Тараканов Иван Васильевич

Айкай гурезь йылысен кыдёке адӟиське

Иван Васильевич Тараканов - филология наукаосъя доктор, профессор, удмурт диалектологияя, лексикологияя но морфологияя ог 200 пала ужъёслэн авторзы, Россия Федерациысь но Удмурт Республикаысь наука удысысь дано ужась, Куӟебай Герд нимо премилэн лауреатэз, Удмурт Республикаысь наукаосъя академилэн академикез, финн-угор обществолэн ёзчиез.

Иван Васильевич быдэс улонзэ Удмурт кун университетлы сӥзиз.

- Иван Васильевич, паймоно кадь чебер гуртын вордӥськемын тӥ - Татарстанысь Урсыын. Мон отчы «Айкай» фольклор театрен тулыс вуыны тупай. Быдэс арня улӥ. Котырак льӧмпу, чияпу, улмо сяська пурӟемын, быдэс гурт шукыяськыса сылэ, лӧсъяськись ческыт зын йырез поромытэ. Ӝужыт-ӝужыт Айкай гурезь йылады но тубай, со сярысь кылбур но гожтӥ. Нош одӥг пол, Бавлыысен Урсые автобусэн бертыкум, мыдлань васькиськем. Кудпала мыныны уг валаськы ни - йыроми. Урсы гуртэз возь кузя утчанъям, отысь векчи изъёс катаме нуллыны ярантэм ниръязы. Сьӧрам кикы калъяськиз, йыромемме валаса, юбоысь юбое лоба, монэ исаса, э-э, силе ук! Йыры но кур луэ, сереме но потэ... Нош гурт калыкты кыӵе ужась, кырӟась, сюлэм шунытсы вань артистъёслы но, мыным но тырмиз. Мӧзмиськоды, луоз, дордылэсь?

- Вордӥськем палъёс котькинлы дуно но мусо. Мыным но Урсы гуртэ туж чебер но мусо потэ. Гуртоосмы отчы ог 350 ар талэсь азьло пуксиллям. Соку со музъемъёсын башкиръёс гинэ пудо вордыса улӥллям. Соос гыронкизёнэз тодӥллямтэ. Паськыт лудъёсын но возьёсын кыр валъёс (тарпанъёс), ыж уллёос гинэ калгиллям.

Гуртмы Урсы шур кузя кыстӥськись ӝужытэсь гурезьёс улэ пуксемын. Соос йылэ тубиськод ке, ӵук паласен нюлэсэн шобыртэм гурезьёс адӟисько, соос кузя Ык (Ик) шур ӧръяське. Лымшор пала учкиськод ке, ог 20 иськем пала Оренбург степьёс адӟисько. Толалтэ отысь кезьыт тӧлъёс, синтэм-пельтэм буранъёс пелляло. Урсы гуртлэн шор вадьсаз, кык ӝужыт гурезьёс вискын, лапеггес гурезьмы вань на. Сое Айкай гурезь нимало, малы ке шуоно, егитъёс, гурезь йылэ тубыса, котырак кариськоно, «Айкай» гурез кырӟало вылэм. Даурысь дауре выжтыса, сое урсыос али но нёжъяло на. М. Г. Атамановлэн верамезъя, со гурез вазен Грах пал удмуртъёс но кырӟало вылэм.

Удмуртъёс Урсые пӧртэм интыосысь вуэмын: Можгалась, Алнашысь, Пургалась, Кибьялась, Чутырысь, Блатгуртысь. Ӟуч кунэн кузёяськисьёс со дыре татысь буш кыллись музъемъёсты солдатъёслы сётъяллям. Соку Бугульмаын, Белебейын, Черемшанскын, Оренбургын ӟучъёслэн кунгожзы вылэм. Соос со музъемъёсты башкиръёслэсь возьмаллям. Калык верамъя, удмуртъеслэн воршудъёссы пӧртэмесь: Можга, Пельга, Кибья, Пурга но мукет. Бӧрысь ини, соос воршуд нимъёссэс фамилия кариллям. Озьы Кибьяловъёс, Можговъёс, Можгинъёс, Пургинъёс, Пельгинъёс кылдӥллям. Гуртмылэсь шор вадессэ али но гиддяпал (Кибья пал) шуо на.

