Шудегов Виктор Евграфович

Шуд вайись

Шудегов В.Е.

Виктор Евграфович Шудегов вордскиз Кез ёросысь Тортым гуртын 1952-тӥ арын 5-тӥ декабре. Атайзэ уженыз валче пӧртэм интыосы выжтылэмен, со будӥз удмурт но ӟуч гуртъёсын, вордскем кылыныз дыго-мого вераське. Дышетскиз Удмурт кун университетлэн физикая но математикая люкетаз, Ленинградысь университетлэн аспирантураяз но докторантураяз. Стажировкаын вал Германиысь Дрезден городысь техникая университетын. 1980-тӥ арын луиз наукаосъя кандидат, 1994-тӥ арын - доктор но Удмурт кун университетын наукая проректор. 1999-тӥ арын быръемын Удмурт Республикаысь Правительстволэн Тӧроезлы воштӥсе, 2001-тӥ арын - Россия Федерациысь Федеральной Собранилэн Федерацияя Кенешезлы членэ. 2003-тӥ арысен кивалтэ отысь Наукая, культурая, дышетонъя, тазалыкез утёнъя но инкуазез утёнъя комитетэн.

Россиысь Естественной наукаосъя академиысь академик. Инкуазез кышкытлыклэсь утёнъя генерал-лейтенант. Россия Федерациысь вылӥ профессиослы дышетонъя дано ужась. Пусъемын Александр Пушкин вордскем дырысен 200 ар тырмонлы сӥзем медален, «Азвесь кирос» наградаен, зарни гадьпусэн но медальёсын.

- Виктор Евграфович, удмурт калыклэн одӥгез дано пиез шуген вераське вордскем кылыныз, нош вынъёсты-сузэръёсты вольытак лабырто. Возьыт ӧвӧл-а тӥледлы?

- Со мон понна бадӟым минус. Пичи классъёсын ас кылыным шалтыр гинэ бӧтьыртӥсько вал. Отӥяз курадӟыны ӧдъяй. 9-тӥ классын анай-атаелэсь люкиськи ни - выжи Иже, интыяськи мурт патере, пыри физикая но математикая мур тодон-валан сётӥсь школае.

- Малы одно физика но математика?

- Атае сюлмаськемен. Уноянъя таблицаез со дышетытӥз школае мынэмелэсь азьвыл ик. Уже кошкон азяз индылӥз: туннэ тод кыклы уноянэз, ӵуказе - куиньлы. Кык арлы бадӟымгес агайме школае дасякузы, вӧзаз пукылӥ но вань визьнодамзэс пелям понылӥ. Озьы соин ӵош тодӥ алфавитэз. Жаляса пусйисько: туала нылпиос сыӵе амалъёслэсь люкемын, покчи классъёсты йылпумъякузы но, тодон-валанзы ӟызы на, малы ке шуоно юн оскытско компьютерлы.

- Шуг-а вал Федерацияя Кенеше выжыяськыны? Тӥ вылӥ наукаысь лыктӥды ук вылӥ власте.

- Чидасьтэм мурт, пе, визьзэ понэ вуз каронэ, чакласькисез - хозяйство нуонэ, амалоез - наукае. Удысэз воштон котьку но шӧдтэк шорысь луэ. Наукаен вырись адями пӧртэм синмын учке карьера шоры: татын маке но выльзэ усьтоно, аслад удысад гурезе тубоно но тодмо луоно. Наукаын мон сокем трос ӧй лэсьты кадь. Алигес Россиысь одӥгез тодмо академик Шевченко мынэсьтым шуак юаз: 1994-тӥ арын кыӵе ке Шудегов печатлаз вал нано структураос сярысь уж, тӥ ӧй вал-а со? Мон, шуисько, автографен книгаме но кузьманы быгатӥсько. Соку гинэ оскиз, ява. Табере ми ӵош ужаськомы.

