Алашеев Владимир Евсеевич

Улонэз - "чагыр экран"

В. Е. Алашеев

Вордскемын: 1951-тӥ арын 5-тӥ декабре.

Ужа: «Удмуртия» ГТРК-лэн телевидениея директорез луыса.

Семьяез: кузпалыз, кык пиосыз.

Кизилиез: Ыбылӥськись (Стрелец).

Яратоно сиёнэз: зыретэн табань.

Оске: аслыз ачиз.

- Владимир Евсеевич, телевизорез нырысьсэ адӟемдэс тодӥськоды на-а?

- Соку мон куинетӥ классын дышетскисько вал. Алнаш ёросысь Кучыран школаын телевизор басьтӥллям. Ӵужае доры тол каникулъёс дыръя куное вуылыса, нырысьсэ адӟи. Сыӵе ик кино, сьӧдэн тӧдьыен, но экранэз пичи, матэ пуксьыса учконо. Нош асьмеос кызьы дышемын вал? Бадӟым бӧз ошо но, шумпотыса адӟиськом.

Будэммыя мукет гуртъёсы но телевизоръёс басьяны кутскизы. Ӝытъёсы программаын мар ке тунсыкоез вань ке, толэзяз одӥг пол, кык пол ке но учкыны Карйылэ ветлылӥм.

- Ку гожъяськыны кутскиды?

- Витетӥ классысен кутски. Ужъёсы печатласькизы «Алнаш колхозник», «Советской Удмуртия», «Комсомолец Удмуртии» газетъёсын. Кызьы гожъяськыны кутски? Атаелэсь адӟем кари, дыр. Со мынам селькор вал. Доре газетъёс вае но, мон учкисько, лыдӟисько. Нош отын куатетӥ-сизьыметӥ классъёсысь нылпиослэн ужъёссы ӵем печатласькизы. Пиналъёс гожъязы асьсэ дышетскемзы, улэмзы, тунсыко учыръёс сярысь. Соослэсь но адӟем кари.

1972-тӥ арын гужем «Советской Удмуртия» газетэ лыктӥ, нош сӥзьылаз – Ижевскысь пединститутлэн удмурт отделенияз дышетскыны пыри. Со аре ик университет каризы. Котькуд гужем «Советской Удмуртия» газетын ужасько вал, дышетсконме йылпумъяса, отчы ик кыли. Ӧтё вал радиое но, угось кыкетӥ курсын дышетскыкум, толэзь пала отын диктор луыса ужай, Пимен Касаткинэз воштылӥ. Тодмо диктормылы соку операция лэсьтӥзы. Интыяз, вить-куать студентъёсты эскеремзы бере, монэ бырйизы.

- Нош телевидение кызьы сюриды?

- Нырысьсэ шеди армиысь бертэме бере, газетын ужакум. Алнашысь призывникъёс сярысь гожтоно кариськи, ог дасо пала фотография ваи. Но газетэ одӥгез туспуктэм гинэ печатласькиз. Мукетъёссэ телевидение лэзи. Отын соку егитъёслы сӥзем передачаосты Саша Титов дася вал. Гожтэтме басьтыса, мыным жингыртӥз. Тодматским. Лыкты, пе, учком. Тӥни озьы нырысьсэ тодматски Пушкинской ульчаысь телевидениен. Со вал 1972-тӥ арын. Титов монэ меӵак эфире поттӥз. Фотографиосты возьматӥсько но мар отын возьматэмын верасько, кыӵе ужрад мынэ, кызьы пиос армилы дасясько. Газетын нырысь корреспондент луыса ужай, собере – спецкор, бӧрысь гурт удысъя отделлэн кивалтӥсез вал.

1989-тӥ арысен ужай партилэн обкомаз инструктор луыса. Ӝоген партиез ворсазы. Кытчы ке интыяськоно вал. «Советской Удмуртия» газетлэн редакциез дорозь кыдёкын. Нош улон интые телевидение вӧзын ик. Отчы монэ ӵемысь ӧтчаллязы. Шуом, иворъёсты лыдӟыны, республикаысьтымы гурт ужъёсъя ужпумъёс сярысь вераськыны.

Телевидениын но нырысь корреспондент луыса ужай, Гера Грязевен ӵош «Улон-вылон» передача кылдытӥм. Вуылӥмы шаерысьтымы вань гуртъёсы, ог 500 пала передача лэсьтӥмы. Кӧня ке дыр ӵоже иворъёсъя отделэн кивалтӥ, берло куинетӥ арзэ ини «Удмуртия» ГТРК-лэн телевидениея директорез.

