Соловьёв Владимир Михайлович
Улонын – кивалтӥсь, сцена вылын – кырӟась[править]
Республикаямы Владимир Соловьёвез артистэз но кырӟасез сямен тодо. Алнашын улӥсьёс сое ёрос администрациысь егитъёсын ужанъя отделэн кивалтӥсеныз сямен тодо на. Со сяна, Владимир Михайлович Алнаш ёросысь «Единство» партилэн ёзэныз кивалтэ но Россиысь Кун Думалэн депутатэзлэн Светлана Смирновалэн оскем адямиез луэ. Шутэтскон минутъёсы Владимир Михайлович яратэ баянэн шудыны, лулсэръёс ик ялкаро, пе. Озьы со бӧрсьысь кык арзэ Варзи-Ятчи курортын толэзьзэ баянист луыса ужаз, огдыре шутэтскиз но.
- Владимир Михайлович, артист но кырӟась луэмды мукет ужъёстылы уг люкеты-а?
- Уг. Юрттэ гинэ. Кивалтон ужъёсын вырын кутскыку, калык монэ тодэ вал ни, соин адямиосын огкыл шедьтыны капчигес луиз.
Но валамтэос кылдыло ик. Куд-ог адямиос юало, малы, пе, тон галстукен уд ветлӥськы. Нош мыным джемперен капчигес.
- Кызьы ортчиз тӥляд пичи дырды?
- Вордӥськи Алнаш ёросысь Туймыйыл гуртын. Семьяын ньыль ныл но одӥг пи будӥмы. Мон пичиез вал, соин эркеписэй гинэ шуылӥзы. Йыркур луылӥз ик. Апайёсы гуртысь кошкем бере секыт йӧтӥз. Выж миськон, пу пильылон – ваньмыз вылам усиз. Школаын нырысь дружина советлэн председателез, берло комсомол огазеяськонлэн секретарез вал. Со сяна, балалайкаен, баянэн шудӥ, спектакль пуктонъёсы пыриськылӥ. Соин котькуд минутэ гожъямын вал. Гуртын фильмъёс возьматылӥзы ке, анайёс арнялы кык пол сяна клубе ӧз лэзьялэ. Котькыӵе умой кино мед луоз, пыдесъяськыса курон но ӧз юрттылы. Нош туэ 4-тӥ-5-тӥ классъёсын дышетскисьёс уйшорозь дискотекаосын шузиясько. Малпан кылдэ: анай-атайёс нылпиоссы сярысь чик уг сюлмасько. Уг валало шат, пичи дырысен лякытэз шӧдэм пиналъёсты бератаз кутыны уз лу ни.
Мон сямен, нылпиосты пичи дырысен трос уж лэсьтыны дышетоно. Туж шумпотӥсько, ньыль-вить кружоке ветлӥсь пиналъёс понна. Соос ик отчы-татчы вуттӥсько, умой дышетско. Кин луозы азьпалан та пиналъёс – уг тодӥськы, но одӥгез валамон – соослэсь одно кин ке пӧрмоз.
Тани мынам бадӟымез нылы суреданъя школае ветлэ. Со суредаськись уз луы, но маке умойзэ отысь одно шедьтоз, вуоно улоназ пыӵатоз.
- Школаез йылпумъяса, артистэ яке кивалтӥсьлы дышетскиды, луоз?
- Анайлэн театральное дышетскыны лэземез ӧз пот ке но, Пермьысь Культурая институтысь режиссурая факультетэз йылпумъяй.
- Нош малы мемиды пумит вал?
- Гурт хозяйствоя институтэ яке университетэ пыр но сокем палэнэ эн кошкы, шуылӥз. Берло Санкт-Петербургысь Театральной институтэ пыри Бекмановен ӵош. Но ветлонэз кыдёкын, уно коньдон быре. Озьы куштӥськоно луиз. Дышетскыны мылкыд кылемын вал бере, туэ Уральской академиысь государственно-муниципальной службая институтэз йылпумъяй – кыкетӥ вылӥ образование басьтӥ.
