон соосты лӥятӥсько: мын ай, нылы, коридоретӥ поръя, куро уг яраты алама мылкыдэз. Нырысь серекъяло вал кадь, берло асьсэос но тае валазы, лэся. Со сяна, Ижевскысь Пинал усточиослэн юртазы ужаны лыктыса, мон шӧдӥ: анай-атайёс тыршо нылпиоссылы школаын дышетскон висказы ватсаса тодон-валан сётыны. Шуом, пиналзэс интыяло крезьгуръя, эктонъя, кунсьӧр кылъёсты дышетонъя студиосы. Нош киужлы дышетонэз куддыр санэ ик уг басьто. Шумпотымон, берло дыре анай-атайёслэн валанзы сайка ни: киуж йырвизез сына, юнматэ но будэтэ. Жаляса верано, мон доры вуись пиналъёс тросэз ёрмисьгес семьяосысь. Ма, тазэ мон валасько. Татчы ветлэмзы понна соос трос уксё уг тыро, вылаз ик, пунэм-лэсьтэм мунёоссэс вузаса, кӧня ке коньы но поттыны быгато. Монэ но куро туннэ нуналэ сюдэ, уж сётэ, сюрес усьтэ пӧртэм городъёсы, улосъёсы но кунъёсы вуылыны, тунсыко адямиосын кусып возьыны.

- Куроен вырисьёс, мон тодэмъя, шаерамы сокем ик ӧжыт ӧвӧл. Аслэсьтыд уждэ мукетъёсызлэсь йӧнгес быдэстэм потэ, вылды? Киужлы материал одӥг, нош сое дасян амалъёс пӧртэм-а?

- Зэм, куроен вырисьёс ӧжыт ик ӧвӧл. Тани шаерысьтымы куд-ог киужъя юртъёс асьсэлэсь ужан амалъёссэс ватыса возё. Медаз, пе, тодэ бускельёсмы, кызьы ми ужмес такем чебер лэсьтӥськом. Но ӵем дыръя ми ог-огмы доры кенешыны ветлӥськом. Мон ачим но котькуд нунал дышетскисько пиналъёсыным ӵош. Мыным но валэктон курыса вазисько ке, лулысь-сюлмысь юрттӥсько. Пиналъёсылы но шуисько: мынэсьтым гинэ адӟем эн каре, чаклалэ мукет авторъёслэсь ужъёссэс, со сяна, асьсэ пырызэс но ужазы мед пыӵатозы. Йырзэс мед тӥялозы, шуом, куролэсь мунёзэс эшшо но тузӥгес, аспӧртэмлыкогес карон пумысен. Мыным дан луоз, учкисьёс пусйизы ке: тани таӵе ужан амалэз кутэ Тарасовалэн дышетскисез, тани таиз но соослэн малпамзы…

Кызьы шуэ горд сюйлэсь арбериос лэсьтӥсь Анатолий Степанов, ӵапак дышетскисьёсыд ик тыныд дунъет пукто: мастер-а тон яке дышетӥсь-а. Мон соин соглаш. Но матынгес кыкетӥез. Малпасько, мон нырысь ик быдэсъясько педагоглэсь ужзэ. Пиналъёсме мон киужлы гинэ уг дышетӥськы, валэктӥсько, кызьы потоно пӧртэм шуг-секытысь. Соос мыным анайзылы кадь ваньзэ верало, ми, огазе кариськыса, вань кылдэм ужпумъёсты сэрттӥськом-пертчиськом. Дышетэм пиналъёсыным трос аръёс ортчыса но кусыпме уг ыштӥськы.

- Котырады Ижевскысь удмурт пиналъёсты гинэ люкады-а?

- Мынам студиям пӧртэм выжыысь нылпиос ветло. Удмуртъёс но, ӟучъёс но, бигеръёс но. Котькудӥныз одӥг кыл шедьтыны тыршисько. Киуж лэсьтон куспын мон соослы мадисько удмуртъёс сярысь, асьмелэн культураенымы тодматӥсько. Соос огымысь пусъё: вот, пе, милемлы школаын та сярысь веразы вал, нош ми ӧм кылзэ, макем тунсыко вылэм! Озьы удмурт калыкен тунсыкъяськыны кутскемзы соку ик шӧдӥське куро арбериос лэсьтэмзыя. Мунёоссы, шуом, удмурт эктонэз тапыртыны кутско… Мынам таӵе малпанэ: нылпиосты будэтоно, калык культураез улӟытыса.

- Маиныз паймытэмысь уг дугдо нылпиос?