- Улонын адями котьку но быръёно луэ. Вамыш лэсьтон азяды кема-а малпаськиськоды?

- Матысь эшъёсын кенешисько. Кин кызьы малпа соиз яке таиз ужпум сярысь, кызьы умойгес луоз сое быдэстыны. Нырысь ачид малпаськиськод, собере эшъёсын вераськиськод.

- Пичи дыръяды кин луэмды потэ вал?

- Уг но тодӥськы ни. Ми вакытэ ялан кинлэсь ке адӟем карылӥм. Кин ке арганэн яке баянэн шудэ ке, со кадь луэм потэ, гожъяське ке, солы синмаськоно вал.

Кыӵе ке вакыт мылкыды вал дышетӥсь, журналист луыны. Тямысэтӥ классын дышетскыкум, сӥзьыл, мыным ӧтён гожтэт вуиз. «Комсомолец Удмуртии» газет 45 ар тырмонзэ пусъе. Ӧтёнын пусйиллям, сыӵе-сыӵе нуналэ возьмаськом шуыса. Мынам Алнашлэсь кыдёке потаме ӧй вал. Гуртын юасько: мар каром? Атае шуэ: мон но, пе, тямысэтӥ классысен Ижевске нырысьсэ вуылӥ. Али ке ӧд ветлы, собере ку мынод? Со ик сюрес но валэктӥз. Нуналлы быдэ Алнашысен Ижевскозь АН-2 кукурузник самолётъёс лобало вал. Самолётэ нырысьсэ пуксёно луи. Отысен мыным валэктӥзы, кыӵе автобусэ пуксёно, кызьы городлэн центраз лыктоно, васькем бере ог 25-30 метр кемын газетлэн юртэз, Пастухов ульча, 13. Шедьтӥ. Куинетӥ этаже туби. Отын «Комсомолец Удмуртии» интыяськемын. Газет кык кылын потылӥз. Удмуртаз «Дась лу!» бамез вал. Тӥни соин валче юнкоръёс пӧлысь монэ ӧтиллям.

«Дась лу!» бамен Григорий Симаков кивалтэ вал. Лыктэмелы туж шумпотӥз. Нырысьсэ адӟи туж егит Володя Романовез, Кезын дышетӥсь луыса ужась Олег Поскрёбышевез. Нош газетлэн редакторез соку Флор Иванович Васильев вал. Мыным бадӟым час кузьмазы. Со кузьым али но милям ӝажыямы синпель интыын сылэ.

- Владимир Евсеевич, тӥ бадӟым семьяын будӥды, дыр…

- Нылпиос ньыль кузя. Анае вань улонзэ колхозын ужаз. Атае – счетоводын. Мынам соосы али шуген ке но, бергало на гурт котырын. Семьяын нылпиос пӧлысь мон бадӟымез. Гужем колхозын ужаллям. Вить-куать часын ӵукна султӥськом но конной дворе дыртӥськом - валтэк медад кыльы. Кыӵе со егит пияш, куке ужаны валэз ӧвӧл? Соку ик малпалозы: та туннэ кема изем. Нош валэн ке ужаськод, ачид аслыд бадӟым адями кадь потӥськод ни. Колхозын трудодень тыро вал. Сое сӥзьыл лыдъяллязы. Ми котьку но кыкетӥ-куинетӥ интыын луылӥмы. Тужгес но трос трудодень басьто вал трактор вӧзын юрттӥськыса ужасьёс.

Сӥзьыл школаын «Зарни сӥзьыл» шулдыръяськон ужрад ортчылӥз. Вуж Утчан школаын куинь колхозысь нылпиос дышетскизы. Отын ужам вить-куать адямиослы, кинлэн трудоденез трос, кузьымъёс сёто вал. Ми понна со тужгес но бадӟым дунъет луылӥз. Кин тросгес трудодень басьтэ, кинэ дунъяло, соос дышетсконын но азьпал радъёсын мыныны тыршылӥзы.

- Ойдолэ выжом туала улон вылэ. Али паськыт вӧлмо вылӥ технологиос, туж дунъяське лэчыт визь. Таин валче шӧдӥськоды-а тӥ адями визен, телевизор учкисьёсын кузёяськиськоды шуыса?

