Прокопьева Анна Николаевна

From Воршуд
Jump to navigationJump to search

Кырӟан зарезьысь марӟан[edit]

А.Н.Прокопьева

- Кӧня ке аръёс талэсь азьло «Италмасын» туж жингрес куараё кырӟасьсы вал. Кытчы меда ышиз со, малы ке али кылыны ик уг луы? - яратоно артистказэс сцена вылысь адӟымтэзылы паймемын куд-огез учкисьёс.

Зэмзэ но, Удмурт Республикаысь дано артисткалэсь Анна Прокопьевалэсь сцена вылысь телеэкранэ выжемзэ, оло, кин ке со адӟытэк но кылиз. Но тросэз али сое тодо «Марӟан» передачаез дасямезъя но нуэмезъя. Калык пӧлысь марӟан пырыосты огъя тугокое бичаса, Анна Николаевна со чеберлыкез выльысь аслыз ик калыклы берыктэ чагыр телеэкран пыр.

- Анна Николаевна, кызьы дӥсьтонды тырмиз улон сюрестэс шуак воштыны?

- Шуак ӧвӧл. Мон, школаын дышетскыкум ик, «Советской Удмуртия», «Дась лу!» газетъёсы гожъялляй. Дышетӥсе, бурд улаз возисе вал Герман Ходырев. Со мыным гожтэт гожъяз, книгаос лэзьялляз. Крезьгур пала шонтӥськыны кутски но, гожъяськемысь дугдӥ. Герман Алексеевич монэ ыштэм. Нош пумиськонмы соин туж паймымон луиз.

Ижевскысь Крезьгуръя училищеез йылпумъяме бере ужасько ни вал «Италмас» ансамбльын. 1978-тӥ арын милемлы сётӥзы квартира. Соберегес ик куинь толэзьлы гастрольёсы Дальний Востоке кошким. Бертӥськомы но, коркаямы кин ке выль улӥсь лыктэ, машинаысь котыр пыртало. Герман Ходырев вылэм. Улыны одӥг площадкае сюримы. Паймиз, кытчы, пе, тон пырид, малы ӧд гожъя ни, туж пӧрме вал ук.

Мон ведь кылбуръёс но гожъясько ас поннам, но ӧй возьматъя нокинлы. Озьы ик кыллё. Пӧрмымтэесь кадь пото аслым, соин ик нокинлы возьматыны уг дӥсьтӥськы.

- Сцена но журналистика - чылкак мукет удысъёс. Кызьы кырӟан лэзиз ас бордысьтыз?

- Каньыл ӧй вал, туж курадӟи. Сценалэн омырез, висёнэз али но бордысь уг кошкы. Командировкае потыкум но шуисько: гастрольёсы мынӥсько.

- «Италмас», «Айкай», телевидение - кудӥз улонады бадӟым инты басьтэ?

- Куректон-а, шумпотон-а вае, но улонысьтым котькуд нуналме дунъясько. Кызьы вунэтод «Италмас» ансамбльын ужаммес? Вань вамышъёсы, быдэ вуонэ, улонэз валанэ, адямиос азьын асме возьыны дышеме - ваньмыз соин герӟаськемын. Улонам туж троссэ сётӥз Анатолий Васильевич Мамонтов. Но бадӟым талантэн кивалтӥсьлэн но огшоры артистлэн адӟонъёссы пӧртэмесь, ваньзэ валаса уд быдтӥськы. «Италмаслэн» репертуарысьтыз вань сольной кырӟанъёс лэсьтэмын вал монэ вылэ. Егитъёс вуизы но, Евгений Серебренников но, мон но дышетӥсьёс радэ кылимы. Нош милям кырӟаммы потэ, вужере сюрыны кутскимы кадь йӧтӥз. Сое мертаса, валтӥсь артистъёс фольклоръя выль ансамбль кылдытыны басьтӥськизы. Кин луысал али мон, огшоры кырӟась радын кыльысал ке «Италмасэ»? Аслэсьтым кужымме мертано кариськи фольклор удысын. Уката ик, соку мон заочной амалэн дышетскисько вал Удмурт кун университетысь удмурт филологияя факультетын. Мыным туж тунсыко вал фольклоръя ансамбль кылдытон, сыӵе ансамбльёс асьмелэн ӧй вал угось. Озьы кырӟаме потыса кошки «Айкае». Но одӥг ужпум - малпан, мукет ужпум - сое улонэ пыӵатон.

