Рысин Иван Иванович
Зыми но... гурезе туби[править]
Та тодосчи туж юн герӟаськемын музъемен. Со эскере музъем вылкӧмлэсь азинскон законъёссэ, адямилэсь отчы пыриськемзэ. Иван Рысин 28 аресаз луиз география наукаосъя кандидат, 45 аресаз - доктор. Шуръёслэсь ӧръёссэс, отын воштӥськонъёсты эскеронъя ужъёсыз калыккуспо изданиосын печатласькизы, нош огъя вераса, 200-лэсь уно наукая ужъёсыз ни, пӧлазы дас монографиез.
Пичи гуртысь потэм пияш ӝабырес тубиз гурезь выллане. Удмурт университет, Ленинградысь, Казаньысь университетъёс, аспирантура (геоморфология но палеогеография удысъёс) - отысен нош ик аслад вордскем карад берытскон. 2000-тӥ арысен Иван Иванович география факультетлэн деканэз луэ. Та дыр куспын факультет йыгмытъёсыз радэ султӥз, азьмынӥсь луиз.
И. И. Рысин наукаын эскерон ужъёссэ юн герӟа дышетонэн, методикаен. Коллективеныз ӵош мур тодонлыко специалистъёсты дасяны сюлмаське. Факультетысь дышетӥсьёс Удмуртилэн географиезъя выль учебниксы понна асьме Правительстволэн премиеныз пусъемын.
Шаерысьтымы наука удысысь дано ужась вань кужмыныз пыриськиз Удмурт Республикалэсь энциклопедизэ дасянэ-поттонэ. Отын солэн сю пала материалэз печатламын.
- 2003-тӥ арын В. Туганаев, П. Воронцов но А. Перевощиков тодосчиос поттӥзы география нимкылъёсын ӟуч-удмурт кыллюкам. Тӥляд мылкыдды ӧй вал-а та уже пыриськыны?
- Зэм, та словарь паймоно кадь, пыр-поч малпаса сузьемын, удмурт-ӟуч люкетэз но вань. Кыл бордын ужасьёслы тунсыко. Жаляса верано, мон та ласянь «чутӥсько», удмурт кылэз дышетэмын ӧвӧл. Сьӧлта ёросысь Кырчим гуртамы 30-40 корка гинэ вал бере, кык иськеме Копкие ветлоно луим. Собере ини - Сьӧлтала, таиз 25 иськемын. Та школаосын удмурт кылэз ӧз дышетэ.
- Син азям пуксе: пичи гинэ пияш, котомказэ мырдэм вормыса, тӧл пельтэмъёстӥ, букосъёстӥ школае вамышъя.
- Озьыгес ик вал со. Копкиозь бусыетӥ, шай вӧзтӥ но ортчоно луылӥз. Кӧня ке кузя люкаськыса, школае поталлямы. Будысагес ӧй кӧшкема ни, со шай пӧртмаське но мар шуыса кышкатъязы ке но. 5-тӥ-6-тӥ классъёсысен велосипедэн ширтылӥ ни. Нош куас 1-тӥ классысен ик кутчай. Ас киын лэсьтэмын вал ай. Собере басьязы, но кӧня пол чигтылӥ меда…
- Ӟеч адямиос бырымтэ. Та ласянь удалтылӥз-а?
- Нырысь ик Акулина бабуме вераны быгатӥсько. Мон со вӧзын будӥ. Нюлэскы-а, шур дуре-а мыноно - сьӧрысьтыз ӧз келля. Монэ Окулинлэн пиез шуылӥзы. Бабуэ кема улӥз, 87-ез тырмыса кошкиз. Трослы монэ дышетӥз. Вашкалаез тодонэ соин герӟаськемын. Рысин фамилимы сярысь вераз: выжыямы пӧйшурасьёс вылӥллям.
Дышетӥсьёсын но удалтӥз, шуэме луэ. Валерий Георгиевич Протасов, школаысь географмы, со ик суредась но мон понна зэмос герой вал.
- Валамон, кытысен потӥз географ луонды.
