Шкляев Александр Григорьевич
Ӟуго-ӟуго улон гердъёс[править]
Александр Григорьевич Шкляев – Якшур-Бӧдья ёросысь якшур пи, удмурт воргорон, Удмурт кун университетысь журналистикая кафедралэн кивалтӥсез, литературовед но критик, котьма ласянь адӟем карымон адями, кузпал но атай. Со «Молот» (али «Кенеш») журналлэн валтӥсь редакторез но Удмуртиысь Писательёслэн огазеяськонзылэн тӧроез вал. Со сяна, 30 ар ӵоже дышетэ ни студентъёсты, удмуртлык, чеберлыко удмурт литература но журналистика понна вань кужмыныз но сюлмыныз нюръяське. Удмурт калыклэн кизилиез. Солы сӥзиськом тазэ мадёнмес.
Пумиськонъёс
Удмурт пединститутын дышетскыкум, милям группаямы вал кык Шкляеваос - Анна но Галя, Якшур-Бӧдья ёросысь Якшур гуртысь. Маке пумысен ми соосты огпол серекъямы но, соос шуизы: «Туж эн дыртэ ай, тани милям бӧлякысьтымы вуоз Саша нимо пи, соку тӥ тододы, кинъёс со Шкляевъёс». Саша Шкляевен мон пумиськи трос аръёс улыса гинэ. (Зэм вераллям Галя но Анна, со выжыысь быдэс династия дышетӥсьёс потэмын, соосты Якшурын Бекманъёс шуо. Огкутскемен верало ни, удмурт этнографлэн но кылбурчилэн В. Владыкинлэн вань Бекман Альчи Санколы сӥзем кылбурез. Тӥни со Бекман Альчи Санко ик вылэм ӵапак Саша Шкляев).
1980 арын вал кадь со, «Советской Удмуртия» газетмылэн редакциез Пастухов урамын дыръя. Мон ужасько вал совето ужъёсъя отделын. Соин ӵемысь гожъяно луылӥз гуртъёсысь депутатъёслэн бырйисьёссылы юрттэт сётэмзы сярысь. Александр Григорьевичен ми кыкнамы сиськон ӝӧк сьӧры тупам. Ог-огмес ми кыдёкысен тодӥськом ке но вал ини, куспамы одӥг пол но вераськеммы ӧй вал. Нош соку, ог-огмылы кӧня ке кыл вераммы бере, со монэ куриз, депутат ужъёсты мургес эскерыса но паськытгес возьматыса, журналаз статья гожтыны. Та ужме мон куиньмойскын быдэстӥ, Александр Григорьевичлы со кельшиз но «Молотлэн» вуоно номераз ик поттӥз. Соин та учырез верасько: Александр Григорьевич газетмес но сак лыдӟе вылэм, улонлэсь вирсэрзэ, йыгаськемзэ шӧдыса улэ.
Туэ 21-тӥ август. Ижысь «Строитель» санаторий. Отчы улыны интыямын вал финн-угор писательёслэн YII калыккуспо конгрессазы Финляндиысь, Венгриысь, Эстониысь, Комиысь, Мордовиысь, Марий Элысь, Карелиысь но куд-ог мукет интыосысь лыктэм куноос. Кыкетӥ ужан нуналэ писательёс но тодосчиос азьын докладзэ лыдӟиз А. Г. Шкляев.
Ма ватонэз, куд-ог вераськисьёс люкаськем калыкез асьсэ пала берыктыны ӧз быгатылэ, нош Шкляев, удмурт калык но литература понна аслаз мугор висёнэзлы кадь сюлмаськыса вераськемен, сокем бордаз кыскиз – омыретӥ кут лобӟем но кылӥськысал, дыр.
Конгрессын юмор сярысь вераськемез лыдэ басьтыса, докладзэ со кутскиз таӵе мадён бордысен. Одӥг эксэез туж сюлмаськытэ вылэм, солэн нылыз ноку уг серектылы шуыса. Соин ик малпам нылзэ сётыны солы, кин сое пальпоттыны ке но быгатоз. Потэм сюрес вылэ котькыӵе лулосъёсты жалясь, огшоры крестьян пи но. Сюрес вылысен со песьтэраз бӧчыез, ӟозэз но бакаез понэм но озьы эксэй корка пырем. Серемез ноку но потӥсьтэм эксэй нылэн вераськыкуз, пияшлэн песьтэраз бӧчы, ӟоз но бака ӵаштыртыны, йӧспӧртэм куараоссэс поттыны кутскиллям гинэ но, эксэй ныл китыр-китыр серектэм: мар бен, пе, сыӵе тынад песьтэрад вань? Озьы огшоры крестьян пи узыр пиос пӧлын вормисе потэм. Та выжыкыл бордысен кутскыса, Александр Григорьевич шуэ: писательёслы эксэйлэсь нылзэ гинэ серекъятоно уг луы, асьсэлы эксэйёслы но, пальпотыса ке но, зэмлыкез возьматыны быгатоно луэ. Нош кыӵе зэмлыкез возьматӥськом но кыӵезэ шарае поттыны кышкаськом шуыса, А. Г. Шкляев ужпум вылэ ужпум пуктэ. Со тупен-тупен маде, кызьы но мар лэсьтоно, удмурт кыллэсь данзэ уката вылӥе ӝутон но удмурт литература пыр калыкмылэсь сюрессэ яркытгес югдытон вылысь. Александр Григорьевич ужрадлэсь кулэ ӧрзэ шедьтыны но сое азьланьтыны быгатэ.
Тӥни таӵе пумиськонъёс дыръя но мукетъёсызлэн верамъёссыя мон тросгес но тросгес тодылӥ та гажано адями сярысь.
