Меняйло Валентина Михайловна
Кӧттырымон ӧй шуды на…[править]
Ӵапак та нуналъёсы… уно аръёс талэсь азьло Глазов ёросысь Порпи гуртын Трефиловъёслэн семьяязы вордскиз Валентина нылзы. Зэм, соку нокин ӧз тоды ай, та нылаш Удмуртиысь калык артистка луоз шуыса. Нош чебер куараен кырӟамез, школаын, концертъёсын валтӥсь луэмез сое мукетъёсызлэсь висъязы ни.
1964-тӥ арын со Ленинградысь Римский-Корсаков нимо крезьгуро училищее дышетскыны пыре но, сое йылпумъяса, весяк Удмурт театрын ужа. Та дырозь сюлэсь ятыр спектакльёсын шудэмын, вунонтэм, аслыз гинэ тупась образъёс кылдытэмын. Туж тодмо луиз Валентина Загуляеваен валче кырӟамзы но.
Кин гинэ уг тоды Валентина Михайловна Меняйлоез, ваньмыз пусъё солэсь туж лякыт, ӟеч, каньыл сямзэ. Театрын со уно аръёс ӵоже профсоюзэн кивалтӥз, тросэзлы сюлмаськись анай интые луиз. Ачиз но кык пиоссэ будэтӥз.
- Артист луон – мар со тӥ понна?
- Весь дышетскон, мае ке усьтон, ас пушкысьтыд, ас пуштросысьтыд тодымтэзэ кыре поттон. Собере ини паймиськод: осто, мон ик-а та, ачим ик-а тазьы пӧрмытӥсько?
- Ачид кадьзэ шудыны капчигес-а?
- Мыным лирической героиняос тупалогес. Тани Харитина туж кельше вал – «Эн ыбылэ тӧдьы юсьёсыз» спектакльысь. Со музъем вылысь адями, но пурысь улон пушкы выемын ӧвӧл. Чеберез валаса, чылкыт, вылӥ малпанъёсын улӥсь. Ас ёросазы юсьёсты вае - мед, пе, улозы. Толыктэм картсэ утьыны выре…
- Роль бордын ужаку, ӵем-а астэ тӥяно-куасано луэ?
- Луылэ ик. Тани Настя Сорокина борды – «Жингрес сӥзьылысь» – кӧберасагес кутски вал. Нина Петровна Бакишева бӧрсьы, ой-ой, кызьы ай астэ пуктыны быгатод? Тырши ни возьытлыкме но вунэтыны.
Та ласянь выжыкылъёсын шудыны капчигес. Ымнырад маска, грим – даурты, кызьы мылыд потэ. Режиссёрлэн мылкыдызъя гинэ мед тупалод. Татын но эсэпсэ валаны кулэ: пиналъёс гож сьӧры ортчемез соку ик шӧдо.
- Луылӥз-а озьы: мар уг тырмы улонын, быдэсме сцена вылын?
- Озьыгес луэ. Улонамы весь маке уг тырмы ук. Но астэ кутыса, чакласа возёно луэ. Сцена вылын аслыд, ас фантазиедлы эрик сётӥськод. Синъёс мальдо, выжыкылын кадь. Тани «Эн кушты монэ, туганэ» спектакльын мон Купанча, яратонэн палёмемын.
- Тылсиосын пыӵан но пиштон понна партнёред кельшыны кулэ, озьы-а?
- Озьы. Сотэк кызьы мылкыддэ усьтод? Та роле бордын ужакум, партнёре мусо потэ вал ни…
- Кузпалды сэре уг вожа-а?
- Егитгес дыръямы шӧдскылӥз. Спектакль учкемез бере шуэ: «Ты не так разговариваешь…» Ма, кызьы, шуисько, вераськом на? Артистлы, кулэ ке, бӧксоно но, нурскетоно но луылэ.
- Тӥляд фамилиды мудрон. Кузпалды кудпалась?
- Украинаысь, Полтава палась. Кызьы тодматским? Двоюродной братэ армиын дыръяз фотоме возьматэм но – таиз ёртэм: тодматы но тодматы. 7-тӥ ноябрьлы Ленинградэ шуак-дуак вуизы.
