Моторина Раиса Константиновна

From Воршуд
Jump to navigationJump to search

Буйгасьтэм сюлэм[edit]

Р. Моторина

Дэри черкогуртын улӥсь Раиса Моториналы 18-тӥ ноябре 80 арес тырме. Удмуртиысь гурт удысысь дано ужась, Дэри ёрослэн дано адямиез 14-тӥ арзэ кивалтэ ёросысь арлыдоослэн «Мӧзмон» клубенызы. Коллективлэн нимыз пыртэмын «Удмурт Кенеш» огазеяськонлэн Данъян книгаяз. Раиса Константиновналэн улонэз шумпотонэн гинэ тырмемын ӧвӧл ке но, ассэ шудоен лыдъя.

Пинал шуыса ӧз учкылэ

- Мон вордски 1939-тӥ арын Выль Казмас гуртысь удмурт крестьян семьяын, - шуэ Раиса Моторина. - Мамаелэн дышетскемез 2 класс сяна ӧй вал, нош тятяе йӧнгес вылэм, бригадирын ужамын, нокин шоры кесяськылымтэ. Мон сое калык верамъя гинэ тодӥсько. Война кутскыса, гуртысь воргоронъёсын ӵош тятяме но оже басьтӥллям, бертыны солы ӧз кылды. Улытозям нокинэ тятя шуэме ӧвӧл, сое воштӥзы тятяелэн двоюродной братъёсыз. Дорамы ӵемысь пыразы, ки вылазы ӝуткаллязы, ал вылазы пуктыса, вешаллязы.

Тятямылэн пичигес гинэ счётэз кылиз. Туж яратылӥ соин шудыны, 6 аресам лыдъяськыны дыши. Озьы школае мынэмелэсь азьло ик ватсаны но куштыны капчиен быгатӥсько ни вал. Школаын синмаськи нырысетӥ дышетӥсьмылы. 1947-тӥ арын, нылпи садэ ветлымтэ пиналъёс, туж возьдаськыса школае мынӥмы. Тросэзлэн дӥськутэз но йӧнала ӧй вал. Дышетӥсьмылэн сьӧд костюмез но тӧдьы блузкаез туннэ но син азям пуксе. Туж чебер кырӟа вал, киосыныз дирижировать карыса. Сыӵеосты милям адӟылэммы ӧй вал бере, озьы выремез тунсыко потӥз. Дорам бертыса, косяк азе пуксисько но,киыным шонаса, эшъёсме кырӟаны дышетӥсько. 5 кузялюкаськылӥмы, мон котьку вожаксы вал. Мынэсьтым кылзӥськылӥзы.

Школаын ортчылӥсь ужрадъёс дыръя но котьку калык пӧлын вал. Сценка пуктоно-а, басня лыдӟоно-а, котьку монэ косылӥзы. Кылбуръёсты капчиен дышетылӥ. Ӝытазеяз 2-3 пол лыдзӥсько но, книгаме миндэр улам поныса, кӧлыны выдӥсько, нош ӵуказеяз, син азям пуктыса кадь, шара верасько. Дышетскон капчиен сётскиз кадь, гуртысьтымы 7 классэз йылпумъятозям. 8-тӥ классэ Дэриысь школае вамыштӥ но, «ньыль» отметкаосы ик ӧжыт кылизы. 9-тӥ класс бере, пе, английской кылъя экзамен сётоно. Одӥг классэ 2-тӥ арзэ кельтозы кожаса, 8-тӥ класс бере колхозэ ужаны потӥ.

Мугоры бадӟым вал бере, шорам пинал шуыса ӧз учкылэ, арлыдоосын артэ котьма ужез быдэстӥ. 4 ар ортчыса, улонэ чутрак воштӥськиз. Одӥг полаз колхоз конторае пыри но, дышетскыны, пе, мынод-а. Кытчызэ но тодытэк, соглаш кариськи. Сарапул совхоз-техникумын бухгалтериысь учётлы (счетоводлы) дышетсконо вылэм. Ар ортчыса, вордскем гуртам, Азин нимо колхозэ, ужаны бертӥ. Отӥяз тодон-валанме эшшо будэтӥ. Счётэн лыдъяськон пичи дырысеным ик туж кельше вал бере, та ужлэсь ӧй ӵыды ни.