Наукаысен Удмурт Правительствое сюри туж секыт вакытэ. Дышетӥсьёслы но бюджет удысын мукет ужасьёслы уждун тырон ӝегалляз ӝыны арлы. Профессорлэн гинэ но коньдонэз ӧз окмылы улыны. Туж секыт вал ёрмисьёсын пумиськылыны. Соос ӵуказе уждун витё, но шуак кыло: уксё сётозы, толэзь ортчыса гинэ. Мискиньёс вань йыркурзэс лэзьылӥзы мон вылэ.

Фамилие «шуд вайись» луэ. Уг лыдъяськы, югдурез тупатыны со юрттӥз шуыса. Но мувӧйлы дунъёс пумен ӝутскизы, республикаысь промышленность улӟиз, бюджетын ватсаса коньдон кылдӥз, пунэмен тыронъёс быризы. Тӥни малы мон Правительстволэсь Тӧрозэ воштӥсьысь кошки каньыл мылкыдын, сюлэмам ӧй вал таӵе секыт малпан: удыссэ Шудегов копак куашкатыса кельтӥз. Трос аръёс ӵоже лэсьтымтэ ужпумъёсты вырӟытыны дауртӥ. Удмурт кылэз мургес пыӵатӥм яслиосы но нылпи садъёсы. Гуртысь визьмо нылпиослы тямыс интернет-класс усьтӥм. Отын пиналъёс, городысь эшъёссы музэн ик, нюръяськыны дышизы университетэ пырон понна. Республикаямы кемаласьгес радъяськыло ни Гурт шудонъёс. Мон - спортъя судья - дэмлай отчы кыскыны Правительстволэсь но районъёсысь кивалтӥсьёслэсь командаоссэс. Адӟелэ вал, макем чупрес нюръясько туннэ футболистъёс, волейболистъёс, ыбылӥськисьёс!

Тазьы пырскемме республикаысь кивалтӥсьёс но синйылтӥллям, шӧдске. 2001-тӥ арын Правительствомылы быръёно вал Россия Федерациысь Федеральной Собранилэн Федерацияя Кенешаз адями. Мыным оскизы кужымме мертаны парламентлэн вылӥ палатаяз.

Талэсь азьвыл котькуд республика но область отчы ыстылӥз кык вылӥ кивалтӥсьсэ - закон кылдытӥсь ёзлэсь но быдэсъясь властьлэсь. Соос кенешыны люкаськылӥзы огъя ужан висказы гинэ. Нош кыӵе яркытэсь вал со азьветлӥсьёс - Москвалэн но Санкт-Петербурглэн йыръёссы Юрий Лужков но Владимир Яковлев, Татарстанлэн Президентэз Минтимер Шаймиев.

Зэм, властез люкон ласянь таӵе амалэн ужан шонер ӧй вал. Губернаторъёс асьсэос закон юнмато, асьсэос ик сое быдэсъяно луо. Соин ик нырысетӥ кивалтӥсьёсты воштӥзы ми кадьёс - субъектъёсысь закон кылдытӥсь но быдэсъясь ёзъёслэн ыстэм муртъёссы. Пӧлазы тросгес луизы бизнесысь адямиос, ӧжытгес - профессионалъёс. Президент Владимир Путин но юнме шорысь ӧз пусйы, дыр: Федерацияя Кенешлы кулэ яркыт муртъёс. Татын соос мед шӧдозы туала нуналэз но, мед адӟозы азьпал вакытэз но. Югдур умоялоз, дыр, сенаторъёсты интыосын выль сямен бырйыны кутскем бере.

- Отчы-татчы шонаськись либерал-демократ Владимир Жириновский дэмла: тӥлесьтыд сенат нимаськись ёздэс копак быдтоно. Англиын тани трос сю ар ужам вылӥ палатазэс, лордъёслэсь (пэръёслэсь) ёззэс, ӝокатыны медо кадь. Кызьы учкиськоды сыӵе учыръёс шоры?

