Толстухина Мария

From Воршуд
Jump to navigationJump to search

Тамаша Маша[edit]

М. Толстухина

Брангуртысь песянайёсмес верасьтэмез-гожъясьтэмез ӧвӧл. «Евровидение» ортчем дырысен ӝоген ар ортчоз ни, нош соос доры кино лэсьтыны ялан вуо кунгож сьӧрысь журналистъёс. Но вераны кулэ, сыӵе бадӟым вормонэз дурыны нылкышноослы юрттӥзы на мукет адямиос, кылсярысь: продюсер, администратор. Огшоры учкись понна соос вужере кылё, но соостэк коллектив анай-атайтэк кадь. Брангурт песянайёслэн администраторзы Мария Толстухина ачиз но туж мыло-кыдо кышномурт. Дышетскемезъя – режиссёр. Удмуртиысь культура удысысь дано ужась. Пиналысен творчествоен выре, кылбуръёс гожъя, кырӟа, концертъёс ортчытъя.

- Мария, кызьы тӥ сюриды та коллективе?

- Шӧдтэк шорысь. Мон соку воксё но Индиын вал. Одӥг пол жингыртэ песянайёслэн продюсерзы Ксения Рубцова, юрттӥсь, пе, кулэ, бабушъёсты Москвае ӧтё Людмила Зыкиналэн юбилей ӝытаз. Отчыозь песянайёс сярысь одӥг пол гинэ кылэме-адӟеме вал: ог витё ар талэсь азьло телевизор пыр сюжет возьматӥзы, кызьы удмурт кенакъёс Виктор Цойлэсь кырӟанзэ быдэсто. Нырысь ас пельылы ӧй оскы: кылъёссэ бен уг валаськы, но Цойлэсь гурзэ мон номырин но уг сура… Туж пайми но синмаськи. Жингыртӥ тодмоелы Надежда Уткиналы. Со шуэ, бен, пельыд уг пӧя, «Цой удмурт сямен кырӟа», быдэсто Брангуртысь арлыдо кышномуртъёс. Соин песянайёсын ужаны ӵектэм бере малпаськонэ уси. Огласянь, мон ведь Индие кыкетӥзэ мынӥ ни вал, малпаськылӥ отчы воксё кылён сярысь, мукет ласянь, Инмар пус сётӥз кадь, мон ас дорам кулэ на шуыса. Жингыртӥ Иже пиелы, кури сое песянайёсты Москвае келяны, нош ачим соосын пумиськи ни Москваын вокзалын, поездысь пумитай.

Людмида Зыкиналы соос туж кельшизы. Со песянайёсмылы бакель сётӥз, шуыны луоз – со дырысен ваньмыз вӧй вылтӥ кадь кошкиз.

- Песянайёс тӥледлы ӝог-а дышизы?

- Ой, ватонэз ӧвӧл, нырысь ӧз яратэ. Тодматскыкумы шуисько: мон – Маша, тӥледын ужало. Одӥгез отын ик меӵкытӥз: «Маша – да не наша». Малпасько, ярам, чидалом. Но кыӵе ке вогъяськонъёс-мар ӧй вал, соос визьмоесь ук, нырысь-валысь ӧз валалэ, малы мон соослы кулэ, сьӧрло соку уг потало вал ук ай. Табере тани «наша Маша» шуо ке, солэсь шуныт кыл ӧвӧл ни кадь потэ.

- Тӥ городын будэм ӟуч нылкышно, песянайёс – гуртысь огшоры удмурт кышномуртъёс. Малы ке дышетскиськоды-а соослэсь?

- Ой, пумтэм тау соослы. Котьку паймисько визь-нодзылы, мудрон луэмзылы, улон кужымзылы. Соосын эшъяськыса, мынам аслам но улон шоры учконэ воштӥськиз, асме жалямысь дугдӥ, кужмогес луи. Тани кык гинэ учырез верало. Кытчы ке поездэн мыныкумы, Конева Галяпай весь суйёссэ посэ. Мар луиз, шуисько. Липет вылысь лымы куяй но золтӥськем-а, мар-а. Ачид шат куяськод, юасько. Со мон шоры сыӵе учкиз: а кин? Вот, малпасько, соос, арлыдо муртъёс, концерт сётыса, сюрес вылысь доразы пыро гинэ но юртъерзы борды кутско, нош мон город квартираын огнам йырыным ой шуыса кыллисько.

