Владыкин Борис Емельянович

Учкисько адямилэн сюлэмаз

Борис Емельянович Владыкин – шаермылэн палэназ но тодмо, дано луэм вынъёс пӧлысь тужгес покчиез. Со – милициысь отставкае потэм полковник, Удмурт Республикаысь но Россия Федерациысь дано юрист, юридической наукаосъя кандидат, Удмурт Республикаысь Адямиослэн правооссыя оскем муртлэн аппаратэныз кивалтӥсь.

- Тӥ туж дано, визьмо Владыкин агай-вынъёс пӧлысь одӥгез. Кызьы анай-атайды будэтӥз, кытысь ваньдылэн сыӵе азинлыко луон мылкыдды?

- Атаймы туж вазь кулӥз. Анаймы милемыз огназ будэтӥз. Со туж визьмо вал. Текстиль промышленностья техникумез йылпумъямын, етӥн заводын ужамын. Туж мыло-кыдо адями, олокыӵе но ужрадъёсы вуылэмын, Ярын, Уваын, Кезын улэмын. Оло, соин но дунне шоры учконэз паськыт вал. Со котьку малпалляз: дышетскем адями гинэ быгатоз улонын азинлыко луыны. Вань ужез котьку но ӵош лэсьтӥмы. Женя но Володя агайёсы пу пильыло, нош ми Славикен узы-борылы ветлӥськомы, ӵӧж-ӟазегъёсты эскериськомы.

Ваньмы ик ӟеч дышетским. Женя Казаньын тодон-валан люказ, экономист луиз. Володя – тодосчи-этнограф. Славик али Москваын улэ, со врач. Нош мон – юрист. Анаймы 1999-тӥ арозь улӥз, диссертациме утён азьын улонысь кошкиз. Одӥг пол Володя агае шуиз: пичи сиротаос сяна, вань, пе, бадӟым сиротаос но. Туж зол верамын. Озьы ми асьмеды бадӟым сиротаосын шӧдӥм кадь.

- Тӥ, агай-вынъёс, ог-огды борды зол кырмиськиськоды, ог-огдылэсь адӟем кариськоды вал, дыр. Но котькудды чылкак пӧртэм удысъёстӥ кошкиды. Тани тӥляд ик юрист луон мылкыдды кытысь?

- Следовательлэн ужез кельше вал. Но со сюресэз быръён азям кема малпаськи. Мылкыды вал Москваысь Тимирязев нимо гурт хозяйствоя академиын но дышетскыны. Музъемез, пӧйшуръёсты али но яратӥсько. Пермь университетысь кунсьӧр кылъёсъя факультетэ но дышетскыны пырай. Отын тодон-валан люкакум, малпасько вал: кунгож сьӧры вуыло, кылысь кылэ берыктӥсь луо. Но пумен валай: школаын дышетӥсьын гинэ ужано луоз. Мынам соин гинэ буйгатскеме ӧз поты, экзаменъёсме дырызлэсь вазь сётыса, выжи юристъёсты дасясь факультетэ. Правоведение пала кыстӥськонлы мылкыд сётӥз, дыр, школаын ӵош дышетскем эшелэн анаез, бускель коркан улӥсь Катяпай. Со адвокат вал. Катяпай сётъяз следовательлэн уженыз герӟаськем литератураез. Со мыным туж тунсыко потылӥз.

- Агайёсты мылкыддэс кызьы ке воштыны ӧз тырше-а?

- Ӧз. Мынам потӥз адямиослы юрттэме. Адӟисько вал, кызьы соос асьсэ правооссэс утьыны шугъясько. Следовательлэн ужез эмъясьлэн выллем. Со обществоысь шекъёсты, кырсьсэ шарая но палэнтыны, эмъяны тырше.

Пермь университетэз йылпумъяме бере ужаны ыстӥзы Иже. Татысь Ленин ёросын ОВД-ын ужай. Тубат бӧрсьы тубат: следователь луыса следственной отделенилэн кивалтӥсез луи. Собере дышетскыны пыри СССР-ысь МВД-лэн академияз, Москвае. Куинь ар ортчыса, Ижысь Ленин ёросысь ОВД-лэн кивалтӥсезлэн воштӥсез луи, собере – Удмуртиысь Югдурез утён министерствоысь следственной управлениен кивалтӥ.

Дышетон уж котыре кыстӥськонэ но котьку вал. Соин ик егитъёслы тодон-валанме сётон вылысь кошки милицилэн школаяз. Татын юридической дисциплинаосъя кафедралэн кивалтӥсез дорозь вуи но дас ар талэсь азьло пенсие потӥ.

- Куд-огез пенсие потэмез бере гур вылысь уг ни васька, нош тӥ ас вылады, оло, эшшо бадӟымгес ныпъет ошиды.

