Чужанова Ольга Ивановна
Удмурт учкисьёслэсь мӧзмисько[править]
Удмуртиысь калык артистка Ольга Чужанова 35 ар ӵоже Удмурт театрлэн сцена вылаз валтӥсь рольёсты шудӥз. Берло аръёссэ Ӟуч театрын ужа. Кылем арын актрисалы 60 арес тырмиз. Нош туэ – сцена вылын шудэмезлы 40 ар. Та лыдпусъёслы сӥзьыса, 6-тӥ апреле Ӟуч театрын артисткалэн юбилей ӝытэз ортчоз. «Удмурт дунне» газетлэн редакцияз ужасьёс Ольга Ивановнаез котырес ӝӧк сьӧразы ӧтчазы, ужез но улэм-вылэмез сярысь юанъёс сётъязы.
- Ольга Ивановна, малы ӝыттэс «Вещий сон актрисы» шуыса нимады?
- А. Островскийлэн «Женитьба Бальзаминова» пьесаезъя «Вещий сон» спектакльын Бальзаминовлэсь анайзэ шудыны шуд усиз. Режиссёрен кенешыса, ӝытам пӧртэм аръёсы шудэм спектакльёсысь люкетъёсты возьматыны чакласа, «Вещий сон» вӧзы «актриса» кыл ватсамы на.
- Удмурт театрын тӥ трос рольёсты шудӥды.
- Мыным валтӥсь рольёсты оскылӥзы. Мугоры чиедэн, лэся, пичи пиосты ӵемысь шудылӥ, котькудаз Выль аре Лымы ныл вал. 45 аресозям мон сое шудӥ. Но улонын котьмалэн аслаз эсэпез луыны кулэ. Мыным шуд усиз дано артистъёсын артэ шудыны: Нина Бакишеваен, Апполос Перевощиковен, Борис Безумовен, Сергей Марковен, Виталий Стрелковен…
- Кудӥз рольды сюлэмады кылемын?
- Тужгес но яратоно роле – Фёдор Абрамовлэн «Кык тол но куинь гужем» пьесаысьтыз Лизка. Гуртысь секыт улон сярысь со. Дэри ёросысь Подшивалын аслэсьтым будэмме тодэ вайыса, лэся, со мыным туж матын потэ. Тятятэк быдэсми бере, мама, уже кошкыкуз, созэ я тазэ лэсьты шуыса, уж кельтылӥз. Абрамовлэн пьесаез гожтэмын син азе яркыт суред пуксьымон. Ваньмыз улонысь басьтэмын.
- Ӟуч театрын ужаны удмурт сямды уг люкеты-а?
- Со котьку но люкетӥз. Возьдаськон сямез табере нокытчы уд кары ни, со асьмелэн вирамы пыӵаса кылемын. Москваысь Щукин нимо театр училищеын дышетскыкум, Джульеттаез шудыны дэмлало вал. Мон со пумысен уйбыт малпаськыса потӥ. Шудыны мылкыды вань, но вераны возьдаськи. Огвакытэ киноын шудыны пробае но ӧтьылӥзы. Ой, уг быгаты шуыса, асме ачим кышкатӥ. Берло со киноез учки, аслам сюлэмы вӧсь луыса ик кылиз, вот, малпасько, ӧй быгатысал шат мон сое шудыны. Иже вуыса но, трос пол шедьылӥ сыӵе учыръёсы. Арлыд вань ни бере, Ӟуч театрын но асме туж ик капчи уг шӧдӥськы.
- Но тӥледлы отын но валтӥсь рольёсты сётъяло.
- Шумпотыны кулэ солы, артистлэн ролез ӧвӧл ке, кинлы кулэ со?
- Профессияды мар тужгес секытэз?
- Секытэз, малпасько, героедлэсь сямзэ шедьтыны, солэн улон ӧраз пырыны. Москваысь дышетӥсьмы шуэ вал: героедлэсь характерзэ шедьтӥськод ке, со ачиз син азьын усьтӥське ини.
