Широбоков Владимир Иванович
Зарезе мынам - бусы[править]
Тодосчиен, корт тӥрлыкен ужасен, пумиським лабораториын. Гур-р-р! потто моторъёс, ӵашето станокъёс. Егит мурт сямен одӥг интыысь мукетаз бызьылыса кадь вутске халатэн воргорон. Ныр вылаз - корт пырыослэсь утись очки. Владимир Широбоков - техника наукаосъя кандидат. Кивалтэ Ижысь гурт удысъя академиысь механикая факультетлэн машина тупатонъя кафедраеныз.
Татын нырысьсэ Удмуртиын асьсэ кужымен бичазы картошка октон агрегат - «Кабан». Со бадӟым ик ӧвӧл - чакламын пичи бусыосын ужаны. Приволжск федерал округлэн техникаез возьматонъя Ижевскын ортчем берло форумаз «Кабанэз» зарни медален дунъязы. Владимир Ивановичлэн но эшъёсызлэн вань та сяна но данъяськымон тӥрлыксы - ю тысь векчиятон, небӟытон агрегат.
В. Широбоков котыр ласянь тунсыко адями: учёной, кивалтӥсь, дышетӥсь, пӧйшурась, губиясь, спортсмен, яратоно кузпал но атай. Вордскиз со 1959-тӥ арын Эгра ёросысь Тыло гуртын огшоры ужась крестьян семьяын. Анаез вань улонзэ тыршиз больницаын - сюдӥз эмъясьёсты но висисьёсты. Атаез ужаз сюрес лэсьтон-тупатон бордын. Бӧрысьгес Широбоковъёслэн семьязы улыны выжиз Эгра ёросысь Чутыр черкогуртэ. Володя, сузэрез но выныз йылпумъязы отысь школаез.
Школаын Володя умой дышетскиз: «ньыльлы» но «витьлы» гинэ. Тужгес кельшизы солы математика, физика, химия предметъёс. Лычсузьыса ик дышетӥз географиез. Угось пичи дырысеныз ик малпа вал пӧртэм шаеръёсы-кунъёсы вуылыны. Ӟуч кыл гинэ секытэн сётскиз.
- 10-тӥ классэз йылпумъяме бере медӥсько вал пырыны морфлотлэн Ленинградысь училищеяз, - вера Владимир Иванович. - Эмъясьёс тазалыкме бергась пуконын эскеризы но, уд яраськы, шуизы. Озьы соос зарезьёстӥ уян сярысь малпанэлы пум пуктӥзы. Эсьмаса, бӧрдэме ик потылӥз. Вӧтъёсам али но тулкымъёслэсь веттамзэс шӧдӥсько кадь. Но офицер луон мылкыды ӧз ышы - дышетскыны малпай Ростов-на-Дону городысь артиллеристъёсты дасянъя училищеын. Вуи отчы - ӧз кельшы. Бертӥ. Ижысь гурт удысъя институтэ пырыны кылиз на вал одӥг нунал гинэ. Мон кырми со луонлыкез.
Ӵапак соку Владимир Широбоков одӥг зарезьысь мукетаз вуиз - шедьтӥз аслэсьтыз улон ӧрзэ. Пичи дыръяз ик олокыӵе но машина-трактор шудонъёс лэсьтылӥз, трос пол бичалляз моторен ужась велосипед. Школа бӧрсьы дышетскиз трактористэ. Йырыз-пыдыз луиз механикая факультетэ пырыны. - Механизаторлэн удостоверениез мыным, институтын дышетскыкум, юн юрттӥз. Котькуд гужем ужай тракторен яке комбайнэн. Ӵемгес аслам гуртам, Чутырын: пудо сиён дасяй, ю арай-кутсай. Ыстылӥзы мукет интыосы но. Огпол ӵыпет лэсьтӥм Дэри ёросысь Пероггуртын. Со ик мынам практикае но вал. Мон ачим дышетӥ студент эшъёсме механизация удыслы. Соос пӧлын инструктор вал. Туж шулдыр улӥм: дышетскиськод, спортэн выриськод, кырӟанъя ансамбле ветлӥськод, комсомоллэн ужаз пыриськиськод, дружинаен урамез эскериськод. Озьы тӥни аръёслэсь ортчемзэс ик ӧм шӧдылэ. Инженер-механик удысъя диплом басьтэмез бере Владимир Ивановичез ужаны кельтӥзы институтэ ик. Кык ар дышетӥз вуоно зоотехникъёсты, со дыре ик кивалтӥз факультетысь комсомол огазеяськонэн. 1986-тӥ арын дышетскыны пыриз Челябинскысь аспирантурае.
Удмуртиысь механикъёсты аспирантурае кык интые гинэ келяло вал: Ленинградэ яке Челябинске. Уралысь институт - Россиын кужмоез, вылаз ик, отын трактор но мукет техника поттӥсь бадӟым предприятиос вань. Отын но тэк ӧй улы: дышетсконын пӧртэм ӵошатсконъёсы пыриськылӥ, ансамбле ветлӥ - гитараен шудӥ. Аспирантураын куинь ар дышетскеме бере Иже берытски.
- Диссертациды маин герӟаськемын вал?
- Пудоез механизация амалэн сюдон. Ачим ик Якшур-Бӧдья ёросысь «Забегаловский» совхозын сюдон цех лэсьтӥ, тракторен сиён нуллӥ, пудоез утялтӥ. Мыным юрттӥськизы хозяйствоын ужасьёс, студентъёс, преподавательёс. Али но ваньмызлы тау карисько.
