Шубин Лев Леонидович

Материал из Воршуда
Перейти к навигацииПерейти к поиску

Мӧзмонэз буйгато Вало возьёс[править]

Л. Л. Шубин

Лев Шубин – медицина наукаосъя кандидат, Ижысь медициная кун академиысь доцент, запасысь полковник. Академись преподавательёслэн профсоюзэнызы кивалтэ. Лев Шубинэз туэ пыртӥзы «Удмурт кенеш» огазеяськонлэн Ижысь Октябрь ёросысь ёзэзлэн правленияз, удмуртъёслэн 12-тӥ съездазы делегат вал.

Туэ сентябрь толэзе Лев Леонидович 50 арессэ пусйиз.

- Семьяяды кин ке эмчиосты вал ке шат? Враче дышетскыны кин мылкыддэс ӝутказ?

- Атае Леонид Семёнович чутыса ветлӥз. Нырысетӥ группаысь инвалид вылэм, со сярысь нокинлы ӧз вералля. Со котьмар ужаз: мушъёс котырын бергаз, чорыгаз. Пичи дырысеным солэн висись пыдыз шоры жаляса учкылӥ. Вот, эмчи луысал ке, малпасько, мон пыдзэ кемалась эмъясал ини. Мамаеным Валентина Васильевнаен куинь пинал будэтӥзы: мон, Люба сузэре но Алёша выны. Мама, дас классэз йылпумъям мурт, улон секытэн дышетскыны нокытчы мынымтэ. Атайлэсь со дас ареслы егит вал. Шутэтскыны потытозяз «Колос» колхозын скал кыскисьын ужаз. Тятя сизьым классэз йылпумъямын. Ижысь ФЗО пыр потэмын. Егит дырысеныз, пыдъёсыз висемен, кунул бодыосын ветлэмын.

Жаляса верано, мамае но, папае но улэпесь ӧвӧл ни. Секыт ужаса ик, та улонысь дырызлэсь вазь кошкизы. Но ми соослэсь юртъерзэс ӧм куштэ. Гужемзэ отын улӥськомы. Вуж коркамы вӧзы выльзэ ӝутӥмы.

Ӵыдонтэм чебер милям Вавож ёросысь Валодор гуртмы. Гурезь йылын ик сылэ. Солы сӥзьыса, пичи дыръям «Дась лу!» газетэ кылбуръёс но лэзьяме вань. Школамы асьме гуртын ӧй вал. Дышетскыны вить иськеме Виль Бия гуртэ ветлӥмы. Котькыӵе зоро-кото куазь мед луоз, нунал потэм огпалась огпала ветлӥмы.

Тулыс-сӥзьылзэ болотной сапегъёсын ветлӥськом вал. Пичи дыръямы гинэ кезьыт нуналъёсы валэн нуллылӥзы. Толалтэ пеймыт, пичи лёгем сюрес кузя, ӟазегъёс сямен, чур гинэ ог-огмы сьӧры вамыштӥськомы. Бадӟымъёс азьпаламы мыно. Милям, пичиослэн, иземмы потэ, мынон сяменымы синъёсмы кынисько. Ӝытсэ нош озьы ик. Куддыръя оген бертылон дыръёс но тупаллязы.

- Атайдэс эмъяны вуиды на-а?

- Со туж шумпотэ вал, мон эмчи луи шуыса. Доре бертэмме гинэ возьмаса улӥз. Мама но вераны луонтэм шумпотылӥз. Мон соку пинал на вал, тодэм-валаме но ичигес на вал, луоз. Атайме йӧнатыны ӧй быгаты. Табере тодӥсько ни, марлэсь со сыӵе курадӟе вал: суставъёсыз чидантэм висизы.

- Тодон-валан Ижысь мединститутын басьтӥды-а?

