Шеда-Зорина Ирина Михайловна

Материал из Воршуда
Перейти к навигацииПерейти к поиску

Тэркы вылын уг лыкты шуд[править]

И. М. Шеда-Зорина

Ирина Михайловна Шеда-Зорина – вань удмуртъёслэн «Удмурт кенеш» ассоциацизылэн вице-президентэз, Нациосын ужан политикая министерствоысь пӧртэм калык культураосъя отделысь валтӥсь специалист. Ас вакытаз йылпумъяз Удмурт кун университетысь кунсьӧр кылъёсъя факультетэз, нош собере – Германиысь Гёте нимо институтэз. Германиын ик дышетскиз кунсьӧр кунъёсын вуз каронъя ужбергатӥсе. Йылпумъяз Шара политикая удмурт школалэсь курсъёссэ. Тодон-валанзэ будэтӥз Кун но муниципальной службая удмурт институтын.

Туннэ нуналлы Ирина Михайловна егит удмурт интеллигенция пӧлысь одӥгез тужгес синмаськымонэз но оскымонэз кышномурт. Котьку син азьын, калык пӧлын, но со вие ик усьтымтэ шыкыс выллем – чылкак тодмотэм.

- Выжыды Пичи Пурга ёросысь Улын Юри гуртысь. Отын удмуртлыкез гажась, юн сямо калык улэ. Асьтэды сыӵеен лыдъяськоды-а?

- Озьы, Юриын туж мыло-кыдо калык. Верасько но соос паймысагес, куараосын шудыса.

Вордӥськиськем гуртын парсь вандон дыръя, 9-тӥ ноябре. Уж вискын ик анае монэ ваем ни. Улын Юриын ми сизьым арес тырмытозям улӥм. Мамаме - школалэсь директорзэ – ӧтизы Пичи Пурга черкогуртэ роное ужаны. Озьы быдэс семьямы выжиз ёрос центре.

Мон куинетӥ нылпи вал, соин но, дыр, мыным дырзы ӧз тырмылы. Атае но школаын ужаз, агае, апае бадӟымесьгес вал ни. Мон весь ас поннамгес улӥ.

Пургала вуэммы бере отысь кык-куинь этажъем выль юртъёс мыным «небоскрёб» кадь потылӥзы. Школае мынӥ, пал кыл но ӟуч сямен тодытэк. Нырысетӥ дышетӥсе пайме вылэм: кызьы та Ирина ӟуч классын дышетскоз? Но куддыръя, уд ке валаськы, дӥсьтӥсьгес но луоно, лэся. Улын Юри виры юрттӥз, дыр, школаез зарни медален йылпумъяй.

- Али тӥ туж шаплы кышномурт. Пичи дыръяды шаян-а вал?

- Дышетсконме тодам вайыны уг быгатӥськы, ваньмыз туж капчиен сётӥськиз-а, мар-а. Ветлӥсько на вал крезьгуръя школае, спортъя секцие. Но тужгес но трос выри общественной ужен. Со ик йырам золгес кылиз. Али берлань учкисько ке, малпасько: дышетсконлы тросгес саклык висъяно вал.

Котьку яратылӥ литератураез, биологиез. Россиысь олимпиадаын биологияя медаль но басьтӥ. Но химилэсь кышкайгес, эшеным ӵош мынӥ Удмурт университетысь филологияя факультетэ. Сылӥм стендъёсты учкыса: филологияя факультетэ но, кунсьӧр кылъёсъя факультетэ но одӥг кадь экзаменъёс сётоно. Бырйим кунсьӧр кылъёсъя факультетэз, филология факультетэ туж ӧтё вал ке но.

Кунсьӧр кылъёсъя факультетын дышетскеме сётӥз туннэ нуналлы туж кулэ луись тодон-валан. Дышетскыны капчи ӧй вал. Ваньзы сямен ик – городъёсысь. Соосын ӵошатыса, мынам тодон-валанэ лябытгес. Но – быгатӥ, горд диплом басьтӥ.

