Мельникова Ольга Михайловна

Материал из Воршуда
Перейти к навигацииПерейти к поиску

Пӧзись ошмес[править]

Melnikova.jpg

Удмурт кун университетысь Удмуртилэн историезъя, археологияя но этнологияя кафедраын 30-тӥ арзэ тырше Ольга Мельникова. История наукаосъя доктор берло дыре бадӟым саклык висъя фин-угор калыкъёсты эскеронлы. Ӟеч тыршемез пусъемын «Россиысь вылӥ тодон-валан сётон удысысь дано ужась» нимын.

Кылем даурысь адями

- Аслам пиналъёсылы верасько: вордски мон адями космосэ лобӟемлэсь азьло, - серекъяса веранзэ мытэ Ольга Михайловна. - Выжыея Шарканысь луисько. Муми Маргарита Игнатьевна отысь вал, нош буби Михаил Васильевич Кудрявцев вордскемын Можга ёросын. Кыкназы но соос Ижысь пединститутын дышетскемын, кыкназэс ик ужаны ыстӥллям Шаркан черкогуртэ. Анае вань улонзэ Шарканысь шор ёзо школаын математикая урокъёсты нуиз, жаляса верано, кӧня ке ар талэсь азьло улонысь кошкиз. Атае дышетскемезъя биолог вал. Чик ӧвӧл шуэмысь кӧня ке нунал школаын ужамын ик, отӥяз комсомоллэн районысь комитетэзлэн секретарез вал, роноын ужамын, тужгес кема тыршиз народной контрольлэн председателез луыса. Анай-атае котькыӵе ужрадэ мыло-кыдо пыриськылӥзы, котыр ласянь азьветлӥсьёс вал. Сыӵе сямзы нылпиоссылы но паласькиз.

Семьямы бадӟым ик ӧй вал: муми-буби, мон но сузэре. Та вакытэ Шарканын атаймы гинэ улэ. Сузэре Ленинградысь ветеринарияя институтэз йылпумъяз. Дышетскемез бере Псков улосэ ужаны ыстӥзы.

Ачим сярысь ке верано, шаплы, котькыӵе ужрадэ пыриськись пинал вал. Пионеръёслэн дружиназылэн председателез, комсомоллэн школаысь комитетэзлэн секретарез, пичиысен ик ваньмыз понна кыл кутыны дышем мурт. Бадӟым классъёсын дышетскыкум, пӧртэм ёросъёсысь ас ёзо эшъёсыным кусып вози.

Шуныт кылъёс вераме потэ Шарканысь дышетӥсьёслы. Трос тодон-валан сётӥз нырысетӥ дышетӥсе Алевтина Васильевна Чунарёва. Ӟуч кылъя но литературая урокъёсты нуись Галина Ивановна Перевозчикова малпанъёсмес шара но шонер вераны дышетӥз. Улонын шонер сюрес бырйыны юрттӥз историез нуись Лидия Георгиевна Аксёнова. Пиналъёсын ӵош школа музее материалъёс люкалляй. Со бордысен ик кутскиз кадь шаертодонэз гажан мылкыды.

Вашкалазэ улӟытӥсьёс

- Школаез «витьёсын» гинэ йылпумъяса, УдГУ-ысь историяя факультетэ нокыӵе шугъяськонъёстэк пыри. Группаысь эшъёсыным тросэныз школаысен ик тодмоесь вал бере, туж ӝог эшъяськимы. Гурт пиналъёс город улонлы шугенгес дышо ке, мыным капчигес вал. Песянай-песятае Ижын улӥзы. Пенсие потэм песятаймес Калык просвещениея министерствое ужаны ӧтизы, нош песянае вуз каронын ужаз. Мон соос дорын улӥ.

Асме шудо адямиен лыдъясько, угось ялан ӟеч адямиосын пумиськисько. Нырысетӥ курсысен ик синмаськи Римма Дмитриевна Голдиналы, Владимир Емельянович Владыкинлы, Мария Михайловна Мартыновалы, Василий Евгеньевич Майерлы но мукет дано дышетӥсьёсмылы. Нырысетӥ курсысен археологияя практикае ветлэммы бере тунсыко потыны кутскиз сюй пушкын бугыръяськыса вашкала арбериосты шедьтон но соосты дышетон. Милям тыршеммы бордысь вашкалаез улӟе. Та практика бере тросэз эшъёсы но археология удысэз бырйизы.

Школаын дышетскыкум кадь ик, университетысен но котькыӵе ужрадэ мыло-кыдо пыриськи, Ленин стипендия басьтылӥ, историяя факультетысь комсомоллэн комитетаз вал, студентъёслэн наукая огазеяськонэнызы кивалтӥ. Студент улонмы туж шулдыр вакытэ тупаз, соку умой азинскиз наукаен вырись студентъёслэн огазеяськонзы.

