Соловьёв Геннадий Капитонович
Капитоныч[править]
Россиысь но Удмуртиысь сӥё-дано артистэз, одӥг кылын гинэ Капитоныч шуыса вераку, шаерысьтымы ваньмыз, пересез но, егитэз но, соку ик валатскоз, кин сярысь вераськон мынэ. Вань калыклы тодмо но мур гажамон луон понна быдэс пуд сылал сиыны кулэ, шуо. Но ведь адямилэн улонэз мар но кӧня сиеменыз ноку но уг дунъяськы, со потэ калык пӧлын астэ кызьы возем но кӧня ӟеч лэсьтэм бордысь. Геннадий Капитонович Соловьёв сярысь гожъямын ни трос, героймы ачиз но удмурт газет-журналъёсы ялан гожъяське. Соин мон солэн улонысьтыз тодэ вайымон учыръёссэ гинэ шараяй.
«Фриц»
Быдӟым ож бырыку, вань калыклэн сямен ик, будӥсь нылпиослэн но юн возьматэмзы потэ вал тушмонэз адӟемпотостэм каремзэс но асьме шаермес утись солдатъёслы дурбасьтэмзэс. Алнаш ёросысь Котныр починкаысь 13 аресъем Гена малпаса но ӵектыса, пиналъёс спектакль пукто. Клуб интые – огшоры корка, учкисьёслы – сэндра, пулъёслэсь сцена, декорация – тэльысь ӵогыса ваем кыз. Туж дыраз луиз ожысь берытскем офицерлэн формаез, погонъёссэ куштӥзы, кагаз вылэ суэн суредазы немец погон, Гена вылэ дӥсязы, озьы фрицлы пӧрмытӥзы. Мукетъёсызлы форма кулэ ӧйлась, соос – партизанъёс. Тани «фрицез» кутӥзы, кылзэ юало, зэмос пыӵалысь ыбыса лэзизы ук!.. Сценка пӧрмиз зэмос спектакльлы. Но ыбем патронлэсь кенжиз корка сэргысь ӝуй. Тылпу ӧз поты, ӝог кысӥзы... Та учыр Генаез воксё ик театр пала ӧз кыскы ке но, вуоно улонэзлы инъет луиз ик, дыр.
Кырӟась
Асан техникумын огез художественной самодеятельносте пыриське, мукетыз спортэн выре, нош Гена мыр-мыр басьтӥськиз зоотехнике дышетскон борды. Кызьы ке оград репетицие кожиз но, Сивкова Тамара кырӟасез адӟыса, шузиме вал – сокем синмаськиз, соку ик ӵош кырӟаны куриськиз.
- Али но таӵе ик тодӥсько на, кызьы соин кыкнамы кырӟамы: «Я играю, всё понимаю, я на дудочке играю»… - маде Геннадий Капитонович. - Укыр трос пиос синмаськылӥзы со чебер ныллы, ачиз но синъёсыныз «ыбылӥськыны» быгатылӥз.
Геннадий, дышетсконзэ йылпумъяса, Уваын кык но ӝыны ар ужаз зоотехник луыса. Но ӧз тӧлӟы солэн сюлмысьтыз сцена. Сыӵе чебер кырӟамзы бере…
Ожгарчи
Витьтонэтӥ аръёсы ож бере дарылэн (порохлэн) зыныз бырымтэ на, армилэн данэз туж вылын. Соловьёвлэн служить кароно частез сылӥз Кунцевоын, Москва бордын ик. Солдатъёс пыриськылӥзы кино пуктон массовкаосы. Со вакытэ Кремльын ужаз Молотов. Оград машинаен ортчыкуз, со сюрес дурысь юыса лошъяськись солдатэз адӟем но гарнизонэ жингыртэм.
