Морозов Василий Николаевич
Тушо суредась но мыддорин Золушка[править]
Ку мон нырысетӥ кылбурме пӧрай?! Уг янгышаськы ке, «Шундыкар» лагерьын, суредасьёслэн чиль-сьӧд тушо дышетӥсьсы Василий Николаевич Морозов шоры учкыса. Мон гинэ ӧвӧл, лагере вуэм егит гожъясьёс ваньзы яратылӥзы та суредасьлы кӧня ке ке но чурзэс сӥзьыны. Ми ӵукна пиньмес сузяськом ай, нош суредасьёс дышетӥсенызы лать гинэ кытчы ке вамышто ни. Эшшо ке киязы мольбертъёсын, буёлъёсын. Озьы нош ик пӧрме вал кылбур.
Василий Морозов – Удмуртиысь художникъёслэн огазеяськонзылэн ёзчиез, Шаерысьтымы пинал усточиослэн школа-интернатысьтызы, озьы ик арысь аре радъяськись «Шундыкар» лагерьысь суредаськыны дышетӥсь. Со сяна, В. Морозов - художникъёс пӧлысь палех амалъя тужгес но яркытэз суредась.
Василий Николаевичен мон пумиськи Ижевскысь «Восточный» нимаськись посёлокын интыяськем улон юртаз. Шонерзэ верало: мынам таӵе тузӥ коркаез адӟеме ӧй вал на. Горд кирпичлэсь, уно пӧртэм сэрего, питыр-котыр липето. Кыдёкысен учкыса, зэмзэ но, выль черк ӝутӥллям, кожалод. Василий Николаевич пумитам мыньпотэ: пушказ пичи ужъёсыз тырмыт на, улӥськом ай, пе, вӧзаз сылӥсь пу коркаямы. Ма, такем бадӟым «гурезез» берыктыса, сыӵе чыры-пыры ужъёсты санэ басьтод на шат, паймемме ӧй ваты мон. Вамыштӥм пу юртазы. Василий Николаевич соку ик ӝажыосысьтыз суредам мудоръёссэ поттӥз.
- «Пӧрам» ужъёсме адӟемды потэ, дыр, озьы-а?! - мудоръёссэ киям сётыса мыньпотӥз тушо суредась. – Соосты огшоры пу вылэ уд суреда, кулэ мульыпу, со уго туж юн маке. Нырысь сое «сусальной зарни» нимаськись бумагаен шобыртӥсько, собере буёлъёс дасясько - курегпузлэсь ӵужзэ, озьы ик уксусэз, темпер буёлэз уже кутыса. Вуоно мудорлэсь суредзэ нырысь огшоры бумага вылэ пыр-поч суредасько. Собере ини сое дасям пу вылэ шуккисько.
- Ой, кызьы-о ваньзэ синды суреданы адӟе, отын ик бадӟым арбериос но, вӧзаз ик чиньы йыл быдӟаез гинэ но вань, - паймисько мон, мудорез киыным маялляса.
- Тӥни адӟиськод-а, татын Василий Блаженныйлэн тусбуйыз-мугорыз, нош кытын ке кыдёкын тӥни пичиесь гинэ гурезьёс. Синъёстэ эшшо золты ай – вераны быгатод-а, маин висъяське мудор огшоры суредлэсь?
- Ма, татын арбериос мукет сяменгес адско кадь. Тани сюрес – со огшоры суредын инвис пала сюбегаса мынэ, нош татын – паськытаса, - дышетӥсе шоры кадь суредась шоры учкисько.