- Тодэмея, Урсыысь ик потэмын Евгений Самсонов писатель но, Василий Алатырев тодосчи но. Оло, эшшо кыӵе ке аспӧртэмлыко кибашлыосты, визьпогъёсты вордӥз на гуртты?

- Мон но Василий Иванович Алатырев сяна, кык тодмоесь тодосчиосмы вань на. Одӥгез Можгов - военной наукаосъя кандидат. Со Москваысь военной академиын дышетӥз. Мукетыз - Геннадий Сидоров, ветеринария наукаосъя кандидат. Али со кулэмын ни.

Вань на туж бадӟым инженермы. Со Леонид Алатырев, му вӧй поттӥсьёслэн сӥё-дано адямизы. Со Татарстанысь Миннибай газ келян заводэн кивалтӥз, собере Нижневартовскысь «Сибнефтегазпереработка» объединенилэн валтӥсь инженерез луиз. Та заводэз лэсьтыкузы, кунгож сьӧрысь оборудованиос ваён вылысь, США-е, Канадае, Германие, Францие, Англие, Дание, Швецие но Финляндие вуылӥз, нош 1967-тӥ арын Гамбургын ортчем IX калык куспо конгрессын бадӟым доклад лэсьтӥз. 1978-тӥ-1980-тӥ аръёсы улӥз но ужаз Япониын. Вань на трос гинэ полковникозь вуэм ожгарчиосмы.

- Удмурт пединститутэз йылпумъямды бере тӥ одӥг арзэ Бавлы шор ёзо школаын ужады. Нош кызьы берен Ижевске вуиды на?

- Удмурт научно-исследовательской институтлэн кылъя сектораз ужась Тамара Ивановна Тепляшина 1953-тӥ арын Москваысь Кылтодонъя институтысь аспирантурае пырем. Тӥни солэн интыяз монэ ӧтизы. Соку институтын ӟуч-удмурт кыллюкамез лэсьто вал. Со словарез дасян бордын мон но ужай. Бӧрысь ми А. С. Беловен ӵош удмурт орфографияя словарь лэсьтӥм. Со 1959-тӥ арын потӥз. Собере мон Тарту университетысь аспирантурае пыри. 1960-тӥ арысен ини Удмурт пединститутын, Удмурт кун университетын ужасько.

- Иван Васильевич, мае тӥ асьтэ улонады бадӟым вормонэн лыдъяськоды?

- Кык учырез. Нырысь ик, мыным шуд усиз пединститутын но университетын удмурт кыллы дышетонэз зэмос наукалэн куронъёсызъя радъяны. Мон аспирантураысь бертытозь, удмурт кылэз А. А. Поздеевалэн но А. В. Конюховалэн школаослы дасям учебникъёссыя дышето вал. Удмурт но ӵыжы-выжы кылъёсъя кунгож сьӧрын потэм статьяосты гинэ но ужазы уг куто вал. Бӧрысь ини тужгес ик 1972-тӥ арын, институт университет луэм бере, дышетскон планъёсмес чылкак воштӥмы: тросгес дыр висъяны кутским диалектологиез, исторической фонетикаез но грамматикаез дышетонлы, выль специализациос усьтӥм, журналистикая люкетэз кылдытӥм, Венгриысь, Финляндиысь, Эстониысь университетъёсын кусыпъёс тупатӥм, ӵыжы-выжы кылъёсты дышетонэз радъямы, удмурт люкетэз куинь поллы паськытатӥм. Азьло дышетскыны одӥг группа гинэ кутӥське ке вал, табере куинь группа - 75 мурт. Тӥни озьы луонлык кылдӥз выль кафедраос радъяны, дышетӥсьёслэсь лыдзэс будэтыны но нимысьтыз кык выль факультет усьтыны - удмурт филологияя но журналистикая.

