Соловьёва Ольга Николаевна
Кырӟакум бӧрдӥсько, бӧрдыкум кырӟасько[править]
Кияса ёросысь Уддяди гуртын паймымон, сабырлы удмурт нылкышно улэ: верано кылзэ сюлэме пырымон вералоз, кырӟанзэ быдэс дунне тыр кисьтоз, ужано ужзэ йылысеныз пумозяз лэсьтоз. Куараез уӵылэн кадь жингырес, йырвизьмыз егит муртлэн кадь сазь, мылкыдыз сэзь.
Лулыныз-вирыныз, сюлэмыз вӧсь луытозяз, удмуртлыкез гажа, удмурт калык понна висе. Ольга Николаевна Соловьёвалы мӧйыез но, пичиез но Ӝакы апай шуыса вазисько. Та нуналъёсы Ольга Николаевналы 80 арес тырмиз.
- 80 ар ӵоже улытозяды оломаиз но вал, луоз? Малы меда тӥледыз Ӝакы шуиллям?
— Шонерзэ вераса, мынам пичи дырме тодам ик ваеме уг поты. Сютэм аръёс номыр ӟечсэ ӧз кельтэ. Анай-атаймы милемыз Сеня выныным пичиысен кыкнамес кельтӥзы, улонысь вазь кошкизы. Сеня понна мон нэнэ луи. Шумпотӥсько, ачим тодон-валан басьтыны ӧй ке но быгаты, вынме дышетӥ, калыке поттӥ. Со Ижысь гурт удысъя институтэз йылпумъяз, гуртэ бертӥз, колхозын тыршиз. Отын ик кайгырисько но: Сеня, висьыса улэменыз, 2002-тӥ арын улонысь кошкиз. Мынам та югыт дунне вылын вирыя матысь адямие чик ӧвӧл ни. Утехин выжымы мон бере чиптэм-чаптэм быре. Сенялэн но Валя кузпалыныз малы ке пиналзы ӧй вал.
Нэнэе но дядяе укмыс нылпи вайиллям, ваньмыз пичиысен улонысь кошкиллям. Собере кема пиналъёстэк улӥллям. Кызьы но озьы югыт дунне вылэ мон вордскиськем на. Соку кыӵе ке но висён, скарлатина шуо кадь, нылпиосты туранаса сямен ик куштылэм. Нылзылы улыны-вылыны мед кылдоз шуыса, вашкала сямъя мыным кыкетӥ ним сётӥллям — тылобурдоез сямен Ӝакы нималлям. Вордскем сярысь свидетельствоям Ольга гожтӥллям.
Лек ож кутскыса, дядяймес войнае басьтӥзы, кема ик дыр ӧз ортчы, похоронкаез вуиз. 1942-тӥ арын висьыны усьыса, нэнэмы но милемын люкиськиз. Озьы ми выныным кыкнамы кылимы: мыным дас арес, Сенялы — куинь. Кызьы ке но асьме понна улӥмы ини, бускельёс юрттэмен, пыд йыламы ӝутӥським, быдэ вуимы. Гужемзэ турын-куар вылын потӥмы. Война вакытэ одӥг тусьты пызь сётылӥзы. Тау дышетӥселы Пелагея Утехиналы. Со милемлы пызьлэсь ӝук пӧзьтыса кельтылӥз. Нянь пыжыны уг тырмы вал, дыр, ини. Одӥг пол Сеня, сиён курыса, бӧрдэ. Мае сётом, шуисько, ӧвӧл ук номырмы. Мар карыны ёрмыса, мед кулом вал шуыса, писпу улын бӧрдыса сылӥсько. Выны озьы выремме адӟем но дорам викышъяса лыктэ: апай, эн кулы, эн кулы, мон ноку но сиён уг куры ни. Ӵыжы-выжыосмы воксё ӧй вал, шуыны уг луы, но со сютэм аръёсы нокинлы мултэс ым кулэ ӧй вал ук. Ярам коть, пересь атаймы вал на, но со кема ӧз улы, 50-тӥ аръёслэн кутсконазы улонысь кошкиз. Ӵужкенакъёсы дорыгес мынӥсько ни вал.
