Шунды эмеспи

From Воршуд
Jump to navigationJump to search

Кемалась-кемалась, вашкала аръёсы, улэм-вылэм одӥг куанер воргорон. Кема калгем со мурт шаеръёстӥ, узыръёслы ужаса, собере солэн дор палаз бертылэмез потэм.

"Отын аслам коркае но, матысьёсы но ӧвӧл. Бускельёсын ке но пумиськыло, адӟиськыло", — малпам со.

Тани ог шулдыр нуналэ потэм со кузь сюрес вылэ: кияз боды, тыбыраз — пуйы. Мынэ, пе, кутъёсыныз ӟукыртыса. Кема мынэм со, трос гуртъёстӥ, городъёстӥ потэм. Тани вуэм бадӟым сьӧд нюлэскы. Ӵапак со виын шунды но пуксем ни, олокытысь тём-тём пеймыт пилемъёс вуиллям, шуак сильзор кутскем — ӵаш, пе, вазе нюлэскын. Шимес йӧтэм воргоронлы, сюресэз но адӟемысь дугдэм, лӥял борды канжаськем но усем. Кытчы бен таӵеен мынод? Пуксем со лӥял вылэ но бӧрдыны кутскем:

Шундые-мусое, пот, пот,

Пеймыт нюлэскысь сюресэз югдыты,

Вордӥськем палъёсам бертны мед быгато!

Лӥял жалям воргоронэз, шуэм солы:

— Эн кайгыры, гажано адями, дорам пыр, куно лу, буртчин валес дасямын, небыт миндэр понэмын, татчы зор но уг йӧт, уг но гудыръя!

Воргорон пырем Лӥял улэ, выдэм небыт кошна (труха) вылэ но умме усем. Уйлэсь ортчемзэ ик шӧдымтэ ни. Сайкам ӵукна но адӟе — куазь шулдырскем. Воргорон лысвуэн пыласькем, бадяр куарен ӵушиськем, Лӥяллы тау карыса, сюрес вылэ дасяськем. Соку Лӥял солы верам:

— Кылзы ай, гажано сюресчи, дэмланме быдэстӥд ке, шуддэ шедьтод даурлы: нюлэскын чебер ты вань, вуэз пияла кадь дун. Куакъёс пӧлы пырыса возьма: куинь чебер нылъёс пыласькыны лыктозы, дӥсьсэс кыльыса, уяны кутскозы, огезлэсь дӥсьсэ тон кут но ват, берен ке куриз — сёт, синмаз учкыса, лякыт кылъёс вераса, соку ик егит батырлы пӧрмод, гажан эше.

Воргорон Лӥяллэсь верамзэ пумозяз кылзэм, йыбырттэм солы но дыртытэк кошкем. Инмын душесъёс поръяло, нюлэскын кыйкайёс чирдо, эмезьпуос пӧлын мушъёс бызгето... Кема мынэм воргорон, тани вуэм чебер ты доры: зэм ик со туж паймымон, вуэз дун, сайкыт, ярдураз сяськаясь льӧмпуос но азвесь куаро бадьёс сыло, вуысь вужерзэс учко. Воргорон пуксем бадьёс пӧлы но возьманы кутскем. Ӝоген потӥллям вераны луонтэм чебер нылъёс, зарни йырсиё, небыт куараё, мугоръёссы сюсьтыл кадь веськрес, синъёссы инбам кадь сайкыт.

Тани соос, дӥсьсэс куштыса, вуэ пыриллям, пальккаськыны кутскиллям. Воргорон ӝог гинэ басьтэм огезлэсь дӥсьсэ но куак пушкы ватэм. Потӥллям нылъёс ярдуре — кыкез дӥсяськиллям но кошкиллям, куинетӥез, дӥсьсэ шедьтытэк, ярдуре кылем, лӥятӥсь куараен дӥсьсэ сётыны курем. Воргорон ныл доры потоно кариськем. Ныллэн чагыресь синъёсаз учкыса ик, дӥськутсэ сётэм но шуэм:

— Вождэ эн потты, мусо нылоке.

Соку ик воргорон егит пияшлы пӧрмем.