Мукетыз учыр гужем вал. Мон коньдонэз кутыны уг быгатӥськы, чиньы пыртӥм вияса кошке-а, мар-а. Вот пукисько огпол озьы, уксё кытысь каром ай шуыса. Арня ортчыса, Пятченко Валяпай мыным уксё сётэ: Маша, мон, пе, боры вузай, ме пунэмен. Мынам синкылиосы ик пызьыразы. Огласянь, шумпотӥ, мукет ласянь, керпотыса му пыр виясько вал. Со, арлыдо кышномурт, паллян киыныз (бур кизэ ыштэм, корка пуктыкуз) 8 ведра боры бичам, ачиз городэ нуыса, вузам, нош мон?!

- Нош мукетъёсыз маин тунсыко?

- Граняпайлэн куать нылпиез, лачак внукъёсыз, соос корка тыр, но ваньзы тупаса уло. Нош куд-огез одӥг нылпиеныз но огкыл уг шедьты. Синмаськымонэсь пиналъёсыз Алевтина Геннадьевналэн, кыкназы творчествоен выро, кемалась ӧвӧл со милям зэмос песянай луиз – пиез нунок кузьмаз. Зояпаймы чал-чал, мултэс уз зульы, вераз ке, кулэезъя гинэ. Туж ческыт пӧраське.

Катя апай тужгес жингрес кырӟасьмы, но озьы шуисько ке, со монэ куаретэ, мукетъёслэсь висъяськемез уг поты. Куд-ог дыръя паймытэ огшоры арбериос шоры кылбурчилэн синмыныз учкеменыз. Огпол зарезь дуре куалялюльы бичаны ветлӥм. Бертыкумы шуэ: вот, Маша, губияны ветлӥм… Пугачёва Наталляпай. Со сокем синэз кыске. Шуныт, востэм. Ваньмыз со борды еро, ачиз со пумысен туж куректэ, висъяськеме уг поты, шуэ. Ольга Туктарева – нокинэн воштонтэм юрттӥсе. Туж мудрон, туж чидась кышномурт. Солы ваньмыныз одӥг кадь луыны быгатоно. Мон Ольгалэн синъёсыныз улон шоры учкыны дышетскисько.

Котькудзылэсь малы ке но дышиськод. Но тужгес синмаськымонэз сямзы – со улонэз яратэмзы. Ваньзы сямен секыт улонэз ортчемын, туж трос кайгуэз адӟемын, но соос уг чигисько, уг ӝожтӥсько, муртъёс вылэ уг лекъясько, асьсэды чакласа-тодыса уло.

- Маша, асьмеос тодӥськом, шоу-бизнесын тодмо луон талант бордысь гинэ уг поты. Мӧйы кырӟасьёс но асьмелэн гинэ ӧвӧл…

- Конешно. Кин уг тоды, со озьы малпа. Тани «Евровидение» бере котькытын сямен арлыдоослэсь ансамбльёссэс кылдытъязы, калык кырӟанъёсты тодазы вайизы. Куд-огезлы удалтэ ик «Поле чудес», «Минута славы» программаосы сюрыны, но азьлане сюрес уг усьтӥськы ни. Асьме песянайёсты бакель кариз Людмила Зыкина. Нош со укыр бадӟым, укыр яркыт кизили вал. Вылаз ик, солэн Концерт юртаз туж азинлыко ужа Ижысь Ксения Рубцова.

- Нош калык асьме бабушъёсты соку ик-а яратӥз?

- Огшоры учкись – бен. Нош мукетъёс… Котькыӵе учыръёс вал. Тани Францие мыныкумы, поездысен одӥг фифа шуэ: всё-таки Канные нуиськоды, коть йӧскадь дӥсялэ-кутчалэ вал, а то гуртысь кадь. Ма, шуисько, ми гуртысь ик вань. Нош возьдаськиськоды ке, дӥсялэ ук! Бакомиз. Яке тани «Евровидение» ветлэммы бере ресторанэ пыриськом. Охранник пыдысен йырозямы шорамы учкиз но уг лэзьы. Кинъёс, пе, тӥ сыӵе, татын тодмо артистъёс гинэ сисько. Ну мон вырисько ук валэктыны, ми но артистъёс, «Брангурт песянайёс» шуыса. Нош Наталляпаймы пумитаз султӥз но чангес куараеныз шуэ: дак Пугачёва я! Охранник дол-дол луиз. Со понна табере, тодмо-дано луэммы бере, ой, чеберъясько азямы охранникъёс но, концерт залъёслэн директоръёссы но.

