Тарасова Алевтина Викторовна

Материал из Воршуда
Перейти к: навигация, поиск

Усто мурт ассэ котькытын шедьтэ

А. Тарасова

Алнаш ёросысь Байтэрек гуртысь Алевтина Тарасова дышетскемезъя агроном, но улон сое вуттӥз чылкак мукет удысэ – культурае. 32 ар ӵоже ини со библиотекарь луыса тырше. Быгатыса радъя гуртоослэсь ваньмон дырзэс, пӧртэм тунсыко ужрадъёс ортчытъя. Алевтина Тарасова пусъемын 50-лэсь уно таукаронъёсын, дипломъёсын. Со – Удмуртиысь культура удысысь дано ужась, Россиысь «Арлэн библиотекарез» конкурслэн финалистэз, Алнаш ёрослэн А. Оки нимо премиезлэн лауреатэз.

Чеберина, чеберай

Байтэрекъёслэн библиотекаязы пырыса, кошкыны уд ӵыды. Ӝажыоссы вылын, книгаос сяна, пуктылэмын удмурт дэремен мунёос, куролэсь пунэм шудонъёс, горд сюйлэсь арбериос. Борддоръёссэс чеберто пужъятэм ӵушконъёс, чуко чалмаос, куэм шобретъёс. Та ваньмыз аслаз Алевтина Викторовналэн, озьы ик байтэрек калыклэн киосынызы лэсьтэмын. Отын ик сылэ вашкала куиськон станок. Библиотекае уд, зэмос музее шедиськод кадь.

– Та станокен али «Чеберай» элькун марафонлы аслым дӥсь куисько, конкурслэн финалаз потӥ, – куиськон куспаз вера Алевтина Викторовна. – Табере тани шуркынмон толэзе устоосыз пӧлысь тужгес устозэ быръёзы. Отчыозь аслым сцена вылэ потыны дӥсь пӧрмытоно. Но станок сьӧрын шол-шол огнам уг пукиськы: куиськон амалъёсты возьматӥсько гуртысьтымы нылпиослы, соослы мастер классъёс ортчытъясько. Библиотекаямы угось «Усточи» клубмы вань. Отын пӧртэм киужлы дышетске пичиез но, бадӟымез но.

Нылкышно творчествоя «Чеберай-2020» марафонлэн финалаз потӥз 20 мурт, пӧлазы Алевтина Тарасова но. Конкурсэз радъясьёс та вакытэ котькуд финалист доры вуыло, соослэн улэм-вылэмзылы, ужамзылы сӥзем видеосюжетъёс лэсьто. Соос возьматэмын луозы бадӟым сцена вылысен, марафонлы йылпумъянъёс лэсьтыку.

– Та конкурсэ ӧтён вуиз но, нырысь кыӵе ке пумитъяськон мылкыды кылдӥз, – шуэ Алевтина Тарасова. – Ма, малпасько, кыӵе мон чеберай?! Егитъёс ойдо мед пыриськозы! Мылкыдме бурдъяз кузпалы: пыриськы, пыриськы, шуэ. Вожвылъяськонлэсь пуштроссэ пыр-поч тодэме бере малпай: пӧртэм киужен вырисько, куд-ог арбериосме вузаса, уксё но поттыны быгатӥсько. Зэм но, мар бен пыриськонтэм? Марафонлэн валтӥсь малпанэз угось сыӵе: удмурт нылкышно, вылтусын гинэ ӧвӧл, киуженыз но чебер. Нош уката усто, кибашлы луэмез табыш но вайыны юрттэ ке. Тани кемалась ик ӧвӧл марафонэз радъясьёс мыным видеовизитка лэсьтыны дорам вуылӥзы. Киуж сьӧрын пукемме но, кузпалэным ӵош чечы кыскемме но, тракторен ворттылэмме но снимать каризы. Финалистъёс пӧлысь бен устозэ быръёзы на, но кузпалы, нылпиосы понна мон чеберай ни. Виталий Игнатиче, кузпалы, шорам табере озьы гинэ вазиське. Трос выльзэ сётӥз та конкурс. Вань тодэмме табере библиотекаын ужам куто.

