Владыкин Владимир Емельянович

Лэсьты ваньзэ, марлы кужымед тырме

В. Е. Владыкин

• Владимир Емельянович Владыкин вордскемын 1943-тӥ арын 20-тӥ мартэ Можга городын.

• 1957-тӥ арын йылпумъяз Кезысь сизьым классъем школаез. Со аре ик пыриз Можга педучилищее.

• 1966-тӥ арын данэн йылпумъяз Москваысь Ломоносов нимо кун университетын дышетсконзэ.

• 1969-тӥ арын луиз история наукаосъя кандидат.

• 1969-тӥ—1973-тӥ аръёсы ужаз Удмурт научно-исследовательской институтын. Собере но туннэ нуналозь тырше Удмурт кун университетын. Наукаосъя доктор, профессор, этнологияя кафедралэн кивалтӥсез.

• В. Е. Владыкин дасяз но поттӥз наукая 200-лэсь уно ужъёс. Соос берыктэмын англи, немец, венгер, финн, эстон, пор но коми кылъёсы.

Туннэ милям куномы – Владимир Владыкин, история наукаосъя доктор, профессор, Удмурт университетысь этнологияя кафедралэн кивалтӥсез. Ваньмыз, кин тодэ Владимир Емельяновичез, огкылысь сямен солэсь кужмо учёной луэмзэ гинэ уг пусъё. Зэмзэ но, удмуртъёс пӧлын та нуналлы ӧжыт, дыр, сокем визьмо, туж мур но трос дышетскем, яркыт адями, со дыре ик востэм, лачмыт, зэмос интеллигент. Тани та интервьюез но сётыны Владимир Емельянович нокызьы но соглаш уг кариськы вал. Кема гинэ тэльмыроно луиз. Но сюлворем юнме ӧз луы: Владыкин туж тунсыко адями, соин вераськон шумпотон вае.

Владимир Емельянович сярысь мон нырысьсэ кылӥ студент дыръям ай. Мынӥсько вал Казане. Поездын артэ шедимы туж вераськись, етӥз удмурт песянаен. Казане бадӟымез пие доры, пе, куное мынӥсько. Мон сярысь но юалляське. Дышетскисько, пӧй, Казаньысь университетын, журналистэ. Со пумитам шуэ: мынам но, пе, одӥгез пие кибашлы гожъяське, оло, тодӥськод Владимир Владыкинэз. Уг, шуисько, кылэме ик ӧвӧл. Песянай ӧжытак ӝоже усиз кадь, но созэ ӧз возьматы. Лад-лад мадиз Володя пиез сярысь. Табере солэн данъяськоно пиез ачиз маде ачиз сярысь.

- Владимир Емельянович, мон тодӥсько, тӥ Москваысь кун университетэз йылпумъяды шуыса, собере - отысь ик аспирантураез. Кызьы удалтӥз сыӵе кужмо вузэ пырыны?

- Со понна ӟеч инъетэ вал, дыр. Мон угось нырысь йылпумъяй Можгаысь педучилищеез.

- Малы одно ик бырйиды педучилищеез, одно ик Можгаысьсэ? Тӥляд вордскем палъёстылы Дэбес ук матынгес луэ.

- Атаймы 1948-тӥ арын кулӥз бере, анаймылы милемды огназ ӝутоно луиз. Секыт вал солы. Соин ик, сизьым классэз быдтэме бере, кыӵе ке но техникуме яке педучилищее пырыны малпай. Отын сёто вал стипендия. Бырйи Можгаысь педучилищеез. Можга угось - мынам вордскем интые.

- Кез ӧвӧл шат?

- Кезын мон быдэсми, нош вордскемын Можгаын. Отын война аръёсы, ӵапак педучилищелэн юртаз интыяськемын вылэм Москваысь выжтэм пулемётной училище. Мынам атае, старшой лейтенант Емельян Аркадьевич Владыкин, со училищеын ужам. Соин ик мон Можгаын вордскемын, 1943-тӥ арын.

- Озьыен, тӥледды, лымшор палан толйись тылобурдоосты сямен, вордскем интыяды кыскиз?

- Озьы, дыр. Педучилищее туж секыт вал пырыны. Конкурс вераны луонтэм бадӟым. Ма, ми, отличникъёс гинэ, 60 кузя люкаським (нош ваньзэ-ӧвӧлзэ 60 муртэ пыртыны кулэ вал). Но мыным удалтӥз, пыри. Нырысь-валысь ачиз педучилище но, дышетскон но туж ӧз кельшы. Мон, 14 аресъем пияш, нырысьсэ дорысьтым кыдёке кошкемын, туж мӧзмыса улӥ. Мон али но котькуд адямиен матысь кариськыны ӝог уг быгатӥськы, уг но тыршиськы. Али мон тазьы шуысал: адямиосын герӟаськыны соку ик уг дыртӥськы, шуак уг но пертчиськиськы. Пинал дыр сярысь веранэз ик ӧвӧл. Дышетскон но капчи ӧй вал. Тужгес но курадӟыто вал суредаськонъя но чебер гожъяськонъя урокъёс, мукет сямен вераса, чистописание. Ми соин куинь ар ӵоже «нажим – волосок» карыса выримы.