Саша семьяязы 11 нылпиос пӧлысь самой пичиез – «пурты шумес» - мугорызъя лапег, тазалыкезъя но нырысь-валысь норед вылэм. Но огез удалтэм – агай-апайёсыз ваньмыз дышетско вал бере, соослэн книгаоссы туж вазь Сашалэн ки улаз шедиллям. Соин ик Александр Григорьевич али но шуэ: «Мон агайёсылэн-апайёсылэн пельпумъёссы вылын будӥ».
Покчи классъёсын ик солы удалтӥз школа ласянь. Дышетскиз Якшур-Бӧдья педучилищелэн базовой шуон школаяз. Отын вань предметъёс удмурт кылын нуиськизы. Котькуд дышетскись борды юнматэмын вал на педучилищеысь студент.
Ӟуч школае потэмез бере Сашалэн сюлэмаз пус кельтэм таӵе учыр. Школазы вылэм улыно-вылыно, коридорез туж кузь. Ӝыны сюрслэсь ятыр дышетскисьёс огдыре линейкае, пе, султыны быгато вал. Одӥг пол школаязы дышетскон арбериосын киоск усьтӥллям. Вузкарисьтэк ӝӧк вылэ тыриллям тетрадьёс, карандашъёс, пероос но мукетсэ. Нылпиослэн соосты басьтэмзы ке потэ, ӝӧк вылэ асьсэос коньдон поныны кулэ. Нималлям со киоскез «стол чести» шуыса. Но со кема ик ужаса ӧвӧл вуэм, одӥг пол быдэс школаез линейкае султытӥллям. Азязы поттӥллям куинь пияшъёсты. Востэмесь, ӟарыт ымныроесь, дэра дэремъёсын. Дышетӥсьёс но бадӟым классъёсысь дышетскисьёс огез бӧрсьы мукетыз пото но лек кылзэс верало: тани та пияшъёс ӝӧк вылысь вузъёсты коньдон понытэк, пе, басьтӥзы, озьыен лушказы. Быдэс линейка азьын пияшъёслэсь кылзэс юало но бӧрӟыто. «Мон ӵем тодам вайылӥсько та учырез, - шуэ Александр Григорьевич. - Мон али но со пияшъёс азьын янгыш кадь - малы мынам дӥсьтонэ ӧз тырмы. Со пияшъёс янгыш ке но, сокем-сокем вӧсь карыны кулэ вал шат соосты?
Таӵе учыръёсты малпаса, Александр Григорьевич син азяз пуктэ дышетӥсьёссэ но, кудъёсыз солэн сюлмаз мур пытьы кельтӥзы, трос тодон-валан сетӥзы. Анна Егоровна Загребина, Никита Владимирович Вахрушев, Сергей Григорьевич Иванов. «Одӥг пол, - тодаз вае со, - ӟуч кылъя уроксэ Фаина Федоровна Ворончихина тазьы кутскиз. Саша, шуэ, мон туннэ ӵукна одӥг удмурт поэтлэсь ӟуч кылын вераськемзэ кылзӥ. Укыр юн шӧдӥське акцентэз. Тон ведь, Саша, удмурт писатель луод. Дышеты ӟуч кылэз, гожъяськыны но, вераськыны но умой мед быгатод. Мукет дыръя Фаина Фёдоровна монэ доска доры ӧте но гожтыны косэ предложение. Мон отчы янгышен мултэс запятой пуктӥсько. Со вазиське класслы, юа, шонер-а мон гожтӥ. Класс чал-чал улэ. Нош ик юа. Класс уг вазьы. Шӧдӥськод-а, Саша, шуэ дышетӥсе, класс тыныд сокем оске, сокем оске, тынэсьтыд лэсьтэм янгыштэ но адӟемез уг поты. Дышетоно вал уроктэ». Со вал зэмос педагогъёслэн зэмос урокъёссы. 11 классэз Александр азвесь медален йылпумъяз.
Витетӥ классысен ик Саша гужемъёсы колхозын ужам. Нырысь кык гужемзэ гуртоослэсь ыжъёссэс возьмам. Сизьыметӥ классэз йылпумъямез бере валэн но тыршем. Собере комбайнерлэн юрттӥсез но вылэм. Колхозын гужемъёсы ужамез Сашаез кыдатӥз но тыршон мылкыд пыӵатӥз. Берло но со котькыӵе удыс борды капчиен басьтӥськылӥз но котькыӵе ужаз пытьы кельтӥз.
МГУ-лэн журналистикая факультетаз дышетсконэз Сашалэн наукае но журналистикае ӝутскон сюресэз вал. Туэ солэн факультетэзлы 50 ар тырмиз. Сое кылдытон сярысь Указ поттӥз на вал И. В. Сталин 1952-тӥ арын 6-тӥ июне.
Нырысь арзэ дышетскыкуз ик А. Г. Шкляев кылзӥз тодмо профессорлэсь А. В. Западовлэсь лекциоссэ. Собере ини, куке Александр Григорьевич Ученой Совет азьын утиз аслэсьтыз удмурт критикалы сӥзем диссертацизэ, А. В. Западов солэн оппонентэз вал. Аслэсьтыз вераськонзэ кутскиз тазьы: «А. Г. Шкляевлэсь ужзэ мон сюлэмы лычсузьымон луыса лыдӟи, солэн геройёсыныз мон ведь ӵем дыръя базарын пумиськылӥ но кема вераськылӥ». Собере гинэ Александр Григорьевич тодэм: А. В. Западов, войнаын сӧсыр луэмез бере, Ижевскын улэм но Удмурт пединститутын кышноеныз, дано литературоведэн Л. М. Кулаковскаяен, ӵош ужам. Соос ик вылӥллям Н. П. Кралиналэн дышетӥсьёсыз. А. В. Западов матысь тодэ вылэм трос удмурт писательёсты. «Жаль, - шуэ Александр Григорьевич, - мынам вазенгес нодэ ӧз лыкты юалляськыны, кӧня тодэ ваёнъёссэ кельтыны луысал удмурт писательёс сярысь».