- Берло аръёсы пияшъёслэн армие ветлэмзы уг пот, но азьвыл служить карымтэосты нылъёс воргоронэн ӧз лыдъялэ. Тӥ сурон сапег нуллӥды-а?
- Одно ик. Служить кари Забайкальской пограничной войскоосын – Дауриын. Армиысь бертэм бере Туймыйылысь калык юртэн но калык театрен кивалтӥ.
- Отысен ик кивалтӥсь но, артист но вордӥськизы, луоз?
- Шонер, мыным туж удалтӥз. Ньыль ар ӵоже Пермьын дышетскеме юнме ӧз луы шуыса, оски ке но, быгатонлыкъёсме эскереме потӥз. Дышетскон интыысь трос умой специалистъёс пото ке но, туала вакытэ соослы оскыны курдало. Соин быгатӥсь но тыршись егитъёс ышо-быро.
Вордскем гуртам ужаны кутски бере, вань гурт калык тодмо, соин капчи йӧтӥз. Хоре ог 50 пала адями ветлӥз. Концертъёсы кык автобусэн потамы, ява.
Соку улон мукет вал. Адями тау карон гожтэтъёсын шуныт кылъёсын буйгатскылӥз. Одӥг муртлэн шумпотонэз быдэс коллективлэн шулдыръяськонэзлы пӧрмылӥз. Рынок адямиослэсь улон шоры учконзэс воштӥз, трос луиз ог-огедлы вожъяськон. Азьвыл калык ачиз улонзэ шулдыртылӥз, нош али ӵем дыръя календарьысь горд нуналъёс мукетъёсызлэсь уж доры потымтэен гинэ висъясько.
Туймыйылын ужаме дырысен дас ар гинэ ортчиз. Но туэ отын ваньмыз воштӥськиз. Егитъёс клубысь укноосты, ӧсъёсты сӧрыло. Нош ми дыръя культура юртын тамак но уг кыско вал.
Туймыйыл Алнаш ёросын тужгес бадӟымез гурт, но татын дискотека гинэ но ортчытъяны аппаратура ӧвӧл, мар веранэз ни мукетъёсыз сярысь. Гуртын спортзал ужа ке но, шудыны тупъёс ӧвӧл.
Кылем арын Туймыйыл егитъёсын люкаськыса вераським колхозлы лыс тӥян сярысь, нош колхоз со понна кыл сётӥз аппаратура басьтонэн юрттӥськыны. Но нылъёс-пиос верамез пелязы понӥллямтэ, лыс тӥяны егитъёсын ужанъя гурт специалист гинэ лыктэм. Озьыен, егитъёс асьсэос асьсэлы юрттыны уг малпасько. Та выллем учыръёс ӵем дыръя пумиськыло.
- Владимир Михайлович, ужды понна сюлэмшугъяськонды шӧдӥське, озьы ке но маделэ вал, кызьы тӥ Туймыйыл культура юртысь ёрос администрацие вуиды?
- Комсомоллэн райкомаз нырысетӥ секретарь быръёнын куинь пӧлысь одӥгез кандидат мон вал. Ворми. Уж тунсыко потӥз. Туала улонэн ӵошатыса, соку туж кельшылӥз партилэн быдэ вуымтэослы саклык висъямез. Котькуд пичи гуртын кылдытэмын вал комсомол огазеяськонъёс. Озьы партия котькуд егит адями доры вуттӥськылӥз. Кызьы соос ужазы, таиз мукет юан, нош туала егитъёсын ужанъя ёз пичи кылемын. Собере Алнашын калык театрен кивалтӥ. Соку пуктӥм Владимир Котковлэн пьесаезъя «Маскара Параска» спектаклез. Республикаын калык театръёслэсь ужамзэс учкыкузы, вормисе потӥм. Милемыз ыстӥзы Башкортостанысь Туймазы городын ортчись Россиысь калык театръёслэн фестивалязы. Отысь лауреат луыса бертӥм.
