Овчинников Владимир Фролович

Материал из Воршуда
Перейти к навигацииПерейти к поиску

Дышетон понна аслыд дышетсконо[править]

В.Ф. Овчинников

Владимир ОВЧИННИКОВ быдэс улонзэ Удмурт кун университетэн герӟаз: отчы шаермылэн пӧртэм сэрегъёсысьтыз визь-нод люканы вуэм студентъёсты экономика удыслы дышетӥз. Дышетэм пиналъёсыз, та вакытлы вылӥ квалификациен специалистъёс, вӧлмемын ни быдэс Россие.

Владимир Овчинников – экономика наукаосъя кандидат, Удмурт кун университетысь ужлэн экономикаезъя но социологиезъя кафедраысь доцент, наукалы сӥзем 70-лэсь ятыр статьяослэн, студентъёслы юрттӥсь пособиослэн авторзы. Пусъемын Удмурт Республикаысь Правительстволэн Данъян грамотаеныз, шаерысьтымы Дышетонъя но наукая министерстволэн Таукаронъёсыныз. Кылем арлэн пумаз Владимир Фролович луиз Россиысь Вылӥ школалэн дано ужасез.

Февральлэн кутсконаз Владимир Овчинников пусъе 60 арес тырмонзэ. Ортчемезлы дунъет сётыны, азьланезлы ужъёс чӧлтыны ӵапак дырыз.

- Кыӵеен син азяды пуксе пичи дырды?

- Со вакытысь вань гурт пиналъёслэн кадь. Гольык пыд бызьылыса-шудыса – пыдкутчанлы-дӥсьлы ёрмоно вал угось, уен-нуналэн ужаса – гурт пиналъёсты пичиысен уж пӧлы кыско. Вордӥськи мон Пичи Пурга ёросысь Вуж Мӧнья гуртын. Атае, Фрол Трофимович Овчинников, колхозын пӧртэм ужез быдэсъяз. Но огшоры вал сюдӥсь, шуэм сямен, ӧй вал. Сельсоветын секретарьлэсь ужзэ быдэсъяз. Вакчи курсъёсты йылпумъямез бере солы оскизы «Искра» колхозысь бригадир-агрономлэсь удыссэ. Табере малпасько ини: музъем ужез мур шӧдӥсь-валась адями вал, дыр, сотэк ӧй оскысалзы та ужез.

Анае – гуртын солы Ольгапай шуыса вазиськылӥзы – кема дыр ӵоже колхозын тыршиз. Со бӧрсьы ужаны интыяськиз нылпи садэ нянькае. Семьямы бадӟым вал: вить пиос но одӥг ныл. Самой бадӟымез – Толя агае – кыстӥськиз лэсьтӥськон удысэ, вылӥ квалификациен специалист луиз. Жаляса верано, кылем арын со улонысь кошкиз. Миша агае Ижысь техникая институтэ пырыны медэ вал, но озьы ик та малпанэз быдэсмытэк кылиз. Гуртэ кылиз, шудзэ отын шедьтӥз, шуыны луоз. Огъя учконо ке, ваньмы ужасесь будӥмы, визь ласянь но адӟем карымонэсь вал. Мыным но Надя сузэрелы гинэ вылӥ образование басьтыны кылдӥз. Со но, мон но экономика удысэ кыстӥськимы.

- Анай-атайды данъяськизы, дыр, тӥледын: со вакытэ вылӥ тодон басьтон ласянь гуртысь пиналъёслэн луонлыксы сюбеггес вал…

- Шонерзэ вераса, дышетскыны косӥсь ӧй вал. Кытчы ке пыремед потэ ке – со аслад ужед, нокин уз косы, уз нодъя. Анай-атайёс угось гуртэз-хозяйствоез ӝутонэ выемын вал. Ӵапак та ик, мон малпамъя, со вакытысь пиналъёсты, ӟуч кылын вераса, самостоятельной луыны дышетӥз. Йырамы мур малпан пыӵаз: улонэд понна кыл кутӥськод ачид. Соин но, лэся, гуртын будэм нылпиос кырыж сюрес кузя ӧз кошкылэ.

Тодон-валан дуннее кыстӥськеме сярысь ке верано, гуртоосылэн та шоры асьсэлэн учконзы вал: горе от ума, шуэм выллем. Дышетсконэн мултэс тунсыкъяськись мурт шоры, шонерзэ вераса, валатэкгес учкылӥзы. Нырысетӥ интыын угось котьку вал уж. Пыкылэмзы но вань: ма, дугды ни дышетскемысь, ужаса уд вутты. Сыӵе вал со вакытысь гуртлэн психологиез.

