Ныл но шыр

From Воршуд
Jump to navigationJump to search

Пиосмурт кышноеныз кык ныл вордӥллям. Одӥгез — асьсэлэн, мукетыз — мумытэм-айытэм. Со нылъёс, будэм беразы, ӧвӧл тупаллям. Ӵем дыръя ваче йырси но вутскыло, пе. Соин ик пиосмурт сиротазэ нюлэскы йыромытыны нуэм. Пичи гинэ корка пыртэм но ныллы верам:

— Тон татын ул, мон пу корало,—ачиз тӥр кутыса потэм. Нылмурт сое косякетӥ учкыса келям, Кема ик ӧз мыны, ныллэн пель сьӧраз пу корам куара кылӥськыны кутскем.

Пеймыт но луэ, пе, ини. Аиз ялан ӧвӧл. Солэн пу корамез туж матын кылӥське. Кӧтыз чидамтэен аиз доры потэм ини . Пу коран дораз мынэм но нокинэз ӧвӧл. Выллань учкыса, кыз бордысь зӧк пул адӟем. Тӧл выретэмъя, со пул кыз борды, тӥрен корам кадь, йыгаське. Тӥни кин вылэм солэн аиз. Отчы ик пуксьыса, бӧрдыны кутскем. Нюлэскын кионъеслэн вузэмзы одӥг-одӥг кылӥськылэ, пе. Нылмурт бӧрдэм-бӧрдэм но пичи корка пырем. Аизлэсь ваем кеньырзэ ӝук пӧзьтэм. Ӝуксэ сиыны кутскем бераз, дораз шыр потэм. Эш луоз шуыса, сое но ӵош ик сюдэм.

Ӝук сиен дыръязы, соос доры гондыр пырем.

— Лык, ватскемен шудом, мон тонэ шедьтӥ ке, сиё,—шуэм ныллы гондыр,—тӥнь та гырлыез чыртыяд ош.

Гондырлэсь вераськемзэ шыр кылэм.

— Вай, мои гондырлэсь гырлызэ чыртыям поно, тон гур вылэ туб,— ныллы шыр шуэм лушкемен.

Озьы ик лэсьтӥллям. Гырлыез шыр чыртыяз ошем но пол вискытӥ бызьылыны кутскем. Гондыр гырлы бӧрсьы ветлэ. Нылмурт полатьын кылле, уг но шока, пе. Гондыр гырлы борсьы ветлонназ жадем. Гырлы куараез кылэ, нылмуртэз уг адӟы, пе. Шыр пол вискытӥ бызьылэ, гырлыез юри зол выретэ. Гондыр, куалектэменыз азьвыллэсь но зол бызьылэ, пе. Ымысьтыз шукы вия, кылзэ вамен куртчем.

— Фу,— шуэм гондыр,— пот ни, жади. Тонэ утчаса но ӧй шедьты.

Нылмурт потэм но, гондыр солы котьма сётэм: зарни, азвесь, буртчин дӥсь. Аиз, нылыз луло на-а шуыса, учкыны мынэм. Нюлэскы пичи корка вуэм но, пумитаз буртчин дӥсен нылыз потэм.

- Валдэ берыкты, мон маке-маке уробояд тыро, мынам табере котьмаи вань ини,— шуэм.

Аиз ма шуыны ик ёрмем. Валзэ берыктэм но, сирота ныл уробояз быдэс шыкыс зарни поттэм. Аиз паймыса гинэ учке на, пе.

Гуртысьтызы атассы забор вылэ тубыса кеськем:

— Урод нылды ӟечен лыктэ-э-э!

— Кызьы инмар сое берыктоз на,— мумиз куаретэм, кирос ик понэм.

Кӧня ке гинэ уло но, аизы урод нылзэс вае, пе. Мумытэм-аӥытэм мурт тодмантэм воштӥськем. Дӥсь кисьтаське. Одӥг шыкыс зарни, одӥг шыкыс азвесь.

Табере зарни понна асьсэлэсь яратоно нылзэс келяллям ни. Яратоно нылзэс нуыса, со корка ик нюлэс шоры кельтӥллям. Сирота ныл сое валэктымтэ. Яратоно нылзы ӝук сиыны кутскем. Дораз шыр потэм. Солы шарк пуньыеныз шуккыса келям. Ӝук сиён дыръяз ик гондыр пырем. Ватскемен шудыны кутскиллям. Яратоно ныл, гондырлэсь сётэм гырлызэ чыртыяз ошыса, бызьылэ, пе. Гур котыртӥ одӥг пол котырскем но, сое гондыр пыд улаз кутэм. Нылмуртлэсь лызэ гинэ кельтэм на.

Аиз яратоно нылыз доры зарни понна мынэм. Зарни интые нылызлзсь кылем лызэ уробояз тырыса ваем. Гуртазы атас нош ик черетскем:

— Ӟеч нылдылэсь лызэ ваё-о-о!

Мумиз кузь боды кутэм но атас бӧрсьы уиське, тышкаське, пе:

— Тынад ма тодэмед!

Зэм ик, яратоно нылзылэсь лызэ гинэ ваиллям на, нош сирота нылзы ӟече потэм[1].

Литература[edit]

  1. Удмурт калык сказкаос / сборникез дасязы Арк. Багай но М. А. Перевощиков. - Ижевск : Удмуртгосиздат, 1940 (с. 63-65).