Лихацкая Галина Александровна
Куинь улонэз улысал[править]
Галина Лихацкая — Удмурт Республикаысь Мунё театрысь режиссёр. Россиысь мунё театръёс пӧлын кык арлы одӥг пол ортчылӥсь «Рабочая лошадка» фестивальын «Привет Мартышке» но «Маша и Медведь» спектакльёсыз вормонъёс басьтӥзы. Галина Александровна йылпумъяз Екатеринбургысь театр институтысь мунё театрлы актёръёсты дасясь ёзэз.
Фамилилы укшась сям
— Сямыя фамилиелы укшасько, дыр. Пичи дырысен ик туж етӥз вылӥськем. Анае верамъя кык арескын капка улысь пуны пасетӥ кошкисько вылэм. Кызьы улэп кылиськем шуыса пайме. Одӥг пол бускельмы вуэм но черекъям шораз: малы, пе, уд учкиськы нылдэ, куйые усёз ни. Пегӟиськем но, куйы вадьсы выдыса, мур вузэ учкисько, пе.
Мукет дыръя, урам шорын шудыкум, ӧжыт гинэ вал уллё лёгамтэ. Весь сюрес вылэ потӥсько вылэм. Мотоцикл но вӧзтӥм ик ширтыса ортчем. Кызьы лёгаськытэк кылиськем? Анай весь курда вал мон понна.
Бадӟымгес будыса но, визь пырымтэ. Пиосын яратылӥ шудыны, нылъёсын мӧзмыт потылӥз. Колхозын турын утялтонын ужаса, ӝытсэ пиосын вал вылын кошки. Бертӥсько но пумитам анае сузэръёсыным пото монэ утчаны, куиньназы ик бӧрдо. Ужысь бертыса, атаймы анайлы куаретэм: кулӥз, дыр, ни, пе, нылыд, мын утча — адями виись вал вылэ пуксьыса кошкиз. Зарница нимало вал кадь сое — адямиез урам кузя кыскыса кошкем. Мон та сярысь ӧй тодылы. Атайлэсь йӧтоз шуыса, ӝогак кеносэ ватски. Нош нэнэ со нуналэ арбуз, канфет басьтэм. Сузэръёсы, монэ жаляса, шып-шып гинэ ческыт сиён вайылӥзы.
Пичи дыръям туж ваменэс вылӥськем, «эн» шуэмез ӧй валалля, пе. Со вакытэз тодам вайисько ке, анае туж жаль потэ, кӧня пурысьтам йырсиез кылдӥз, дыр, монэным йырин. Но мон солэн нырысетӥ юрттӥсез вал. Нылпиосты ути, сизьым арескысен сиён пӧзьтыны кутски. Ваньзэ люкен-люкен дасялоз но валэктоз: созэ соку пононо, тазэ соиз пӧзем бере. Ужысь бертыкузы, сиён дась вал ни.
Аслам атае, армиын служить карыкуз, кулӥз. Самоволкае кошкыса, эшъёсыныз кинлэн ке бакчаяз пыриллям. Сое шӧдыса, юрт кузё атаелэсь пыдзэ кусоен ӵогем, эшъёсыз вирзэ дугдытыны быгатӥллямтэ. Анае верамъя, со туж шаплы вылэм, мон выжыезъя кошкиськем, лэся.
Атае украин выжыысь, но ассэ ӟырдыт кавказ пи шуэ вылэм. Улӥллям Грозныйын, анай-атаез люкиськыса, Ростове кошкиллям. Нэнэе атаеным тодматскем Ростовысен. Со шуд утчаны шуыса палэнэ кошкем но карт шедьтэм. Атайме армие басьтэмзы бере анае дор палъёсаз бертэм, Алнаш ёросысь Арбайкаын скал кыскисьын ужам, собере мон вордӥськиськем.
Выжыкыл дунне
— Мыным куинь арес тырмытозь, улӥмы Актэмырын ӵужай дорын. Анай кыкетӥзэ бызьыса, Ятцазэ кошким. Нырысь аръёссэ улӥмы песянаен. Со зол куронъёс пуктылӥз: коркан котьку чылкыт медло, куашетэмез но ӧз яратылы. Шудонъёсыным шып-шып гинэ ас поннам бӧтьыртэмысьтым, шуэ вал: мар, пе, веднаськиськод?