- Мынам но та предмет сярысь тодэ ваёнъёсы туж ик ӟечесь ӧвӧл…

- Но мукет ласянь учконо ке, Достоевский но шуиз вал: кин, пе, чебер гожъяськыны быгатэ, со карьера но лэсьтыны быгатоз.

- Тӥ соглаш-а солэн вераменыз?

- Хм, соглаш, дыр.

- Нош тӥляд гожъяськемды чебер-а?

- Чебер. Гожъяськон сям возьматэ гожъясьлэсь лыдӟисезлы ӵектэм кусыпсэ. Ури-бери уг дырты ке.

- Озьыен, карьерады пӧрмиз?

- Мон озьы юанэз пуктыны уг быгатӥськы. Мынам валамея, карьера – со ужан инты, одно ик самой вылӥез ӧвӧл ке но. Самой вылӥ карьера – зэмос адями луыны. Сое возьматэ быдэс улонэд. Нош мынам улонэ, оскисько, азьлань питыра на. Со сяна, Испаниын улись каталонецъёс юнме уг шуо: «Нокин но нокинлэсь но вылӥ ӧвӧл, адями ке со». Соин ик малпаське, мар со карьера.

- Кызьы тӥ шуиськоды, дышетсконды секытэн кутскиз? Нош отӥяз?

- Отӥяз мон дыши училищелы, выль эшъёс шедьтӥ. Кылсярысь, Коньы Толя (со алигес Удмуртиысь калык кылбурчи ним басьтӥз, мон сое сюлмысьтым ӟечкыласько) монэным ӵош одӥг комнатаын улӥз. Дышетсконын сокем шугъяськонъёс ӧз луэ ни кадь. Училищеез мон йылпумъяй горд дипломен. Еж-чилясь дышетӥсь луи. Нош зэмос дышетӥсь луыны быдэс улонме тыршисько.

- Собере?

- Собере малпай Удмурт пединститутэ пырыны. Нош училищеысь дышетӥсьёсы воксё шуэрскизы: тон мар, пе, дауртӥськод, тынад сюресэд меӵак Москвае, отчы ӧд мыны ке, ми тонэ каргалом. Кышкатски-малпаськи но МГУ-е мыноно кариськи, мар луоз - лу. Отчы вуи но воксё абдрай: конкурс - одӥг интые 18 адями! Но удмуртъёс – визьмо калык ӧвӧл-а: кышкаменымы, синмес кыньыса но, батыръяськеммы уг-а поты? Мон вань экзаменъёсты «витьлы» сётӥ но историяя факультетлэн студентэз луи.

Москва мыным нырысьсэ, Можга сямен ик, ӧз яра: ваньмыз кыӵе ке вылтӥяськисесь, кӧттыроесь, коштан дӥсяськемын. Нош кызьы улӥз соку вань страна, 1961-тӥ арын? Туж начар. Мон, кытысь ке пыдлось вуэм удмурт пияш, аслым ачим инты шедьтыны уг быгатӥськы вал. Вылаз ик воксё витьымтэ палась шуккет шедиз на.Лыктӥ деканатэ студент билет басьтыны. Отын шуо:

- Ми тӥледды очной амалэн дышетсконэ кутыны али ум быгатӥське. Одӥг ар ке но ужам стаж кулэ. Озьы косэмын правительстволэн постановленияз. Тӥ дышетӥсь, мынэ школае ужаны. Нош одӥг арзэ ӝыт яке заочной амалэн дышетскоды.

- Тӥ понна со зэмзэ но туж вӧсь шуккет вал ук, дыр?

- Ма, туж ик ӧй вал. Мон дӥсея но, выросъёсыя но Москвалы уггес тупаськы вал. Тӧдьы куака выллем. Кызьы шуо ӟучъёс, асме мурт тэркыын кадь шӧдӥ. Мыным йӧн-йӧн дӥсяськон понна коньдон поттыны кулэ вал.

- Озьы ик кошкиды?

- Монэ Подмосковьеысь огаз школае ысто вал. Ӧй мыны, Кезам бертоно кариськи. Кошкон азям Самуил Яковлевич Маршак доры адскыны пыри…

- Маршак доры?!

- Бен, Самуил Яковлевич доры. Паймымон-а?

- Юаськоды на…

- Ма, мон Твардовскиен но, Свиридовен но тодмо вал, Маршак тодматӥз аслаз матысь эшъёсыныз. Александр Трифонович куддыръя мултэс меӵак но вераськылӥз. Мыным со шуиз: мар, пе, тон шедьтӥд университетысь, мын вал литинститутэ, тон кибашлы, визьмо удмурт пияш ке, кызьы шуэ Самуил Яковлевич. Мон кышкаменым могаса вази: «Поэтом можешь ты не быть, но гражданином быть обязан!» Нош Маршакен мон тодматски Можгаысен. Мон солы Москвае дӥсьтӥ келяны веросъёсме, кылбуръёсме. Солы кельшизы, лэся. Ог-огмылы ми гожтэтъёс гожъямы, со мыным кӧня ке книгаоссэ кузьмаз.

