Осетров Владимир Григорьевич
Станок сьӧрын… тодосчи[править]
Владимир Григорьевич Осетров — Удмурт Республикаысь наука удысысь дано ужась, техника наукаосъя доктор, Ижысь техникая университетысь машина поттонэз роботъёсын радъянъя кафедралэн профессорез, Россия Федерациысь вылӥ школалэн дано ужасез. Пусъемын «СССР-лэн изобретателез» гадьпусэн, озьы ик ВДНХ-лэн дипломъёсыныз но грамотаосыныз. 5 монографиослэн, озьы ик наукая уно ужъёслэн авторзы. Владимир Григорьевичлэн усьтонъёсыз паськыт кутӥсько машина поттонын, соос вылын дышетско студентъёс. Кемалась ик ӧвӧл тодосчи пусйиз 75 арес тырмонзэ. Солы сӥзьыса, Ижысь техникая университетын радъямын вал бадӟым адӟытон.
- Кыӵе музъем будэтӥз таӵе визьпогез?
— Вордӥськи мон Удмурт шаерлэн уйпалаз — Яр ёросысь Пудем черкогуртын. Но со гуртын улэмме воксё уг тодӥськы ни. Угось мыным кык арес тырмыса, семьямы выжем Иже. Атае дышетскем адями вал. Вавож ёросысь Какмож-Итчи гуртын вордскем маке йылпумъяны быгатэм гурт хозяйствоя техникумез. Со вакытлы та бадӟым вормонэн лыдъяськиз. Гуртын вордскемъёслэн угось тодон-валанзэс будэтыны луонлыкъёссы пичиесь вал. Школаын кӧня ке классэз йылпумъяны быгатӥд ке — ярам ни ойдо. Ужаны атайме ыстӥллям Яр ёросысь Пудеме. Гурт удысэз сяна, солы оскиллям партия ужез но — инструктор луыса тыршем партилэн ёрос комитетаз. Отысен ик сое синйылтӥллям но Иже ужаны ӧтиллям. Ӝоген оскиллям шаерысьтымы гурт хозяйствоя министрлэсь удыссэ: 1940-тӥ арозь валтӥз сое. Бӧрысь курон пуктӥллям: министр луыны быгатэ гурт удысъя вылӥ тодон-валан басьтэм мурт гинэ.
Озьы атае пуконзэ кельтоно луиз. Тодон-валан люканзэ азьланьтыны луонлыкез ӧй вал ни: семьяез кылдӥз, куинь пиез вордскиз. Вылаз ик, ӵапак со вие кутскиз Быдӟым ож. Атае, рос-прос но кышкасьтэм воргорон, ож сярысь тодэмез бере мукет нуналаз ик ужаны военкоматэ потӥз: адямиосты фронтэ келялляз. Кӧня ке дыр ортчыса, сое дышетскыны ыстӥзы Москвае — офицеръёсты дасянъя курсъёсы. Отын кыдаса, со фронтэ мынӥз ини, Москваез тушмонлэсь утиз. Ожысь улэпкын бертӥз. Ужаз Сьӧлта черкогуртын партилэн ёрос комитетаз инструктор луыса. Озьы ми быдэс семьяенымы Сьӧлта палъёсы вуимы. Анаелы соку туж умой тупаз ини: картсэ ыстӥзы вордскем ёросаз — Сьӧлтае. Со отысь Копки гуртын вордскемын, котыр калыкез тодэ. Анае но дышетскем адями вал. Йылпумъяз Ижысь финансовой техникумез. Быдэс улонзэ тыршиз Сьӧлталась выт бичанъя инспекциын. Со выжыезъя ӟуч вал. Атае — удмурт.
- Тӥ техника удысысь тодосчи, быдэс улондэс сӥзиды машина поттонэз эшшо но ӟечгес радъянлы. Кытысь сыӵе мылкыд? Кинлэсь пыӵаз?