Мон малпасько вал зэмос удмурт фольклорен вырыны. Мед луысалзы ансамбльын фольклорез тодӥсьёс, шуом, удмурт филологияя факультетэз быдтэмъёс ик, но кырӟаны быгатӥсьёс. Нош улонын мукет сямен луиз. Художественной кивалтӥсь Николай Широких ӟуч вал бере, солэн сюлэмыз ӟуч пала кыскиз. Собере Валентина Пудова вуиз, со но трос ӟуч кырӟанъёс кырӟаз. Но акашка шудонэз пуктӥм ик. Азьланяз фольклор бордын трос ужаны ӧз кылды. Телевидение кемалась ӧтё ни вал бере, озьы кошконо кариськи крезьгуро передачаос лэсьтонэ.

- Кык вылӥ образование горд дипломен басьтӥды ке но, мон тодэмъя, тӥ кырӟанэн но ӧд люкиське.

- Кырӟась шуыса тодо вал бере, ялан ӧтьылӥзы концертэн потаны. Но мон весь дышетски. Шуисько вал, уг ваньмиськы. Телевидение лыктыса но университетын дышетсконме азьланьтӥ. Куать ар дышетсконо луиз. Одӥг арзэ подготовительной курсъёсы ветлӥ. Школа бере трос аръёс ортчемын ни вал угось. Нош мон гороскопъя Овен - уг яратӥськы мар ке ласянь но келяны, малпанме одно быдэстыны турттӥсько. Та быдӟа арлыдэн дышетскыны пыри бере, ляб тодон-валан возьматыны возьыт. Дышетӥсьёс но шуо вал, Анна Николаевна, малы одно ик «вить» басьтыны турттӥськоды? Шуисько, «вить» понна уг тыршиськы, возьдаськисько, кыӵе ке юандылы ӧй ке тоды вераны.

Собере Радиоя но телевидениея институтын художественной но документальной программаосъя режиссёре дышетски. Группаямы кызь куать адями ке вал, ньыль-вить мурт гинэ художественной программая диплом дасямы. Пӧлысьтызы огнам «вить» басьтӥ. Москваысь профессор Игорь Константинович Беляев крезьгуро передачаосме котьку вылӥ дунъялляз. Али но ужъёсме солы возьматъясько. Котьку пайме крезьгуро улонысь чеберлыкез телевидение пыр возьматэммылы.

Дышетсконме али йылпумъяй ни. Кырӟаны мылкыды вань, луонлыке но вань на. Уг юиськы, тамак уг кыскиськы. Тазалыкме ути ке, куараё чузъяськоз на.

Улонын котькуд адямилэн аслаз интыез вань, мынам со басьтэмын ӧвӧл на. Наукалэн куронъёсызъя кызьы фольклорез кутӥсько, нокин мукетыз озьы уг выры. Тани юбилейлы сӥзем концертам выль кырӟанъёсын потай. Аранжировка каремын ке но, калык кырӟанлы матэ кельтэмын - сямыз, омырез. Крезьгураз но калык сямъёс-йылолъёс чакламын: сюан гур ке, мед чузъяськоз уксё тӥрлык, вӧсь гуре тылобурдо куара пыртэмын. Пӧртэм инструментъёслэн но чузъяськемзы кылӥське.

- Анна Николаевна,телепередачаез нуись я кырӟась медло тӥ, адӟиське, дӥськутлы но вылтустылы трос саклык висъяськоды. Кин ке юрттӥсьты вань яке асьтэлы оскиськоды?

- Москваысь телевидениын ужасьёслэн асьсэлэн имиджмейкеръёссы вань. Йырсизэс но сынаны юртто, дӥськут но быръё. Мынам та нуналозь нокинэ ӧй вал, али вырыны кутско кадь мынам имидже бордын. Йырсиме мон ачим тупатъясько вал. Кытчы ке кыре ке потӥсько, одӥг дӥськут дӥсясько, классикаез ке возьматӥсько, нош ик мукетсэ быръёно. Гуртысь нылкышноос доры нош малы мон ӟуч дӥсен потом, мынам вань аслам удмурт дӥсе. Карамас-Пельгаысь Зоя Мазитова дэра куиз но, «Айкайысь» кырӟась но художник Петр Данилов солэсь дэрем вуриз. Айшетэ но куэмын. Но одӥг та костюмен ум дугдэ, малпасько, эшшо кулэ луоз на.