Саша студент дыръяз тыршиз быдэс Совето шаерез котыръяны. Но кытчы гинэ ӧз вуылы, одно ик шедьтэ вал со интылэсь Удмуртиен кыӵе ке но герӟетсэ. Нырысь практиказэ ортчиз Ставропольеысь Дивное станицаын, «Приманычские степи» газетын. Ӵапак Маныч ты палан кутэмын но быдтэмын вал асьмелэн героймы В. Азин. Кыкетӥ практиказэ Шкляев ортчиз Новосибирскысь «Молодость Сибири» газетын. Командировкае ветлыкуз, Колывань селоын со пумитаз Г. И. Овчинниковез - 21-тӥ дивизилэсь командирзэ, кудаз ожмаськиз Максим Прокопьев. Дано комдив отчы ссылкае келямын вылэм но отчы ик улыны кылем. Карачаево-Черкесиын дыръяз Александр Григорьевич вуылӥз ӵапак со интые, кытын дасяло буклэсь пулъёс но ысто Ижевске пыӵал тӥрлыклы ёз лэсьтыны. Нош 1968-тӥ арын Шкляев калъяське В. В. Пименовлэн этнографияя экспедицияз но котыртэ быдэс Удмурт шаерез. Сыӵе пумиськонъёс дыръя вала, кӧня тодэм кулэ, соиз яке таиз маке сярысь гожтон понна. Журналист дась луыны кулэ котькыӵе адямиез пумитаны, котькыӵе учырен пумиськыны.
Университетсэ быдтыкуз, Александр витьлы уте Андрей Платонов сярысь ужзэ, солы дэмлало аспирантурае пырыны. Александр Шкляев уг жадьы дышетскыны. Али но кыӵе ке курс усьтӥське, сое нокинлы лыдӟыны ке, номыр шоры учкытэк, со борды басьтӥське ачиз. Берло аръёсы озьы дасяз «Россиысь но матысь зарубежьеысь калыкъёслэн литературазы» курс. Но тани программае пырто «Право но пресса» предмет - Александр Григорьевич Москваын пырпотэ американо-российской школаез, басьтэ солэсь сертификатсэ; дышетскон стандартэ пырто «Ивор сётонъя ёзэтъёс но калыккуспо гуманитарной право» курс - Александр Григорьевич пырпотэ Горд Крестлэсь женевско-московской школазэ. Со стажировка ортче Хельсинки но Турку университетъёсын, кык пол ветлэ дышетскыны Голландиысь Маастрихт городэ, сое ассэ но ӧтьылӥзы лекция лыдӟыны Финляндиысь Оулу университетэ но Будапештысь Россилэн культурая центраз. Озьы усто дышетӥсьлэн кылэмез-адӟемез ваньмыз вуэ студентъёс доры.
Рос-прос кыткиськон аръёс
А. Г. Шкляевлэн улытозяз куинь ӝот-ӝот ужан интыез вал. УдНИИ, Писательёслэн союззы но университет. Писательёслэн огазеяськоназы ужакуз, Ф. Васильевлэн кичӧлтэмезъя но дэмламезъя дася «Между Волгой и Уралом» серилэсь нырысетӥ томзэ (вань берло томъёс пӧлысь со самой ӟечез ик кылиз). 1978-тӥ арын люка но лыдӟись азе вуттэ К. Гердлэсь «Гажан эше!» кылбур книгазэ, 1985-тӥ арын реабилитация бере нырысьсэ ӟуч кылын Москваын поттэ К. Гердлэсь А. Смольниковлэн берыктэмезъя «Ступени» кылбур книгазэ. Москваын ик печатла удмурт писательёслэн ужъёсынызы Удмурт Республикалы сӥзем «Край родниковый» книга. Собере Москва пыр ик дася удмурт кылбурчиослэн чуръёсынызы «Песни солнечного леса» туж чебер бичет. Дасяз «Молотлы» - 60» антология. Александр Григорьевичлэн ки пыртӥз потӥзы туж трос рукописьёс. Солэн кивалтэмез улсын ортчылӥзы литературалы сӥзем трос ӝытъёс но «котырес ӝӧкъёс», егит гожъясьёслэн семинаръёссы, лыдӟисьёсын пумиськонъёс но дискуссиос.
Ачиз Александр Григорьевич лыдӟись доры вуттӥз таӵе книгаоссэ: «На подступах к реализму. Удмуртская литература, литературное движение и критика в 1917-1934 гг.» (1979), «Араны егит муртъёс лыктозы...» (1985), «Времена литературы - времена жизни» (1992), «Ӵашъем нимъёс» (1995), «Вапумысь вапуме» (2000). Со сяна, университетын ужакуз, со, Юлия Васовчиклэн берыктэмезъя, дасяз но поттӥз Петер Домокошлэсь «История удмуртской литературы» книгазэ, Д. А. Яшинэн ӵош - «Удмурт фольклор. Удмурт литература» пособие но Б. Ш. Загуляеваен ӵош - «Калык кылос но сое бичан» книга. Озьы ик Александр Шкляев асьмелы тодмо на аслаз шаржъёсыныз, эпиграммаосыныз но пичи веросъёсыныз. Соосты нимысьтыз сборнике люказ ни. Нош кутэ табере «Удмуртская Республика» энциклопедиез, отысь адӟоды, литературая вань бадӟым статьяосты Шкляев гожтӥз шуыса. Со сяна, Александр Григорьевич ог 250 научной статьялэн авторез. Соос печатламын пӧртэм конгрессъёслэн но конференциослэн материалъёссы пӧлын, «Вопросы литературы», «Литературное обозрение», «Октябрь», «Наш современник», «Элиас» но «Опискелиум» (Финляндия), «Вопросы национальностей» (США), «Кенеш» но «Инвожо» журналъёсын, «Молодые о молодых» но «Сверстники» сборникъёсын.