Уж дураз Алевтина Тарасова котьку сямен удмурт дэремен ветлэ. Машина басьтыкумы, автосалонэ но удмурт дэремен мынӥ, ваньзэсты паймытӥ, шуэ со.

Синмаськиз бусылы

– Вордӥськи мон Пичи Пурга ёросысь Шор Кечол гуртын, – веранзэ азьланьтэ Алевтина Викторовна. – Будэтӥз монэ ӵужмемее. Мамае палэнын улӥз, ужаз, адӟиськыны вуылэ вал, дышетскемме чакласа возиз.

Ӵужмемее, гуртамы сое Дыдык апай гинэ шуылӥзы, ӟеч сюлэмо адями вал. Быдэс гур перепеч пыже но, косякез усьтыса, ульчаетӥ ортчисьёсты пыжиськемзэ веръяны ӧте вал. Таосыз пумитаз «дыртӥсько ай, Дыдык апай» шуыса вазё ке, ӵужмемее киыныз шона: я, сыл ай, сыл, капка азе потто! Гуртын шуылӥзы: Дыдык апаез пумитад ке, сюресэд удалтоз. Со ӧлексы вал ке но (пыдыз чутӥз), нокыӵе секыт ужлэсь ӧз кышкалля, калыкен тупаса улӥз. Монэ но озьы ик улыны дышетӥз. Мыным шуныт вал со вӧзын. Кӧня удмурт калык веранъёсты тодӥ солэсь!

Школаын 6-тӥ классозь удмурт кылъя урокъёсмы ӧй вал. Но вуиз выль дышетӥсь – Нина Анатольевна Ермокина. Со, пе, удмурт кыллы дышетоз. Солы ми ваньмы синмаським: йӧно, визьмо, чебер. «Сӥзьыл» темая сочинение гожтыны косӥз. Али кадь тодӥсько: быдэс классэн соку «2» басьтӥмы. Сочинениямы угось туж трос ӟуч кылъёс пыртӥськеммы, суро-пожо пӧрмем. Но выль дышетӥсьмы асваланмес вакчи дыр куспын воштыны быгатӥз, удмурт кылмес гажан мылкыд пыӵатӥз. Со дырысен, малпасько, мон асме зэмос удмурт адямиен шӧдыны кутски. Ваньмыз, мар герӟаськемын удмуртлыкен, тунсыко потыны кутскиз.

8-тӥ класс бере малпай вуз карисе дышетскыны мыныны. Но мамае ӧз лэзьы: кыӵе, пе, вуз карись! Тон туж лякыт, котькинлы оскись – тонэ, пе, капчиен алдалозы. Кылзӥськи, ӧй мыны, школае ик кыли. Мамае малы ке санэ ӧз басьты, кызьы 6-тӥ классын ик гуртысьтымы нылкышноосын ӵош автобусэн Иже ветлӥ, Сенной базарын картошка вузалляй. Котькинлэсь чалякгес вузаса быдтӥсько вал, нош нылкышноос озьы ик тыро ведраосынызы сылӥзы на. Монэ доразы ӧтё ни: ойдо, пе, милесьтым но табере озьы ик вуза. Уг тодӥськы, оло, жаляса, пинал карыса, мынэсьтым картошкаме чалякгес басьто вал. Нош одӥг гужеме, нюлэскысь узы бичаса но сое вузаса, асме школалы быдэсак дӥсяй.

10-тӥ классозь рос-прос валанэ ӧй вал, кыӵе меда удысэз быръёно. Нош одӥг нуналэ, школаысь бертыкум, пӧртэм буёлэн кисьтаськись бусылы синмаськи. Йырам чилектэм кадь луиз: тани ук маин мыным выроно – музъемен! Гуртын вордски, гуртлы ик кулэ луо!

Озьы Ижысь гурт удысъя институтысь агрономияя факультетэ йыгаськоно кариськи. Кечолысьтымы «Мир» колхозэ рекомендация курыны мынӥ, со юрттоз, малпай, отчы пырыны. Нош мыным шуо: милемлы агрономъёс кулэ ӧвӧл, клубын ужасьлы, библиотекарьлы ёрмиськом. Тодысал ке соку, улонэ монэ азьланяз культурае ик вуттоз шуыса...