- Мар пыре удмурт песянайёслэн райдеразы?

- Соос сыӵе кылэз уг но тодо. Соос милям калык артистъёс ке но, туж огшорыесь: самолётын эконом-классэн ветло, гостиницаосын йырлы быдэ номер уг куро, ӵошен кӧласьком. Нырысь-валысь уксёмы но ӧй вал ук ай. Тодӥсько на, огпол интыязы Подмосковьеысь базае. Ми нюлэскы потӥм, губи бичам, нош Зояпай милемлы сыӵе ческыт дасяз губиен картош, чиньымес нюлыса сиим.

- Берло дыре тӥ асьтэос но ӵемысь песянайёсын артэ султӥськоды, кырӟаськоды, удмурт кылдэс но поттылӥськоды ни…

- Удмуртэн кӧня ке кыл сяна уг тодӥськы, секыт потэ. Нош удмурт дэрем тусылы туж тупа. Кырӟаны пиналысен яратӥсько, соин куддыр пичи концертъёс дыръя вӧзазы султытэк уг чидаськы. Соос уг улляло кадь. Мон ачим но песянай ук!

- Тӥ концертъёсын трос городъёстӥ ветлэмын, кунгож сьӧры потамын, нош Ижын бадӟым концерт туэ феврале нырысьсэ сётӥды ай.

- Дыр ӧз сюрылы. Ижын концерт азьын туж зол сюлмаським, ас дорад выступать карыны котьку секытгес. Но номыр ик ӧз пӧрмы кадь, калык куинь час ӵоже чабиз. Туж шумпотымон соиз: ӧтем артистъёс ваньзы гонорартэк ужазы – концертын поттэм коньдонэз келям Брангуртысь черк пуктонэ. Тӥни сыӵеесь милям песянайёсмы, асьсэос пенсиенызы уло, нош ужаса поттэм коньдонзэс Инмар ужлы висъяло. Журналистъёс ке ялан порто: кӧня уксё поттӥськоды, кытчы тыриськоды, мар сииськоды-юиськоды? Соос уг валало, милям артистъёсмы мукетэсь шуыса.

- Ма, тӥледыз но пышкылытэк уг кельто, дыр…

- О, ма, кызьы сотэк! Улӥсько вашкала коммунальной коркан, зэм, бускельёстэк, но дворец ӧвӧл. Коньдонэн висёнэ мынам ноку ӧй вал. Уж мыным шумпотон мед кузьмалоз, мед мон сое яратом. Бен, яратонтэк та улонын номыр уг пӧрмы, ваньмыз со котырын берга. Мон трос аръёс ӵоже выри визьмо кариськыны, ваньзэ пыр-поч малпаса лэсьтыны – номыр ӧз пӧрмы. Индиын дыръям ураметӥ мӧзмыт тусын вамышъясько. Нош отын ваньмыз капчи мылкыдын, пальпотыса ветло. Одћг арлыдо воргорон матэктћз но маке киосыныз выртэ-выртэ, йыры, гадьы шоры возьматэ. Эше берыктӥз ни, укыр трос, пе, малпаськиськод, сюлэмыдлы оскы. Мон таӵе арлыдам гинэ дыши улонлы шумпотыны, асме шудоен шӧдыны.

- Соку пыр-почгес маде улон-вылонды сярысь.