Татын но, малпасько, мыным общественной уж юрттӥз. Кыкетӥ курсысен бырйизы комсомоллэн комитетаз секретаре. Ортчытъямы фестивальёс. Ансамбльмы но вал, Надежда Уткинаен ӵош ветлӥмы.

- Со дыръёсты романтикъёслэн вакытсы шуо, озьы-а?

- Осконъёс трос вал. Гуртын улӥськод но малпаськод: городын сыӵе умой улон. Городын улыкуд малпаськод: тунсыко улон – Москваын. Отысен учкиськод ини кунгож сьӧры, ялан оскиськод. Нош кунгож сьӧры вуылэм бере валаськод ни: дунне вылын вордӥськем гуртэд кадь ӟеч инты ӧвӧл. Но чебер интыос котькытын но вань – асьмеос сое утьыны гинэ ум быгатӥське. Котыр трос калык, машина, жаг.

Али улон мукетгес луиз, дунлыкъёс воштӥськизы. Учконо ке мукет кунъёсты… Германиын трос калык улэ, ваньмыз ог-огеныз «наштаськемын». Гуртысь гуртэ потыку но сыӵе эркын ӧвӧл. Асьмелэн Ижевск, Пичи Пурга котырын трос калык улэ шуиськом ке но, Германиысь бертэме бере тапалъёс мыным сыӵе паськыт, вӧл-вӧл потӥзы. Сыӵе асьмеос бай улӥськом, но малы меда со узырлыкмес ум дунъяське?

- Германиын кӧня ке ар ӵоже улӥды. Кызьы но малы отчы шедиды?

- Дышетсконме йылпумъяме бере Ижевскысь школаын ужаны кутски. Дышетӥсьлэн ужез туж яра вал. Но кутскиз выльдӥськон, туж юн ӝегатӥзы уждунэз. Соин сэрен одӥг гужем нокытчы но потэме ӧз луы. Со вакытэ Чайковский дорын ожгарчиослэн пичи городзы лэсьтӥське вал. Отын ужазы Германиысь фирмаосысь адямиос. Соослы кылысь кылэ берыктӥсьёс кулэ луиллям. Эшелэн ӝуткамезъя отчы мынӥ, огкыл гожтӥ.

Кунсьӧр кылъёсты дышетыса но мынам Россилэн палэназ потаме, отысь адямиосын вераськеме ӧй вал. Ма, Удмуртия но ворсам улос лыдъяськиз. Таиз уже яраз, школае ӧй ни берытскы, тодматски вуоно картэным – Винфрид нимо немецен.

Германие кошкон азям «Удмуртская правда» газетэн мынӥ. Огкыл гожтӥ. Кунгож сьӧрын нимысьтыз корреспондент луыса ужай на.

- Аслад калыкед, шаеред борды зол бурмем адямилы палэнын астэ шедьтыны секыт ӧй вал-а?

- Германиын тунсыко потӥз калыклэсь улон-вылонзэ тодыны. Нокин тыныд номыр но тэркы вылын уз сёты. Россиысь вуэмъёслы асьсэлы но, нылпиоссылы но секыт вал. Пиналъёс, немец кылэз тодымтэенызы, школаын но лябгес дышетскизы.

Выльдӥськон кутскон вакытэ Германие нырысь кошкемъёс гожъязы: татын ваньмыз умой, квартираос но сётъяло, дышетскыны коньдон висъяло… Уноез, сыӵе улонлы синмаськыса, Россиысь вань котырзэс вузаса кошкылӥзы, нош отын уж шедьтыны гинэ но секыт вал. Россиын адями кивалтӥсь луыса ужа, нош отын – «грузчик» луэ.. 40-50 аресъем воргоронлы немец кылэз но дышетыны секытгес ни, нош сотэк уже уг куто. Мон паймылӥ: сыӵе визьмо, тодӥсь-валась адямиос ужтэк пуко.

