Радионов Олег Викторович
Мыным куинь диплом уг тырмы[править]
Удмурт Элькунлэн Президентэз Александр Волков промышленностья, энергетикая но транспортъя министре туэ юнматӥз Олег Радионовез. Удмуртиысь культура удысысь дано ужась, Россия Федерациысь За заслуги перед Отечеством орденлэн II степенё медаленыз пусъем мурт журналистъёслы кемалась тодмо. Выль ӧре выжытозяз, Олег Викторович Радионов кивалтӥз Ижысь полиграфкомбинатэн. Кык созывын сое бырйылӥзы Кун Кенеше депутатэ. Ижысь инженерлэн но дышетӥсьлэн семьяязы кыдам воргорон паймытэ небыт луэменыз, калыкен вераськыны, адямиослы юрттыны быгатэменыз.
- Олег Викторович, туала пуконды, азьвылэныз ӵошатыса, небытгес яке чурытгес?
- Тазьы шуысал: таиз пуконэ чурытгес. Но сое рос-прос мертаны ӧз кылды на. Удысэ туж паськыт, вань огазеяськонъёсын тодматсконо, котькытчы вуттӥськоно.
- Кылем арын гинэ, ньыльдон вить арестэс пусъён азяды, верады вал, газет-журнал поттон ужлэсь палэнскыны уд малпаське шуыса…
- Кылдэмез озьы, дыр. Президентмы Александр Волков министр луыны ӵектӥз но, малпаськонэ уси. Вормо-а ныпъетме? Соку ик тодам вайи Ижысь полиграфкомбинатэн кивалтыны кутскемме. Со вал 1993-тӥ арын март толэзе. Кивалтонэ монэ бырйиз комбинатын ужась калык. Тӥрлык вужмемын. Мукет типографиос газет поттыны кутско ини выль офсет амалэн. Со юрттэ туспуктэмлэсь ӟечлыксэ будэтыны. Милям со ӧвӧл. Озьыен, музон сямен ужаны дышетскем муртъёс кулэ. Со сяна, уждун пичи - калык мукет азе пегӟе. Валтӥсь бухгалтермы, валтӥсь инженермы, производствоен кивалтӥсьмы гинэ но ӧвӧл. Поттӥськомы куинь газет: «Удмурт дунне», «Удмуртская правда» но «Известия Удмуртской Республики». Мукетъёсыз кошкизы милесьтым со вакытлы ӟечгес но ӝоггес ужась Киров но Казань типографиосы. Заказъёс ӧвӧл. Кызьы таӵе азьын кузёяськод? Кутски та удысын вылӥ образованиен муртъёс дортӥ ветлыны. Соосты ас дорам кыскыны амал но шедьтӥ: асьмеос Удмуртиын чиньыен лыдъямон, асьмеос ке ӧм, нокин но уз быгаты югдурез тупатыны, солэсь ортчыт - таӵе типографимес но ыштомы, шуи соослы. Сюлэмзэс вырӟытӥ кадь. Туннэ валтӥсь специалистъёс - кык вылӥ образованиен адямиос. Президентмы Александр Волков дурбасьтэмен, офсет амалэн печатлан борды но кутскыны быгатӥм. Кредитэн басьтӥмы Германиысь «Юнисет-60» машина. Сыӵе тӥрлык, Москваын, Иркутскын но Владивостокын сяна, ӧй вал на. Россиысь азьмынӥсь предприятиос радэ потӥмы. Приволжск федерал округын, Уралын ми огнамы нырысьсэ поттыны кутскимы турлы буёло газет-журнал. Таӵе вормонъёсты сяна, тодам вайи Кун Кенешысь депутатын ужамме. Ушъяськем кадь медаз кылӥськы. Калыкен пумиськонъёс радъялляй, шуг-секытысь потыны юристэн ӵош юрттылӥ, шумпотыса басьтӥськи выль законъёс кылдытон борды. Кун Кенеше нырысетӥ быръемазы юрттӥ мӧйыос сярысь программаез кылдытыны. Кыкетӥ быръемазы коррупциен нюръяськон пумысен законэз кутонэ пыриськи. Таиз ласянь быдэс Россиез азьпалтӥм. Выль пукон ӵектэмзы бере малпай: тодон-валанэ тырме бере, оло, асме министрын эскероно? Уг ваты: аслам но берло дыре потэ ни вал кужымме выль удысын мертаме.