Кыкетӥ бадӟым вормонэн мон лыдъясько удмурт филология факультетын аспирантура усьтонэз но диссертациосты утёнъя кенеш кылдытонэз. 1992-тӥ арысен кандидат диссертация утёнъя кенешмы вань, 2003-тӥ арысен - доктор диссертациосты утёнъя. Со куинь специальностьлы люкиськиз: ӟуч кылъя, кылтодос наукаослэн теоризыя но Россия Федерациысь калыкъёслэн кылзыя (финн-угор но самоди кылъёсъя). Милям кенешамы 21 мурт диссертациоссэ утиз ни. Соос пӧлын 6-ез мынам аспирантэ, 3-ез - В. К. Кельмаков профессорлэн.

- Иван Васильевич, тӥ быдэс улондэс кылтодон удыслы сӥзиды. Нош дышетэм студентъёсты пӧлысь кӧняез тӥлесьтыд сюрестэс бырйизы?

- Туж тросэз. Соос пӧлын кылчиос - наукаосъя докторъёс В. К. Кельмаков, М. Г. Атаманов, А. Ф. Шутов, Г. А. Ушаков, литературая но фольклоръя учёнойёс-докторъёс А. С. Измайлова, Т. Г. Владыкина, нош филология но педагогика наукаосъя кандидатъёс луиз мынам ки пыртӥм потэм 20-лэсь трос студент.

Али Удмурт кун университетысь филология факультетын но Россиысь Наукаосъя академилэн Урал люкетысьтыз Историяя, кылъя но литературая Удмурт институтын ваньмыз сямен мынам дышетэм студентъёсы ужало. Со сяна, университетысь удмурт факультетэз йылпумъямъёс тросэз Удмурт радиоын, телевидениын, газетъёслэн но журналъёслэн редакциосазы ужало. Элькунысьтымы школаосын но Удмурт кун университетэз йылпумъямъёс дышето. Нош пединститутэз быдтэмъёс табере пенсиын.

- Тӥ трос кужымдэс, быгатонлыктэс сётӥды Удмурт нимкылъёсъя но шонер гожъяськонъя комиссиын ужанлы. Удмурт кылмес ӟечгес, узыргес карон понна, кӧня выль кылъёс малпамын, кылдытэмын вал. Нош малы 1998-тӥ арын выль кылъёсын нырысетӥ бичет потӥз но, уж дугдӥз?

- Нимкылъёсты кылдытон 1990-тӥ аръёсын ик кутскиз вал, Удмурт Элькунлэсь Конституцизэ удмурт кылэ берыктон вылысь. Та ужлэсь кулэзэ шӧдыса, 1994-тӥ арын Кун Кенешлэн тӧроез бордын нимкылъёсъя но шонер гожъяськонъя нимысьтыз комиссия кылдытэмын. Солэн тыршемезъя, 1998-тӥ арын нимысьтыз бичетэн бюллетень поттэмын. Отчы 372 кыл пыриз. Нырысь-валысь та ужез азинтон бордын В. И. Шибанов но П. И. Воронцов ужазы. Соос удмурт кылъя но литературоведениея нимысьтыз нимкылъёсын бичетъёс но дасязы ни вал. Но Кун Кенеш таӵе ужъёсты поттыны коньдон висъямысь дугдӥз. Соин сэрен кутскем ужмы ӟудӥз. Али сое азинтон бордын кӧня ке тыршо на Удмурт радиоын, телевидениын, куд-ог газет-журналъёсын гинэ. Нош удмурт кылын шонер гожъяськонъя комиссия (кивалтӥсез мон луисько) аслэсьтыз ужзэ пумаз-йылаз вуттӥз. 2002-тӥ арлэн пумаз сое Россиысь Наукаосъя академилэн Урал люкетысьтыз Историяя, кылъя но литературая Удмурт институт печатлаз. Со тазьы нимаське: «Удмурт кылын шонер гожъяськонъя кыллюкам». Отчы ватсаса сётэмын на «Удмурт кылын шонер гожъяськон правилоос». Вераны кулэ, правилоос но словарь лэсьтӥсьёслы коньдон ӧз тыре. Комиссилэн кивалтӥсез та ужез азинтон бордын ӧз ни ужа. Озьы бере, нимкылъёсты кылдытон уж азьланьын, оло, чылкак пашмоз.

