Ямаева Надежда Петровна

From Воршуд
Jump to navigationJump to search

Верамелэсь азьло малпаськисько[edit]

Ямаева Страница 1.jpg

Надежда Ямаева – Дышетонъя но наукая министерствоысь анай кылъя секторысь валтӥсь специалист. 2012-тӥ арын нырысетӥ инты басьтӥз кун служащийёс куспын радъяськем элькун вожвылъяськонын. Пайме: кызьы луэ висъяны ужез но личной улонэз? Шуэ: ноку медаз луы война.

Пичиысен янгышанлэсь кышкан

– Пичи дыръям малпаськылӥ: пӧртмаськись бодые луысал ке, кыӵе курон со азе пуктысал? Тупаса улонлэсь вылӥе номыре пуктэме уг луы. Школаын дышетскыкум, нылпиослы патриотизм мылкыд пыӵатонлы туж бадӟым саклык висъяське вал. Мон понна бадӟым геройёс вал война вакытысь пионеръёс, комсомолецъёс, солдатъёс, кудъёсыз, улонзэс жалятэк, тушмонэн жугиськизы. Борис Полевойлэн «Повесть о настоящем человеке» книгаысьтыз героез Маресьев мон понна тужгес адӟем карымон вал. Со возьматэ: адямилэн улоназ тросэз ачиз бордысь потэ. Та книгаез мыным библиотекаын уг но сёто на вал, пичи ай шуыса. Анайме басьтыны курылӥ, – будэмзэ тодаз вае Надежда Петровна.

– Вордски Ува ёросысь Узей-Тукля гуртын. Семьямы туж лыдӟиськись. Пичи дыръям пӧртэм журналъёсмы оломар мында люкаськемын вал – кеносын соос радъёсын-радъёсын кыллизы. Отчы потыса, туж яратылӥ соос пӧлын бугыръяськыны. Книгаосмы но туж трос вал. Увае яке Ижевске потӥськом ке, одно кӧня ке книга басьтыса, бертӥськом вал. Удмурт писательёслэсь произведениоссэс нырысь ик ӟуч кылын лыдӟылӥ. Угось анае школаын удмурт кылэз дышетымтэ, соин ик со берыктэмъёссэ книгаосты басьтылӥз. Атайя табере чылк-чылк удмурт вераське ни.

Атае Пётр Николаевич тазалыкезъя группаын. Со дырозь совхозын тыршиз – механизатор вал. Анае Юлия Петровна озьы ик быдэс даурзэ совхоз ужлы сӥзиз – сиён пӧрась но, пудо сюдӥсь но вал.

Семьяямы 4 пинал будӥм – ваньмы нылъёс, мон бадӟымез. Соин но, вылды, анай-атае мыным корка котырысь но, мукет но ужъёсты оскылӥзы. Нош оско ке тыныд – кызьы сое уд быдэсты? Эшшо малпасько вал: мынам янгышаны правое ӧвӧл – соин ик котьмае рос-прос быдэстыны тыршылӥ. Пичи дыръям аслым нод-нод потӥсько вал. Дорамы шудыны лыктӥсь пиналъёслэсь но куд-ог дыръя акыляк потылӥ: туж яратылӥ ас кожам пӧртэм киужъёсын вырыны – вуриськыны, керттӥськыны, суредаськыны, макраме лэсьтыны, гравюра техникаен ужъёс быдэстыны, пул вылын сутыса суредъёс пуктылыны но трос мукет. Анай-атаймы вань тунсыкъяськонъёсмес лыдэ басьтыны тыршылӥзы, мылкыдмес пуромытылӥзы.

Школаын умой дышетски – 11-тӥ классэз йылпумъякум, физкультураен гинэ «4» потӥз, соин ик азвесь медаль сётӥзы. Ӧй верасал, дышетсконлы вань дыры кошкылӥз шуыса. Но урокъёс бере соку ик доре бертыны ноку ӧй ваньмылы. Совето Союзлэсь быжзэ адӟыны кемдӥз на – вал октябрёнок, пионер. Школаямы пӧртэм кружокъёс, секциос нуиськемысь ноку ӧз дугдылэ. Мон кырӟанъя кружоке ветлӥсько вал, собере фольклор ансамбль кылдӥз – отчы гожтӥськи. Дышетски домраен шудыны. Атаелэн туж потэ вал, гармошкаен яке баянэн мед шудом на шуыса, но талы дышетӥсьмы ӧй вал. Шумпотыса ветлӥ театральной, спортивной, туристической, эктонъя, гимнастикая кружокъёсы, тунсыкъяськи туспуктэмъёс лэсьтонэн, фольклор материалъёсты бичанэн но трос мукет ужъёсын. Гитараен шудыны дышетски ни ас кожам, студент дыръям.