Я, лыктӥ мон Самуил Яковлевич доры но верай: пыри, пӧй, университетэ но сыӵе-сыӵе муген дорам бертоно луисько. Эк, пӧсектӥз ук мӧйы кылбурчи:

- Ма, кызьы соос озьы дауртыны дӥсьтӥзы?! Мон али ик партилэн ЦК-яз жингырто! Мырдэм-мырдэм буйгатыны быгатӥ керӟегтэм классикез: мон понна, пӧй, таӵе югдур пайда гинэ ваёз. Ярам, мыным вокзалэ кошконо. Самуил Яковлевич монэ келяно кариськиз. Вуимы мынам вагонэ доры.

- Сыла ай, Володя, ма, та огъявагон лэся ук?

- Озьы.

- Мукетыз ӧз шедьы шат?

- Ӧз.

- Кызьы тон сокем кыдёке сыӵе вагонын бертод?! Мон али ик тыныд купе вагонэ инты утчаны мынӥсько! Нош мынам коньдонэ огъя вагонэ сяна уг тырмы шуыса, вераны кепыр. Кызьы но озьы нош ик удалтӥз буйгатыны пӧсекъясь пересез.

Пукси вагонам, туби куинетӥ ӝажыям. Маршакъёс пакетъёсы оломар но салам тыриллям. Усьтӥсько одӥгзэ – персикъёс, мукетаз – буженина, куинетӥяз – балык. Тӥни сыӵе сиёнъёсын монэным ӵош мынӥсьёсты паймытыса бертӥ мон огъя вагонлэн куинетӥ ӝажыяз.

- Бертӥды Кезэ, собере мар?

- Ужаны пыри школа-интернатэ, дышетӥсь, воспитатель, вожатой луыса. Уй-нунал коньдон жӥльдӥ. Уже кельше но, пӧрме но кадь. Витисько тол сессие ӧтёнэз. Нош со дыраз малы ке но ӧз вуы. Берлогес но ӧвӧл. Мар та таӵе, неужто вунэтӥзы мон сярысь? Гожтӥ университетэ, отысь нош номыр уг вазё. Эшшо кык гожтэт лэзи на – пайдаез сыӵе ик. Воксё пумаз вуыса, туж ӝожмыт гожтэт гожтӥ ини. Я, вуиз ик ивор: ми, пе, тӥледлы куинь ӧтён лэзьямы ини, нош соос берлань берытско «адресат кошкемын» пусэн. Кызьы берло шараяськиз, ӵош ужась эшъёсы озьы дауртӥллям, гожтэтъёсты берлань келяса.

Йыркуръяськыса яке мукет урод муген ӧвӧл. Малы, пе, ми сыӵе кибашлы дышетӥсез лэзёмы, мед ужалоз дорамы, нокыӵе Москваостэк но.

- Тӥ соосты шонере поттыны турттӥськоды кадь? Нош соослэн «сюлмаськеменызы», тӥляд улон сюресты воксё палэнэ кошкыны быгатысал ук. Соку ӧй луысал валтӥсь удмурт этнограф Владыкин.

- Ма, соиз озьы, дыр, но мар вал, со ортчиз ини, мон нокинлы но уг йыркуръяськиськы. Вӧсь карыны – мынам сямы ӧвӧл. Ойдолэ берытском университетысь вуэм гожтэт борды. Отын мыным ӵектэмын вал, гужем сессие лыктыса, тол экзаменъёсты но сётыны. Озьы ик лэсьтоно луи, кытчы пырод. Одӥг толэзь куспын 12 экзамен но 16 зачёт сётӥ - ваньзэ «витьлы» гинэ. Собере, «ужаса улонэн тодматскемме» лыдэ басьтыса, монэ очной амалэн дышетскыны выжтӥзы, аслам группаям ик. Озьы мон огдырлы москвич луи.

- Тӥ шуиськоды, педучилищеын дышетсконды секытэн кутскиз шуыса. Нош университетын? МГУ-ез педучилищеен уд ӵошаты, отын эшшо но шуггес вал, дыр.

- Педучилище луыса гинэ, оло, мон капчиен дышетски университетын. Дышетсконме нош ик йылпумъяй горд дипломен. Таиныз туж данъяськисько. Собере, мон талантливой адями ӧвӧл-а, мар-а?

- Озьы ик ини талантливой меда?

