Пономарёв Карл Александрович

From Воршуд
Jump to navigationJump to search

Вуберган[edit]

К. А. Пономарёв

Вордӥськемез берегес ик покчи Пономарёвез вӧлдэт улэ полате кӧлтыса кельтӥлям. Вож нуны, кутэтысь потыса, выж вылэ усем. Нокытӥыз шуккиськымтэ, йырыз гинэ йылсо кылем.

- Адӟонды тӥляд сыӵе, – шуи мон Карл Александрович Пономарёвлы, - «небыт» усён но выльысь ӝутскон.

- Ӧвӧл, - вазиз история наукаосъя доктор, профессор, Дуннеысь информатикая но Россиысь генинженерной академиослэн ёзмуртсы, Удмуртиысь наука удысысь дано ужась, Россиысь вылӥ школаысь дано ужась, - инмаръёс кыл куто уськытон понна гинэ, нош ӝутскон адями кужымлэсь но тыршемлэсь потэ».

- Тӥ ёзъёс Николай, Василий ним нулло, нош тӥ – Карл. Йӧспӧртэм…

- Мынам песятае узыр вузчи вылэм. Революция бере сое кулаке потӥллям но Сибире келяллям. Нош атае Александр Яковлевич солы ӧчкарыса-а, дуннелэсь кудпала бергамзэ шӧдыса-а, Глазовысь учительской семинариын дышетскыкуз, революционеръёсын герӟаськем. Совето властез туж гажаз, со азьын атаез понна янгышсэ шӧдылӥз, мон шуысал.

Сыӵе адямилэн семьяяз 1931-тӥ арын нясь-нясь шуныт апрель толэзе Тукбулат гуртын вордӥськи мон. Атае соку татысь школалэн завучез вал. Мае революционной праздникъёс трос шуыса, мыным Май ним сётэм но сельсоветын озьы ик гожтытэм, анаеным Феврония Степановнаен кенешытэк. Тае тодыса, эшез тышкаськем: пиедлэсь нимзэ революциен одно ик герӟамед потэ ке, Карл шу – 5-тӥ мае Карл Маркс вордскемын…

Атае сельсоветэ бызьыса мынэм но, нокинэ алытэк, витьытэк, книгае ас киыныз «Карл» тупатэм, «Маез» ӵушыса. Озьы ачимъяськемез понна уждунэзлэсь тросгес штраф тырем – 25 манет.

- Адямилэн сямыз пичи дырысеныз ик шӧдӥське, шуо. Тӥ либыт, кылзӥськись пияш вал, дыр?

- У-у, шаян вылӥськем. Огпол, дорысь пегӟыса (соку атайме Богатырка гуртэ дышетыны ыстӥллям вылэм ини) Чупчи шур кузя пыжен кошкиськем, умме усиськем. Ярам, пудо возьмасьёс синйылтӥллям тулкымъёс вылын веттаськись пыжез. Мукетъят анае магазинысен ыштэм. Вань калыкен утчаса-утчаса тэкитэн вышкыысь шедьтӥллям. Кызьы ӧвӧл ӝокаськем!

Пичи дырме тодам ваисько ке, син азям пуксе дунне вылысь ваньзэ тодӥсь, зэмос интеллигент выросъёсын атае. Со монэ мусояса Каля шуылӥз, кӧлыны выдыкум, выжыкыл мадьылӥз. Соин сэрен тыш но сиеме вань. Одӥг ӝытэ атаелэн мылкыдыз секыт, нош мон ёртӥсько: мачкы но мачкы выжыкыл. Атае лякытэн валэктӥз, туннэ огнад кӧлыны выдод шуыса. Мон ӧй вала. Небыт интыям еэн шлач! вуиз. Та учыре сяна, атаелэн кизэ бордам йӧттэмез ӧй вал.