— Тау тыныд, казакпи,— шуэм солы зарни йырсиё нылаш. — Кельшисько ке тыныд, оло, кузпал луо ай.

— Бызёд ик меда тон мыным, туж куанер муртлы, мынам юртъере но, ваньбуре но ӧвӧл. Кытын но кызьы уломы?

— Та сярысь эн сюлмаськы, эше. Улом, ум быре. Оло, ваньмыз воштӥськоз ай, — верам солы егит нылаш.

Воргорон шудэзлы оскымтэ, пегӟыны кутскем, нош ныл со сьӧрысь кыльымтэ.

— Озьыен, тон но куанер улод, трос секытсэ чидано луод, — дугдыса китӥз кутэм воргорон но, соос азьлань вамыштӥллям. Тани вуиллям бадӟым каре но воргорон эксэй дорын ужаны медъяськем.

Тани уло ини соос эксэй дорын. Вуэм праздник. Та воргорон ушъяськем, уй куспын вань бадӟым но пичи шуръёс вамен зарни выж лэсьтыны быгато шуыса. Кылэм тае эксэйлэн чаклачиез но верам кузёезлы. Эксэй воргоронэз дораз ӧтем но юам:

— Зэм ик-а тон уй куспын зарни выжъёс лэсьтыны быгатӥськод?

Воргорон "уг" шуыны дӥсьтымтэ. Эксэй косэм сое уй куспын зарни выжъёс лэсьтыны: ӧд ке, пе, быдэсты, улэп уд кыльы. Воргорон потэм но бӧрдыса кышноез доры мынэм. Соиз юам малы бӧрдэмзэ. Картэз ваньзэ верам.

— Али мон юртто тыныд, но азьланяз визьмогес лу.

Тани уй но вуиз. Зарни йырсиё кышноез потэм коркасьтыз, туж кужмо шултэм но кеськем:

— Ого-го! Пичиос но бадӟымъёс — мон доры! Ваньмыз улэп макеос соку ик люкаськиллям со доры. Инмысь кизилиос адскемысь дугдытозь ужзы быдэсмем. Ваньмыз лэсьтэмын вылэм, кызьы косэмын: шуръёс вамен зарни выжъёс чиляло! Мукетъят воргорон ушъяськем, уй куспын быдэс бусые нянь кизьыны, араны но ӝӧк вылэ нянь вуттыны быгато шуыса. Эксэйлы тазэ но ивортӥллям. Ӧтем со ушъяськисез дворецаз но косэм:

— Кызьы верад, озьы ик лэсьты. Ӵуказе ӵукна ӝӧк вылам выль нянь вутты, а то улэп уд кыльы. Нош ик визьмо кузпалыз юрттэм картэзлы. Таӵе кышноезлы шумпотыса, воргорон нош ик ушъяськыны кутскем:

— Map гинэ та! Мон шунды луыса ӝужаны но, пуксьыны но быгато!

Эксэйлэн вожез потэм, ляльчиез пыр косэм:

— Со ваньзэ лэсьтыны быгатэ бере, мынам син азям шунды кариськыса мед ӝужалоз инбаме, ӧз ке быгаты, атаслэсь музэн, йырзэ корыштыны косо. Та сярысь воргорон нош ик кышноезлы верано луэм.

— Тон мар, копак визьдэ ыштӥд-а? Таӵе ужлэсь секытсэ уд шедьты ук. Табере асьмеос кемалы люкиськоно луом. Ӵок ни, эн кайгыры, кылзы верамме. Тани тыныд кык кышет, огзэ бур кисыяд пон, мукетсэ — палляназ, кияд та бугорез кут, кушты пыд азяд но вамышты отчы, кытчы питыралоз со.

Воргорон кузпалызлэсь дэмланъёссэ быдэстэм. Кема мынэм со нюлэсъёс, зарезьёс сьӧры, куке-соку вуэм бадӟым югыт дворец доры. Бугорез пушказ пыриз бере, воргорон но пыроно кариськем, бур кисыысьтыз кышетсэ поттэм.