- Зол синмаськиды-а?
- Ма, мон сое вунэтӥ вал, нош со вунэтымтэ. Тулыс ини, двоюродной братэным гуртэ мыныса, анайме самолётэн Ленинградэ вайиз. Анае одӥг арня дорам улӥз, собере поездэн гуртэ келямы. Ми ӵошен 1-тӥ майлы мынӥм Полтавае. Таяз учыре но юатэк-вератэк билет басьтыны вуэм.
Мон зол ваменскылӥ. Огпол Дэбесын гастрольын дыръя жингыртэ: Новосибирскысь военной училищее преподавателе соглаш луэмме али ик, пе, верано. Мон пумит луи. Кытчы Удмурт театрме кельтом?
- Тапала кыскыны быгатӥллямды ик Сергей Павловичез…
- Ижын солы яраз, татын улэмез потӥз. Нырысь гарнизонын, собере ДоСААФ-ын ужаз, инструктор луыса. Али пенсиын ини.
- Сочиненияды тӥ куке гожтӥллямды: луоды артистка, бызёды офицерлы, вордскозы кык пиосы…
- Зэм, 8-тӥ классысен-а, мар-а… Эшшо уйвӧт адӟи вал ай: туж шулдыр куазен, лыз инмысь украин кырӟан кисьтӥське, мон кыӵе ке пиосмуртэн (оло, Инмарен) со кырӟан пала вамышъясько. Оскисько: вань ик сыӵе Вылӥ визь, со шӧдытэ, возьматэ азьпал сюресмес.
- Иське, кин луысалды?
- Врач ке – вирлэсь кышкасько вал. Немец кыллы дышетӥсь луысал, дыр, но со аре та специальносте ӧз кутэ.
- Егит дыр – тужгес шудо вакыт. Нош театрын?
- 1980-тӥ аръёс но, соберегес но… Та аръёсы тужгес адскымон рольёсы вал (куд-огзэ верай ни): Аннушка – «Дуринчи кар», Поликсена – «Зэмлык умой, но шуд дуногес», Гуӵин кенак – «Тонэ кожай вал юг дыдык», Жага – «Кезьыт ошмес», Лидия Николаевна – «Инвожо уйшоре но пиштэ», Зара – «Пинал мылкыд – юмал йӧлпыд», Васильна – «Бызьыны вуэм песяйёс», Оки – «Яратон уг пересьмы» спектакльёсысь.
Котькуд роль – улонэлэн оглюкетэз, ас буёлэныз ворекъятэ, лулпушез узырмытэ. Тани «Гуртысь маскарчиосыз» басьтом. Ася, героиняе, пересь писателен улоно луэ, пиналыз вань. Егит пиез туж яратэ ке но, со пала уг кариськы: ас чылкытлыктэ, дандэ утёнэз вылӥегес пуктэ. Ассэ малпатэк, мукетызлы шуд сётыны тырше, но ас понназ курадӟе, пересь пиосмуртэн герӟаськиз шуыса.
- «Асьсэдыз вунэтӥсь» героиняос сямдыя тӥледлы матынгес. Улонын но озьы уг лу-а? Одӥг ролез ик ӵош дасяськоды, но кин ке одӥгез шудэ. Сыӵе дыръя кӧт ӝож-а?
- Ӝож коть ӧвӧл – кинэ быръёз ведь режиссёр. «Йыромем туриын» озьы: туж потэ вал Нинаез шудэме. Кузпалыз весь юэмен, со жадиз, кошкиз мукетыз доры, но картсэ яратэмысь ӧз дугды… Тазьы учконо ке, сцена вылын кӧттырымон шудыса ӧй вутты. Луысал на ке, та рольёсме ик мукет сямен, мукет синмын шудысал ни. Жаль, асьмелэн удмурт нылкышноез котыр ласянь йӧн-йӧн возьматӥсь пьесаос уг тырмо, ӧвӧл режиссёр но.
- Кыӵе партнёрен шудыны капчигес вал?