Та вадес ик ужай «Арганчи» ансамбльын. Вуылӥм республикалэн пӧртэм палъёсаз, шаермылэн палэназ но потам. Со мон понна бадӟым школа вал.
Та вадес ик Алнаш культура юртэн кивалтӥ. Берло усьтӥ быдэ вуымтэослы но нылпиослы «Ошмес» центр. Татын ужаку, ёрос администрациысь егитъёсын ужанъя отделэ ӧтизы. Малпаськыса-малпаськыса соглаш луи. Табере одӥг интыям кема пукисько ни – вить ар.
- Кызьы тӥледды валано?
- Японецъёс шуо, котькуд куинь-ньыль ар куспын ужан-служебной тубатэтӥ вылӥе ӝутсконо яке копак мукет удысэ выжоно.
- Малы?
- Котькуд выль уж борды кутскыку, адями кыӵе ке но выль малпанъёсын лыктэ. Та дыр куспын соосты лэсьтыса вуттӥськод яке уд. Нош уг пӧрмы ке, интыдэ бушаты. Мукетъёсыз кужымзэс мед утчалозы. Азьло одӥг интыын ог кызь ар ужамъёсты ушъяллязы, нош табере югдур воштӥськиз.
Ортчем аръёсы коммунистической партия быгатӥсь-тыршись пиналъёсты учкыса, чакласа будэтӥз, кадръёсъя нимысьтыз политика нуиськиз. Нош туэ ӵемысь пинал пичи дырысеныз ик адӟе анай-атайёсызлэсь ужтэк пукемзэс яке ичи коньдон басьтэмзэс. Соин солэн дышетскыны мылкыдыз быре. Собере, институтэ пырыны малпасьёс тодо: коньдонтэк инты уз сюры.
- Иське, мар кароно?
- Гуртъёсы потаку, нылпиосты улонлы дышетыса будэтон сярысь вераськиськом. Куд-огез дышетӥсьёс талы пумит луо, милям ужмы – тодон-валанъёс сётон, шуо. Нош мон сямен, гуртэ кыльыны малпась пиналэз, тужгес ик со дышетсконзэ азьланьтыны уг туртты, быгатонлыкъёсыз ӧвӧл ке, ньыльёс-витьёс вылэ кысконэз ӧвӧл. Мед со, оло, лад-лад куиньёслы дышетскоз, но вуонояз умой адями, анай-атай луоз.
- Владимир Михайлович, ёросысь егитъёсын ужанъя ёзын кӧня адями тырше тӥляд кивалтэмды улсы, кыӵе шуг-секытъёс пумиськыло ужады?
- Ёросамы 21 колхоз. Котькудаз вань егитъёсын ужась специалист. Но, жаляса верано луэ, ужмы секытэн мынэ. Малы ке шуоно ужрадъёс ортчытъяны коньдон кулэ, нош со уг тырмы. Кылсярысь, пӧртэм ӵошатсконъёсы потаны гинэ но бензин ӧвӧл. Миым арын куд-ог гуртъёсысь егитъёс КВН-э валъёсын лыктылоно луизы, ява. Тӥни кызьы луэ.
Егитъёсын ужанъя специалистъёслэсь мылкыдзэс ӝутон понна, ӵошатскон выллем радъяськом. Со сяна, ёросысь адӟем карымон егитъёслэсь фотографизэс Данъян пул вылэ ошылӥськом. Озьы возьматыны тыршиськом, ёросысьтымы умой адямиос – со доярка, тракторист, комбайнер, спортсмен. Вужмем амалъёсын ужаськом, дыр. Но мукетъёсыз малпамын ӧвӧл на.
Кылем арын удалтӥз, Ижысь спонсоръёс аппаратура кузьмазы. Сое ёрос отделамы возиськом, гуртъёсы дискотека ортчытъяны потаськом, концерт пуктонъёсы кутӥськом. Та поттэм коньдонэн мукет ужрадъёсты ортчытъяськом.
