Токарева Виолетта Алексеевна
Шӧмъя егит дырлэсь ческытсэ![править]
Кыӵеесь туала удмурт егитъёс? Маин соос тунсыкъясько? Кыӵе шуг-секытъёсын пумиськыло? Вань та юанъёслы валэктонъёсты тодэ Виолетта Токарева – удмурт егитъёслэн «Шунды» огазеяськонзылэн кивалтӥсез. Татарстанысь Менделеевск ёросысь Вандэмо гуртын будэм нылаш бурмемын удмурт кыл, удмурт культура борды.
– Виолетта, удмуртлыкез гажан мылкыд тыныд гуртэд пыӵатӥз, луоз. Вандэмоын вордӥськемын дано удмурт гожъяськисьёс Михаил Петров, Александр но Николай Белоноговъёс...
– Мон туж шумпотӥсько, та гуртын вордӥськи шуыса. Вандэмо туж чебер! Соин, дыр, со сярысь сомында кылбуръёс гожтэмын. Будӥ мон огшоры семьяын. Папа колхозын тракторист луыса кема аръёс ӵоже ужаз. Визьмыз, быгатонлыкез вал ке но, школа бере нокытчы но дышетскыны ӧз пыры. Гуртын кыӵе ке шулдыръяськонъёс ортчо ке, папа отын калыкез шулдыртэ-лӧпкытъя ини. Мама школаын пӧраськись луыса тыршиз. Соос кыкназы но творчестволэсь кыдёкын. Но семьяямы улон-вылонмы чик но мӧзмыт ӧй вал: ӵошен кырӟаса но пукылӥмы, эктылӥмы но.
Сцена вылэ мон нырысьсэ 2-тӥ классын потӥ. Со вакытысь туспуктэмъёсты али учкисько но валасько: сценалэсь кышкан, учкисьлэсь возьдаськон йырам чик но вылымтэ – пичи дыръям ик асме шаплы возисько ини вылэм. Соин, дыр, дышетӥсьёс монэ гуртамы, ёросамы ортчылӥсь ваньмаз сямен ужрадъёсы, конкурсъёсы ӵектылӥзы. Мама ӧз пумитъяськылы. Кыӵе ке конференцие, конкурсэ мынӥськомы ке, котьку сьӧрам ветлӥз. Соин, вылды, отысь мон ӵемысь вормонъёсын бертылӥ.
Пичи дыръям ик мама мыным удмурт дэрем вурытӥз. Сцена вылэ монэ котьку ачиз дасялляз, та ужез мукетъёсызлы ноку но ӧз оскылы. Со гинэ тодылӥз, кызьы кышетэз куасэтэн-куасэтэн шонер керттоно, йырсиез бантикен лач-лач кутоно, ымдуръёсты чебер буяно. Нялтас вераса, мама монэ котьку чебер дӥсялляз. Али, бадӟым куен, малпасько: мынам но со кадь анай луэме потэ! Гуртын уж пумтэм-йылтэм луэ вал ке но, мыным но, вынылы но мама-папа вань мылкыдзэс, дырзэс, кужымзэс сётылӥзы.
Одӥг учыр али но син азям. 4-тӥ классын Выль арлы дасяськиськомы. Бал-маскарадлы дӥсь малпано. Ай сыӵезэ – мукетъёсызлэсь йӧспӧртэм мед луоз. Та ласянь анае ноку но ӧз шугъяськылы. Сыӵе костюмъёс дасялляз – шулдыръяськонъёсын ялан вормисе поталляй. Но та рад дышетӥсьмы шуиз: быдэс класс, пе, огкадь дӥсяськоз, нош кыӵе героез возьматомы – вераны ӧз тоды, Виолетталэн анаезлэсь, пе, юаллясько ай. Мама солы верам, нылме негр дӥсяны малпасько вал шуыса. Озьы быдэс класс негръёс луимы. Мон – соослэн королевазы. Огез нылаш шуэ: а малы мон королева ӧвӧл? Солы валэктӥзы: тынад йырсиед тӧдьы, нош Виолетталэн – сьӧд, тон йырсидэ буяны соглаш-а?
Зэм, анае соку йырсиме нырысьсэ нап-нап сьӧд буяз, векчи-векчи пунӥз вал. Бамъёсме-пельёсме но сьӧд буёлэн маялляз. Гуртоос, монэ адӟыса, кӧтсы висьытозь серекъязы. Валамон ини, та рад но шулдыръяськонысь мон вормонэн бертӥ.