- Сергей Марковен. Кылсярысь, «Дуринчи карын». Туж жаль, та артистэз ыштӥм. Сцена вылын со улонын кадь вал. Геройзэ пушласянь югдытыны быгатылӥз. Борис Безумов но, шуом, Исьток… Соин артэ вунэтӥськод сцена вылын шуыса. Юморист, импровизатор, шудыкуз но шоккетыны вуэ. Шуак мар ке «не так» лэсьтоз вал – коть отчыяд ик усь. Ярам, шуге-леке сюрыса уд вуттӥськы – ачиз ик поттэ. Тани мон, Насьток, дэремме воштӥсько (учкисьлы адӟонтэм). Нош Исьток кутэ но возъетэз палэнтэ. Амалтэк зэмос сцена пӧрме.
- Удмурт театрлэн ӟуч кылын спектаклез, артистлэн синмыныз учкыса, кыӵе со?
- Ас кылыныд ке – шоканы ик капчи, эркын. «Сяськаосын сыръя тулыс возьвыл…» нёжтыку сямен, пӧлаз сылмиськод. Нош ӟуч кылын шудыку – мар ке пушкы ӝиптэм кадь. Уката ик кылъёсыз, берыктэмез кӧтъя-сюлэмъя ӧвӧл ке. Пумитъяськон мылкыд кылдэ, эркынак шудыны уд быгатӥськы ни. Таӵе дыръя маке аслэсьтыд дэмласькод. Ӵемысь юрттэ кырӟан – со небӟытэ, яркытгес каре шудоно сценаосыз. «Пинал мылкыд – юмал йӧлпыд» комедиын ас палысьтымы кылъёстэм кырӟанъёсты пыртылӥ вал.
Огъя вераса, ӟуч кылэ берыктэм уж – со чылкак мукет спктакль. Мурт шӧмъем, шуыны луоз.
- Глазовын дышетскыса, кызьы ӧд ӟучоме?
- Удмурт театре шеди ук! Зэм, мон школаын удмурт кылэз ӧй дышеты. Семьяямы удмурт сямен вераським, нош гуртамы ӟучъёс но, бигеръёс но вал. Порпи гуртмы Глазкарлы вить иськемын гинэ (али татын сад-бакчаос ни, но коркамы сылэ на). Тодӥсько на: одӥг ар Роза Ивановна Яшина дышетӥз. Ӟуч кылъя огаз урокын юаз но – мукетаз ӧй дасяськы ни. Бадӟым «2» пуктӥз, шуиз: «Гыдыке-мусое, уроклы котькуд нунал дасяськоно». Озьы дышетӥз но – визьмаськи, трос пукылӥ лыдӟиськыса-гожъяськыса. Ветлӥ хоре, лекторие.
Гужем ми, нылъёс, концертэн шулдыртылӥм котырысь гуртъёсты. Ужан сяменымы но – ю кутсаськом-а, тӧлӥськиськом-а, мешокъёсты ӝоктӥськом-а – кырӟаны куарамес ӧм жалялэ. Кыӵе дыръёс вал со! Сепыч но Сыга шуръёс, Чупчи дурын турнан… Анаелэсь ӧй кыльылы.
- Анай-атайды кырӟасесь вал-а?
- Атае кырӟаны яратэ вал, плотникын ужаз. Анае – рядовойын. «Мӧпӧй», «тять» шуыса вазиськиськом вал соослы. Тятяе секыт улонэз адӟиз. Война бере, фронтысь бертыса, кӧня ке ар пытсэтын пукиз. Вить мешок изыны нуэм но – пызез чакламзы мында потымтэ…. Тятяе, тодӥсько, ӧй лушкасал – туж честной, но мукетъёслы оскись вал. Мон вордскем берегес тюрьмае шедиз. Туж шумпотылӥ кытысь ке бертылэмезлы. «Кирпич» чай вайылэ вал, солэн емыш но тысь шӧмыз ымам кылемын.