Туэ тулыс «Инвожо» журналэн ӵош Татарстанысь Кукмор ёросысь егитъёсын пумиськонэ потам. Отын монэ паймытӥз егитъёслэсь улонзэс радъяны турттэмзы-быгатэмзы. Кукморысь егитъёсын ужанъя ёзлы араз 3 милион 250 сюрс манет висъямын вал. Нош асьмелэн быдэс шаерлы - 12 миллион манет, Алнаш ёрослы – 66 сюрс манет гинэ. Со сяна, бускельёсмы дорын егит семьяослы, 15 ар ӵоже тырон вылысь, 150 сюрс манет ссуда сётӥське. Таин егитъёс асьсэлы улон инты басьтыны быгато. Нош асьмелэн 5-6 сюрс манетэз гинэ басьтон поннна но черодын сылоно.
- Иське, бускельёс асьмелэсь умойгес уло?
- Ми вань вуж амалъёслэсь куштӥським, нош выльзэ малпаны ӧм быгатэ. Тани Татарстанын азьло вакытысь трос ӟечсэ туэ улонэ пыӵатыны быгатӥзы – нылпиосты будэтон но кивалтэт удысъёслэсь ик.
- Владимир Михайлович, кылылэм вань, тӥ Италие но вуылӥды шуыса?
- Озьы. Кылем арын вал со. Егитъёсын ужанъя кун комитетэн командировкае потам. Италиын туж секыт югдурзы наркоманиен. Отын йырез поромытӥсь суретъёсын вырисьёсты коммунае люкало, ужато. Соку ик социологъёсын, психологъёсын пумиськонъёс ортчытъяло.
Школаосын пиналъёс формаен ветло. Отын адямиос кызьы дӥсяськемзылэсь, ӝӧк сьӧрын умойтэм пукемзылэсь - номырлэсь уг возьдасько. Тани 7-тӥ–8-тӥ классъёсын дышетскисьёс милемлы концерт пуктӥзы. Одӥгез таза нылаш эктыкуз ӵем усьылӥз. Асьме нылпи сцена вылысь кемалась бӧрдыса кошкысалыз, нош со мыньпотэ но выльысь эктэ. Отын юрттэт сётон ёзын (социальной службаын) егит пиос ужало, озьы соос альтернативной служба ортчо.
Тросэз Италиын адӟем карымон, но уно амалъёс Россилы уг тупало. Укыр пӧртэм уго улон радмы.
- Озьыен, быдэс дуннеысь адямиосты сюлэмшугъяськытэ наркотиклэн калык пӧлы вӧлмемез. Кыӵе югдур та ласянь Алнаш ёросын?
- Син усёз, куинь пол сялӟы. Туннэ нуналлы документъёсъя ми палан йырез поромытӥсь суретъёсын вырисьёс ӧвӧл. Но Алнаш вӧзтӥ федеральной трасса ортче. Соин, малпан кылдэ, вазь-а, бер-а, та висён ми доры вуоз шуыса. Солы пумит султон сярысь али ик малпаськиськом. Со понна пӧртэм ужрадъёс ортчытъяськом.
Кылсярысь, ӧтчам республикаысьтымы «Егит семья», «Психолог плюс» центръёсысь специалистъёсты. Соос, ньыль-вить кузя вуыса, гуртъёсын куинь-ньыль нунал ужазы. Со сяна, Алнаш больницаын ужасьёсын адямиосын пумиськонъёсы потаськом.
- Тодмоосты пӧлын тӥледлы вожъяськисьёсыз, карьерист шуисьёсыз вань-а?
- Кылылэме ӧвӧл. Малпасько, котькуд адямилэн улонэз ӟеч пала берыктэмез, умойгес каремез потэ. Нош кин тэк кылльыны яратэ, ас быгатэмзэ ватыса улэ – со тыршись муртэ карьерист шуэ. Адями уж пагӟаетӥ нокинлы люкетытэк тубе ке, татын умойтэмез ӧвӧл. Таӵе муртъёсты гажасько.