Ӝутӥллям вань солдатъёсты, командиръёслы пӧсь йӧтэм, юэм солдатэз шедьтӥллям, кылзэ юн юаллям, мукетъёссэ ӝыны ар ӵоже увольнительнойтэк возиллям, визь медло шуыса. Удмурт пияш сое валатэк ӧз кыльы – Геннадий Капитонович пересьмыса но «ответственность» кылэз, кыл кутонэз туж мур вала но быдэсъя, кылзэ тӧлъя-буръя ноку юнме уз лэзья, шуэ:
- Мон рольме но, котьку сямен, огнам, дублёртэк, шудӥсько.
Таӵе артист – режиссёрлы самой оскымон ужась, эш.
Лётчик ӧз пӧрмы
Бадӟым талантэн адями олокыӵе но удысын ассэ утча. Соловьёвлэн вал мылкыдыз военной лётчик луыны. Но комиссиез ортчыкуз, лулсэръёсыз ӧз чидалэ. Гозылэсь пунэм тубатэтӥ пеймыт азьын выллань тубоно но тэтчоно вал, пе. Куинь пол тэтчыны косэмзы бере гинэ уллань вамыштэм… ог кык метр ӝуждалаысен. Геннадийлы дораз бертыны дэмлазы. Но пияш куректонлы ӧз сётскы – азьланьын сое уно пӧртэм сюрес возьма.
Зоотехник
Табере ини зоотехник Соловьёв Шаркан ёросысь Бородулие шеде. Специалистъёс ичи вал. Соловьёвлы вуылоно вить колхозэ.
- Пудо сиён ӧй вал, - тодаз вае Геннадий Капитонович, - Хрущёв кужмысь кукуруза будэтытӥз, милемыз - 500 гектар вылын, соку ми пудо сиёнтэк кылимы. Колхозлэсь предзэ куролы Саратове ыстӥзы, нош со ресторанын мултэссэ ӟистыны шедьтэм но, уксёзэ лушкаллям. Табере милемыз Правительствое ӧтизы, кылмес юало. Правительствоысь А. Вахрушев монэ воксё ёртӥз, кызьы, пе, тросгес йӧл кыскоды? Пудо сиён ӧвӧл, шуисько. Пайми, кызьы ужаны: косо, нош юрттӥсь ӧвӧл. Соку егит зоотехник газетысь ялонэз адӟем, артистэ дышетскыны, пе, ӧтиськом. Со понна конкурсэз ортчоно. Иже комиссие лыктэ но, отын нош ик А. Вахрушев пуке. Культурая министр вылэм со удмурт пиосмурт. Соловьёвез адӟыса юам, скалъёсыд, пе, трос йӧл сёто ни-а. Трос сёто ни, мыняса шуэм Соловьёв. Нош ачиз, конкурсэз ортчыса, Ленинградэ А. Островский нимо театральной институтэ дышетскыны кошкем.
Зэмос артист
Таиз учыр Татарстанысь гуртын вал, Удмурт театрлэн труппаез гастрольёсы потаку. Возьматӥськиз «Бызьыны вуэм песяйёс» спектакль. Абдуллаез шудӥз Г. Соловьёв. Тани со пересьёслэн юртысьтызы ньыль пересь кышноосты буйгатӥз но сьӧраз нуыны кыл сётӥз. Соку залысь песянай пукон вылысьтыз султӥз но ваньмызлы кылымон куриськиз:
- Монэ но сьӧрад басьты!
Абдулла-Соловьёв киыныз шонтӥз, песянай сцена вылэ тубиз но, ваньзы ӵош катанчи сьӧры ышизы. Соку ик туж зол горем кылӥськиз.
Зэмос искусстволэн кужымез со – учкись вунэтэ театрын пукемзэ, оске сценалы, артистлы.
«Ой, тӥ чебер нылъёс»…
Туж ӟеч пумиталлязы удмурт учкисьёс та спектаклез, соин гастрольёс ортчизы, Удмуртиысь сяна, Татариысь, Башкириысь, Киров областьысь гуртъёстӥ. Кельшизы на «Яратэ - уг яраты», «Гуртысь маскарчиос» но трос мукет...