Удмурт факультетын 2 кечез куто

– Туж пичи дыръям шуисько вал: будӥ ке, шофёр луо. Бадӟым классъёсын грузовой машинаез нуллыны дышетски – право но басьтӥ вал. Али руль сьӧры пуксьыны мылкыды малы ке ӧвӧл. Но машинаен ноку уг ворттылы шуыса, вераме уг поты.

Атае шуылӥз: эмъясе дышетскы, нылы. Эмъяськон амалъёсъя книгаосыз но трос солэн – соосты возьматъя вал. Мыным но тунсыко потылӥзы. Нош биология школаын одӥгез яратоно предметэ вал. Но ӵужанае одӥг пол дэмлаз: врач эн луы вал, нылы – кӧня ке янгышад ке, адями быроз. Солэн сузэрез, врачъёслэн янгышаменызы, улонысь кошкиз. Дышетӥсьлэн ужез кельшегес. Визьнодась мыдлань ужаз ке но, янгышсэ тупатыны луонлыкез вань на.

Ӵужаелэн верамез пелям пыриз, лэся, бадӟымгес будыса, дышетӥсь луон сярысь малпаськыны кутски. Но кыӵе предметэз быръёно – ӧй валалля. Школаысьтымы вань дышетӥсьёсмы туж ӟечесь вал, котькудӥзлэсь мар ке ласянь но адӟем карыны луэ. Нош дышетӥсь кельше ке, солэн предметэз но тунсыко потэ ни. Но вуиз школаямы удмурт кылъя но литературая егит дышетӥсь Людмила Петровна Малинина. Мар кадь сыӵе аспӧртэмлыкез вал солэн? Ужаз чылкак выль амалъёсты кутэмен ӧз висъяськы кадь. Но гань-гань луэменыз, тодон-валанъёс сётон мылкыдыныз, котькуд дышетскисьлы пуш дуннезэ усьтыны луонлык кылдытыны тыршеменыз пиналъёсты бордаз кыскиз, лэся. Шораз учкыса, валай: Удмурт кун университетысь удмурт филология факультетэ вамышто. Эшшо малпай на: ӟуч филологе котькин дышетскыны быгатоз, нош удмуртаз – удмурт кылэз тодӥсьёс гинэ. Мон кык кечез кырмо – ӟуч кылъя, литературая но удмурт кылъя, литературая дышетӥсь луо!

Шокчыны маза ӧй вал

– Студент аръёсы кутскизы 1996-тӥ арысен. Дышетскыны туж кельшиз. Дышетскон вакытэ но, берло но удмурт филология факультетэз аслам дореным шӧдылӥ, нош отысь ужасьёсты – аслам семьяеным. Татысен ик удмуртлык сярысь зэмос рос-прос валанэ-шӧдонэ кылдӥз. Нош университетын нырысетӥез тужгес бадӟым усьтон мон понна вал литературоведение удыс. Со монэ паймытӥз, кыӵе ке выль галактикаез усьтӥз кадь...

3-тӥ курсысен практикаме ортчи Ижысь 56 номеро гимназиын. Собере малпай: нош малы меда дышетскон вискын нылпиосын ужантэм – озьы, университетме йылпумъятозь, та гимназиын ик кӧня ке урокъёс нуи ни. Мыным со туж пайдаен берытскиз. Отысен валай: умойгес асме шӧдӥсько бадӟым классъёсын дышетскисьёс пӧлын. Зэм, соос нылпиос на, озьы ке но луэ ни бадӟымъёсын музэн кенешыны.

Университетэз горд дипломен йылпумъяй, кельтӥзы отчы ик удмурт литературая но Россиысь калыкъёслэн литературазыя кафедрае. Стажёр-исследователь луыса студентъёслы но абитуриентъёслы занятиос ортчытъяй, пӧртэм исследовательской, методической, организационной ужъёсты быдэсъяй. Со вакытэ ик Дышетӥсьёслэсь тодон-валанзэс будэтонъя институтын дышетӥсьёслы лекциос лыдӟылӥ, практической занятиос ортчытъяй. Ӵем потано луылӥз ёросъёсы – со аръёсы мон элькунысьтымы тросэныз визьнодасьёсын тодматски. Тау соослы егит дышетӥсез валамзы, тунсыкъяськыса кылзӥськемзы понна. Соку гинэ кылдӥсь дышетон бурдъёсме ӧз сӧсыртэ. Эшшо дасяллямы олимпиадаослы, кун аттестацилы материалъёс. Удмурт литератураез дышетонъя методикаез азинтон бордын бадӟым тунсыкен ужай. Шокчыны маза ӧй вал – мыным со туж кельшылӥз! Та вакытэ басьтэм тодон-валанъёсы, быгатонлыкъёсы али но ужам юртто.