- Гуртысьтымы ӵош дышетскем Миша Гущин эшеным одӥг нуналэ Иже шонтӥмы. Мединститут котыртӥ котырским но пушказ пырыны ик кышкамы, медучилищеез шедьтыса, отчы документъёсмес сётӥм но студентъёс луим. Мынам нош мылкыд пирсэкъя, угось враче дышетскем потэ. Миша училищее ик кылиз. Нош мон, одӥг арзэ дышетскыса, армие куриськи. Москва улосысь Монино посёлоке сюри. Санинструкторе шеди, отын ини мыным тӧдьы халат сётӥзы. Трос военной врачъёсын пумиськоно луиз. Вожъяськыса но синмаськыса учкылӥ соослэн ужзы шоры, соос кадь луэме потылӥз.

Армия бере колхозэ куриськи. Председательын Владимир Красильников ужаз. Нош парторгын – Геннадий Шубин. Мыным кыӵе уж сётоно шуыса, шорам кыкназы но паймыса учко. Геннадий Васильевич шуэ: трактор солы сётоно. Озьы монэ «Т-45» трактор сьӧры пуктӥзы. Машина-тракторен ужаны, школаын дышетскыкум, удостоверение басьтӥ вал. Уй-нунал ужаса, трактор гуретэмъя пель сьӧрын жур вазе. Али ке но мон со куараез кылӥсько. Ялан тазьы уд улы шуыса, дышетсконме азинтэме потӥз.

Училищее ӧй мыны ни, кышкатэк Ижысь мединститутэ пыри. Мон сьӧры ик Миша эше но вуиз. Одӥг группаын соин ӵош дышетскимы ини. Паймоно кадь та улон: эшелэн военной врач луэмез потэ вал, нош мынам – огшоры эмъясь. Пӧрмиз мукет сямен: мон военной луи, нош Миша кема аръёс ӵоже ини Каракулино черкогуртысь ёрос больницаын хирург луыса тырше.

Мынэсьтым адӟем карыса, Люба сузэре но сьӧрам кыстӥськиз. Ми соин одӥг группаын ӵош дышетским. Со невропатолог луыса Нижний Новгородын ужа. Удыссэ яратэ.

- Огдыре кык муртэ дышетыны анай-атайдылы секыт йӧтӥз, луоз?

- Гуртын со вакытэ секыт вал улон. Мамаен атаез али ке но туж жалясько. Мама огназ ужаз, уждун кисы тыраз ик ӧз басьтылы, луоз. Нош кык муртэ кызьы ке но дышетоно вал. Кытӥ-отӥ пунэмалляз но, дыр. Озьы ке но кызьы милемыз дышетод шуыса ноку ӝожтӥськемзэс кылэм-адӟеме ӧй вал. Сюресъёс но соку йӧнала ӧй вал. Иже мынон понна Вало шур вамен пыжен потоно. Инга станциозь вить иськемез пыдын вамышъяно. Училищее пыреме бере монэ шур вамен поттон понна вазь ӵукна ик мама Лёшик вынме, пичи мае ке, сайкатэ ни вал: «Лёвиктэ келя ай, пие». Соизлэн кӧлэмез но туж потэ вал, дыр, но, пал кыл вератэк, гур вылысьтыз васькыса, монэ келяны мынылӥз. Отӥзэ, пыдесозь лысвуэз коласа, вокзалозь мынӥськод. Озьы ик городэ вуиськод. Дӥсьмы выламы куасьмылӥз.

Дышетскон мыным туж кельшиз. Ньылетӥ курсэз йылпумъяй но Нижний Новгородысь институтлэн военно-медицинской факультетаз кошки отысь дышетӥсьёс ӧтемъя. Отчы мыныны дасо пала пиос ӝуткаськимы. Ваньзы берен Иже кошкизы, мон кыли. Институтэз йылпумъяса, лейтенант луи. Нижний Новгородысь Сармовской дивизие мыныны дэмлазы: отын, пе, врачъёссы ӧвӧл. 1990-тӥ аръёсы вал со. Ӵапак со вакытэ кунгож сьӧрысь частьёсты асьме доры поттылӥзы.

Нырысь ик полкын медицина службалэн начальникез луыса тырши. Врачъёс ӧз тырмылэ. Вань висисьёс мон доры лыктылӥзы: кинлэн ке йырыз пиле, кин ке чиньызэ вандыны шедьтэ, куинетӥезлэн кӧтыз чутыръя. Собере монэ дивизиысь медицинской батальонэ дерматологе выжтӥзы. Нижний Новгородын кожно-венерологической институт вань. Со удысъя специализациез отын ортчи.