Выль но Вуж Казмасъёс

- Выль Казмас гуртын вордскемын, нош бызи мон Вуж Казмасэ, - вера Раиса Константиновна. - Та гуртъёс артэ интыяськемын, кусыпсы 4 иськем гинэ. Ог-огзылэсь туж пӧртэмесь. Выль Казмас - бадӟым гурт, отчы котыр гуртъёсысь калык ужаны ветлӥз, культурая юрт вал, гуртоос котькудӥз ас понназ улыны тыршиз. Капка азе уйлы кельтэм трактор-машинаослэсь детальёссэс качало вал. Нош Вуж Казмасын одӥгез маке ужа ке, дэмен юрттӥськозы, куно лыктэ ке, быдэс гуртэн шулдыръяськозы. Озьы-а, тазьы-а, но мон кыксэ ик гуртъёсме яратӥсько. Вордскем палъёсам бертон муг шеде ке - бурдъяськисько. Ӝоген Выль Казмас гуртысь клуб 60 ар тырмонзэ пусъёз, пинал дыр отын ортчемын бере, кызьы уд мыны.

Бызьытозям мон котькыӵе ужрадэ, общественной уже мыло-кыдо пыриськылӥ. Нимы быдэс ёрослы тодмо луэмын вал ни. Фамилиме воштыса, кӧня куректӥ, монэ тодӥсь уз луы ни шуыса. Юнме сюлмаськиськем, Моторинаен но монэ ӝог тодӥзы.

Вуж Казмас гуртын кема улыны ӧз кылды. Ёросысь кивалтӥсьёс, ӟеч ужамме синйылтыса, 3 ар пала доразы ӧтьыса улӥзы. Одӥг полаз, 1979-тӥ арын вал со, арлы отчёт сётоно, нош районын ужасьсы ӧвӧл. Монэ, отчётэн мынэм адямиез, ужаны кельтӥзы. Со ик Дэри черкогуртэ вуэме луиз. Ужаны кутски ёросысь гурт хозяйствоя управлениысь учётъя но отчётъя ёзын. Выль интыын быдэс ёрос понна кыл кутоно луиз. Со вакытэ ёросын 8 колхоз но 1 совхоз - «Шабердинский» - вал. Колхозъёсын кызьы но озьы огкыл шедьтылӥмы, нош совхозъёс соку отчётъёссэс келяллязы меӵак министерствое. Милям совхозмы котьку но бере кылисьёс радын ветлӥз, дыраз отчёт келямтэысьтыз. Гурт хозяйствоя министерствоысь специалистъёс шабердыосты адӟемпотостэм карылӥзы. Совхозэ аслым ветлоно луылӥз.

Лыдъяськон оркестр

- Тросэз малпало, бухгалтерлэн ужез мӧзмыт шуыса, нош мон пичиысен ик та ужлы синмаськемын. Конторае пырыкум, счётэн лыдъяськем куара крезьгуро оркестрлэн шудэмез кадь потылӥз. Пичи дыръям дышетӥсь луэме потэ вал ке но, улон сюрес монэ пыраклы лыдпусъёсын герӟаз. Ас поннам малпасько вал, калыкен ужаны котькудӥз быгатоз, со понна кылыд гинэ мед мыноз, нош татын - лыдпусъёс! Соос уг верасько ке но, адямиосты сямен яратоно, соку гинэ та удысын ужаны быгатод.

Та кылъёсы ас вылам ик вуизы: калык азьын вераськоно луиз. Гуртъёсысь специалистъёсты люкало ке, соослы ми семинаръёс, дышетсконъёс ортчытъямы, учётъя кылдэм юанъёссылы валэктонъёс сётылӥмы. Туж кышкасько вал калык азьын вераськонлэсь. Монэ бурдъяны быгатӥз управлениен кивалтӥсьмы Игорь Гараев. Туннэ, пе, эшшо но ӟечгес вераськид, озьы ӵуказе нуналлы оскон пыӵатылӥз. Солы луыса калык пӧлын но вераськыны, колхоз кузёосын огкыл шедьтыны но ӝоггес дыши.