Туж яратӥсько вал радиопостановкаосты, выжыкылъёсты кылзыны. Песянай куаретэмысь, радиоез шыпыт карисько но, пельме лякыса, ӟус вылын сылӥсько. Одӥг пол укноетӥ адӟисько: мон доры эшъёсы лыкто. Корка пыризы но, шоразы дол! учкисько, номыр уг куаретӥськы. Соос но номыр уг верало. Кӧня ке озьы сылыса, эшъёсы, кыл вератэк, берытскизы но кошкизы. Выжыкылэз соосын воштэме ӧз луы.
Туж яратӥсько вал мунёосын шудыны, ас поннам олокыӵе но выжыкылъёс малпаса. Шудон пӧлы выйисько ке, мыным нокин кулэ ӧвӧл. Ноку бай ӧм улэ, но анаен атай ми понна шудонлы но, сиёнлы но, дӥськутлы но коньдонзэс ӧз жалялэ. Сузэръёсылы но маза ӧй вал. Кузь пальто дӥсятӥсько, куссэс думисько. Маин принцессаос ӧвӧл? Нимамы улыкумы ини, ӝыны гуртысь эшъёсы дорамы лыкто вал. Вань дӥськутмес поттӥсько, соосты олокызьы но чебертӥсько. Коркамы йырин-чукин берытскемысь, анай номыр ӧз куаретылы, тылпу гинэ эн поттэ, шуылӥз. Милесьтым юртмес гуртын «шудон корка» гинэ нимало вылэм. Укыр куашетӥсько шуыса, монэ школае куать арескын ик сётӥллям, сузэръёсме утьыны одӥг арлы ӵужаез вайылӥзы.
Ятцазысь калык ӝыныез ӟуч, ӝыныез удмуртъёс вал. Мон малы ке но ӟучъёсын эшъяськылӥ. Куинь-ньыль арескам соиныз но, таиныз но кылын шалтыр гинэ вераськисько ни вылэм. Но школае мыныса, удмурт кылъя урокъёсын нырысь-валысь туж курадӟи, «кыкъёс» бичаны кутски. Шуом, гожтоно ке «сяська», мынам пӧрме «сящка». Нэнэе йырыз курен жугылӥз но.
Дышетски «ньыльлы» но «витьлы». Дышетӥсьёс шуо вылэм анаелы, дораз дасяськысал ке, кыӵе меда дышетскысалыз нылды. Туж уг яратӥськы вал урок лэсьтыны, тырмылӥз дышетӥсьёслэсь верамзэс кылзэмен. Тетраде гожтонозэ ӝогак быдэстӥсько но, урок лэсьтэм улсын, художественной книга лыдӟыса пукисько. Анай куаретэ: «Мар сыӵе кема пукиськод!» Урок лэсьтӥсько, шуисько. Дорам матэктэ ке, книгаме тетрадьёс улэ ватӥсько.
Палёмытӥсь паймон
— Шор ёзо тодон-валан басьтӥ Байтэрекын. Школаен кивалтӥз республикаысьтымы биологияя туж дано дышетӥсь Леонид Белоусов. Школалэн аслаз бадӟым сад-бакчаез вал. Леонид Данилович дышетскисьёсын ӵош отын пӧртэм опытъёс ортчытъяз. Мон но та уже пыриськи, нимысьтыз дневник нуисько вал будосъёсъя. Тыршеме понна ВДНХ-лэсь медаль но басьтӥ. Ӟеч тодӥсько на борщевик будэтэммес. Кидыссэ бичаса, солэсь ӟеч уд поттыны тыршим — берло со сатана жаг турын выллем быдэс шаерамы вӧлмиз.
Будосъёс котырын вырыны кельшиз, биолог луон сярысь малпаськисько ни вал. Но, бадӟым классъёсын дышетскыкум, республикаысьтымы Мунё театр школаямы «Кот в сапогах» спектакль возьматӥз. Солэсь пуштроссэ уг тодӥськы ни, нош гудыръяса, чилекъяса зорись суредэз туж паймыса учки. Выль ар ёлкаез чеберъянэ кутӥськись дождик зэмен но зориз кадь. Чилектэм тыл улсын со югак воректылӥз. Та паймон мылкыдме воштӥз, режиссёре пырыны малпай.