- Оград Дэбесысь Уйвае вуимы, - маде Геннадий Капитонович, - отын улэ вал Аполлос Перевозчиков артистлэн кенакез, туж сӥлы кышномурт, милемыз со лыктэммылы быдэ дораз ӧтьылӥз но табанен, перепечен, пӧсятэмен куноялляз. Ог вить ар гуртазы ӧм ни вуылэ вал. Мон, ролелы дасяськыса, ымнырам туш но мыйык ляки ни, нош со вӧзам вуиз но тушме кысканы ӧдъяз. «Артистъёс но пересьмо шат?» - юа. Мынам со лякемын, тани сцена вылэ потоно ни, шуисько. Мырдэм валатскиз, ну, серекъямы ук ваньмы ӵош...
«Сталин» пумиськылӥз... Волковен
Куӟебай Гердлэн 100 арес тырмон юбилеезлы сӥзем ӝыт дыръя вал со. Сталинэз шудӥз Геннадий Соловьёв, Горькиез – Леонид Романов. Сценка бырем бере артистъёс занавес сьӧры ышизы. Кияз чильымен, гримен Соловьёвлы пумитаз нырысь шедиз Василий Ванюшев профессор. Ак но бак но вазьыны ёрмыса, таид берлань чигназ. Соловьёв Удмуртилэсь Президентсэ Александр Волковез пумитаз но солы Сталинлэн куараеныз вазиськиз. Кивалтӥсь но паймиз.
Мар сярысь мадё синпелетъёс?
Геннадий Капитоновичлэн синпель кузьымъёсыз туж трос. Тани радиоприёмник 1992-тӥ арын сётӥллям со кичӧлтэмъя ортчытэм финн-угор калыкъёслэн драмтеатръёссылэн нырысетӥ фестивалязы. Тани Кун Думаысь депутатлэн Светлана Смирноваен кузьмам чебер шкатулкаез. Нош Президентмы Александр Волков кинюртэменыз суйпосын нуллон час кузьмам. Борддоразы – дано артистлэн портретэз, туэ юбилеез дыръя сое сётӥз Удмуртиысь калык художник Пётр Ёлкин.
* * *
Артистъёс роль сётэмзэс витё, нош Соловьёв сётэмзэ куддыр уг басьты. Вераськон ӝутӥмы одӥг тодмо авторлэн пьесаез сярысь. Соя, шуиз Капитоныч, мон спектакльын ӧй шуды, юморез тырмыт кадь, но отын калгон возьматэмын, нош калгон - со семьяез быдтон.
- Ачид угось весь одӥг кышноен улӥськод.
- Озьы луыны кулэ, - сцена вылын кадь йыгмыт куараен вазиз Соловьёв. - Калыкын юнме уг шуо: семья, кудаз каньыл нылпиослы но пересьёслы, со - адӟем карымон семья.
Но ужзэ яратӥсь мурт ужез сярысь тросгес кенеше - кинлэн маиз висе, со сярысь ик вераське. Со умоен лыдъя Удмурт театрлэсь школа программая ӟуч спектакль пуктылэмзэс, кылсярысь, А. Островскийлэн «Гроза» пьесаезъя. Шӧдэ вуж спектакльёсы берытсконлэсь кулэлыксэ. Шуом, И. Гавриловлэн, В. Садовниковлэн пьесаоссыя. Та дырозь Удмуртиысь артист группаос сизьым пол палэнын дышетскизы ни ке, берло дас ар ӵоже та амал вунӥз ни.
Сюлмыз вӧсь луыса маде ляб спектакльёс сярысь. Туала улон сярысь ӟеч пьесаос ӧвӧл, пе. Соос мед кылдозы шуыса, выль драматургъёсты, режиссёръёсты будэтоно.
Источник:
Соловьев Г. К. Капитоныч / Г. К. Соловьев ; записал Пётр Кузнецов // Удмурт дунне. - 2007. - 9 нояб. - С. 6, 11. - (Удмурт кизилиос).
За предоставление материала выражаем огромную благодарность редакции газеты
"Удмурт дунне"