Пичи дырмы секыт но сютэм ке но ортчиз, мон улонэлы уг ӝожтӥськиськы, Инмарлэсь вожзэ уг поттӥськы. Мынам адӟонэ сыӵе вал, дыр. Со курадӟон пыр ӧй ке потысал, дуннелэсь кызьы бергамзэ ӧй валасал. Тазьы ик, туннэ сямен, азьланяз но улыны мед кылдоз. Та дунне вылын тазалык мед луоз, солэсь но бадӟымез номыр кулэ ӧвӧл ни. Сютэм но йӧнала дӥськуттэк будыса, 80 аресам вуи ини шуыса, аслым ачим уг оскиськы. Мылкыд сыӵе ик капчи, но адямиез жадён зӥбе вылэм. Самой со ик пересьмон но вань, дыр. Пудо сюдыны кулэ бере, нуналлы быдэ сямен пушнерлы ветлӥсько, сое кораса чипы-куреглы сюдӥсько. Соку асме ачим эскерисько: кылем арын сямен быгато на меда пушнерме, тыбырам керттыса, вайыны. Туэ шӧдыны кутски: ӟигар быре.
- Юртъер возись муртлы воргорон ужез но быдэсъяно луылӥз, дыр?
— Пичиысен колхоз уже кутски, мугоры пичи, ачим чиед. Озьы ке но нокыӵе секытлэсь ӧй кышка: фермаын парсь но сюдӥ, рядовойын но тырши, бригадирын но ветлӥ, почтаын но ужай. Гуртэтӥ, коркалы быдэ журнал-газетъёс люкылыса, ветлӥ, соку калык трос лыдӟиськиз, сумкае аслэсьтым бадӟымгес вал, дыр. Сеняез дышетон понна уж вискам но гуртоослэсь корка пушсэс миськыса ветлылӥ. Ӝытсэ но кематэк доре ӧй вуылы. Уждун вӧзы пичи ке но копейка поттэмелы шумпотылӥ. Быгатэмея весь вынылы юрттӥ, номыр ласянь но анай-атаё эшъёсызлэсь медаз вожъяськылы шуыса. Сеня дышетсконзэ йылпумъяз но, скал басьтӥм, адями радгес улыны кутским, асьмелэн йӧлмы вал ини. Собереяз гид тыр ыж вордӥм, азбар тыр чипы-курег. Ноку но пудотэк ӧм улэ.
- Сыӵе улон пыр потыса но, сюлэмды ялан кырӟан борды кыстӥське. Тӥледыз тросэз уӵы шуо. Туж трос кырӟанъёсты, удмуртъёссэ, поръёссэ, бигеръёссэ, Сталин но Ленин сярысь тодӥськоды, кызьы ваньзэ йырады возиськоды?
— Мон весь кырӟай, улытозям кырӟай. Кырӟан ик монэ возе, со куректонме но, шумпотонме но буйгатэ. Кырӟан мыным сиён кадь ик потэ. Сюлмысьтым уг ке кырӟаськы, сотэк мыным иназ ӧвӧл, кӧты уг тыры. Ма, али но, бакчаям потӥсько но, отын нокин алӥсь но, кутӥсь но ӧвӧл, э, кырӟасько ук, э, кырӟасько. Огшоры кырӟан со медаз луы, бӧрдэм мед потоз, сюлэм мед бугыртӥськоз.
- Усто кырӟась кылъёссэ но, гурзэ но ачиз ик малпа, луоз?
— Ма, гурез калыклэн, дыр, нош кылъёссэ, чисто ачим малпаса, кырӟасько. Огнам кыльыса, улонэлэсь вань курытсэ ньылыса, кырӟасько, кырӟасько, кырӟасько. Улон гумырдэ, ӝождэ калыклы вераса уд ветлы ук. Куддыръя тонэ валась но уз луы. Пичи дыръям, калык пӧлы потыкум, нэнэедлэсь мӧзмиськод-а шуыса юаллясько ке вал, кӧты гинэ урод луылӥз. Со пумысен медаз ик вераське кадь потылӥз.
Одӥг пол бакчаям потӥ но адӟисько: ну, писпуэз тӧл някыръя ук. Дугды ай, малпасько, мон но, та писпу сямен ик, тӧллы сётӥськыны ӧвӧл кулэ. Со дырысен юн кариськыны дыши.
- Но тӥ улонын огнады ӧд кыле, сюлэмдэс валась адями шедьтӥды.
— Ныллы бызьыны кылдэм бере, егит дыръям мон но бызьылӥ. Пичи Пурга ёросысь Иван нимо воргоронэз дорам пыртосэ пыртылӥ. Со монэ аслаз гуртаз улыны чортэ вал, но дорысьтым потыны ӧй дӥсьты. Мурт шаерын кинлы мон кулэ луом? Со но озьы ик малпаз, луоз, дор палъёсаз кошкиз.