- Спектакльын шудэм роляды кема-а ветлӥськоды?
- Вазен шудэмъёсыз сярысь уг ни вера. Алигес «Пока она умирала» спектаклез шудэммы бере, милям, артистъёслэн, доре кошкеммы, люкиськеммы уг ни поты вал. Огшоры кенешыса, одӥг семья сямен пукиськомы, сыӵе ог-огмылы дышимы.
- Ӟуч театрын ӟоскытгес уг поты-а? Кызьы отын тӥледыз пумитазы?
- Урод ӧз пумиталэ. Егитъёс но асьсэлэн каризы. Ӟучысь удмуртаз выжыса, мон тани мае шӧдӥ: Удмурт театрын одӥг роле кык но, куинь но артист куриськыны быгатэ. Нош ӟучъёслэн озьы ӧвӧл, режиссёр мар шуоз, соя ик лэсьтод. Котькудӥз отын аслэсьтыз шудоно рользэ тодэ ини. Соос одӥг составен шудо, отчы куриськыны умой ӧвӧл ни.
- Удмурт театрысь кошкыкуды, кыӵе мылкыдын эшъёсты келязы?
- Мон, малпасько, тросэз артистъёс шумпотӥзы, дыр. Верай ни, Удмурт театрын рольёс понна олокӧня адями вожмаське. Одӥглы ке но кулэсмим, шуизы, дыр. Нош Ӟуч театрын мон ужаны выжемелэсь азьвыл ик шудылӥ ини. Отысь режиссёр Владимир Сафонов Александр Галинлэн пьесаезъя «Ретро» спектакль пуктыны медэ вал. Со нырысь ик Фаина Будинаез доразы ӧтиз. Фаина Ивановна соглаш ӧз луы. Спектакльын мон шудӥ, асме умоен возьматӥ. Собере Владимир Иванович мукетаз спектакле шудыны ӧтиз. Ӟуч театрын артистъёс ӵем вошъясько, огез лыктэ, мукетыз кошке, шӧдыса но ӧз вуттэ, лэся, Ӟуч театре выжемме.
- Артистъёс куспазы эшъясько-а? Ӟучаз-а, Удмуртаз-а со умойгес шӧдӥське?
- Асьмеос, удмуртъёс, мон сое дышетскыкум ик шӧдӥ, мар ке луэ ке, огинэ кариськыны быгатӥськом. Кусыпъёсмы шунытэсь. Нош ӟучъёс нимаз, асьсэ поннагес улыны дышемын. Мыным уг тырмы кырӟан. Гастрольёсы потакумы, удмурт кырӟанъёсты кырӟаса, автобусын бертылӥськом вал. Кыӵе ке праздник тупа ке, одно ик пӧрам сиён театре нуиськод вал. Ӟуч театрын нырысь паймо вал озьы дауртэмелы, табере дышизы ни.
Эшъяськон сярысь ке… Мынам сямы алама ӧвӧл кадь, адямиос борды кыстӥськисько, но сыӵе матысь эшъёсы ӧвӧл. Ольга Чайниковаен эшъяськылӥмы ик. Мукетъёсыныз но турттӥсько вал, но малы ке ӧз пӧрмы. Котьма ке но, артистъёс куспын вожвылъяськон вань. Милемлы рольёс кулэ ук.
- Али шудоно рольёсты сярысь вералэ вал.
- Шумпотӥсько, режиссёръёс монэ синйылто на шуыса. Та вакытэ шудӥсько «Примадонна», «Валентин и Валентина», «Правда хорошо, а счастье лучше», «Вещий сон» спектакльёсын. Луо котькыӵе учыръёс: Валентина туж ик сюлэмам уг лякиськы, но мон сое озьы ик шудӥсько, режиссёрлы пумит мынэме уг луы. Кемаласьгес ини «Неугомонный дух» спектакльын валтӥсь ролез, экстрасенсэз, шудӥ. Ой, умой шудӥськод, шуылӥзы учкисьёс. Нош мон паймисько: соку ӧй тодылы, кыӵе адямиез шудӥсько. Туала арын умой быгатысал ни сое возьматыны, малы ке шуоно телевизор пыр но кӧня со экстрасенсъёсты возьматъяло, трос гожъяло.