- Адями визен ум кузёяськиське. Телевидение азьын сыӵе ужпум уг но сылы. Ми понна валтӥсь интыын - учкись доры дыраз ивор вуттон. Нош кызьы азьвыл вал яке ӵуказе луоз, учкись ачиз малпаськыны, дунъет сётыны кулэ ни. Соин ик кузёяськон шуон, мон сямен, шонер ӧвӧл. Адямилы дырыз дыръя ивор сётоно.

- Тӥ кивалтӥсь. Озьы ке но асьтэлэн но уг поты-а кыӵе ке передачаосын потамды?

- Аслэсьтыд кужымдэ, быгатэмдэ шӧдон понна экранэ потаны кулэ но, дыр. Но табере мӧйымисько ни. Чагыр экран азе егитъёс пото. Нош кунгож сьӧрез ке учконо, отын мӧйыгес адямиос дунъясько, учкись соослы оскегес. Милям но телевидениын азьланяз озьыгес ик луоз кадь, потэ.

- Гельмут Шмидт шуиз вал: «Политикъёслэн но журналистъёслэн одӥг кадь куректонзы: соос ӵемысь ӵуказеяз гинэ валало сое, ма сярысь туннэ вераськизы». Та кылъёсты ас вылады шӧдиськоды-а?

- Телевидение иворъёсты сётэ «туннэ» кылын. Таин со газетлэсь висъяське. Туннэ тазьы, туннэ озьы луиз. Куке мынэ «толон», соку со адямиослы тунсыко ӧвӧл ни. Улон туж дыртыса азьлань мынэ бере, тросэзлэн тодэмзы потэ, мар вал туннэ. Соин ик милемлы туннэ кыл понна улоно луэ ни. Озьы ке но авторской передачаосын дунъет сётыны кулэ туннэлы но, толонлы но, вуоно дырез адӟонлы но. Телевидениын адямиос ог-огенызы туж юн герӟаськемын. Одӥг журналист передачаез огназ лэсьтыны уз быгаты. Со вӧзын одно ик луыны кулэ оператор, режиссёр, кулэ дыръяз – монтажёр, звукорежиссёр, техникъёс… Котькуд передача бордын ог 20 пала адями ужа. Соин ик секыт. Дэмен ужез ӟечгес радъян бордын тыршоно луэ. Нош мукет сямен ке учконо, шуом, заводын ужа конвейер, отын одӥг кадь детальёс потто. Озьы ик телевидениын нуналлы быдэ передачаос мыно, но ваньзы соос пӧртэмесь. Передачаос ог-огзылы тупаны но кулэ ӧвӧл. Соин ик татын эшшо одӥг аспӧртэмлыкез вань на: телевидение аслэсьтыз учкисьсэ медаз ышты шуыса, передачаосты тунсыкогес кароно. Али трос телестудиос усьтӥсько ни. Асьме городын ик ог сизьым-тямыс. Мае адямиос учкозы, кыӵе каналэз быръёзы, сюлмазы мар тужгес но кельшоз? Со сярысь но малпаськоно луэ.

- Тӥляд телевидениды учкисьёссэ вуоно арын маин шумпоттоз?

- Шумпоттоз-а, куректытоз-а ни… Али милемыз Москва быдэс часлы дасэтӥ каналысь кулэстӥз. Ӝытазе 18 час 30 минутысен 21 часозь ужаськом ке вал, табере одӥг часмес басьтӥзы. Вуоно арысен но озьы ик луоз. Бадӟым передачаосын потаммы уз луы ни. Ужаломы 18 час 30 минутысен 20 часозь. Иворъёсъя, национальной, нылпиослы сӥзем передачаос луозы. Нош ӟуч кылын мынӥсь бадӟымъёсыз передачаос ышозы, дыр. Соос 34-тӥ каналэ выжозы. Таиз ласянь умоез со: али технической передатчикъёс пуктэмын ни Глазовын, Балезиноын, Воткинскын, Сарапулын, Кизнерын. Соин ик та ёросъёсысь гуртын улӥсьёс но 34-тӥ каналэз учкыны быгато. Азьвыл соослэн сыӵе луонлыксы ӧй вал.