Война кутскем бере, 1942-тӥ арын тулыс, атае ачиз мылкыд каремъя фронтэ кошкиз. Нош сӥзьыл бырыны шедиз. Озьы мон, Еня сузэре, Женя выны атайтэк кылим. Улӥмы верантэм секыт, эшшо ке выны колодчае усьыса быриз. Кайгузэ небӟытон понна, анае милемыз Глазове ваиз. Сизьыметӥ классэз йылпумъяса, уже интыясько, шуисько вал. Анае ӧз лэзьы: атаед дышетӥсь вал, солэн пытьыетӥз мынод, шуиз. Солэсь кылзӥськыса, 1946-тӥ арын Глазовысь дышетӥсьёсты дасясь училищее пыри. Анае училищелэн общежитияз комендантэ куриськиз, милем улыны комната сётӥзы.

Со вакытэ ик Ярысь Иван Васильев – анаелэн тодмоез – Флор пизэ педучилищее дышетыны пыртӥз. Общежитиын комнатаос тырмымтэен, анае сое дорамы улыны ӧтиз. Озьы ми Флор Васильевен, бӧрысь тодмо удмурт кылбурчиен, одӥг валес вылын кӧламы, одӥг сиён сиимы.

- Со аръёсы педучилищеез йылпумъямъёсты школаын ужаны косылӥзы…

- Монэ но школае ыстӥзы. Нош мынам дышетскон мылкыды пуромиз, атае кадь тодӥсь но быгатӥсь луэме потӥз. Дӥсьтыса но дӥсьтытэк гожтэт ыстӥ калыкез дышетонъя наркомлы Е. Никифоровалы, Ижевскысь пединститутэ пырыны куриськыса. Солэсь «дышетскыны лэзёно» шуыса валэктон вуиз.

Ачим математикаез туж яратӥсько, нош педучилищеын тригонометрилы ӧз дышетэ, англи кыллы сямен ик. Кылиз одӥг сюрес – пединститутлэн историяя факультетэз. Отын дышетскыкум, комсомольской, профсоюзной уже сэзь пыриськи, коммунист луи.

- Дышетскон, комсомол… Егит, йӧно воргорон котыртӥ чебер нылъёс ӧз бергалэ шат?

- Кисьмам емышез веръятэк кельтыны – сьӧлык. Дышетскон капчиен сётӥськиз бере, институтын данэ бадӟым вал. Мукет факультетъёсысь гинэ но нылъёс уллёен ветлӥзы, тодматскыны шуыса. Егит дыръя нырысь ик мае синйылтоно: нылашлэсь мугорзэ, пыдъёссэ… Сыӵе шузи-мази вакытэ кышнояськытэк кыльыны визь тырмиз ик…

Кузпал шедьтӥ пединститутэз йылпумъяме бере, Балезино ёросысь Ново-Волково гуртын дышетыкум. Монэ но эшшо куинь выпускникез татысь школае ыстӥзы. Пӧламы Галина нимо нылаш вал, физикалы но математикалы дышетӥз. Тӥни кызьы луэ улонын: институтын дышетскыкумы, огпол но ӧм пумиське, нош кыдёкысь гуртын ог-огмес яратӥм (Галина понна Ново-Волково дунне пыдэсы интыяськемын кадь потӥз, дыр, угось со Ижевскын вордскемын но будэмын). Пиналъёсмылэн нылпиоссы будо ини, нош ми весяк ӵош. Сямызъя бырйиськем, шӧдске.

- Шуо, вакчи дыр ӵоже йыр поромымон карьера лэсьтӥды…

- Ново-Волково школаын ар ужай но… Мон удмурт, коммунист, образование вылӥ. Балезино ёросысь комсомоллэн райкомаз кыкетӥ секретаре бырйизы. Арзэ отын ужай. Удмурт, коммунист, комсомоллэн райкомезлэн секретарез – басьто Ижевске комсомоллэн обкомаз.

Со вакытэ «Комсомолец Удмуртии» газет потӥз удмурт но ӟуч кылъёсын. Валтӥсь редакторлы удмурт кылын потӥсь газетъя воштӥсе монэ ыстӥзы. Ар ужаса вуи-а, ӧй-а но, партилэн обкомаз лектор, пе, кулэ. Кинэ быръёно? Удмуртэз, коммунистэз, кивалтонын йӧндырись муртэз – Карл Пономарёвез. Озьы 1958-тӥ арын КПСС-лэн обкомаз вуи. Ньыль ар ӵоже быгатон, тодон-валан люкай но КПСС-лэн ЦК-езлэн Общественной наукаосъя академиезлэн аспирантураяз пырыны малпай.