Мынам югдуре мукет вал. Мон мынӥ картэ доры, улон интылы но, коньдонлы но ӧй ёрмы. Но уже интыяськыны шугоми: кинлы кулэ мынам англи, немец, ӟуч кылэз тодэме? Школаын ужазы Англиысь вуэм дышетӥсьёс. Нош ӟучъёс отын сомында вал ни, урамтӥ мынӥськод – котькытын ӟуч кыл. Германиын мон немец кылэз мур-мур дышетӥ, Гётэ институтлэсь дипломзэ басьтӥ. Со сяна, пӧртэм кунъёсын вуз каронъя юрттӥсьлэсь дипломзэ басьтӥ на. Дышетски Китайысь, Норвегиысь адямиосын ӵош. Мон – гуманитарий – «пӧсяно» луи вытъёсъя система, бухгалтерия удысын. Куд-ог кылъёсты мынам кылэме ик ӧй вал. Али асэным данъяськисько ни. Дышетӥсьёсы – Канадаысь, Англиысь, Германиысь профессоръёс. Соос мыным «витьёс» юнме ӧз пуктылэ, дыр.

- Немецъёс укыр кезьытэсь, дыр ласянь укыр шонересь, шуо, зэм-а?

- Мон шумпотӥсько: немецлыкез, германлыкез пичи ке но веръяй. Сямъёсмы пӧртэмесь. Ӵукна соос бутербродъёс сиё, ӝыт но – бутербродъёс. Шыд но, ӝук но уггес пӧзьто. Нуназеян вакытэ няньтэк сисько, но тэркыосазы туж тросэн тыро бадӟым сӥль юдэсъёс.

Германиын мон туннэ нуналэз гинэ ӧвӧл, толлозэ но вашкалазэ но шӧдӥ. Бадӟым городъёсын сыӵезэ уд ни адӟы, котькытын – глобализация, одӥг выллем культура.

- Фамилидэс кык люкетлэсь, Шеда-Зорина кариды. Малы?

- Асьмелэн мертэтъёсмыя мон бер бызи ни. Зорина фамилиме куштэме ӧз поты, монэ соя тодо вал. Мукетыз люкетэз – Шеда – кузпалылэн. Шеда гинэ карысал ке, татын юанъёс кылдысалзы, дыр. Германиын астэ котькызьы гожтыны луэ вал.

- Куинь ар ӵоже кунгож сьӧрын улӥды. Ваньмыз умой вал кадь. Но малы удмурт шаере бертоно кариськиды?

- Мон патриот-а, мар-а. Школаын кытӥяз монэ озьы исало но вал. Германиын дыръям учкылӥ отысь телевидениез, возьматъязы Россиез, татысь шуг-секытъёсты. Сюлэм интыяз ӧй вал. Пӧртэм кунъёсын вуз карисьлы юрттӥсе дышетски на бере, практикаез кунсьӧрын ортчоно вал. Тодам лыктӥз Ижевск. Отчы куриськи. Малпай: Германиын ватсаса басьтэм тодон-валанэным, оло, быгато удмурт калыкелы кыӵе ке пайда вайыны. Картэ но Россилэн ӵуказе нуналэзлы, ӝутсконэзлы оскиз.

1997-тӥ арын Ижевске бертӥм, кыкнамы но ужаны кутским школаын. Соку мон кыкетӥ пиналме витисько ни вал. Нылылы кык толэзь тырмиз, усьтӥськиз Нациосын ужан политикая комитет, отчы интыяськи.

- Чаклано ке, кыксэ но пиналдэс вайиды улондылэн тужгес дыгыри вакытаз, одӥг азьысь мукет азе кошкон дыръяды. Кышканды ӧй вал-а?

- Мон, котьма ке но, нырысь ик – кышномурт. Малпасько, нылкышно вордӥське нуны ваён, улон сётон вылысь. Мон ужасько, тыршисько, но ваньмыз со коньдон понна гинэ ӧвӧл, со пиналъёсты будэтон, дышетон вылысь. Кин понна улод на?