— Техника борды кыстӥськонме валаны но шӧдыны кутски 3-тӥ классысен. Али кадь ик син азям пуктӥсько еврей выжыысь Вадим Гляйзер эшме. Мар но ум дауртӥське, мар но ум кылдытӥське вал ми! Тодам вайисько ас киынымы лэсьтэм нырысетӥ арберимес — фонарик вал со. Куинетӥ классын дышетскыкумы, пӧрмытӥмы ми сое. Бӧрысьгес, бадӟым классъёсы вуыса, урмыса кадь ветлӥ кружокъёсы. Сюлэмылы тужгес но тупаз авиатехника. Школаямы кытысь ке вуттӥллям вуж самолётлэсь двигательзэ. Со борды мерскимы ук — кӧня нунал ӵоже меда сое эскерыны-чакланы выримы! Кыӵе ёзэз маин герӟаськемын, малы соос кулэ но мукет та выллем юанъёслы валэктонъёс асьмеос шедьтӥмы ведь, нокыӵе визьмо книгаосын бугыръяськытэк. Бӧрысь туж капчиен сэрттӥськомы но бичаськомы вал самолётлэсь но, тракторлэсь но двигательёссэс. Озьы ик техника борды кыстӥськонэ юнмаз. Пичи дыры сярысь ке верано, син азям пуксе на вож тэль. Анаелэн атаез лесничий вал. Кӧня писпу мерттӥз со. Мон но сьӧраз куриськылӥ, писпуослэсь ненег модосъёссэс сюе согыны юрттэмъяськылӥ. Со палъёсы вуылыкум, тэлез адӟыкум, амалтэк син азям пуксе песятае, пинал дыры…
Сьӧлта черкогуртысь шор ёзо школаез йылпумъяса — 16 арескам — анай-атаелэн бурд улысьтызы потӥ: Иже ширтӥ. Кытчы кариськоно? Йыгаськи Ижысь механикая заводэ. Озьы-тазьы, шуисько, техникаез валасько, ужаны быгатӥсько… Юнматӥзы монэ токарь вӧзы дышетскисе. Вакчи дыр ӵоже та удыслы дыши. Ӝоген токарь луыса нимаз ужай ни. Заводын станок сьӧрын быдэс нунал ужаса но, егит дыръя жадёнэз валано ӧвӧл вылэм: ваньмон дыръям ӝытазеосы аэроклубе ветлӥ на. Ма, самолётъёслэсь-вертолётъёслэсь пушсэс пичи дырысен ик тодӥсько вал, табере, малпасько, соосын лобаны, парашютэн тэтчаны дышетсконо. Тӥни ӵап соку йырам малпан чилектӥз: оло, лётчик луоно! Кема малпаськытэк, документъёсме одӥгаз лётной училищее сётӥ. Экзаменъёсты ӟеч сётӥ, но тазалыке ласянь ӧй ортчы. Валэктӥзы: давлениды, пе, бадӟымгес, таӵе учырын инме ӝутскылыны уг яра. Шуизы: пехоталы, пе, тупалод. Отысен ик монэ армие басьтӥзы. 2 ар службаме нуи. Гуртысь пияшъёс кышкасьтэмесь ук, шуг-секытъёсты чиданы дышемын. Мон но озьы ик: службаелэсь ортчемзэ ӧй ик вала. Сержантозь будӥ. Армиын басьтэм быгатонлыкъёсы азьлань улонам но юрттӥзы…
* * *
- Ку пушкады вырӟиз наукае кыстӥськон мылкыд?
— Армиысь бертыса, малпаськыны кутски: ужан вискын кытын ке тодон-валан но люкано. Озьы мон 1959-тӥ арын вамыштӥ Ижысь техникая университетэ (соку механикая институт). Экзаменъёсты капчиен сётӥ. Ӵапак соку вузъёсын нырысетӥ курсъёсын дышетскисьёслы луонлык сётӥзы дышетскон куспын ужаны, коньдон поттыны. Озьы милям быдэс группамы нуназезэ заводъёсын ужаз, ӝытазеосы тодон-валан люказ.