Пӧртэм улосъёсын бадӟым конференциос ортчылӥзы. Ижевске но уно университетъёсысь студентъёс вуылӥзы. Университетлэн 1970-тӥ арын мытэм ӟеч сямыз туннэ но кылемын: Уралысь но Поволжьеысь городъёсын черодэн-черодэн ортчытъясько археологияя конференциос. Мон но тросаз выступать карисько.

Ижысь студентъёслы лекциос лыдӟизы Москваысь, Санкт-Петербургысь, Пермьысь но мукет городъёсысь туж кужмо профессоръёс. Совето Союз вакытэ студентъёсты тазьы визьноданэз туж шонерен лыдъясько. Университетысь зэмос специалистъёс потылӥзы. Со вакытэ тодматскыны кылдӥз Совето Союзысь туж дано археологен Владимир Фёдорович Генинген. Удмурт шаер понна но со трос лэсьтӥз: шаертодонъя музейын кивалтӥсьлэн воштӥсез вал, 1950-тӥ арын археологияя нырысетӥ экспедиция радъяз, лымшор ёросъёсысь синпелетъёсты эскериз. Бӧрысь ужаз Киевысь археологияя институтын.

Азьлань гинэ

- Сюй пушкын кема бугыръяськыны луэ, монэ сюлмаськытӥз мукетыз ужпум - шедьтэм арбериез калык доры вуттон. Соин ик дышетсконме азьланьтыны малпай. Владимир Генинг ӧтемен, Киеве вуи. 1983-тӥ арын, университетэз горд дипломен йылпумъяса, Украинаысь археологияя институтэ дышетскыны пыри. Аспирантураын куинь ар тодон-валан люкатозям, улон воштӥськиз, политикаын огыр-бугыр луиз. Мынам дышетӥсе, история наукаосъя доктор В. Генинг соку шуиз: кандидат диссертацидэ Киевын утьыны секыт луоз. Аспирантураез йылпумъяса, Ижевске бертӥ, Удмурт кун университетын лекциос лыдӟыны кутски. 1989-тӥ арын кандидат диссертациме Москваысь М. Ломоносов нимо университетын ути.

Берло дыре Украинаысь эшъёсыным но кусыпъёсы тӥяськизы. Азьвыл аръёсы Россиысь вань археологъёс, 3 арлы одӥг пол Киеве научно-практической конференцие люкаськылыса, бадӟым ужпумъёсты эскерылӥзы. Берлоез пумиськонмы 2012-тӥ арын радъяськиз.

Визьмо кузпалъёс, визьмо нылпиос

- Кандидат диссертациме утеме бере бызи, - шуэ Ольга Михайловна. – Кузпалы Сергей Львович Мельников вордскемын Сарапул городын. УдГУ-ысь историяя факультетын дышетскиз. Визь-кенеш люкан куспаз армие ветлӥз, со но котькыӵе ужрадэ мыло-кыдо пыриськылӥз, эшъёссэ но сьӧраз валтыны быгатылӥз. Егит муртлэсь сэзь сямзэ кивалтӥсьёс синйылтӥзы. Со вакытэ университетысь тужгес усто студентъёслы Ленинградысь университетын дышетскыны луонлык сётылӥзы. Сергей Львовичез но отчы ысто вал, но со ӧз мыны. Мельниковъёслэн семьяязы 4 пинал будӥз, Сергей - бадӟымез. Атайзы улонысь вазь кошкемен, анайзылэн нырысетӥ юрттӥсез вал студент Сергей. Ленинградын дышетскемез туж потӥз ке но, 3 пиналэн анайзэ ӧз кельты.

Дышетсконзэ йылпумъяз гинэ, егит специалистэз Ижысь соку гинэ усьтӥськем 81 номеро школалы директоре пуктӥзы. Ӟеч организатор вал ке но, вань сюлмыныз история понна висиз. 3-4 ар школаын чидамез бере УдГУ-ысь Россиысь историяя кафедрае уже интыяськиз. Та вакытэ 19-тӥ даурлэн историезъя, Россилэн историезъя валтӥсь специалист, доцент, история наукаосъя кандидат луэ, трос аръёс ӵоже обществознаниен ЕГЭ-я элькун комиссиен кивалтэ.