Асьмемыз гажаны дышетсконо

– 2004-тӥ арын вал со – мыным жингыртӥз Дышетонъя но наукая министерствоысь анай кылэз дышетонъя ёзлэн соку кивалтӥсез Юрий Александрович Фомин. Лыкты, пе, ӵуказе ӵукна министерствое, малызэ ӧз вера. Малпай: таос монэ Дышетӥсьёслэсь тодон-валанзэс будэтонъя институтэ быдэсак выжыны косозы, дыр. Ӵектӥзы министерствоын ужаны. Мон пумитъяськыны ӧй быгаты.

Юасьёс шедё: мар лумбытэн со министерствояды кариськоды? Туж паймытэ: малы куд-ог адямиос троссэ сюлмаськонъёссэс погыльтыны туртто чиновникъёс вылэ? Троссэ ужпумъёсты ачид бордысен эскерыны кутсконо. Адями котькыӵе учыръёсы адямилыко кыльыны но ас интыяз ужзэ ӟеч быдэстыны кулэ. Йӧскалык дышетонъя ёз азе валтӥсь ужпум пуктэмын – анай кылъёсты дышетонэз радъян. Али котькуд калыклэн анай кылзэ дышетыны правоез вань. Но жаляса верано, тросэз таӵе луонлыксэс уг куто. Туж потэ вылэм, удмурт кылэз семьяосазы ик мед утёзы шуыса. Угось адямиез пичи дырысеныз кыӵе кылын дышето – сое со уг вунэты ни. Сое со дунъя. Мар веранэз, удмурт интеллигенция пӧлын но тросэз нылпиоссэс анай кыллы уг дышето ни. Шуо: удмурт сямен вала. Но валаны гинэ тырмыт ӧвӧл, вераськыны но быгатоно вылэм.

Элькунамы, ӟуч кылъя сяна, ортчыло удмурт, бигер, пор кылъёсъя урокъёс, факультативъёс. Шуг-секытъёс трос ке но, шумпотыса пусъем потэ: берло кык аръёсы анай кылзэс дышетыны мылкыд карисьёслэн огъя лыдзы уг кулэсмы (кӧня ке будэ но). Валамон, таин уж уг йылпумъяськы, капчияк кариськыны нокызьы уг луы. Озьы ке но та пичи емышъёс кужым но оскон сёто бадӟым ужпумъёсты быдэстонлы, пайдаё ужъёсы бурдъяло.

Национальной образование понна али капчи вакытъёс ӧвӧл. Кызьы югдурысь потоно? Огъя кужымен. Ог-огмы вылэ чӧлскыса, кыдёке ум вуэ. Школаосын, нылпи садъёсын сяна, анай кылэз дышетон сярысь сюлмаськоно семьяын но. Витёно ӧвӧл, кин ке асьме понна лэсьтыса сётоз шуыса. Асваланмы воштӥськыны кулэ. Малы ке асьмелы анай кылынымы вераськон понна куд-ог дыръя кулэ, со кылын кунгож сьӧрысь адямиос нырысь ик мед вераськозы шуыса. Кунгож сьӧрысь адямиос кылмес дунъяло бере, оло, асьмелы но сое дунъяны луоно... Жаляса верано, таӵе югдурын мон удмуртъёслэсь асьсэдыз ултӥямзэс, асьсэлы оскымтэзэс шӧдӥсько. Со сюлэмез вӧсь каре. Улонысь пӧртэм удысъёсын удмурт кыллэсь кулэлыксэ будэтон но шараян бордын тыршыны кулэ. Элькунысьтымы учреждениослэн, организациослэн юртъёссы бордын удмурт кылын вывескаос кылдо – куд-огез шуэ: малы, пе, талы коньдон кисьтонэз? Но таӵе чыры-пырыослы луыса но ас кылдэ гажан мылкыд пыӵаны ӧдъя.

Чылкак воштӥськем уз луы

– Мон уг яратӥськы ортчемаз мултэс бугыръяськыны, маке лэсьтэм сярысь жаляны. Мае ке улонам воштысал-а? Таӵе юан азям уг пуктылӥськы. Бырйи дышетон удысэз – иське, татын мынам интые. Кельшыса со дуннее вамыштӥ. Адями та удысын туж пӧртэм паласен ассэ усьтыны, азинскыны быгатэ шуыса, малпай вал. Улэмъя валасько: со луонлыкъёс малпамелэсь эшшо но тросгес вылӥллям.