- Бен, дышетӥсе ик тылгизьы уськытӥз. Сьӧлталан дышетскыкум, малпанэ юнмаз. 9-тӥ класс бере нырысьсэ бадӟым походэ потӥм. Моторен пыжъёсы пуксьыса (соосты тол вылтӥ асьмеос лэсьтылӥм), Калмез, Ватка кузя Волгаетӥ Казанёзь вуим. Нош бертӥм ини поездэн… Озьы ог кык арня куспын мае но ӧм адӟе, палаткаосын кӧлам.
Милям гуртмы тэль пушкын. Ӝуйы гинэ, нюрмульы… Номыр сокемез ӧвӧл. Кельшо вал эркын, гурезё интыос, котыр дунне мед адскоз. Та ласянь армиын удалтӥз. Хабаровск но Владивосток вискын Дальнереченск город дорын службае ортчиз, танкистын. Сихотэ-Алинь гурезьёс, сопкаос, Уссури шур, Ханка ты, Япон зарезь…
- Ижысь пединститутэ мыныса, университетэ сюриды. Нош удалтӥз…
- Бен, дышетон программаос муромытэмын вал. Та ӧр монэ кыскиз, зыми но - отысь ӧй поты ни. Ӧй но шӧды - «5»-ёс коже дышетскыны кутски, 4-тӥ курсысен ленин стипендиат луи. Совето Союзысь устоосыз студентъёс чотэ сюри: юромо Москвае лэзьязы, Вормон Знамя вӧзын туспуктон понна. Со бадӟым кузьым вал мон понна: университетысь огнам. Москваын экскурсиосы нуллӥзы. Вооружённой Кужымъёслэн музеязы ветеранъёсын оградын тусмес пуктӥзы.
- Студент дыръя ӵем адӟылӥм: та лапышак мугоро пияш сцена вылэ но вуттӥське, спортын но мукетъёссэ азьпалтэ…
- Мон факультет хорын гинэ кырӟай. Пель вылам гондыр пуксемын. Начальной классъёсты йылпумъякум, соин йырин гинэ отличник ӧй луы. Нош физкультураез яратӥ. Котькуд ӵукна - зарядка (али ке но мугорме куасасько). ГТО-лэсь куронъёссэ быдэстыса, зарни значок басьтӥ (тросэзлэн азвесь вал). Ӵошатсконъёсын ӵемысь вормисе потылӥ, куасэн мынам нырысетӥ разряд.
- Студент дыръяды ик котькуд гужем экспедициосы поталляды. Соку ик, вылды, ӧд быгатэ ни синдэс кыньыса учкыны: кызьы, тӧл пельтыса яке ву гылтыса, изъянмо гыриськись муос.
- Бен, му вылэз тӧл но ву «сиён» учыръёс шугъяськытыны кутскизы. Курсовой но диплом ужъёсме экспериментъёсын юнматон понна гужем экспедицие кариськи но муэз съёмкаос лэсьтыса эскери. Соин валче трос-трос пробаос, анализъёс кулэ вал. Тыршеме оскымон пӧрмем. Кафедрамы монэ синйылтӥз. МГУ-э конференцие ыстӥзы. Докладме лыдӟоно луи совето странаысь бадӟым учёнойёс азьын. Тӥни со бордысен ик ваньмыз кутскиз. «Му вылын эрозия» темаме доктор диссертациозь вуттӥ, Европалэсь шундыӝужанпал ӵошалзэ (равниназэ) эскери.
- Тӥляд эскеронъёсты гурт удыслы пайда сётӥзы. Кызьы соос кутӥськизы но кутӥсько?
- Кылсярысь, Алнаш ёросысь «Красное знамя» колхозын огкыл кутыса ужамы. Отысь музъемъёсты тӧлэн-вуэн «йыръемлэсь», вукыремъёслэсь утён вылысь расчётъёс лэсьтӥм, ужрадъёс дэмлам.
Милесьтым эскеронъёсмес уже пыӵатон понна трос уксё кулэ. Тодӥськом: гурт удысын ноку коньдон ӧз тырмылы. Соин ик муослэсь зумытсэс ыштонтэм понна дэмланъёсмес улонэ пыӵатыны шугъяськиськом.
