Шиляев Виктор Иванович
Виктор Иванович Шиляев вордскемын Селта районысь Югдон гуртын. 1969-тӥ арын выже Ува ёросысь Бызара (Узей-Тукля) гуртэ. Семьяязы ӟуч кылын верасько вал, нош татын со удмурт луэ.
Республикаысь культурая училищеысь калык инструментъёсъя люкетсэ йылпумъяз но Викторез армие басьтӥзы. Кык ар ортчыса, 1984-тӥ арын берытске гуртаз, интыяське культурая юртэ. Кылдытэ калык инструментъёсын шудӥсь коллектив. Ваньмыз сямен дышетскисьёс ортчо та огазеяськон пыр. Виктор Иванович таин гинэ уг буйгатскы. Кылдо нылпи фольклоръя, «Арганчи» ансамбльёс, пуньыен шудӥсьёслэсь ансамбльзы. Ялан юнматэ но будэтэ аслэсьтыз оркестрзэ. Бадӟым уж нуэмез, гуртын, ёросъёсын, республикаын но Россиын фестивальёсы, ӵошатсконъёсы пыриськемез пусъемын трос грамотаосын, дипломъёсын.
Виктор Шиляев культура удысысь дано ужась.
Пичи арганчи
Воргорон ульча кузя вамышъя. Скалзэ сюлоен шлачкетыса улля. Адӟе: бускелезлэн пичи Витёкез капка азяз потэм но бодыен шонаськыса сылэ.
- Э,э, пие, мусое, тон бодыдэ куштыса шула но арганэныд шуд вал. Эсьма, вань калгись скалъёс, чебер шудэмдэ кылыса, гуртазы бертозы, бусыетӥ пегаса уз ветлэ ни, - серекъяса пияшез тыбыртӥз вешаса вераз ӝужыт мугоро агай.
Вить аресъем пияш серекъямез пеляз ӧз ик поны, меӵак кеськиз:
- А ма бен, мынам арганэ пичильтык ке но, котькинлэсь зол шудэ но, кырӟатэ но!
Собере Витиос доры бускельёс, я эшъёсыз пыраку, со диван вылэ султэ но арганзэ валатэк но ай зол-зол кыска но кырӟа, ассэ котькинлэсь умой шудӥсь кожа. Дарья Савельевна но Иван Максимович вордӥзы тямыс нылпи. Витя сизьыметӥез. Но жаляса верано, ваньмызлы улыны ӧз кылды. Кылё вить кузя: куинь пи но кык ныл.
Атаез огшоры ужась. Анаез, тямыс классэз йылпумъяса, секретарь луыса ужа прокуратураын. Ваньмон дыръяз балалайказэ кутыса кырӟалляз. Пиез арганэз сюлмысь кыскаку, кышномурт абдраз:
- Э, пичи-мусо тыкмылие, тынад крезьгурез шӧдонэд но, сое яратонэд но вань ук.
Баян вормиз
Пумен Витя балалайкаен шудыны дыше ини. Школае мыныса, туж синмаське хоккейлы. Нош сюлмыз но синъёсыз кыско баян кыскась шоры! Классэнызы кивалтӥсь Виктор Георгиевич Обухов кырӟанъя урокъёсты нуиз. Витяен ӵошен балалайкаен шудылӥзы. Собере урокъёс пумын пияш курылӥз солэсь баянзэ но. Витялэн атаез ӧз чида ни, баян басьтӥз. Пиёк сое кысканы дышиз, муртъёс шоры учкыса но кылзыса. Пӧртэм ужрадъёсын со азьветлӥсе потылӥз. Эшъёссы пумен вожомылӥзы но: мугорыз пичигес, ачиз «куиньёс» октылэ уга, пе.
- Асме обидьыны ӧй сётылы, мыжыкъёсме ӧй урдылы. Кескич вераськыса, укылтэмъёсты ас бордысьтым палэнтыны быгатылӥ. Берло эшъяськылӥм, - серекъяса тодаз вае Виктор Иванович.
Ӟуч-удмурт крезьчи
Паймытэ соиз но. Югдон гуртын Шиляевъёслэн семьяязы ӟуч сямен верасько вал. Узей-Тукляе вуэмзы бере лач-лач удмуртъёс луизы. Ма кызьы, пе, уд дышы? Виктор укмысэтӥ классысен ини клубын крезьчи луыса ужаны кутске. Покчи классъёсын пиналъёс ӟуч сямен ваньзы пыр-поч уг валало бере, Викторлы аслыз шаплыгес дышоно луиз удмурт кыллы. Со дырысен та клублэсь Шиляев ӧз люкиськылы ни, шуыны луоз.