- Туж талантливой, веранэз ик ӧвӧл. Но серекъятэк верано ке, экзаменын ӟеч тодон-валан вӧзы ӧжытак шуд но кулэ, дыр. Тани тодам лыктэ Саша Шкляев, али, валамон, Александр Григорьевич, доцент. Со мынэсьтым одӥг арлы бергес пыриз МГУ-е, журфаке. Гуртысь потэм пияш, туж керпотӥсь, дӥсьтӥсьтэм но ваньмызлы оскись вал со. Нырысетӥ курсын дышетскыкуз, лыктӥз мон доры. Бӧрдонэз ым пумаз мискиньлэн: экзаменын, пе, «куинь» басьтӥ. Буйгатӥсько ини, кызьы быгатӥсько. Комнатаын ӵош улӥськом вал одӥг немецен Армин Ейнеэн, али матысь эшеным. Со юа: мар пумысен, пе, чигиське егит адями. Мон солы Сашалэсь зачётказэ возьматӥсько. Немеце учкиз но шуэ:

- Профессор «удовлетворён», нош егит адями ӧвӧл шат? Саша синву пыртӥз пальпотыны ӧдъяз.

Малы мон та учырез тодам ваи? Саша - визьмо пияш, дышетскиз но мылысь-кыдысь, азьтэмъяськытэк. Но тӥни одӥгаз экзаменын ӧз удалты. Луылэ, кытчы пырод.

- Нош кызьы тӥ этнографие вуиды, оглом, историе но? Мукет сюресъёс син азяды ӧй вал-а?

- Вал, кызьы ӧй вал. Огвакыт асме литераторен но адӟисько вал, малпалляй артистэ но мыныны. Бен, бен, эн пайме, эн серекъялэ: мыным Инмар куара сётэм вылэм. Вал мылкыды лингвист, переводчик луыны. Но улон ас сяменыз кузёяськиз – луи историк-этнограф. Кызьы шуо сыӵе дыръя ӟучъёс, Его Величество Случай кивалтӥз. Но мон ноку но ӧй жаля, уг но жаляськы, историез бырйи шуыса. Мынам валтӥсь правилое, шуод-а, мар-а, сыӵе: ноку но эн жаля ортчемез сярысь.

- Валамон. Нош малы одно ик этнография? Историын ӧжыт шат мукет удысъёс, огезлэсь мукетыз тунсыкогес?

- Нырысетӥ курсысен ми дышетыны кутским та предметэз. Мон соку ик валай – таиз мынам. Луэ ук озьы: йырвизен гинэ уд, сюлэмын шӧдӥськод, мар тыныд чакламын.

- Пырак нырысетӥ лекциысен ик валады? Нырысетӥ курсысь студент соку ик шедьтэ улон сюрессэ?

- Ми доры лыктӥз доцент К. И. Козлова, бӧрысьгес профессор. Кыӵе со лекция лыдӟиз! Валантэм арбериосты но кушаса кадь сётӥз. Визьмо, чебер нылкышно. Али но син азям солэн тӧдьы кӧжыё лыз дэремез. Мон соку ик ас поннам малпай: котьма мед луоз, но мон этнографиез бырйисько.

- Мон ӧйгес вала, Владимир Емельянович: тӥледлы Козлова-доцент кельшиз-а яке Козлова-нылкышно-а?

- Соиз но, таиз но. Тӥни озьы ик вуи этнографие. Этнография мынэсьтым сюлэмме но, йырвизьме но буйгатӥз, шуыны луоз. Та наука калыкъёслэсь вань узыр пуштроссэс, пӧртэмлыксэс-огазеяськемзэс пыр-поч эскере. Нош солэсь тунсыкоез мар ке вань-а? Татысь мон шедьтӥ пӧртэм кылъёсты, кырӟан но мукет сямъёсты, мурлэсь но мур дунне шӧдонэз, философиез – ваньзэ, мар монэ кемалась бордаз кыске вал. Университетэз йылпумъякум, ӵектӥзы аспирантурае мыныны. Отын дышетскыкум, диссертация гожтӥ.

- Кыӵе темая?

- Темае вал – «Очерки этнической и социально-экономической истории удмуртов до начала ХХ века». Нялтас вераса, со пумысен нырысь-валысь шуг-секытъёс кылдӥзы. Кафедраысь кивалтӥсьёслэн туж уг поты вал та темаез юнматэмзы. Мыным ӵектӥзы Африкая ужаны, кафедралы угось африканист туж кулэ вылэм. Мон шуисько: Африкая ужась монтэк но шедёз, нош кин выроз мынам удмуртъёсыным, мон ке ӧй? Вылаз ик со вакытэ удмурт этнограф одӥг но ӧй вал на. Ӝыны ар пала нюръяськи но темаме юнматӥзы. Ӝоген (дыраз, куинь ар ортчыса) луи история наукаосъя кандидат. А, ӧжыт гинэ ӧй вунэты одӥг учырез.