- Нош малы асьмеос выль правилоосъя ум гожъяськиське?

- Книга-газет поттӥсьёс али со правилоосты чакласа гожъяськыны кулэ. Школаосын гинэ, выль учебникъёс потытозь, вуж правилоосъя ик дышетскозы на. Жаляса верано луэ, кивалтӥсьёс эскерымтэен-чакламтэен, газет-журнал поттӥсьёс, озьы ик «Удмурт дунне» газет но, выль правилоосъя уг гожъясько на.

- Тӥ, Иван Васильевич, бадӟым улон сюресэз ортчемын, дуннеез трос котыръямын. Озьы бере, асьме улэм-вылэммы, лул-дуннемы шоры пӧртэм калыкъёсын ӵошатыса учкыны быгатӥськоды. Малы асьмеос таӵеесь?

- Асьмеос, удмуртъёс, кинлэн ке кивалтэм яке зӥбет улаз улыны дышемын. Революцилэсь азьло нырысь бигеръёс зӥбыса возизы, собере - ӟучъёс. Соослэн косэмзыя-индылэмзыя гинэ улӥмы. Соин ик асьмеос сыӵе дӥсьтӥсьтэмесь, ас мылкыдмес шара вераны яке ас сяменымы маке лэсьтыны кышкаськомы. Совето власть вакытэ но кивалтӥсьёс косъяськемъя гинэ улӥмы. Бӧрысь озьы улэммы сямлы пӧрмиз. Соин ик али но асьмеос, удмурт юлтошмылы сюрес сётытэк, мукет калыкъёслэсь валэктэмзэс-индылэмзэс, косъяськемзэс возьмаса улӥськом.

- Удмурт калык Венгрия, Финляндия, Эстония сямен понназ кунын улысал ке, кызьыгес азинскысалмы кадь потэ?

- Революцилэсь азьло финнъёс куанергес уло вал. Ас понназы улон вакытэ бадӟымесь азинсконъёс басьтӥзы. Мукет кунъёслэсь адӟем карыса, соос вузкарыны, коньдон поттыны, экономиказэс но культуразэс азинтыны дышизы. Асьмеос но соос манер вамыштысалмы, калыкмы но ӧй ӟучомысал, кылмес, культурамес дунъяны, гажаны дышысалмы.

- Азьланяз кыӵеен адӟиськоды кылмес, культурамес?

- 1950-тӥ-1960-тӥ аръёсын ӵошатыса, удмуртъёслэн но асваланзы трослы будӥз, удмурт сямъёсты, вашкала шулдыръяськонъёсты пусйылыны кутскизы. Гуртъёсын, ёросъёсын пӧртэм фольклор ансамбльёс кылдыло. Городъёсысь но ёросъёсысь удмурт кивалтӥсьёсмы но ас кылзэс поттыло ни, куд-огез докладъёссэс но удмурт кылын лэсьтыны ӧдъязы. Собере азьло анай кылын ортчись ужрадъёсы калык уг люкаськылы вал. Табере сыӵе ӝытъёсы калык трос лыктэ. Соин ик оскон вань: удмурт кылмы, культурамы азинскоз на. Со понна асьмелы тросгес сюлмаськоно, нылпиосмес пичиысен ик удмурт кылын бӧтьыртыны дышетоно. Соос анай кылынызы бӧтьыртыны медаз возьдаське, вордӥськем интызэс, сямъёсмес, анай-атайзэс мед гажалозы.