- Берло дыре ӵем кылоно ӝожтӥськонъёсты: удмурт кылын телепередачаос, пе, ӧжыт. Малы сыӵе югдур кылдӥз? Маин со герӟаськемын? - Удмурт передачаосмы тырмыт шуыны, зэм но, уг луы. Но берло дыре кадръёсын секыт луиз. Алигес дорысьтымы Анатолий Борисов («Питран» передачаез нуэ вал – Е. М.) кошкиз. Мар секытэз? Удмурт перадачаосты лэсьтӥсьёс гуртысь потэмын. Соослы туж секыт квартира шедьтыны. Асьсэлэн улон интызы ӧвӧл бере, отӥ-татӥ ветлоно луо, трос коньдонзы кошке, улыны уг тырмы ни. Соин ик ми доры лыктэмъёс ужало, дышо но кошконо луо. Национальной передачаослэсь лыдзэс но данзэс ӝутыны мукетыз амал юрттоз, дыр. Удмурт передачаос мыныку, ӟуч кивалтӥсьёслэн ӵектэмзыя, куд-огаз ӟуч кылын субтитр гожъяськом. Ӟучъёс сыӵе вамышез ӟечен лыдъяло. Соку соос удмурт но, бигер но передачаослэсь пуштроссэс валалозы. Озьы бере, телевизорзы азьысь уз кошке.

Кунгож сьӧрез учконо ке, шуом, Финляндиез ик, отын Америкаысь ваем трос передачаосты, киноосты учко. Ваньмыз англи кылын ик мынэ, но улӥяз финн кылын субтитр лэсьтэмын. Малы со кулэ? Англи кылэз дышетӥсьёс киноез озьы но валало, эшшо асьсэ кылынызы лыдӟо на. Кунгож сьӧрысь вань кунъёс сыӵе амалъя ужало.

- Куд-ог адямиослэн телевидение шедьыны ӟырдыт мылкыдзы вань. Но, мынам тодэмея, куазь сярысь ивортылыны тупамон нылашез шедьтон понна гинэ тӥ 30 нылъёсты кылзӥды-эскериды…

- Телевиденилэн аслаз аспӧртэмлыкъёсыз. Вань сыӵе адями: улонын синмаськымон, нош экранын малы ке со чебер уг адӟиськы. Нош мукетыз сокем чебер но ӧвӧл кадь, нош экранын учкымон. Ӵапак тае ик возьматэ инкуазья ивортонэз лыдӟон понна ортчытэм берлоез ӵошатскон но. Куд-огез тулкымъяськыны кутске. Но передачаез нуон понна ужаны дышыны кулэ на. Вань сыӵеосы, экранлы дышо но «кизили висёнэн» курадӟыны ӧдъяло. Ваньмыз луыны кулэ. Сыӵеез-таӵеез ӧз луы ке, телевидение туж яркыт уз адӟиськы.

- Владимир Евсеевич, кунгож сьӧры ӵем-а потано луэ?

- Ужея гинэ командировкаосы потасько. Шуд усиз пӧртэм финн-угор калыкъёсын пумиськылыны. 1992-тӥ арысен «Финн-угор дунне» передача лэсьтыны кутским. Мон солэн валтӥсь редакторез вал. Соин ик толэзьлы быдэ кытчы ке вуылӥмы. Я, шуом, одӥгзэ передачаез татын гожтӥськом, мукетсэ – Мордовиын, собере мынӥськом Комие, бӧрысь – поръёс доры но Ханты-Мансийске. Карелие гинэ ӧй вуылы. Адӟи Эстониез но, Финляндиез но. Одӥг пол асьме туристической фирмаосын ӵош вуылӥ Кипре, отысен одӥг нуналлы – Израиле. Пӧртэм шаеръёсты адӟыса, вордӥськем музъемдэ мукет сямен дунъяны кутскиськод. Мурт дуннеын лымы ке но ӧвӧл, пӧртэм емышъёс будо ке но, асьме шаермы котьмалэсь дуно но мусо потэ.

- Уж ласянь малпанъёсмес палэнтыса, ойдолэ вераськом семьяды сярысь. Тӥляд кузпалды но, пиды но тодмо адямиос.

- Кузпалы Алевтина университетысь удмурт кылъя кафедраын ужа. Бадӟымез пие Геннадий университетысь романо-германской факультетэз йылпумъяз, Адам радиостанцилэн тулкымаз нуись луыса ужа, передачаос лэсьтэ. Пичиез пие Александр укмысэтӥ классын дышетске.

- Адями аслэсьтыз улонзэ ачиз лэсьтэ, яке инмарен мар сётэмын-а?

- Нырысь ик, адями ачиз лэсьтэ. Но солы инмар но юрттэ. Уж борды ачид ӧд ке кутскы, нокин но тыныд озьы, тазьы кар уз шуы. Пыжем нянь писпуын уг буды…

Источник:

Алашеев В. Е. Улонэз - чагыр экран / В. Е. Алашеев ; записала Е. Миннигараева // Удмурт дунне. - 2001. - 7 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"