— Э-э! Та мынам сузэрелэн кышетэз, кытысь шедьтӥд ай? — юам кузё кышно.

Воргорон, номыре ватытэк, ваньзэ радызъя верам.

— Озьыен, тон эмеспимы луиськод! — шумпотэм кузё кышно но сое куно карем.

Ӵуказеяз воргорон нош ик сюрес вылэ потэм. Мынэм, мынэм бугор сьӧры но уката чебер но узыр дворец доры вуэм. Табере со паллян кисыысьтыз кышетсэ басьтэм но нош ик дуно куно луэм: таиз но кузё кышно кузпалызлэн апаез вылэм. Озьы воргорон тодматскем кышноезлэн апайёсыныз. Соос ик валэктӥллям, кызьы шундылэн ӝужан интыяз вуыны. Отын но, синэз мальдытыса, чилясь дворец сылэ вылэм. Бугор отчы пыриз бере, воргорон но вамыштэм со сьӧры, кыкна кышетсэ кисыосысьтыз поттыса.

— Та мынам нылъёсылэн кышетъёссы! Кытысь шедьтӥд тон соосты? — паймем Шунды мумы.

Воргорон, номырзэ ватытэк, ваньзэ радызъя верам. Покчи эмеспиез вуэмлы Шунды мумы туж шумпотэм. Шуак вань укноостӥ югыт пиштыны кутскем. Шунды мумы эмеспизэ палэнскыны косэм:

— Пие бертэ, сутскыны медад шедьы.

Тани Шунды двореце пырем, пӧсь луэм.

— Выль зынэз шӧдӥсько, кин ке вуиз, оло? — юам со мумизлэсь.

— Эмеспимы вуэм, медад суты шуыса, мон сое палэнскыны косӥ.

— Я, табере мед потоз ни.

Кунозы потэм, синъёссэ киыныз пытсаса, — сокем мальдыт.

— О-о, эмеспи, кызьы сюрес шедьтӥд ай дорамы? — юам Шунды.

— Кышное валэктӥз. Бадӟым муген вуи: тодоно, кытысь шунды ӝужа но кытчы пуксе.

Ӵуказеяз ӵукна вазь ик Шунды эмеспизэ сайкатэм но кык пуртыос шоры возьматэм: одӥгаз ялан ву пӧзе, мукетаз йӧ кынмемын. Ӵукна пал шунды йӧэн пуртые пыре, собере пӧзись пуртые, собере шуак инбаме ӝутске. Верамъяз ачиз озьы ик лэсьтэм. Ӵуказеяз эмеспи юам Шундылэсь:

— Тон интые мынам ӝужаме луоз-а?

— Луоз. Только ӵапак мон сямен ик лэсьты.

Эмеспи ваньзэ чакласа лэсьтэм но шунды луыса инбаме ӝутскем. Нуналскын вань музъемез ортчем, ӝытазе вуэм со интые ик, кытысен ӝужаз. Ӝытсэ сиськыкузы, Шунды юам эмеспилэсь:

— Я, вера, кызьы ветлӥд, мае адӟид?

— Трос адӟи. Тужгес но — куанеръёслэсь курадӟемзэс: ужало, ужало, нош кӧтсы тыр уг луы, дӥськутсы начар. Янгышатэк янгыше усё.

Куинетӥ нуналаз шунды эмеспи дораз потэм, пырем эксэй доры но верам, кызьы шунды ӝужа.

Эксэйлэн аслаз но, шунды кариськыса, инбаметӥ ортчемез потэм. Йӧэн пуртыысь со быректӥсь вуэ тэтчем но потэмез луымтэ ни.

Тӥни озьы воргорон эксэйлы пунэмзэ берыктэм: эксэйлэсь ваньбурзэ куанеръёслы сётъям, ачиз дворецаз улыны кутскем. Мон но со доры куное ветлӥ, ваньзэ сямен ик туж усто куноятӥз, тӧр сэргы пуктылӥз, небыт миндэр вылэ. Бер ӝытозь ӝӧк сьӧрын пукимы, сиимы-юимы, кырӟамы-эктӥмы, ортчемзэ тодэ ваимы. [1]

Литература[edit]