- Но номыр шоры учкытэк, тодон-валан дуннее кыстӥськон мылкыдды котьмалэсь золгес вылэм…

- Вуж Мӧньялан соку тямыс классъем школа гинэ ужаз ай, 9-тӥ-10-тӥ классъёсын дышетскыны мылкыд карисьёс Учала (Пичи Пурга ёросысь Ильинск черкогурт – авт.) ветлӥзы. Тямыс классэз йылпумъяй Ушъян грамотаен. Солэн кужымез-данэз 10-тӥ класс бере сётӥськись медальлэн кадь бадӟым вал. Малпаськи: малы бен мыным Учала ветлонэз на? Со интые, оло, техникуме шонтоно? Озьы ик кари. Грамотаелы луыса, одӥг экзамен но сётытэк, дышетскыны пыри Ижысь индустриальной техникуме. Озьы мон, гуртысь вуэм востэм пияш, шеди городын будэм-кыдам пиос пӧлы. Таослэн, конешно, ултӥямзы но потылӥз. Вот, Ушъян грамотаед ӧй ке луысал, татчы дышетскыны ӧй но пырысалыд. Тодам кылиз на возьдаськеме: городысь пиос чильк-вальк кисьтаськись костюмъёсын, нош мон – уродос гинэ шароваръёсын.

Дышетскыны кутскеме бере нырысь-валысь мурт сэрегъёстӥ кыстаськоно луиз, нырысетӥ курслэн пумаз гинэ огъяулонние инты сётӥзы. Отын эшъяськи Удмуртилэн пӧртэм сэрегъёсысьтыз вуэм пияшъёсын. Соос пӧлысь одӥгеныз – Владимир Радкеен – али но эшъяськиськом. Со «Ижсталь» заводлэн ветеранэз луиз ни.

Ёрмыса дышетски ке но, техникум аръёсме шуныт мылкыдын тодам вайисько. Ӵапак соку кыдай, киосме волятӥ, технико-технологической тодон-валан басьтӥ. Та ваньмыз инъет луиз азьлань улонэлы. Отын мон дышетски стрелковой пыӵал тӥрлыкез лэсьтӥсь техник-механиклы. Практикаосмы ӝыны ар ӵоже радъяськылӥзы. Мон ужаны вуттӥ «Ижмаш» заводын – Калашников автоматэз лэсьтӥ. Со бӧрсьы кык толэзьзэ Ижысь механикая заводын – пистолет дасян бордын. Ӵапак отысен монэ армие басьтӥзы.

- Шуо: удмурт пиосты шумпотыса басьто пограничнике. Угось ӝожтӥськонэз тодӥсьтэмесь, чидасесь, кужмоесь. Тӥ но кунгожез утиды, луоз?

- Мон шеди Амур улосэ, ракетной войскоосы. Музъем пушкын ракетаослы шахтаос лэсьтэмын вал, ӵапак отын ик боевой дежурство нуи. Межпланетной запускъёс но вал, эсьмаса. Ӝоген мыным оскизы секретчиклэсь ужзэ. Часте вуись вань гожтэтъёс, секретной иворъёс мон пыр ортчылӥзы, озьы ик кыл кутӥ библиотека понна. Сётӥзы сержантлэсь званизэ, нош дембеле потӥ ни старшина нимын. Мылкыды ке луысал, военной удысъя но кошкыны быгатысал, дыр. Угось службаме азинтыны ӧтёнъёс вал. Но вордскем палъёсам монэ витиз яратоно нылаше. Али ке но мон запасысь офицер, вылӥ лейтенант.

- Армиысь возьмам нылашен ик семья кылдытӥды-а?

- Ми соин одӥг гуртысь. Сое вордыны басьтэм Вуж Мӧньяысь одӥгез семья. Со мынэсьтым одӥг ареслы пичигес вал, дышетскыны одӥг школае ветлӥмы. Сое синйылтытэк кельтыны уд быгаты: тусын-буйын артистка кадь – бадӟым сьӧд синмо, вольыт бамо. Танялы синмаськемме ӧй ик вала. Армиысь возьмало, шуиз. Сьӧраз ветлӥсьёсыз ӧжыт ӧй вал ке но, быдэстӥз ведь сётэм кылзэ.

Кузпалы но, тямыс классэз йылпумъяса, нырысь-валысь тыршиз Вуж Мӧнья сельсоветын секретарь луыса, собере нылпи садын пиналъёсты утисьын. Иже выжемез бере дышетскыны пыриз ПТУ-е, лэсьтӥськонын отделочной ужъёсъя специалист луиз. Али тырше Ижысь панель юртъёсты пуктонъя управлениын завхоз луыса. Ай егит дыръяз дышетскыны пыриз вал Удмурт кун университетысь юридической факультетэ. Нырысетӥ курс бере дышетсконзэ куштоно луиз. Ма, сыӵе ини кышнолэн адӟонэз: нылпиосты чаклано, картлы саклык висъяно. Мон но солы юрттыны ӧй быгаты, аспирантурае пыри. Семья кылдытэммы дырысен туэ 36 ар тырмонэз пусъёмы ни.