– Шаплы сямыдлы луыса ик быгатӥсь нылпиослэн «Шундыкар» лагерязы шедид, дыр?
– Тау удмурт кылъя но литературая дышетӥселы Людмила Павловалы. Со мыным «Шундыкар» сярысь вераз. Со дырозь ӧй тодылы, дунне вылын сыӵе усто лагерь вань шуыса. Отын мон 2 пол шутэтски. Ӵапак отын удмуртлыкез яратонэ бугыр-бугыр ӝутӥськиз. Лагерьлэсь азьло малпалляй, удмурт егитъёс гуртъёсазы уло но отын гинэ удмурт кылын верасько шуыса. «Шундыкар» та учконме йырин-чукин берыктӥз. Мон ас синмыным адӟи, туала удмурт егитъёс шулдыресь, визьмоесь но шаплыесь шуыса. Тодӥ, кыӵе удмурт кырӟасьёс, группаос, фильмъёс вань. Лагерьлэсь азьвыл ёросмылэсь палэнэ поталляме ӧй вал. Нош татын Удмурт шаерын, «Шундыкарын», улӥськиз – пинал мурт понна со мукет кунэ вуылэм кадь потӥз ини. Со дырысен мон тунсыкъяськыны кутски ваньмыныз, мар удмуртлыкен герӟаськемын.
Удмурт кун университетысь удмурт филология факультетэ дышетскыны пыри. Егитъёслэн «Шунды» огазеяськонэнызы юнгес эшъяськыны кутски. Соку ик лагере нырысьсэ вожатой луыса мынӥ. Улон-вылонэ вуберганлы укшаны ӧдъяз: огез ужрад йылпумъяське гинэ, тон мукетызлы дасяськыны ӧдъяськод ини. Параос вискын бызьыса мынӥськод «Чипчирган» ансамбле. Отысь ӝог-ӝог вамышъяськод Василий Ушаков режиссёрлэн «Ватка» театраз – татын лулыным но, мугорыным но шутэтскылӥ.
Шумпотӥсько: университетын мыным эшъёсын туж зол удалтӥз. Татын гинэ валай, мар со эшъяськон. Ужрадъёслы котьку ӵошен дасяськылӥмы. Ваньмы – удмурт кылын чылк-чылк вераськись удмуртъёс. Ваньмылэн йыръёсмы пӧзё: созэ ужрадэз радъяно вылэм, тазэ... Деканат дормы луиз. Дышетӥсьмы Ангелина Сидорова – кыкетӥ анаймы. Параос вискын ми котьку Ангелина Иосифовна котырын вал. Параос йылпумъяськизы – ми нош со бордын ини.
Удмурт кыл ласянь эшъёсыным нокыӵе возьдаськонъёсмы ӧй вал. Университетэ калыкен пачылмем автобусын мынӥськомы – удмурт сямен лар-лар кырӟаськомы. Кондукторъёс милемыз тодмало вал ини. «Чипчирганысь» репетициысь ӝытазе пыдын бертӥськомы – нош ульча трос кырӟаськомы. Удмурт кылэз вӧлмытон но азинтон вирамы мур-мур пыӵамын вал. Туала вакытэ, жаляса верано, удмурт филология факультетын дышетскисьёс куспазы удмурт кылын уг вераськыло ини.
Али валасько: УдГУ-э пырыса, шонер вамыш лэсьтӥськем. Нырысь ведь мон Елабугаысь театр училищее мыныны малпасько вал. Школаысь дышетӥсьёсы угось весь вераса улӥзы: тыныд театре мыноно, тыныд сцена вылын шудоно. Но улон ваньзэ ачиз радъяз – училищее но университетэ пырон экзаменъёс одӥг нуналэ тупазы. Озьы мон артист интые дышетӥсь луи. Та дырозь одӥг нунал но школаын ӧй ужа на. Но котькуд нунал пиналъёс котырын бергасько – Ижысь огаз библиотекаын тыршисько. Соослы книгаос люкылэм сяна, пӧртэм пумиськонъёс, ӝытъёс ортчытъясько.
– Егит муртлы егитъёслэсь огазеяськонзэс валтыны капчи яке секыт?
– «Шундыен» кивалтыны ӵектӥзы магистратурае пыреме бере. Мынам нырысь уг поты вал: кивалтон удысын тодон-валанэ ӧвӧл. Курдай но: вань удмурт егитъёс понна кыл кутоно ведь. Но соку сямы сыӵе вал: косӥзы бере – лэсьтоно! Эшъёсы но лӧпкытъязы: тынад ваньмыз пӧрмоз! Озьы соглаш кариськи. Выль уж секытэн сётӥськиз. Но бӧрысь ӧраз пыри. Валай: котькыӵе ужпумез, шуг-секытэз сэрттыны-пертчыны луэ, мылкыдыд вань ке.
