Поткина Алевтина Ивановна

Ма сётэ тыныд со кырӟанэд?..

Алевтина Ивановна Поткина элькунамы тросэзлы тодмо. Гуртын тыршисьёслы – аслаз ужезъя, со – Удмурт Республикаысь «Удмуртмелиоводхоз» управленилэн директорезлэн воштӥсез; городын улӥсьёслы – «Инвожо» ансамбльын кырӟась но староста луэменыз. Тусызъя но, сямызъя но, ассэ воземезъя но со калык пӧлын висъяське.

Будон сюрес – бусыез выжон гинэ ӧвӧл. Со трос нюко-гопо-гурезё интыосты вормыса потон. Сизьым сузэр-вынъёс пӧлысь бадӟымезлы котькугес ик пичиоссэ утьыны кылдэ. Аля но анаезлы Серафима Павловналы юрттоно луылӥз, песянай-песятаезлэн бакча котыразы но ужано луылӥз. Туж яратӥз будосъёс котырын вырыны. Чырткем нылашлы со секыт ӧз усьы.

Аля кин луон сярысь бырйиськыса кема ӧз улы. Пичиысен ик туж яратӥз бере музъемез, будосъёсты, малпаськиз агроном луон сярысь. Сарапулысь совхоз-техникумез йылпумъяз.

Практикае лэзьязы Дэбес ёросысь Калинин нимо колхозэ. Отын соку председательзы зол вал – А. И. Рубцов. Нылашлы Удмурт Лем гурт туж яраз: калыксы лякыт, вераськись. Татчы ик ужаны лыктон сярысь малпаськиз. Малпамъя гинэ улыны уг луы уга. Ижысь сельхозинститутэ ужаса дышетскон вылысь пыремез бере, дораз бертылытэк, Дэбесэ ширтӥз вал но, сое Тыловае лэзизы.

Быземез бере Алевтина городын улон сярысь ӧз ик малпаськылы вал. Но Тыловайысь кошконо луиз, ужаны «Удмуртмелиоводстрой» трестэ интыяськиз. Бӧрысь сое «Удмуртмелиорация» огазеяськон каризы. Нырысь-валысь производственной отделлэн инженерез луыса ужаз. Татын усьтӥськиз Алевтина Ивановналэн вань быгатонлыкез, ӟырдытэз, чиданэз. Ужан сяменыз сельхозинститутын но дышетскиз, пиналзэ но будэтӥз, огазеяськонын комсомол организацилэн секретарез но вал, Октябрь ёросысь но Ижевск городысь комсомоллэн ревизионной комиссиосынызы но кивалтӥз, спортэн но выриз. Ыбылӥськонъя, куасэн бызьылонъя, граната лэзьянъя ӵошатсконъёсын нырысетӥ интыосты басьяз. Ужаз бадӟым азинсконъёсыз но общественной улонэ мылысь-кыдысь пыриськемез понна Быдӟым тыложлы 30 ар тырмон азьын сое Вормон Знамя дорын фото вылэ пуктӥзы.

Кӧня ке дыр ортчыса, Алевтинаез Министръёслэн Советазы уже ӧтизы, гурт ужъя отделэ валтӥсь референтэ пуктӥзы. 1986-тӥ арын Алевтина Ивановналы мелиорацияя но ву хозяйствоя министрлэн воштӥсезлэсь ужзэ оскизы. Но татын со кема ик ужаса ӧз ни вутты – воштӥськонъёс кутскизы. Министерствоез быдтӥзы, троссэ ужасьёсты палэнтӥзы. Мелиорациен герӟаськем ужъёсты утён понна, «Удмуртмелиоводхоз» управление кылдытӥзы. Алевтина Ивановнаез отчы директорлэн воштӥсез луыса басьтӥзы.

Азьло но, али но ужез агрономиен герӟаськемын. Муосты удалтытӥсь карон, бакча сиён будэтӥсьёслы ву киськанэн юрттонэз эскерон но утён. Котькуд ёросысь сыӵе ужпумъёс Алевтина Ивановналы тодмо. Котькудӥзъя вань нимысьтыз картаез, папкаез. Арлы быдэ ветлэ, эскере, гурт ужасьёслы ӵектонъёс сётэ. Трос сюлмаськон вае куасьтэм муосты утён. Торфен узыр дасям мерттӥськон муосты лушкало. Машинаен-машинаен нулло но вузало. Эскероно луэ тыметъёсты, шлюзъёсты, каналъёсты. Ой, кыӵе мӧзмыт но валантэм уж, малпалод. Но Алевтина Ивановна ужзэ яратэ. Соин ик быдэс улонзэ отын тырше ини.