- Директор дыръяды, оло, полиграфкомбинатэз узырмытон пумысен лушкем малпанъёсын улӥды? Быдэсмытэк кылем мылкыдъёсты вань-а?
- Полиграфкомбинат Россилэн палэназ но тодмо мед луоз шуыса, ялан сюлмаськисько вал. Милемыз котькытын кылӥзы ке, озьыен, ми доры вазиськылозы. Америкаысь но Финляндиысь заказъёсмы вал ни. Сыӵе кусыпъёсты паськытатыны медӥ. Жаляса верано, та мылкыдме улонэ пыӵатыса ӧй вутты. Но комбинат интыяз уг сылы. Сӥзьыл гинэ отчы пуктӥзы выль тӥрлык - печатлась машина. Та юрттэ изданиослэсь буёлзэс яркытгес карыны, соосты калык доры ӝоггес вуттыны. Оскисько, туала директор Василий Сидоров мынэсьтым малпанме быдэстоз.
- Озьыен, полиграфкомбинатлэн выль кузёезлы ӟеч ваньбур кельтӥллямды, нош татын, министерствоын, тӥледлы кыӵе пирдан выжиз?
- Сое озьы шуыны луэ меда? Мон дасяз креслое ӧй пуксьы - чылкак выль министерствое вуи. (Туэ огазеязы Промышленностья но транспортъя но Эстӥськонъя, энергетикая но связья министерствоосты - авт.) Мон уг шуиськы: мынэсьтым азьло кивалтӥсьёс урод ужазы. Туннэ воштӥськемын улон шоры учкон. Али бадӟым саклык висъяно предприятиослэсь ӧрзэс воштонлы, соосты куашканлэсь утьыны тыршоно, поттэм вуззы калыклы матын мед луоз.
- Ижысь автозаводлэн азьпал улонэз кыӵе меда? Вань-а со?
- Асьтэос тодӥськоды: со али банкрот луон калэ вуэмын. Но мон лыдъясько: югдур асьме бордын гинэ ӧвӧл. Россиялы мур малпаськоно: кулэ-а асьме кунын поттэм машина? Яке асьмеос, мурт кунысь ваем машина люкетъёсты гинэ бичаса, уломы-а? Ӵапак таӵе ужпумез али пертчыны кулэ Россиысь Правительство. Мон малпасько: асьмелы туж кулэ дорамы потӥсь «корт вал». Жаляса верано, калык кыстӥське мукет кунын кылдытэм машина котыре. Но асьмеос маин лябгес? Выль модельёс малпан бордын ужаны кутскимы ке, нокинлэсь но бере ум кыле. Вераськон нуиськомы Кореяен. Отын потӥсь машина люкетъёсты Ижын бичаломы. Озьы лэсьтомы «Киа-Спектра» но «Киа-Сорренто». Кыкетӥез ужпум - ВАЗ-2107 машина поттонэз сётоно «ИжАвтолы». Та ӧръёсты огазеяд ке, завод улӟоз. Югдурлэн умоямез потоз Россия Правительство бордысь. Со чакланы кулэ: кулэ-а калыклы асьме машинаос? Кулэ шуизы ке, «ИжАвто» уз быры. Туннэ ми сюлмаськыны кулэ мукетыз пумысен но: заводэз люкетэн-люкетэн медаз лушкалэ.
- Мотоцикл поттонмы воксё куашказ-а ни?
- Жаляса верано, таиз удыс ворсаськиз, шуыны луоз. «Ижмаш» заводлэн огез предприятиез соин выре вал. Туннэ со чалмиз. Но вожъяськымон ужа мукетыз пичи огазеяськон. Отын мотоцикл бичало, выль модельёс потто. Таосын ми ӵош ужаськомы, удыссэс паськытатыны малпаськомы. Кык толэзь азьло вуылӥзы Кореяысь специалистъёс, электромотоцикл татын поттон пумысен кенешим. Оло, маке пишмоз.