- Шонер синйылтӥд. Мудорез суредаку санэ басьтӥське «мыддорин перспектива» нимаськись амал. Мае возьматэ со? Мудорысь вань арбериос, шуом, ӝӧклэн пумыз яке шур азьлане паськытаса кошко. Адӟылӥд, луоз, мудоръёсын куддыр Иисуслэн ымныр тусыз, киосыз но кызьы ке мукет сямен адско. Кыӵе муген озьы лэсьтӥське? Черке пырем адями котырысьтыз мудоръёсты адӟыса мед шӧдоз соослэсь дун чылкыт лулкужымзэс. Сыӵе шӧдон мед кылдоз – вань та мудорын суредам мученикъёс васькизы кадь музъем вылэ, черке вуэм адями котыре, солы маин ке юрттыны, улоназ шонер сюрес возьматыны. Со адями пичи, сьӧлыко, нош мудоръёсын суредамъёс бадӟымесь, быдӟымесь но чылкытэсь. Асьсэлэн чылкытэнызы ик соос кужмоесь. Мудоръёсын номыр мултэсэз луыны кулэ ӧвӧл. Инкуазь суредъёс но, арбериосты чеберъянъёс но татын медаз луэ. Мудор кильтро луыны кулэ ӧвӧл, ваньмыз интыяз но тырмыт мед луоз. Мон та куронъёсты санэ басьтӥсько. Та амал мыным матынгес. Тазьы ик суредаськизы вашкала Византиысь мудор суредасьёс но.
- Нош куд-ог черкъёсы пыриськод но, таӵе амалэн суредам мудоръёсты уд адӟиськы ук. Соос огшоры суред кадь борддоръёсы ошылэмын. Маин со герӟаськемын?
- Зэм, туала черкъёс таӵе амалэн суредамъёссэ санэ уг басьто. Тросэз малпало: мудоръёсын вань арбериос но тусбуйёс улонын кадь зэмос но огшоры суредамын ке, калыклы валамонгес но матын. Кылсярысь, асьмелэн Николай Владыкомылы сюлэмызъя суред выллем кылдытэм мудоръёс. Тани Москваын но Христос утисьлэн черказ XIX-тӥ даурын кылдытэм вань мудоръёсты выльдӥзы, тупатъязы академической амалъя.
Быдэс дунне синмаськыса учке, шуом, Возрождение вакытысь суредасьёлэн Леонардо да Винчилэн яке Микеланджелолэн ужъёссы шоры. Зэм, соос чебересь. Но отын нырысетӥ интые потэ адямилэн вылтус чеберез: мугорыз-а со, ымныр тусыз-а, учкемез-а. Мудоръёслы со уг тупа. Отын уго нырысь ик луыны кулэ лулдуннелэн чеберез. Та ласянь тужгес но кужмоесь «вазь христианство» вакытысь мудоръёс. Макем валаса быръемын отын буёлъёс! Макем соос адямилы дунчылкыт мылкыд кылдытыны быгато! Со вакытысь адямиос черке кӧня ке кышкасагес но вамыштылӥзы, тани-тани со мудоръёс сьӧлыкъёссы понна соослэсь кылзэс юалозы кадь. Флоренский философ пусъе: мудоръёсты суреданъя искусство куашказ соку, куке кылдӥз итальян живопись. Озьы ни-а, мар-а со…
- Озьыен, мудоръёс шоры но пӧртэм синмын учкисьёс вань. Нош черкъёс кызьы та югдур шоры учко?
- Зэм, котькуд батюшкалэн аслаз учконэз, аслаз малпанъёсыз. Тани асьме шаерысьтымы черкъёсын ӵемгес пумиськыло яркыт, чебер суредам мудоръёс. Кыдёке ветлонэз ӧвӧл – пыре ай Александро-Невской черке, отысь борддоръёсын сомында яркыт но чылкыт быдэстэм мудоръёс. Отысь батюшкоос малпало, вылды, мудоръёс таӵеесь ик луыны кулэ шуыса. Верасько ук, котькудӥзлэн аслаз валанэз. Нош мыным матынгес мудоръёсты вуж школая суредан. Соос вылысь тусбуйёс – со огшоры адямиослэн ӧвӧл ук, со мученикъёс, котырысь адямиослэн шудзы понна курадӟемъёс но дунчылкыт луэмъёс ук.
- Мудоръёсты суреданы дышетскем но кулэ, дыр. Та ласянь тодон-валанъёстэс нуналлы быдэ будэтыны тыршиськоды, луоз.