- Озьыен, студент улонэ тӥ зымиды, армие ветлыса, семья кылдытыса?

- Озьы пӧрмиз, шуыны луоз. Армиысь бертӥ но, дышетсконме азьланьтыны мылкыды ӝутскиз. Кытысь ке кылӥськиз: Удмурт кун университет, пе, кыкетӥ набор ортчытэ. 1972-тӥ арын угось пединститут университет луиз. Мон отчы пыри 1973-тӥ арын.

- Маиныз бордаз кыскиз экономика удыс?

- Индустриальной техникумез горд дипломен йылпумъяй. Нырысетӥ экзаменэз гинэ – математикаез – «витьлы» сётыса, капчиен дышетскыны пыри экономикая факультетэ. Малы одно та удысэз бырйи? Со универсальной, шуыны луоз. Та удысын басьтэм тодон-валанэз кутыны луэ огъя промышленностьын но, нимаз предприятиос вылын но, гурт хозяйствоын но. Тодон-валан люкай «планирование промышленности» специализацияя.

Студентлэн улонэз шулдыр, шуо калыкын. Со зэм но озьы вылэм. Котырад – эшъёс, серемпыр веранъёс, тунсыко пумиськонъёс но лулысь-сюлмысь кенешонъёс. Гужемзэ ваньмы сямен ик студотрядъёсын тыршимы.

- Капчиен-а сётскиз наукалэсь иззэ йыръён?

- Удысэ тунсыко потэ вал бере, ӧй ик шӧды дышетскон аръёслэсь ортчемзэс. Сое йылпумъяй «витьёсын» гинэ. Азям юан кылдӥз: кытчы мыноно та дипломен? Вамыштӥ «Редуктор» заводэ – предприятилэн экономикаезлэсь азинскемзэ чаклай-радъяй. Ар пала ужаса вуттӥ-а, ӧй-а, мыным вазиськиз университетысь экономикая факультетысь промышленностьын производстволэсь экономиказэ радъянъя кафедраысь доцент (та дырлы экономика наукаосъя доктор, профессор) Юрий Семёнович Перевощиков: лыкты, пе, ужаны дорамы. Озьы мон берытски вордскем борддоръёсам – университетэ. Интыяськи наукая но эскеронъёсъя секторе инженере-исследователе. Ӝоген наукая сотрудниклэсь удыссэ оскизы, собере ассистент луи, озьы ӝутски кафедраысь валтӥсь преподавателёзь. Озьы вамышен-вамышен наукае мургес но мургес выйи, экономикаысь пӧртэм ужпумъёсты эскери. 1986-тӥ арын экономика наукаосъя кандидат ним басьтэме бере мон луи ужлэн экономикаезъя но социологиезъя кафедраысь доцент. Нялтас вераса, мон дышетскон вакытэ факультетамы одӥг гинэ кафедра усьтэмын вал, та вакытэ экономикаез дышетон-эскерон паськытаз: ужзэс радъяло пӧртэм кафедраос, студентъёс басьто паськытэсь тодон-валанъёс.

- Кыӵе ужпумлы сӥзиды кандидат диссертацидэс?

- Нимаськиз тазьы: «Организация и планирование оплаты труда в бригадах на примере станкоинструментальной деятельности». Сое ути Санкт-Петербургысь Н. А. Вознесенский нимо финансово-экономической университетын. Оппонентъёсы луизы Свердловскысь (али Екатеринбургысь) калык хозяйствоя институтысь тодосчиос. Диссертация гожтыны соку луонлыкъёс паськытэсь вал. Угось наукая эскеронъёс ортчылӥзы пӧртэм заводъёсын. Кылсярысь, «Редуктор» но «Купол» предприятиосын. Соосты радъянъя нимысьтыз заказъёс вуылӥзы. Профессор Ю. С. Перевощиков кивалтэм улсын экономикая исследованиос, Удмуртиысь огазеяськонъёсын гинэ ӧвӧл, палэнысь заводъёсын но радъяськылӥзы. Шуом, Москваысь «Станколит» предприятиын, Санкт-Петербургысь Кировский заводын. Выльдӥськон вакыт кутскем бере вань со заказъёс ышизы, тодосчиослэн эскеронъёс ортчытъяны луонлыкъёссы быризы.

- Уд жаляське-а, уждэс доктор диссертациозь ӧд вуттэ шуыса?