- Ма, Кун Кенеше ужаны ӧтизы. Тодон-валамелы кулэясько бере, пумит луод шат? Нырысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссиын референт вал. Федеральной законъёсы оглом 100-лэсь трос ватсанъёс, тупатонъёс дасяй. Али кивалтӥсько Адямилэн правоосызъя оскем муртлэн аппаратэныз. Пусйыны кулэ, таӵе оскем муртлэн ужез Россиын выль ай. Дас ар талэсь азьло гинэ закон кутэмын. Нош куд-ог кунъёсын со вазен ужа ни. Кин со – Адямилэн правоосызъя оскем мурт? Калыкез утись. Нырысьсэ сыӵе ужасьёс кылдӥзы 1809-тӥ арын Швециын. Али та правоосъя оскем муртъёс пӧртэм удысъёслы люкиськыса ужало ни. Нош асьмелэн республикаямы оскем мурт кык ар ӵоже гинэ ужа ай бере, калык со сярысь рос-прос уг тоды на. Озьы ке но ортчем ар ӵоже 1 сюрс 422 адямилы юрттыны быгатӥм. Коллективмы пичи ке но, ужасьёсмы туж валаса быръемын. Пӧламы вань бадӟым опытэн адямиос но, егитъёс но. Ваньзэ тодыны уг луы, соин ик котькуд ужасьмылэн аслаз удысэз. Нош дорамы вазиськисьёсты чакласьком ини кин доры ыстыны.

- Укыр трос вазиськисьёсты луиз ке, Адямилэн правоосызъя оскем муртлэн аппаратэз ваньзэ вормоз-а?

- Али вуттӥськиськом ай. Оскем мурт – Михаил Кокорин – котькуд ужез ачиз но учке. Кун Кенеш азе дэмланэн потыны чакласьком: интыосын оскем муртлы общественной юрттӥсь кутыны мед лэзёзы. Пенсие кошкем юристъёс ӧжыт ӧвӧл ук. Куд-огез гуртоосызлы коньдонтэк но юрттыны дась. Кызьы шонер гожтоно вазиськонэз, кыӵе документъёс кулэ, созэ я тазэ ужпумез сэрттыку. Сыӵе юрттӥськисьёс оскем муртэз доразы но ӧтьыны быгатозы. Та выллем опытмы Красногорье, Шаркан ёросъёсын вань ни. Ми туж умой валаськомы: кабинетъёсын пукыса гинэ ужпумъёсты уд сэртты.

- Югдурез утён удысын туж кема ужады. Соку-а, али-а капчигес кадь потэ?

- Азьвыл аръёсы калыкез зол кутӥз партия. Профсоюзъёс но кужмоесь вал. Соостэк адямиез ужысь уд улля. Ма, социализм вакытэ улыны дышимы ни вал. Калык оскиз: улон эшшо ӟечгес луоз. Со дырысь кырӟанэз тодады вае ай: «Не надо печалиться, вся жизнь впереди…» Нош улон тӥни кызьы берытскиз. Мыным туж жаль пото война вакытэ вордӥськемъёс. Ми шуиськом: «ышем поколение». Кыӵе гинэ курадӟон пыр потоно ӧз луэ соос, ортчемезлэн ныпъетэз секыт зӥбе пельпумъёссэс. Лыктэ песяй тон доры приёме, маде шуге-леке шедемзэ. Тон сое кылзӥськод, валэктӥськод – адями буйга.

- Озьыен, тӥляд ужды психологлэн выллем но луэ.

- Озьы. Гуртъёсы потаку, мӧйыос кытӥяз шугъясько асьсэ ужпумзэс ӟуч кылын валэктыны. Соку мон кылысь кылэ берыктӥсь луисько. Удмурт сямен вазисько: «Я, кенаке, мар тонэ сюлмаськытэ?» Адямилэн тусыз ик воштӥське, мылкыдыз бурдъяське, удмурт кылын ваньзэ тупен-тупен маде ни. Луэ озьы но: адямилэсь куронзэ законъя ми быдэстыны ум быгатӥське. Мар карод, кытӥяз сокем умой ке но ӧвӧл: закон – со закон.

Ялан тодам вайисько следовательын ужамме. Адямиос туж пӧртэмесь луо: кин ке юн сямо, кин ке ляб лулсэро. Шуом, следствие кык толэзь ӵоже мынэ ни, янгыше уськытэм адями туж сюлмаське. Оло, со рос-прос валатэк йыруж лэсьтӥз. Оло, улонын озьы луиз, нош ачиз – туж лякыт, семьязэ яратӥсь, ужась. Тюрьмае шедёнэз пумысен куректэ.