Вить ар ужаса, Санкт-Петербурге военно-медицинской академиын дышетскыны ӵектӥзы – армилы кивалтӥсьёс дасянъя факультетаз. Отын куинь ар тодон-валан люкай. Секыт озьы: пумен дышетскисько, пумен диссертациме гожтӥсько. Сое йылпумъяса, генераллэсь званизэ басьтыны луэ вал. Мон отчыозь ӧйгес вуы. Полковникозь ӝутскыса вуттӥ ик, собере армиын кутскизы бадӟымесь сокращениос. Соос али ке но мыно.

Шумпотӥсько, сыӵе чебер городын улыны но дышетскыны кылдӥз шуыса. Нева шур, музейёс, Зимний дворец… Со чебер макеос мынэсьтым, гуртысь потэм пияшлэсь, йырме ик пӧромытылӥзы. Улон инты пумысен ӧй курадӟы, общежитие сётӥзы. Одӥг каникулам но бертылытэк ӧй чидалля, лобыса доре кошкисько вал. Адӟи, кызьы калыкъёс уло. Ялан ӵошатӥсько вал городысь но гуртысь адямиослэсь улонзэс. Ужез сяна, гуртын мае адӟо? Вот, малпасько, та чеберез гуртоос ас синъёсынызы ке адӟысалзы. Али ке но жаль пото мыным гуртын улӥсьёс. Уж капчиямын шуо ке но, ферма со ферма ик кыле ини.

- Улыны со ворекъясь городэ ӧд кыле, дыр, ук?

- Дышетсконме йылпумъяса, табереяз монэ келязы Сибире, Томскысь военно-медицинской институтэ. Нырысетӥ аръёсаз отделенилэн начальникез луыса ужай. Собере институтлэн научно-исследовательской отделэныз кивалтӥсе юнматӥзы, амбулаторно-поликлинической кафедраен кивалтӥ. Коллективмы туж умой вал, ог-огмес валаса, ог-огмылы юрттыса ужамы. Мыным кивалтоно луиз тодосчиосын, визьмо преподавательёсын. Со кафедраын 2009-тӥ арозь тырши. Тямыс арзэ институтын учёной советлэн секретарез вал.

- Пичи гинэ гуртысь потэм удмурт пияшлы шурдыт ик вал, дыр, со быдӟа интыосын ужаны? Ӵош ужась эшъёсты удмурт выжыысь луэмдэс тодылӥзы-а?

- Аслым ачим куддыръя паймылӥ: мон, огшоры, пичи гинэ гуртысь потэм удмурт пияш, сыӵе визьмо адямиосын кивалтӥсько шуыса. Ӵемысь Удмурт шаерме тодам вайылӥ. Укное учкисько но малпасько: Вало дорам эшъёсы возь вылын пудо-животсэс возьмало, луоз, семьяенызы турын окто-калто, нылпиос шурын пыласько… Ултӥямзэс, мурт адями каремзэс Нижний Новгородын но, Санкт-Петербургын но, Томскын но ӧй шӧдылы. Ваньмыныз одӥг радын вамышъяй. Удмурт луэмме нокытын ӧй ваты. Ма, сое шараятэк йӧныз но ӧвӧл, «Личной делоын» ваньмыз гожтэмын ук.

Капчи ӧй вал, ужын котьку но шуг-секытъёс пумиськыло. Но мыным котьку улонам ӟеч калыкен удалтылӥз. Томскысь военной институтын туж умой вал генералмы Олег Жаткин. Адямиез со ноку но тоно-моно ӧз карылы. Ужаны быгатэмез адӟылӥз. Со тодэ вал: монэ мурт дуннеын нокин вылӥе ӝутыса ӧз возьы, ас кужыменым но тодэм-валаменым ӝутскыны быгатӥ, со понна гажалляз. Сибирьын адямиос чылкак мукетэсь, соос ог-огзылы котьку юрттыны дасесь. Пусйыны кулэ на: отын туж зол наука азинске. Кызьы тодӥськом историысь, визьмо адямиосты узникъёсты вазен Сибире келяллязы ук. Озьы ик тӥни тросэз визьмо адямиос отчы выжы лэзизы, луоз.