- Куддыр сыӵе малпанъёс кылдыло ик. Но талы мынам аслам валэктонэ. Кандидат диссертациме ути выльдӥськонлэсь азьло. Собере странаын кутскизы воштӥськонъёс. Наукалы саклык висъямысь дугдӥзы, тодосчиос асьсэ понна кылизы. Нокыӵе заказъёс, эскеронъёс сярысь веранэз ик ӧй вал. Та муген, лэся, мон но наукалэсь кыштыр палэнскыны ӧдъяй. Утчаськон, выльзэ усьтон мылкыдме ӧз бурдъя ни. Озьы докторлэсь нимзэ басьтон сярысь малпан йырысьтым кошкиз. Быдэсак выйи дышетон уже. Кудымкар городын усьтӥськиз Удмурт кун университетлэн ёзэз, отын студентъёслы лекция лыдӟылӥ. Ма, та ужен олокытчы но вуылоно луиськиз: шаерысьтымы ваньмаз сямен ик городъёсы, Свердловск улосысь Нижняя Турае, Новый Уренгое, Башкириысь Нефтекамске но уно мукет городъёсы.

Уг тодӥськы, кинлы ке, оло, паймымон потоз мукетыз но: укмыс ар ӵоже секретарь луыса тырши Удмурт кун университетын кылдытэм диссертациосъя кенешын. Мукетыз, оло, докторлэсь нимзэ басьтон понна быжтӥз кырмысал ни таӵе тупась вакытэз. Нош мон маке ӧй ик туртты. Шуисько ук, выльдӥськон аръёс шӧдӥськизы – наукаын утчаськонэлэсь тунсыксэ ыштӥ.

- Мар вераны быгатӥсь-коды туала студентъёс сярысь? Визьзы ласянь макем висъясько соос тӥ вакытысь егитъёслэсь?

- Вераны быгатӥсько экономика удысъя дышетскись студентъёс сярысь гинэ. Мон чакламъя визьзы ласянь соос милесьтым лябесьгес. Ӧвӧл, оло, мукет сямен валэктоно: соос дышемын-а, мар-а ни капчиезлы. Лякытэн тодон-валан басьтыны, мултэс пырскытэк, созэ я тазэ ужез бергатыны. Улоназы угось бадӟым инты басьтыны кутскиз Интернет. Кыӵе ке юанэд кылдӥз ке, отысь часта гинэ учкыны быгатод. Нош мон тодам вайисько наукая ужъёсме киын гожъяса пукемме. Валамон, тазьы ужаса, тодон-валан йыре золгес пыӵа. Нош туала студентъёслы та ласянь удалтӥз: уен-нуналэн ручкаен гожъяськыса, книгаосысь бугыръяськыса пуконэз ӧвӧл.

- Кызьы дунъяськоды шаермылэсь туала экономиказэ? Кыӵе амал сое азинтыны юрттоз?

- Кыӵе ке улослэсь экономиказэ эскерыку, одно ик санэ басьтоно солэсь аспӧртэмлыкъёссэ. Удмурт шаер сярысь ке верано, асьме дорын интыяськемын обороная пӧртэм предприятиос. Соин ик нырысь ик саклык висъяно соослы. Угось соосты азинтытэк, улосмылэн экономикаез уз ӝутскы. Нош туннэ нуналлы соос 30-50 процентлы гинэ ужало. Кулэ кун ласянь оскымон но бадӟым заказъёс. Ӵем кылоно ук экономикалэн реальной секторез сярысь. Сое азинтон-ӝутон герӟаськемын ӵапак заводъёсын, калыкен – отын ужасьёсын. Тани басьтом «Купол» заводэз ик. Отын уникальной вуз потто, нош кужымез быдэсак уг кутӥськы.

- Лыдпусъёс, кыӵе ке эскеронъёс-анализъёс пумысен йырдэс тӥяса, жадиськоды, дыр. Кытысь кужым басьтӥськоды? Кызьы радъяськоды ваньмон дырдэс?

- Мон гуртын вордскем адями бере, со монэ ас бордаз кыскемысь ноку но ӧз дугдылы. Вордскем гуртэлэсь кыдёкын ик ӧвӧл – бускель Буро-Ӝикъя гуртын – басьтӥ корка. Ваньмон дыр тупа ке, шуак гинэ отчы ширтӥсько. Малпасько, гуртын вордскем адями ноку но солэсь люкиськыны уз быгаты. Бакчаям бергаса, юртъер котырме тупатъяса-радъяса, кужым басьтӥсько. Улонэ вылэ ӝожтӥськыны мугез ӧвӧл – ваньмыз пӧрмиз радызъя но сюлэмыя.

Источник:

Овчинников В. Ф. Дышетон понна аслыд дышетсконо / В. Ф. Овчинников ; записала Е. Никитина // Удмурт дунне. - 2012. - 27 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"