- Мынам тани таӵе дуно книгае вань ( Василий Николаевич поттэ альбомлы укшась бадӟым книгазэ – авт.). Кызьы крезьгурчилы дуно нотаосын книгаез, мыным но со сыӵе ик воштонтэм. Отысь суредъёсты, соос мудоръёслы инъет луыны быгато шуыса юнматӥллям вылэм ай Санкт-Петербургын 1899-тӥ арын. Татын ваньмыз тыро-пыдо валэктэмын, шуом, кыӵе арбериосты-тусбуйёсты, пужыосты мудор вылэ суреданы луоз, Благовещениез адӟытыку. Озьы ик татысь шедьтыны луоз, кылсярысь, Иисуслэн кыӵе вал ымнырыз егит дыръяз, собере кӧня ке ар ортчыса. Солэн та куке но суредам тусыз Византия вакытысь даурысь дауре кылемын, соин ик со зэмосгес. Мон но тыршисько мудоръёсам утисьлэсь таӵе ымныр туссэ утьыса суреданы. Мед шӧдӥськоз солэн мылкыдыз, мед адӟиськоз адямиос понна сюлэм висемез. Та самой секытэз, дыр, мынам удысам. Соин сэрен трос лыдӟиськоно луэ на. Тӥни кӧня книгаосы, соосты кык пол но, куинь пол но синъёсын сӥсъяно луэ. 70 ар ведь асьмеос мудоръёстэк улӥм. Соосты сутӥзы, черкъёсты куашкатӥзы. Сомында дыр ӵоже мудор суредасьёс ышыны но быгатысалзы. Но Инмар ӧз сёты, утиз буёл лэсьтонэз, мудор суреданэз но. Капчиен уг сётӥськы та уж: пу утчан бордысен кутскыса, сое кызь пол лакен шобыртытозь. Даурысь дауре мед ветлозы соос.
- Кӧня дырез «чидалозы» суредам мудоръёсты?
- Мон оскытӥсько, соос корка пушкын, кӧс интыын сылӥзы ке, сюрс арез но пырпотозы. Мульыпу со туж юн маке уго. Бырйисько тужгес но вольытсэ, чурытсэ. Мыным вуж мудоръёсты но тупатъяны вайыло. Отысь шекъёссэ адӟыса, ас ужад тыршиськод ни соосты палэнтыны.
- Быгатэ-а мудор суредась аслэсьтыз малпам суредъёссэ но ужаз пыртыны?
- Зэм, пичи арбериоссэ вошъяны, ачимъя карыны быгатӥсько ик. Аслам лыдӟемъёсы вылэ пыкиськыса, мукетгес карисько, шуом, валтӥсь тусбуй бӧрсьын мынӥсь арбериосты: гурезез, турын-куарез, инбамез. Но лулкужым сётӥсь мылкыдыз мудорын номырин воштонтэм. Сое суреданы пуксиськод – тодӥськод ни кадь, кызьы ваньзэ радъяса но маиз ке уг тырмы кадь. Озьы тӥни нуналъёсын-нуналъёсын со малпанъёстэ азинтӥськод, пӧртэм школаосын-амалъёсын тодматскиськод. Озьы гинэ маке со пӧрмытыны луоно. Вылаз ик, заказ сётӥсьлэсь но мылкыдзэ санэ басьтыны кулэ. Берлозэ тани Владимирской мудор суредай.
- Ӵем уд пумита палех амалъя суредаськисез…
- Бен, мон дышетски Иваново улосысь Палех училищеын. Азьвыл со Россиысь мудоръёсты суреданъя центр вал. Кытысь таӵе кыл потэмын? Вашкала дауръёсы, та музъем вылэ монголо-татаръёс вуэм бере, отысь мудор суредасьёс нюлэскы пегӟиллям. Отысь нюлэсэз сутоно (ӟуч кылыны вераса – «палить») луиллям но мудор суреданъя мастерскойёс выльысь усьтӥллям. Со туж тунсыко инты. Нырысь со сярысь мон тодӥ Дэри ёросысь Казмас школаын 7-тӥ классын дышетскыкум. Кыӵе ке шедьтэм мудорысь учкыса копиязэ лэсьтӥськем (али ке но уг валаськы, ма муген, сюлэм косэмъя-а, мар-а). Анае соку ик шуиз: «Тон суредась луод!» Собере ини мон тодӥ, Иваново улосын сыӵе-таӵе училище вань шуыса. Школа бере Ижевскысь огаз художественной школаын дышетски, татын монэ буёлъёсты валаны дышетӥз суредась Чистяков. Собере мон Палехе шонтӥ. Молдавиысь, Москваысь адямиос вить-куать ар ӵоже Палехе пырыны туртто шуыса тодыса но, мылкыды ӧз юскиськы. Арнялы вазьгес вуи но нюлэскытӥ, возь вылъёстӥ суредаськыса ветлӥ, киме «вӧлӥ». Экзамен сётонъя комиссиысь огез дышетӥсь вань абитуриентъёслы суредъёсме адӟытӥз но шуиз: «Тани кызьы суредаськыны кулэ!» Озьы тӥни мон Палехе пыри.