- Пыӵал тӥрлык лэсьтонэн мар луоз?
- Татын но тросэз потэ кунлэн куронэз бордысь. Али ӟеч ужало Воткаысь машина поттонъя завод, Ижысь «Купол» завод, мотозавод, «Аксион». Кылсярысь, али, кылем арен ӵошатыса, «Купол» заводын 180 процентлы тросгес вузъёс потто. Зэм, куд-ог заводъёс ужтэк пуко, шуыны луоз. Кылсярысь, «Ижмашысь» ыбылӥськон пыӵал поттон удыс 85 процентлы гинэ «тырше», снайпер пыӵал поттон - 90 процентлы. Куд-ог заводъёсты мукет ӧре но выжтыны луэ. Нош тазэ - нокызьы, малы ке шуоно быдэс Россиын сыӵе аспӧртэм завод ӧвӧл. Специалистъёсты но лэзьыны уг луы - бӧрысь соосты огазе уд бича ни. Кун сётэ заказ. Сое одӥг арлы чакланы луэ ик, нош мар луоз, куинь ар ортчыса? Тае нокин вераны уг тоды. Со ласянь секытгес. Кема дырлы чаклам планъя ужано вал. Но сое асьмелы нокин туннэ уг сёты.
- Элькунамы интыяськем тужгес бадӟымесь предприятиосын кивалто Удмуртилэн палэназ улӥсь муртъёс. Кызьы та шоры учкиськоды?
- Шонер вераськоды. Та юан монэ но юн сюлмаськытэ. Малы ке шуоно министерство предприятиосын кузёяськыны уг быгаты. Со дыре ик ми соослы юрттыны кулэ. Тужгес вӧсь мукетыз. Предприятиослы кивалтӥсь быръён ортче, республикаямы улӥсь калыклэсь мылкыдзэ санэ басьтытэк. Чиновник гинэ но со уже пыриськыны уг быгаты. Со умой шат? Та ужпумез ӝутыны малпасько, вылӥ кивалтӥсьёслы вазиськыса. Чалмыт улыны уг яра. Малы ке шуоно завод кузё бордысь туж тросэз потэ: ӟеч улоз-а огазеяськон, калыклы отын ужаны луонлыкъёс кылдытэмын-а? Уката ик туала кризис вакытэ. Котькыӵе воштӥськон, ужысь кулэстон нырысь ик шукке огшоры муртэ. Куддыр тазьы луэ: кузё ужасьёсыз сярысь сюлмаськемысь дугдэ. Интызэс ыштэмъёслы кызьы но озьы юрттыны выриськомы ик. Кинэ но сое дышетскыны келяськомы. Куддыръя вазиськиськомы вылӥослы, юрттэт курыса. Кылсярысь, «Нефтемаш» но Сарапулысь радиозавод пумысен ходатайствоен потӥмы. Соос элькунмылэсь люконтэм заводъёс, ворсаны уг яра шуим. Табере банкрот уз кыле, возиськыны мед пишмытозы шуыса, субсидия басьтыны быгатозы. «ИжАвто» пумысен сыӵе уж берыктэмын ини. Нялтас вераса, пичиесь огазеяськонъёсмы но мурт киын ни. Соос пырисько ужбергатӥсьёслэн ассоциациязы. Таосыныз ми туж кенешыса ужаськомы.
- Огъёссэ огазеяськонъёсмес ыштӥмы шуыса, бӧрдӥськомы, мукетъёссэ асьмеос келяськомы. Озьы юаны вырисько: малы «Удмуртнефть» выжиз Китай кие?