- Тани, шуом, школаын пинал сокем ик умой уг дышетскы, со шоры «кыкчи» шуыса учко. Со ӝутскыны но уг тыршы ни, «кыкчи» ке «кыкчи» мед луоз! Школаын дас ар дышетскыса но со ассэ адямиен ӵем дыръя уз шӧды. Нош киуж ласянь со сыӵе быгатонлыкъёссэ адӟытоз! Солэсь киужзэ дунъяло, адямизэ но гажаны кутско. Тани кылем арын радъямы Алёна Останиналэсь куро арбериосызъя адӟытонзэ. Учкисьёслы кельшиз. Мон солы вазиськисько: «Ойдо, Алёна, ӵош дышетскем эшъёстэ нимысьтыз ӧтём». Нош со «уг, уг» шуэ. Озьыен, шумпотонзэ дышетӥсьёсызлы но, классэзлы но верамез уг поты. Таӵе дыръя йыре малпан каръяське: ужзылы сюлэмзэс сётӥсь дышетӥсьёс школаын одӥг-кык. Та нуналэ ӝуась синмо дышетӥсез туж шер пумиталод…

Гуртын но ужаса вуи бере, али шӧдӥсько ни, маин висъясько гуртысь но, городысь но пиналъёс. Гуртын будӥсьёсыз анай-атайёссылы матынгес, соос тодо ог-огзылэсь куректонъёссэс но шумпотонъёссэс. Нош городысь пиналъёс ас понназыгес уло, эшъёссылы гинэ но адӟытэмзы уг поты анай-атайёссэс. Кепырало шат: кин ке соослэсь шекъёссэс синйылтоз?

- Тӥ кемалась ик ӧвӧл пыриськиды ватсаса тодон-валан сётӥсь дышетӥсьёс куспын «Сюлэмме сётӥсько нылпиослы» конкурсэ. Мар сётӥз со тӥледлы?

- Сое куатетӥ арзэ ини радъя Россиысь Калыкез дышетонъя но наукая министерство. Кемалась ини туж синмаськыса учкисько вал отчы пыриськем Хмелёв Владимир Леонидович – Пичи Пурга ёросысь Яган-Докъя гуртысь пу вӧлонъя но кызьпу сулэз чеберъянъя специалист шоры. Конкурсысь бертыса, со шуиз: Нина Семёновна, мон тӥледыз адӟисько та конкурсысь. Кылем арын шуд усиз мыным но отчы пыриськыны. Удмурт Республикаын вормисе потӥ. Бӧрысь пыриськи Москваын ортчись заочной тураз. Быдэс Россиысь финалэ потӥз 12 адями. Пӧлазы вал мон но. Ноябрь пумын Санкт-Петербургын радъям финалаз пыриськи. Тужгес но секытэн сётскиз Питерысь огаз школаын 40-50 пала учкисьёс азьын усьтэм урок сётон. Мукет калыкъёс пӧлын шӧдӥ: мон кужмо удмуртлыкеным. Пыри куать тужгес но усто дышетӥсьёс пӧлы, аспӧртэмлыко луэме понна пусйизы нимысьтыз кузьымен – цифровой фотоаппаратэн.

- Филологияя факультетэз йылпумъяса, кызьы озьы луыса кошкиз: тӥ нылпиосты киужлы дышетыны кутскиды?

- Мон вордски Алнаш ёросысь Шадрасак-Кибья гуртын. Данъяськисько соин, паймисько: отын тросэз улӥсьёс вылӥ образованиен. Пичи гуртын умоез борды кыстӥськон сям юн возиське.

Шадрасак-Кибьялан начальной школаын дышетскыса, Варзи-Ятчи шор ёзо школаез йылпумъяй. 7 иськемлы палэнэ дэриез-котэз лёгаса ветлоно луиз. Нырысь возьдаськисько вал, Варзи-Ятчи курорт ук, пиналъёс но отын мудронэсь, визьмоесь, эшшо ке ӟучомемын на. Нош милям, палэнысьёслэн, сюрес ӵоже дӥськутмы гинэ но наштаське. Соос сьӧры уйиськыны кутским, ми но соослэсь ӧжыт медам тодэ кадь потылӥз. Вань сюлэмме сётыса дышетски. Соин, оло, капчиен пыри Удмурт университетлэн филологияя факультетаз.