Наука удысъя ке верано, Александр Григорьевич нырысьсэ сокем пыр-поч эскериз удмурт литературалэсь 20-тӥ - 30-тӥ аръёсы азинскон сюрессэ, солэсь со вакытысь улонэн, критикаен но идеологиен герӟетъёссэ чакласа. Шараяз удмурт поэзилэсь финн поэзиен кусыпъёссэ. Пуктӥз удмурт литератураын романтизмлэн интыез сярысь ужпум. Беглой темаез учкыса пыртӥз «удмурт беглоиада» термин. Асьме доры вуттӥз архивъёсын, пӧртэм газет подшивкаосын ышыса улэм произведениосты. Соос пӧлын, кылсярысь, «Василий Александровлэн книжкаез» (1878), В. Денисовлэн «Мынам пленысь пегӟеме» (1919) повестез. Университетэ А. Г. Шкляев лыктӥз ужаны И. В. Таракановлэн ӧтемезъя, куке удмурт филология факультетын усьтӥзы журналистикая специализация. Тросэз туала тодмо удмурт журналистъёс - Вл. Михайлов, И. Байметов, Р. Игнатьева, Н. Золотарева, И. Аркашев, А. Гребина, В. Сидоров, Ю. Решетников но мукетъёсыз - А. Г. Шкляевлэн семинаръёсыз пыр потэмын.
Али Александр Григорьевич факультетын пыд йылыз султытӥз «Журналист» газетэз. Со 50-лэсь ятыр номер поттӥз ини. 40-лэсь тросэз номерез Интернетэ пыртэмын.
Мыным веразы, Шкляев, пе, «конфликтной» адями. Кызьы со сярысь ачиз Шкляев малпа шуыса, мон одӥг пол, нокин вылэ но чӧлскытэк, аслэсьтыз туж ӝикытак гинэ юаны кариськи, уз-а меда, пӧй, со та юанлэсь куалекты. Нош со мыным таӵе огшоры гинэ валэктон сётӥз. «Тодӥськод-а, Петр Николаевич, - шуиз со. - Ыж уллёын луо такаос, соос ог-огенызы вирӟектымон, сюръёссэс тӥямон, ог-огзэсты виымон лекасько. Ми пичи дыръя эшъёсынымы котьку но тыршиськом вал соосты люкыны но зӥбломытыны. Но вал пӧламы одӥг пияш, со люкем гинэ ӧвӧл, эшшо но золгес узатэ вал вожомем такаосты. Ми адӟиськом но солэсь сыӵе «спектакль» учкемзэ, йырмы курен лыктӥськом вал дораз но юаськом: малы сылӥськод, малы уд люкиськы?! Нош со шуэ: «Ынтересно. Мед жугиськозы. Учком, кин кинэ вормоз!» Вот мон адӟисько ке кыӵе ке «жугиськонэз», кинлэсь ке кинэ ке обидемзэ, ноку но палэнтӥз уг кошкиськы, кин вормоз ай но со вормись пала карисько ай шуыса. Мынам котьку дурбасьтэме потэ солы, кин зэмлык но адямилык палан. Вот и учкы, кин «конфликтной» адями. Кин, кылзэ вераны дӥсьтытэк, ымаз ву ӟузьыса пуке, яке кин ужпумез шонерезъя сэрттыны тырше но конфликт ӟугыез пертче». Соин Александр Григорьевич гажа сыӵе адямиосты, кудъёсыз асьсэ малпанзэс но мылкыдзэс ватытэк, чик кышкатэк шараяло. Туала писательёс пӧлысь сыӵе радэ пыртэ со А. Ермолаевез, В. Ванюшевез, Г. Перевощиковез, М. Атамановез. Сыӵеесь ик вал со понна В. Романов, П. Чернов но С. Самсонов. Валамон, солэн сюлэмызъя ӧвӧл властез возись адямиослэн ымазы учкыса но кӧяса-вӧяса гожъяськисьёс.
Д. А. Яшин улонысь кошкем бере, литературая кафедрае А. Г. Шкляев огдыре чылкак Р. И. Яшинаен ӵошен гинэ кылизы вал. Собере ини соос котыре лыктӥзы егитъёс С. Т. Арекеева, Л. П. Федорова, Т. И. Зайцева, В. Г. Пантелеева, аспирантураысь берытскиз Г. Н. Шушакова, озьы вамыш бӧрсьы вамыш кылдӥз кужмо коллектив. Озьы ик татчы ужаны вуиз землякез Кекоран гуртысь А. А. Вахрушев. Отысь со мынӥз аспирантурае, утиз диссертацизэ. Соку, 1994-тӥ арын, лэземын вал усьтыны университетын журналистикая специальность, собере, 1999-тӥ арын, - журналистикая кафедра но факультет. Туннэ А. Г. Шкляев ас котыраз нош ик люказ ни выль коллектив. «Молотын» дыръяз но со котырын ужазы кужмо адямиос: П. Чернов, А. Ермолаев, В. Широбоков, П. Поздеев, М. Иванов, С. Перевощиков.