- Собере тӥляд улонады бадӟым воштӥськон ортчиз. Кышкыт ӧй вал-а ныло-пиё семьяе пырыны?
— Ӧй, ӧй кышка. Мыным сое ортчоно вал, дыр. Огнам улыны дышем мурт, 42 аресам мынӥсь мар ке Геннадий Соловьёвлы бызи. Со вакытэ Геннадий Степанович гуртысьтымы сельсоветын председатель луыса ужаз. Кузпалыз солэн Вавож палась вал. Висеменыз сэрен улонысь вазь кошкиз. Куать нылпизы кылиз: куинь ныл но куинь пи. Мамазы кулыку, самой бадӟымез Юра пизы армие кошкиз, нош пичиез Надя 6 аресаз мынэ вал. Табере нылпиос быдэ вуизы ини. Нуныкайёсмы но трос ни: 10 внуке, 5 внучкае, 2 правнучкае. Вордӥськем нуналам мар но уг кузьмало соос мыным! Бертэмзылы гинэ но туж шумпотӥсько. Мар табере мыным кулэ на?
Мыным кузпалэн 15 ар сяна улыны ӧз кылды. Генялэн сюлэмыз висьылӥз. Лябӟемзэ шӧдӥз, лэся, одӥг пол, валес вылын кылльыкуз, монэ дораз ӧтиз. Ӝакы, мон ӝоген куло, шуэ. Мон шулӟектӥ: осто, мар вераськиськод, нош мон кызьы огнам улом? Мон соку кошко татысь, уг улы огнам, шуисько. Улод, улод, Ӝакы, шуэ, тонэ нылпиос ярато. Макем тон визьмо нылкышно вылэмед.
Нылпиос куспын котьмар дырмы луэ вал. Куать кузя ук соос. Но ми Генялы номыр уродзэ ӧм вераллялэ, мар ке вал, сое нылпиос пушкы кельтылӥмы. Монэ соослэн кылынызы вӧсь каремзы ӧй вал. Вордэм мамазэс кадь яратӥзы. Пичи дыръязы Геня соосты курдатъя вал, ӧд ке кылзӥське, мамадэс улляло шуыса. Соку нылпиос мон борды бинисько: мама, кошкод-а шуыса юало. Уг, уг, мон тӥледыз жаляса лыктӥ ук, шуисько. Нуназе колхоз уже потай, нош уйёссэ кӧня пар пӧзьы но пыдвыл керттӥ меда! Чидай, ӧй кошкы. Адӟонмы сыӵе вал, дыр: куать нылпи вылэ эшшо кыксэ, Генялэн Миша агаезлэсь Володя пизэ но Лена нылзэ, дорамы басьтоно луимы на. Ачим но курадӟыса будӥ бере, соосыз но, таосыз но нылпиос умой мед улозы кадь потӥз. Огзылы но шунытме ӧй жаля. Йӧно семьяын вордскем нылпиосты калык радэ поттыны тырши. Генялэн благословить карем кылъёсыныз улӥськом, дыр, шуыса, малпасько.
- Кырӟась мурт шудтэм луэ, шуо. Соос радэ асьтэдыз пыртыны быгатӥськоды-а?
— Корка тыр нылпи пӧлын улыса, астэ шудтэм шуыны уг яра ни.
- Удмурт культураез, кырӟанэз утемды но вӧлмытэмды понна республикаямы нырысьсэ тӥледлы сётэмын «Признание» калык премия.
— Номыр но озьы гинэ уг ортчы, дыр. Пичиысен котькыӵе удысын тырши, секытлэсь ӧй кышка. Соин ик, дыр, 1986-тӥ арын Эшъяськон орденэн пусйизы. Со вакытэ ик туспуктэмме Ижысь Данъян пул борды шуккизы. Доскаез усьтыкузы, ачим Иже мыныны ӧй быгаты. Геннадий Степановиче шуэ, Иже, пе, ветлоно ай тонэ адӟыны. Ӝытазе кузпалы доре вуиз но паймыса вера: ёросысьтымы, тон сяна, доска вылын нокин понэмын ӧвӧл. Нош 2005-тӥ арын Кияса ёрослэн дано адямиез луи.
- Улонады бадӟымесь вормонъёс басьтэмды понна кинлы меда тужгес но тау кариськоды?