- Шаерысьтымы пинал усточиослэн школа-интернатазы ветлӥсь, озьы ик «Шундыкар» лагерьысь пиналъёстэс кыӵе школая дышетӥськоды?
- «Шундыкар» сярысь ке верано, кык арня ӵоже нылпиез суредаськыны уд дышеты. Соиз валамон. Но татын тужгес но кулэез – быгатонлыкъёсыз ласянь пиналлы оскон пыӵатон. Мед оскоз со созэ но, тазэ но вормыны быгатоз шуыса. Удмурт нылпилы со туж кулэ маке. Смена ӵоже мон соослы мае но сое валэктӥсько, но быръем ужзэ налпи азьланьтэ ни гуртаз, ачиз кыстӥське выльзэ тодыны, быгатонлыкъёссэ эшшо но лэчытгес вӧлыны. Со сяна, со – удмурт пиналъёс, соос борды город цивилизация ӧз йӧтскы на. Тӥни кытын зэмос этнофутуризм вордскыны быгатэ.
Тодам вайисько туэ радъям «Шундыкарын» луэм серемес учырез. Пиналъёслы ог ӝытэ, ӝомал усемын вал ни, Кӧшкеман нунал ортчытыны малпам. Вожатойёс пӧлысь кин ке гу гудыса, тӧдьы дисен дӥсяськыса отчы выдӥз, монэ кыз борды думизы: вӧзтӥд пиналъёс ортчизы ке, кӧшкематы, пе. Дас минут но ортчиз ни, ӝыны час но, нылпиос монэ уг ик адӟо. Нош чибиньёс неномыртэм куртчылӥсько. Пиналъёс озьы ик монэ ӧз синйылтэ, быдэс нюлэс тыр кесяськоно луиз: «Мон татын, уте монэ!» Тӥни сыӵе учыр.
Дышетон уж вылэ ке выжоно, пинал усточиослэн школа-интернатазы дышетскисьёс муресьгес тодон-валан басьто ини. Москваысь Художествоосъя Академилэн дэмламезъя нимысьтыз программая ужаськом. Гипсэн но выриськом, академической суред но лэсьтӥськом, пуэн но выриськом. Ваньзэ ас выламы чакласьком. Котьма ке но огъя школа луыны кулэ. Соинтэк-а Китай, Америка кадь азьмынӥсь кунъёс бадӟым саклык висъяны кутскизы ни Россиысь академической школалы. Тани басьтом кылем даурлэн кутсконаз кылдэм авангард течениез. Та амалъя суредасьёс ваньзы академической школа пыр потэмын. Котькыӵе амалъя суредаськы но дышетскемедлэн инъетэз тып-тып луыны кулэ. Тани асьме шаерысьтымы но Чернышев, Орлов, Чувашов суредасьёс асьсэды авангардъёс шуо. Но со озьы ӧвӧл, соослэн кадь суредъёс кемалась кылдытэмын вал ини, со выль ӧвӧл ни.
- Берло вакытэ туж паськытаз этнофутуризмъя движение. Кызьы учкиськоды со шоры?
- Тодам соку ик лыкто таӵе шӧмъем ужрадъёсы пыриськись адямилэн Макс Верёвкинлэн кылъёсыз. Мон, пе, кылисько но, гольык кариськыса, кыз йылэ тубо – удмуртъёс, пе, сыӵе возьдаськисесь ук. Мон понна, шонерзэ вераса, таӵе дауртонъёс валантэмгес. Озьы со вань удмуртъёсты ултӥя ук. Искусство шат со? Мон тае уггес валаськы. Малпасько, культурамы сокем огшоры но малпаськытӥсьтэм луыны кулэ ӧвӧл. Мон отысь номыр чеберзэ но дунозэ уг адӟиськы.
- Чидатэк витисько: ку меда куинь батыръёсты – пиосты сярысь пал кыл ке но вералоды ни?