Асме, оло, ӝоггес шедьтысал, школаямы яке клубын со дыре театрен герӟаськем кружок ужасал ке. Ас поннам мар ке выри ик дасялляны. Дас ньыль арескын гуртысьтымы пиналъёсты люкай но, гуртоосмылы концерт возьматӥмы. Ачим ик кырӟанъёс, кылбуръёс утчай, эктонъёс дасяй. Ялонъёс ошылӥм. Гурт калыклы концертмы кельшиз.
Ӟеч дышетскисьлы — ӟеч инты
— Школаез йылпумъяса, документъёсме сётӥ Пермьысь культурая институтысь режиссёръёсты дасясь отделение. Экзаменъёс сётыку, общежитиын интыос ӧй вал, улӥмы спортзалын, кӧламы выж вылэ валем матрасъёс вылын. Нылъёс туж лекесь, пинёесь люкаськиллям, ог-огенызы весь керето. Мон, школаез дас куать арескын йылпумъям но анаелэн шуныт бурд улаз будэм мар ке, номыре адӟылымтэ ыжпи выллем, куалектӥ. Улытозям таӵе лекъяськисьёсты ӧй адӟылы уго. Артэ ик булочной вал. Буйгатскон понна, лэся, кексъёс но булкаос сиыса, толэзь куспын дас килограммлы куайиськем. Керӟегъяськонъям быгатэмме но возьматэме ӧз луы, «кык» басьтыса, гуртэ бертӥ. Макем возьыт вал: ӟеч дышетскыса но, пырыны ӧй быгаты! Нош анае монэ шумпотыса пумитаз. «Кол» басьтысалыд ке но, пе, нокыӵе ӧй кариськысал. Туж мӧзмем мынэсьтым, кыдёке кошкемысьтым но, сюлмаськиз, вылды.
Мон та толэзь куспын воштӥськи, дӥсьтӥсьгес луи, пиньёсы но кылдӥзы. Улонын сыӵе но опыт кулэ вылэм. Со аре ик туж капчиен пыри Ижевскысь культпросветучилищеысь режиссёръёсты дасясь отделение. Кык но ӝыны ар дышетскыса, келязы Алнаш ёросысь Туймыйылэ. Ӟеч дышетски шуыса, ӟеч инты ӵектӥзы. Отысь культура юртысь калык коллективен кивалтэ вылэм Владимир Соловьёв. Али со егитъёсын ужанъя министр.
Ӝыны ар куспын пиналъёсын спектакль дасямы, нылпи театръёс пӧлын Алнашын ортчем ӵошатсконын нырысетӥ инты басьтӥмы. Со уженымы гуртъёсы но потамы. Озьы ке но мынам сюлэм интыяз ӧвӧл, клубын уж мылкыдме уг буйгаты — дышетсконэз азьланьтоно. Табере мынам артист луэме потэ.
Лобан бере буйган
— Май толэзе Ижын Мунё театрын, Екатеринбургысь театр институтэ дышетскисьёсты быръён ортчытӥз педагог Сергей Жуков. 21 муртэ гужем лыктыны косӥз, соос пӧлын вал мон но. Нырысетӥ тураз ик Сергей Константинович шуиз: тӥ соглаш ке, пе, монэ но эшме Елена Ворончихинаез институтысь мунё театрлы артистъёсты дасянъя отделение куто. Дэмлало, оско бере, мар мынонтэмез, малпай. Нош аслам драмая актриса луэме потэ вал. Сочинение гожтыса но историен экзамен сётыса, студентка луи. Институтэз йылпумъяме бере Москваысь Щепкин нимо театр училищеын стажировка ортчи, шаерысьтымы культурая училищелы педагог кулэ, пе. Но актриса луон мылкыды вормиз, куать арзэ ужай Ижевскысь «Молодой человек» театрын. Собере вуи Нижний Новгород улосысь Арзамас городысь драмая театре. Таяз кык ар возиськи. Сямы пӧсь, малпанъёсме шара верано кожасько. Мыным актриса луонэн гинэ уг тырмы, лэся, ачим кузё луыны кулэ. Режиссёр луон мылкыд аслэсьтыз кариз, вылды.
Туннэ нуналлы мон буйгамын. Отчы, татчы лобаса ветлэме бере аслэсьтым интыме шедьтӥ. Куддыръя сцена бордаз кыске ик. Но быръёно луысал ке актрисаен режиссёр вискын, малпаськытэк бырйысал кыкетӥзэ. Со мыным Инмарен сётэмын, лэся.