1990-тӥ арын Сергей пимы вордӥськиз. Милям дорамы трос книгаосмы. Ӝытъёсты книгаос сьӧрын ортчытъяськомы бере, пимы 3 аресысен лыдӟиськыны кутскиз. Удмурт шаермес гажа. Школае мынэмезлэсь азьло ик бубиныз ӵош город транспортэн ворттылон сяменыз быдэс Ижевскез котыртӥз. Доре бертэмзы бере нимысьтыз карта лэсьтылӥзы, отчы вань памятникъёсты но городлэсь дано интыоссэ пусйылӥзы. Дышетскиз 86-тӥ лицейын. Котыр ласянь визьмо. СТС каналын пиналъёс понна ортчылэм «Самый умный» передачае но 3-4 пол пыриськиз. 11-тӥ классын дышетскыкуз, обществознаниея Россиысь олимпиадаын вормиз но Москваысь Калык кусыпъёсъя кун институтэ (МГИМО) дышетскыны пыриз. Студент дыръяз «Огонёк» журналын ужаз, собере аспирантураез йылпумъяз, пӧртэм кунгожсьӧр кылъёсты тодэ. Та вакытэ Сербиысь Российско-сербской гуманитарной центрын ужа.

1999-тӥ арын Анна нылмы вордӥськиз. Декретын пукон аръёсы токма медаз ортче шуыса, докторантурае дышетскыны пыри. Пиналмес пичиысен ик режимъя улыны дышетӥмы. 10 часын кӧлыны выдтылӥмы, собере мон эшшо 4 час тодон-валанме будэтон бордын пукылӥ. Пичи Анямес будэтыны юрттӥзы воргоронъёсы: кузпалы но пие, гужемъёссэ - песянай-песятайёсыз. 2004-тӥ арын доктор диссертациме ути.

Нылмы та вакытэ 11-тӥ классын дышетске. Пичиысен сое художественной гимнастикае нуллыны кутски. Мугорзэ кыдатӥз нуналлы быдэ, понедельникез вератэк, соку шутэтскылӥмы. Спорт милемлы котыр ласянь юрттӥз. 5 аресысен со пӧртэм городъёсын ортчылӥсь ӵошатсконъёсы анай-атайёстэк ветлӥз ини. Шумпотӥсько, 13 ар гимнастикае ветлэмез юнме ӧз луы, кылем арын художественной гимнастикая спортъя мастерлэсь куронзэ быдэстӥз.

Йыр висён

- Пӧртэм удысъёсын сямен ик, археологилэсь историзэ дышетонын но бадӟым шуг-секытъёс пумиськыло. 2000-тӥ арозь сое нимаз удысэн ӧз лыдъяллялэ, дышетскон книгаос ӧй вал, кытын но отын печатлам пичи очеркъёсты гинэ пумитаны кылдылӥз.

Выльдӥськон вакытэ археологиез дышетонлы тросгес саклык висъяськыны кутскиз. Москваысь, Санкт-Петербургысь, Кемеровоысь но мукет интыосысь археологъёсын кусыпъёсмы юнмазы. 2006-тӥ арын Новосибирскын ортчем съездэ пыриськи.

Со дырысен уно аръёс ортчизы. Шаерамы трос гинэ история наукаосъя докторъёс. Кинлэн ке нимыз калык пӧлын вӧлмемын, нош мынамез тодмо луэ студентъёс, преподавательёс но учёнойёс пӧлынгес. Монэ сюлмаськытэ археологиысь тодон-валанъёсты калыклы вуттон. Археологияя нимысьтыз книгаос али но трос ӧвӧл, нош студентъёсты кызьы ке визьнодано. Куронъёс но ялан воштӥсько. Студентъёс доры лыктэмлэсь азьло Интернет вотэсын трос бугыръяськоно луэ. Бадӟым саклык висъясько историен тодматон амалъёслы. Историяя, археологияя но этнологияя кафедра берло дыре юн кусып возе университетысь мукет факультетъёсын но шаерысьтымы удмуртлыкез ӝутон удысын тыршисьёсын. Трос визь-кенеш сётӥзы удмурт филологияя факультетлэн азьвыл деканэз Любовь Фёдорова, али деканэз Наталья Кондратьева, нациосын ужан политикая министр Лариса Буранова, Ижысь удмурт кылъя дышетӥсьёс. Берло дыре котыр ласянь юрттэ Историяя, кылъя но литературая Удмурт институтлэн директорез Алексей Загребин. 2013-тӥ арын вузъёсын выльдӥськонъёс ортчизы. Вылӥ верам адямиосын кенешыса, магистратураын дышетскисьёслы шаертодонэз дышетонъя нимысьтыз программа гожтӥ.

Вамыштоно ке, мед кылёз пытьы

- Интыям пукыны уг чидаськы, котькытчы нырме чуртнасько, кылме верасько. Магистратураын дышетскисьёсын сяна, бакалавръёсын ужасько. Алексей Загребинэн валче ужаны кутскыса, пӧртэм проектъёсы пыриськиськомы. Та вакытэ ужаськомы «История но Удмуртиысь историкъёс 1920-тӥ-1930-тӥ аръёсы: эскеронъёс но кивалтон» проект бордын. Валаны тыршиськомы со вакытысь археологилэсь азинскемзэ, кивалтон удысын ужасьёс тодосчиослы юрттӥллям-а яке пыд пуктыны выриллям-а. Пӧртэм валэктонъёс шедьтэмын, ваньзэ радъяны тыршиськомы. Эскерон уж борды студентъёсты но кыскыны выриськомы.