Дасэти классын Витя мур малпаськонэ усе. Кытчы дышетскыны мыноно? Ижысь музучилищее куто крезьгуръя школаосын дышетскемъёсты гинэ. Соку Виктор шуак кинлэсь ке кылэ культурно-просветительской училище сярысь, отын ик, пе, калык инструментъёсъя люкетэз но вань. Колхозлэн правлениез шумпотыса ыстэ сое отчы дышетскыны. Училище бере Виктор армие кошке. Крезьгурен герӟаськемез татын но туж юрттӥз. Службаез шӧдытэк кадь, капчиен ортчиз. Со тодаз вае:
- Армиысь вуон нуналам ик пыриськоно луи культурая но спортъя празднике (али нимало Гербер). Отын шудӥ, музон крезьчиос ӧвӧлэн. Соку клубын ужазы кык кузя: хорен кивалтӥсь, вылӥ образованиен кышномурт Надежда Вениаминовна Шахтарина но культурая ужъёсты радъясь, культурая училищеын дышетскем нылкышно Ольга Борисовна Конышева. Баянэн шудӥсь ӧй вал. Монэ укмысэтӥ классысен ик тодо вал бере, ӝоггес ӧтизы доразы.
Виктор Ивановичлэн нырысетӥ малпанэз – оркестр кылдытоно. Ма бордысен кутсконо? Валамон ини, гуртын шуг луоз шудӥсьёсты люканы но дышетыны. Нырысь ай инструментъёс но шедьтоно ук.
Сю манет интые - сю эш
Уваысь ёрос культура юртын зол оркестрзы вал. Кивалтӥсез Фарит Касимович Зайнутдинов. Шиляевлэн со матысь эшез луиз. Фестивальёсын нырысетӥ интыос утэмзы понна уваослы коньдон висъяло. Райцентрысь мултэс кылем вуж инструментъёсты Узей-Тукляысь но мукет гуртъёсысь клубъёслы сётъяло. Бератаз Фарит Касимович шуэ: ужбергатонэ, пе, выжисько, мар умоез вань на милям, басьты, Виктор.
Шиляев веранзэ азьланьтэ:
- Озьы клубамы - кабинетъёсы, фойее, залэ - уно инструментъёс вуизы. Соос радъятэк сюр-вай пазямын. Мон, халат дӥсяса, аслам кабинетам ӝажыос лэсьтӥсько. Ӵапак сыӵе дыръя шӧдтэк шорысь дорам пыриз культурая министр Геннадий Васильевич Чайников. Ӵыжектӥ. Собере шумпотӥ: ма, гуртысь клубе ачиз министр вуиз.
Со ужамме адӟыса шуиз:
- Молодцы, молодцы, Виктор Иванович, культура, искусство, калык понна сюлмаськиськоды. Ужады азинсконъёс тӥледлы, коллективеныды дано ним басьтыны тыршелэ.
Таӵе верам кылъёс мылкыдме эшшо но лӧпкытӥзы.
Эстрадаысь - оркестре
Саесъёстэ пужалляса тыршытэк, ӝӧк вылэ нянь уд вутты. Нырысь-валысь пиналъёс керпотыса учкылӥзы инструментъёс шоры. Киязы кутылыны ик кышкаллязы. Эстрада искусство паськытгес вӧлмемын вал уга.
- Маин меда гочатоно таосты? - нош ик тодаз вае кивалтӥсь. – Оло, мадёно крезьгуръёс сярысь, ӝӧк сьӧрын конфетэн чай юыса. Ӧвӧл, кутсконо нотаосын тодматыны.
Дышетэ но дышетэ ерпечкаосты егит специалист, нош соос нотаосты чаляк вунэто. Шедьтэ мукет амал. Пӧртэм инструментъёсын шудыны дышем кык-куинь пиналъёс мӧйыослы чаклам ужрадъёсы пырисько. Тае адӟыса, егитъёс каллен-каллен оркестре кыстӥськыны ӧдъяло. Озьы, йӧн-йӧн ансамбль кылдэ но районын, палэнын радъяллям фестивальёсы пыриськыны ӧдъяло.