Вормон тубатъёс
— Мунё театрын тямыс ар ужатозям, ог тямыс спектакль пуктӥ ини, пӧртэм интермедиос дасяй. Вормонъёсы но вань. Мунё театръёс пӧлын ортчылӥсь «Рабочая лошадка» калыккуспо фестивале куинь ужме нуллӥзы. «Привет Мартышке» спектакльме кык номинациын пусйизы: «Тужгес устоез режиссёр уж» но «Устоез нылкышно роль» (актриса Эмма Земан). Туэ тулыс ортчем фестивальын «Машенька и Медведь» уже «Устоез спектакль» гран- при басьтӥз, озьы ик «Устоез пиосмурт роль» (Александр Перевощиков), «Кыкетӥ планысь устоез роль» (Антонина Пушина) номинациосын вормим.
Но буйгатскем уг поты. Азьланяз бадӟымгес фестивальёсы бадӟымгес спектакльёс дасян борды но басьтӥськоно. Выль проектъёс кылдытоно, грантъёс утчано. Нациосын ужан политикая министерство юрттэмъя кылем арын «Пичи ерпечка» спектакль дасямы. Туэ грант басьтӥмы Россиысь Театрын ужасьёслэн огазеяськонзылэсь «Умка» спектакльлы. Тазэ ужмес Выль ар праздникъёслы дасяломы. Нош та дыре тыршисько «Звёздный мальчик» спектакль бордын. Оскар Уайльдлэн выжыкылэзъя ачим ик инсценировка дасяй. Нылпиос сое адӟозы ни октябрь пумын.
Тодон-валанме будэтон сярысь но сюлмаськисько. Режиссёр луисько ке но, режиссёре дышетскемын ӧвӧл. Но диплом понна гинэ институтэ пыреме уг поты. Дышетсконо ке, зэмос мастер доры мыноно. Мон бырйи Нижний Новгородысь Виктор Шрайманлэсь лабораторизэ. Котькуд ар дораз сессие ветлӥсько. Люкаськимы 15 кузя, ваньмы пӧртэм мунё театръёсын ужаськом. Мыным туж тырмыт, мар сётэ Виктор Львович. Со Россиысь мунё театр удысысь одӥгез валтӥсь специалист — режиссёр, педагог, критик.
Мар монэ шугъяськытэ та нуналэ? Театрмы пересьме, ӧвӧл шоро-куспо арлыдъем актёръёсмы. Кинэн ужалод, одӥген-одӥген пенсие кошкизы ке? Нош удмурт спектакльёс дасян пумысен ужпум туж секыт, со театрен гинэ герӟаськемын ӧвӧл.
Шумпотон сярысь ке верано, театрамы калык мыло-кыдо ветлэ, уката ик юртмы выльдӥськем бере. Выль ар представлениосы театре шедьыны но шуг. Югыт, шуныт но чебер интые пыдъёс асьсэос кыско, учкисьёслэн гинэ уг, артистъёслэн но.
Магнитэн думемъёс
— Картэным Константин Мехряковен кыкнамы Мунё театрын ужаськом. Со — актёр. Нош нырысетӥ дипломезъя — программист, йылпумъяз Ижысь механикая институтэз. Со вакытэ ик институтысь «Молодой человек» студие пыриськиз. Театрын ужакуз ини, заочно амалэн йылпумъяз Екатеринбургысь театр институтысь актёръёсты дасянъя отделениез.
Тодматски картэным «Молодой человек» театрын. Улӥськом вал одӥг остановкаын. Быдэс ар ӵоже доре ӵош бертылӥм ӟеч тодмоос сямен. Паска азьын шуисько, мон киросэн котырсконэ мыно. Басьты, пе, сьӧрад, ноку ветлэме ӧвӧл. Транспортэн центр пала вуыкумы, мон вылэ кыӵе ке но воргорон зӥбиськиз. Боз-боз куаразэ поттыса, Костя шораз куаретӥз: «Эй, ну-ко, сыл!» Пайми: мугорын пичи, чиед ке но, та монэ утьыны быгатэ ук! Котырам пиосмуртъёс вал ке но, соос асьсэды золгес яратӥзы, семья кылдытон понна оскымонзэ ӧй пумита. Черкын кимес кутыса сылӥм. Бертӥмы пыдын, нокызьы люкиськыны ум валаське ни. Со но уг кошкы, мон но уг пыриськы. Шып гинэ сылӥськом. Со куспын син азям адӟиськиз: вадьсамы шар кылдӥз кадь. Озьы, номыр вазьытэк, сылӥм, сылӥм но люкиським. Ӵуказеяз Костя мон доры лыктӥз. Озьы пумиськылыны кутским.