- Вунэтоно ӧвӧл, дыр, тани мае. Асьмелы экономика ласянь эрик сётэмын. Со вие ик чаклано луиськомы Россиын кутэм законъёсты. Огез шуэ: ваньбурен кун гинэ кузёяськыны уг быгаты. Мукет сямен вераса, огазеяськонлэн акциосыз пӧлысь оглюкетэз гинэ кыле кун кие. Озьы ик луиз «Удмуртнефтен». Зэм, туннэ трос вераськыны луэ: ӟеч-а со, ӧвӧл-а. Но со уж берыктэмын вал ни мон министерствое лыктэмлэсь азьло ик. Али мукетыз сярысь сюлмаськоно. Кылсярысь, муысь сьӧд зарниез тыбырад ныпъяса уд нуы. Валтӥсез - сое асьме дорын поттыны, калыкмылы ужан инты кылдытыны мед луоз, вытъёс Удмуртие мед кылёзы.
- Башкириын ӝутыны медылӥзы электростанция. Удмуртия таӵе малпанлы пумит вал. Туннэ со юан пытсамын-а ни?
- Дуннеысь туж тросэз проектъёс кынмизы, кризис вуэмен. Таиз ужпум но озьы ик. Котьма ке но асьмелэн мукет шумпотонмы вань. Камбарка дорын выж ӝутӥмы. Ноябрь толэзе Воткаын ӝутӥськиз «Вектор» нимо выль завод. Отын поттозы электрокужымез люкылӥсь приборъёсты. Китаен вераськонъёс мыно Можгаын пияла поттонъя завод усьтон пумысен.
- Татарстан Нижнекамск водохранилищеез ӝутон малпанэн улэ вал. Кызьы сое дунъяськоды?
- Мон со шоры туж кырыж учкисько. Элькунмылэн ӟеч музъемез ву улэ кылёз уго. Соин ик, кык кунъёс огкылэ вуытэк, югдур интыысьтыз уз вырӟы. Экономикамылы но экологимылы изъян вайиз ке проектсы, соглаш ум кариське. Асьмелы ыштон ваемез понна Татарстан уксё висъянэн яке мукет маин ке гочатӥз ке, соку малпаськомы на.
- Семьядэс но шукко-а та выллем малпанъёс? Кызьы пумитазы ӵыжы-выжыосты министр луэмдэс?
- Соослэн мылкыдъёссы люкиськизы. Ачим огзэ тодӥсько: нылпиосы пичиесь луысалзы ке, министр луыны пумит кариськысал, дыр. Соослы саклык кулэ ук. Нош али соос палэнэ кӧчемын ни. Дмитрий пие дышетске Москваысь печатья кун университетын. Валерия нылы Чехиысь Карловской университетэ пырыны дасяське, отысь курсъёсты йылпумъя. Кышное Елена Александровна, огласянь, бурдъя монэ кужымелы оскеменыз. Мукет ласянь, жаля. Ачим но ӧпкелисько, ог-огмылы дыр ичигес кыле шуыса. Нялтас вераса, ми соин одӥг институтын, одӥг факультетын дышетскемын. Со доцент, али Удмурт кун университетын егитъёслы валэктэ, кызьы поттоно книга. Азьвыл шутэтскон нуналъёсы быдэс семьяен кытчы ке потаськомы вал. Туннэ быдэсак выемын ужам. Доре бертыса но, пӧртэм документъёсты учкытэк уг луы. Соосын ужын вырыны дыр уг шедьы. Семьяе вала монэ. Нырысь арзэ секыт, отӥяз капчигес луоз шуыса, оскисько.
- Кыӵе вӧтъёс адӟе меда министр?
- Бер выдӥсько бере, соку ик умме усисько. Номыр уг адӟиськы кадь. Та дырез мон ӵошатӥсько ортчем аръёсыным. Институтэз быдтэме бере Ижысь полиграфкомбинатэ вуи но - ваньмыз выль, ваньзэ тодэме потэ. Цехен кивалтӥсез кури монэ пуктыны печатлась машина сьӧры, нимысьтыз дыр тупатыны косӥ, со куспын «корт» визез котыр ласянь мед дышетом шуыса. Али но мон ӵапак сыӵе тютюпи. Кивалтыны гинэ медам быгаты, дэмланъёс но мед сётъялом.