- Озьы ке но удмурт кылдэс нокытын ӧд вунэтэ. Томскысь удмурт студентъёсын но анай кылыныды вераськиськоды вылэм, шуо.

- Солэсь азьвыл вал кылэме, Сибире трос удмуртъёс улыны кошкемын шуыса. Отысен тодӥ ини, пырак нимаз-нимаз гуртъёсын, пе, уло. Юромо соосты утчаны олокӧня пол сюрес вылэ поталляй. Но сыӵе жалясько, доразы таки ӧй вуы. Гуртъёслэн висъёссы отын туж бадӟым. Сюрес вылысь мынӥсь-ветлӥсез ик пумитаны уг луы. Машинаед тӥяськиз-мараз ке, нокин юрттӥсь уз шедьы. Нош изьверъёслы адямиез кесяны кема ик ӧвӧл. Озьы ик тӥни Сибирь музъем вылысен кыли асьме выжы калыклэсь улонзэ адӟытэк. Но уж дурам ӵем гинэ пумиськылоно луылӥз удмурт нылпиосын но анай-атайёсын. Институтэ дышетскыны пырыны трос пол юрттэме но вань.

- Котькыӵе дуннеетӥ ветлы но, вордӥськем палъёс малы ке берен доразы кыско.

- Быдэс Россиысь военнойёсты сократить каремысь ӧз дугдылэ. Военной институтъёсысь – Томскысь, Самараысь, Саратовысь – тросэзлы преподавательёслы ужысь дырызлэсь вазь кошконо луиз. Мынам военной стаже тырмемын ни вал бере, уж понна сокем ӧй ни сюлмаськы. Кытчы улыны интыяськоно шуыса гинэ ӧжытак ӧпкели. Дас ар Томскын улӥмы. Соку йырам калыклэн визьмо веранэз лыктӥз: кытын вордскид, отын ик кулэ луид. Малпасько, ужан но улон опыт бадӟым ни, оло, мар ке ласянь но вордӥськем палъёсылы, удмурт калыкелы ӟечсэ лэсьтыны быгато на. Иже бертыса, медакадемиысь ректор доры пыри. Николай Сергеевич Стрелков умой пумитаз, дышетӥсьёс котьку кулэ, лыкты, пе, басьтом. Тау Николай Сергеевичлы, доцентлэсь должностьсэ сётӥз. Кузпалы но медакадемие ик ужаны интыяськиз, фармакология кафедраын ужа, со сяна, лечебной факультетын деканлэн юрттӥсез.

- Лев Леонидович, кузпалдэс мукет шаерысь шедьтӥды-а?

- Тани мар паймымонзэ вераме потэ. Вуоно кузпалэным мон, Ижысь мединститутын дышетскыкум, тодматски. Со микробиологиен дышетӥсь вал. Егит мылкыд ук: синмаським, кузпалъяським. Калыкез шуак-дуак медам паймыты шуыса, кышнояськи но соку ик мукет шаере «пегӟи», Нижний Новгородэ дышетскыны пыри. Зинаида Валентиновна научной сотрудник луыса тыршиз. Татын но солэн ужез микробиологиен герӟаськемын вал. Мыным Санкт-Петербурге кошконо луиз но, Зинаида Валентиновнае но сьӧрам ик мынӥз. Отын но со наука удысэ кыстӥськиз. Пастер нимо научно-исследовательской институтын ужаз. Ижысь татчыозь нокин со институтын ужамын ӧвӧл. Кузпалылэсь ӟеч йӧнатыны быгатэмзэ шӧдыса, дораз эмъяськыны тодмо артистъёс но ветлӥзы. Кузпалы но медицина наукаосъя кандидат луиз. Зинаида Валентиновна вордскемын Кизнер ёросысь Короленко черкогуртын.

- Кылэме вань, одӥг шутэтскон нуналэ но дорады уд пукиське, вордскем палъёсады потӥськоды.