- Берло вакытэ ӵемгес но ӵемгес глобализация кылэз кылоно. Мар со сыӵе?

Глобализация кыл пӧрмемезъя латин кыл луэ. Со глобус но музъем шар кылъёсын герӟаськемын. Али озьы луиз: нокыӵе калык но ас понназ улыны уг быгаты. Асьмеос табере быдэс дуннеысь калыкъёсын герӟаськемын: соосын вузкариськом, пӧртэм арбериосын вошъяськиськом, телевизор, Интернет пыр кусып возиськом. Нош кыӵе но кунъёсысь вузъёс ваемын ӧвӧл. Интернет, мобиль телефонъёс пыр асьмеос нимысьтыз адямиосын, ужъюгдуръёсын, дышетсконниосын, библиотекаосын герӟаськиськом. Соин ик шонерак вераны луэ: асьмеос глобализация дауре улӥськом.

- Мон туж паймисько, малы Удмурт кун университетын удмурт филология люкетысь студентъёс тросэз курсовой но диплом ужъёссэс ӟуч кылын гожъяло?

- Удмурт факультетысь студентъёслы пӧртэм специальностьёс сёто: удмурт кылъя но литературая, ӟуч кылъя но литературая; удмурт кылъя, литературая но кунсьӧр кылъёсъя (немец, англи); удмурт кылъя, литературая но венгер кылъя; удмурт кылъя, литературая но финн кылъя. Соин ик студентъёс курсовой но диплом ужъёссэс кызьы ке удмурт кылын, озьы ик ӟуч кылын но гожтыны быгато.

- Шуиськом, кылмы табере законъя кун кыл луиз. Нош малы асьмеос озьы ик туж чаляк ӟучомиськом?

- Удмурт кыл кун кыл ке но луэ, со анай кылэз, культураез дышетонлы, сое азинтонлы бадӟым ик юрттэт уг сёты. Малы ке шуоно, кыл сярысь законэз ӟучъёс лэсьтӥзы, сое кутон вылысь, куараоссэс но ӟуч депутатъёс ик сётӥзы. Удмурт кылэз, культураез азинтонлы сӥзем статьяос отысь куямын вал. Соин ик законэз 10 ар ӵоже лэсьтыны выризы.

- Иван Васильевич, тӥ та нуналъёсы юбилейдэс пусъёды. Тӥни ачим но ӟуч кылэз кутоно луи. Кызьы бен сое удмурт кылын шуод ай?

- «Юбилей» кылэз «тырмон нунал» шуоно. Тани мон вордӥськем дырысеным 75 ар тырмон нуналме пусъё.

- 75 арес тырмон нуналдэс бен кытын ортчытыны малпаськоды? Кыӵе выль ужъёсыныды сое пумитаськоды?

- Сое Удмурт кун университетысь удмурт факультетлэн советаз ортчытозы. Собере вордӥськем гуртам но пусйыны дасясько, лэся... Берло аръёсы мыным Удмурт Республикалэсь энциклопедизэ поттон бордын трос ужано луиз. Отчы мынам 36 статьяе пыртэмын. Кылем арын «Удмурт кылын шонер гожъяськонъя кыллюкам» книгае, «Удмурт нимвоштос» препринтэ потӥзы. Препринт удмурт морфологилэн ог люкетэз луэ. Азьланяз удмурт лексикологилэн историезъя бадӟым уж даъяно на. Собере студентъёслы удмурт кылын дышетскон книга поттоно.

- Иван Васильевич, тау. Эн сётӥське аръёслы, таӵе ик кочон кадь луэ. Атайды сямен ик, 100 арес пусъёндэс но мед адӟоды на.

Источник:

Тараканов И. В. Айкай гурезь йылысен кыдёке адӟиське : беседа с д-ром филол. наук, проф. УдГУ / И. В. Тараканов ; Записала Г. Романова // Удмурт дунне. - 2003. - 27 июня. - (Удмурт кизилиос).

За предоставление материала выражаем огромную благодарность редакции газеты "Удмурт дунне"