Сюанозь вуттӥз… сурсву

– Ижысь гурт удысъя институтын дышетскон аръёс –тужгес шудо, вунонтэм вакытэ. Уксёлы ёрмоно вал, соин ик вань дышетскон аръёсме ужаса ортчытӥ: я гардеробщикын, я утялскисьын, я нылпи садын пиналъёсты утисьын. Институтын, валтӥсь удыслы сяна, радъямын вал общественной профессиослы ватсаса дышетон. Мон, агрономияя тодон-валан люкам сяна, ваньмон дыръям библиотекарьлэн ужезлы дышетски, студентъёс понна пӧртэм ужрадъёс ортчытъяй. Озьы агрономлэн дипломез вӧзы библиотекарьлэсьсэ но басьтӥ на.

Я, дыр вуиз ужан инты бырйыны. Алнаш ёросысь Байтэрекысь «Искра» колхоз, пе, агрономлы кулэяське. Но председательзы шуэм: нылъёсты уг куты, соос бызё, декретысь уг потало. Но пиосъёс пӧлысь отчы нокин мынымтэ. Практикаме отын ортчи вал бере, мыным ик инты ӵектӥзы, огъяулонниын инты сётӥзы. Уг вунэтӥськы ни нырысетӥ ужан нуналам председательлэсь верамзэ: гуртамы выль клуб, библиотека пуктӥмы, нош отын ужаны нокинлы. Но мынам соку агроном луон мылкыды кужмогес вал, лэся.

Али кадь ик тодам кылиз кузпалэным нырысьсэ пумиськеммы. Колхоз складэ матрас нуыны косӥзы. Ульчаетӥ мынӥсько, пумитам лыктэ сьӧдкысъем егит пияш. Тӧдьы дублёнкаен, пограничникъёслэн кадь изьыен. Шорысьтыз синъёсме воштэме уг ни луы, сокем со мыным чебер потӥз. Вӧзтӥм мыняса кошкиз. Малпасько, укыр чебер та пияш, шорам уз учкы. Вылаз ик, гуртысь школае таляк егит дышетӥсьёс вуэмын вал. Малпасько, кудӥз ке тае ас палаз кароз ни… Бӧрысь тодӥ, со – Ӟунняысь Виталий Тарасов. Армиысь алигес гинэ вуэм, пограничник вылэм, Байтэрекысь колхозэ связистэ ужаны лыктэм.

Бусы ужъёс кутскемлэсь азьвыл контораынгес пуконо луылӥз. Та чебер пияше огпол пыре, ма но со каремъяське, кыкетӥзэ, куинетӥзэ вуэ – марды ке ӧз тӥяськы-а, пе, нылъёс? Ӵош ужась кышномуртъёс, шорам учкыса, серемпыр верало: мар ке но ӵем пыраны кутскиз ай та казакпи.

Нош огпол монэ Актэмыр гуртысь хранилищеысь картошкалэсь ӟечлыксэ эскерыны косӥзы. Пыдын потӥ, мотике ӧй вал ай соку. Бӧрысь ини мон «Восход» мотикеным трасса вылтӥ тӧл кадь ворттылӥ, «ГАЗ» машинаосты, эсьмаса, азьпалтылӥ. Актэмыре потӥ но, Виталий но бордам итӥськиз, мыным но отчы ветлоно, пе. Лабыртыса сюреслэсь ортчемзэ ик валатэк кылим. Собере клубысь келяз. Шуи соку: туж потэ сурсву юэме. Мон, пе, дасяло. Маскара кадь луиз, сурсву юэммы бере сюан сярысь вераськыны кутским. Гужем пумын гожтӥськыны малпам вал, сюан дэрем но басьтӥ вал ни, Виталий сюрес вылын шудтэм учыре сюриз, сӧсырмиз. Арлэсь кема пӧртэм больницаосын эмъяськиз. Соин ик быдэс гуртэн сюан ӧм шудэ, Выль ар азьын гожтӥським но тӥни. Феврале Ирина нылмы вордскиз ни. Со бӧрсьы ик – Марина, Алёша, Максим. Ачим ик валатэк кыли кадь трос нылпиё анай луэмме...