Со вал защитаелэсь кык толэзь азьло. Монэ ӧтизы Иностранной кылъёсъя Морис Торез нимо институтэ: ми, пе, тӥледлы ӵектӥськом ООН-ын ужаны, Вашингтонын яке Венаын. Ма, пӧй, оскалтоно, дыр. Лэсьтӥзы экзамен – англи кылын диктант но огъя вераськон. Соослы яраз, лэся. Азьланьто: али ик, пе, мыноно дас толэзьем курсъёсы. Нош мынам кык толэзь ортчыса защитае. Соосты, пе, соиз нокӧня но уг сюлэмшугъяськыты. Тӥни ме тыныд! Мар понна мон соку куинь ар ӵоже аспирантураын дышетски, малы диссертация гожъяй-курадӟи? Малпаськи, малпаськи но пумит луи. Вылаз ик огшоры кыл берыктӥсь (синхронной переводчик) луыса ужано, экспертэ яке визь-кенеш сётӥсе (советнике) ӵектысалзы ке, эшшо мукет вераськон. Кыл куспетӥ гинэ валаны сётӥзы, куд-ог «тунсыко» ужпумъёсты быдэсъяно луоз шуыса. Соглаш ӧй луы. Воксё паймизы: милям ӵектонъёсмылы пумит, пе, ноку но, нокин но уг кариськы. Нош мон кариськи.

- Ку тӥ англи кылэз дышетыны вуиды? Педучилищеын, тӥ верамъя, иностранной кыл ӧй вал.

- Университетын ик дышетӥ. Англи сяна, немец кылэз тодӥсько на кадь. Нялтас вераса, та кылъёс пумысен серемес учыр вал. Мон переводчик луыса Индие но Афганистанэ вуылӥ. Лобиськомы Делиысен Кабулэ. «Боингын» артэ шедимы ачим кадь ик тушо адямиен.

Бускеле юа:

- Кытысь тӥ?

- Советской Союзысь.

- Уг оскиськы, тӥляд туж вольыт английскойды. Нош Советской Союзын кылъёсты уг тодо, туш но нуллыны уг лэзё.

- Ма, тушъёсын Пётр I гинэ нюръяськиз, али мукет дыръёс. Нош мурт кылъёсты тодӥсьёс тачак. Куспетӥ вераса, англи кыл тӥляд вордскем кылды ӧвӧл, шӧдске. Тӥ немец, лэся. Ойдолэ немец кылын вераськом. Тазэ ини мон немец кылын солы ӵектӥ. Бускеле воксё кылтэм-ымтэм луиз, быльк учке шорам. Мырдэм-мырдэм шедьтӥз вераны:

- Бен, мон немец, Цюрихын улӥсько. Нош тӥ Советской Союзысь ӧвӧл, тӥ ӟуч ӧвӧл.

- Шонер, мон ӟуч ӧвӧл. Мон – удмурт, но Советской Союзысь.

Немец соку шорам кескич учкиз но адресме куриз. Сётӥ. Со но аслэсьтыз мыным сётӥз: пыралэ, пе, дорам. Одно ик, шуисько, мон арнялы быдэ Цюрихе вуылӥсько ук. Ӧз вала серекъямез, оскиз, шӧдске.

- Котьма ке но, Владимир Емельянович, университетын дышетскон куспын кык кылэз дышетыны, йӧн-йӧн тодыны котькудӥзлы сётэмын ӧвӧл.

- Ма, оло, озьы но, дыр. Но мон университетын дырме юнме ӧй быдты ук, дышетски. Нош удмурт но ӟуч кылэз тодӥськод ке, мукетсэ дышетыны туж секыт ӧвӧл. Удмурт кылэ мыным туж юрттӥз англи кылэз ӟечгес, капчигес вераны. Со сяна, анай-атай сётӥзы, луоз, быгатонзэс, Инмар но юрттӥз. Тани Слава выны но ӟеч тодэ англи но француз кылъёсты.

- Аспирантура бере тӥ вуиды Ижевске…

- Озьы. Ужаны кутски УдНИИ-ын, али Историяя, кылъя но литературая институтын. Нош 1972-тӥ арын монэ университетэ ӧтизы. Со дырысен татын ужасько. Одӥг арлы гинэ вис карылӥ, Берлинын ужай, дышетски.

- ?!

- Мар сокем паймиськоды? Мон верай ук ини: удмуртъёс - визьмо калык.

- Ма, кызьы отчы шедиды?

- Огшоры гинэ. Лыктӥз мон доры туж гажано профессор Василий Евгеньевич Майер но шуэ: вань, пе, луонлык Берлинысь университетэ стажировкае мыныны, ӧвӧл-а мылкыдыд? Мар бен, оскалтоно, пӧй. ГДР-лэн Москваысь посольствояз мыным кылъя экзамен ортчытӥзы, сыӵе ик – Берлинын. Озьы ик шеди. Отын этнографияя лекциос но лыдӟи.

- Удмуртъёс сярысь?

- Ӧй, удмуртъёсын сокем ик тунсыкъяськисез ӧй вал отын. Но, Инмаре-Кылчинэ, мар гинэ мон лыдӟоно ӧй луы немец студентъёслы, кыӵе гинэ консультациос ӧй сётъя! Австралиецъёс сярысь, гурезьёсын улӥсь вьетнамецъёс сярысь, Кавказысь кылъёс сярысь, чиганъёс сярысь… Нялтас вераса, берло темая лекциме мон англи кылын лыдӟи. Немец эшъёс паймо вал: кытысь, пе, тӥляд сокем пӧртэм удысъёсъя тодон-валанъёсты? Мон пумитазы данъяськыса шуисько:

- Мон йылпумъяй тужгес но кужмо советской вузэз. Со милям Сорбоннамы но, Оксфордмы но, Кембриджмы но луоз, дыр.

