Морякова Марина Исаковна
Выжы выжызэ медаз вунэты[править]
«Удмурт Кенеш» огазеяськонлэсь Ашальчи Оки нимо премизэ туэ басьтэмъёспӧлын – Кияса ёросысь Вуж Салья гуртысь Марина Морякова. Марина Исаковна культура удысын 40 арлэсь кема тыршиз. Шутэтскыны потыса но ялан калык пӧлын. 19 ар ӵоже ини гуртысьтызы «Нылкышно шуд» клубен кивалтэ. Ваньмон дыръяз гожъяське, ужъёсыз пӧртэм журнал-газетъёсын печатласько. Кылбуръёсын «Ненаглядная сторона» но «Сальяе – вордскем гуртэ» бичетъёсыз потэмын.
– Марина Исаковна, тӥ сярысь шуыны луэ: «Кытын вордскиз, отын яраз».
– Бен, нокытчы ӧй кошкылы – татын вордски, татын ик улӥсько. Бадӟым семьяын, 5 нылпи пӧлын, будӥ. Мон 3-тӥ нылпи луисько. Пичи дырысенымы ужаса но ранӟыса (курадӟыса) будӥм. Бай ӧм улэ. Одӥг гинэ вынмы вал, со 43 аресаз улонысь кошкиз. Бадӟымез Тоня апае но покчиез Оля сузэре Кияса черкогуртын уло. Рая апае асьме ёросысь ик Куӵос гуртэ быземын. Соос ми доры ӵем гинэ бертыло.
Покчи вакытэз тодэ ваёно ке, маиз но ӧй вал отын! Одӥгзэ вунонтэм учырез вераме потэ. Пӧсь гужем куазен нэнэ картофка пуд пӧлысь пунысюлэз ишкем. Ӝокыт шунды шорын со туж чаляк куасьмем. Шӧдтэк шорысь гурт вадьсы, кӧшкемыт гудыръяса но чилекъяса, сьӧд пилем лыктыны ӧдъяз. Ми, пичи нылпиос, со турынэз ӝогак гинэ утялтоно кариським. Эсьма, сыӵе йӧзор кисьтӥз, шокчыны ик омыр бырылӥз. Бадӟымесь йӧ пырыослэсь суйёсмы но пыдъёсмы пӧськы кадь куректыны кутскизы. Доре бертӥм но, 10 ведраем вышкыосты адӟыса, эшшо золгес абдрам – соос ваньзы йӧэн тырмиллям. Со кышкыт учырез тодэ вайыса, «Ум вунэтӥське» верос колӟай вал.
– Пичи дыръяды кин луэмды потэ вал?
– Туж потэ вал журналист луэме. 8-тӥ класс бере Можга педучилищее пырыны малпай. Экзаменъёсме умой сётӥ ке но, малы ке монэ отчы ӧз кутэ. Кӧты ӝож луыса, кема бӧрдӥ, доре кызьы бертом на шуыса, возьдаськи. Берен школае вамыштӥ. 10-тӥ классэз йылпумъяй но со сӥзьылэ ик Иже киномеханикъёсты дасянъя курсъёсы заочно дышетскыны пыри, отысь вылӥ категориен специалист луыса потӥ. Вуж Салья шор ёзо школаенымы кивалтӥсь Мартемьян Гурьев мыным нылпиосты визьноданы оскиз. Кельше вал мыным дышетӥсьлэн ужез. Улон кызьы кулэ озьы ас ӧраз кожытэ вылэм.
– Иське, шуддэс гуртысьтыды ик шедьтӥды?
– Мон пичиысен кепыраса будӥ. Эшъёсы пӧлын но асме кулэтэмен лыдъялляй, асме ачим ултӥяса улӥ. Нэнэелэсь малы монэ таӵе ямсыз (шӧтэм) вордӥд шуыса юалляме но вань. Нош со монэ буйгатылӥз: киосыд вань, пыдъёсыд интыязы, синъёсыд адӟо, мугорыд чебер. Ымнырыд но шуш ӧвӧл. Кепыраменым уг но бызьы шуисько вал, пиослэсь пегаса сямен ветлӥ. Нош асьме гуртысь ик Лёня мон борды, ужаны яратӥсько шуыса, байланӥз (тэбиниз).