- Жириновский, быръёнъёс матэктэмъя, ӵемысь урдскылэ олокин шоры но. Милемды янгыш каре, законъёс кылдытъянэн ум выриське шуыса. Со шонер ӧвӧл. Федерацияя Кенеш уно кужымзэ сётэ законъёс кылдытъянлы. Мон ачим но, Тӧроенымы Сергей Мироновен ӵош но кӧня ке законлы инъетъёс сётӥм. Тани али дасяське дышетонэн но наукаен вырись учреждениосты музъемлы вытлэсь мозмытон сярысь закон. Собере учкелэ ай Конституцимес. Отын валамон пусъемын ук: Федеральной Собрание кылдытӥське кык палаталэсь - Федерацияя Кенешлэсь но Кун Думалэсь. Сенатмес быдтоно ке, нырысь ик воштоно ук Конституцимес. Вылаз ик, берло дыре гинэ дуннеысь данакез кунъёс выжизы кык палатаен парламентъёс кылдытонэ. Соос, пе, пайдаёгес ужало.

- Нялтас вераса, печатьын таӵе ивор сётэмын вал: Федерацияя Кенешысь ӝыныез пала адямиос асьсэлэн бырйиськем интыенызы чик но герӟаськемын ӧвӧл. Зэм со. Тани Санкт-Петербурглэн азьвыл йырызлэн Анатолий Собчаклэн кышноез Людмила Нарусова луиз Тываысь адями, Ижлэн азьвыл йырыз Анатолий Салтыков - Новосибирск улослэн ыстэм муртэз. Россиысь коньдон ужпумъёсъя министрлэн азьвыл воштӥсез Андрей Вавилов, уно миллион доллар лушкамез понна кыл медаз кутытэ шуыса, кескичак шобырскиз Пенза улослэн сенаторезлэн мандатэныз. Тӥледлы кельше-а сыӵе югдур?

- Асьсэ улосъёсынызы герӟаськымтэ сенаторъёс сярысь верано ке, соос быръемын законъя. Но мон таӵе амаллы меӵак пумит. Кызьы озьы, аслад лыдъяськись улостэ тодытэк, солы дурбасьтод? Интыосын ӟеч валало ук, кинъёс йыртэманэн герӟаськемын, кинъёс ӧвӧл. Соин ик Федерацияя Кенеше адямиосты улосъёсын бырйыны кулэ. Россиын туннэ кылдытэмын кивалтонъя система. Парламент - закон кылдытӥсь ёз. Солы бадӟымгес власть сётоно вылэм, малы ке шуоно отчы адямиос ӵемгес вазиськыло.

- Кызьы кылдо Федерацияя Кенешын комитетъёс? Ваньмыз уг мерско-а Калыккуспо ужпумъёсын вырисяз?

- Котькудӥз сенатор ас мылкыдызъя быръе удыссэ. Валамон ни, Калыккуспо ужпумъёсъя комитетэ уноез курисько, нош калыкез улон-вылонын утён сярысь сюлмаськисяз - ӧжытэз. Югдурез шонертыны амал вань. Данакез эшъёсмы гожтӥсько одӥг комитетэ но ватсаса одӥг комиссие. Кылсярысь, Ивор вӧлмытон политикая комиссилэн тӧроез Людмила Нарусова - мынам комитетам огшоры член, солэн комиссияз мон сыӵе ик «рядовой» лыдъяськисько. Комитетэ сизьымлэсь ӧжытгес адямиос люкасько ке, сое быдто. Ачим сярысь верано ке, мон азьвыл ик дасяськи ни вал Наукая, культурая, дышетонъя, тазалыкез утёнъя но инкуазез утёнъя комитетэ пырыны. Вал комитетлэн тӧроезлэн воштӥсез, али соин кивалтӥсько. Вить бадӟымесь ужпумъёсын вырыны капчи ӧвӧл. Вылаз ик, татын эскериськись законъёс трос миллион адямиосын герӟаськемын. Дышетонэз выльдонъя, студентъёслы стипендиос ватсанъя законъёслы арлы быдэ сямен шонертонъёс дэмласьком. Зэм, сыӵе ӵектонъёсмес ӵемысь палэнтыло. Но ми суй-пыдмес ум юскиське. Шӧдӥськом уго: таӵе ужпумъёсты одно быдэстоно. Ми котьку дасесь «корзинае» куштэм законопроектэз выльысь ӝутыса сэрттыны-пертчыны.