Дэри черкогуртын ужаны кутскыкум, анаймы одӥг пол гинэ шуиз: «Кен, аслэсьтыд уждэ дорад эн нуллы ни, ява. Калык ужаку - ужа, адямиос шутэтскыку - шутэтскы». Ужме дорам ӧй нуллы ке но, уж монэ дорам но шедьтылӥз. Одӥг полаз мунчое пырыны дасяськисько но, дорамы пырись луиз. Бухгалтермы отчётэн лыктэм. Сое кылзоно ке, мунчое сӥялоз. Нырысь мунчое ӵошен ветлӥмы, собере отчётсэ эскери.

Ужан аръёсме тодам вайисько ке, куд-ог дыръя аслым ачим туж вашкала адями кадь потӥсько. Нырысь ик счётъёсын лыдъяськимы. Бӧрысь счётной машинаос потӥзы, соос рычаген ужазы, собере арифмометр кылдӥз, отӥяз со но выльдӥськиз. Клавишной луэмез бере талэсь ӟеч машина уз луы ни кожаськомы вал. Собере электроника вуиз. Тазэ милемлы сётӥзы ёросын тужгес усто ужаммы понна. Вань лыдпусъёсты машина лыдъяз ке но, солы осконмы пичи вал. Кӧня ке толэзьзэ отчётъёсмес 2 кузя лыдъяллямы: эше - машина сьӧрын, мон вӧзаз - счётэн. Берло ини компьютер вуиз, таизлы дышетскыны моӵе ӧз тырмы ни.

Югыт но пеймыт

- Улонэ мынам огыр-бугыр ортчиз, шумпотонэз но, куректонэз но адӟи. Мамамылэн ми2 нылъёсыз вал, мон пичиез. Секыт улонлы чидатэк, дыр, оло, ӵемысь висемысьтым, пичи дыръям монэ 3 пол мудор улэ кулыны шуыса тыриллям, нош мон луло кыли. Вазен гуртъёстӥ туно-пелёос ветлылӥзы. Огпол анаелы шуиллям: «Нылыд улӥсь ӧвӧл кадь. Улӥз ке но, шудтэм луоз». Куд-ог дыръя малпаськисько: шудо-а мон, шудтэм-а? Асме шудтэм шуэме уг поты, соку ик кырӟасько:

…Если скажут,
что я несчастливая,
Не поверю я, нет, никому…


Ас вакытаз сютэм но кынмыса кулонлэсь кылемын. Вазен ми, гуртысь пичиос но пӧламы одӥг бадӟым мурт, Ижевске вузаськыны ветлылӥмы. Гуртысь картошкаез бичаса, я бусыысь куроез, культое бинялтыса, дӧдьыен нуллӥмы. Вузаса поттэм уксёен нянь басьтылӥмы. Огпала 25 иськем мыноно. Одӥг полаз дӧдьыез кыскыны ӟигары быриз. Поезд переезд дорысен казмасъёс сюкасен ӝожонэн сюдӥллям. Катьяськи. Нош мукетъят бертыкум пыдысьтым кутэ пӧсьтӥз. Тяма гуртэ вуи но, юж вылын пал кут кылле, юри кин ке мыным дасям кожалод. Нош ик дорозям вуи.