1977-тӥ арын ми кузпалъяським. Лёня «Рассвет» колхозын ужаз. Кӧня ке дыр ортчыса, Коля пимы но Валя нылмы вордскизы. Но шӧдтэк шорысь кузпалы 28 аресаз шырвисёнэн черлаз. Пыд йылаз султоз на шуыса, эмчиослэн осконзы ик ӧй вал ни. Киясаысь сое Иже самолётэн нуизы. Сыӵе дыръя чидалод на-а, пе? Мон но сьӧразы куриськи. Лёня со вакытэ кулонэн артэ ветлэ вал. Но мон картме уен-нуналэн больницаын утялтыса вози, пыд йылаз султоз шуыса, бадӟым осконэн улӥ. Больницаын 3 уй кӧлӥ но нылпиосты эскерон понна – огезлы 4, мукетызлы 2 арес вал – сюрес вылэ потӥ. Ӝыт пал потыса, Киясаысен Вуж Сальяозь 25 иськемез пыр огнам пыдын бертӥ. Со вакытэ кионъёс алямын вал. Гуртэ вуытозь, пиньёсме куртчыса, вамышъяй. Со кышканэ али ке но весь тодам на. Сыӵе учыръёс пыр потыса, кыдано вылэм, кышкасьтэм но чидась луоно. Лёня йӧназ. Нош каллен-каллен улыны кутским. Отӥяз Саша пимы вордскиз на. Бӧрысь Лёня но киномеханике дышетскиз. Ӝытъёсы клубе мыным юрттыны потаз. Колхоз сое токаре но дышетскыны лэзьяз.
– Шӧдӥське, Лёняеныды тӥ туж умой улӥськоды, ог-огды шоры мусо гинэ вазиськылӥськоды.
– Кузпалын ведь быгатыса улыны кулэ. Кулэ дыръяз мон со шоры, пыриськыса сямен, Лёнчик шуыса вазиськылӥсько. Кин шуныт кылэз уз яраты? Соку Лёня бызьыса, ява, вань ужез быдэсъяны дась. Ма, со ноку тэк улонэз уг тоды, ялан мар ке но ужа. Пудо котыре но, бакчае но потэ, скал но ачиз кыске. Ми ай муш но вордӥськом, чечытэк ум улӥське. 100 гектар музъеммы вань, 2008-тӥ арын, музъем басьтыса, фермеръёс кариським. Ми отчы чабей кизиськом. Кин сомында музъемез гыроз-кизёз? Нош ик Лёняе. Пудолы но кӧня турын дасяно! Соин сэрен юртъер котырмы чисто техникаен согиськемын. Пичи гинэ вуко лэсьтӥм. Асьмеос ик отын пызь изӥськом. Ма, бон вукомы куаӵ-куаӵ ӧвӧл на, али катьяськиськом ай. Котькытчы уксё кулэ ук.
– Пиналъёсты кинъёс луизы?
– Егит дыръям дышетскыны ӧз кылды бере, ас поннам малпалляй: кӧт вылам ветло, но нылпиосылы ваньзылы ик вылӥ тодон-валан сёто, дышето. Озьы малпамме Инмар кылӥз, лэся, нылпиосы ваньзы дышетскизы, адямие потӥзы.
Бадӟымез Коля пимы Удмурт кун университетысь журналистика факультетэз йылпумъяз, мынэсьтым малпанме быдэстӥз. Собере программистэ дышетскиз на. Али ужбергатон удысын тырше, Ижын улэ. Валя нылмы, школазэ зарни медален йылпумъяса, тодон-валанзэ будэтӥз Ижысь медициная академиын. Со нылпи врач луиз. Валя но кыкетӥ профессия басьтӥз на, юристэ дышетскиз. Ижысь «Здоровье» центрен кивалтӥз, али дораз пиналын пуке. Саша пимы, школазэ азвесь медален йылпумъяса, вылӥ тодон-валан басьтӥз Удмурт кун университетысь юридической факультетын, али Москваын улэ. Милемыз шумпотто ини 3 нуныкаосмы. Пичи дырысенызы пиналъёсме пӧртэм ӵошатсконъёсы но конкурсъёсы пыриськылыны косылӥ, секытлэсь эн кышкалэ, шуылӥ. Вормонъёс басьтылэмзылы асьсэос ик шумпотылӥзы: Колямы «Артекын» шутэтскиз, Валя Анапае вуылӥз, нош Саша Ижысь «Усточикаре» ветлӥз.