Следовательлэн ужез весъёсын мертасьлэн выллем: кинлэн янгышез золгес? Нош йыруж лэсьтӥсьёс пӧлысьтызы «лябзэгес» эшсэс юромо сьӧдмало ке? Ӵемысь малпаськод: пытсэт сьӧрын пукемез бере та адями ӟеч кыльыны быгатоз на-а? Кызьы сое шонер сюрес вылэ берыктоно?

Но вань туж кышкыт адямиос но. Сыӵеос ӵемысь нырысетӥ йыружзэс лэсьтӥзы ни быдэ вуымтэ дыръязы ик. Собере кӧня ке пол пукылӥзы пытсэт сьӧрын. Тодам лыкто следовательын соку гинэ ужаны кутскем аръёсы. Мон – егит, асме возьматэме потэ. Азям туж кышкыт рецидивист пуке, солы лек юанъёс сётъясько.

- Кызьы сыӵе секыт йыруж лэсьтыны киыд пыриз? – сизьдӥсько.

Нош со ганяк гинэ вазе:

- Да-а, паськыт вамышъяскод, пельпумысен ик коралтӥськод. Кыдёке мынод… - собере шорам мыр-мыр учкыса ватсаз: - Зэм, кырыж-мерыж улонэ, но со мынам аслам, валаськод-а, аслам улонэ. Нош тон эскеры, малпаськы табере…

Со учыр бере мынам вань дунне валанэ берытскиз. Мон котькуд йыртэмась шоры учкыкум малпасько: со но адями, озьыен, соин но адямиен кадь вераськоно. Йыружез рос-прос валаса эскерем бере тынад но, йыртэмасьлэн но мылкыдыз буйгатске. Тон шӧдӥськод: ваньзэ шонер лэсьтӥд. Йыртэмась вала: аслаз йыружез понна кыл кутэ, мултэссэ со вылэ ӧз оше.

- Следователь луыса 15 ар ӵоже тыршиды. Кыӵе ке ужды понна возьыт луон учыръёсты вань-а? Йырвандӥсьёс пӧлын тӥледыз кышкатъясьёс сюрылӥзы-а?

- Кизилиосъя мон Весъёс. Оло, соин но котькуд чыры-пырыез мертасько, сизьым пол эскерисько, собере гинэ гожтӥсько. Йылаз-пумаз вуттымтэ одӥг ужез но судэ ӧй келялля. Валантэм интызэ нимаз висъясько но эшшо эскерыны курисько. Соин ик трос дыр ортчем бере но одӥг уже понна но возьыт ӧвӧл. Йыртэмасьёсын мон ӧй «шудылы». Судъялоз суд, нош тон вань ужез эскериськод. Кышкатъяло ӵемысь йыртэмасьёсын «шудыны» кутскемъёсты. Суд кызьы шуэ? Всё, та адямилэн номыр ӟечез ӧвӧл ни. Куд-ог следовательёс шуо на: «Мар тыныд, ойдо таоссэ но йыружъёсты со адями вылэ ик гожтом». Но мон ноку сыӵе вамыш ӧй лэсьтылы. Зэмос йыртэмасьёс эрикын луозы-а? Кытӥяз югдурез шонер валаны туж секыт.

Азьвыл нылкышноос пытсэт сьӧры келяло вал картъёссэс. Воргорон кузпалзэ «куинь пол тэшкыльтэ» но, соиз, жуге шуыса, судэ вазиське. Пиосмуртэ пукто. Нош воргорон квартираын куать толэзь ӵоже уг ни улы ке, кышномурт, нокинлэсь юатэк-маратэк, сое отысь выписать каре, аслыз мукет туган шедьтэ. Озьы трос воргоронъёс улон интытэк кыльылӥзы. Пытсэт сьӧры одӥг пол шедьыса, мукетъят но умойтэм сюрес вылэ султылӥзы. Ярам, али та закон воштэмын ни. Мукет ласянь, нылкышноез но валано: егит, чебер, нош кузпалыз юэ, нылпиоссэ рос-прос уг учкы. Ялан-а со вӧзын курадӟод? Нылкышно синмаськиз мукет воргоронлы – оскымон, йӧно…

- Али тросэз уг оско судъёслы но, Прокуратуралы но.

- Ми шуиськомы: «правовой нигилизм». Но нуналмысь уж возьматэ: адями кулэ органъёсы шонер вазиське ке, секыт югдурысь но ӵемысь потыны быгатэ. Но асьмеос кытӥяз ум тодӥське, кызьы шонер гожтоно вазиськонэз, кытчы мыноно. Дунтэк юрттэт сётӥсь юристъёсмы но туж ӧжыт. Адямилэн вазиськонэз шонер гожтэмын ӧвӧл ке, сое лыдӟись ваньзэ рос-прос уз вала, юрттэт но сётэмез уз луы. Нош адямилэн правоосызъя оскем мурт доры лыктэмъёсты ми ваньзэ умой-умой, дыртытэк кылзӥськом. Кытчы вазиськоно? Вань тубатъёсты тодӥськом. Специалистъёсмы ужамын Прокуратураын, МВД-ын, адвокатъёсмы но вань. Улон ог интыяз уг сылы. Соин ик тодон-валанмес будэтон бордын но ялан тыршиськом.