Сыӵе малпанэ пичи дырысен пыӵамын. Уг валаськы ас понназы гинэ, асьсэды дӥсяса-сюдыса, эркияса гинэ улыны тыршисьёсты. Уг валаськы туала Европаез но. Паймытэ Скандинавия. Отын кышномуртъёс пиналъёссэс картъёссы вылэ куштыса кельтыны дышиллям, пе. Та ласянь вераськи Скандинавиысь воргоронэн. Кышноез солы куинь пиналзэ кельтэм, «улэме потэ ай» шуэм но кошкем. Сыӵе учыръёс, пе, милям ӵемысь луо. Кышномурт но воргорон кусыпъёс сярысь али трос верасько. Нылкышноослэн психологизы зол воштӥське. Но, кин тодэ, оло асьмеос со «передовой» Западэз тэтчыса кошком ай, оло Запад ас малпаськон ӧрзэ воштоз но берытскоз милям малпаськонамы. Мынам котьку потэ вал пи но ныл ваеме. Озьы ик луиз. Инмар вань, вылды.

- Пиналъёсты асьсэды немецэн-а, удмуртэн-а, ӟучен-а лыдъяло?

- Нылы, нырысетӥ классэ ветлӥсь маке, пиелы кытӥяз шуэ: мон но мама удмуртъёс, нош тон но папа – немецъёс. Кузпалы немец, венгер, ӟуч кылын умой вераське. Ужа Ижевскысь техникая университетын. Со пиналъёссэ удмурт кылэз дышетыны куре. Германиысь бертыкумы, пие ӟуч кылын уг вераськы вал. Солы секыт йӧтылӥз, школаын «фашист» шуисьёс но шедьылӥзы. Нылы Германие ветлэмын ӧвӧл. Нырысетӥ классэ мынӥз, но школаын удмурт кылэз кунсьӧр кылэз выллем дышето. Пие, нылылэсь адӟем карыса, библиотекаысь «Ӟеч-а, бур-а удмурт кыл!» книга басьтэм, удмурт кылэз ас понназ дышетоно кариськиз. Дорамы вераськонамы куинь кыл котьку но кутӥське: удмурт, немец, ӟуч.

- Россие бадӟым осконэн берытскиды шуиськоды, малпанды ӧз воштӥськы-а?

- Зэм, мылкыдъёс мукетгес луизы. Асьмеос секыт улӥськом шуиськом ке но, али но гань-ганьгес пукиськом на. Западэз учкиськод: соос десант кадь ужало, ваньмыз минутъёсъя гожъямын. Асьмелэн кунгож сьӧрысь улонлы синмасько. Ижевскысь одӥг тодмоелэн нылыз Германиын выж миськисе интыяськем. Но отчы шедьыны но конкурс пыр потоно на, нимысьтыз курсъёс пыр ортчоно. Тон тодыны кулэ, кыӵе химия суретъёсты кызьы кутоно, кӧня кабинетэз 30 минут куспын миськыны вуттоно. Ужез быдэсъяно ӟеч но ӝог. Нош асьмелэн уж шоры но дунне шоры но учконмы татчыозь воштӥськымтэ на. Со огъя система бордысь потэ, вылды. Егитъёс бадӟым улонэ пото выль сямен ужан малпанъёсын, но соослэсь мылкыдъёссэс лапкомыто. Адями пуксе, ваньзы кадь луэ.

- Кемалась ӧвӧл, тӥледыз Вань удмуртъёслэн «Удмурт кенеш» ассоциацизылы вице-президентэ бырйизы. Бадӟым ныпъет вормымон-а?

- «Удмурт кенеше» сюри Валентин Тубылов пыр. Монэ со пичиысен тодэ. Кунсьӧр кылъёсын вераськисько, пӧртэм калык кусыпъёсын вырисько бере, дэмлазы «Удмурт кенешлэн» исполкомаз ужаны. Бӧрысь куризы вице-президент луыны. Кужыме, тодэме вань кадь потэ, соглаш луи.

Малпанъёс трос. Финн-угор дуннеен юнгес кусып возём. Туала вакытэ одӥг арен гинэ улыны шонер ӧвӧл ни, кыдёке азьпала чаклам план лэсьтоно. Туэ «Удмурт кенеш» огазеяськонлы 15 ар тырмоз. Юнгес кусып тупатоно мукет удмурт огазеяськонъёсын. Одӥг малпанъёсмы, одӥг кисыысь юрттэт, нош ужаськом – нимаз.