– Улон воштӥськыса, гуртъёсын кино возьматъямысь дугдӥзы. Но тӥ культураысь ӧд кошке.
– Мӧйымыса ини дышетскыны пыри Ижысь культурая колледже. Арлыды шоры учкытэк, «5»-лы гинэ дышетски, режиссёрлэсь дипломзэ басьтӥ. Со вакытэ ик гуртысьтымы культура юртэнымы кивалтӥ. Концертъёс сяна, гуртоосынымы уно спектакльёс пуктылӥм. Мӧйыослэсь нылпиос но палэнэ ӧз кыльылэ, милемын ӵош сцена вылэ потазы. 17 ар ӵоже ини радъяськом «Салья базар» ужрадмес. Быдэс гуртэн отчы потӥськом, сьӧр гуртъёсысь егитъёс но, эсьмаса, куаныса ик ми пӧлы пырисько. Озьы ми вашкалаосмылэсь сям-йылолъёссэс нылпиосмылы пичиысен пыӵатыны тыршиськом.
– Тӥ гуртады «Нылкышно шуд» клубен но кема кивалтӥськоды ини.
– Ми арлыдо но егит семьяосын пумтэм «Шудо семья» вожвылъяськонэз ортчытъяськом. Одӥг праздникез но ум кельтӥське, тэк ум пукиське. Котькудзэ рос-прос, быдэс гуртэн, дышетӥсьёсын но нылпиосын ӵош лэсьтӥськом. Клубмы аламаен ваньзэ ик ужрадъёсмес школаын ортчытъяно луиськом. Гуртамы гинэ ум, ёросамы ортчылӥсь вожвылъяськонъёсы но мыло-кыдо пыриськиськом, отысь вормисьёс луыса бертӥськом. Дорамы тодмо адямиосты – тодосчиосты, артистъёсты, политикъёсты, писательёсты, журналистъёсты – ӧтчаськом. Ӟеч кусып возиськом «Удмурт нылкышно кенеш» огазеяськонэн. Семьялы сӥзем ужрадъёсамы соосты дорамы ӧтьыны тыршиськом. Асьсэос но милемыз кык пол «Табань» клубазы, Иже, ӧтчазы ини. Туж тунсыко потӥз со милемлы. Отчы вуылыса, кӧня эшъёс но тодмоос шедьтӥм ини. Алигес семьяос куспын ёрос ӵошатскон ортчытӥм. Таиз но синмаськымон но адӟем карымон пӧрмиз.
Кылем арын «Гуртовидение» ужрадмы но туж усто ортчиз. Отчы ми гуртысьтымы адӟем карымон семьяосты люкамы. Ми, арлыдоос, ёросын ортчылӥсь спортъя ӵошатсконъёсы но пыриськылӥськом. Отысь но вормыса, кубокъёсын бертылӥськом. Ӝытъёсы урам кузя скандинав амалъя, бодыосын, поръяськом. Дырмы луэ ке, гимнастика но лэсьтӥськом. Мыло-кыдо ветлӥськом «Бӧляк» калык ансамбле. Нырысь-валысь со «Тайвади» шуыса нимаськиз. Кивалтӥз соин гуртысьтымы шаплы нылкышно Аграфена Бубякина. Ачиз ик арганэн но шудӥз. Туж зол коллектив. Со быдэс Удмуртилы тодмо луиз. Табере коллективен быгатыса кивалтэ Антонида Наумова.