Ужез сяна, Алевтина Ивановналэн вань на эшшо одӥг сюлэм яратонэз – кырӟан! Со кырӟанэн ик вордӥськиз но кадь. Школаын кырӟаз, техникумын кырӟаз. Гуртаз каникулэ бертылыкуз, фермае скал кыскисьёс доры мынэ но шуэ: «Ойдолэ концерт пуктоме!» Соосыз дась. Быземез бере Толяезлы вордскем нуналаз арган кузьмаз. Гуртазы адскыны берто ке, анаеныз вераськыса но уг вутто – быдэс гурт калык соос дорын ини. Арган шудэмъя кырӟало. Городэ кошкыкузы но, сюанэз сямен келяло.

Ижын Алевтина Ивановналы огвакытэ мӧзмыт луиз. Сюлмын – кырӟан, нош кытын сое кисьтод. Ӧрзэ шедьтӥз ведь. Газетысь ялон адӟиз: Ижысь редуктор заводлэн культура юртаз удмурт ансамбль, пе, кылдэ. Отчы кырӟасьёсты ӧтё. Картэныз ӵош мынӥзы.

Отын соку кырӟась-верась калыкен ужаны кутскиз «Тюрагай» ансамбле ветлэм мурт Николай Возисов. Ансамбльзылы туж чебер ним но шедьтӥзы: «Инвожо». Туэ солы 17 ар тырме ни. «Инвожолэн» нырысетӥ концертъёсыз ик учкисьёслэн син шоразы усизы. Мукетъёсызлэсь со висъяськиз кырӟан-веран манереныз но, дӥсеныз но, кырӟанъёсыныз но.

«Инвожо» ансамбльлэн ӝутскон сюресэз вольыт ӧй вал. Редуктор заводлэсь культура юртсэ приватизировать карозы шуыса, соослы кошкыны дэмлазы. «Ижмаш» культура юртысь удмурт калык театре А. А. Митрофанов доры мынӥзы, отысен – крезьгуръя школае. Сое Устинов ёросэ выжтэмзы бере, «Инвожолы» «Восточной» клубе интыяськыны дэмлазы. Транспортэн отчы ветлыны шуггес ке но вал, мыло-кыдоос кырӟанзылэсь ӧз куштӥське. Али но ветло.

Ансамбль кылдэм дырысен солэн шорсюлмыз луэ арганчи но крезьчи, Удмурт Республикаысь культура удысысь дано ужась Михаил Журавлев. Татын троссэ солэсь кырӟанъёссэ кырӟало.

Николай Романович Возисов ӧвӧл ни. Кивалтӥсьёс вошъяськылӥзы, нош старостазы ялан одӥг – Алевтина Ивановна Поткина. Со татын анай выллем. Калыкез люкась но, валтӥсь но, котькудӥз сярысь сюлмаськись но, янгыш лэсьтыкузы, даллашись-визьмась но, ваньзэс яратӥсь но, лӥятӥсь но. Алевтина Ивановналэн ӟеченыз али «Инвожоысь» артистъёс одӥг омырен ӵош шокаса уло, удмурт культураез азинтонын но азьпалан мыно. Со понна ик Алевтина Ивановналы сётэмын Удмурт Республикаысь Кун Кенешлэн но Культурая министерстволэн Данъян грамотаоссы, нош ужаз басьтэм азинсконъёсыз пусъемын Удмурт Республикаысь Гурт удысъя но сиён-юонъя министерстволэн, мэрилэн Данъян грамотаосыныз.

Уж ужасез шедьтэ, шуо. Алевтина Ивановна уно дырзэ но кужымзэ сётэ на «Удмурт кенешлы». Со «Удмурт кенешлэн» Октябрь ёзэзлэн тӧроезлэн воштӥсез луэ, озьы ик – Ижысь Шаркан бӧляклэн тӧроез. Котькуд ужзэ пичиысен ик сэрыт но ӟеч лэсьтыны быгатэменыз, вуэ на нылпиосызлэн нунокъёсынызы но вырыны, бакчаяз но ужаны, туж чебер, яркыт сяськаос будэтыны.

Мон туж шумпотӥсько Алевтина Ивановна Поткиналы Куӟебай Герд нимо национальной премия сётэмлы. Таӵе адямиослы луыса, асьмелэн азьланезлы осконмы уг кысы.

Источник:

Гаврилова-Решитько, М. В. Ма сётэ тыныд со кырӟанэд? : [о зам. директора упр. "Удмуртмелиоводхоз", старосте ансамбля "Инвожо", лауреате нац. премии им. К. Герда А. И. Поткиной] / Гаврилова-Решитько М. В. // Удмурт дунне. - 2003. - 10 окт. - (Удмурт кизилиос)

За предоставление материала выражаем огромную благодарность редакции газеты "Удмурт дунне"