- Пичи дыръям туж яратылӥ кырӟаны, кылбуръёс гожъяны. Но семья сыӵегес вал, вазь ужаны кутски. Вазь бызи. Бӧрсьысь бӧрсе кык пи вайи. Со вакытэ тырши фотоательеын, проявительёслы аллергия луиз, кошконо луи. Соку тодам лыктӥз пинал дыры, мынӥ культпросветучилищее дышетскыны. Пумен ужай Операя но балетъя театрын кассаын. Артистъёсын артэ луыны мыным туж кельшылћз, пумен ачим но кыстӥськи творческой улонэ, «капустникъёсы» пыриськылӥ, нылпи праздникъёслы сценарийёс гожъяй, пичигес рольёсты шудылӥ. Нырысь-валысь со тунсыко вал, нош пумен сюлэм тросгес курыны ӧдъяз, возьмалляй бадӟымгес рольёс сётэмзэс, тросгес уждун ӵектэмзэс… Собере витьыса жади но кошкыны ӝуткаськи. Ваньмыз кутыны ӧдъязы, тон сыӵе кырӟаськод, сыӵе шудӥськод, возьма на. Но мон ваменэс адями, вылаз ик, модае пыризы корпоратив шуон ӝытъёс, тамадаосын сюанъёс. Мыным киыз-пыдыз вал ваньзэ сое радъяны. Арня ӵоже толэзьем уждун мында уксё поттыны кутски, со туж юрттӥз пиосме пыд вылазы ӝутыны. Озьы паськытазы городысь продюсеръёсын, концерт агентствоосын кусыпъёсы, мон кутски Москваысь кизилиосты Ижын пумиталляны.

- Вогесь, дыр.

- Котькыӵеесь. Но огзэ валай: макем кизили яркытгес, сокем со лачмытгес, огшорыгес. Туж кельшизы Надежда Бабкина, Наталья Варлей, Василий Лановой. Василий Семёновичлы пумтэм синмаськи. Соин тунсыко ужаны но, шутэтскыны но. Огаз ӝыт кафеын сиськыкумы, со аслаз выжыосыз сярысь мадьыны кутскиз, нош мон шуисько, украин кырӟанэз тодӥсько. Мытӥ. Всё, пе, туннэ концертын сое ӵошен быдэстом. Но ӝыт ӵоже артист мон сярысь вунэтӥз, конешно. Но мон ӧй куатаськы, бӧрысь ӝытбыт ӵош кырӟаса-вераса пуким. Солэн кырӟамме ушъямез мон понна туж бадӟым дунъет луиз, аслым оскон пыӵатӥз. Бӧрысь со мыным туж юрттылӥз ужам. Шуом, концертэ кӧня ке артист ялэмын, но кудӥз ке лыктыны уг быгаты, кыкетӥез ӝега. Сыӵе дыръя калык азе ачим потӥсько. Кышкыт. Учкисьёс шуыны быгатозы ук, ми тонэ учкон понна уксё ӧм тыре, но мон амал шедьтӥ: маке серемпыр верасько, собере туж тодмо кырӟанэз мытӥсько, залэз кырӟаны курисько. Ваньзылэн мылкыдзы умой луэ. Али та амалэз уката паськыт кутӥськом, тани Брангурт песянайёсмылэсь кырӟанъёссэс караокее гожтыны малпаськом, концерт дыръя учкисьёс мед быгатозы бӧрсямы удмурт кылын кырӟаны.

- Творчество нылкышноез огласянь бурдъя, мукет ласянь быдтэ-шукке…

- Творчество уг, шукко сое валасьтэм адямиос, тонэ дунъясьтэмъёс яке уката огшоры – тонэн укыр пӧртэм муртъёс. Кулэ, дыр, чиданы, но мон уг быгатӥськы пӧяськыны… Кӧня ке ар улыса, семья улонэ ӝокатыны кутскиз. Валай, картме уг яратӥськы. Со сярысь аслыз но, анайзылы но верай. Монэ нокин но ӧз вала: кызьы-озьы, уг юы, уг жугиськы, уг вожа, кин ӟеч улонлэсь ымем? Но мон аслэсьтым кари – люкиськи. Кӧтсы ӝожен соос монэ улонысьтызы быдэсак ӵушизы, шуыны луоз, пиосме огнам будэтӥ, трос курадӟи, но одӥг пол но ӧй жаля, сыӵе вамыш лэсьтэмысьтым. Зэмос курадӟон вылэм ай азьланьын. Аръёс ортчыса, туж яратӥ одӥг адямиез. Сыӵе яратӥ, кызьы вераны уд тоды – кӧня дыр ортчиз ни, тодам вайисько ке, али ке но шоканэ пытсаське. Но улонын котьку мылкыдъя-малпанъя гинэ уг луы – ми ӧм быгатэ ӵошен луыны. Со учыр монэ туж шуккиз. Секыт мылкыд вормиз. Собере шӧдӥ: выйисько, но аслым юрттыны уг быгатӥськы ни. Ярам, мыным удалтӥз эшъёсын, соос пельтӥм кыскыса поттӥзы, шуыны луоз. Внукелэн вордӥськемез сазёмытӥз.