Ваньмыз, кин матысь тодэ Александр Григорьевичез, вераны быгатоз: со ӟырдыт сюлэмо адями. Оло, анаез-атаез но Инмар азьын сяна, со ноку но нокин азьын йырзэ ӧз мыкыртылы. «Ас малпандэ шонерак вераны, зэмлык понна нюръяськыны быгатон - со журналистика профессилэн шорсюлмыз», - шуэ со.
Источник:
Шкляев А. Г. Ӟуго-ӟуго улон гердъёс / А. Г. Шкляев ; записал П. Кузнецов // Удмурт дунне. - 2002. - 11 окт. - С. 6, 11. - (Удмурт кизилиос).
Нуналысь — нуналэ[править]
4-тӥ феврале 75 арессэ пусйиз Александр Григорьевич ШКЛЯЕВ — филология наукаосъя кандидат, УдГУ-ысь журналистикая кафедраысь доцент, удмурт литератураез но журналистикаез эскерись, трос дышетскон но тодос книгаослэн авторзы, Удмурт Элькунлэн Кун премиезлэн но Кузебай Герд нимо премилэн лауреатсы, культура но наука удысъёсысь дано ужась. Вераськонмылэн инъетэз луизы пичи гуртысь бадӟым улонэ вамыштэм адямилэн сюресысьтыз яркыт тодэ ваёнъёсыз.
Пичи дыр: Якшур гурт
— Александр Григорьевич, тӥ Быдӟым ож мынон вакытэ трос нылпиё семьяын вордскемын. Иське, секыт сютэм дыръёсты но вал…
— Пичи дырысенымы ми, гурт пиналъёс, дышетским трос крестьян ужъёслы. Школалэсь азьвыл ик мынэсьтым бадӟымгес эшеным тачкаен пу дуре ветлӥм. Со тачкаяз улвай тыриз, нош мон, та золгес ӝуа шуыса, — горд ньылпу лыс. Дяяе (озьы милям Якшур-Бӧдья ёросысь Якшур гуртамы тятяез, атаез шуо вал) со лысэз адӟиз но шуэ, та, пие, пу уз лу, талэсь тылпу потыны быгатоз. Озьы монэ индылӥз но всё-таки ваем лысме кораз. Табере со учырез ӵем гинэ тодам вайылӥсько но малпасько: а ведь дяяе ужам ужме чоттэм ӧз кар.
В. Солоухинлэн вань «Бишка» веросэз. Отын мынам но пичи дыры суредамын кадь. Толалтэ, туж кезьыт нуналъёсы, ыжпиосмес корка пыртылӥм. Ӵукна кин ужаны мынэ, кин — школае, мон ыжпиосын корка кылисько но соосын шудӥсько. Гужем соосты утялтоно-будэтоно, нош сӥзьыл… Котькуд аре кынтэм бере дяяе ыж вандылӥз. Монэ одно ик бордаз возе вал, юрттӥськись карыса. Но аслам пудоез ноку но вандылэме ӧвӧл: ки уг пыр. Ма, дяяе но огшоры гинэ реж-реж уг кутскы вал уж борды. Пурт понон азяз котьку но сюдэм-вордэм пудозэ сюлворе вал, вождэ эн вай: мар карод — озьы пересьёс косӥллям. Котькуд сыӵе учыре сюлэм ик чигиське вал.
Нош одӥг пол гуртамы отпуске иськавынмы, войнаын ожмаськем капитан, бертӥз. Ми сое куное ӧтим. Лыктӥз ёлка кадь чебер чильк-вальк дӥсяськем кышноеныз, нош дяяе сюлэмшугъяськонзэ вераз: вот, пе, парсь будэтӥм но кызьы но мар карыны ум валаське. Нош капитан шуэ: а мар, мон живо-два вандо. Вераськизы но, со ӵуказеяз вазь ӵукна ик вуиз, косӥз парсез гидысь поттыны. Ай ми мазэ-созэ ум валаське. Мон, пичи маке, парсьпиез быдэс гужем сюдӥ-утялтӥ, нуныяса, кормалляса будэтӥ бере, монэ ик парсьлы азбаре сиён сётыны косӥзы. Парсь, мае ке шӧдыса кадь, гидысь потыны дотово пумитъяськиз. Озьы но тазьы мон сое тусез доры вуттӥ, парсь сиськыны гинэ кутскиз но, капитан, пистолетсэ кобураысьтыз поттыса, йыг! ыбиз. Мон — бӧрдны…
Пенсие потон азям колхозысь ужаме пумысен справка басьтӥ: 5-тӥ класс бере, 12 арескам, мынам 102 мында трудодене люкаськем вылэм ини. Солэсь азьвыл но ужамы: уриським но, шеп но октылӥм, но со понна милемыз канфетэн яке чечыен гинэ куноятылӥзы. Умой тодӥсько на 4-тӥ класс бере вал гид берын мӧйы калыкен кукуруза мерттэммес. Квадратно-гнездовой амалэн: котькуд пусъем-дасям гопе одӥг-кык кидыс куштӥськом вал. Ми ик эшеным Шакта Валиен усыям со бусыез. Куазь туж пӧсь вал. Валъёсмылэсь сарвылзэс лузьёс вирпотымон куртчылӥзы, валъёс, ныр пысыязы лачак нымы-кибы чуртнаськемен, йырзэс сиес улысь мырдэм уллане лэзё но ымзэс-нырзэс сор! карыса сюе зырало. Туж жаль потылӥзы валъёс.
Бен, пичи дыры быдэс герӟаськемын ужен. Колхоз ужен ке ӧвӧл, гурт ужен. Вань пиналъёс озьы тыршизы, сотэк улыны ӧй луысал. Солы мон уг ӝожтӥськиськы.