- Тодэм потэ ни, кызьы артистэ мыноно кариськиды…
- Школаез йылпумъякум, зарни медальлы кыскисько вал, но одӥг запятоен сэрен сочинениен «4» басьтӥ. Ижевске вазьгес мыноно вал: Ленинградысь Римский-Корсаков нимо крезьгуро училищее удмурт студия люкало. Экзаменме умой сётӥ ке но, мыныны уг ӧдъяськы ни вал: ӵапак атае кулӥз. Но визьмась шедиз, Глазовысь культура удысын отделын ужасьёс индылӥзы: кызьы озьы, сыӵе городэ шедьыса – дунтэк дышето – уд мыны?
Кызьы дышетскысал ай? Весь ужай, нырысь сторожын, собере – нылпиослы йӧл сиён дасян кухняын. Флягаосын выроно вал, но мон секыт ужлэсь ӧй кышка, дышемын бере. Тау дышетӥсьёсмылы но: милемлы, удмурт гуртысь лыктэмъёслы, вылӥ культура сётыны тыршем сяна, доразы нуллыса сюдылӥзы но.
- Азьло гожъямъёсъя, крезьгуро комедиын шудыны тӥледлы уг кельшы вылэм?
- Ленинградын дышетскыкум со озьы потэ вал. Шузияськон выллемъёсыз уг яратӥськы. Котьку но драмаын шудэме потылӥз. Но та ласянь одӥг мастер гинэ дышетӥз, Станиславскийлэн школаезъя. Ми театръёстӥ трос бызьылӥм – Ленинградын соос трос ук. Опералэсь, балетлэсь но ӧм палэнскылэ. Киноосы ӵем ветлӥм, Азалия Всеволодовна Малых ӝуткалляз, «техника речи» нуиз милемын.
- Тӥледын ӵош дышетскизы ук тодмо луэм артистъёсмы…
- Зэм. Пӧламы вал Миша Ворончихин но. Со ми палась ик, Качкашурысь хорын кырӟамезъя ик тодӥсько ни вал.) Сергей Кудрявцев, Геннадий Городилов, Валерий Дёмин Операя но балетъя театре ужаны кариськизы.
- Тӥ отчы ӧд шонтӥське, малы?
- Театрмы музыкально-драматической шуиське вал ай. Таяз мон, выль лыктэм маке, ньылетӥ составын, нош удмуртаз – нырысетӥ интыын. Кудзэ быръёд, валамон ни. Татын но ай, ужаны кутскыса, пыд улысь музъем гылӟе кадь вал. Но мӧйы эшъёсмылэсь юрттыны дась луэмзэс шӧдыса, таӵе куалекъян ортчиз. Тужгес тау карыны кулэ Россиысь калык артистлы Василий Яковлевич Перевощиковлы. Режиссёр сямен но зол ужаз-валэктылӥз. А. Островскийлэн пьесаезъя «Зэмлык умой…» спектакльын Поликсеналэсь туссэ-сямзэ пуктыны вырыкум, шуылӥз: «Эн вунэты: тон али горд сюй кадь ай, тынэсьтыд котьма пӧрмытыны луоно». И. Гавриловлэн «Кезьыт ошмесысьтыз» Жагаез басьтӥ калык артисткамы Васса Кирилловна Виноградова «киысь» (та ролез со нырысь ик шудӥз). Премьера дыръя трос ӟеч кылъёссэ, сӥзёнъёссэ вераз. Мыным удалтӥз рольёсын: кырӟанъёс-эктонъёс юрттылӥзы героиняосме, соослэсь яратӥсь сюлэмъёссэс мургес усьтыны.
Кырӟан – асьме учкись понна ваньмыз: сюлэмдэ усьтон но, мылкыддэ ӧръян-буйгатон но. Кырӟанъёс пыр юри малпамтэ спектакль пуктыны луэ.
- Спектакль возьматыкуды тыл кысӥз ке, мар ужалоды? Кырӟалоды-а?
- Кырӟало. Сыӵе учыръёс вал ни: Башкортостанысь Кильдияр гуртын «Яратон уг пересьмы», Карлыганын «Жингрес сӥзьылэз» пуктыкумы. Тыл тёпак кысэ ке, учкисьёс пӧлын гуж вазе, шулало, но амал шедьто: сюсьтылъёс ӝуато, фонарьёс, керосин лампа шедьто, машина фараен но югдытэмзы вань. Карлыганын юмокысь капчиен потӥм. Геннадий Бекманов пӧламы вал. Баянэн вань крезьгуро номеръёсмес быдэстӥм.