- Озьы ке но паймыто тӥляд сокем паськыт тодон-валанъёсты. Тани со чиганъёс ик кызьы син шорады йӧтӥзы?

- Меӵак вераса, малпамтэ шорысь. 1970-тӥ арын Парижын люкаськыны кулэ вал чиганъёслэн конгрессы. Асьме учёнойёслэн возьматэмзы потӥз, Совето Союзын но чиганъёслэн ужпумъёсынызы выро шуыса. Соин ик «Вопросы истории» журналын соос сярысь статья поттыны малпазы. Нош чиганъёсъя одӥг специалист но ӧз шедьы. Редакция вазиськиз милям кафедраямы, мон соку аспирант вал. Статья гожтыны малы ке но монэ куризы. Ярам, шуисько, гожто, но со понна тӥ поттоды мынэсьтым удмуртъёс сярысь статьяме, иське. Ну-у, - нёжтыса лэзе журналлэн кивалтӥсез. А мар, пӧй, сокемез удмуртъёслэн, огшоры калык, шаерысь шаере уг костаськы, уг лушкаськы. Я, кылмы тупаз. Мон гижысь-пиньысь басьтӥськи уж борды. Кык толэзь ӵоже пуки библиотекаосын, немец, англи, славян кылъёсысь ужъёсты ачим берыктылӥ, испан но француз кылъёсын тодмоосы юрттӥзы. Статьяе понна гонорар басьтыны лыктӥ но монэ, кыӵе ке адӟылымтэ изьверез выллем, кабинетысь кабинетэ нуллӥзы: тани, пе, та адями чиганъёс сярысь сыӵе ужез вормиз. Нош геройёсы, чиганъёс, редакцие, эсьмаса, телефонъёс ӟырдамон жингыръяллям: малы, пе, сыӵе пичи тиражды, ватсаса поттэ на, кин, пе, авторды, кытысь со чиган? Соос сярысь нокин но озьы гожтыса, санэ басьтыса ӧвӧл на гожъям. Зэм но, асьме литератураын чиганъёс котьку но вал выжытэм калык, лушкаськисьёс, шырмачъёс яке ресторанын шудӥсьёс-кырӟасьёс. Статьяе потэм бере мыным чиганъёслэсь уно гожтэтъёс вуизы.

- Котьма ке но, удмурт этнография но чиганъёс ог-огзылэсь туж кыдёкын ук. Кызьы луэ меда кык толэзь куспын сыӵе выль удысэз бугыртыны?

- Выльысь верасько на: мон йылпумъяй МГУ-эз. Отын тодон-валанъёслы инъет туж мур сёто вал, наукаын ужаны отын йӧскадь дышетӥзы. Мон пумтэм тау карисько университетлы, дышетӥсьёслы (соос пӧлын тросэз быдэс дуннелы тодмо специалистъёс) мыным ӟеч визьнод сётэмзы понна. Мон соослэсь тодон-валанъёссэс пунэмен басьтӥ, табере со пунэмен тыронме студентъёсылы тырмыт берыктыны тыршисько. Оло, куке но шуозы: УдГУ-ын милемлы этнографилы ӟеч, зэмос сямен дышетӥзы. Мон понна со самой вылӥ дунъет луоз.

- Туала студентъёс пумысен. Кыӵе дунъет тӥ сётысалды соослы? Кызьы наукае кыстӥсько?

- Ма, ваньзэсты одӥг мертэтэн уд мерта, котькыӵеез вань. Кыӵе улонмы – сыӵе ик адямиосмы но. Но оглом вераса, визьмо, вылӥ культураен егитъёс но шедё. Милям ужпуммы – соослэсь кужымзэс шонер ӧретӥ ӧръяны, малпаськыны дышетыны. Наука пумысен ке верано, чаклалэ асьтэос: милям кафедраысьтымы наукаосъя 10 кандидатъёс потӥзы ни, 15 аспирантъёс али диссертациос гожто. Соос пӧлысь тросэз - удмуртъёс. Етӥз, сюлмо егитъёс будо, соиз шумпоттэ.

- Дышетон уж тӥлесьтыд уг-а возъя наукаез?

- Ма, кык пукон вылын пукиськод ке, люкетэ ик, дыр. Нош улондэ малпаськыса радъяськод ке, кулэтэм чыры-пырыослы дырдэ уд ке быдтӥськы, маиз ке но соиз пӧрме кадь. Мынам 200 пала научной публикациосы. Кӧняез ке поттэмын немец, финн, венгер, эстон, коми, пор но англи кылъёсын. Мынам ужъёсы вань Бадӟым Советской но Исторической энциклопедиосын. Ушъяськемен эн лыдъялэ, но мон куддыръя кылбур нерге но гожъясько, пыртэмын Писательёслэн огазеяськоназы. 1995-тӥ арын Будапештын авторской ӝытме ортчытӥзы. Потӥзы ини кылбуръёсын куинь книгаосы.