— Выныным беcпризорнойёс луыса кылимы. Милям корка вадьсамы пересьёс улӥзы. Уката но тодам лыктэ Лёгор агай. Ма, кышноез но солэн туж умой вал. Ялан соослэсь адӟем карыса, будӥ, верам кылъёссэс пелям поныны тырши. Гуртысь вазен улэм пересьёслы паймемысь но синмаськемысь али ке но уг дугдӥськы. Кыӵе соос улонэз валазы, визь сётыны быгатылӥзы, котькуд ужзэс малпаса но чакласькыса лэсьтылӥзы. Куддыръя шонер-а меда лэсьтӥсько шуыса юалляськыны доразы мынӥсько вал. Уддяди калыклы тау каремысь уг дугдӥськы, Лёгор агаез но, солэсь кузпалзэ но, вордэм анай-атайме но ялан буре вайисько, музъемысен инбамозь соослы тау карисько.
— «Инвожо» ансамбльтэк тӥледыз син азе ик пуктыны уг луы. Эшъёсты шуо: тӥ «Инвожо» ансамбльлэн шорсюлэмыз. Сцена вылэ ваньды вашкала, жильк-жильк удмурт дӥсен потӥськоды. Куараосты сярысь веранэз ӧвӧл ни — зэмос артистъёслэн кадесь. Вормонъёсты но адӟем карымонэсь.
— «Инвожо» ансамбле ветлӥсь эшъёсылы но тазалык сӥзисько. Соосын ми ӵош кыдамы, одӥг семья кадь улӥмы. Али но ялан огинын. Ёрос кивалтӥсьёсты, культура отделын ужасьёсты вератэк кельтэме уг поты. Соос коллективмылы ӧй ке юрттысалзы, сыӵе югыт сюрес милемлы ӧй усьтӥськысал. Вань ӟеч калыклы ӟеч кылъёс вераме потэ. Сыӵе адямиос вӧзын улыса но будыса, мон адямие потӥ. Бадӟым тау кареме потэ Надежда Пахомовалы, милям ёросамы со «Удмурт кенешен» кивалтэ. Надежда Викторовна ке милесьтым мылкыдмес ӧй ӝуткасал, ку сонякемысь дуннеосты котыръясалмы ай. Эсьмаса, самолётэн но кӧня пол лобаны кылдылӥз. Нырысь ик кунгож сьӧры Финляндие потамы, собере Эстоние вуылӥмы. Кӧня пол фин-угор фестивальёсы пыриськоно луылӥз. Кылдӥз ке кылдӥз калыкен адӟиськыны! Вуылӥмы Латвиысь «Балтика» фестивале, Чебоксарые, Марий Элэ, Калмыкие, Челябинске но трос музон интыосы. 2010-тӥ арын шуд усиз «Минута славы» передачае пыриськыны. Котькытын милям дӥськутмылы, кырӟаны но эктыны быгатэммылы паймылӥзы. Фестивальёсысь лауреатъёс луыса бертылӥмы. Со вормонъёс эшшо юнгес мылкыдмес ӝутылӥзы, азьланяз улыны но ужаны кужым сётылӥзы.
- Тӥ Геннадий Степановичлэн Петя пиезлэн семьяеныз улӥськоды. Юрт котырды жон-жон. Нош асьтэлэн вордӥськем коркады кыдёкын-а?
— Атай юртмы али ке но интыяз сылэ на, 1910-тӥ аръёсы ӝутэм корка вужмемын ини, ланьырскемын. Жаль потыса ик нуналлы быдэ шораз учкылӥсько, но мар карод на соин? Выны улэп луысал ке, отын ик улысал, дыр, ай. Мон бызьыку, Сеня дотово бӧрдӥз, апай, тон кошкиськод бере, мон та юртэз вузало, шуэ. Огмылы но отын улыны ӧз кылды.
- Тӥлесьтыд 80 арес тырмондэс Кияса черкогуртысь культура юртын пусйизы, собере — Ижысь Эшъяськон юртын. Юбилееныды ӟечкыланы вуылӥзы элькунысьтымы тодмо-дано адямиос: учёнойёс, артистъёс, кылбурчиос.
— Тау кареме потэ вань удмурт калыклы. Тужгес но Надежда Пахомовалы. Со ке монэ ӧй ӝуткасал, кытысь таӵе-таӵе данэз адӟысал ай.
Источник:
За предоставление материала выражаем огромную благодарность редакции газеты "Удмурт дунне"