Калыкен одӥг кыл шедьтӥсько но ужаны быгатӥсько шуыса, алигес Кияса ёросысь «Удмурт Кенеш» огазеяськонэн кивалтӥсьмы Ольга Танаева монэ ёросысьтымы «Удмурт нылкышно кенешен» кивалтӥсе ӵектӥз.
Тамында ужез огнам бергатыны ӧй быгатысал, вӧзам оскымон эшъёсы ке ӧй луысалзы: Галина Фёдорова, Светлана Егорова, Алевтина Мизирева, Нина Трофимова, Елена Парфёнова, Светлана Фёдорова, Антонида Наумова, Зинаида Куликова.
– Журнал-газетъёс тӥляд матысь эшъёсты луо. Кемалась-а соосын эшъяськиськоды ни?
– 6-тӥ классын дышетскыкум, «Советской Удмуртия» газетлэн «Пинал куараос» бамаз гожъямъёсме лэзьяны кутски. Огез, кыкез печатласькизы – шумпотӥ, копак бурдъяськи. Гожъяськыны эшшо но зол мылкыды ӝутӥськиз. Собере кылбуръёсы каллен-каллен пӧрмыны шӧтазы. Отӥяз ини дӥсьтонэ тырмиз, лэся – «Кенеш» журналэ йыгаськи. Бӧрысь гожъямъёсы «Ӟечбур!» но ёросысьтымы «Знамя труда» газетъёсын печатласькизы. Гожъяськеме понна гонорар но, мар но мыным кулэ ӧвӧл, газет баме гинэ соос мед потозы, мылкыдме инмозь ӝутозы. «Удмурт дунне» газетлы 100 ар тырмон ужрадэ нош кыӵе шумпотыса мынӥ! Пыдъёсы музъемез ӧз ни шӧдэ. Газет пыр сомында эшъёс шедьтыны луэ вылэм.
– Тӥляд книгаосты но вань ини. Кин соосты поттыны юрттэ?
– Кытӥ-отӥ ӟуч кылын но гожъясько – 2003-тӥ арын «Ненаглядная сторона» книгае потӥз. Собере гуртысьтымы гожъясьёсын огинэ люкам кылбуръёсы – «На той земле, где начал жить». Отӥяз киям вуиз «Сальяе – вордскем гуртэ» кылбур бичетэ. Нырысетӥзэ книгаме поттыны юрттӥз районмы. Со герӟаськемын вал ёрослэн юбилееныз. Нош кылбур бичетме, гуртоосынымзэ но – ёрос библиотека. Куд-ог кылбуръёсыя крезьгурчиос кылдытъязы ини чебересь кырӟанъёс. Кылсярысь, «Салья гуртэ» кылбурлы крезьгур гожтӥз Алнаш ёросысь Шудья гуртысь Александр Малков. Мукетызлы – асьме ёросысь ик Атабай гуртысь Александр Кунгуров. Арлы быдэ удмурт кылын диктант но гожтӥсько, умой балл люкасько.
– Улонын мае тужгес но бадӟым шумпотонэн лыдъяськоды?
– Мон малпамъя нырысетӥ интыын семья но нылпиос луыны кулэ. Ӝӧк вылысьтымы ноку сяськаосмы уг бырыло – мыным соосты пиналъёсы ваё. Нылпиос понна мар уд лэсьты! Ижын вордскем кенэ монэ «золотая свекровка» шуэ.
– Моряков фамилиды нош кытысь потэмын? Со сярысь мар ке вераны быгатоды-а?
– Лёнялэн Степан нимо песятаез егит дыръяз ик гуртамы адӟем карымон вылэм. Ӝужыт мугоро, тусын-буйын чылкыт но чебер, пе, вал. Армиын 7 ар моряк луыса служить карем. Со бордысен солы Моряк кушем ним понӥллям. Собере фамилизэс но Моряков гожтӥллям. Нылмы, вашкала выжымы медаз быры шуыса, пиезлы песятаезлэсь Степан нимзэ понӥз. Выжы выжызэ медаз вунэты.
Источник:
За предоставление материала выражаем огромную благодарность редакции газеты "Удмурт дунне"
