Шкляева Татьяна Геннадьевна

From Воршуд
Jump to navigationJump to search

Нунал медло яркыт![edit]

Т. Г. Шкляева

Татьяналэн нуналыз азьын йырамы бергатӥм трос удмурт Такъянъёсты, Танюшъёсты. Уноез сярысь ми тӥледлы мадиськеммы ни. Нош та муспотон егит кышномуртэ тодмаськоды-а?

Татьяна Шкляевалэн куараез, тапыр эктэмез туж кельышлы вал «Устолык», «Айкай» коллективъёсын, «Эктон корка» студиын. Россиысь улосъёс куспын ортчем «Юрган-2001» конкурсын со нырысетӥ инты басьтэмын, 2003-тӥ арын «Голоса России» конкурсын кунысьтымы сизьым устоосыз кырӟасьёс пӧлы пыртэмын. Со сяна, Татьяна - шаерысьтымы фольклоръя специалист, бадӟым калыккуспо фестивальёсты радъясь. Нош кылем арысен солы оскизы республикаысьтымы «Эшъяськон юрт» учрежденилэн директорезлэн воштӥсез луыны.

- Адямилэн нимыз - солэн адӟонэз, шуо. Татьянаос - кыӵеесь соос? Та ним тӥледлы тупа-а кадь?

- Туж тупа. Грек кылысь берыктыса, Татьяна возьматэ «радъясь» шуэмез. Аслэсьтыз улонзэ, юрт пушсэ, котырзэ радъяны быгатӥсь. Со сяна, нимы туж небыт. Татьянаос лякытэсь. Зэм, керӟегъяськытэк уг луы, но котьку тыршиськод керетытэк, гань-гань, огкыл шедьтыса, ог-огдэ валаса улыны. Таӵе ним сётэмзы понна анай-атаелы бадӟым тау шуисько.

Вордӥськи Эгра ёросысь Лудошур гуртын. Вить аресме тырмытыса, улыны выжимы Сеп гуртэ. Отысен угось школае ветлыны матынгес вал. Анай-атае колхозын ужало. Папа - механик, весь машина котыртӥ берга. Мама - бухгалтер. Кыкназы но кырӟаны ярато. Мон но яратылӥ эктыны-кырӟаны. Школаын, клубын ортчись ужрадъёсы, кырӟанъя, хоръя но мукет кружокъёсы ветлылӥ. Дышетӥсьёс туж мыло-кыдоесь вал. Весь малпалляй: крезьгуръя школае ветлысал ке, дышетсконын но «витьёс» гинэ басьясал. Мылкыды ялан кыстӥськиз кырӟан, кыӵе ке ужрадъёсты ортчытон котыре.

- Школаын шуген дышетскиды шат?

- Ӧй. Ваньмыз потылӥз мылкыд бордысь. Концерт дасянэн вырыкум, туж бурдъяськылӥ, школаын но соку ӟечгес дышетскыны кутскисько вал. Гуртамы куинь бадӟым урам - котькудӥз нимаз дасялляз пӧртэм номеръёс. Собере концерт пуктылӥмы. Туж тунсыко.

Яратоно ужен выриськод ке, тодон-валан басьтонын но ваньмыз туж капчиен, вольыт мынэ вылэм. Али но озьы ик - макем трос луэ уже, сокем трос лэсьтыса вуттӥсько. Нош ныпъетэ капчия ке, йыре ӝож мылкыдъёс пыро. Соку утчаны кутскисько выль ужъёс, аслым шуг-секытъёс юри кылдытӥсько. Олома умойтэмез сярысь малпаськыны дыры медаз кыльы.

Мон пичи дыръям ик тодӥсько вал: луо артистка. Нош сочинениосам гожъялляй: крезьгуръя дышетӥсь. Артистка луон мылкыдме шарае поттыны возьдаськылӥ. Школаын мон туж востэм вал.

- Нош культурая училищеын дышетскон кызьы сётӥськиз?

