Тексты песен обряда Пӧртмаськон

1. Лыктӥськом, лыктӥськом, кудое,

Куать арес ошедлэсь сьӧд вирзэ поттӥськом, кудое.

Та коркадылэн кӧзоноез Тыпы-а, пужым-а, кудое?

Юатэк пырим шуыса, Вождэс эн вае, кудое.

Ӝӧк котыр пуксем ёз калык,

Кылзэ вератэк, уз си-ю.

Ӝӧк вылэ пуктэм баддянъёс

Пальккаськытэк уз улэ.

Йырйыл кошкись ӟазегьёс

«Дядяк» шуытэк уз кошке.

Луӟӟи-Ӝикъя (Лудзи-Жикья), Селта ёрос

2. Ой, кече, кече, кечонка,

Кече йылын кенос вань.

Кенос йылын сьӧд ныл пуке,

Сьӧд ныл киын сьӧд чаша.

Сьӧд чашаын горд вина,

Сое юи — кудӟиськи.

Вал люктаны васьки но —

Егит пиен пумиськи.

Егит пиен пумиськи но —

Чупатэк ой чида.

Лудӟи-Ӝикъя, Селта ёрос

3. Мувыре потэм ук узыед-борыед,

Мувыре потэм ук узыед-борыед.

Шундыя-бусъя кисьмам-а, ӧвӧл-а?

Шундыя-бусъя кисьмам-а, ӧвӧл-а?

Силёе потэм эмезьмы

Куазья-зоръя кисьмам-а, ӧвӧл-а?

Мувыре потэм сьӧд сутэред,

Дошлой калыклэн мылыз-кыдыз со вылын.

Пужым килед киль-киль усе,

Лашман калыклэн мылыз-кыдыз со вылын.

Лудӟи-Ӝикъя, Селта ёрос

4. Пужымлэсь выжызэ лёги но,

Ныллэсь пыдзэ лёгем кадь луи.

Пужымлэсь вайзэ кырми но,

Ныллэсь суйзэ кырмем кадь луи.

Пужымлэсь лыссэ кырми но,

Ныллэсь йырсизэ кырмем кадь луи.

Пужымлэсь сулзэ кеси но,

Ныллэсь басмазэ кесем кадь луи.

Пужымлэсь гурызэ басьтӥ но,

Ныллэсь пель угызэ басьтэм кадь луи.

Лудӟи -Жикъя, Селта ёрос

5. Чиль-чиль сӥялоз сьӧд нюлэсэд —

Непременной калыклэн мылкыд со вылын.

Пир-пир толӟоз пипу кваред —

Вольной калыклэн мылкыд со вылын.

Киль-киль тӧлӟоз пужым килед —

Лашман калыклэн мылкыд со вылын.

Нюп-нюп усёз нюло кваред —

Завод калыклэн мылкыд со вылын.

Ӵукна ӝужалоз шундыед,

Квар вылъёсад волдыръяськоз.

Ӵукна султоз воргоронэд,

Уж вылъёсаз волдыръяськоз.

Кам дуре потэм сутэред

Вуя-бусъя кисьмалоз.

Мувыре потэм узыед-борыед

Шундыя-пӧсья кисьмамын.

Byж Зумъя (Новый Сентег), Сарапул у.,

.