Чаклано ке, му вылъёс тросгес начармо лымшор ёросъёсын. Отын уго тэльёс ӧжытгес, меӵ бамалъёс но гыремын. Азьло укыргес тыршимы та ласянь. Али трос музъемъёс гырытэк кылё, соин валче тросэз вукыремо интыос «йӧназы», будосъёсын шобырскизы. Инкуазь аслэсьтыз басьтэ.
- Табере тӥ шуръёслэсь ӧръёссэс эскериськоды. Та бордын мар тунсыкоез?
- Бен, книга но поттӥм: «Русловые процессы на реках Удмуртии» (2006). Эскерим, кытын кызьы ярдуръёс гылтӥсько, ӧръёс воштӥсько. Шурлэн тусыз огкадь уг возиськы: вукыремъёсысь, бамалъёсысь сюез тудвуэн, зор вуэн шукке ярдуръёсы, ву пыдэсъёсы. Та ласянь асьмелэн «бӧрдӥсь» гуртъёсмы вань. Тани Кизнер ёросысь Крымской Слудка гуртын 7 урамез Ватка шур «ньылӥз» ни. Озьы арлы быдэ 20-30 метрез ву асэстэ. Малы? Шурлэн вылӥязгес сыӵе визылэз вань, миандра шуиське, сое номырин уд дугдыты. Ог сю арзэ ни со озьы ӧрзэ воштыса азьланьске. Табере пумитаз гурт шедем. Черксэ но ини выйтӥз. Улӥсьёсыз чигнало-кошко…
Таӵегес адӟонзы Калмез дурысь Головизнин Язок, Чупчи вӧзысь Кожило гуртъёслэн но. Лэсьтӥм картаос, пусйылӥм кышкыт интыосты, кытын уг яра лэсьтӥськыны. Отчы кемдыны быгатозы электро юбоос но, мувӧй гумыос но - дыраз тодӥд ке, утьыны луоз.
- Адӟиське: эшшо огез удысты - рекреация. Мар со?
- Рекреация - шутэтскон. Та удысъя но книга поттӥм ни. Эскерим Удмуртиысь чебер интыосты, кытын адями шутэтскыны, эркын шокчыны быгатэ. Трос карта лэсьтӥм. Пусйим: асьме дорын сыӵе инты, нырысь ик, Камлэн бур пал ярдурыз, Вотка тыметлэн котырыз. Таӵе интыосын курортъёс лэсьтыны луоз.
- Наукаын вормонъёсты зол ик герӟасько вылэм факультеттылэн ужъёсыныз. Эшшо маин данъяськемды луэ?
- Экология ласянь ужаменымы. Милям котьку син азямы но кыл йыламы ОВОС (оценка воздействия на окружающую среду). Таӵе эскерон-дунъеттэк инкуазьлэсь нокыӵе узырлыксэ кутыны, лэсьтӥськыны лэземын ӧвӧл.
Республикалэсь «Экология-2000» программазэ дасянэ но быдэсъянэ пыриським. Наташа Краснопёрова студенткамы, кылсярысь, инкуазез мувӧен кырсёмытон ласянь эскеронъёсыз понна нимысьтыз премия утӥз, Великобритание вуылӥз.
Нимаз районъёсъя но ужаськом. Тани Вавож ёрослэсь быдэсак инкуазьзэ, экологизэ учким, сэрттӥм-пертчим, солы сӥзем книга но гожтӥм. Сое школаосазы но уже куто ни. Табере кутским Можга ёрос борды.
Удмуртилэн географиезъя учебникмы туэ куинетӥ изданиен потӥз ни. Вылез трос, милям удысамы уго тодонъёс ог вить ар куспын вужмыны вуо.
- Школьникъёслы таӵе учебник поттон азьло возиськиз С. И. Широбоков вылын, сизьым изданиез вылэм. Таӵе «адями-гурезь» возиз факультеттэс. Кин со тӥ понна?
- Нырысь ик пусъём: удмуртъёс пӧлысь со нырысетӥез географияя профессор (степенезъя доктор ӧй вал ке но). География факультетмылы 18 ар гинэ ай, 1990-тӥ арын усьтӥськиз. Та арын ик Степан Ивановичез пенсие келямы. Но ӵапак солэн возем инъетэз ик милемлы пушйыны, ӝутскыны луонлык сётӥз.