- Бен, кузпалы Наталья Михайловна кузьмаз мыным куинь пи. Соос сярысь малпаса ик корка ӝутон борды басьтӥськи. Куке но семьяё луозы, пуктэм юртмы соослы ӵапак луоз. Котькуд семьялы нимаз пырон ӧс, нош улозы одӥг липет улын.
- Пиосты но килы мынӥсесь бере, мумыкорзэ дэмен ӝутӥды, дыр?
- Пуктыны кутскыкум, пичиесь вал ай, но ма но ӧз дауртэ – атайлы, пе, юрттом. Одӥгез вуоно коркалэсь макетсэ бумагалэсь лэсьтэ, кыкетӥез пулэсь маке вӧлэ, куинетӥез коркалэсь вылтуссэ суреда. Табере соос бадӟымесь ни, вань ужез ӵошен быдэстӥськом. Кӧня кирпич ӝутказы ни соос. Тӥр возьыны куиньназы быгато ни, корка пушкысь ужъёсты курадӟытэк быдэстом ни. Ваньзы суредаськыны ярато, ӵукна синзэс кесьыса вуо-а, уг-а, ӝӧк сьӧры пуксьыса ӵуш-паш суредаськыны кутско ни.
- Кузпалды тӥляд туж кельышлы. Кызьы веськрес мугоро, мертчан йырсиё Натӥлэсь сюлэмзэ ас палады берыктыны пӧрмытӥды?
- Кызьы кузпалы шуэ: мон, пе, Золушка, но мыддорин. Со Ижевскын будэм нылаш, улэмын Пушкинской ульчаысь вӧл-вӧл квартираын. Макем солы секытэн сётскиз частной секторысь пу коркае улыны выжон. Ву пыртэмын ӧй вал, сюресъёс уродэсь. Эшшо ке корка ӝутыны малпаським. Вылаз ик, мон – суредась, капчи ик ӧвӧл солэн кузпалыз луыны. Учконо ке, ми кыкнамы ик туж пӧртэмесь кадь. Со – тӧдьы, мон – сьӧд, со –ӟуч, мон – удмурт, мугоры тани мынам кӧйгес, со –ӟызы, мон гуртын вордскем пияш, нош Наташа – городын.
Кышнояськыны мон уг дыртӥськы вал. Малпай, таӵе вамыш лэсьтыны котьку вуо. Песянае ёртылӥз: ма, тыныд, пе, 29 ар шуккиз ини, ку-о кузпалъяськод ни. Нош мынам йырам этюдъёс, адӟытонъёс, суредъёс… Ужасько ни вал Шаерысьтымы пинал усточиослэн школа-интернатазы, вуиз ми доры туж чебер нылаш. Нимыз Наташа, пе. Озьы тӥни нунал бӧрсьы нунал кусыпъёсмы но юнмазы.
- Мольберт сьӧрын сылыса акыльтэ но, дыр, кызьы шутэтскон дырдэс радъяськоды?
- Туж яратӥсько спортэз. Куасэн бызьылон мылкыд ай студент вакытысь кылемын. Кӧня пол меда куасэн бызьылонъя ӵошатсконъёсын Иваново улослэсь данзэ утьылӥ. Спортъя мастере кандидат нимын Удмуртие берытски. Спортэз гажаны дышетӥ пиосме но. Семьяен ӵош ӵем потаськом великен ворттылыны, пыдын яке куасэн бызьылыны.
- Сокем огшоры юанэлы вождэс эн вае но, тӥ понна ма со яратон?
- Туж мур кыл ведь та. Нырысь ик Инмарез яратыны кулэ, дыр, солэсь дас куронъёссэ быдэсъяно. Озьы Инмар но тонэ яратоз. Собере семьяез, нылпиосты. Ужедлы но сюлэмдэ сётытэк номыр ӟечсэ уд пӧрмыты. Яратӥсько дышетскисьёсме, соослэн ваньмыз ӟеч ке, макем мынам мылкыды ӝутске. Улон – со туж чебер маке. Сое яратыны кулэ.
Источник:
Морозов В. Н. Тушо суредась но мыддорин Золушка / В. Н. Морозов ; Елена Никитина // Удмурт дунне. - 2005. - 29 апр. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