Соку партиен Никита Хрущёв кивалтӥз. Со косэмъя, промышленной но гурт ёросъёс кылдытэмын вал. Кылсярысь, Можга ёросэ соку пыризы Ува, Вавож, Сюмси, Селта… Сюресъёс ӧвӧлэн, вавожъёс Можгае ӝыны Удмуртиез котыръяса мыно вал – Ижевск пыр. Таӵе гызмылес радлыкез чупыресгес ужатон пумысен диссертация гожтыны дэмлазы Общественной наукаосъя академиезлэн. Кык ар ӵоже материалъёс люкай, СССР-ез котыръяй. Нош 1964-тӥ арын Хрущёвез кушто! Странаен кивалтон амалъёс воштӥсько. Диссертацие буш кылиз. Ӟигары быриз, валес вылысь султэме уг лу! Кык-куинь толэзь огныраса сямен ветлӥ. Со дыр ӵоже валамон луиз, кытысь но кыӵе «тӧлъёс пельто», академиысь преподавательёс пӧлын но индылӥсьёс шедизы – чылкак выль диссертация куинь толэзьскын гожтӥ. Озьы история наукаосъя кандидат луи.

- История наукаосъя кандидатлы Москваын шуныт инты дасямын ӧй вал шат?

- Соку визьмын дорам бертоно кожай. Эшшо ке обкомын ӧс куспысен ик задание сётӥзы Глазовысь пединститутын кылдэм югдурез эскерыны. КГБ шараям крезьгуръя факультетысь нылъёслэсь нылпи куштыны ветлэмзэс. Мугзэ но тодэм: студенткаос но воргоронъёс-преподавательёс мултэс эшъясько, пе. Мон обкомлы ивортӥ, пединститутлэн ректорез янгыш ӧвӧл шуыса. Сое интыяз кельтӥзы, крезьгуръя факультетысь егит дышетӥсьёсты уллязы, нош монэ институтысь партийной организацилы секретаре бырйизы. Кема ик ӧй ужа, УАССР-ысь просвещениея министре ӧтизы. Татын ужакум, доктор диссертацилы материал люканы кутски. Ӝоген партилэн Удмуртиысь обкомезлэн идиеологияя секретарез луи.

- О, партилэн Олимпез!

- Жаляса верано (яке шумпотыса-а?), обкомлэн нырысетӥ секретареныз Валерий Марисовен ӧм тупалэ. Со яратӥз лебезьыса вераськемез, пыриськемез, вань ужпумъёсъя соин кенешемез. Нош мон ас кужымме шӧдӥ, ас визьмыным улӥ. Визьмо кивалтӥсь мукет визьмо муртэ вӧзаз уз возь, шуо. Ужъя споръяськонъёс шара вожвылъяськонэ выжылӥзы. Куинь ар чидай. Нош огпол янгышай…

…Гожтӥ заявление, обкомлэн секретарезлэн ужезлэсь ас мылкыд каремея куштӥськисько шуыса. Тушмонъёсы лӧптӥзы. Чебер кылын кӧясьёс-вӧясьёс, азям ӧс усьясьёс йырзэс ӝутӥзы, вылам дэри киськазы.

Супыльтонъёс, ултӥянъёс…

Кошки сельхозинститутэ дышетыны – шыпыт, югыт, шуныт. Со гинэ ӧвӧл – ӟеч ужаме понна Данъян грамота сётӥзы. Солэсь дуно наградае ӧвӧл мынам!

Собере, партилэн обкомез пумитъяськиз ке но, Удмурт кун университетлэн ректоратэз ӧтемъя, выжи университетэ общественной наукаосъя кафедраен кивалтыны. 1985-тӥ арын ути доктор диссертациме. Солэн пуштросэз Урал но Волга котырысь улосъёсын калыкез дышетонэн герӟаськемын вал. Берло аръёсы ужасько дышетӥсьёслэсь тодон-валанзэс будэтонъя институтын.