Со бадӟым улонэз пырпотэм адями, орденъёсын пусъем фронтовик. Тодон-валанэзлы, йырсазьызлы паймылӥм. «Знание» обществолэн лекторез вал, колхоз кузёосты, оло, ваньзэ тодылӥз.
- Факультеттылэн туала «ымнырыз» кыӵе?
- Ньыль кафедрамы, лабораториосмы, Вотка ёросысь Фертики гуртын геостанцимы вань. Дышетӥсьёсмы 35 котырын. 21-ез наукаосъя кандидатъёс, соос пӧлын ньыль удмуртэз: И. К. Чирков, И. Л. Малькова, А. Ф. Кудрявцев но А. А. Перевощиков. Доктормы куинь: мон сяна, В. И. Стурман но С. В. Пучковский (таиз биолог). Ас дорамы но учёнойёсмес будэтӥськом. Мынамаз (геоморфология) аспирантураын куинез диссертацизэс утизы ни. Туэ И. И. Григорьевлэн черодэз. Мон сямен ик - Иван Иванович, удмурт пияш.
- Коридоретӥ ортчыку но, шӧдӥське: тӥляд студентъёсты тросэз пиос. Гуртъёсысь но ӧжыт ӧвӧл, дыр?
- Зэм, гуртъёсысь трос лыкто. Городысьсэ но вераса, удмуртъёс 40-50 процентозь луыло. Вань студентъёс пӧлысь ӝыныез - пиос. Соос картография бордыгес карисько. Татын уго, йырвизь сяна, кужым но кулэ, приборъёсын ужано, экспедициос дыръя - тужгес но.
- Кылзӥськисьтэм студентъёсыз тӥ доры пыртыло-а?
- Кылзӥськисьтэм - со кыӵе? Студент куинь пол куинь экзамензэ «2»-лы сётэ ке… Соку улляно луиськом. Со вань вузъёслы огъя правило. Туала студентъёс куд-огез ичи кужымен вылэ тэтчыны выро. Со тӥни синкылиозь вуттэ, анайёссы дорам пыро.
- Ас анайды пиез понна шумпотыса вуиз-а?
- Бен. Со 2001-тӥ арын кулӥз, мон соку декан вал ни.
- Декан луыса кыӵе дӥсьтон вамышъёс лэсьтӥды?
- Укмыс арзэ ни ми Россиысь олимпиадаосы келялляськом студентъёсмес, соос бертыло вормыса. Кылем арын инкуазез уже кутонъя но экологияя олимпиадаын кыкетӥ луизы, МГУ-ысь студентъёсты но азьпалтӥзы. Сӥзьыл ветлӥзы Улан-Удэе, нырысетӥ луизы. Саранскын - куинетӥ. Ньыль арзэ бӧрсьысь вуылӥмы ни Санкт-Петербурге калыккуспо бадӟым фестивале. Отын луэ научно-практической конференция но олимпиада - брейн-ринг. Нырысь-валысь вормылӥзы бадӟым городъёсысь студентъёс, нош берло кык арзэ милямъёс кубокъёсын бертӥзы.
- «Олимпийской декан» юнме уг шуо вылэм тӥледыз.
- Спортын сямен вожомон, вожмаськон пыӵаз, дыр, сямам. Мугорез кыдатэм но кулэ физико-географлы. Декан луыса сьӧрлось практикаосмес улӟытӥ. Студентъёсмы нош ик Тянь-Шане потаны ӧдъязы, Байкалэ но нуллӥм кык арзэ, али Карелие, Кольской шормуӵе вуыло.
2005-тӥ арын тулыс декан быръён дыръя монэ интыям ик кельтӥзы. Таӵе оскон вань ке, со маке но сярысь вера, дыр. Пукись из улэ ву уг бызьы. Россиысь Наукаосъя Академилэн геоморфологияя комиссиезлэсь 29-тӥ пленумзэ Ижын ортчытӥм. Странаысь тодосчиос дорамы кыстӥсько ни.
Источник:
За предоставление материала выражаем огромную благодарность редакции газеты "Удмурт дунне"