— Тодӥсько пичи дыръяды секыт висемды сярысь но…
— 2-тӥ классын дышетскыкум, ӝыны ар пала школае ӧй ветлы. Нэнэе, вал кыткыса, больницае нуиз. Отын толэзь пала кылли. Бурмытытэк монэ гуртам келязы. Озьы кыллисько гуртын. Ӝӧк сьӧрын дяяе лыдъяське-чотаське (со инвалид вал но колхоз контораын счетовод луыса ужаз) но лушкем синвуоссэ ӵушылэ: малпаське вал луоз, таиз но пие кулоз шуыса. Войналэсь азьло Феликс пиез, озьыен, мынам агае, 9 аресказ кулэм. Табере дяяелы нош ик сыӵе адӟон. Пумтэм жаль потӥз дяяе. Оло, отысь ик мыным кужым но пыриз бурмыны. Бен, мон доры туно-пелёез но ӧтчазы, картошка пар вылын но возизы, уг тодӥськы, мар юрттӥз, но нунал бӧрсьы нунал мынам ёзвиосы улӟизы. Ваньзэ сое тодэ вайыкум, син азям пуксе больницаын ӵош кыллем Бӧдья черкогуртысь пичи ӟуч нылаш. Ачиз ӟызы, картошка уд кадь лызпыр-ӟарыт, но люкиськыкумы мыным кизэ сётӥз но шуиз: «Не умирай». Со кылъёс монэ кулыны ӧз лэзе кадь. Берло со нылашез мон ноку но ӧй ни пумита. Нош верам кылыз ялан пель сьӧрам улэ.
Со дыре ик тӥ трос лыдӟиськыса, умой дышетскыса будэмын. Якшур-Бӧдья школаез азвесь медален йылпумъямын. Кытысь со мылкыд но малпаськон йырвизь — кин пыӵатӥз?
Апайёсы-агайёсы школаын но педучилищеын дышетско вал бере, мынам син шорам туж вазь йӧтӥзы соослэн книгаоссы. Пуштроссэс уг ке но валаськы вал, отысь суредъёсты учкылӥ. Лиза апае шара дышетэ вал «Бородиноез». Мон но соя дыши со кылбурез лыдӟыны. Туж вазь мынам пушкам каръяськиз сыӵе малпан: дышетсконо! Дяяелэн, со кык классъем церковно-приходской школаез гинэ йылпумъямын вал бере, пиналъёссэ, колхозэ медаз кыле шуыса, туж потэ вал бадӟым азе дышетэмез.
Дядяе но, нэнэе но туж сюлмасько вал, нылпиоссы сютэм медаз улэ шуыса. Соин ик тыршизы нянь но, сӥль но, йӧл но мед луоз шуыса. Куддыръя нянь ӧз тырмылы, но мукетъёсыз гуртоос улӥзы эшшо но начаргес. Дяяе сӧсыр ке но вал, всё-таки пиосмурт. Агае фронтын 3 пол сӧсырмиз ке но, бертӥз, коркамес сэзъяны юрттӥз. Одӥгез кышномурт, Зоя кенак, берло тодаз вайылӥз: тулыс вуэ ке, уже мыныкум, пичи нылпиосме, пудоез сямен бусые поттыса, мынэ, асьтэос сиён утчалэ! шуыса, пе, кошкисько вал. Нылпиос гужем коӵо, ӟольгыри каръёсысь пузъёсты шедьтыса, тыл вылын пыжыса, сиылӥзы. Мынам ӧвӧл оскалтэме, юрдӥсько вал, но тол вылтӥ шушыез, пижныен кутыса но гурын куасьтыса, сииськомы вал.
Мон эшъёсы пӧлын пичи но, чиед но вал. Тросэз сӥльвироесь адӟисько ке но вал, ляб дышетскылӥзы. Мон малпалляй, таос уг тыршо, азьтэмъясько. Но табере, пӧртэм литератураез лыдӟыса, валасько: уг тырмы вал белок, витамин, сахар. Картошка вылын гинэ улэменызы, мугорзы тордылӥз, тазалыксы ӧй вал.
— Мон туж умой тодӥсько нырысетӥ классэ мынэмме. Вылам ваньмыз выль вал, самой модной адӟиськисько, вал, дыр: дяяеным кутам зарни кадь кисьтаськись выль кут, нэнэеным вурем дэра штани, дэрем, сумка. Кутэн 5-тӥ классозь ветлӥ. Котькуд ӵукна курадӟисько вал бинялтонэз ӝикыт бинялтыны. Сӥзьыл-тулыс котэн пулъёс керттӥськом вал кут уламы.
Мон, зэм но, дышетски сыӵе классын, кытын вань предметъёс удмурт кылын нуиськизы. Соин ик берло но мон нырысь ик лыдӟылӥ удмурт книгаосты. Соос пӧлын вал трос мукет кылъёсысь берыктэмъёсыз но. Удмурт кылын мон нырысьсэ лыдӟи «Василий Тёркинэз», Д. Дефолэсь «Робинзон Крузо», Д. Свифтлэсь «Гулливерлэн путешествиосыз» книгаоссэс, «Пӧртмаськись выжыкылъёсты», М. Горькийлэсь «Калыкын» повестьсэ но трос мукетъёссэ. Гуртын яратоно книгамы вал П. Чайниковлэн «Удмурт литература» хрестоматиез. Отысь М. Можгинлэн «Беглой» балладаез, И. Соловьёвлэн «Шактыр беглоез», И. Еремеевлэн «Сирота нылпиосыз», И. Гавриловлэн «Санӥ» поэмаез, Ф. Кедровлэн «Мемиелы» кылбурез милемлы лыдӟон луылӥзы.