- «Удмуртия» кун телерадиокомпаниын тӥ дас ар ужаськоды ни. «Марӟан» передачалы но туэ дас ар тырмиз. Трос-а лэсьтэмын, ӧжыт-а? Азьланезлы кыӵе малпанъёсын улӥськоды?

- «Марӟан» программа эфире потӥз ни 390-этӥзэ. Шаерысьтымы вань артистъёс, коллективъёс возьматэмын ни та передачаын. Мынэ со удмурт сямен, но куд-ог дыръя ӟуч кылын но дасясько. Удмурт фольклор сяна, мыным, кылсярысь, ӟуч фольклор но туж тунсыко. Палэнэ уг кельтӥськы классикаез но джазэз. Трос луо учкисьёслэсь куронъёс. Но котьку соосъя гинэ кариськыны уг луы. Удмурт учкись крезьгурлы дышетскемын ӧвӧл, соин ик сое ваньмыныз пичиен-пичиен тодматоно. Передачаын озьы ик трос тодмо но тодмотэм нимъёс усьтӥсько, тросэзъя дасямын ни нимаз телефильмъёс.

- Сомында передачаос дасяса, вань на-а мар сярысь но кин сярысь возьматыны?

- Одӥгез но передача ог-огезлы уг тупа. Одӥг артистэз ик пӧртэм сямен возьматыны луэ. Толон со сцена вылэ гинэ тубиз ай, нош туннэ быгатонлыкез трослы будӥз, кырӟанъёсыз но выльмизы. Собере, передача одӥг интыяз уг сылы, мар ке но выльдӥське. Мыным али туж кельше телевидениысь кивалтӥсьёслэн «Марӟан» передачаез сцена вылысен гожтыны луонлык сётэмзы. Адӟиськод учкисьлэсь синъёссэ, созэ яке тазэ артистэз кыӵе мылкыдын пумитамзэ. Озьы кылдэ улэп передача. Тани «Марӟанлы» дас ар тырмонлы сӥзем концерт кыстӥськиз куинь час. 20 минутэн куать передача возьматыны чакламын, учкисьёс адӟизы ни витетӥ люкетсэ. Азьланяз концертъёсын потаны чакласьком мукет городъёсы но.

- Анна Николаевна, нош учкисьёс тӥледлы вазисько-а, кинэ ке но возьматыны курыса, яке кинлы ке кыӵе ке юрттэт кулэ?

- Вазиськисьёс трос. Кудӥз быгатонлыксэ кылзыны куре. Юало, кырӟаммы, пе, потэ, кытчы со понна вазиськоно. Юрттыны куро. Егитъёс сярысь одӥгзэ вераме потэ. Малы ке но тросэз малпало, дышетскытэк но кырӟаны быгатозы шуыса. Удмуртъёслэн туж ик дышетскыны мылкыдзы ӧвӧл, уката но вылӥ образование басьтон ласянь. Нош мон верасал, кырӟаны ке но быгатӥд, тодон-валан туж кулэ. Бумагатэк али нокытчы уд кариськы. Кӧня асьмелэн усто кырӟасьёсмы, но одӥгез но вылӥе ӝутскыны уг быгаты. Бен, тодон-валан сяна, кулэ на коньдон. Но таиз ини мукет ужпум.

- Кытысь тӥледлы пыӵаз калык кырӟанъёсты яратон мылкыд?

- Мон буди калык кырӟанъёс вылын. Папае туж усто шудэ вал арганэн, но мон сое вӧтам кадь гинэ тодӥсько на. Нош мамаелэн куараез чебер. Но со туж востэм вал. Шулдыръяськонъёсын ассэ ноку ӧз возьматъя: кырӟаны но уг кутскы, уг но экты. Монэ кырӟато-эктыто вал. Нош кыӵе ке киуж борды басьтӥськыкуз, мамае кырӟа ни вал. Сомында кылэмын, адӟемын бере, пӧртэм кырӟанъёсты тодэ вал. Со сьӧры мон но кырӟаны кутскисько.

