Тигр но ӟичы

From Воршуд
Jump to navigationJump to search

Одӥг пол Ӟичы куакъёс пушкысь туж зол уралтэм (сютэм) Тигрез, пе, пумитам. Ӟичылэн кышкаса лулыз ик пыдтышказ вуэм. Ас понназ, пе, малпа ни: "Берпум часэ луоз ук та мынам, сое алданы ке ӧй быгаты".

Мар-о карод, Тигр со вылэ урдӥськыны турттэ ни, пе. Витьымтэ шорысь Ӟичы серекъяны кутскем. Ачиз ке кышкаса куалекъя, пе. Тигр паймеменыз быж вылаз ик пуксем.

— Тон мае-о сыӵе-сыӵе серекъяськод?

— Тонэ.

— Кинэ? Монэ?!

— Конешно! Тон монэ сиыны турттӥськод, нош мон тынэсьтыд чик но уг кышкаськы. Тынэсьтыд нокин но уг кышка. Нош мынэсьтым адями но тыллэсь кадь кышка.

Тигр малпаськыны кутскем: «Нош шонерзэ ке со вера? Соку Ӟичыез йӧтылонэз ӧвӧл!».

Ӟичы шуэм:

— Тон мыным уд оскиськы кадь. Ойдо мон сьӧры. Мыныса-мыныса сюрес доры потӥллям. Со сюрес вылтӥ адямиос ӵапак базарысь берто вылэм.

— Эн кыль мон сьӧрысь! — кеськем Ӟичы. Тигр Ӟичы сьӧры ик, пе, ворттэ. Адямиос Тигрез адӟиллям но — ну, пе, пегӟо ук, пыдтышсы гинэ, пе, чиля на. Нош Ӟичыез турын пӧлысь чик но адӟиллямтэ.

Бератаз Ӟичы Тигрлы, пе, шуэ:

— Адӟид-а, адямиос мынам быжылэсь гинэ но кышкало, нош тон шоры одӥгез но ӧз учкы.

Визьтэм Тигр йырзэ ошем но туж кыдёке кошкем. Соин ик асьме палан тигръёс уг уло ни. [1]

Литература[edit]