- Отын мон бурдъёсме вӧлъяй. Аслэсьтым малпанъёсме но, куддыръя кылме но вераны кутски. Мыло-кыдо дышетски. Урокъёсы лопырскыса мынӥсько вал. Вазь ӵукнаысен бер ӝытозь училищеын пукылӥ. Урокъёс бере баянэн, арганэн, фортепьяноен, балалайкаен шудылӥ. Милям фольклоръя отделениын соку туж зол вал хореография. Арняяз куать час ӵоже эктыны дышетылӥзы. Со сяна, мон «Инвугур» коллективе ветлыны кутски.

Училищеын дышетсконме озьы ик бурдъяськыса йылпумъяй. Малпай Москвае культурая институтэ мыныны. Но Россилэн шоркараз вокзалэ вуи но валай: монэ татын нокин уг возьма, кытчы мыныны уг валаськы. Бӧрдыса сылӥ. Озьы ке но институтэ экзаменъёсме умой сётӥ. Но ваньмыз со сюлэмыя ӧй вал ни. Шуом, Ижын группаямы мон фортепьяноен тужгес ӟеч шудӥсь вал ке, Москваын озьы ӧз адӟиськы ини. Отчы лыктэмъёс ваньзы туж кужмоесь. Мон инметӥ лобамысь дугдӥ.

Удмуртлэн сыӵе сямыз, дыр, мурт дуннелы со секытэн дыше. Малпай: куке-соку Удмурт университетын но культурая кыӵе ке ёз усьтозы, отчы дышетскыны пыро. Тӥни озьы Москваысь бертӥ вордӥськем гуртам.

- Эрикез шӧдэм, лопырскем муртлы сыӵе вамыш лэсьтыны капчи ӧй вал, дыр. Со пумысен ӧд жалялэ-а?

- Ӧй. Москваын дышетсконме йылпумъяса, гуртэ бертыны эшшо секытгес луысал ни. Мон малпай: та улонын ваньзэ дыртытэк, радызъя лэсьтоно. Эгралан калыклэсь ваньмон дырзэ радъянъя центрын методист луыса ужаны кутски, «Устолык» коллективен кивалтӥ. Ансамбльмы калык ним басьтӥз. Ветлылӥм гуртысь гуртэ, концертъёс пуктылыса. Клубтэм, школатэм туж пичи гуртъёсы но вуылӥм. Озьы тыршимы калыклэсь мылкыдзэ бурдъяны, ӟечезлы осконзэ улӟытыны.

Нош огпол гуртамы вуиз «Айкай» коллектив. Тӥни соку артистка луон чагыр малпанэ нош ик сайказ. «Айкайын» кырӟа ни вал училищеын ӵош дышетскем эше Светлана Зубкова. Мон куриськи ансамбле. Солэн чеберлыкъя кивалтӥсез Евгений Серебренников шуэ:

- Ойдолэ, быгатэмдэс эскером, кырӟалэ маке…

Артистъёс пуксизы но йӧно тусын кылзо монэ. Нош табере, пе, эктыса возьматэ… Тӥни озьы аспӧртэм экзамен ортчытӥзы но шуизы: али ик дорамы басьтыны интымы ӧвӧл, луонлык кылдӥз ке - ӧтёмы. Быдэс ар ортчыса гинэ, Серебренников жингыртӥз. Тӥни озьы кошки Иже. «Айкай» коллективын мыным туж яра вал. Но татчыозь отын ӧй чидасал, дыр. Ужез огвыллемгес потылӥз. Нош мынам потэ на вал кыӵе ке мургес ужпумъёсын, дышетонэн, югдытонэн выреме. Соин но огдыре ик ветлыны кутски «Эктон корка» студие. Нош ӝоген университетысь искусствоосъя но дизайнъя институтын усьтӥськиз калык творчествоя ёз. Отчы дышетскыны пыри, «Айкай» коллективысь кошконо луи.

Кӧня ке улыса, интыяськи республикаысьтымы творчествоя центре методист луыса ужаны. Соку соин кивалтэ вал Культурая министерствоысь туж тодмо, ӟеч специалист Зинаида Михайловна Никитина. Центрын уже туж яралляз. Огвакытэ ик юн кусып вози егитъёслэн «Шунды» огазеяськонэнызы, «Шундыкар» лагере монэ фольклоръя специалистэз сямен ӧтчаны кутскизы.