- Мар ватонэз, асьсэ правооссэс ӵемысь уг тодо гуртоос. Та югдурез тупатон понна тӥляд кыӵе ке программады но вань шуыса кылӥськиз.

- Зэм, Удмуртиысь улӥсьёслэсь правооссэс тодонлы сӥзем программалэн проектэз дась ни. Но Кун Кенешын сое ӧз кутэ, укыр трос коньдон кулэ. Та программаын чакламын вал уже кыскыны пӧртэм министерствоосты но ведомствоосты. Юристъёсты дасясь вань вузъёс но колледжъёс бордын юристъёслэсь клиниказэс усьтыны. Отын егит специалистъёс, вуоно юристъёс вань мылкыд карисьёслы дунтэк консультациос сётысалзы. Сыӵе клиникаос вань ини Свердловск областьын.

- Кылзӥсько мон тӥледыз но буйгасьтэм мылкыддылы паймисько. Озьы ке но, пичияк ӵабышто ик, малы наукае сыӵе бер вуиды?

- Егит дыръям уже туж кысык вал, дыры ӧз тырмылы. Нош Москваын тодон-валан люкаку, монэ туж визьмо адямиос дышетӥзы: академик Кудрявцев, Бородин… Ӵапак соос ик мылкыд сётӥзы наука борды басьтӥськыны. Куать ар талэсь азьло быдэстӥ адямилэсь правооссэ утён амалъёслы сӥзем диссертациме.

- Шӧдӥське, уждэс тӥ яратӥськоды. Нош семьядылы сюлэм шунытты тырме на-а? Следовательын ужакуды тӥледын йырин уг керӟегъясько вал-а?

- Кышное, Татьяна Петровна, дышетӥсь. Но ужа «Ижсталь» заводын кадръёсъя службаын. Нылы туж чебер – пинь эмъясь врач, улэ Якутиын (картэз отысь). Вань куинь аресъем внучкае. Ужелы соос кемалась дышизы ини.

- Егит дыръяды инкуазез, пӧйшуръёсты туж яратӥськоды вал, шуиды. Аръёс ортчемъя сюлэмды ӧз чурытомы-а? Вождэс эн вае, но тулыс вуэмез кин кызьы шӧдэ, шуо, кин ке – кечсин сяськаосъя, кин ке жуг-жагъя, кин ке… лымы улысь потэм бырем муртъёсъя…

- Инкуазез яратонэ ноку ӧз бездылы. Зэм, егит дыръя туж трос дырез басьтылӥз уж. Кытчы но потано, мае но адӟоно ӧз луы. Нюлэскын адямилэн шӧйыз шедьтэмын. Тон ӝог-ӝог гинэ, блокноттэ пыдес вылад поныса вань адӟемдэ, эскеремдэ гожъяськод. Соку нюлэслэн чеберез сярысь малпанъёс йырын уг ни бергало… Инкузь – со паймымон маке. Туж-туж яратӥсько пӧйшуръёсты. Яратӥсько музъемез. Яратэмме буйгатӥсько сад-бакчаям.

- Адямилэн йыраз пӧртэм малпанъёс бергало. Я соиз, я таиз нырысь интые потэ. Та ласянь мар тӥледлы берло дыре азьлань валтэ?

- Мултэс бадӟым кылъёс вератэк… асме удмурт адямиен шӧдон. Удмурт адями кӧберасьгес, соин но солы юрттэме потэ. Дас ар ӵоже пенсиын лыдъяськисько ни ук, шутэтскыны но луэ вал. Но вань сыӵе ужъёс – отын мон туж кулэ луисько на.

Шаерамы ваньмыз-ваньмыз асьме калыкен лэсьтэмын: Балезино сюресэз кыӵе курадӟыса ӝутӥзы, заводъёсын, бусыосын тыршизы… Выльдӥськон вакыт бере огшоры калык троссэ ыштӥз. Удмурт калыке тужгес но ненег, вӧсь луись. Секыт югдуре шедьыкуз, шонер сюрес шедьтыны шугъяське. Тӥни со ласянь юрттэме, тодон-валан сётэме потэ.

Источник:

Владыкин Б. Е. Учкисько адямилэн сюлэмаз / Б. Е. Владыкин ; записала Е. Миннигараева // Удмурт дунне. - 2007. - 26 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"