- Россия Федерацилэн Конституциез чакла адямиосты дунтэк дышетыны но эмъяны. Зэмос улонын та курон уггес быдэсъяськы ни кадь. Оло, Конституцие воштонъёс пыртоно?

- Конституция туала улонлы тупа. Мон лыдъясько, матысь дыре отчы воштонъёс уз пыртэ. Нош дунтэк дышетон но эмъян сярысь куронэз быдэстом шуыса оскисько. 1998-тӥ арын, дефолт вакытэ, дышетонъя бюджет вал 1 миллиард доллар. Верай ни: профессорлэн уждунэз улон минимумлэсь но пичи кыльылӥз. Туннэ та бюджет дас пол бадӟымгес. Профессор 500 доллар котыр басьтэ.

Тазалыкез утёнэ но трос коньдон висъяське. Зэм, сое быгатысагес кутоно вылэм. Одӥгаз кенешонын калыкез улон-вылонын утёнъя но тазалыкез утёнъя министр Михаил Зурабов валэктӥз памперсъёслы висъям коньдон сярысь. Лыдъямы но - со окмысал котькуд адямилы минутлы быдэ 1 памперс воштыны. Валамон ни: сыӵе мыдланьяськонъёслы пум пононо.

Ӧжытгес уксё висъяське на культуралы - адямилы быдэ араз 14 копейка. Милемлы шуо: олле нырысь ӝутоме экономикаез, собере культуралэн но черодэз вуоз. Ми солы пумит. Вань удысъёсты оглом ӵош сяськаяськытоно.

- Михаил Зурабовез карга ни кадь быдэс Россия.

- Мугъёсыз но вань уга. Льготаен эмъюм висъян туж урод радъямын. Одӥгез уно сюрс манетлы дасо препарат басьтэ, мукетызлы номыр уг кыльы ни. Шараяськиз таӵе учыр но: дас кык аресъем пиёклы ньыль коробка виагралы бумага гожтӥллям.

Югдурез ми рос-прос чакланы выриськом. Матысь дыре ик ужрадъёс кутэмын луозы 2006-тӥ ар понна пунэмен тыронъёс берыктон вылысь. Туала кылын вераса, комитетмы али мониторинг ортчытэ.

Нош учкелэ ай участокысь медсестралэсь уждунзэ - университетысь доцентлэн сярысь но бадӟымгес! Врач басьтэ сое дышетэм профессорлэсь уногес. Отысь кӧня-кӧня вожвылъяськонъёс пуромо. Пичи уждуно эмъясьёсты буйгато: тӥ, пе, диспансеризация ортчытэм чотын ватсаса уждун басьтоды. Та амал, валамон ни, шонер ӧвӧл. Кемаласен вераськон нуиськомы: бурмытӥсьёсты но дышетӥсьёсты ӝутоно кун служащийёс радэ. Ужпум быдэстэмын ӧвӧл.

- Нош трос нылпиё семьяослы юрттон ласянь кызьы?

- Али котькуд улос ас быгатэмезъя юрттэ. Удмуртиын куиньмоос вордӥськыку, Президент Александр Волков та семьяе ачиз лыктэ но, нуныос номырлы медаз ёрме шуыса, ваньзэ лэсьтэ. Сыӵе амалэз пыӵатоно вылэм музон республикаосы но областьёсы.

- Кыкетӥ нылпи ваем понна коньдон соку ик уг тыриськы. Луоз-а бен солэн пайдаез?

- Татын лыдэ басьтоно пӧртэм учыръёсты. Жаляса верано луэ, тросэз пиналъёс кулыны шедё на. Оглюкетэз анайёс (атайёс) нунызэс уг утё. Висъям коньдон медаз «капчия» шуыса, вылӥ палаталэн спикерез Сергей Миронов ватсан сётӥз: дотациез будэтоно инфляцияя.