Калык творчествоя центре вуэме бере ик монэ куризы республикаысьтымы Гербер праздниклы программа дасяны. Со понна калыкен вераськыны быгатоно, коллективъёсын огкыл шедьтоно, трос жингыръяно. Пӧрмытӥ. Азьланяз но выри пӧртэм фестивальёсты, концертъёсты радъянэн, проектъёс гожъялляй. Административной ужез шӧмъяй, валай - быгатӥсько. «Воршуд», «Вашкала музъемлэн выль кырӟанэз», «Инву утчан гур», «Ӝужась кизилиос» но трос мукет проектъёсты дасянэ но ортчытонэ пыриськи. Калык творчествоя центр, университет, «Эктон корка», «Шунды» огазеяськон - ваньмыз со ог-огеныз юн герӟаськиз, сизьым ар ӵоже со мынам аспӧртэм дуннее вал. Кунгож сьӧры но трос поталляй. Вуылӥ Эстоние, Венгрие, Финляндие, Турцие.

- Нош Эшъяськон юртэ кызьы вуиды?

- Соку пичи пиналыным пукисько вал. Дорам лыктӥз нациосын ужан политикая министрлэн воштӥсез Наталья Смирнова. Озьы но озьы шуэ, ӝоген шаерамы Эшъяськон юрт кылдоз, отчы ужаны ӧтиськом. Тынад удмурт калык огазеяськонъёсын, коллективъёсын кусыпъёсыд вань, азьвыл но министерствомылэн пӧртэм проектъёсаз пыриськылӥд, ачид но ужрадъёс ортчытъяд. Выль ужед секыт ке потӥз, юрттомы.

- Эшъяськон юрт - со туж аспӧртэм учреждение. 70-лэсь трос ужасьты, ваньзы пӧртэм выжыысь. Егит кивалтӥсьлы соосын одӥг кыл шедьтыны секыт ӧвӧл-а?

- Али сокем секыт ӧвӧл ни. Дорамы пӧртэм учреждениосысь вуэмъёс ужало. Ваньзы аспӧртэмесь. Котькудӥз соос асьсэ ужан радлыксылы дышемын вал. Нош Эшъяськон юртлэн аслаз куронъёсыз. Али ваньзы сое валазы ни кадь.

Директормылы Роман Александрович Горяиновлы 31 арес гинэ. Ми соин огъёзъёс. Со вала: мон егит на. Нош мон валасько: со егит. Соин ик ог-огмес пыкылытэк, ог-огмылы юрттӥськыса, ужаськом.

Учреждениямы ужало ӟучъёс, удмуртъёс, бигеръёс, немецъёс, еврейёс - ваньмыныз огъя кыл шедьтӥськом. Сотэк кызьы? Милям куать отделмы: калык культураез азинтонъя, финн-угор калыкъёсын кусып возёнъя, дышетонъя но методикая, иворъёсъя но издательствоя, социокультурая но техсредствоосъя. Офисъёсмы сётэмын пӧртэм калык огазеяськонъёслы. Пусйыны кулэ, Эшъяськон юрт усьтӥськем бере республикаямы улӥсь калыкъёс чырмытгес луизы. Татчыозь 29 калык огазеяськон ке вал, ӝоген эшшо кӧняез ке кылдоз. Документъёссэс дасяло шаерамы улӥсь мордваос, грузинъёс, сербъёс.

- Но ваньмызлы соослы Эшъяськон юртын висъет шедёз шат?

- Со понна ик со Эшъяськон юрт. Тани, шуом, еврейёс офисазы огназы ай. Ми одно ик кинэ ке вӧзазы интыялом на. Учрежденимы азьын сылӥсь валтӥсь ужпум: пӧртэм калык огазеяськонъёслэсь ужрадъёссэс ортчытыны юрттон. Татчыозь соос кытын сюрем люкаськыло вал ук.

Эшъяськон юрт ортчем арын сӥзьыл гинэ усьтӥськиз ай, но ми трос бадӟым ужрадъёс ортчытыса вуттӥм ни. Дорамы вуылӥзы Россиысь но кунгож сьӧрысь бадӟым адямиос. Ортчиз Россиысь Кун Кенешлэн пумиськонэз, ветлӥз Президент Дмитрий Медведев.