Университетлэн улоназ мыло-кыдо пыриськем сяна, шаерысьтымы пӧртэм комиссиослэн ёзчизы луисько. Кусып возисько архивын ужасьёсын, Удмуртиысь архив ужъёсъя комитетлэн, памятникъёсты утёнъя огазеяськонлэн ужъёсазы пыриськисько. Арлы быдэ Россиын «Егит архивист» конкурс ортче. Удмуртиысь пиналъёслэсь ужъёссэс отчы ӵектӥськомы. Ёросъёсысь пинал шаерчиосты но син азямы возиськомы. Тужгес устоосызлы, УдГУ-э пырыкузы, юрттӥськомы.

Ижысь Генерал юртлэн учёной советэзлэн ёзчиез луисько. Кылем арын студентъёс пӧлын М. Горький нимо парклэн историезъя юалляськон ортчытӥмы, туэ малпаськомы Ижысь азбаръёсъя.

Университетын ортчытъяны кутскимы школаосын дышетскись пиналъёс пӧлын шаертодонъя олимпиада. Таяз суббота нуналэ но УдГУ-э люкаськозы пӧртэм ёросъёсысь 7-тӥ-11-тӥ классъёсын дышетскись пиналъёс. Визьзэс эскерем сяна, университетэн тодматомы, музеямы пырталомы. Шумпотӥськомы, олимпиадаын вормисе потэмъёс пӧлысь тросэз милям студентъёсмы луо.

Егит мылкыд

- Ас вакытаз анай-атае монэ туж быгатыса визьнодаллям. Дыр вуэмын табере со тодон-валанъёсме нылпиослы пыӵатыны. Ачим но мон 4 аресысен лыдӟиськыны кутски. Туннэ кадь ик тодӥсько на Шаркан библиотекаысь нырысетӥ книга басьтэмме. Школае уг ке но ветлӥськы на вал, «Сестрица Алёнушка и братец Иванушка» книгаез лыдӟи. Туж кышкаллямы библиотекаын ужасьлэсь книгалэн пуштросэз сярысь юалляськемезлэсь. Амалтэк лыдӟиськись луод. Та дыре но книгаос сьӧрын трос пукисько, Интернет вотэсын но ялан бугыръяськоно луэ. Студентъёсын бер ӝытозь ужасько бере, гурт котырысь вань ужъёсты вазь ӵукнаосы быдэстыны тыршисько. Нуналлы окмымон сиён пӧзьтӥсько.

Вань жадемме буйгатӥсько сад-бакчаям. Вазь тулыс ик удъёс будэтон борды басьтӥськисько. Асьмелэн бакчаямы но, Шарканын улӥсь атаймы доры но (отчы мон 2 арнялы одӥг пол бертасько) мерттӥськиськомы. Сӥзьылаз емыш бичасько, сылалтӥськонъёсын вырисько. Городын улон коркамы котырез утялтон но чеберъян сярысь сюлмаськисько, ТСЖ-лэн правленияз пырисько.

Доре бертыса, уж сярысь вунэтыны тыршисько, но... Одӥг юртын кык историкъёс уло бере, туала улон сярысь кенешонъёстэк уг луы. Сыӵе дыръя нылмы милемыз дугдытэ, историяя кафедралэн кенешонэз, пе, нош ик кутскиз. Ваньмон дыр шедьыку, пӧртэм ёросъёстӥ, городъёстӥ но странаостӥ ветлыны яратӥськомы. Шаермес сяна, быдэс дуннеез котыртӥмы ни, шуыны луоз. Кунгож сьӧры вуылыкумы, пыдын ветлӥськомы, вань кылэм-адӟеммес гожтыса кельтӥськомы. Синмаськымон интыос туж трос ке но, Удмурт шаермылэсь дуноез номыр ӧвӧл кадь. Нылпиосмылы но Атыкай музъеммес яратон мылкыд пыӵатӥськомы. Пимы шуиз ни, Россилэн палэназ улыны уг быгаты.

Кемалась ик ӧвӧл мыным 55 арес тырмиз. Та лыдпус мылкыдме ӧжытак куашкатӥз кадь, пенсие, пе, потон дыр вуэмын, нош мон асме университетэз али йылпумъям студент выллем шӧдӥсько ай, мылкыды дурыныз пӧзе.

Источник:

Мельникова, О. М. Пӧзись ошмес / О. Мельникова ; записала В. Емельянова // Удмурт дунне. - 2016. - 22 янв. - С. 10, 15. - (Тӧр шорын).

За предоставление материала выражаем огромную благодарность редакции газеты "Удмурт дунне"