- Актриса луиды шуыса, жалян вакытъёсты чик ӧй вал-а?
- Мар ватонэз – котьма вал: шуом, дэриетӥ, кынмыса машинаез донгакумы, огназы кылем пиналъёсы сярысь малпаку… Но ваньмыз со тӧлӟылӥз, тӧлӟылэ, милемыз туж возьмаллям шуыса шӧдӥськод ке, шумпотӥсь синъёссэс адӟиськод ке. Уж, театр мон понна нырысетӥ интыын вал.
-Ортчем дырлэн глаголэныз вераськиськоды ни…
- Озьыгес луэ. Ог вить арзэ театрын огинтыямгес, вужерынгес улӥ. Арлыд йылэмъя ас пушкад копаськыны кутскиськод. Со пушласянь сюпсе вылэм, висьыны уси… Но, дугды ай, пӧй, ас шорам мукет сямен учко. Мар мон сярысь шуо, кельше-а, пӧрме-а роле, ушъяло-а, курлало-а шудэмме – уг малпаськы ни. Ас сюлэм куараме гинэ кылзӥсько. Таӵе валан мӧйымыса гинэ лыктӥз. Табере егитъёсты но дышетӥсько: шумпоты, мар тыныд сётэмын та нуналэ, та минутэ. Ачим но шумпотӥсько. Мон олокыӵе бадӟым артистка ӧвӧл, но тау Инмарлы – дуннее вордэм, мазэ ке но сётэм. Мон но кызьы быгатӥ, лэсьтыны турттӥ.
- Валентина Михайловна, нош черке тӥ пыраськоды-а?
- Пырасько. Библиез лыдӟыны выри. Выль сӥзёнэн тужгес но тодматски. «Наука разума» шуиськись огазеяськонэ ветлылӥ, отын дунне кылдэм сярысь вераллязы. Улон-вылонмы сярысь со выль малпаськон ӧр сётӥз.
- Соин ик «Огшоры учырын» выль мылкыдын ужады, озьы-а?
- Бен. Спектаклез егит режиссёр пуктӥз. Ымез уг пытса, вераммес кылзэ. Бадӟым осконмы вал солы. Жаль, театрамы кема ӧз возиськы.
Татын – пудо гидын – Валэз шудӥ. Животъёс ке но, адямилэсь ӟечгес валало: вордсконо нылпиез утёно. Но пудолэн номыр каремез уг луы улонын адями кузёяське. Мыдлань малпанэныз ваньзэ сӧре, куашкатэ, инкуазез быдтэ.
- Артист луон – секыт-а?
- Секыт, уд ке валаськы пьесалэсь пуштроссэ, режиссёрлэсь мар малпамзэ. Озьыгес луиз «Эн кушты монэ, туганэ» лирической драмаен. Темаез туж чебер, материалэз бадӟым. Но режиссёр фантасмагорие «сьӧлтаськемен», пумзэ валаны ӧз луы ни…
- 7-тӥ феврале – Удмурт театрлэн 75 аръем юбилеез. Кыӵе мылкыдды?
- Театрамы туж кезьыт. Гужемозь ужалом на, собере тупатъян ужъёс кутскозы. Театрлэсь азьпал дырзэ адӟыны уг луы. Возёзы на-а милемды?
Вераськонэ пыриське Россиысь дано артистка, Удмуртиысь калык артистка Валентина Загуляева.
- Зэмзэ но, туннэ нуналэн гинэ али улӥськом. Дӥськутмес-дэреммес уг выльдо ни. Фонограмма вань, но быдэсак рос-прос концерт сётэммы уг луы – база ӧвӧл.
Источник:
Меняйло В. М. Кӧттырымон ӧй шуды на... / В. М. Меняйло ; записала Т. Чернова // Удмурт дунне. - 2006. - 27 янв. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