Режиссёрез – кузпалыз

– Агрономын кема ик ужаса ӧй вутты. Кызьы шуиз председательмы, озьы ик луиз: вылысьтыз вылаз декретын пуконо луиз. Кыкетӥ нылме, 4-5 толэзьем мае ке, утисьлы кельтыса, ужаны потӥ. Кысык вакыт – уборка мынэ вал соку. Мыным шуо: 1-зэ гинэ агрономез кельтозы, пе. Ми соку 2 кузя вал: пиосмурт но мон. Валамон, кельтӥзы воргоронэз.

Соку нош ик ӵектӥзы: библиотекарьлэн интыез бушаз, басьтӥськы ай та уж борды. Озьы 1988-тӥ арын ноябре монэ библиотекаен кивалтӥсе юнматӥзы. Бусыез библиотекалы воштэме пумысен чик ӧй жаля.

Библиотека ужъя тодон-валанъёсме муромытон вылысь Ижысь культурая училищее пыри. Дышетскон вискам нылпиосме утиз Виталий Игнатиче. Эшшо ке сомында пудоен улӥмы соку. Со ваньзэ ас вылаз басьтӥз, огпол но жадемез вылэ ӧз ӝожтӥськылы. Нялтас вераса, со но культурая училищеез ик йылпумъямын, режиссурая факультетэз. Кивалтэ культурая юртэнымы. Ужрадъёсты соин ӵош дэмен ортчытъяськомы. Зэм но, со мынам режиссёре кадь. Шуом, кыӵе ке проектэ, конкурсэ пыриськоно ке, мон нырысь куалектэм кадь луисько. Таӵе дыръя Виталий Игнатиче биньгозыез ас кияз кутэ, тынад пӧрмоз, одно пыриськоно, шуэ.

Ма, монэ гинэ ӧвӧл, нылпиосмес но со бурдъяны быгатэ. Озьы 2004-тӥ арын быдэс семьяенымы пыриськимы «Под крышей дома твоего» элькун конкурсэ. Отын ми вормисе потӥм, Гран-при басьтӥм. Нош 2017-тӥ арын пыриськимы Россиын ортчись «Семья года» вожвылъяськонэ. Сцена вылысен возьматӥмы удмурт выжымес. Конкурслэсь Гран-призэ утӥм, гуртысь семьяос пӧлын тужгес устоосыз луим. Нялтас вераса, юри та конкурслы шуыса, дасямы Виталийлэсь выжы писпузэ. 7 поколенизэ тодыны быгатӥм. Вань выжыез мушкасьёс вылӥллям. Ми но та сямез азинтӥськом, муш вордӥськом.

Та вожвылъяськонын вормисе потыса, дӥсьтонэ будӥз кадь. Выль тодмоос, эшъёс кылдӥзы, соослэн мыло-кыдо луэмзылэсь адӟем кари. Малпасько, библиотекамес азинтоно, со понна пӧртэм проектъёсы пыриськоно. 2011-тӥ арын библиотекамес модельнойёс радэ пыртон вылысь проект гожтӥ, грант утӥм. Но ӵап соку Пичи Пурга ёросысь Пугачёво каргуртын пуштылон учыр вал, уноез социальной объектъёс изъянмизы. Соин ик Культурая министерство со уксёез висъяно кариськиз Пичи Пурга черкогуртысь библиотекаез тупатонлы. Нош монэ усто проект гожтэме понна ыстӥзы Россиысь гурт интеллигенцилэн форумаз. Со ортчиз Белгород улосысь Грайворон городын. Удмуртиысь культура удысъя огнам делегат вал. Отчы пыриськиз Россилэн Президентэз Владимир Путин но, делегатъёсын со кенешиз гуртэз котыр ласянь ӝутон сярысь. Эсьмаса, солэсь автографсэ но басьтыны быгатӥ.

Ог 2 ар ортчыса, кужымме мертаны малпай Россиын ортчись «Устоез библиотекарь» конкурсын. Отчы пыриськизы кунмылэн пӧртэм сэрегъёсысьтыз 300-лэсь ятыр библиотекарьёс. Удмуртиысь 3 адями вал. Финалэ потӥз 20 мурт, пӧлазы мон но. Но устоез библиотекарь луиз Москваысь Ф. Достоевский нимо библиотекалэн кивалтӥсез. Байтэрекысь библиотекамы москваосын вожвылъяськыны пӧрмытӥз шуыса, мон понна бадӟым дан луиз.