- Инкуазьлэн воштӥськемез сярысь ООН-лэн конвенциез вӧзын 2005-тӥ арын 16-тӥ феврале ужаны кутскиз правоя калыккуспо документ - Киотский протокол. Австралия но США со улэ гожтӥськыны пумит луизы. Россиын но куспазы вожвылъясько ивор вӧлмытӥсьёс но тодосчиос. Кин бен татын шонер? - Мон малпасько - учёнойёс. Огшоры адямиос инкуазез чаклало ке дасо аръёсын, тодосчиос - дауръёсын. Берло сю ар ӵоже дуннеын омыр шуназ 0,6 градуслы, куд-ог улосъёсын - трослыгес. Россия сыӵе воштӥськонэн сэрен сокем шуге-леке уз шедьы. Но, Антарктидаысь йӧ шунаса, океан сизьым метрлы ӝутскиз ке, бадӟым кунъёс но ву улэ шедёзы ук. Якутие, оло, кезегъян (малярия) вӧлмытӥсь чибиньёс каръяськозы. Тӥни сыӵе кышкытлыклы пумит нюръяськыны кулэ Киотский протоколын пусъем ужрадъёс.

- Россилэн Президентэз косӥз ваньбур поттонэз кык пол унояны. Солы уз люкеты-а та протокол?

- Протокол алэ омыре мултэс углекислота лэзёнлэсь. Валамон ни, промышленность золгес берга ке, инкуазез юнгес кырсёмытэ. Тани Удмуртиын но предприятиос ваньбур поттонзэс арлы быдэ будэто. Тӥни малы Киотский протокол котькуд ласянь ӟеч шуэме уг поты. Ваньзэ возьматоз дыр.

- Россия Федерациысь Правительство 2002-тӥ арын кутӥз инкуазез утёнъя доктрина. Отын пусъемын: омырез кырсёмытӥд - дун тыр. Кызьы сое валано?

- Коньдон мыноз инкуазьлы лэсьтэм изъянэз наука юрттэмъя лыдъянэ, шудтэм учыръёслэсь бервылъёссэс быдтонэ, калыклэсь лябӟем тазалыксэ юнматонэ. Россиысь экономистъёс но юристъёс кемалась эскеро ни экологияя страхование шуон ужпумез. Куд-ог улосъёсын дасямын правоя но методикая документъёс. Зэм, сыӵе страхованиез улонэ пыӵатыны ум быгатӥське на. Асьмеды та ласянь азьпалто Америка но, Европа но, Азербайджан но, Казахстан но. Комитетысьтымы нимысьтыз кылдытэм группа али ужа та удысъя закон кылдытон бордын. Сотэк Россиысь предприятиосты уд косы инкуазез утьыны, коньдон тырытыны.

- Алигес йылпумъяськизы пӧртэм ёзъёсы депутат быръёнъёс - Кун Думае 2-тӥ декабре ортчоно быръёнъёс азьын кужымез мертан. «Зэмлыко Россия» («Справедливая Россия») данак округъёсын кыкетӥ-куинетӥ интыосты басьтӥз. Зэм, Сергей Мироновлэсь но Виктор Шудеговлэсь вордэм партизэс, «Справедливая Россия» шуонэз, унь-мань карыса, куд-огез «эсер» партия шуо. Тӥледлы кельше-а озьы исан?

- 1917-тӥ арын революцилэсь азьвыл социал-революционеръёслэн (эсеръёслэн) партизы тужгес бадӟымез вал. Трос калыкез йыромытыны капчи ӧвӧл. Со соизлы яке таизлы партилы юнме шорысь гинэ уз дурбасьты. «Зэмлыко Россия» понна вылӥ кивалтӥсьёс уг ужало. Нош «Огъя Россие» пыро 70 губернатор, ваньмыз сямен мэръёс но ёрос йыръёс.