Туэ улонын мыным кельше котькуд тыршись, быгатӥсь адямилэн коньдон поттыны быгатэмез. Со дыре ик поромытэ государстволэн адямиосты шуг-секытъёслэсь утьыны быгатымтэез. Оскисько, йыртэманъёс пӧлысь ӝыныез та бордысь потэмын. Таин одӥг ёросын нюръяськыны уг луы, кулэ федеральной программа.
- Владимир Михайлович, кызьы малпаськоды, кивалтӥсь сямен адямиослы кельшиськоды-а?
- Кивалтӥсь ваньмызлы умой луыны уг быгаты. Азьтэмзэ со сюлмо адямиез сямен ужатыны кулэ. Тодосчиослэн лыдъямъёссыя, ужасьёс пӧлысь 20 процентэз тэк кыллё, 20 процентэз котькыӵе секыт югдуре тыршозы, нош 60 процентэзлы тупамон ужан инты кылдытоно. Мынам малпамея, сю адямилы умой карон понна, куд-огъёссэ вӧсь но кароно луэ. Тани концертъёсы пичи пиналъёсын ветло, нылпиослэн шып пукемзы уг луы, куашето. Залын ваньмызлы люкето. Валасько, анай-атайёсты – пиналзэс кельтыны нокытчы. Иське, дырын-дырын коридоре потано, пиналэз буйгатоно, собере гинэ, лач-лач пуксьыса, концертэз учконо. Улонысь зарни шорзэ шедьтыны тыршоно.
- Кивалтон уженыды йырин сцена вылысь кошкылоно ӧд луылэ-а?
- Ӧй. Ӵемысь Иже но мукет интыосы концертэн вуылӥськом. Одӥгаз кырӟась, мукетаз концертэз нуись сямен пыриськисько. Толэзь-кык сцена вылэ уд потаськы ке, куалекъяны кутсконо, аслыд кытчы пырон инты ик шедьтоно ӧвӧл ни, ява. Шонерзэ верса, котькуд концерт азьын сюлмаськоно луэ.
- Тӥледды Ижевске ужаны, улыны ӧз ӧтьылэ-а?
- Вал сыӵе дыръёс. Алнаше кылеме сярысь уг жаляськы. Малы ке шуоно сцена вылэ потан мылкыдме но быдэстыны, мукет ужен но вырыны вуисько.
Улон интымы пичи, но асьмелы тырме. Тятя доры гуртэ ӵемысь бертасько. Собере, ваньмыз Иже ке кошкизы, кин татын ужалоз?
Туймыйылын улыкум, малпаськылӥ, мар шедьто со Алнашысьтызы. Нош табере уйзэ гуртын кӧлӥсько но, Алнаше бертэм потэ ни.
- Владимир Михайлович, маделэ вал кузпалды, семьяды сярысь.
- Кык нылы. Бадӟымезлы дас кык арес, пичиезлы одӥг но ӝыны гинэ ай. Кышноеным тодматским, Туймыйылын ужакум. Со ми доры практикае вуылӥз. Ӵошен луим.
Мынэсьтым ӵемысь юало, кышноед клубын ужа, дыр, шуыса. Ӧвӧл, со руноын (роно) экономист.
- Кузпалды ӟуч шуыса, тодӥсько. Нылпиосты удмурт кылын верасько-а?
- Кышное удмурт сямен ваньзэ вала. Бадӟымез нылы кӧня ке вераськылэ. Нош пичиез ӟеч-ӟеч нянь, ву шуыны быгатэ ни.
- Вераськонмес йылпумъяса, асьтэ мылкыддэс вералоды-а?
- Мыным котьку удалтылӥз эшъёсын: институтын но, армиын но. Со алнаш пиос Лева Плотников, Юрий Лобанов, Туймыйылысь баянист Вячеслав Адаков. Нош кырӟасез сямен тросэз монэ тодо Николай Постниковлэн кырӟанъёсызъя. Ваньмызлы тау кареме потэ.
Источник:
Соловьев В. М. Улонын – кивалтӥсь, сцена вылын – кырӟась / В. М. Соловьев ; записала Ольга Кожанова // Удмурт дунне. - 2001. - 21 дек. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