Дышетонлы сӥзьыса, кык сюлэсь трос научной уж гожтӥ, соос пӧлын 8 монография. Кылсярысь, «Финно-угорский мир, потребность объединения и проблемы развития» (1994-тӥ ар), кивалтэме улсын потӥз «Из истории народного образования Удмуртии (1996-тӥ ар), берлоез бадӟым уже – «Образование в России и Удмуртии на рубеже ХХ и ХХI веков: итоги, проблемы, перспективы (национально-региональный аспект)» (2001-тӥ ар).

- Котькудӥз книга – дунне вылэ пырыштыктэ, пытьыдэ кельтон, пиналэз будэтон кадь. Но вань на тӥляд мукетыз данъяськымон нылпиды – со…

- Удмурт культурая но «Удмурт кенеш» огазеяськонъёс. Мон соосты люкыны уг быгатӥськы, угось выжызы соослэн одӥг. Тэтэ карон вакытазы – 80-тӥ аръёслэн пумаз, куке странаын национальной политика пичи калыкъёс пала берытскыны кутскиз, - соослэн нимзы «Удмурт клуб» вал. Сое кылдытӥсьёс Н. Симонов но Л. Крестьянинова вазиськизы юрттэт курыса, нырысетӥ удмурт огазеяськонлы документъёс дасяно, пе. Соглаш луи. Пумен клублэн ужаз кыстӥськи.

Соку Удмуртиын пӧсь нюръяськон пуромиз удмурт кылэз кун кылъёс пӧлы пыртон пумысен. Сарапулысь кивалтӥсьёс вылӥ трибунаысен черекъязы, удмурт кыл кун кыл луиз ке, Сарапул Удмуртиысь потоз шуыса. Озьы ик удмурт калыклэсь но ӝутскыны шӧтамзэ одӥгъёсыз шумпотыса пумитазы, мукетъёсыз – ортчыт каргаськыса.

Та выллем югдур Советской Союзлэн мукет республикаосаз но кылдӥз. Воштӥськонъёслы дунъет сётон но дышетонэз улонлы матэгес карон понна, СССР-ысь Калыкез дышетонъя министерство доклад дасяны басьтӥськиз. Монэ эксперт луыны куриз. Материал утчаса, бадӟым страналэн пӧртэм сэрегъёсаз вуылӥ, дышетонэз сяна, пичи калыкъёслэсь кызьы улэмзэс, азинскемзэс чаклай. Озьы сюрес вылын, шонергес вераса, Дагестанын «Удмурт клублэн» уставез вордӥськиз.

Ӝоген Н. Симоновез удмурт огазеяськонэн кивалтонлэсь палэнтӥзы – «Удмуртская правда» газетлы верамзэ журналист ӧжыт мыдланьтыса сётэм но, интервьюлэн валтӥсь малпанэз «Удмуртия – удмуртъёслы» луэм.

Удмурт культурая обществолэн кенешаз монэ та огазеяськонлы тӧрое бырйизы. «Удмурт кенешен» ӵош ортчытэмын удмуртъёслэн нырысетӥ съездзы, Россиысь финн-угор калыкъёслэн ӧтчамзы но Дуннеысь финн-угор калыкъёслэн кенешсы. Ваньмыз со визе, кужыме, виры пыр поттэмын. Нош татӥяз жади, оло, акыльтӥ но. Огазеяськонэн кивалтонлэсь палэнски. Табере югдур но воштӥськиз ини – удмурт огазеяськонъёсты тодо, дунъяло, кун соослы коньдон висъя. Ужаны выль адямиос лыктӥзы. Документъёс лэсьтыны юрттэт курыса, мыным куд-ог дыръя вазисько ик…

Нылпи будӥз, вордӥськем юртысьтыз лобӟиз.

Источник:

Пономарев К. А. Вуберган / К. А. Пономарев ; записала Ольга Вахитова // Удмурт дунне. - 2002. - 26 апр. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"