Али куддыр аслым ачим паймисько но ини: быгатӥсько вылэм «уг!» но шуыны, ваменэс адямиен но вераськыны, лек сямме но возьматыны. Егитъёсын ужаны огвакытэ секыт но, капчи но. Шуом, «Шундыкар» лагерьын ваньмыз котьку сямен вӧй вылтӥ кадь мынэ. Пинал муртэ утчано, сюлвороно ӧвӧл, сояз я таяз ужрадэ пыриськыны курыса. Со ачиз ик проект но гожтоз, ужрад но ортчытоз. Но лагерь быре но, егитъёс... ышо. Малы озьы луэ – али но уг валаськы.
Мукет ужрадъёсы кыскон понна соослы сю пол гожъяно, сюрс пол жингыръяно луэ. Ваньзы пӧртэм муг шедьто: огез экзаменлы дасяське, мукетыз ужа, куинетӥез гуртэ бертэ... Озьы амалтэк троссэ ужъёсты ас вылад басьтоно луэ. Тазьы тыршыса, кужым но, мылкыд но 2 полэс трос быре. Аслыд дыр чик уг кыльы ини. Амалтэк асме тодам вайисько. «Шунды» огазеяськонлэн азьвыл кивалтӥсез Юлия Шахтина, шуом, ӝот-ӝот вералоз вал: туннэ ӝыт 18 часын пумиськиськом! Мынам дорам ужъёсы тымиськемын ке но, 18 часын мон Юлия Германовна дорын пукисько вал ини. Косэмын – лэсьтэмын!
– Кыӵеесь соос – туала удмурт егитъёс?
– Азьвыл аръёсы удмурт «движуха» зол вал. Али со лябӟемын. Туннэ «Шундылы» выль кужым – выль егитъёс – кулэ. Мон ӵем потасько шаерысьтымы колледжъёсы, университетъёсы, ёросъёсысь школаосы. Нылъёслы-пиослы огазеяськонмы сярысь верасько – озьы но, тазьы но гочатыны вырисько. Но соос, жаляса верано, «Шундые» уг лыкто. Пӧлазы ӧвӧл азьветлӥсьёс, кудъёсыз шуысалзы: ойдолэ ӵош кариськомы но кыӵе ке удмурт ужрад лэсьтомы!
Мар ватонэз: туала егитъёслы номыр но тунсыко уг поты. Соосты секыт бордад кыскыны но сьӧрад валтыны. Уло ас дуннеязы. Соин ик, визьзы, шаплы сямзы вань ке но, мултэс кытчы ке ветлыны, ужрад малпаны мылзы чик уг поты. Мыным со туж паймымон но валантэм. Угось ачимъя тодӥсько: выль адямиосын тодматскыса, выль ужрадъёсы пыриськыса, мылкыд ӝутӥське, тодон-валан паськыта. Зэм, куддыръя адямиослэсь, телефонъёслэсь, иворъёслэсь жадёно. Но уйзэ изиськод но ӵукнаяз сэзь-пезь султӥськод. Мукет сямен луыны кулэ ӧвӧл: ми егитъёс ук!
Огпол егитъёсылы видео келяй: пор нылъёс-пиос Ижысь Шор площадетӥ поръяло, экто, кырӟало. Та видео монэ зол ӵабыштӥз. Пушкам вожан каръяськиз: малы ми озьы ум быгатӥське? Егитъёсылы ӵектӥ: ойдолэ площаде поталомы, мынӥсь-ветлӥсьёсты шулдыртомы! Марысь-мар ке, кырӟанэн-эктонэн «Чипчирган» ансамбль юрттӥськоз. Егитъёсмы вырӟизы-а? Ӧз! Огез но! Куддыр соос мыным туж жалесь йӧто: егит дырзылэсь вань ческытсэ шӧмъяса, вань чеберзэ адӟыса уг вутто кадь потэ.