Трос пол вормисе поталлямы элькунамы ортчись конкурсъёсын. Семьяосын ужась клубъёс, озьы ик гуртъёсысь культурая объектъёс пӧлын устоосыз луимы, грант утӥмы. Со уксёен библиотекамес выль книгаосын, туала техникаен узырмытыны быгатӥм.

Ӟечезлэсь адӟем карон

– Гуртоослэсь ваньмон дырзэс пайдаё но тунсыко ортчытон вылысь ялан маке выльзэ малпаны тыршисько. Удмурт выжымес зол утьыса возиськомы. Кылем арын «Бай-Тэрек» фестиваль ортчытӥмы, отчы люканы быгатӥмы пӧртэм интыосысь 20-лэсь ятыр самодеятельной коллективъёсты. Арлы быдэ сямен ортчытӥськомы «Пукрол гуръёс» ужрадмес. Со сӥземын Пукро праздниклы, ӵапак угось бускель Ӟуннялась черкмы, та дун-чылкыт нуналлы сӥзьыса, пуктэмын-усьтэмын. Огазе кариськыса, осконэн герӟаськем кырӟанъёсты быдэстӥськом.

Трос ужрадъёсмы сӥземын киужлы, шаермылэн, гуртмылэн историзылы. Арлыдоос сяна, отчы мылысь-кыдысь пырисько пиналъёс но. Бен, коронавирус вӧлмемен, троссэ ортчытыны ӧм быгатэ. Но дыр вуоз – уж вырӟоз.

Удысам выль омыр пыртэм кадь луиз Эстониысь сету выжыысь адямиосын тодматскон. Соос гуртамы вуылӥзы 2004-тӥ арын, элькунамы «Юр-яр» фестиваль ортчыку. Соос Эстониысь Обиница гуртысь вуэмын вал, бӧрысьгес та инты фин-угор дуннелэн культурая шоркарез луиз. Обиницаысь сетуос доры трос пол куное вуылэме вань. Отын котьку чакласько, кызьы соос выжыоссэс утё, кыӵе ужрадъёс ортчытъяло. Кылсярысь, Обиницаын уло Ааре но Риэкка кузпалъёс. Гуртысьтызы одӥгаз юртын соос сету выжызылы сӥзем ужрадъёс ортчытъяло, нош отын ик усьтэмын сету калыклэсь сиёнъёссэ ӵектӥсь кафезы. Туристъёс та интые шумпотыса лыкто. Асьмелэн но вань маин паймытыны палэнысь лыктӥсьёсты. Озьы маке ласянь соослэсь адӟем карисько, ӟеч амалъёссэс ужам кутӥсько. Асьсэос но сетуос ми доры вуыло, соку гуртамы радъяськомы калыккуспо фестивальёс. Угось макем тросгес луозы эшъёсыд, сокем паськытгес луоз дунне шоры учконэд, сокем пайдаёгес карыны быгатод аслэсьтыд но удыстэ.

Вӧзам мылкыдме-удысме валась кузпалы, нылпиосы ӧй луысал ке, оло, культура удысэ ӧй но вуысал. Котьма ке но, кыӵе ке ужез нуыны но отын вормонъёс басьтыны кужым потэ семьяысь. Виталий Игнатиченым табере юртамы кыкнамы кылемын: 4 кузя пиналъёсмы пыд вылазы султэмын, семьяосынызы палэнын уло. Чидатэк витисько соослэсь, 5 нунокъёсылэсь адскыны бертамзэс, коркамы соку шудэн уката пачыла. Нош кошко ке, сюлэмме буйгатӥсько яратоно библиотекаям, бакчаям.

Источник:

Тарасова А. В. Усто мурт ассэ котькытын шедьтэ / Алевтина Тарасова ; вераськиз Елена Никитина // Удмурт дунне. – 2020. – 13 авг. – С. 10, 23 : фот. – (Тӧр шорын).

За предоставление материала выражаем огромную благодарность редакции газеты "Удмурт дунне"