- Ваньмон дыр шеде ке, четлыкысь мозмем тылобурдо кадь, кузпалэным ӵош, машинае пуксьыса, вордскем палъёсам ширтӥсько. Яратӥсько шур кузя поръяны, солэсь чеберзэ учкыны. Асьмелэн кадь нокытын но чебер но мусо инкуазьмы ӧвӧл, дыр.

- Тӥ медакадемиысь профсоюз комитетэн кивалтӥськоды. Мукет организациосын соос кемалась уг возисько ни.

- Академиысь профсоюз организацимы милям туж быгатыса но синмаськымон тырше, отын – 500 пала адями. Вазиськись муртлы коньдонэн юрттэт сётыны, санаторие путёвка шедьтыны быгатӥськом.

- Тӥ гуртын улӥсь удмурт калыклэсь вашкала сямъёссэ, йылолъёссэ утён понна сюлмаськиськоды. Бадӟым саклык висъяськоды будӥсь нылпиослы. Озьы ик тӥ черкен но ӟеч кусып возиськоды.

- Асьмелэсь улонмес нылпиослы азинтоно ук. Соослы саклык ӧд ке висъя, лулпушсы лябомоз но сӧриськоз. Озьы ик вунэтоно ӧвӧл арлыдоос сярысь но. Оже ветлэмъёслы синпелетъёс котькуд гуртъёсын сямен пуктэмын. Нош со вакытэ ик фронт мышкын ужасьёсты вунэтӥськомы. Соин Валодорамы, ужась муртлы но оже быремъёслы сӥзьыса, юромо часовня усьтӥмы. Элькунамы таӵеез ӧвӧл на, шуо.

Мон Инмарлы оскись врачъёслэн обществоязы пыриськисько. Таиз ласянь ректорлы Николай Сергеевичлы тау шуыны кулэ, со сюлмаськемен, академие вӧсяськон зал усьтэмын. Табере отчы студентъёс но пыраны быгато ини.

Мон удмурт калыклэсь мӧзмыса кема улэменым сэрен, лэся, солэн берган ӧраз кыстӥськемме валаса ик ӧй вутты. Медакадемиысь удмурт преподавательёсын но студентъёсын «Удмурт кенешлэсь» пичи ёзэтсэ кылдытӥмы ни. Али отчы тужгес но мыло-кыдо 15 преподавательёс но ог дасо пала студентъёс пырисько. Малпасько, дорамы азьланяз тросгес но тросгес студентъёс кыстӥськозы. Туэ сӥзьыл Ижысь Октябрь ёросысь «Удмурт кенешлэн» правлениезлэн ёзчиез луи. Озьы ик шуд усиз удмуртъёслэн 12-тӥ съездазы делегат луыса пыриськыны.

Асьме калык – ужась калык. Со котьмар карыны быгатэ, но туж кема, дӥсьтоно-а, ӧвӧл-а шуыса, малпаське. Вылез борды кутскыны кышка. Одӥг гинэ учырез вераме потэ. Сьӧлта ёросысь Эшмедьгуртэ куное ветлӥмы. Тодмоосылэн нылзы соку гинэ школазэ йылпумъям. Малы вылӥ дышетсконние уд пыриськы юамелы кышкатскиз ук: мон уг быгаты. Анаез но уз, уз быгаты со отын дышетскыны, медаз ик ветлы, шуэ. Дышетскыны мынон ласянь ӝуткай мон со нылашез, экзаменъёссэ но туж умой сётъяз, табере медакадемиын дышетске.

Ми дышетскон вакытэ туж трос удмурт нылъёс но пиос мединститутын тодон-валан люказы. Али соослэн лыдзы чутрак кулэсмемын. Кышканмы асьмелэсь бадӟым. Дӥсьтӥсьгес луоно ни вал, асьмеос котьмар карыны быгатӥськомы ук.

Источник:

Шубин Л. Л. Мӧзмонэз буйгато Вало возьёс / Л. Л. Шубин ; записала Любовь Тихонова // Удмурт дунне. - 2012. - 21 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"