Уг валаськы, кызьы ужез но личной улонэз нимаз люкыны луэ: со ваньмыз личной ук. Мон ӵукна 5 но ӝыныен султӥсько ни. Синучкон азьын сылонлы дыры трос уг кошкы. Но ӵукналы быдэ аслым план лэсьтӥсько: мар карыны кулэ туннэ нунал куспын – кудзэ ӝегатскытэк лэсьтоно, кудзэ берлолы кельтыны луоно. Ваньмыз ик соос ужен герӟаськемын луо.

Магазинъёстӥ ветлыны уг яратӥськы – та мынам планам туж шер шеде. Зэм, дорын няне быре ке, чакласько ик, ужысь туннэ, лавка пытсаськытозь, кошконо шуыса.

Туж паймисько: кызьы татчыозь ӧй гожты кандидат диссертациме. Малы ке нокызьы дыр висъяны уг быгатӥськы.

Люкетылэ возьдаськон сямы. Эшъёсы пӧлын ик ӧжыт ӧвӧл сыӵеос: тодо-а, уг-а, верано кожало ни. Нош мон тодэмме ас поннам эшшо эскеро на, шонер ик-а шуыса – собере гинэ верало. Возьдаськонме вормыны турттӥсько ке но, валасько, чылкак воштӥськеме уз луы шуыса.

Ӟечезлы оскон пуроме

Кема малпаськи: мар мон понна шуд? Номыр выльзэ ӧй усьты: мон шудо, матысьёсылэн ваньмыз умой ке. Аслам, оло, шугъяськонъёсы луозы, но мон соосты ачим вормыны тыршо.

Нылкышно анай мед луоз, соку со шудоен ассэ шӧдоз – та классика. Нош улонын озьы гинэ уг пӧрмы ке? Иське, аслэсьтыд кулэлыктэ улонлэн мукет ӧръёсысьтыз утчано. Одӥгезлэн сузэрелэн нылпиосыз будо ни – соосты туж яратӥсько, аслам кадь ик пото. Ачим семья кылдытон понна ӧй на пумита сыӵе адямиез, кудӥзлы быдэсак усьтӥськыны дӥсьто.

Мон тодӥсько: дорын монэ туннэ нокин уг возьма. Но талэсь шудтэмгес уг луиськы кадь. Сюлмыным но, визьмыным но мон котьку шӧдӥсько анай-атаелэсь, сузэръёсылэсь иськемъёс пыр но монэн артэ луэмзэс. Оскисько, мон но соослы ноку мултэс уг луы шуыса.

Вис кылдэ ке, туж яратӥсько пӧртэм киужъёсын вырыны. Али вуриськисько, салфеткаос чильпасько. Ас киосын лэсьтэм арбериослэн лулзы вань кадь потэ. Улон интыез соос шунытгес каро. Кема аръёс ӵоже улӥ вал студентъёслы общежитиын. Но али сётӥзы служебной квартира – дышетон удысын ужатозям, отын улыны быгатӥсько.

Шулдыръяськыны яратӥсь мурт ӧвӧл мон. Но праздникъёсты уг яратӥськы шуэме уг поты. Уката но соос кыӵе ке сям-йылолъёсын герӟаськемын ке. 9-тӥ Май – самой валтӥсь праздник мон понна. Кӧня чакласько, та нуналэ котьку чылкыт инбам но пиштэ шунды – котьку озьы мед луоз. 1-тӥ сентябрь школа дырысен мон понна шумпотон вае. Али но, та нуналэ сяська керттэтъёсын нылпиосты урамысь ӧй адӟы ке, нуналы бездыт ортчиз кадь потэ. Выль ар праздникъёсы одно быдэс семьяенымы люкаськыны тыршиськом. Анай-атайёслы но со шумпотон. 8-тӥ Мартэз мон тулыслэн вуэменыз герӟасько. Тросэз вуженыз люкисько, выль малпанъёсын улыны кутско Выль арысен, нош мон – тулыс вуэмез шӧдыны ӧдъясько ке. Та вакытэ чеберезлы, ӟечезлы осконэ уката пуроме.

Источник:

Ямаева, Надежда Петровна. Верамелэсь азьло малпаськисько / Надежда Ямаева ; записала Элина Кумачёва // Удмурт дунне. - 2016. - 25 марта. - С. 10, 15. - (Тӧр шорын).

За предоставление материала выражаем огромную благодарность редакции газеты "Удмурт дунне"