Новиков Анатолий Васильевич
Со луысал миллионер. Бырйиз шаерчилэсь сюрессэ.[править]
Анатолий Васильевич Новиковлэсь нимзэ шаерамы туж тросэз тодо. Со - Удмурт Республикаысь сӥё-дано дышетӥсь, шаерчи, журналист, коллекционер. Ас вакытаз кылдытӥз Удмуртиысь комсомоллэсь нимзэ нуллӥсь мотоклуб но отын 27 арзэ тыршиз. Та паймымон адями та нуналъёсы пыртэмын Ижевск городлэн дано гражданинъёсыз пӧлы. Дораз кожатэк но ӟечкылатэк ӧм чидалэ ми но.
- Анатолий Васильевич, тӥ пыртэмын Ижевск городлэн дано адямиосыз пӧлы. Та сярысь тодыса, мылкыдды бугыртскиз, йырады кыӵе ке малпанъёс чилектӥзы, вылды?
- Уг ваты: синкылиосы ӧжыт гинэ ӧз потэ. Мон ведь кемалась дырысен бичасько ни вашкала, аспӧртэмлыко арбериосты - ваньмыз-ӧвӧлэз 60 сюрс пала люкаськемын. Пушкин вакытъёсы тодмо Плюшкин коллекционерлэн но сомында соос ӧй вал - ог 30 сюрс арбериосыз лыдъяськизы.
Огвакытэ мылысь-кыдысь басьтӥськи самоваръёсты люкан борды. Иж тыметлы матысь Береговой (али Милиционной) но Базар (али Горькийлэн) урамъёсты вылэгес тубтыкузы, мыным туж удалтӥз. Одӥг ӟеч тодмое юртъер котырзэ нуллыны-ворттыны юрттыны куриз. Соку ик пыд улын кыстаськись тунсыко арбериез синйылтӥ. Мар та, юасько корка кузёослэсь. Самовар, пе. 1870-тӥ аръёсысь кылем маке. Сое Иж заводлэн одӥгез кивалтӥсезлы юри лэсьтэм вылэм городысь тодмо кибашлы Крюков. Самовар пуктэмын кукъёс вылэ. Соос эрказ басьтӥсько. Басьтӥське ӵын кошкон трубаез но. Озьы самовар син куспын пӧрме чорыген шыд, лудкеч яке ӵож пӧзьтон арберилы. Заводлэн кивалтӥсез угось туж яратылӥз чорыганы но пӧйшураны. Самоварез котьку сьӧраз басьтылӥз.
Кышное мултэс арбериосты доре нуллэме понна куаретэ вал. Озьы самоварез уж дурам, гараже нуи - соку мон обкомын водитель луыса ужасько вал. Выж вылын кыстаськыкуз, ӵыжыны шедьтӥ ук! Зӧк трубаос борды кылтыр-колтыр шуккиськиз. Йыр бордам кырмиськыса гинэ вуи на: пилиськоз ведь! Ӧз пилиськы. Сокем юн лэсьтэмын вылэм. Со самовар бӧрсьы коллекционер луон мылкыды уката пӧзьтӥз.
Огвакытэ люкай Ленинэн, партиен, комсомолэн герӟаськем арбериосты. Отӥяз сюлэмы куриз: люка ваньзэ, ма тунсыко, паймымон потэ - кудӥз маин уката дуно, бӧрысь но валаны луоз.
- Вашкала арбериос туала арын туж дуно сыло. Соосты вузаса, тӥ кемалась миллионер луыны быгатысалды.
- Зэмен но, мынам миллион манетлэсь дуно сылӥсь арбериосы но вал. Кылсярысь, пионоламе куро вал Ленинградэ, со понна асме но отчы ик улыны ӧтё вал, квартира сётом шуизы. Кышное пумит луиз.
Со пионолаез пианино борды дэмӟытӥськод но, пожалуйста, коть Бетховенэз шуд, коть Моцартэз - крезьгуръя нимысьтыз тодон-валанъёс кулэ ӧвӧл. Мукет трос тунсыко арбериосын ӵош сое дунтэк сётӥ Ижысь Кузебай Герд нимо школалэн музеяз.
Мон юрттӥ ӝог юрттэт сётӥсьёслэсь, МВД-лэсь, Удмуртиысь Национальной банклэсь музейёссэс узырмытыны. Арбериосме сётӥ Ижысь 9, 24, 16 номеро школаосы. Пластинкаосты, шер пумиськылӥсь книгаосты, тодмо ӟуч писательёслэсь открыткаоссэс - ваньмыз ог 7 сюрс экземпляр - кузьмай Национальной бибилиотекалы. Али тани сюлмы висе спортъя музей понна. Оскисько, туэ ар пумозь со одно усьтӥськоз шуыса. Отчы сётон арбериосы трос, кылсярысь, XIX даурысь кылем куасъёсы котькинлы тунсыко потозы, малпасько. Ачим пыриськи Удмуртиысь комсомоллэсь нимзэ нуллӥсь мотоклубез кылдытонэ. Нылпиос туж мыло-кыдо пырисько вал клублэн ужаз, ӵемысь ӧтчаллям Совето Союзысь Геройёсты. Соослэсь адӟем карыса, нылъёс но пиос ас улонзы, азьлань сюрессы понна кыл кутыны дышетскизы. Мотоклубын кыдам егитъёс пӧлысь 29-эз спортысь мастеръёс луизы. Со вакытъёсысь кылем туспуктэмъёсы, дипломъёсы, значокъёсы туж трос - малпасько, спортлы сӥзем музейын соос ас интызэс шедьтозы.