Нош удмурт кыл сярысь ке верано, мон солы дыши ни, Сарсак-Омгае бертыса. Вераськыны уг быгатӥськы вал бере, ас поннамгес шудӥ, весь мунёос котырын бергай, соосын вераськи. Со понна Андреймы куинь арескозь ӟуч кылэз ӧз тоды. Ми Коляен - гастрольёсын, нош пимы песянаеныз кыле. Собере асьмеос но соин пичи дыръяз удмурт кылын гинэ вераськылӥм. Адӟим угось, макем курадӟиз кузпалылэн апаезлэн пиез. Анай-атаез соин ӟуч сямен вераськизы, Агрызысь садикын - бигер кылын, нош Сарсак-Омгае бертэ но, удмурт луэ. Озьы, куинь кылэз сураса, кематэк ӧз вераськы.

Кык но ӝыны арескын Андреймес сьӧрамы Крыме гастрольёсы кутӥм. Одӥг ӟуч кылэз но уг тоды. Дикий ребёнок шуо вал сое: вераськыны туртто - уг пӧрмыто. Нош ӟуч кылэз дышетонэз ик ӧй вал, азбаре потэ но ас понназ дыше. Нокыӵе шуг-секытъёс ӧз кылдылэ, нылпиос но серем ӧз карылэ. Тросэз анай-атайёс шуо, нылпимес удмурт кыллы ум дышетэ, серем карозы, пе. Нош мон малпасько, ваньмыз со анай-атай бордысь потэ. Удмурт кылзэс соос гажало ке, сӥлы каро ке, со сям пыӵалоз нылпилы но. Пинал ассэ но, кылзэ но ултӥяны уз сёты. Милям Андрейлэн ноку ӝожтӥськемез ӧвӧл ултӥямзылы.

- Ӟуч но удмурт кылэз гинэ тодэм ӧвӧл, пиды шалтыр гинэ трос пӧртэм кылъёсын вераське.

- «Италмас» ансамблен ми картэным трос пол потамы кунгож сьӧрысь странаосы. Макем ваньмыз сярысь тодэм потэ вал, вераськем. Но уг луы, кылэз ум тодӥське. Чиньыосын вераськыны выриськод, кык кыл англи сямен, кӧня ке кыл немец сямен йылтӥськод на (мон немец кылэз школаын дышетӥ). Пимылы шуиськом вал, кылэз тодымтэен, ми курадӟим, нош тон эн аналскы, дышеты.

Англи кылэз Андрей школаысен ӟеч тодэ вал. Удмурт кун университетын дышетскыкуз, тодон-валанъёссэ азинтӥз. Дышетскиз со историяя факультетын. Этнограф луиз. Огдыре ик романо-германской филологияя факультетэз йылпумъяз, референт-переводчик луиз. Стажировкаез Америкаын ортчиз, Англие но ветлӥз. Туж умой тодэ венгер, финн кылъёсты. Трос пол вуылӥз ни Венгрие, Финляндиын но вал. Али но тани кык толэзьлы Эстоние, Венгрие, Финляндие фестивальёсы кошкемын. Ветлӥз Норвегие но. Кӧня ке кылэз тодӥськод ке, мукетсэ капчи ни дышетыны. Озьы норвегъёслэсь литературной кылзэс тодэ ни.

- Дипломат луон мылкыдыз ӧй вал-а?

- Сыӵе ӵектон вал. Но Андрей шуиз, монъя, пе, со ӧвӧл. Дышетэ Удмурт кун университетын, студентъёсты тодматэ этнографилэн пӧртэм палъёсыныз, дышетэ англи, венгер, финн кылъёслы. Этнограф бере, тунсыкъяське калык эктонъёсын, кивалтэ «Эктон корка» огазеяськонэн.

- Капчи-а артистъёслэн семьязылы та улонын возиськыны?

- Сцена мед сюдоз шуыса, туж зол берганы кулэ, уката ик али. Азьло аръёсын ӵошатоно ке, ваньмыз коньдонэн мертаське. Кузпалы «Айкайысь» кошкиз, али нимаз фирмаын ужа. Но сад-бакчае озьы ик пыдын ветлӥськом.


Источник:

Прокопьева А. Н. Кырӟан зарезьысь марӟан / А. Н. Прокопьева ; записала Лия Малых. - 2001. - 13 июля. - С. 6, 11. - (Удмурт кизилиос).


За предоставление материала выражаем огромную благодарность редакции газеты "Удмурт дунне"