- Удмурт театре учкись сямен лыктыкуды, сценаезлэсь уд мӧзмиське-а?
- Удмурт театр мынам аслам гуртэ кадь потэ. Нош Ӟуч театр – со кыӵе ке туж бадӟым ук, дворец вал бере отын, шунытэз уг тырмы, шуод-а, мар-а.
- Асьтэ шоры палэнысен учкыны яратӥськоды-а?
- Уг, уг яратӥськы. Мыным уг кельшы куарае. Со нылпиослэн кадь потэ. Напгес мед луоз вылэм. Но сое воштыны уз луы ни.
- Тӥляд нылды но пиды быдэ вуэмын ни. Кенэн улӥськоды шуыса, тодӥськом.
- Егит дырысеным бадӟым семьяен улӥсьёс шоры вожъяськыса учкылӥ. Ми мамамылэн кык кузя гинэ вал – Витя выныным. Жаль потэ, со дырызлэсь вазь улонысь кошкиз. Аслым ачим туж умой песянай потӥсько. Мыным кельше кенэн улыны. Сямы сыӵе, котьмае ачимгес лэсьтыны тыршисько. Егит дыръям нылпиосылы саклык висъяны ӧй быгатылы, ялан уж дурын, гастрольёсын. Табере нуныкайёсыным гинэ пукысал кадь. Мынам соос куинь кузя ни. Но адямилы ялан уксё уг тырмы, нылпиослы юрттэм потэ на.
- Песянайзы руль сьӧрын но ворттылэ кадь. Нуныкайёсты, пе, тӥ шоры «песянай» шуыса уг вазьыло.
- Сад-бакчае ветлоно бере, ворттылыны дышетскытэк йӧныз ӧй вал. Монэн ӵош мыныны кузпалы ӵемысь уг ваньмы, соку ачим руль сьӧры пуксисько. Мамае ми вӧзын ик улэ, 82 арес ини солы, котьма ласянь юрттӥське на. Пичиосмы сое но, монэ но песянай уз шуэ ук, соин ик шорам «Оля», «Олечка» шуыса вазисько. Бакчаысьтымы нылкышноос воксё соослы паймо, сыӵе, пе, мусо кылӥське.
- Нылдылэн но нимыз Оля кадь? Малы асьтэ сямен ик нимады?
- Кузпалы кемалы командировкае кошкылӥз. Нылы далай гинэ нимтэк ветлӥз. Бертӥз но юа: кызьы, пе, нимад. Шӧдыса ик ӧй вутты, Оля ним понӥмы.
- Пиналъёсты кыӵе удысэз бырйизы? Артист луэмзы ӧз-а поты?
- Оля Удмурт кун университетысь худграфез йылпумъяз, туж чебер суредаське. Школа бере экономистэ потэ вал дышетскемез, ачим ӧй лэзьы, культура мыным матын бере, суредась мед луоз шуи, лэся. Но со бӧрысь ужзэ воштӥз, аслым но табере жаль потэ, оло, нылы шонер малпаське вылэм, лэсьтӥськон удысэ экономикаен герӟаськем уже интыяськиз. Рома пие ассэ ӧз шедьты на. Шудыны со яратэ, усто кырӟа. Массовкаын ке но сцена вылэ потыны яралод шуыса, Ӟуч театре ужаны интыяй вал. Кӧня ке шудӥз но кошкиз. Али жаля кадь со пумысен. Оло, азьланяз дышетскыны но быгатысал. Кошкыны котькытысь капчи, берен берытскыны секыт.
Источник:
За предоставление материала выражаем огромную благодарность редакции газеты "Удмурт дунне"