Огласянь, малпасько, оло, дыр вуэмын «Шундылэсь» кивалтӥсьсэ воштыны? Аръёс ортчемъя, оло, мон егитъёсты шӧдэмысь но валамысь дугдӥ? Выль кивалтӥсь, оло, огазеяськонэ выль мылкыд пыртысал, егитъёсты сайкатыны быгатысал? Мукет ласянь, кошкыны вазь на кадь: «Шундылы» одӥг яркыт проект но ӧй лэсьты, аслэсьтым вань малпанъёсме улонэ ӧй пыӵаты на. Нош малпанъёсы мынам лачак! Нимаз пуксьыса, соос йыре уг лыкто. Вордӥсько, я магазинэ мыныку, я концертын пукыку, я эшъёсын адскыку...
Мон уг быгатӥськы чаклам радлыкъя улыны: туннэ созэ кароно, ӵуказе – тазэ. Ваньмыз пӧзись мылкыды бордысь потэ: туннэ со вань ке, котькыӵе гурезьёсты погыртыны дась.
– Эшшо ке вӧзын валась кузпал вань ке!
– Зэм, Саша кузпалы мыным «Шундыын» котыр ласянь юрттӥське: со грузчике но, водителе но. Уг нёръя, ужъёсыз трос, отчы-татчы дыртӥсько шуыса. Со – лэсьтӥськон удысысь ужбергатӥсь. Киыз котькыӵе ужлы мынэ. Тодэ: уж умой мед радъяськоз шуыса, кивалтӥсьлэн ӟеч юрттӥсез луыны кулэ. Кылмы тупа, оло, соин но: со – гань-гань, мон – тур-пар. Но тусмы, малпанъёсмы, улон шоры учконмы – кыкнамылэн но огкадь. Ас вакытаз Саша удмурт егитъёс пӧлын тодмо блогер вал. Трос гожъялляз удмурт ужрадъёс сярысь. Тодмо удмурт адямиослэсь интервьюос басьялляз. «Шундыкар» пыр потӥз. Тодматӥзы милемыз эшъёсмы – со пумиськон Инмарен гожтэмын вал, дыр.
Мон сыӵе возьмай аслэсьтым адямиме. Саша дырозь киноын выллем пӧсь яратонэ ноку но ӧй вал. Огпол телефонэ тӥяськиз. Вазиськи Коля тодмоелы. Со Ижын сервиссэ усьтӥз вал. Колялэн туганэз шуэ: ми, пе, йӧно удмурт пиосмуртэн тодматскимы – тӥ ог-огдылы туж тупаськоды, тӥледыз одно ик тодматоно! Мынам, валамон ини, синъёсы чиляны ӧдъязы. Малпасько, кыӵе ини меда со – пырак мынам куронъёсылы тупа ук. Озьы Коля монэ Сашаен тодматӥз. Пайми: таид мынэсьтым но шаплы вылэм. Со нуналэ ик Сашаен удмурт дискотекаын эктӥмы. Эктӥсько но малпасько: Виолетта, тон синмаськиськод ини, кошкы татысь ӝоггес! Ӵукнапал, дорам пырыкум, шуисько: сыӵе умой эктӥмы – Саша та сярысь вунэтыны кулэ ӧвӧл! Озьы ик луиз.
Кема ик ӧм пумиськылэ, сюан каримы. Кыкнамы но удмуртлыкез гажаськомы бере, сюанмы удмурт сям-йылолъёсъя ортчиз. Ӵапак тупаз угось: Менделеевск ёросын Гыронбыдтон ортчиз, милемлы отын кузпалъяськыны ӵектӥзы.
Берло дыре валасько: уж пӧлы выйыса, ачид сярысь вунэтыны уг яра вылэм. Вунэтӥськод ке, бордад соку ик висёнъёс тэбиньыны кутско. Соин ик одно ик шутэтскыны тыршисько. Нош шутэтскисько мон Вандэмоям... бакчаын ужаса. Йыры ик сайкыт луэ. Сомында идеяос вордско: мынам тазэ потэ, мынам созэ потэ. Гуртэ толэзь пала уг бертылӥськы ке, мугоры куалекъя, бӧрдэме потыны кутске – лулы-сюлмы озьы анаен-атаен сюлмысь сюлме вераськон куре. Трос кужым сёто ӵыжы-выжыосы. Соос доры кемагес уг поталляськы ке, ӟигартэк кылисько кадь. Яратӥсько соосын ӝок сьӧрын пукыны но ортчемзэ тодэ вайыны. Таиз ини пичи дырысь кылемын – куноос дорамы лыкто ке, мама-папа милемыз кылзӥськыса пукыны уг лэзё вал. Туннэ котькӧня пук, котькӧня кылзы!
Источник:
За предоставление материала выражаем огромную благодарность редакции газеты "Удмурт дунне"