Бордамы тросгес егитъёсты кысконо. Али озьыгес пӧрме: «Шундыысь» егитъёс ужало, «Шундыкар» лагерьын тодон-валанзэс будэто но бӧрысь ышо. Со дыре ик йырмес тӥяськом: кытысь шедьтоно кадръёс. Егитъёс али туж быгатӥсесь. Соос бордысь мон адӟисько «Удмурт кенеш» огазеяськонлэсь ӵуказе нуналзэ.

- Азьвыл общественной ужен выризы огъя малпан (идея) понна, нош али валтӥсь интые потыны ӧдъяз коньдон, карьера. Оло, соин но куд-ог визьмо егитъёс общественной ужлэсь палэнско?

- Пионер, комсомолец дыръям общественной ужен туж выри ке но партие ӧй пыры. Юанъёсы кылдӥзы: тыныд озьы-тазьы кароно шуо, нош асьсэос чылкак мукет сямен уло, кизы ас палазы купырес.

Туннэ удмуртлык понна кесяськыса гинэ егитъёсты бордад уд кыскы. Соос общественной ужлэсь пайдазэ мед шӧдозы. Нош общественной уж пӧртэм луонлыкъёс сётэ: выль эшъёс, кусыпъёс, кунгож сьӧры потан, калык азьын вераськыны быгатон, бумагаосын ужан, кивалтӥсьёсын одӥг кыл шедьтон… Ваньмыз со карьера лэсьтыны но уг юртты шат? Кадръёслы шугомиськом ук. Мон туж шумпотӥсько общественной уж пыр карьера лэсьтэм адямиос понна. Малы со умойтэмен лыдъяськыны кулэ?

Общественной огазеяськонлэн вылӥ кивалтӥсьёслы аслэсьтыз дэмланъёссэ сётэмез луэ. Жаль, та луонлыкез асьмеос ум кутӥське. Мукетъёссэ гинэ курласа, «Тӥ номыр уд ужаське» шуыса улоно ӧвӧл. Соослэсь ик нош тӥ мар дэмласалды шуыса юаськод но, номыр вераны уг тодо.

- Наука удысын ужъёсты кыӵе мыно?

- Нациосын ужан политикая министерствое лыктэме бере ужаны кутски крашинъёсын. Соос со вакытэ асьсэды бигеръёс пӧлысь туж люкыны выризы. Та ужея ик вуи Историяя, кылъя но литературая удмурт институтлэн директорез Кузьма Куликов доры. Вераськон ӝутскиз палэнын улӥсь удмуртъёс ласянь. Та ужпум бордын ужаны ӵектӥзы. Пыри аспирантурае. Малпасько, диссертацие ӝоген дась луоз, дыр вуиз аслэсьтыд тодон-валандэ ӝӧк вылэ поныны.

- Эшъёсты трос-а?

- Мон малы ке уг учкиськы улонын кыӵе инты басьтэ адями – кузё-а со, ӧвӧл-а. Адями нырысь ик адями луыны кулэ. Соин ӵош ужаны, солы оскыны мед луоз. Эшъёсы трос шуыны уг быгатӥськы. Юн кусып нокинэн уг возиськы, но тодӥсько: марысь мар ке, соос вань ужзэс куштыса лыктозы но юрттозы.

- Тӥ – кужмо кышномурт. Семьяяды «Шеда-а», «Зорина-а» ворме?

- Зорин выжые шӧдӥське ик. Ма, удмурт семьяосты учконо ке, отын вашкала дырысен кышномуртлэн бадӟым интыез вал, солэн кылыз – валтӥсь. Гуртын милям котьку кузё вал мама. Папа соягес кариськиз. Нош мон книгаос бордынгес будэмын-а, мар-а. Малпасько, кышномурт со кышномурт ик луыны кулэ. Семьяямы бадӟым ужъёсты ог-огенымы кенешыса быдэсъяськом.


Источник:

Шеда-Зорина И. М. Тэркы вылын уг лыкты шуд / И. М. Шеда-Зорина ; записала Елена Миннигараева // Удмурт дунне. - 2006. - 3 февр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"