- Огполаз коллективмес ӧтизы Иже дано ӟуч оркестръёслэн конкурсазы. Жюрилэн кивалтӥсез, Свердловскысь музыкант, умой дунъет сётӥз. Отӥяз, пе, оркестрез дано нимын но пусйыны луоз. Озьы ик пӧрмиз. Коллективлы калык инструментъёсъя народной оркестр ним сётӥзы. Собере клубамы эшшо кык ужась куто на - дирижёр но концертмейстер, - шумпотэ Виктор Иванович. - Оркестрамы ньыль группа кылдиз - ог 18-20 адями люкаськиз. Асьмелы йӧн-йӧн шудӥсьёс будэтоно шуыса, сыӵеосты чакласько садикысен ик. Учкисько, кинэ кыӵе инструментэн дышетоно: металлофонэн яке бубенэн. Нырысетӥ классын сыӵеосын ӟечгес тодматскисько, кыкетӥын - крезьгур радэз валэктыны кутскиськом, пӧртэм крезь тӥрлыкез (инструментъёсыз) возьматӥськом.
Ужан куспын олокыӵе но учыръёс луо. Садикын туж сюлмысь шудыкумы, огезлэн штаниез куашказ. Ма концерт дыръя но, сцена вылын аслам но юмоке усьылэме вань. Дирижёр интыын сылыкум, пичи вис карыса, мыным пеллянэн шудоно вал. Кисыям пырисько но – пеллянэ отын вылымтэ.
Данъяськымон емышъёс
Культура юртын синмаськымон тыршо егитъёс. Художник-постановщик Игорь Александрович Исаков - зарни киё мастер. Крезьгуръя кыӵе гинэ техника уг сӧриськы, Игорь сое син куспын тупатъя. Шиляевлэн мукетыз дышетэм пиез, Виктор Александрович Анисимов, оркестрлэн концертмейстерез. Со озьы ик йылпумъяз культурая училищеысь оркестръя люкетэз. Татьяна Анатольевна Дедюхина, училищеысь дирижированиея но крезьгуръя люкетын дышетскыса, тырше татын ик клубын.
- Зэм, тросэз пиналъёс культурая училищее мыно, но дышетсконзэс ваньзы йылаз-пумаз уг вутто, - куректэ Виктор Иванович. Уждун пичи бере, культура удысын уг возисько, выжо мукет ӧре. Кылё соос, кинъёслэн сюлэмъёссы юн висё культура, калык творчество, крезьгур искусство понна. Бадӟым тау училищеысь педагогъёслы, нимысьтыз ик оркестрен дирижированиея специалистъёслы Наталья Колбиналы но Валерий Саматовлы, ӟеч тодон-валан сётэмзы но крезьгуръя устолыкез мур яратон мылкыд пыӵатэмзы понна.
Удалтэм
Шонер профессия быръем Шиляев. Вӧзаз ужасьёсын но удалтэ. Шутэтскон юртлэн кивалтӥсез Ольга Борисовна Конышева ӟеч сямо, чупрес нылкышно. Со тырше спонсоръёс шедьтыны, коллективъёслы коньдонэн юрттыны.
- Туж шаплы, ӧсэтӥ ӧз ке лэзе, укноетӥ пыроз, - мыняса маде воргорон. – Кызь куинь ар пала ужамы Надежда Вениаминовна Шахтаринаен. Со хорен кивалтӥз, «Азвесь» фольклор ансамбль кылдытӥз, спектакльёс пуктылӥз. Ужрадъёсы калыкез люканы юрттылӥз. Та удысын коньдон тырмымтэен, ужбергатонэ кошкиз.
Гуртлэн гимнэз но гербез
Кызь ньыль ар ӵоже люкам тодон-валанэн гинэ уг буйга. Шиляев, ялан маке но выльзэ утча, ассэ котыр ласянь эскере. Клубын ужасьёс ӵемысь ёрмо выль кырӟанъёслы. Тани гуртысь садиксылы (отын но Виктор Иванович нылпиосты дышетэ) «Жильыртӥсь ошмес» ним сёто. Нылпиослы сӥзем композиция дасякуз, Шиляев малпаз выль кырӟанъёс. Огез озьы ик, «Жильырты, ошмес», нимаське. Собере вордӥськиз гимн но.