- Индие но вуиды, луоз, секыт мылкыдлэсь куштӥськон понна?

- Бен, валан вуиз, улонме воштоно шуыса. Ошо философлэн сыӵе веранэз вань: ми кема чидаськом улонмес сӧрисьёсты, но ваньмызлы пум вуэ – куке но палэнскыны быгатыны кулэ… Индие вуыса, пайми: калык нокытчы уг дырты, ялан пальпотыса ветлэ. Нош мынам ымныры золтӥськемын, лэся, дугдыса ик юало: мар луиз? Нуналлы быдэ вӧсяськыса гинэ, мон мырдэм дыши пальпотыны, шундылы, инкуазьлы шумпотыны. Собере синмаськи, улӟи. Куинь толэзь отын улэме бере Иже берытски но аслым инты ӧй шедьты ни. Йӧскадь уж ӧвӧл, сюанъёс ортчытъяса, акыльтӥз, пиосы пыд вылазы ни, кутски но берен кошки. Тӥни отысен ик шедьтӥз монэ Рубцова.

- Маша, концертъёсысь сяна, табере тӥледыз адӟыны луэ пӧртэм телепрограммаосысь: я тӥ «Угадай мелодию» программаын вань кырӟанъёсты кыкетӥ нотаысен тодӥськоды, я рестораторъёсын пӧраськонын ӵошатскиськоды, «Давай поженимся»-озь но вуиды…

- Ӧтё бере, малы мынонтэмез? Мыным кельше пӧртэм ужрадъёсы пыриськыны, камералэсь, калыклэсь уг кышкаськы – уже сыӵе. Асме но, песянайёсме но уродэ ӧй уськытъя на.

- Тон сюлмысь потэм синкылиосыныд абдратӥд кадь «Давай поженимся» передачаез нуись чурыт сямо, лэчыт кыло Гузееваез но…

- Мон соку ачим ӧй оскы сыӵе луонлы. Азьло ваньмыз шуо вал: шоу-шоу… Нош ас вылам вуиз но, оски: телевидение но весь уг пӧяськы вылэм. Куинь воргоронъёс пӧлысь Геннадий Либгардовез адӟи гинэ – пушкы тыриз. Умой ӧвӧл ӵошатыны, но со сыӵе кельше… мынам азьвыл яратонэлы.

- Геннадий вуылӥз Иже, пыриськиз концертады, нимысьтыз чебер кырӟан быдэстӥз, яратэмзэ шара вераз. Озьыен, кусыпъёсты азинско, сюанозь кема ӧвӧл ни…

- Бен, кусыпъёсмы азинско, но сюан сярысь вераськон уг мыны. Мон программаын ик верай, уен-нунал артэ луон понна карт уг утчаськы шуыса, мыным туж тупасал куноян (гостевой) брак шуон. Ялан пиосмуртэн луыны мон уг быгаты ни (сямы но сыӵе, уже но уз сёты), нош таӵе арлыдын туган вошъяса улэме уг поты ни. Геннадий ласянь но мон туж чакласькисько ай. Песянайёсылэсь визь-нодзэс санэ поныны вырисько: меӵак вераса, Либгардов соослы ӧз кельшы. Огласянь, тунсыко воргорон, творчествоен выре, кырӟанъёс гожъя, вить нунал дорам улытозяз, ӧз керӟегъяськыты, но кин тодэ… Арлыдоослэн шӧдонзы золгес, дыр. Улыса адӟом ни.

Источник:

Толстухина М. Тамаша Маша / М. Толстухина ; записала Зинаида Рябинина // Удмурт дунне. - 2013. - 5 апр. - С. 10, 15. - (Тӧр шорын).

За предоставление материала выражаем огромную благодарность редакции газеты "Удмурт дунне"