- Кытысь кужым шедьтӥськоды? Воксё ӟызымиллямды ни.
- Министре пуксеме бере куать килограмме куштӥськем ик. Но мон та пумысен уг бӧрдӥськы. Ӟигар люкасько мугорез кыдатон залын. Татчы арняяз огпол ке но уж йылпумъяськем бере пырасько. Йырвизез кема ужатэм бере мугорез зуркатон туж юрттэ вылэм ганяк шокчыны. Азьвыл туж яратӥсько вал губияны. Толалтэ султӥсько куас вылэ. Книгаез кемалась киям ӧй кутылы ни. Берлозэ лыдӟи Михаил Веллерлэсь «Последний великий шанс» книгазэ. Эшшо огпол дась на сое чирдыны. Но со понна шутэтскыны потоно. Мон кык ар ӧй адӟылы ни отпускез.
- Баянэн но туж усто шудӥськоды шуыса, кылӥськиз. Оло, крезьгур но юрттэ бурдъяськыны?
- Ас вакытаз, зэмен ик, мон Ижысь кыказ крезьгуръя школае йыгаськи. Поннам малпай: огзэ ӧй кыткы ке, мукетаз пыро. Кыказ но шедиськем. Табере огысьтыз документъёсме басьтоно. Али ке но уг вунэтӥськы, макем мыным возьыт вал со вамышез лэсьтыны. Ма, кызьы куром, кызьы вералом, мукет азьын визь люкало шуыса? Школалэн ӧс азяз туж кема сылӥ кепыраса. Нялтас вераса, студент дыръям но баянлэсь ӧй люкиськы, ансамбльын шудӥ. Гитара борды кыстӥськи. Жаляса верано, баянэ ӧвӧл ни. Гитараез но киям кутылыны туж шер кылдэ.
- Кин выжые сыӵе востэм тӥ?
- Удмурт-а шуыса юамды потэ, вылды. Удмурт. Атае выжые мынӥськем, лэся. Котьма ке но асме туж востэм шуэме но уг луы. Мон ялан сюрисько вал тумошо учыръёсы. Толалтэосы ӧй дугдылы хоккеен шудэмысь. Пыдме но чигтэме вань. Озьы но котькинлэсь усто луэме потылӥз. Оло, соин но пичи дыръям асме лётчике дасясько вал. Жаляса верано, синъёсы ляб. Соин ик быръёно луи мукет удысэз. Туж яратӥсько вал пӧртэм буёло книгаосты но журналъёсты учкылыны. Ялан малпалляй: кызьы меда таос лэсьтэмын? Мылкыдъёсме анай-атае шӧдӥзы, лэся. Соос ик веразы: Россиын кык дышетсконни дася книга поттонэн вырисьёсты - Омскысь политехникая но Москваысь полиграфияя институтъёс. Нырысь огзэ горд дипломен йылпумъяй - луи инженер-технолог, бӧрысь мукетаз йыгаськи - отысь потӥ инженер-экономистлэн дипломеныз. Дышетски на Удмурт кун университетын менеджере.
- Куинь дипломды ни. Оло, ӝоген диссертация но гожтоды?
- Валтоно удысам олокыӵе но ужпумъёс вань. Зэмен ик, гужем шорозь малпасько ни кудзэ ке диссертациын сэрттыны-пертчыны. Мыным куинь диплом уг тырмы. Весь азинскеме потэ, нокин но кутчаны медаз быгаты шуыса.
- Пӧрмымтэ ужъёсты ӟигардэс зол-а быдто? Яке тӥляд ваньмыз вольыт пӧрме?
- Кузпалы воксё шулӟектэ, шуыны луоз, маке умойтэм луэ ке. Мон сыӵе ӧвӧл. Мыным весь удалтэ, уг шуиськы. Пӧрмымтэ ужъёс монэ вожомыто. Мытэм сюрес вылысь вормытозям уг палэнскиськы.
Источник:
За предоставление материала выражаем огромную благодарность редакции газеты "Удмурт дунне"