- Гуртмылы 300 ар тырмемен валче со кылдӥз. Гурт пусэз суредаз Геннадий Евгеньевич Сидоров. Пичи дырысен ик ми соин матысь эшъёс. Гербез адӟыса, огвакытэ ик кылбур но, крезьгур но пӧрмиз, - валэктэ автор.
Виктор Шиляевлэн творчествоез арысь аре будэ, узырме. Быдэс республикаын со данъя Ува районзэ но Бызара гуртсэ. Тани ма вера клублэн кивалтӥсез Ольга Конышева:
- Со улонын пырак утча аслыз гинэ тупась тылгизьы. Уг яраты муртлэсь чуръёссэ но гуръёссэ ужаз пыртыны. Тани туэ Вормон Нуналлы сӥзем ужрадмы быдэсак солэн малпамезъя радъяськиз. Туала амалэн - видеоаппаратураез, историяя киноосыз уже кутыса - ортчытим. Виктор Ивановичлэн коллективаз юн дисциплина возиське. Котькудӥз шудӥсь кыл кутэ аслаз инструментэз понна. Кивалтӥсь дышемын ваньзэ зырк-зырк возьыны. Туж быгатэ нылпиосын кусып возьыны. Крезьчи сяна, со дышетӥсь, психолог но мастер. Ачиз ик тупатъя сӧриськем инструментъёсты.
Оркестрлэн ӟардонэз матын
Кылем арын училищеысь оркестръя люкетлы 41 ар тырмиз, но огарзэ отчы дышетскисьёсты ӧз кутэ. Та пумысен крезьчи шуэ:
- Жаляса верано луэ, мон туж пайми та иворлы, малы ке шуоно гурт клубъёсын крезьчиос уг тырмо. Ижысь культурая училищеын котькудзэ нимысьтыз дышето на культура юртэн кивалтыны. Оркестръя люкетэз йылпумъясьёс тросэз зэмен ик ужало гуртысь клубъёсын. Туала арын крезьгуртэк нокыӵе ужрадъёс уг лэсьтӥсько ни. Нянен гинэ адямилэн кӧтыз уг тыры, сюлмызлы но «сиён» кулэ ук.
Нылъёссы туала удысын
Шӧдӥське: улонын гурт культуралы саклык ӧжытгес висъяське. Оло, соин Шиляевъёслэн нылъёссы мукет сюресэз быръё. Бадӟымез, Оля нылзы, Ижысь кооперативъя техникумез йылпумъяса, финансист луиз, Уваын ужа. Быземын ини. Яна дышетске Чугун сюресъя техникумын. Кузпалыз Елена Павловна вордскемын Узей-Тукля гуртын. Вуриськись, ужа Уваын нимаз предприятиын.
Син азям сылэ Узей-Тукляысь клуб. Бадӟым ик уг адскы кадь, нош пушказ пырыса паймоно – районысь культура юртлы тупась. Котькуд кивалтӥсьлэн аслаз ужан интыез. Кӧня грамотаос но дипломъёс!
Виктор Ивановичлэн, ялан выльзэ утчасьлэн, сюлэмшугъяськонэз уг быры. Егитъёс, тямыс-укмыс классэз йылпумъяса, городэ кошко. Оркестр юн возиське кык-куинь ар, одӥг-огез гинэ пиос отын шудо куать арзэ. Ялан выльдоно луэ коллективез. Шиляев таӵе малпанэ вуэ: клубын ужасьёслы огазе кариськоно, тодон-валанзэс ӝутыса, театръя, кырӟанъя, оркестръя коллективъёс кылдытоно. Собере быдэс районысь адямиос доры вуоно.
Виктор Иванович аслаз кужымезлы оске. Нош культура копак акыльтӥз ке?
- Котькытын но котьмаин ужаны быгато. Шуом, тракторен. Кырӟаме-шудэме но юрттоз улонам. Ӟуч поговоркаын выллем: и жнец, и певец, и на дуде игрец, - йылпумъяз веранзэ культура удысысь дано ужась, крезьчи, крезьгурчи но дирижёр Виктор Шиляев.
Источник:
Шиляев В. И. Крезь бурдъёс вылын / В. И. Шиляев ; записала Юлия Кузьмина // Удмурт дунне. - 2007. - 2 февр. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