Техника удысын дышетскисьёслы, мон малпамъя, таӵе амал туж пайдаё. Туала студентъёслы но мон весь шуисько: дышетскон вискады луонлык шедьтӥды ке заводын ужаны — вамыштэ отчы. Теориен артэ — тужгес но техника ласянь — практика вамыштэ ке, тодон-валан люкамлэн пайдаез азьланяз но зол шӧдӥське. Ачим сярысь ке верано: кӧня асме тодӥсько — мон ялан дышетски но, со вие ик ужай но… Дышетскон вискам ужаны интыяськи дышем интыям — Ижысь механикая заводысь станок сьӧры. Озьы вить ар ӵоже дышетскытозям, ялан заводын бергай. Ӵектӥзы дышетсконме аспирантураын азинтыны. Со ик выжыяськеме луиз Ижысь техникая университетэ. Басьтӥськи студентъёслы лекциос лыдӟон борды. Со вакытэ ик тодон-валан люкай аспирантураын. 1974-тӥ арын кандидат диссертациме ути — бурд улаз басьтӥз монэ Россиысь сборочной производствоя тужгес но устоез тодосчи — институтысьтымы Борис Фёдорович Борисов. Соин ӵош ми студентъёслы чаклам пособие но поттӥмы. 1998-тӥ арын ути ини доктор ужме.
Учконо ке, монэн одӥг группаын дышетскемъёс пӧлысь уноез шаерамы тодмо адямиос луизы, пӧртэм дыре пӧртэм предприятиосын-заводъёсын кивалтӥзы.
- Техника удыслэсь пуштроссэ валаны котькудӥзлы кылдымтэ. Огъя кылын вераса, кыӵе удыслы сӥземын наукая ужъёсты?
— Соос герӟаськемын машина бичанэз эшшо но ӟечгес радъянъя технологиосты кылдытонэн. Мон усьтӥ машинаосты выль сямен бичан амалэз — компенсирующий материалъёсты уже кутыса, ёзъёсты деформация пыр воштыса. Таӵезэ, мынам ужъёсысьтым сяна, нокытысь но уд пумита ни. Машина поттонэз эшшо но ӟечгес радъянлы ик сӥземын мукетъёсыз но усьтонъёсы. Кылсярысь, производствоын — сборочной цехъёсын — кутӥське нимысьтыз кылдытэм алгебрае. Соя кылдытыны луэ машина бичанэз радъянъя выль технологиосты. Со сяна, производстволы номырин воштонтэм луо мукетъёсыз но изобретениосы: полимер материалъёсты уже кутыса станокъёслэсь лэчытлыксэс (точность) будэтон, магнит сиос вылын ужась планетарной редукторъёс, детальёслэсь ӟечлыксэс эскеронын кутӥськись интерференционной приборъёс но мукет.
Одӥг уж — кыӵе ке усьтон лэсьтыны, маке выльзэ шараяны, мукетыз ужпум — со сярысь иворез вӧлмытыны. Нырысетӥез мыным матын ке, кыкетӥез — кыдёкын. Ас пушкамгес ужасько-вырисько угось. Тани ай 2002-тӥ арын монэ ӧтчазы Америкаын ортчись конференцие. Мон сярысь тодӥллям кунгож сьӧрын англи кылын потӥсь журналысь — отчы огпол гинэ ужме ыстэме вал. Лыктоды но лыдӟоды, пе, наукаын усьтонъёстылы сӥзем докладдэс. Бӧрысь, пе, сюрес вылэ быдтэм коньдондэс берыктомы. Но со коньдонэз нырысь аслыд шедьтоно ук! Англи кылысь берыктӥсез но утчано, соин ӵош сюрес вылэ потоно — кӧня тыр усёз ужрадэ пыриськон! Вылаз ик, соку уждунлэн быдӟалаез ушъямон ӧй вал. Озьы ик мынытэк кыли. Кин тодэ, оло, усьтонъёсы вӧлмысалзы ни быдэс дуннее. Изобретениосы но, кызьы нимало техника удысысь тодосчиос, полезной модельёсы, юнматэмын 17 патентэн. Соос кытын ке кутӥськыны кутско ке, патент басьтэм муртлы коньдон висъяськыны кулэ. Шумпотӥсько, мынам гожтэм ужъёсы вылын табере тодон-валан люкало егитъёс. Азьвыл аръёсы бурд улысьтым арлы быдэ потэ вал 5 дипломник. Озьы Ижысь техникая университетын 35 ар ӵоже ужатозям, 170-лэсь ятыр специалистъёсты дасяны пӧрмытӥ. Соос пӧлысь куд-огез техника наукаосъя кандидатозь будэмын. Пӧлысьтызы тани одӥгез — «Редуктор» огазеяськонлэн кивалтӥсез Валерий Мишунин. Студентъёсты дышетон вискын кивалтӥсьын ужаны кылдӥз «Редуктор» заводын но. Тырши отын валтӥсь директорлэн наукая но инновациосъя воштӥсез луыса. Соку кылдытӥмы мувӧй кысконлы чаклам выль редукторъёсты.