Туала егитъёс уггес тодо ни большевикъёсты но эсеръёсты. Но ми оскиськом, эсеръёс сямен ик, бадӟым партилы пӧрмонмылы, малы ке шуоно утёмы огшоры адямиосты. Сергей Миронов уно пол вералляз: ми коммунизмлы пумит, но социализм понна: котькудӥзлы котькыӵе тубатын дур ваёно. Гуртысь удмуртъёс сярысь верано ке, соос али курдатэмын: «Огъя Россилы» куаразэс ӧз сётэ ке, газтэк, уждунтэк, бакча гырыны трактортэк кылёзы.

- «Единоросъёс» дэмлало пенсиез уждунлэн 45 процентозяз ӝутыны, туала эсеръёс 65-ёзь. Быдэсмымон-а тӥляд сӥзёнды?

- Вераськон уг мыны ук отчы туннэ ик вуон сярысь. Сергей Миронов ӵектэмъя, дышетӥсьёсты но эмъясьёсты тубтоно кун служащийёс радэ. Кивалтӥсьёс азьло черекъязы: пенсионеръёслы тырыны коньдон уг окмы. Стабфонд шуонэ уно миллиард доллар люкаськем бере, юрттэм интые, али курдато: отысь коньдонэз калыклы люкылӥд ке, дунъёс ӝутскозы, пе. Тӥни малы асьме уксё утиське кунгож сьӧрын, юнматэ мукет кунъёслэсь экономиказэс. Шонер шат со?

- Россия уз куашка-а?

- Туннэ сыӵе кышкытлык ӧвӧл. 1990-тӥ аръёсы Президент Борис Ельцин чеберъяськиз: басьтэлэ асьтэлы сомында асэрик (суверенитет), кӧнязэ ньылоды. Туннэ югдур мукет ни. Странамы пӧрмиз огъя Россилы. Пӧртэм улосъёсын уждунъёс огӵошгес луизы. Валамон ни: узыр но куанер областьёс вань на. Но пӧртэмлыксы сокем шурдыт ӧвӧл ни, малы ке шуоно бюджет кусыпъёс ӟечгес радъямын.

- Оглом шулдыр мылкыдо тодосчи Кузьма Куликов азьлане мӧзмыт мылкыдын учке, удмуртъёсмес жаляса.

- Огласянь, со шонер. Глобализация шуон пичи калыкез зӥбе яке быдтэ. Будос яке пӧйшур выжытэм бырыку, ваньмыз бӧрдо. Нош калык быдэсак сылмыку, чалмыт уло. Ватонэз ӧвӧл: пичи кунъёс но, кылъёс но отӥяз бырозы. Но сыӵе вакытэз озёлогес карон амалъёс вань. Ӵапак пичи коллективъёсын юнгес утисько дуно йылолъёс.

Пӧртэм мугъёсын сэрен пичи гуртъёсысь удмуртъёс юыны кутско, нош Москвае яке Санкт-Петербурге дышетскыны кошкемъёс шаерамы уг берто ни. Сое-а удмурт калыкмы понна ӟеч шуод?

- Нош асьтэос Удмуртие берытскыны малпаськоды на-а? Оло, запасэ кошкись политикъёс музэн, кыӵе ке кунэ посолэ мыныны медӥськоды?

- Кунгож сьӧрын мон трос пол вал, но дипломатэ ӧй дышетскы. Со удысын ужало вылӥ профессионалъёс. Соослэн быгатэмзы бордысь пото матысь но кыдёкысь бускельёсын кусыпъёс. Дипломатэ пичиысен дышетсконо, музон кылъёсты ӟеч тодоно. Сыӵеосты мон ноку но уг суты ни. Мынам каре - Удмурт шаер. Мугоры Москваын ке но, пропискае вордскем палам. Сенаторысь кошкыса, одно берытско Удмуртие, ужало мыным дэмлам удысын.

Источник:

Шудегов В. Е. Шуд вайись / В. Е. Шудегов ; записал А. Шкляев // Удмурт дунне. - 2007. - 23 мая. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"