Институтэ берытскыса, Владимир Широбоков быдэс ар кивалтӥз пӧртэм приборъёсъя лабораториен, таин ӵош ик дышетӥз на механизация кафедраын. 2006-тӥ арысен кивалтэ кыклэсь огинэ карем кафедраен - машинаосты тупатонъя но конструкциослы материалъёс дасянъя. Ижысь гурт удысъя кун академиын ужало бакча емышлэсь но будосъёслэсь удалтонлыксэс ӝутон бордын. 200-лэсь ятыр патент сётэмын пудо вордон ужъёслы. Техника кылдытон но бичан бордын трос выро механика но электрофикация факультетъёсын. Татысь механикъёс ма гинэ но ӧз лэсьтэ ни: картошка но ӵужкушман октон агрегат, пичи тракторъёс, усыян, гырон, му небӟытон тӥрлык.
- Та ужлы вань улонзэ, дырзэ сётэ Павел Леонидович Максимов. Техника наукаосъя доктор котькудмылы юрттыны дась. Вань лэсьтэм ужъёсмы со пыр ортчо, - дышетӥсез сярысь гажаса вера В. Широбоков.
- Улон азьлань мынэ, техника но тӥрлык воштӥсько. Тӥледлы но туала куронъёслы тупасьёсыз кулэ, дыр? - Ми сое валаськом, но коньдон уг окмы. Огез буйгатэ: техника выльдӥське, нош ужан амаллэн шорсюлмыз одӥг выллем кыле.
- Озьы ке но инженер-механиклы ялан дышетсконо луэ, дыр?
- Сотэк нокызьы, тужгес но кунгож сьӧрын бичам трактор-машинаез тодон вылысь. Академиын ми сётӥськом огъя валан, нош отӥзэ визь-нод люкано ни улытозяд. Но мон котьку шумпотыса пусйисько: академиез йылпумъямъёсты котькытын ушъяло. Тани, ИПОПАТ-ысь валтӥсь инженер шуэ: тӥляд, пе, механикъёсты ваньмызлэсь умоесь, соос сярысь ӟеч кылъёс гинэ верало автозаводын но.
Студентъёсмы пырисько пӧртэм конкурсъёсы но олимпиадаосы. 2008-тӥ арын Саранскын ортчем олимпиадаын милямъёс нырысетӥ интые потӥзы. Вуж тӥрлыкен дышетскыса но, егит пиослэн тодон-валанъёссы туж муресь. Умоесь кусыпъёсмы Санкт-Петербургысь, Пермьысь, Челябинскысь, Саранскысь, Казаньысь но мукет городъёсысь вузъёсын. Вуылӥськом соос доры, соос - ми доры. Семинаръёс-кенешъёс пыр трос выльзэ усьтӥськом. Берло дыре та ласянь туж бадӟым юрттэт сётэ Интернет. Отысь трос выльзэ шедьтоно, тужгес но техника удысъя.
- Гурт удысъя академиез йылпумъясьёслэн малы ке гуртэ берытскемзы уг поты. Мугез валамон: егит специалист шугъяське улон инты, пичи уждун ласянь.
- Зэм, гуртын али секыт, уждун ичи, шутэтскыны нокытын. Соин ик егитъёсты музъем котыре берыктон понна ваньзэ луонозэ лэсьтоно. Широбоков лыдъя: студентъёслы луонлык сётоно коньдон поттыны. Вуоно механикъёс тыршо Ижысь техника тупатъян предприятиосын. Кин ке ужа гуртын но механик яке тракторист луыса. Озьы соос азьланезлы сюрессэс ӵого.
Нылъёсты-пиосты визьнодам сяна, Владимир Иванович ачиз но дыр сюремъя азьланьтэ техникаез выльдон бордын ужзэ.
- Хозяйствоосын ӧжыт кутӥське ю тысез пудо сиёнлы небӟытон амал. Вань сыӵе агрегат, но со вужмемын ни. Али мон сое выльдӥсько. Огкыл юнматыса, сое пуктӥм ни Можга ёросысь Вало-Ӝикъя хозяйствоын но Якшур-Бӧдья ёросысь Фрунзе нимо эштосын. Ӟечлыксэ ушъяло. Пуктыны луысал сое мукет гуртъёсы но. Та пумысен кенешом ай гурт удысъя но сиён-юонъя министрен.
В. Широбоков али дасяське выль дышетскон арлы. Соин ик сюлмаськонъёс та вакытэ трос. Механикая кафедралэн лабораторияз вуиз выль тӥрлык - двигательлэсь ужамзэ эскерись прибор. Студентъёсты дышетон понна Владимир Ивановичлы выль арбериез рос-прос тодоно. Соин ик шутэтскон дырзэ палэнтыса, ӵем пыралля академие - уж вылын эскере сое. Та сяна, выльдоно на вашкала стендъёсты. Угось улон азьлань мынэ - техника воштӥське.
Владимир Иванович тодматскиз ни нырысетӥ курсэ пырем куд-ог студентъёсын. Егитъёс оскымонэсь но визьмоесь кадь. Озьыен, соос но, азьлоосыз сямен ик, вузлэсь данзэ вылӥын возёзы, мылысь-кыдысь пыриськозы дышетсконэ, наукае, конструктор уже.
Источник:
За предоставление материала выражаем огромную благодарность редакции газеты "Удмурт дунне"