- Тодӥсько: “Ижевсклэн дано гражданинэз” ним басьтон понна кулэ луись документъёсты арлы быдэ сямен дасялляды, но тӥледыз азьпалтӥсьёс шедьылӥзы.
- Соку ӝожомылӥ: кӧня музей усьтоно на, тонэ мед дунъялозы шуыса? Нош “Ижевсклэн дано гражданинэз” ним басьтон мон понна - ваньмыз. Оло, Александр Пушкин сярысь материалъёсме огазе люканы-радъяны луонлыке, коньдонэ, кылдоз. Соос мынам туж трос люкаськемын. Шер пумиськылӥсь книгаосы гинэ - 156 пумо. Дано поэтлэсь 3 сюрс пала выжы-кумыоссэ шедьтӥ ни. Соос пӧлын 40 палаез - дун-чылкыт святойёс. Екатерина II, Алексей II эксэйёс, Михаил Кутузов, Александр Суворов полководецъёс - Александр Пушкинлэн кыдёкысь ӵыжы-выжыосыз.
- Шонер ке валасько, Пушкин сярысь гожъямъёсты-суредъёсты огазеян понна тӥледлы коньдон кулэ.
- Сокем чебер уг кылӥськы ке но, бен, кулэ. Но со ужъёсы калыклы ик, историлы кылёзы ук!
- Удмурт шаерлэн, Ижевсклэн историзылы сӥзем гожъямъёсты туннэ вылӥ дунъясько. Нош «Золотой ларец» книгады шаерез тодонъя туж зол учебник луэ - дышетӥсьёс сое мылысь-кыдысь куто ужазы.
- Та книгае потэм сярысь Пермьын тодӥллям. Нош соос ӵемысь ортчытъяло вал Волга но Урал котырысь гожъяськисьёс куспын ӵошатсконъёс. Озьы ужме отчы курыны кутскизы. Мынӥ. 1-тӥ инты басьтӥ.
- Анатолий Васильевич, тӥляд улон интыды туж ӟеч - укноысеныды Шор площадь ӧжыт гинэ уг адӟиськы. Но юртэз укыр вуж ни…
- 1924-тӥ арын пуктэмын, берлозэ тупатъязы-выльдӥзы сое 1946-тӥ арын. Татын уло вал «Ижстальын» ужасьёс, ми семьяеным - 20 ар пала ни. Валамон, мукетсэ улон инты басьтыны асьмелэн кужыммы уз тырмы. Но городысь вылӥ кивалтӥсьёс оскыто: тазэ юртэз куашкатозы, иське, выль корка пырон лэсьтыны быгатом. Витём - ма шуод на. Нош интыез ласянь ке, зэмен но, туж умой: городын ортчись праздникъёсты ноку сямен уг кельтӥськы. Шор площаде одно потасько. Калык шоры учкисько.
- Кызьы малпаськоды, малы туала калык, вашкалаосын ӵошатыса, мукетгес луиз?
- Эрказгес луэмын, вылды. Ужаны быгатэмысь дугдӥм. Тодамы ваёме 1870-тӥ аръёсты. Соку шаерамы вуылӥз мувӧй поттон удысын ужась Людвиг Нобель. Паймиз: кыӵе пурысесь та Иж палъёс. Заводысь кылык шымыртэмын, ваньзэ киын лэсьто - секыт ужаса губырмо. Тае адӟыса шуиз: ваньзэ воштоно! Заводэз арендае басьтӥз. Малпасько, со аръёс Иж завод понна тужгес азинскымонэсь вал. Адямиос сьӧд-пурысь дӥсьсэс воштӥзы яркытэзлы. Нылкышноос тротуаръёс кузя шляпаосын, киязы зонтъёсын ветлыны ӧдъязы. Заводысь тужгес секыт ужез табере быдэсъяз техника. Татын тыршисьёслэн уждунзы сокем бадӟым ӧвӧл ке но, сое дыраз басьтӥзы, юнме шорысь ӧз кулэстылэ. Заводысь кивалтӥсьёс ужасьёссэс куддыръя кужмысь но бертыны, шутэтскыны косылӥзы ни. Калык угось оскыны кутскиз: азьланьын эшшо ӟечгес улыны кутскоз. Тӥни малы революция дыръя тӧдьыос вуо ке, заводын ужасьёс соосын ӵош гордъёсты ӝуго. Гордъёс заводэз киулто - тӧдьыослы пумит нюръясько. Соос понна нырысь интыын вал яратоно заводзы - сое гинэ медаз таркалэ, быдтэ.
Туала вакытэ городын выль юрт пукто, чебер кенер лэсьто гинэ - одно отчы кин ке со ки бервылзэ кельтэ ни: гожъяське, суреда.
- Анатолий Васильевич, городын тӥ 75 ар улӥськоды ни. Кызьы малпаськоды, солэн тусыз трослы воштӥськиз-а?
- Вазен егитъёс кык интыын пумиськон сярысь верасько вал: одӥгез - Советской но Карл Маркс урамъёс вожвыл потон сэрегын, отын азьло час пуктэмын вал, кыкетӥез - Генеральской сад, али Горький нимо парк. Туннэ, пожалуйста - Калашниковлэн музеез, Калыкъёслэн эшъяськонзылы сӥзем монумент, Михайловской собор... Ма, ваньзэ вераса уд быдты. Кивалтӥсьёс верало: Удмуртия Россие пырем дырысен 450 ар тырмонлы сӥзьыса, Ижевск уката зол воштӥськоз. Оскисько талы, шумпотӥсько.
Источник:
Новиков А. В. Со луысал миллионер. Бырйиз шаерчилэсь сюрессэ / А. В. Новиков ; записала Э. Кумачева // Удмурт дунне. - 2007. - 15 сент. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