Нырысетӥ курсын весь мӧзмисько вал. Нуналлы быдэ сямен городын улӥсь апае доры ветлылӥ. Нош эшъёсы со вие пиосын тодматскыны вуиллям ни! Вот, шуо, пурга пиен, пе, тодматским. Ӝоген мон но Тарасов Коляен пумиськи. Нырысь со мыным нокыӵе ик ӧз поты кадь. Со худграфлэн 2-тӥ курсаз дышетске вал ни. Ӵош киное ветлыны кутским. Озьы ик ог-огмылы дышим. Ваньзы паймо вал: кыӵе чебер пара! Коля монэ ӵем дыръя суреда вал, гуртысь вуэм нылъёс азьын ассэ зэмос суредасен адӟытэмез потэ вылэм, лэся. Улэп сяськаосты но шедьтыны соку шуг вал ай, нош со вить часын султыса, кузь черодын сылыса, олокытӥ-мар быдэс букет вуттылӥз. Армие кошкиз но ар ӵоже мыным 156 гожтэт келяз. Эшъёсы чылкак абдрало вал: удмурт пияш сюлэмыд понна сыӵе чебер нюръяське! 3-тӥ курс бере ми кузпалъяським. 4-тӥ–5-тӥ курсъёсын худграфын дышетскисьёслэн этажазы нимаз комната висъязы. Мон та студентъёс пӧлын чеберез мургес валаны дышетски. Со ик луиз киужен выронэлы инъет.

- Кузпалды тӥледыз ас вордскем палъёсаз ик вайиз, дыр?

- Бен, дышетсконмес йылпумъяса, ми Пичи Пурга ёросысь Вуж Монья гуртэ бертӥм. Отын со чеберлыко школа усьтӥз, мон пиналъёсты удмурт кыллы но литературалы дышетӥ. Озьы ик кыштыр улӥмы. Школаын ужан вискам Коля монэ дышетӥз куроен вырыны. Ӝоген ужаны кутски солэн Киужъёсъя юртаз.

- Капчиен ӧз сётӥськы, дыр, гуртысь лыктыса городын улон?

- Городын улон сярысь малпасал ке, оло, капчиен сётскысал. Мынам со шуак луиз. Туж секыт огдыре кузпалтэк, юрттэк, яратоно ужедтэк кыльыны. 9-тӥ сентябре Коля дорысь Ижевске улыны апае (дядяелэн сузэрез) доры кошки. Нош 10-тӥ сентябре уж шедьтӥ.

Нырысетӥ аръёсаз возьматэме потэ вал: мон Колятэк но «самостоятельной личность» шуыса. Нош али, ньыль ар ортчыса, мукет сяменгес малпано ни. Нокинлы но, номыр но возьматыны тыршоно ӧвӧл - быдэсъяно аслэсьтыд яратоно уждэ. Мын ас сюрестӥд. Котькуд адямилэн та улонын аслаз кулэлыкез. Аръёс шоры учконо ортчем выжъёс шоры кадь. Мар луиз - луиз. Озьы ик луыны кулэ вал, дыр.

- Та улонын ма тӥледлы кужым сётэ? Выль семья кылдытон сярысь малпанъёсты ӧвӧл-а?

- Мон ужын гинэ басыломисько. Кытчы кытчы, нош уж дурам лобӟыса мынӥсько. Шудо, пе, сыӵе адями, кудӥз шумпотыса уже мынэ, нош ужысь шумпотыса гуртаз дыртэ. Кыкетӥез та нуналлы монэ уггес шумпотты на. Выль семья кылдытон сярысь малпасько ке, анаймылэн верам кылъёсыз пель сьӧрам кылӥсько: ой, кен, кен, дукъялэн котькытын сиёнэз одӥг – лыс … Яратон со вань яке ӧвӧл, кыкетӥзэ семья кылдытыны секыт. Егит дыръя азьланезлы оскиськод но озьы ик яратыны кутскиськод. Нош 34 арес бере астэ воштыны секыт. Пиосмуртлы капчигес, вылды.

Адямилы озьы но, тазьы но шуыны луоно. Нош астэ ачид ноку уд алда. Та нуналлы мон аслам лулыным но сюлмыным кенешыса улыны тыршисько. Уг тодӥськы, Кузьма Иванович Куликов тодэ на меда верам кылъёссэ. Улонэлэн тужгес но секыт вакытаз со шуиз вал: «Нина, кытчы ӧтизы, мын, мылкыдыд гинэ мед луоз. Номыр шоры учкытэк, тӧдьы юсь сямен, азьлань мын».

Источник:

Тарасова Н. С. Тӧдьы юсь сямен - азьлань! / Н. С. Тарасова ; записала Е. Тугашева // Удмурт дунне. - 2006. - 20 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"