Туэ ортчоно бадӟым ужрадъёс пӧлысь пусйысал Россиысь «Молодые голоса-2009» конкурсэз, финн-угор калыкъёслэсь «Воршуд» фестивальзэс. Огазеяськонъёс но асьсэ ужрадъёссэс ортчытъялозы. Толэзьлы быдэ люкаськылэ Удмурт нылкышно кенешлэн «Табань» клубез, малпаськомы «Эктон корка» студилэсь ӝытъёссэ ортчытъяны. Радъяськозы этнокультура удысын проектъёс гожъянъя, арт-менеджментъя, арт-технологиосъя семинаръёс.

- Котькуд калыклэн аслаз сюресэз, аспӧртэмлыкез. Куд-огез али ӧпкеле: удмуртъёс кивалтыны вордӥськемын ӧвӧл, соослы та удысэ кыстӥськонэз но номырлы, мед, пе, асьсэ быгатоно уженызы ик вырозы, кырӟалозы-вералозы ни…

- Сыӵе малпан шонер ӧвӧл. Калыкмы пӧлын трос визьмо, гажано кивалтӥсьёс. Соос ужзэс, котыр ласянь малпаськыса, дыртытэк, радъяло. Со урод шат? Кытын ке кулэ ӝоглык, кытын ке - визьнод, улонэз валан… Тросгес тодон люкано, калыкен ужаны дышетсконо. Нош кырӟаны быгатэм нокинлы уз люкеты.

- Сцена вылысь тӥледыз адӟыны уг луы ни. Кырӟаськоды на-а?

- Ас поннам. Но али выль дэремъёс заказтӥ, концертме дасян борды пумен басьтӥсько ни.

- Татьяна - «радъясь» кыл бордысь, шуиды. Шӧдӥське: улонын тӥ ваньзэ лад-лад, огсыр радъяны тыршиськоды. Нош чакламъя уг пӧрмы ке?

- Мыным туж зол юрттэ ӟечезлы оскон. Котьку, котькытын. Шуом, уж дурын мон оскисько соизлы яке таизлы адямилы, оскисько: мар кулэ - со быдэстоз, валалоз. Куд-огез шуэ: ужасьёстэ, нырысь ик, чакласа возёно. Нош мон шуысал: соослы осконо, ужез ӵош лэсьтоно.

Котькуд учырысь пайдазэ, визьнодасьсэ адӟыны быгатоно. «Уг» шуыса, адями аслэсьтыз азьланяз кыӵе ке сюрессэ ӵоге. Котьку утчано «я» карон луонлыкъёс. Тани, шуом, жингыртӥзы Пермь палъёс. Суббота нуналэ ӝыт, пе, Иже вуылом, туж потэ Эшъяськон юртэ пыреммы, уженыды тодматскеммы. Но Эшъяськон юртэ со нуналэ асьме ужасьёсмы гинэ но пырыны уг быгато. Азьвыл вераськытэк, возьмаськисьёс нокинэ уз лэзе. Учрежденимы азьын сыӵе юн куронъёс. Ма кароно? «Ум быгатэ» шуыса, ми адямиосты ӝожомытом ук. Утчано луэ ни югдурысь потон амалъёс. Ачид сярысь гинэ уд, Удмурт Республикалэн данэз сярысь малпаськиськод. Соку шуг-секыт учырысь потон амалъёс одно шедё.

Уг яратӥськы огвыллем нуналъёсты. Соку мон кытчы пырон инты уг шедьтӥськы. Соин ик тыршисько котькуд нуналэз аслым, котырысь эшъёсылы пайдаен ортчытыны.

- Кыӵе кырӟан тӥляд улондылы тужгес но тупа кадь? - «Мон бакчаям мертто пинал льӧмпу,

Арлы быдэ со мед сяськаялоз…»

Та кырӟанлэн кылъёсыз но, гурез но туж сюлэмыя.

Источник:

Шкляева Т. Г. Нунал медло яркыт! / Т. Г. Шкляева ; Елена Миннигараева // Удмурт дунне. - 2009. - 23 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"