- Туж тунсыко: кызьы меда радъяське кыӵе ке изобретенилы патент басьтон?
— Та ужрадэз люкыны луоз кыклы: изобретенилы но полезная модель нимаськись арберилы патент басьтонлы. Изобретение бадӟымгес ужен лыдъяське, дыр но сое усьтонлы тросгес кошке. Нош кыкетӥез наукаын пичигес ужен лыдъяське. Патент басьтон понна вазиськонэн потоно университетысь патентъя ёзэ. Соос эскерон радъяло, йылпумъян гожто. Бӧрысь тае ваньзэ келяно Москвае. Отын но котыр ласянь чаклало изобретенидэ. Санэ басьто: дунне вылысь кыӵе ке кунын уг кутӥськы-а меда усьтэм амалэд яке кылдытэм арбериед. Таӵеез уг шараяськы ке, патент сётӥське. Совето Союз вакытэ наукалы бадӟымгес саклык висъяськылӥз. Коньдон вуылӥз изобретениосты кылдытонлы но, соосты улонэ пыӵатонлы но. Тодӥсько на совето аръёсы изобретение понна премия басьтэмме. Одӥгез завод сое уже кутыны кутскем. Басьтӥ соку 300 манет — самой бадӟымез уждун шаерамы 100 манет пала гинэ вал. Наукаен вырыны кыӵе ке стимул вал соку. «Изобретатель СССР» гадьпусэн но монэ пусйизы-данъязы соку. Нош туала вакытэ тодосчиос кызьы быгато, озьы бергало-бызьыло. Наукаен выро, утчасько, со вие студентъёсты-специалистъёсты будэтыны сюлмасько, кыӵе ке изобретение лэсьто но асьсэос ик сюлмасько сое вӧлмытыны, производствое пыӵатыны.
* * *
- 2003-тӥ арысен тӥ заводын тыршонлэсь палэнскиды, асьтэды быдэсак сӥзиды наукалы. Станок сьӧры выльысь султыны мылкыдды уг кылды-а?