— Школаын тӥ вань предметъёсты удмурт кылын-а дышетэмын? Тани кылӥ вал, А. Твардовскийлэсь «Василий Тёркинзэ» нырысь удмурт кылын лыдӟи шуэмдэс.
Ваньмыз та верам кылбуръёс-веросъёс сюлэмез бугырто но, адямилэсь курадӟемзэ адӟыса, бӧрдэмез поттыто. Нош уката но сюлэмез вырӟытэ вал нэнэмылэн черсыкуз кырӟамез. Мытэ ке вал «Корка но ӝутӥ ой но горд сюйлэсь…» гурзэ, мынэсьтым 4 ареслы бадӟымгес апае кутске вал ӟиз! бӧрдыны. Нош мынам пель сьӧрам али но улэ на, выль коркаямы горд сюйлэсь гур шуккыкузы, кышноослэн та гурез кырӟамзы. Кирпич ӧвӧлэн соку горд сюйлэсь гур пуктӥзы, вашкалаос сямен кырӟаса. Табере мон сое ӵошатӥсько «Калевалаысь» персонажъёслэн кырӟаса пыж но мар лэсьтэменызы.
Быдэ вуон: Москва
— Москваысь университетын журналистикая факультетын дышетскон, туж дано. Маин Москва паймытӥз но гуньдытӥз пичи удмурт гуртысь потэм егит адямиез? Кыӵе вал Москва но студентъёс 1960-тӥ аръёсы?
— Нырысь ик паймытӥз культураеныз. Уг вераськы ни архитектураез, памятникъёсыз сярысь. Факультетысь дышетӥсьёсты нырысь ик тодам вайисько. Верасько вал пальпотыса гинэ, будто ке татын тонэ кемалась витизы. Лекция лыдӟон аудиториын пукон интыосыз кульчоен-кульчоен вӧлдэтозь тубо: циркын кадь. Нырысетӥ семестрын ик вашкала ӟуч литературая курс лыдӟиз профессор А. Западов. «Котырес аудиторилэн» самой вылӥ но самой пыдлось радаз пуксем студентъёсты улӥязгес васькыны косэ вал. «Огпол, — шуэ, — туби мон самой пыдлось рад сьӧры но отысь матрац шедьтӥ». Ми гор! серектӥськом.
Собере — студентъёс — москвичъёс! Соос туж дӥсьтӥсесь вал, эрикоесь. Туж уно тодо, ог-огенызы лабыр потто. Лекциосын но профессорлы олокыӵе но юан сёто, мытыло но.
— Тӥ «оттепель» шуон вакытэ дышетскиды. Кызьы шӧдӥське вал со улонады?
— Нырысь ик, вунэтэм, сюрес урдсын возем авторъёс шараяськизы. Марина Цветаева, Анна Ахматова, Николай Заболоцкий, Борис Пастернак но мукетъёсыз студентъёслэн кыл йылазы вал ини, соослэсь сюрессэс азьланьтӥзы туж егитэсь но туж дӥсьтӥсесь кылбурчиос. Ми дышетскыны кутским гинэ но, комсомол группаямы одӥг билет сётӥзы: МГУ-лэн культура юртаз Евгений Евтушенко, пе, творческой ӝытсэ ортчытоз. Билетлы розыгрыш лэсьтӥзы но, со мыным сюриз. Эшъёсы сюлворо: тон али деревняысь вуид, малы со тыныд, тон со кылбурчиез уд тодӥськы, тыныд сое вазь на кылзыны! Нош мон ӧй сётӥськы. Заллэн галёркаяз ке но шеди, быдэс ӝытэз пыд йылам ке но сылӥ, со ӝыт сюлмысьтым али но уг кошкы. Е. Евтушенко сыӵе зол лыдӟиз, солы, зал зуркамон чабизы, мон пыраклы синмаськи солэн кылбуръёсызлы но лыдӟон манерезлы. Со вал мон понна «оттепельлэн» одӥгез тодметэз.
Но ӝоген вуиз 1965-тӥ ар. «Шунан» вакыт пумен «кезьытомыны» кутскиз. Сӥзьыл студентъёс пӧлын вӧлмытылӥзы Западын произведениоссэс лушкем печатлам Ю. Даниэль но А. Синявский сярысь гожтэтъёс, соос пала дурбасьтоно, соос антисоветчикъёс ӧвӧл шуыса. Мон мазэ-созэ уг на валаськы. Собере лушкем но мар но ивортылыны кутскизы, 5-тӥ толсуре, Конституцилэн нуналаз, Пушкин площадьын демонстрация луоз шуыса. Научной библиотекае мынӥськод, каталогын кыӵе ке книга утчаса бугыръяськиськод, нош отын карточка: «5-тӥ толсуре демонстрация луоз». Мон но отчы мыноно кариськи: мар ке но отын тунсыкоез луоз! Нош 4-тӥ толсуре профсоюз пыр милемыз Владимир, Суздаль городъёсы экскурсие нуизы. Отын кӧлӥмы. Ӵуказеяз шуныт луиз, сюрес кисальмиз, мынам пыдэпононэ ляб вылэм: пыдъёсы тяп-тяп котмизы. Москвае вуыса, автобусысь васьконо ни вал Пушкин площаде мынон понна зэм ик тросэз потӥзы, нош мон малпай, мынӥ ке демонстрацие, пичи дыръя сямен, воксё но висьыны усё. Бертӥ огъяулонниям.