Картэ мынэсьтым ньыль арлы пичи. Солэсь бадӟым шуыса, бордысьтыз кема люкиськыны турттӥ. Ум пумиськылэ ни шуисько но, кӧня ке улыса нош ӵош луиськом — магнитэн кадь ог-огмы борды кыске. Мылкыдъёсмылы ӧм пумитъяське ни, огазе кариським. Ар ортчыса, пимы вордӥськиз. Ӵош улэммылы дас вить ар луоз ни. Дорын но, театрын но, азьвыл сцена вылын но ӵош вал. Акыльтӥськом но кадь ог-огмылэсь. Но кӧнялы ке дорысь кошке ке, мӧзмыны кутскисько. Ужын керетыны но вуттӥськом, лекмес поттытэк. Со сцена вылын, мон залын. Костя вунэтэ, мон режиссёр шуыса, нош мон — актёр луэмзэ. Соку ини милемлы тодамы вайыто: тӥ гуртады ӧвӧл, пе. Но ужмылы ум ӝожтӥськиське, кыкмылэн ик азинсконъёсмы вань.
Пери анайлы — пери ныл
— Кык нылпимы будэ. Денисмы 7-тӥ классэ ветлэ, нош Настямылы куинь арес гинэ ай. Нылме куамын укмыс арескын вайи, пие но картэ куремысь. Костя пиезлэсь будэмзэ валаса ик ӧз вутты. Атай мылкыдыз сайкаса, пичи нылпиен утиськемез потӥз. Пиелы но эш кулэ. Аслам кык сузэре но выны вань, ог-огмес туж яратӥськом. Сыӵе матысь адямиез уз луы шуыса, пие жаль потӥз. Настямы туж мудрон пӧрмиз. Дорын со милям кузё. Соя ӧз ке луы, Денисмес жугоз но. Монэным но кивалтыны турттэ, кылзӥськемез уггес поты. Куддыръя шуисько ни, астэ урод возиськод, мон тонэныд уг шуды. Бӧрдыны кутске, час но, кык но вузоз, ӧд ке нуныя. Чиданэ 20 минутлы гинэ тырме. Паймыса учкисько вал таӵе аляк нылпиос шоры. Малпалляй, анай-атайзы эркиямысь, асьсэды озьы возё. Кыксэс но одӥг кадь утиськом, будэтӥськом кадь. Денисмы востэм, зӥбыт, ныл кадь кылзӥськись вал, нош таиз пери но пери. Ас выжыям кошкем, ачим но анаелэн адӟонэз вылэ вуи.
Нылпиосме туж яратӥсько. Керӟегъяськон вакытам янгышен куаретыны шедьтӥсько ке, буйгаме бере шуисько ни: вождэс эн вае. Весь котырам бергасалзы, пиелэн эшъёсыныз ураме но потэмез уг поты вал пичигес дыръяз. Олокызьы но шудылӥм уго соин. Табере нылы весь ёртэ. Нош кӧня дыр кулэ ужлы, йыр уг ик шутэтскылы. Уйин но малпанъёсылэсь сайкасько. Соин ик шуисько: мыным куинь улон кулэ вал. Одӥгзэ быдэсак аслым сӥзьысал. Отчы-татчы ветлысал, дуннеен тодматскысал, яратоно киужъёсы бордын быдэс нуналъёсын пукысал. Туж яратӥсько керттӥськыны, чильпаськыны, ачим ик модельёс малпасько. Мукет улонме быдэсак семьяелы, нылпиосылы сӥзьысал. Дасо пала нылпи вайыса, соос котырын бергасал. Куиньметӥзэ ужен гинэ герӟасал. Но улонын озьы уг луы, сюлэмдэ ваньмызлы ик шори люкиськод.
Источник:
За предоставление материала выражаем огромную благодарность редакции газеты "Удмурт дунне"