- Удмурт кылын?

- Мон гожъяй соосты кык кылын: удмурт но ӟуч. Кык кылын, кык бурдэн кадь, кыдёкегес лобыны луэ.

- Нялтас юаме потэ: тӥ кыӵе кылын малпаськиськоды?

- Ку кызьы. Кыӵе кылын вераськисько, соин ик малпаськисько кадь. Но анай кыл, веранэз ӧвӧл, нырысетӥ интыын. Москваысен мон шудтэм учыре шедьылӥ, дас нунал ӵоже йырсазьтэк кылли. Йырсазям пыри но нырысетӥ кылъёсы вал удмурт кылъёс, собере – ӟуч, отӥяз англи но мукетъёсыз. Кызьы мон тодӥ со кылъёсты, озьы ик тодам лыктӥзы.

- Тӥледды тодӥсь адямиослэн верамзыя, тӥ туж трос экспедициосы вуылэмын, озьы-а?

- Зэм, соиз озьы. Кытын удмуртъёс огазьын уло, мон ваньмыз доры вуылӥ: Татарие но, Башкирие но, Сибире но, Свердловск областе но. Со сяна, мон ветлӥ экспедициосы Шор Азие, Закавказьее, Германие.

- Нош таиз малы кулэ луиз удмурт этнографлы?

- Зэмос этнограф ас нырулзэ гинэ тодыны кулэ ӧвӧл, со мед быгатоз ӵошатыны ас калыксэ мукетъёсыныз. Сыӵе огшоры гинэ валэктон.

- Тӥ кунгож сьӧры но экспедициен-а нырысьсэ потӥды?

- Ӧй, кырӟась луыса.

- Кыӵе кырӟась?! Серекъяськоды, луоз?

- Шапыклы но уг. Мон верай ук ини, огдыре кырӟась луон сярысь малпаськылӥ шуыса. Москваысен мон ветлыны кутски университетлэн культура дворецаз, кырӟанъя классэ. Монэ дышетӥз ас вакытаз синмаськымон оперной кырӟась Анна Андреевна Матова, странаысь котькинлэсь устоез Аида шуо вал сое.

- Неужто тӥ операосын кырӟады?

- Ӧй, ариос понна мынам куарае лябгес вал. Кырӟай ӟуч романсъёсты. Урод уг пӧрмы вылэм, вылды, монэ Мосгорэстрадаын ужасьлы кадь, сцена вылэ одӥг пол потам понна 14 манет тыро вал бере. Чаклалэ, стипендия 30 манет ке вал, 14 манет трос-а, ӧжыт-а студент понна. Мон кырӟалляй Искусствоын ужасьёслэн центральной юртазы, Колонной залын, одӥг концертын ӵош кырӟамы Майя Кристалинскаяен, Алла Иошпе, Стахан Рахимовен но мукет тодмо аристъёсын. Озьы мон нырысьсэ потӥ кунгож сьӧры кырӟась луыса, комсомоллэн ЦК-езлэн делегациеныз. Ветлӥмы ГДР-е, вуылӥмы Балтийской зарезь дурысь пӧртэм городъёсы.

- Али но кырӟалляськоды на-а? Ас поннады ке но?

- Уг ни, куарае азьвыл кадь ӧвӧл ни.

- Нош маингес выриськоды ваньмон дыръяды?

- Нырысь ик, конечно, книгаос. Лыдӟиськонтэк улонме ик малпаны уг быгатӥськы. Яратӥсько ӟуч романсъёсты кылзыны, инкуазе потаны. Ну и, собере, футбол.

- Футбол? Ноку но ӧй малпасал.

- Футболэз мон уй но, нунал но учкыны дась. Жаляса верано луэ, асьме футболистъёс, Удмуртиысь но, Россиысь но, туж шер шумпотто милемды, болельщикъёсты.

- Тӥляд вань-а яратоно писательды?

- Томас Манн, немец.

- Секыт сое лыдӟыны…

- Кинлы кызьы. Немец кылын секытгес йӧтэ. Мыным кельше солэн философской инъетэз.

- Тӥ наукаосъя доктор, профессор, кылбурчи, ньыль кылын вераськиськоды, тодон-валанъёстыя – зэмос энциклопедист. Вань на, дыр, мукет «сьӧлыкъёсты», кудзэ мон уг тодӥськы. Сыӵе адямилы нокинлы, дыр, вожъяськыны но, нокинлэсь адӟем карыны. Тӥ понна асьтэлэн дунъетты котьмалэсь вылӥын луыны кулэ, озьы-а? Мукет сямен вераса, тӥледлы нокинлы «вӧсяськыны»?