Нош ӵуказеяз факультетэ быдэс комиссия вуиз. Кин вал демонстрациын, милицие нуиллям. Йылпумъяськиз со учыр тазьы: тросэзлы студентъёслы комсомол билетазы выговор гожтӥллям. Сочи городысь Володя Науменко берло мыным билетсэ возьматӥз: гожтэмын вал «объявлен выговор за участие в антисоветской демонстрации». 1990-тӥ аръёсы Володяез мон Москваысен пумитай. Юай, возиськод на-а со билеттэ? Шуиз: ыштӥ. Да-а, сыӵе документ музее кыльыны кулэ вал.
Али но куддыр малпасько, шонер-а лэсьтӥ меда, со демонстрацие мынытэк, туж-туж кулэзэ валасал ке, котмем пыды шоры учкытэк но, автобусысь васькысал ведь. Сое тодам вайисько но, А. Пушкинэз юрттыны ӧтисько: со но потӥз вал Михайловскоеысь Петербурге декабристъёслэн восстаниязы пыриськыны, но сюресэз вамен лудкеч потӥз. Пушкин малпам: та умойтэм. Мыныны уг яра шуыса, берытскем. Мон али но уг лыдъяськы, Ю. Даниэль но А. Синявский геройёс шуыса. Асьсэос, соцреализмез данъяса, книгаос гожъязы, нош кунгож сьӧрын псевдонимен соцреализмлы пумит ужъёс поттылӥзы. Сыӵе кык ымныроос мынам сюлэмыя ноку но ӧй вал. Мукет ужпум: со понна адямиосты тюрьмаын возёно ӧй вал, дыр.
Кын корт куртчон вакыт: Ижкар
— Тӥ асьтэдыз кинэн шӧдӥськоды-лыдъяськоды вал: журналист, критик яке тодосчи? Кыӵе малпанъёсын берытскиды Иже?
— Ижкаре мон вуи вал журналистын ужан мылкыдын «Комсомолец Удмуртии» газетэ. Туж яра вал уже. Но литература удыс вормиз. Кыкетӥзэ, аспирантура бере, берытскыкум, мынам мылкыды вал ини дышетон но наука удысын тыршыны. И. Тараканов маза уг сёты ни вал, лык ин, лык, журналистикалы дышетыны шуыса. Со нуиз монэ университетлэн проректорез А. Вахрушев доры. Ӵужектыны сётскись синкӧльыоссэ бергатыса, фантомас кадь гольык йыро Агафон Николаевич шорам туж кескич учкиз но И. Таракановлы шуиз: «Мед ӧжыт ужалоз на издательство, газет котырын, собере адӟом». Ӧз кут монэ. Бералтыны сое И. Тараканов ӧз быгаты. Мон кариськи УдНИИ-е.
Гожтэм ужъёстэс, печатлам книгаостэс вераса уд быдты — трос. Дышетскем адямиос соос сярысь тодо. Нош асьтэлы кудӥз книгады тужгес но дуно потэ?
Кудаз ке юбилеям кин ке но шарж гожтыса лэзем. Авторез пусйымтэ. «У «человека в истории» «смысл жизни — в созидании», а оно в «краю родниковом» даёт «вторую жизнь» «удмуртским батырам», молодой поросли, которая считает, что «время быть молодым». Тани татын тыршемын мынам книгаосылэсь но статьяосылэсь нимъёссэс одӥг пуштросэ герӟаны. Шонерак верано ке, самой мур уже, валамон, диссертацие вылэ пыкиськыса гожтэм книгае — «На подступах к реализму». Зэм, отысь куд-ог дунъетъёс туала вакытлэн мертэтъёсызлы уг тупало ни. Но наукалэн сыӵе аспӧртэмлыкез: солэн амалъёсыз, методологиосыз ялан вошъясько. Котькуд ужез ас вакытэз пыр лыдӟоно. Со книгаелы ог 5-6 рецензия гожтэмын, со гырыса потэмын А. Ермолаевлэн рецензиез пыр. Статьяосын бичетъёсты верано ке, со — «Времена литературы — времена жизни». Котькуд статья отын — критика, со композиция, сюжет ласянь ӝик-ӝик биньыны тыршемын. «Ӵашъем нимъёс» туж кема люкам материал вылын гожтэмын. Со но мыным дуно.
Удмурт тодосчиос пӧлысь тӥ котькинлэсь азьло серметады Интернетэз: асьтэлэн вотэс бамды но вань, ВКонтакте огинын но ялан «улӥськоды». Мар сярысь луоз вылез книгады? Ку нимаз бичетэн поттоды улонысь учыръёстэс, кудъёссэ тӥ туж быгатыса гожъяськоды?
Интернетэз мон серметай Алёша пие валлин. Со сое умой вала, солы монэ дышетэ. Отчы пырытэк табере уг лу. Политикъёс но асьсэлэсь малпанъёссэс табере Интернет пыр верало. Алёша вакчи веросъёсме «интернет-веросъёс» шуэ но соослэсь электрон версизэс лэсьтыны косэ. Со умой дэмлан. Оло, кулэ но. Вакчи веросъёсы бордын мон али но ужасько. Но сыӵе книгалэсь азьло поттэме потэ критикаен выль бичет. Печатламын ни «Вапумысь вапуме», «Арысь аре. Удмурт литература даурлэн кожъёсаз». 3-тӥез бичет луыны кулэ «Нуналысь нуналэ. Удмурт литература туннэ но ӵуказе».
Шкляев А. Г. Нуналысь - нуналэ / Александр Шкляев ; вераськиз Вера Пантелеева // Удмурт дунне. - 2019. - 7 февр. - С. 10, 15 : фот. - (Тӧр шорын).
За предоставление материала выражаем огромную благодарность редакции газеты "Удмурт дунне"