Мон 2 пиме, 2 мамаме, 2 кузпалме ватӥ. Аслам анае 25 аресам кулӥз. Сое воштӥз кузпалылэн анаез - Ефимия Фёдоровна Моторина. Таиныз нэнэенымы 30 ар валче туж тупаса улӥмы. Улонам бадӟым сьӧд вишты кельтӥзы 1990-тӥ аръёс. Кузпалэным Иван Петрович Моторинэн ӵош кыкто пиос будэтӥмы, кыкназы ик Ижысь сельхозинститутэз йылпумъязы. 1990-тӥ арын январь толэзе малпамтэ шорысь одӥгез пимы улонысь кошкиз. Ӝыны ар но ӧз ортчы, кузпалме ватӥ. 1992-тӥ арын - солэсь анайзэ, 1995-тӥ арын - кыкетӥ пиме. Пиосы семья но кылдытыса вуизы вал, одӥгезлэн 2 нылъёсыз будо, мукетыз 5 толэзь гинэ кузпалэн улонэз адӟиз. Озьы мон голяк огнам кыли. Ӟеч адямиос юрттӥзы секыт зӥбет улысь потыны. 2 внучкаосы табере Москваысь институтъёсты йылпумъязы. Соос бордам уг уло ке но, асме трос нылпиё анаен шӧдӥсько. Ужатозям 4 бухгалтерез ужаны дышетӥ. Соос, пиналъёсы музэн, нуналлы 2 пол (ӵукна но ӝытазе) жингырто, кыӵе кӧлӥд яке нунал ӵоже мар ужад шуыса юаллясько.

Шуд - со сюрс пичи арбери выллем. Адями, улоназ маке уг тырмы ке, ассэ шудтэмен лыдъяны кутске. Нош шудо луон понна одно ик ваньмыз луыны но кулэ ӧвӧл, дыр. Тырмымтэ шудэз-бурез аслыз адямилы утчано. Секыт улонэз но кызьы ке капчиятыны луэ ук. Мон со тырмымтэ инӟыосты кылбур чуръёсысь, лэчыт веранъёсысь утчасько но дышетӥсько. Монэ тросэз эшъёсы юморен вордскем адями шуо. Тятяе выжые мынӥськем, лэся, солэн, пе, ымыз ӧз ворсаськылы: я кырӟалоз, я адямиосты серекъятоз вылэм.

Одӥг полаз «Ӟечбур!» газетын ужасьёсын ӵош Пичи Пурга ёросысь Аксакшур гуртын улӥсьёсын пумиськонэ ветлӥмы. Шуд сярысь вераськонме Анатолий Перевозчиковлэн кылбур чуръёсыныз кутски:

Югытэз но уно вал мынам
улонам,
Пеймытэз но тырмыт
та вордскем муосам,
Ог-огзэс вошъяло нуналъёс
но уйёс,
Азьпалан вӧлдӥсько я
югыт, я пеймыт сюресъёс.
Ӵукнатэк нокытын но
уг луы ӝыт-ӵук,
Кык валъёс кадь ветло
югыт но пеймыт…


Туж секыт вакытам та кылбур чуръёс мыным улыны кужым сётӥзы, улон борды кырмиськыны юрттӥзы. Нош со залын кылбур чуръёслэн авторзы пуке вылэм, шорам учкыса, со но синвуаськиз.

Тау, дуно калыке

- Оген улон ик монэ удмуртлыкен герӟаз. Туж бадӟым тау кареме потэ Мария Ишматовалы, соку ёросысь удмурт культурая огазеяськонэн кивалтӥз. Дэри черкогуртын удмуртъёслэн огазеяськонзы вань шуыса тодӥсько вал, нош ӧтьытэк мыныны ӧй дӥсьтылы. Одӥг пол Мария Дмитриевна жингыртӥз но шуэ, пукон ӝытамы казмасъёс, пе, лыктозы, оло, бордамы итӥськод. Пичи дырысьтым мамаослэсь пукон ӝытсэс тодам вайыса, мон но пӧрмытски. Удмурт дӥсьме дӥсяй, черсон, пӧлэстӥськон, керттӥськон киям кутӥ но клубе мынӥ.