- Я, тӥ монэ воксё Быдӟым Инмарез кадь суредады. Озьы мон эриктэк вылтӥяськыны кутскысал, дыр, но арлыдэ уз сёты. Мон понна вань улытозям гажано, адӟем карымон адями – дышетӥсе, МГУ-ысь этнографияя кафедралэн кивалтӥсез, профессор Сергей Александрович Токарев. Чылкыт сюлэмо, паймымон визьмо воргорон. Сое быдэс дуннеын тодо.

Анае, Анастасия Алексеевна, мон понна но, агай-вынъёсы понна но - самой дуно, яратоно но гажано адями. Кӧня мон улӥсько дунне вылын, котькуд вамышме солэн синъёсыныз дунъяны тыршисько: мар меда шуысал анае, кызьы учкысал соиз яке таиз уже шоры. Визь-кенеш, юрттэт али но курисько. Милемын солы капчи ӧз йӧты, огназ будэтӥз. Атаймы кулыку, Женя, бадӟымез, кыкетӥ классын дышетске вал, нош покчиезлы, Борислы, одӥг толэзь гинэ. Кызьы уд йыбыртты сыӵе анайлы? Милемды со ваньместы калык радэ поттӥз, дышетӥз.

- Кин луизы тӥляд агай-вынъёсты?

- Женя агаймы, Казаньысь финансово-экономической институтэз йылпумъяса, со городэ ик кылиз. Ужаз сюрес лэсьтон удысын, басьтӥз «Татарстан Элькунысь дано финансист» ним. Али пенсиын. Слава, мон бӧрсьыез, школаез зарни медален йылпумъяса, али вылӥ категориен врач, тропической висёнъёсъя специалист, улэ но ужа Москваын. Нялтас вераса, ньыль ар ӵоже Нигериын госпитален кивалтӥз, вуылӥз Японие, Вьетнаме, одӥг пол, паймытыса, Святой Маврикий шормуӵысь жингыртӥз. Покчиез, Борис, - полковник, юридической наукаосъя кандидат, Россия Федерациысь но Удмурт Элькунысь дано юрист, тырше асьме Кун Кенешлэн Аппаратаз.

Тӥни сыӵе семьямы.

- Зол команда, номыр уд шуы. Семья сярысь кылпум потӥз бере, кузпалды сярысь но юам потэ. Татьянаез мон умой тодӥсько, одӥг гуртын быдэсмим бере. (Лыдӟисьёсмылы ивортӥсько: со кылтодон наукаосъя доктор, ужа Историяя, кылъя но литературая инстутын, сэрттэ-пертче фольклорен герӟаськем ужпумъёсты.) Нош кызьы тӥ соин огазеяськиды?

- Мон Таняез нырысьсэ адӟи, УдГУ-ын берпуметӥ курсын дышетскыкуз. Синйылтӥ, кызьы шуо, сыӵе дыръя. Собере со кошкиз Тартуэ, аспирантурае. Кусыпмес ӧм ыштылэ. Со Эстониысь бертӥз но, кузпалъяським.

- Секыт ӧвӧл-а кузпалэн-тодосчиен, укыр визьмо кышноен улыны. Милям университетын одӥг доцентмы, кузпалыз огшоры парикмахер но, шуоз вал: малы мыным визьмо кышно, мон ачим Сократ.

- Э-э, ми ведь одӥг гуын кык гондыръёс ӧвӧл. Ми визьмо адямиос ук. Но серекъятэк верано ке, тупаса, ог-огмес гажаса улӥськом, ӝожтӥськыны сьӧлык луоз. Танялэн анай-атаеныз кусыпъёсмы туж ӟечесь. Софья Григорьевна - туж визьмо кышномурт, лякем визьмын уг улы. Григорий Карпович, азьвыл дано дышетӥсь но тодмо краевед, туж мыло-кыдо, чупырес адями, ми соосын котьку но быгатӥськом огъя кыл шедьтыны. Милям тупа улон-дунне шоры учкеммы. Ӵем ке но уг пӧрмы, шумпотыса бертасько Якшуре.

- Озьы ик мед луоз азьланяз но, Владимир Емельянович. Вераськонмес йылпумъяса, тани мар сярысь юам потэ на вал. Тӥ улон сюрес вылад бадӟымесь вормонъёс басьтӥды, меӵак вералом. Но ваньзэ-а, мае пусйиды, тӥ быдэстӥды? Ортчемзэ учкыса, номыр сярысь но-а уд жаляське?

- Ма, ваньзэ быдэстыны кинлы ке кылдэм-а? Одӥгзэ, кыксэ, дассэ пуктэм ужпумдэ быдэстӥськод но – вылез кылдэ. Пусъемзэ быдэстэмен буйгатскид ке, улон шӧг луоз. Улон дугдылытэк пӧзьыны кулэ. Нош ортчемез сярысь верано ке, мон номыр сярысь но уг жаляськы. Мар вал улонам, ваньмыз со мынам, люконтэм.

Источник:

Владыкин В. Е. Лэсьты ваньзэ, марлы кужымед тырме / В. Е. Владыкин ; записал Г. Коряков // Удмурт дунне. - 2002. - 12 апр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"