— Зэмзэ вераса, станокъёстэк, производствотэк асме син азям пуктыны ик уг быгатӥськы. Наукае быдэсак выжи ке но, Ижысь техникая университетын но мон станокъёс сьӧрын. Но таяз радэ ки улам — студентъёсты дышетонлы чаклам техника. Сое егитъёс ас синмынызы эскеро, кутыло, темаез ӟечгес валало. Туала егитъёслэн угось теоризэс заводъёсын юнматыны луонлыкъёссы сюбегесьгес ни…
- Тунсыко: наука ужын семья бурдъя меда оло нош тодон-валан дуннее выйыны люкетэ…
— Кузпалы Екатерина Ивановна мынэсьтым удысме туж вала. Ми, тодосчиос, сыӵеесь ук: улӥськомы малпанъёсын-утчаськонъёсын. Таӵе дыръя коркаез-хозяйствоез нуон палэнэ кыле. Кышноелэн та пумысен одӥг пол но монэ пыкылэмез ӧвӧл. Уж дурысь котьку капчи мылкыдын, пӧсь сиёнэн вите. Бен, берло дыре тазалыкез чутыны ӧдъяз: синъёсыз но лябӟизы, пыдъёсыз висемен, ураме но потамысь дугдӥз ини. Но озьы ке но со монэ бурдъя капчи кылъёсыныз. Кызьы ай мон сотэк быдэстысал наукая ужъёсме! Мон киын гожъясько, со «пӧрамме» машинаен печатла, янгышъёсме тупатъя, ӵектонъёс сётъя. Кузпалы выжыезъя ӟуч — вордскемын Татарстанысь Катюша черкогуртын. Йылпумъяз Казаньысь финансовой институтэз. Распределение пыр Иже келяллям: озьы милемлы соин тодматскыны кылдӥз.
- Сое синйылтэмды бере ик сюлмады яратон кылдӥз-пуромиз?
— Милемыз тодматӥз анае. Дорамы сое куное ӧтем но шуэ: вот, пие, тодматскы — туж умой, учкымон нылаш. Мыным со соку ик кельшиз. Зэм но, тусын-буйын чылкыт, востэм нылаш. Кык ар ӵоже пумиськылӥмы но 1963-тӥ арын сюан шудӥмы. Вуоно арын пусъёмы ни семья кылдытэммы дырысен 50 ар тырмонэз.
Мон малпамъя, яратон уг пуромы шуак. Со кылдэ но юнма аръёсын. Дыр ортчемъя ог-огдэ мургес валаны ӧдъяськод, син азяд пуктыны ик уд быгатӥськы ни кузпалтэк улондэ. Сотэк тон но ӧвӧл кадь. Яратон сюлмын быдэс улон ӵоже гыбдаса улыны кулэ… Кузпалэным будэтӥмы одӥг пи. Со но кошкиз вал мынам лёгем пытьыея: тыршиз Ижысь пӧртэм заводъёсын. Но егит дыръяз ик производствоын вӧсь луыны шедиз. Табере тани дорын пуке, семья ӧз кылдыты, внукъёс мыным ӧз кузьма. Соос интыын мон понна — студентъёсы. Котьку дыр шедьтӥсько соосын кенешыны, кулэ дыръяз — юрттыны.
Шӧдӥсько: аръёс ортчемъя золгес кыстӥськыны ӧдъяськод выжыосыд борды. Тунсыко потэ ваньмыз: кинэн эшъяськиз анай-атаед, кыӵе выжыысь соос потэмын но трос мукет. Тани алигес басьтӥськи книга гожтон борды. Солэн геройёсыз луозы Удмуртиысь машина поттон удысысь инженеръёс, технологъёс, тодосчиос. Соослэн улэмзы, ужамзы пумысен та вакытэ материалъёс люкасько. Оскисько, книга одно ик югыт дуннее вордскоз. Со сяна, мыло-кыдо пыриськыны ӧдъяй Сьӧлта ёросын вордскем-будэмъёслэн огазеяськоназы. Одӥг ужрадлэсь но палэнэ уг кылиськы. Яр ёросын вордскемын ке но, дореным лыдъясько Сьӧлта ёросэз. Отын ортчиз самой шудо вакытэ. Туж данъяськисько данэ потэм сьӧлтаосын.
Егит дыръя дыр ӧз шедьылы бакча котырын берганы. Я мон дышетскисько, я студентъёсты дышетӥсько, я станок сьӧрын сылӥсько… 75 арескам гань-ганьгес кариськыны луэ ни. Соин ик яратоно уже луиз ни бакчаын емыш будэтон, утялтон. Но инкуазе потыса но, йырысьтым уг кошко магнит редукторъёс…
Источник:
За предоставление материала выражаем огромную благодарность редакции газеты "Удмурт дунне"