Азьланяз но Мария Дмитриевна ӧтьылӥз. Ачим ик валатэк кыли удмуртлыке вуэмме. Отӥяз огазеяськонмы «Удмурт Кенешлэн» бурд улаз, пе, луоз, кивалтӥсьсэ но воштӥзы. Дэриысь удмурт арлыдоос нокинлы кулэ ӧйлась ни. Мария Дмитриевнамы милемыз люказ но шыпытак шуэ, али, пе, мӧйыослы клубъёс кылдытъяло. Асьмелы но усьтоно, эшъёслэсь, пинал дырлэсь медам мӧзме шуыса, клубмылы «Мӧзмон» ним сётыны ӵектӥз, нош монэ кивалтӥсь луод, шуиз. Пумитъяськыны ӧй дӥсьты. Озьы 2006-тӥ арысен та клубез нуисько. Та ныпъетлэсь куштӥськоно ни вал, дыр.

Ӟеч калыкъёс воргоронэн тодматӥзы вал. Борис Андреевич Кожевниковен ог-огмылы туж тупамы. Со уг юы вал. Юисьтэм муртэн керетыны но немарлы вылэм. Таиныз ми валче 19 ар улӥмы, со дыр 19 толэзь кадь ортчиз.

Та вие нош ик огнам кыли. Кытысь ке лыдӟи вал, оген улонэз, пе, чиданы быгатэ кужмоез гинэ. Мон нош асме буйгатӥсько, иське, ляб кышномурт ӧвӧл. Вӧзам коӵышпие будэ. Туж шыраны яратэ, мон доры лыктэ но нуныямме вите.

Дорын пукисько ке но, уже тачак. Мон дышемын вань ужме вазь ӵукнаысен мытыны, нуназелы эркын мед луом ни. Егит дыръям киужен трос выри, али выж лёгет гинэ керттӥсько на. Бумага котырын тросгес бергасько: сканвордъёс но йыртӥянъёс сэрттӥсько, лыдӟиськисько. Яратоно «Удмурт дунне» газетэз сӥсъяса потӥсько, вашкала улон сярысь гожъямъёсты бӧрдыса лыдӟисько. Кухняын берган сяменым радиоез кылзӥсько. Нуналлы быдэ 14 часын куазь сярысь иворез тетрадям гожтӥсько ӵуказе нуналэз тодон вылысь. Со мыным кулэ но ӧвӧл кадь, но мед луоз. Телевизор пыр иворъёсты учкисько.

2012-тӥ арын «Тау, дуно калыке» бичет поттӥ. Гожъяськон сярысь чик тодам но ӧй вал. «Ӟечбур!» газетын ужасьёс ик ӵектӥзы, тӥ сярысь, пе, газетъёсын трос гожъямын, оло, ваньзэ люкаса, нимаз книгаен поттоно, асьтэ сярысь кӧня ке гожтысалды на ке, эшшо умой луысал. Кема малпаськи, книгаез лыдӟись уз луы шуыса. Но 500 экземплярен печатлам книгае ӝог вузаськиз.

Кыӵе быдэстытэк кельтэм ужъёсы кылемын на?

Мынам туж потэ вал кыӵеке спектакльын шудэме. Егит дыръямы мыным котьку оскылӥзы суфлёр луыны, нош рольёсты мукетъёсызлы люкылӥзы. Одӥг аре Дэри черкогуртэ ветлыны кутскиз вал режиссёр Василий Ушаков. Спектакль бырйимы, рольёсты люкылӥмы, нош сцена вылын шудыны ӧз кылды. Коньдонэн шуг-секытъёс кылдэмен, режиссёр дорамы ӧз вуылы ни.

Мон трос калыкен улыны дышемын. Таӵе сям мамамы пыӵатӥз. Шуылоз вал, калыкен но сиисько-юисько, ёрмыса но уг улӥськы. 80 арес тырмонме пусъёнлы тапыр дасяськисько. Мылкыд вань дыръя малы уд шузияськы...

Источник:


Моторина Р. К. Буйгасьтэм сюлэм / Раиса Моторина ; вераськиз Валентина Емельянова // Удмурт дунне. – 2019. – 14 нояб. – С. 10, 15 : фот. – (Тӧр шорын)..

За предоставление материала выражаем огромную благодарность редакции газеты "Удмурт дунне"